Süsakiraka anain wayuu

Suluʼu Aapiria Wayuu ojuʼitaka juunioʼu soʼu 2020, apansaajünüsü wanee pütchi suluʼu tü kanüliakat «Kasataalejeseʼe shiʼraajüin wayuu tü pünüliakat otta kojutuin pia sutuma». ¿Kasa aküjünaka wamüin suluʼu tia pütchikat süchiki kojutuinjachin Jehová atumawaa jee niain neʼe anain süpüla aluwatawaa?

Aküjünüsü sünain tia pütchikat waneesiain neʼe tü kasa jülüjainjatkat saaʼin wayuu jee tü jülüjainjatkat naaʼin na aapieekana: kojutuinjachin Jehová atumawaa. Sünainpünaasü tia niain neʼe Maleiwa anaka süpüla aluwatawaa otta niainjachin soonooin amaa wayuu.

Wekirajaajeerü anain apünüinsü kasa wayaawateetkalü akajee jamüin shiʼraajüinjatka wayuu nünülia Jehová otta jamüin kojutuinjachikai nia sümüin.

Tü palajatkat, mojusü nünüiki Satanás nüchiki Jehová suluʼu tü apainkat Edén. Naashin Satanás mamaneesai Maleiwa otta nnojotsü lotuin sukuwaʼipa tü nuluwataakalü anain Adán sümaa Eva. Shia tü nüküjeekalü achiki wanaa sümaa nüsakirayaain Eva. Niiʼiratüin Satanás sukuwaʼipa tü nümakat Jehová, alaa chi Maleiwakai naashin. Aküjashi nia alawaa nüchiki Jehová, «Yolujaa» müshijeseʼe nümünüin suluʼujee tia, «alaa» maluʼut tia (Juan 8:44, TNM). Nnojotsü oonooin Eva sümaa tü nümakat Maleiwa, shia soonooka amaa tü alawaa nümakat Satanás. Sütüjaanakalaka saaʼu shiyoutuin süchiki niain Maleiwa aluwataain saaʼu (Gen. 3:1-6). Ayatayüiya Satanás aküjain alawaa nüchiki Jehová. Na wayuu anoujakana sünain tü alawaa nüküjakat Satanás, nnojoishii jaa müin nümüin Jehová. Mojushiisü maʼin namüin na nüpüshikana Maleiwa süküjünüin alawaa nüchiki Jehová, watta saalii müliaa shiʼraka wayuu suluʼujee tia.

Tü wane shia keeʼireein naaʼin Jehová anain sukuwaʼipa wayuu otta anain nakuwaʼipa na aapieekana, müsüjeseʼe naaʼinmaain kojutuin nia atumawaa. Müshi nia: «Shiimainshaata kojuteechin taya atumawaa» (Ezeq. 36:23). «Kasataalejeseʼe shiʼraajüin wayuu pünülia otta kojutuin pia sümüin», müsü nünüiki Jesús nüküjapa süchiki tü wanüikinjatkat woʼuraajapa. Sükajee tia wayaawata aaʼu shiainjatüin wachuntuin maʼin tia woʼuraajapa (Mat. 6:9, TNM). Süküjain maʼin tü Bibliakat kojutuinjachin maʼin atumawaa Jehová. Anuu waneirua pütchi sümaka tü Bibliakat: «Kasataalejeseʼe kojutuin Jehová jutuma» (1 Cron. 16:29; Sal. 96:8). «Jiiʼiraja jayeechi nümüin Maleiwa süpüla jiiʼiyatüin kojutuin nia jümüin» (Sal. 66:2). «Kojuteechi pia tatuma süpüla kaʼikat süpüshuaʼa» (Sal. 86:12). Anuu nünüiki Jesús nümüin Jehová wanaa sümaa chajachin nia suluʼu tü piichi aʼwaajüleekat: «Kasataalejeseʼe shiʼraajüin wayuu pünülia otta kojutuin pia sutuma», nusoutaka Jehová nümüin: «Teʼraajirüitpa tanülia jee teʼraajireerü shia süchikuaʼa» (Juan 12:28, TNM).a

