Nücheküin Jehová wayaawajaain suulia waainjala

1. ¿Kasa naaʼinraka wanee wayuu niyaawajaale suulia naainjala?

WAAʼINRÜLE kasa mojusü ayaawajaweeshii waya suulia tia. Niyaawajaale wanee wayuu suulia naainjala saashin tü Bibliakat, nülerajüin tü kasa mojusü naaʼinrakat, niiʼiratüin nukuwaʼipa otta nnojotsü naaʼinrüin shia piantua (paashajeʼera tü pütchikat «Ayaawajawaa suulia kaainjalaa», sünain tü kanüliakat Jamaluʼulu pütchikat).

2. ¿Jamüsü watüjaainjatkaʼa saaʼu tü waaʼinrajatkat süpüla wayaawajaain suulia waainjala? (Nehemías 8:9-11).

² Süka kaainjalain waya waneepia, watüjaainjatü saaʼu tü waaʼinrajatkat süpüla wayaawajaain suulia waainjala. Kaainjalashii waya jee outushii waya nünainjee Adán sümaa Eva (Roma 3:23; 5:12). Nnojoishi jaralin isain suulia tü kaainjalakat, kaainjalashiʼiya na wayuu kanoulakana maʼin maʼaka naaʼin Pablo mayaainjeʼe nüchecherüin naaʼin (Roma 7:21-24). ¿Mojukuʼu müinjatche waaʼin saaʼujee tia? Nnojo. Amüliajüi wayuu Jehová otta nücheküin wapüleerua talatüinjatüin waaʼin. Wekirajaa süchiki tü alatakat namüin na judíokana nükalioʼu Nehemías (paashajeʼera Nehemías 8:9-11). Nnojotsü nücheküin Jehová mojukuʼu müinjatüin naaʼin na judíokana saaʼujee tü kasa mojusü naaʼinrapuʼukat. Nücheküin naʼwaajüinjachin nia sümaa talatüin naaʼin. Talateerü naaʼin wanee wayuu niyaawajaale suulia naainjala, müshiijeseʼe nikirajüin waya Jehová süpüla wayaawajaain suulia waainjala. Waaʼinrüle tia moteerü naaʼin Jehová waainjala.

3. ¿Kasa wekirajaajeetka anain sünain ekirajaayakat tüü?

³ Sünain ekirajaayakat tüü, wekirajaajeerü sooʼomüin tü waaʼinrajatkat süpüla wayaawajaain suulia waainjala. Wekirajaajeerü anain palajana tü nikirajakalü anain Jehová na israelitakana süpüla nayaawajaain suulia naainjala otta tü naaʼinrakat wapüleerua süpüla wayaawajaain suulia waainjala. Süchikijee wekirajaajeerü anain tü nikirajakalü anain Jesús na nikirajüinkana süpüla nayaawajaain suulia naainjala.

TÜ NIKIRAJAKALÜ ANAIN JEHOVÁ NA ISRAELITAKANA

4. ¿Kasa nikirajaka anain Jehová na israelitakana süpüla nayaawajaain suulia naainjala?

⁴ Soʼu nüpansaajüin Jehová nünüiki namüin na israelitakana, naküjain nümüin noonoojeenain sümaa nünüiki. Noonoolejeʼe sümaa nünüiki Jehová naaʼinmajeena naya jee aneerü nakuwaʼipa. Anuujeseʼe nünüiki namüin: «Tü taluwataakalü anain pia soʼukai nnojotsü kapüleein süpüla paaʼinrüin jee puunteerü shia» (Deut. 30:11, 16). Nnojoliire noonooin sümaa nünüiki otta naʼwaajüle wanee maleiwa naata nuulia, nnojoleena naaʼinmajüin naya jee mülieena naya. Nnojoliipejeʼe niyüülajüin Jehová naya, eeshii süpüla nouyantüin nachikuaʼa nünainmüin jee noonooin sümaa nünüiki (Deut. 30:1-3, 17-20). Arütkaajeechi Jehová nanainmüin nayaawajaale suulia naainjala jee naaʼinmajeena naya nachikuaʼa.

5. ¿Kasa naaʼinraka Jehová süpüla nükaalinjain na israelita eʼrüliikana wayumüin? (2 Reyes 17:13, 14).

