Wakaaliinja na woʼuyaajanakana
1. ¿Kasa waaʼinrajatka süpüla washatüin nukuwaʼipa Pablo waküjapa pütchi nümaa wanee wawala?
1 Nümaale chi Aluwataaushikai Pablo na anoujüshiikana, nükaaliinjüin naya süpüla nachecherüinjatüin naaʼin sünain anoujaa (Roma 1:12). Akaʼaya wayakana, akaaliinjiraainjana waya namaa na wawalayuu waküjakana amaa pütchi otta watütüleʼerajiraainjatüin waaʼin. Eeshii süpüla yootuin waya nümaa chi woʼuyaajanakai süchiki tü kasa jalouikat wamüin sünain aküjaa pütchi.
2. ¿Kasa waaʼinrajatka süpüla nnojolinjachin mmoluin seema aküjaa pütchi chi woʼuyaajanakai? ¿Jamüsü waaʼinrajatka tia?
2 Wakaaliinja chi woʼuyaajanakai. Eeshii waneeinnua wawalayuu mmotka seema aküjaa pütchi. Tia, jaʼyasü saaʼu nanüiki otta noʼupünaa. Nnojoleena mmoluin naya watütüleʼerüle naaʼin süka pütchi analuʼut. ¿Kasa maa waaʼinrajatka nayaaluʼu? Jamüshijaʼa wanee anoujüshi alapalaakai naaʼu na wawalayuukana, nüküjawalin nümüin chi nümaakai sünain aküjaa pütchi mmoluin nia seema aküjaa pütchi makalaka nuʼuraajüinjachin nümüin Jeʼwaa. Müshi wanee wawala: «Akulemeraainjachi pia süpüla analüin paaʼin. Eesü isawaire wachiki wakulemeraain süka mmoluin maʼin waya makalaka woʼuraajüinjanain nümüin Maleiwa». Eere wanee kasa akaaliinjaka waya süpüla nnojoliinjanain mmoluin waya seema aküjaa pütchi, waküjüinjatü achiki nümüin chi woʼuyaajanakai.
3. ¿Kasa waashajaainjatka achiki nümaa chi woʼuyaajanakai sünain aküjaa pütchi?
3 Tü waashajaainjatkalü achiki nümaa. Waküja nümüin chi woʼuyaajanakai jaralüin tü pütchi kamalainjeetkat sümüin wayuu jee jaralüin tü kasa yooteekalü atuma saaʼin wayuu (Prov. 27:17). Wouyantüinjanale eemüin wanee wayuu ekirajaweekai sünain tü Wiwüliakat, waküja nümüin chi woʼuyaajanakai kasainjatüin waashajaain achiki nümaa chia wayuukai otta jamüinjatüin sukuwaʼipa watuma. Kettaapa wekirajüin wanee wayuu sünain tü Wiwüliakat, eesü süpüla waküjüin nümüin chi woʼuyaajanakai tü waaʼinrüitpakat süpüla niyaawatüin saaʼu chi wayuukai tü pütchikat, jamüin waashajeʼeraka wanee wersiikulo nümüin otta jamüin maka sukuwaʼipa watuma nikirajia.
4. ¿Jamüshii wakaaliinjüinjanaka na woʼuyaajanakana sünain aküjaa pütchi?
4 Na anoujüshii eejanakana nükalioʼu Jesuu, aküjüshii pütchi naya otta akaaliinjiraashii naya (Aluw. 11:23; 15:32). Müshijeseʼe ekirajünüin Timoteo nutuma Pablo otta nuluwataain Pablo nia süpüla nikirajüin na waneeinnua süchiki tü kasa nütüjakalü apüleerua (2 Tim. 2:2). Wekirajüle na wawalayuukana süchiki tü watüjakalü apüleerua, tüteena naya sünain aküjaa pütchi otta talateerü naaʼin naaʼinrapa tia. Jee müsia, talateechi wamaa Jeʼwaa (Heb. 13:15, 16).