Washata sukuwaʼipa nikirajia Jesús wekirajapa süka tü karalouktakat Kasa Shikirajaka
1. ¿Jamapuʼusü nikirajia Jesús?
1 Mapüleesat sümaa jaʼyain maʼin tü nikirajakat anain Jesús chi Atüjakai maʼin Ekirajaa. Süpüla nasakiraajiraain naaʼin na wayuu aapajakana nünüiki, nüsakirapuʼuin naya süpüla nütüjaainjatüin saaʼu jamüin nanüiki (Mat. 17:24-27). Naashajeʼerapuʼuin tü ashajuushikat nüchiki Maleiwa (Mat. 26:31; Mar. 7:6). Nnojotsü wainmain maʼin tü pütchi nikirajakat anain na nikirajüinkana süka natüjaajeerüin saaʼu mapeena (Juan 16:12). Otta taasia nütüjawee aaʼu nanoujüle otta natüjaale saaʼu tü nikirajakat anain naya (Mat. 13:51). Tü karalouktakat Kasa Shikirajaka ayuʼluushi süpüla müinjatüin wekirajia.
2. ¿Jamüinjatü sukuwaʼipa watuma tü asakiraa suʼttakat aka wanee ekirajaaya?
2 Asakiraa suʼttaka aka wanee ekirajia. Wanaa sümaa puʼttüin sünain ekirajaa wanee ekirajaaya, anasü paashajeʼerüle tü asakiraa suʼttakat aka wanee ekirajaaya. Süpüla nikirajaweein chi pikirajüinkai, paashajeʼera tü asakiraa suʼttakat aka wanee ekirajaaya jee püchunta nümüin nüsouktaiwa shia. Nnojotsü choʼujaain jülüjüinjatüin maʼin paaʼin tü nünüikikat otta pünoukteʼerüinjatüin shia. Paapa neʼe tü analuʼutkat nümüin otta puʼtta sünain ekirajaa tü ekirajaayakat. Tü nüsouktakat shiʼipajee tü asakiraakalüirua sükaaliinjeechi pia süpüla pütüjaain saaʼu jaralüinjatüin tü pütchi pikirajaainjatkat maʼin anain.
3. ¿Kasa waaʼinrajatka süpüla mapüleeinjatüin wekirajia?
3 Pütchi suluʼukat tü Wiwüliakat. Shia ekirajaanajatka anainjee tü Wiwüliakat (Heb. 4:12). Akatsaʼa, nnojotsü choʼujaain aashajeʼeraa süpüshuaʼa tü pütchi suluʼukat tü Wiwüliakat. Paashajaa maʼin süchiki tü eeʼiyatakat tü wanoujakat anain. Nnojotsü choʼujaain maʼin paashajeʼerüin tü pütchi aashajaakat süchiki wainma kasa. Tü karalouktakat Kasa Shikirajaka, shikirajüin tü shiimainkat sümaa mapüleein shia; müsüjeseʼe mapüleeinjatüin tü pikirajiakat. Jülüja maʼin paaʼin tü shikirajakat anain otta nnojo paashajaain maʼin süchiki wanee kasa nnojotka choʼujaain sümaa nnojoluin suluʼuin shia tü ekirajaayakat.
4. ¿Jamüsü süpüla watüjaain saaʼu choʼujaain akatalaa kaʼi süpüla wekirajaain sünain sooʼomüin pütchi namaa na wekirajüinkana?
4 Sooʼomüin pütchi. Eesü poloo pienchi pütchi sooʼomüin tü ekirajaanakat anain, choʼujaale shia eesü süpüla shikirajaanüin anain. Nücheküle otta nütüjaale saaʼu tü sümakat wanee ekirajaaya eesü süpüla püchuntüin nümüin chi pikirajüinkai naashajeʼeraiwa nümüiwaʼa tü sooʼomüinkat pütchi. Weʼitaa wanee shiyaawase, pikirajapa sünain ekirajaaya 4 «¿Jarai chi Jesucristokai?» otta nünoujüle chi pikirajüinkai sünain niain Jesús chi Mesiiakai, nnojoleerü choʼujaain ekirajawaa nümaa sünain tü pütchikat «Jesucristo, chi Mesías aküjünakai achiki paala». Eesü choʼujaale, pükatalüin kaʼi süpüla pikirajüin tü sooʼomüinkat pütchi.
5. Wekirajüinjanale sünain tü sooʼomüinkat pütchi, ¿jamüinjatü sukuwaʼipa watuma?
5 Pikirajüinjatüle sünain tü sooʼomüinkat pütchi, anasü pikeraajüle tü asakiraa paainjüinjatkat sünain tü ekirajawaakat otta pikirajaa sünain tü sooʼomüinkat pütchi maʼaka paainjüin shia süka wanee ekirajaaya. Otta müsia eesü pükatarüle palitchon minuuto süpüla ekirajawaa sünain tü sooʼomüinkat pütchi, piʼrüle choʼujaain nümüin chi pikirajüinkai nünoukteʼerüinjatüin wanee nukuwaʼipa. Müle shia, pütüjaajeerü aaʼu niyaawatüle tü naashajeʼerakat nümüiwaʼa.
6. Sajaʼttapa wanee ekirajaaya, ¿jamüinjatü shikirajia tü shikirajakat tü Wiwüliakat?
6 Tü shikirajakat tü Wiwüliakat. Tü asakiraa suʼttakat aka wanee ekirajaaya asoktünüsü sükajee tü shikirajakat tü Wiwüliakat tia ashajünüsü sajaʼttiamüin wanee ekirajaaya. Eesü süpüla püsoʼirüin naaʼin chi pikirajüinkai sünain tü shikirajakat anain wanee ekirajaaya sükajee tü pütchi ashajünakat. Naashin noʼutku na aküjakana pütchi anasü namüin aashajeʼeraa namaa na nekirajüinkana tü ashajünakat suluʼu otta tü pütchi suluʼujeejatkat tü Wiwüliakat. Süchikijee nachuntüin namüin na nekirajüinkana naküjaiwa jamüin sünainpünaakat tü sümakat tü Wiwüliakat tü pütchi ashajünakat. Sükajee tia, chi ekirajüikai niyaawateerü müleka nütüjaaipale saaʼu chi nikirajüinkai tü pütchi shikirajakat maʼin wanee ekirajaaya, tü pütchi suluʼujeejatkat tü Wiwüliakat otta anale shia nümüin. Otta chi ekirajünakai atüjaleeshia ekirajaa wayuu sünain tü shiimainkat süka tü Wiwüliakat.
7. ¿Jamüsü süpüla wekeraajüin tü ekirajaakat wayuu sükajee tü karalouktakat Kasa Shikirajaka?
7 Süpüla anainjatüin maʼin nekirajia na wayuukana otta woutiisainjanain naya washatajatü sukuwaʼipa nikirajia Jesús (Mat. 28:19, 20). Tü karalouktakat Kasa Shikirajaka sükaaliinjeena waya süpüla wainküin tia. Mapüleeinjatü, jaʼyainjatü otta kemeʼeriainjatü putuma nekirajia na wayuukana sünain tü shiimainkat süka karalouktakat tüü.