Yapa waya sümaa talatüin waaʼin süpüla tü outkajawaakat eere sotuin waaʼin ouktüin Jesuu
1. ¿Kasa weeʼiyatüinjatka süpülapünaa tü outkajawaakat eere sotuin waaʼin ouktüin Jesuu?
1 Aainjüneerü tü outkajawaakat eere sotuin waaʼin ouktüin Jesuu maatteoʼu 26, soʼu tü kashikat maatsoʼu. Süpülapünaa tia outkajawaakat, eesü süpüla weeʼiyatüin talatüin maʼin waaʼin sutuma jülüjüin waaʼin tü kasa anasü naaʼinrakat Jeʼwaa süpüla nuʼtteʼerüin waya (Is. 61:10). Yapeena waya süpüla kaʼikat tia, müleka talatüle tü waaʼinkat maaʼulu yaa. ¿Jamüshii yapeenaka waya? Joʼu wekirajaai sünain tia.
2. ¿Kasa waʼyataainjatka aaʼujee süpüla wekeraajüin tü kasa choʼujaakat sünain tü outkajawaakat eere sotuin waaʼin ouktüin Jesuu?
2 Tü kasa choʼujaakat sünain tü outkajawaakat. Tü ekawaa aipaʼajatkat nutuma chi Senyotkai, shia wanee kasa mapüleeinjatü jee kojutüinjatü maʼin shia. Süka keeʼireein waaʼin aneein sukuwaʼipa süpüshuaʼa tü kasa choʼujaakat sünain, yapa shia watuma süpüshuaʼa (Prov. 21:5). Anainjatü tü miichi aneekünakat süpüla tia outkajawaakat, wuleinjatü shia jee keraatüjülüinjatü shia süpülapünaa suʼttüin otta müsia anainjatü tü oora aneekünüinjatkat. Anainjatü süneekia watuma tü wiinokot otta tü pan maʼakakat soolojia. Chi wawala ekirajüinjachikai, ekirajaainjachi maʼin nia sünain tü pütchi nikirajüinjatkalü anain, na jülüjakana aaʼin na antüshiikana otta na alatirüinjanakana tü wiinokot sümaa tü pankat, nayaawatüinjatü saaʼu tü naaʼinrajatkat. Kettaatüjülüinjatü süpüshuaʼa tia aaʼinnajatkat sünain tü outkajawaakat. Yapeena waya süpüla tia outkajawaakat süka talatüin waaʼin sutuma woʼtteʼennüin (1 Ped. 1:8, 9).
3. ¿Kasa waaʼinrüinjatka süpüla yapain watuma tü waaʼinkat süpüla tü ekawaa aipaʼajatkat nutuma chi Senyotkai?
3 Yapa putuma tü paaʼinkat. Choʼujaashaatasü maʼin yapain putuma tü paaʼinkat (Esd. 7:10). Müle shia watuma, wayaawateerü saaʼu sujutü tia outkajawaakat. Süpüla tia, waashajeʼerüinjatü suluʼu tü Wiwüliakat tü pütchi aashajeʼennajatkat soʼu tü outkajawaakat eere sotuin waaʼin ouktüin Jesuu. Aashajaainjana waya suluʼu waaʼin süchiki tü nukuwaʼipakat Jesuu süpülapünaa nuʼutünüin aaʼin. Waaʼinrüle tia, washateerü nukuwaʼipa Jesuu (Gal. 2:20).
4. Sünainjee tü kasa anasü eekat sutuma naakajirüin waya Jesuu, ¿jarat tü talatakat maʼin atuma paaʼin?
4 Sükajee naapajiraain nikii Jesuu süpüla ouktaa, niiʼiyatüin anain Jeʼwaa süpüla aluwatawaa, taashishii waya suulia waainjala jee suulia tü ouktaakat, anajiraainnapa waya nümaa Maleiwa otta kateerü woʼu waneepia nutuma Jeʼwaa (Col. 1:21, 22, 1 Juan 2:2). Waashajaale suluʼu waaʼin süchiki tü kasa naainjakat Jesuu wapüleerua katsüinjeerü tü waaʼinkat sutuma, wekeraajeerü tü wanüiki wamakat paala nümüin Jeʼwaa wanaa sümaa woutiisain waya otta ayateena waya woʼunüin süchiirua nukuwaʼipa Kürisüto (Mat. 16:24). Talateerü maʼin tü waaʼinkat müleka yapale waya süpüla tü outkajawaakat eere sotuin waaʼin ouktüin Jesuu waaʼu jee woʼunüin sünain.