Nükaalinjeein pia Maleiwa
SÜKA nümaʼanajeejatüin Maleiwa tü Bibliakat, jalouisü wamüin tü sümakat. Mayaainjeʼe nnojoluin shiain wanee karaloʼuta aashajaaka süchiki tü wunuʼu shipinaseinjatkat wayuu, anasü maʼin tü sümakat süpüla watüjaain saaʼu tü waaʼinrajatkat suulia shapaakuʼu müin waaʼin, suulia jülüjakuʼu müin waaʼin kasa mojusü, suulia waapüin waaʼin sümüin mojaa aaʼin otta suulia mojuin maʼin waaʼin ayuuire waya.
Süküjain tü Bibliakat nütüjaain saaʼu Jehováa tü jülüjakat waaʼin otta jamüin waaʼin, nia chi Kakumalakai waya. Nükaalinjeein waya Jehová, eeshi nia wamaa soʼunnaa müliaa. Anuu piamasü pütchi suluʼujeejatka tü Bibliakat akatsüinreetka paaʼin:
«Nnojoishi wattaluʼuin Jehová noulia na mojukana aaʼin otta nükaalinjain na wayuu yüülakana aaʼin» (SALMO 34:18).
«Tayakai Jehová, taya chi Pümaleiwasekai, taya ajapuluʼujakai pia süka tü pajapü pikiakat, anuu tanüiki pümüin: ‹Nnojo mmoluin pia. Shiimain takaalinjeechin maʼin pia›» (ISAÍAS 41:13).
¿Kasa naaʼinraka Jehová süpüla nükaalinjain waya nnojoliire anain waya suluʼu wekii? Sünain tü wane pütchikalüirua, watüjaajeerü aaʼu nükaalinjeein maʼin waya Jehová otta wainmain sukuwaʼipa tü nükaalinjakalü akajee waya.
a Jehová nünülia Maleiwa (Salmo 83:18).