Asakinnaka Anain

◼ ¿Joujainjana wooʼulaaka suulia ekirajaa wanee wekirajüin sünain tü Wiwüliakat?

Eere wanee wekirajüin nnojoikai aapaain sümaa tü nikirajaakalü anain, waküjüinjatü nümüin süka anakalü akuwaʼipa nnojolinjachin wekirajüin nia sünain tü Wiwüliakat (Mat. 10:11). Anasü jülüjale waaʼin palajana jamüin nukuwaʼipa chi wekirajüinkai. ¿Yapashi nia süpüla ekirajawaa soʼu tü oora eʼitaanakat süpüla nikirajaainjachin? ¿Nejeettüin tü nükaralouksekat süpülapünaa nikirajüin? ¿Oʼunawaishi sünain tü outkajawaakat? ¿Eesia anouktaain nukuwaʼipa sutuma tü nikirajakalü anain? ¿Nüküja achikit sümüin wayuu tü nikirajaakalü anain? Jülüja waaʼin jeʼrain nuuyase, nütüjale maʼin jee eere tü isakat nüchiki. Nnojoluinjatü ashapajaain waaʼin müleka nnojorüle katsüinmaatüin nunoula wanee wekirajüin, soto waaʼin naatawalin sukuwaʼipa wayuu otta eein na kapüleekana amüin wanee kasa otta na aapaamaatakana sümaa tü aküjünakat namüin. Wooʼulaainjanale suulia ekirajaa wanee wayuu, wama nümüin eein süpüla nikirajaain sünain tü Wiwüliakat mapa müleka keeʼireere naaʼin shia (1 Tim. 2:4).