Tü chiiruaajatkat shia süka keeʼireein naaʼin Jehová kojutuinjachin nia atumawaa süpüla kaʼikat süpüshuaʼa. Jülüjataa waaʼin tü naaʼinrajatkat Jehová kettaapa tü Miitkat Juya nuluwataainjatkalü oʼu Cristo süchikijee suuʼulakünüin naaʼin na wayuukana nutuma chi Yolujaakai. ¿Jülüjeetche naaʼin na wayuukana otta na aapieekana soʼu tia isayülüin saainjünüin waneirua kasa süpüla kojutuinjachin atumawaa Jehová? Süpüla watüjaain saaʼu tia, jülüja waaʼin tü alawaa nüküjakat Satanás suluʼu tü apainkat Edén. Naashin niakai, aʼyataashii na wayuukana nümüin Maleiwa saaʼujee anain nakuwaʼipa nutuma jee nnojolin anain Maleiwa süpüla aluwatawaa. Kettaapa tü Miitkat Juya, nnojoleerü ooʼulakünüin naaʼin piantua na wayuukana, jama loteerüin nakuwaʼipa jee nalateerüin süchikumüin tü naaʼinrakat Satanás. Kateetkalaka noʼu süpüla kaʼikat süpüshuaʼa otta atüjaaneerü aaʼu niain neʼe Jehová anakai süpüla aluwatawaa. Aneerü namüin na aapieekana namaa na wayuukana nuluwataain Jehová naaʼu. ¿Ayateeiche kojutuin Jehová natuma na aʼyataashiikana nümüin?

Aa, ayateechia kojutuin nia atumawaa otta nnojoleerü aküjünüin alawaa piantua nüchiki. Ayateechi kojutuin Jehová namüin na aapieekana jee namüin na wayuukana, ayateerü naaʼinrüin tia süka neʼreerüin naaʼinrüin Jehová kasa pülasü. Süka nnojoluin yaletüin naaʼin Jesús, naapeerü süchikuaʼa tü aluwatawaakat nümüin chi Nüshikai. Nieechikalaka Maleiwa laülaain saaʼu kasa süpüshuaʼa (1 Cor. 15:28, TNM). Süchikijee tia, taasheerü nakuwaʼipa na wayuukana maʼaka taashin nakuwaʼipa na nüchooinkana Maleiwa (Roma 8:21, TNM). Mayaa, nikeraajeerü Jehová tü keeʼireetüjütkalia naaʼin, paaʼinweena na chajanakana iipünaa namaa na kepiakana yaa mmapaʼa (Éf. 1:10).

¿Jameerü naaʼin na aʼyataashiikana nümüin Jehová sülatapa tia? Napüshuaʼa na kepiakana chaa iipünaa jee na yaakana kepiain mmapaʼa, suchuntaajeerü maʼin naaʼin naʼwaajüin Jehová. Anuu wanee pütchi nüshajaka David: «Kasataalejeseʼe nuʼwaajünüin chi Maleiwakai Jehová, kasataalejeseʼe kojutuin nia atumawaa süpüla kaʼikat süpüshuaʼa» (Sal. 72:18, 19). Ayateerü weʼrüin kasa anashaatasü süpüla kaʼikat süpüshuaʼa wayaawateetka atuma kasain sünainpünaain nünülia Maleiwa. Suluʼujee tia, waʼwaajeechi nia süpüla kaʼikat süpüshuaʼa.

Waashajaapa nüchiki Jehová jülüjasü waaʼin aipüraliin nia wayuu (1 Juan 4:8). Ayateerü jülüjain waaʼin waneepia nukumajüin waya Jehová saaʼujee alin waya nüpüla, naapüin nikii chi nüchonkai waaʼu saaʼujee alin waya nüpüla otta nuuʼulaain wayaawatüin saaʼu süka waaʼin wamüiwaʼa niain chi anakai süpüla aluwatawaa. Ayateeria weʼrüin süpüla kaʼikat süpüshuaʼa alin waya nüpüla. Sutuma tü kasa anasü weʼreetkat nutuma chi Washi iipünaajachikai, aleeweena maʼin waya nümaa otta weeʼirajeerü jayeechi nümüin süpüla waʼwaajüin nia (Sal. 73:28).