«Aapüshi Pablo analuʼut nümüin Maleiwa otta atütülaasü naaʼin»

Naapapa na anoujashii chajanakana Roma nüntajachin Pablo, eeshii na oʼunakana maʼaka 64 kiloometüro süpüla nantiraain nümaa. ¿Jamüsü naaʼin Pablo niʼrapa naya? Aapüshi nia analuʼut nümüin Maleiwa otta atütülaasü naaʼin (Alu 28:15, TNM). Atütülaasü naaʼin Pablo natuma na nuwalayuukana mayaapejeʼe niain atütülawalin naaʼin nayakana (2Co 13:10).

Maaʼulu yaa, atütülaasü naaʼin na wawalayuukana natuma na wawalayuu alapalaakana naaʼu. Eesü kaʼi mapüsaka oʼu naya, shapaale naaʼin jee choʼujaale natütünnüin aaʼin süka wayuuin naya maʼaka waaʼin. ¿Kasa waaʼinrajatka süpüla watütülüin naaʼin chi wawala alapalaakai waaʼu sümaa tü nuʼwayuusekat? ¿Kasa waaʼinrajatka süpüla wakaalinjiraain namaa sünain achecheraa waaʼin sükajee tü wanoulakat? (Ro 1:11, 12).

• 

  Wojuʼita sünain aküjaa pütchi namaa. Talatüsü maʼin naaʼin chi wawala alapalaakai waaʼu niʼrüle waya sünain aküjaa pütchi soʼu tü semaana nüntakalü oʼu (1Te 1:2, 3; 2:20). Eeshi süpüla pürekutsoolüin aaʼusiliaat pia soʼu tü kashi nüntakalü oʼu. Pujuʼita sünain aküjaa pütchi nümaa chi wawala alapalaakai waaʼu otta sümaa tü nuʼwayuusekat. Puunejaa naya sünain ekirajaa wayuu. Nnojo japülin pia sünain aküjaa pütchi namaa sutuma jekechin pia, kamalainsü namüin aküjaa pütchi namaa napüshuaʼa na wawalayuukana.

• 

  Wounejaa naya wepialuʼumüin. Wama namüin makataiwa naya wepialuʼu otta wounejaa naya nekaiwa wamaa. Aishii naya wapüla waaʼinrüle tia. Nnojotsü choʼujaain wainmain kasa waapaka namüin (Lu 10:38-42).

• 

  Waapaa sümaa tü nümakat wamüin. Kamaneeshi chi wawala alapalaakai waaʼu, nükaalinjain waya süpüla anain waʼyataain nümüin Jeʼwaa. Eejeerü kaʼi nüchiaaka oʼu waya (1Co 5:1-5). Waapaa sümaa tü nümakat otta nnojo yaletüin waaʼin, waaʼinrüle tia, talateerü naaʼin sünain aʼyatawaa nümüin Maleiwa (Heb 13:17).

• 

  Waapaa analuʼut namüin. Waküja nümüin chi wawala alapalaakai waaʼu otta sümüin tü nuʼwayuusekat jamüin anaka wakuwaʼipa sutuma tü naaʼinrakat wapüleerua. Eesü süpüla washajüin shia namüin sünain wanee karaloʼutachon (Col 3:15, TNM).