Paaʼinrajatka süpüla pikirajaʼawalin sünain tü Bibliakat pümüiwaʼa
¿KAPÜLEESÜCHE pümüin pikirajaain sünain tü Bibliakat pümüiwaʼa semaanawai? ¿Akuʼlajaʼawaisüche paaʼin sünain? Alatawaisü tia wamüin wapüshuaʼa. Wainma tü kasa waaʼinrawaikat soʼukaiwai maʼaka saaʼin wooʼojuinjanain. Eesüjaʼa sukuʼlajaale waaʼin jee shiale nnojorüle wooʼojeein. Anapejeʼe waaʼin waaʼinrapa shia. Meeria wakuwaʼipa wekirajaʼawaire wamüiwaʼa. Müshii nüsamatakai waaʼin Jehová süka tü Nünüikikat, tü makalü aka saaʼin wüin (Éf. 5:26). Anuu waneirua kasa paaʼinrajatkat:
Pükatala kaʼi jee oora pikirajaainjachika oʼu. Wanee kasa choʼujaaka maʼin naaʼinrüinjatüin wanee anoujashi, shia nikirajaain sünain tü Bibliakat nümüiwaʼa (Filip. 1:10). Suulia motuin paaʼin tü kaʼi pikirajaainjachikalü oʼu, püshaja shia eere jaʼyashiin maʼaka saaʼin sünain wanee cartelera sünain tü neverakat jee shiale piʼitaain wanee alarma suluʼu püserulaatse süpülapünaa pikirajaain.
Piyaawata saaʼu jeʼtsüinjatüin pümaa sünain ekirajawaa. Eeshii na kamalainkana amüin kamaʼain naya sünain ekirajawaa, eetaashii na kamalainkana amüin nekirajaain motsoʼowai. Piyaawata saaʼu jeʼtsüin tü oora pikirajaweekalü oʼu jee shiale pikirajaain motsoʼowai. Nnojorüle paaʼin sünain ekirajawaa soʼu tü kaʼi püneekakat puuʼulaka paaʼinrüin shia soʼu poloo minuuto. Anasü paaʼinrüle tia suulialeʼeya nnojoluin pikirajaain. Eesüjaʼa pikirajaweere sooʼomüin süchikijee sülatüin poloo minuuto (Filip. 2:13).
Püneeka palajana tü pütchi pikirajaainjatkalü anain. Nnojorüle paaʼinrüin tia, püchajaweerü neʼe tü pikirajaainjatkalü anain soʼu tü oora püneekakat süpüla ekirajawaa (Éf. 5:16). Anasü püshajüle tü pütchi pikirajaweekalü anain. Püsakirüle paaʼin sünain wanee kasa pütüjaweekalü aaʼu, eesü süpüla püshajüin shia. Eesüjaʼa jülüjale paaʼin süchiki wanee kasa pütüjaweekalü aaʼu pikirajaapa, püshaja shia süpüla pikirajaain sünain mapa.
Eesü süpüla puʼwanajaain tü kaʼi jee tü oora pikirajaweekalü oʼu. Nnojotsü mojuin puʼwanajaainjatüle shia. Shia anaka aluʼu pikirajaale semaanawai. Eesüjaʼa puʼwanajaainjatüle tü pikirajaainjatkalü anain otta jeʼtsüinjatüin pümaa sünain ekirajawaa.
Aneerü pukuwaʼipa pikirajaʼawaire waneepia pümüiwaʼa sünain tü Bibliakat semaanawai. Aleeweeshi pia nümaa Jehová, aneerü tü kasa püneekakat jee jimateerü maʼin paaʼin (Jos. 1:8).