Wekiraja wayuu sünain tü Wiwüliakat
1. ¿Jamüshii eeka na nnojoliikana ekirajüin wayuu sünain tü Wiwüliakat?
1 Eeshii na nnojoliikana ekirajüin wayuu sünain tü Wiwüliakat sutuma wainmain maʼin tü kasa naaʼinrakat. Shiimainpajaʼa aʼyatawaain maʼin ekirajaa wayuu: ekirajaainjana waya nümaa, wakaaliinjüinjachi nia süpüla eejiraain nia sümaa tü kasa ooʼulakünakat aka naaʼin. Naashin Pablo shia niʼyataainjatka maʼin amaa nikirajüinjanain na Tesalónicajeʼewaliikana sünain tü shiimainkat (1 Tes. 2:7, 8). ¿Kasa waaʼinrüinjatka süpüla wekirajüinjanain wayuu sünain tü Wiwüliakat?
2. Süka alin maʼin Jeowa wapüla ¿kasa wakatalüinjatka apüla kaʼi?
2 Wakatala kaʼi süpüla waʼyataain nümüin Jeowa. Wainma tü kasa waaʼinrüinjatkat waʼwaajapa Maleiwa. Akatatshii waya kaʼi semaanawai süpüla woutkajaainjanain, waküjüinjanain pütchi, waashajeʼerüinjatüin tü Wiwüliakat otta süpüla woʼuraajüin. Jülüja waaʼin tüü: Jülüjüshi saaʼin wanee wayuu chi suʼwayuusekai, jaʼitairü kupaashaatain shia. Müinjatüjaʼa neʼe nukuwaʼipa Jeowa watuma süka alin nia wapüla, akatalüinjana waya kaʼi süpüla waʼyataainjanain nümüin (Éf. 5:15-17; 1 Juan 5:3). Wekirajüinjatü tü wayuukalüirua sünain tü nünüikikat Maleiwa, tia shia soʼutku tü waaʼinrüinjatkat maʼin sünainpünaa tü waʼyataainkat nümüin Maleiwa naashin Jesuu (Mat. 28:19, 20). Jülüjüle waaʼin tia, wounteerü wekirajüin wayuu sünain tü Wiwüliakat.
3. Eesü tü kaʼi isaʼwaijeetka wachiki süpüla wekirajüin wayuu, ¿kasa wayuu tü waaʼinrüinjatka sülatüle tia wamüin?
3 ¿Jama nnojorüle wountüin wakatalüin kaʼi sutuma ayuulin waya, waʼyataale jee shiale sutuma wanee waʼyataain suluʼu tü outkajaaleekat? Eeshii na ekirajakana wayuu nepialuʼu sutuma ayuulin naya. Eeshi aküjülii pütchi ekirajakana süka computador jee ayamaajaka süka nnojoluwalin jimatüin naya. Eeshii na wawalayuu achuntakana kaaliinwaa nümüin wanee wawala süpüla nikirajüinjachin wanee wayuu sujuuna tia kaʼi nnojoluinjachika oʼu nia.
4. ¿Kasa anasü weʼreetka müleka wekirajüle wayuu sünain tü Wiwüliakat?
4 Talatsü maʼin naaʼin Pablo sutuma niʼyataain sünain nikirajüin wayuu sünain tü shiimainkat (Aluw. 20:35). Talatsü naaʼin Pablo nümaa Jeowa sutuma niʼrüin kasa anasü sünainjee tü niʼyataainkat chaa Tesalónica (1 Tes. 1:2). Wekirajüle wayuu sünain tü Wiwüliakat mayaapejeʼe kupaain maʼin waya, talateerü maʼin waaʼin sünain aʼyatawaa nümüin Maleiwa.