Karaloʼutairua talataka atuma naaʼin na moʼusaliikana

«Naʼakajee na wayuu aashajeʼerawaikana tü karaloʼuta wakumajakat, wainma na eʼraajakana wayuu eekai moʼusalii. Eeitpa süpüla naashajeʼerüin karaloʼutakat tüü na wayuu moʼusaliikana. Naata maʼin süshajia tü pütchi napülajatkat nayakana». Aküjünüsü tia pütchikat suluʼu tü rewiisütakat The Watch Tower (La Torre del Vigía) ojuʼitaka juunioʼu 1 soʼu 1912. Otta müsü tü rewiisütakat: «Anasü maʼin namüin na moʼusaliikana natüjain süchiki sülüʼülüin sükalia wanee kasa anashaatasü maʼin eejeetka nutuma chi Maleiwakai».

Wanaa sümaa süshajünüin pütchikat tüü, nnojotyülia akumajünüin sukuwaʼipainjatka tü pütchi napülajatkat na moʼusaliikana suluʼu inglés. Mayaainjeʼe müin shia, na aküjaliikana pütchi nüchiki Jehová nakumajüin karaloʼuta napülajatka na moʼusaliikana suluʼu tü kanüliakat braille jee ayatüsü naaʼinrüin tia. ¡Alatüsü suulia 50 anüikii tü karaloʼuta akumajünakat napüla na moʼusaliikana! ¿Jamüsü sukuwaʼipa süpüla wakumajüinjatüin shia?

Sukuwaʼipa süshajia suluʼu braille

«Tü aainjünakat palajana shia süshajünüin suluʼu braille. Sümaiwa paala, ayaʼlajünawaisü tü programa akumajünakat aka tü pütchikat suluʼu braille. Nnojotpejeʼe süpüla sukumajünüin süka watta saalii anüikii» naashin chi wawalakai Michael Millen, aʼyataakai sünain Servicios de Procesamiento de Texto chaa Patterson (Nueva York), otta müshi nia: «Müsüjeseʼe nakumajüin na wawalayuukana wanee programa anaka maʼin süpüla ashajaa pütchi suluʼu watta saalii anüikii. Nnojotsü eein wanee programa eekai müin aka saaʼin, anaʼleesia shia suulia waneirua saaʼin tamüin».

Nnojotsü shiain neʼe ashajünüin pütchi suluʼu braille. Aküjünüsü süchiki tü ayaakuaa eʼitaanakat sünain tü karaloʼutakalüirua. Jamüsüjaʼa sünain tü ayaakuaa eekat sünain tü karaloʼutakat Anainjatka atuma pukuwaʼipa waneepia, müsü mayaa sünain: «Wanee wayuu oʼunaka suluʼupünaa wanee wopu mouisü, wüittashaataka maʼin, eesü namüna otta uuchiirua nüpüleerua». Anuu tü nümakat Jamshed, wanee wawala moʼusai, pürekutsoot jee aʼyataashi neʼipajee na laülaashiikana: «Anasü maʼin tamüin tü aküjünakat süchiki tü ayaakuaakat sünain tü karaloʼutakalüirua».

Süchikijee süshajünüin tü pütchikat, aluwataanüsü tü archivokalüirua eere tü Weteet akumajaakat karaloʼuta suluʼu braille. Asonünüsü tü pütchikat sünain wanee karaloʼuta kaʼlesü maʼin, süka wanee maakina süpülajatkat tia, nnojotsü shia oototünüin otta kajürülasü, jaʼitairü wainmatuain shipettünüin, nnojotsü shia amojujaain, kottusü jee katasü shia natuma na wawalayuukana. Aluwataanaa müsia tü karaloʼuta namüinjatkat na moʼusaliikana wanaa sümaa tü karaloʼuta namüinjatkat na wane wawalayuukana, nnojotsü oikünüin shia. Müleka eere tü eʼikajaʼawaika chisooui jee choʼujaale shia namüin na wawalayuukana, eesü süpüla süjütamaatüin Weteet tü karaloʼuta napülajatkat na moʼusaliikana süpüla nekirajaain na wawalayuukana sünain süpüla tü outkajawaakat.

Aʼyatawaa maʼin süpüla sukumajünüin karaloʼutakalüirua tüü otta wainma nneerü oʼunaka sünain. Jamüsaʼa yaa Wallkill (Nueva York), sümaʼinruʼu sukumajünüin 50.000 Biblia napülajatka na wane wawalayuukana, piama neʼe Biblia akumajünaka suluʼu braille. Otta müsia wanee Biblia braille suluʼu inglés, akumajünüsü shia suluʼu 25 shiʼipa.a Wainmaleesia nneerü akataajünaka sünain akumajaa wanee Biblia napülajatka na moʼusaliikana suulia tü akataajünakat süpüla sukumajünüin wanee Biblia napüla na wane wawalayuukana. Jamüsüjaʼa süta wanee Biblia suluʼu 25 shiʼipa, eetaasü maʼaka 150 dólar sülia.

¿Jamüsü naaʼin na wawalayuu aʼyataakana sünain akumajaa Biblia suluʼu braille? Anuu tü sümakat Nadia, aʼyataasü shia suluʼu tü Weteet chakat Sudáfrica: «Wainma tü kasa kapüleekat namüin na wawalayuu moʼusaliikana otta na moʼupaʼakana, talatapejeʼe maʼin taaʼin süka eein wanee kasa taaʼinraka süpüla takaalinjain naya. Tatüjaa aaʼu alin maʼin naya nüpüla Jehová».

