¿Pükaaliinjüin chi püküjakai amaa pütchi?

1. ¿Jamüsü anaka kamaajanale waya sünain aküjaa pütchi?

¹ Nuluwataain Jesuu 70 nikirajüin sünain aküjaa pütchi, «nüjütüin naya [...] sünain piamawalin» (Luc. 10:1). Sutuma naainjüin tia akaaliinjiraashii otta atütüleʼerajiraashii naaʼin sünain aküjaa pütchi. Wojuʼitapa nümaa wanee wawala sünain aküjaa pütchi, ¿kasa waaʼinrajatka süpüla wakaaliinjüin nia?

2. Nüküjapa pütchi chi waküjakai amaa pütchi, ¿jamüsü jülüjüinjatka waaʼin nünüiki? ¿Jamüsü sukuwaʼipa watuma?

² Jülüja paaʼin. Nüküjapa pütchi chi pümaakai jülüja paaʼin tü nünüikikat (Sant. 1:19). Naashajeʼenrüinjatüle wanee pütchi suluʼujee tü Wiwüliakat, paashajeʼera shia suluʼujee Piwiwüliase wanaajiraa nümaa. Piirakaa chi aashajaakai eeshi süpüla niain chi püküjakai amaa pütchi jee niale chi naashajaakai amaa. Jülüjüle paaʼin tü aashajaanakat achiki, eesü süpüla naainjüin tia chi aküjünakai amüin pütchi.

3. ¿Joujainjachi wakaaliinjaka chi waküjakai amaa pütchi?

³ Joujainjana wasouktaka. Niainjachire aküjüin pütchi chi püküjakai amaa pütchi, puuʼulaa naashajaaiwa, paainjüle tia piiʼiyatüin kojutüin nia pümüin (Rom. 12:10). Nnojo püsouktüin wanaa sümaa naashajaain. Motule naaʼin tü nünüikinjatkat jee isale nüchiki asouktaa wanee asakiraa, pükaaliinja nia sümaa nnojoluin puʼwanajaain tü naashajaakat achiki. Ayata paashajaain süchiki tü aashajaanakat achiki (Pro. 16:23; Ecl. 3:​1, 7). Paainjüle tia, kooʼomüinjeerü putuma tü naashajaakat achiki chi püküjakai amaa pütchi (1 Cor. 14:8).

4. ¿Kasa talateenaka atuma waya sünain aküjaa pütchi?

⁴ Süchikijee naküjüin pütchi na 70 nikirajüinkana Jesuu, «aleʼejüshii naya [...] sümaa talatüin maʼi naaʼin» (Luc. 10:17). Eeshii süpüla waleʼejüin sümaa talatüin waaʼin süchikijee waküjüin pütchi wakaaliinjüle na waküjakana amaa pütchi, jülüjüle waaʼin nanüiki otta wasouktüle süchuntünapa wamüin.