Asakinnaka Anain

◼ Shikirajüle wanee anoujüsü nümaa wanee wawala soʼuluʼu shipia wanee wayuu, ¿kekiyaalajüinjatche shia?

Suunejaale wanee anoujüsü wanee wawala sünain ekirajaa wayuu, kekiyaalajüinjatü shia (1 Cor. 11:3-10). Müsü tü rewiisütakat Aapiria Wayuu ojuʼitaka juulioʼu 15, 2002 suluʼu süpanaka 27: «Shikirajüinjatüle wanee anoujüsü wanee wayuu sünain tü Wiwüliakat sümaa yalain sümaa wanee aküjüi pütchi woutiisakai, kekiyaalajüinjatü shia. Süka jamüin, niainjachi ekirajaaka wanee toolo tia pütchikat maʼaka saainjünüin suluʼu tü outkajaaleekat». Jaʼitairü ekirajüin shia suluʼu wanee miichi, soʼuluʼu shipia wayuu otta eepünaale shikirajüin, kekiyaalajüinjatü shia.

Shiiwaʼarüle suwaraijaain wanee wawala saaʼu wanee wayuu süpüla shikirajüin shia sünain tü Wiwüliakat, nnojotsü choʼujaain kekiyaalajüinjatüin. Jaʼitairü süküjüinjatüle sümüin wanee wayuu tü saaʼinrajatkat süpüla shikirajaain sünain tü Wiwüliakat jee shiale wanaa sümaa süküjüin sümüin tü sümakat wanee karaloukta aashajaaka süchiki ekirajaa wayuu sünain tü Wiwüliakat. Nnojoishii ekirajaamaatüin sünain tü Wiwüliakat na wayuu aashajaanakana amaa soʼuluʼu nepia. Makalaka nayaawatüinjatüin saaʼu na wawalayuukana joujainjatüin kekiyaalajüin wanee anoujüsü.