Atüjainjachi pia aküjaa pütchi: Püküja pütchi namüin na moʼusaliikana

¿JAMÜSÜ CHOʼUJAAKA? Na wayuu moʼusaliikana nnojotsü anain namüin naashajaale nümaa wanee wayuu nnojoikai neʼraajüin. Müsüjeseʼe weʼraajüinjatüin nakuwaʼipa süpüla waküjain pütchi namüin. Aishii maʼin nüpüla Jeʼwaa na wayuu moʼusaliikana (Le 19:14). Washata nukuwaʼipa Jeʼwaa otta wakaalinja naya süpüla neʼraajüinjachin Jeʼwaa.

ANUU SUKUWAʼIPAINJATKA:

• Püchajaa nachiki. (Mt 10:11) ¿Piʼraajüin wanee wayuu eekai kapüshin wanee moʼusai? Eere püküjain pütchi, ¿eesüche wanee koleejia eere nekirajünüin na moʼusaliikana? ¿Eesüche wanee miichi kamaʼaneekana karaloʼuta suluʼu braille süpüla nakaalinjain na moʼusaliikana?

• Natüjaainjatü aaʼu pükaalinjeein naya. Aneerü naaʼin na moʼusaliikana pümaa müleka kamaneere pia namüin otta natüjaale saaʼu pükaalinjeein naya. Püküja pütchi süchiki tü kamalainkat namüin.

• Pükaalinja naya süpüla neʼraajüin Jeʼwaa. Tü nupueulosekat Jeʼwaa, sukumajüin wainma karaloʼuta, audio jee waneirua kasa napülajatka na moʼusaliikana. Püsakira chi moʼupaʼasaikai jaralin kamalain nümüin süpüla nikirajaain nüchiki Jeʼwaa. Chi wawala aʼyataakai sümaa tü karaloʼutakalüirua, nuchuntuinjatü tü nikirajaweekalü aka chi moʼusaikai. Eejüinjatpejeʼe naaʼin chi wawala jülüjakai aaʼin tü aküjaakat pütchi süpüla saainjünüin tia.