⁵ Kojuyatua neʼrüliin wayumüin na israelitakana nümüin Jehová. Aʼwaajüshii naya maleiwayaasü jee aaʼinrüshii naya kasa kashüülasü. Müliashii maʼin naya sünainjee tia, ayatapejeʼe nükaalinjeein Jehová naya süpüla naʼyataain nachikuaʼa nümüin. Kojuyatua nuluwataain na nünüikimaajanakana süpüla nayaawajaain suulia naainjala jee naʼyataain nachikuaʼa nümüin süka süpüshuaʼa naaʼin (paashajeʼera 2 Reyes 17:13, 14).

6. ¿Kasa naaʼinraka Jehová nakajee na nünüikimaajanakana süpüla nayaawajaain suulia naainjala na israelitakana? (Piirakaa sümüin tü ayaakuaakat).

⁶ Soʼu neʼrüliijaain wayumüin na israelitakana, kojuyatua nuluwataain Jehová na nünüikimaajanakana süpüla naküjain namüin tü alatajatkat nnojorüle nayaawajaain suulia naainjala. Anuujeseʼe nünüiki nükajee Jeremías: «Jiakana israelitakana, jiyaawajaa suulia jaainjala […]. Nnojoleena taʼürülain jia, jama tamüliajülin wayuu [...]. Nnojoleechi taya jashichikuʼu müin jümüin waneepia. Jiyaawajaa suulia jaainjala süka jiʼrüliijaain wayumüin nümüin Jehová chi Jümaleiwasekai» (Jer. 3:12, 13). Anuu tü nümakat Jehová namüin na israelitakana nükajee Joel: «Jüleʼeja jüchikuaʼa tanainmüin süka süpüshuaʼa jaaʼin» (Joel 2:12, 13). Anuu nünüiki nükajee Isaías: «Maa juʼlojookai saaʼin jukuwaʼipa, juuʼulaa suulia aaʼinraa kasa mojusü toʼuluʼu. Juuʼulaa suulia tia» (Is. 1:16-19). Anuukaʼa joo tü nümakat Jehová nükajee Ezequiel: «¿Talatüsüsa taaʼin outule wanee wayuu saaliijee naainjala? [...] Nnojoireejaʼa süpüla talatüin taaʼin saaʼu outuin wanee wayuu. Shia anaka aluʼu müleka niyaawajaale suulia naainjala süpüla katüinjatüin noʼu» (Ezeq. 18:23, 32). Talatüsü naaʼin Jehová niyaawajaale suulia naainjala wanee wayuu, jama anain nümüin katüin noʼu süpüla kaʼikat süpüshuaʼa. Nnojoipejeʼe yalain neʼe Jehová aʼatapajüin niyaawajaain wanee wayuu suulia naainjala. Wekirajaa süchiki tü naaʼinrakat.

7. ¿Kasa nikirajaka anain Jehová na israelitakana nükajee Oseas sümaa Gómer?

⁷ Jülüja waaʼin tü nikirajeekalü anain Jehová na israelitakana nükajee Oseas sümaa Gómer, tü nuʼwayuusekat. ¿Niyüülajüinche Jehová Gómer süka kawalaʼatain Oseas sutuma? Süka nütüjaain saaʼu Jehová tü suluʼukat naaʼin wanee wayuu, anuu nünüiki nükajee Oseas: «Püleʼejira süchikuaʼa tü wayuu kawalaʼatakalü atuma pia. Ai püpüla shia maʼaka alin nüpüla Jehová na israelitakana mayaainjeʼe naʼwaajüin waneirua maleiwayaasü» (Os. 3:1; Prov. 16:2). Jülüja waaʼin ayatayülüin kaainjalain tü nuʼwayuusekat Oseas soʼu nüküjain Jehová tia pütchikat. Nüküjapejeʼe Jehová nümüin Oseas nüleʼejirüinjatüin shia süchikuaʼa jee motuinjatüin naaʼin saainjala.a Tü nikirajeekalü anain Jehová na israelitakana, shia ayatayüliin alin naya nüpüla mayaainjeʼe kaainjalain naya noʼuluʼu. Nuluwataainjeseʼe na nünüikimaajanakana süpüla nakaalinjain naya sünain ayaawajawaa suulia naainjala jee neeʼiratüinjatüin nakuwaʼipa. Nükaalinjeein Jehová wanee wayuu süpüla niyaawajaain suulia naainjala mayaainjeʼe ayatayülin kaainjalain nia. Nütüjaa aaʼu Jehová tü suluʼukat naaʼin wanee wayuu (Prov. 17:3). Wekirajaa sünain tü naaