Wekiraja sünain tü Wiwüliakat na wayuu moʼusaliikana

1. ¿Jamüsü watüjaaka saaʼu nükaaliinjeein Jesuu wayuu eekai moʼuin?

¹ Nujuʼitajaitpa Jesuu Jericójee, eejana piamashii wayuu moʼusalii. «Senyotkalee, [...] pümüliaja waya», namakalaka nümüin. Shapaasü naaʼin Jesuu soʼutpünaa tia, malaaka sülüʼülüin nükalia süpüla oʼutünaa aaʼin. Mayaainjeʼe müin nukuwaʼipa, nükaaliinjain naya wayuukana (Mat. 20:29-​34). ¿Kasa waaʼinrajatka süpüla wakaaliinjain na moʼusaliikana maʼaka naainjüin shia Jesuu?

2. ¿Jamüinjatü süküjia pütchi namüin na moʼusalii wantiraakana amaa?

² Wakaaliinja naya. Wantiraale sainküin kaaye sümaa wanee wayuu eekai moʼuin, waküja wanülia sümüin otta wakaaliinja shia sünain tü choʼujaakat sümüin. Eejeena na nnojoliikana jaa müin wamüin süka jouluin wayuu kamaʼürat otta mojulaasü. Kamaneere waya namüin, aneerü naaʼin. Eeshii na moʼukana shiasaʼa müin eein na moʼupaʼakana. Watüjaale saaʼu tia, watüjaajeerü aaʼu kasain wakaaliinjainjanain anain naya wayuukana. Wakaaliinjapa wanee wayuu eekai moʼuin waküja namüin waʼyataain sünain ekirajaa wayuu sünain tü Wiwüliakat. Waashajeʼera namüin Salmo 146:8 jee shiale Isaías 35:​5, 6. Natüjale aleejaa braille, wasakira naya nacheküle waapüin namüin karaloukta suluʼu braille. Weeʼiyata namüin jamüin südescargaajia wanee pütchi suluʼujee jw.org süpüla naapajüin shia. Eere namaʼana wanee computador sümaa wanee programa aleejaka tü pütchi jaʼyakat suluʼu computador, eesü süpüla naapajüin tü pütchi suluʼukat jw.org otta karalouktairua eeka suluʼu RTF (texto enriquecido). (Paashajeʼera «Pükaaliinjeere na moʼusaliikana».)

3. ¿Jamüinjatü nachajaaya watuma na wayuu moʼusaliikana?

³ Wakaaliinja na wayuu moʼusaliikana. Wojuʼitapa sünain aküjaa pütchi sainküin piichi, nnojoleena weʼrüin ojuʼitaain wanainmüin wanee wayuu eekai moʼuin. Matüjainsalii yootoo naya sümaa wayuu eekai nnojoluin neʼraajüin. Makalaka wachajaainjanain naya süpüla waküjüin pütchi namüin (Mat. 10:​11, TNM). Jülüja paaʼin piʼyataale jee koleejiale pia nümaa wanee wayuu eekai moʼuin. Müle shia, püküja pütchi nümüin. Watüjaale saaʼu eein wanee koleejia napüla na moʼusaliikana, yooto waya nümaa chi shikiipüʼükai süpüla weʼikajaain nümüin karaloukta suluʼu braille. Eeshii piʼraajüle wayuu eekai moʼuin apüshi jee piʼraajüle wanee piichi napülajatka na moʼusaliikana. Püküja namüin na wayuu moʼukana apüshi eein karaloukta suluʼu braille namaʼana na aküjüliikana pütchi nüchiki Jeʼwaa otta eein pütchi akurawaajünaka süpüla naapajüin shia na moʼusaliikana. Müinjatia pünüiki namüin na shikiipüʼükana koleejia jee piichi napülajatka na moʼusaliikana. Paashajeʼera namüin suluʼujee tü Wiwüliakat koʼujeerüin nutuma Maleiwa na wayuu moʼusaliikana. Piiʼiyata namüin tü videokot No sé qué haría sin ella, suluʼuka jw.org. Videokot tia, nüchikimaajatü wanee wawala moʼusai anakai akuwaʼipa sutuma eein nümaʼana tü Wiwüliakat suluʼu braille. Lotule wanüiki sünain achajawaa na wayuu moʼusaliikana, yooteena waya namaa.

4. ¿Kasa shikirajaka anain waya tü saainjakat Janet?

⁴ Eesü wanee wawala moʼusat, Janet sünülia. Aküjüsü shia pütchi suluʼu wanee pinchi süpülajatü wayuu moʼusat. Süküjaka pütchi sümüin wanee majayüt. «Wanaa sümaa yaajachin Jesuu mmapaʼa, koʼusü nutuma na wayuu moʼusaliikana. Shiiʼiyatüin tia koʼujeenain nutuma soʼu palitchon kaʼi na moʼusaliikana», sümaka Janet sümüin tü wayuukot. Süküjaka sümüin nikeraajeerüin Maleiwa tü sümakat Alateetkat Mapeena 21:​3, 4. Sümaka tü wayuukot: «Eiwaʼalia müin sünüiki tamüin wanee wayuu eekai moʼuin. Naashin na wayuu koʼukana, moʼusat wanee wayuu nutuma Maleiwa saaliinjee mojulaain shia jee shiale saaliinjee mojulaain süpüshi». Suluwataaka Janet suluʼupünaa sucoreeose tü wayuukot, tü paajina kaluʼukat tü karalouktakat Kasa shikirajaka. Ekirajaasü tü wayuukot sümaa Janet piantua süpüla semaanakat.

5. ¿Jamüsü kapülainjatka waaʼin nakuwaʼipa na moʼusaliikana?

⁵ Isasü wachiki koʼuin watuma na moʼusaliikana maʼaka nutuma Jesuu. Eepajaʼa süpüla wakaaliinjain naya süpüla natüjaain saaʼu tü shikirajakalü anain tü Wiwüliakat. Süka wainmain na wayuu süttakana ekii nutuma chi Yolujaakai, wakaaliinja naya (2 Cor. 4:​3, 4). Koʼushii nutuma Jesuu na piamashii wayuu chajanakana Jericó (Mat. 20:34). Kapürale waaʼin nakuwaʼipa na wayuu moʼukana, wakaaliinjeena naya süpüla neʼraajüin Jeʼwaa chi Maleiwa koʼuinjachikai atuma naya otta aapüinjachikai kataa oʼuu waneepia namüin.