Ana watuma shikirajia wayuu süka tü karalouktakat Kasa shikirajaka

Wanaa sümaa nayaawatüin aaʼu na wekirajüinkana tü sümakat tü Wiwüliakat otta neʼitaain suluʼu nakuwaʼipa tü sümakat, jaʼyasü naaʼu kooʼomüin tü nanoulakat (Sal. 1:1-3). Anale watuma nekirajia süka tü karalouktakat Kasa shikirajaka, wakaaliinjeena naya süpüla kooʼomüin nanoula.

Asakiraairua suʼttiajeeka wanee ekirajaaya. Ashajünüsü waneeirua asakiraairua suʼttianainjee wanee ekirajaaya. Eesü süpüla waashajeʼerüin shia. Nnojotsü süpülajatüin nusouktüinjachin shiʼipajee. Tia süpülajatü keeʼireeinjatüin naaʼin nikirajaweein sünain tü wamakat nümüin. Wanee sukuwaʼipa shia waküjüile nümüin eein süpüla nusouktüin motsomüin neʼe shiʼipajee tia asakiraakalüirua. Eesüjaʼa süpüla nnojoluin pansaain tü nümakat, akatsaʼa nnojoluinjatüin waküjüin nümüin mojuin tü nümakat. Watüjaainjatü saaʼu tü kasa wekirajüinjatkat maʼin anain nia (Prov. 16:23; 18:13).

Sooʼomüin pütchi. Müleka niyaawatüle saaʼu chi wekirajüinkai tü sümakat wanee ekirajaaya, eesü süpüla waküjüin nümüin eein süpüla naashajeʼerüin nümüiwaʼa tü kanüliakat sooʼomüin pütchi. Wekirajapa nia wanee sukueena, eeshi süpüla wasakirüin nia sünain tü pütchi nikirajaakalü anain. Nnojorüle niyaawatüin maʼin saaʼu wanee ekirajaaya, wakatala maʼaka jeʼra minuuto süpüla wekirajüin nia sünain tü kanüliakat sooʼomüin pütchi. Wekiraja nia sünain süpüshuaʼa jee shiale süpüshi tia pütchikat. Eesü süpüla waashajeʼerüin tü pütchikalüirua jee wasakirüin nia sünain wanee kasa yapaka paala watuma.

Pütchi süttaka sajaʼttiamüin wanee ekirajaaya. Sajaʼttiamüin wanee ekirajaaya ashajünüsü susouktia tü asakiraairua suʼttiajeekat wanee ekirajaaya. Wasakirüle chi wekirajüinkai sünain tia pütchikat, watüjaajeerü aaʼu müleka niyaawatüle saaʼu tü wekirajakalü anain nia jee makatüle shia suluʼu nikii. Süchikijee waashajeʼerüin nümaa susouktia tü pütchikat otta tü pütchi suluʼujeejatkat tü Wiwüliakat, wasakira nia sünain jamüin shiimainka tü sümakat tü pütchi süttakat (Aluw. 17:2, 3).