Matüjainre wanee wayuu aashajeʼeraa braille

Jama matüjainre wanee wayuu moʼusai aashajeʼeraa suluʼu braille, eesü sutuma nupueulose Jehová wanee karaloʼuta Aprenda a leer braille sünülia. Akumajünüsü shia süpüla nikirajüin wanee wawala wanee wayuu moʼusai süpüla nütüjainjachin aashajeʼeraa braille. Eesü müsü aka saaʼin wanee tablerochon sünain otta wanee laapi süpüla nüsonüin chi wayuu ekirajaakai tü pütchi nütüjaaitpakat suluʼu braille, müleʼe shia nutuma, ayateerü sotuin naaʼin tü nikirajaakalü anain nümülerüle shia.

«Kamalainshaatasü shia tamüin»

¿Kasa anasü neʼraka na wawalayuu moʼusaliikana jee na moʼupaʼakana sutuma eein karaloʼuta suluʼu braille? Ernst, kepiakai Haití, oʼunawaishi nia sünain tü outkajawaakat, nnojotpejeʼe eein karaloʼuta nümaʼana suluʼu braille. Kapüleesü maʼin nümüin süka jülüjainjatüin maʼin naaʼin tü nüküjainjatkat namüin na nikirajüinkana otta nusoutuinjachire sünain tü outkajawaakat. Anuu tü nümakat Ernst: «Jooluʼu eesü süpüla tayalerüin tajapü sünain tü outkajawaakat otta tasoutuin shiʼipajee tü asakinnakalü anain. Anasü maʼin taaʼin süka wanaawain tü tekirajaakalü anain namaa na wane tawalayuukana. Akooʼomüinraasü wanoula wapüshuaʼa».

«Mapüleesat tü pütchi ashajünakat suluʼu braille sutuma nupueulose Jehová suulialeʼeya tü wane karaloʼutairua napülajatkat na moʼusaliikana», müshi chi wawalakai Jan, wanee laülaashi moʼupaʼaichi kepiakai chaa Austria. Nia oʼuniraka tü ekirajawaakat sünain tü karaloʼutakat Aapiria Wayuu otta ekirajawaakat sünain tü Bibliakat namaa na wawalayuukana. Anuu sooʼomüin nünüiki: «Kayaawasesü süpana tü karaloʼutakalüirua, eesü noota sünain mapüleeka ousütaa otta aküjünüsü süchiki tü ayaakuaakalüirua».

Seon-ok, wanee pürekutsoot chejeʼewat Corea del Sur, moʼusat shia jee moʼusat shikii. Nnojoliiwaʼaya tü karaloʼutakalüirua suluʼu braille, akaalinjünüinjatü shia sutuma wanee wawala atüjaka süpüleerua nanüiki na manüisaliikana, suuʼunajirüinjatüin tü sajapükat süpüla shiyaawatüinjatüin saaʼu tü pütchikat. Eeitpa süpüla shikirajaain sümüiwaʼa sünain tü pütchikat süka eein shia sümaʼana suluʼu braille. Otta müsü tü wawalakat: «Eesü waneirua karaloʼuta ashajünakat suluʼu braille kapüleeka süpüla aashajeʼeraa, eesü nnojorüle eein punto sünain, shokotule süshajia tü pütchikat jee arülale maʼin tü karaloʼuta ashajünakalü aluʼu shia. Anapejeʼe maʼin tü nakumajakat na aküjaliikana pütchi nüchiki Jehová. Anasü maʼin tü karaloʼutakat jee anasü maʼin süshajia pütchikat natuma, müsüjeseʼe mapüleein aashajeʼeraa shia tamüin». Otta müsü shiakat: «Paala sümaiwa, akaalinjünüsü maʼin taya süpüla tekirajaain sünain tü Bibliakat. Eepejeʼe süpüla tekirajaain jooluʼu tamüiwaʼa, talatashaatasü maʼin taaʼin sutuma taaʼinrüin tia. Yapasü tatuma tü ekirajaanajatkalü anain sünain tü outkajawaakat jee asoutusü taya sünain. Taashajeʼerawalin süpüshuaʼale tü karaloʼuta ashajünakat suluʼu braille. ¡Kamalainshaatasü shia tamüin!».

Sünain tü karaloʼuta sukumajakat nupueulose Jehová, müsü wanee pütchi sünain: «Karaloʼutakat tüü, süpüshi tü ekirajünakalü aka wayuu sainküin Mma, aainjünüsü süka tü nasülajakat na wayuukana süka naaʼin. Nnojotsü oikünajatüin. Püsülajeere nneerü, puluwataa shia suluʼu donate.jw.org». Müsia neʼe sünain tü karaloʼutairua ashajünakat suluʼu braille. Waapüin analuʼutkat jümüin süka jüsülajüin nneerü suluʼupünaa donate.jw.org. Sükajee tü jüsülajakat, akumajünüsü karaloʼutairua katchinka atuma nanoula napüshuaʼa na wawalayuukana otta müsia namüin na wawalayuu moʼusaliikana.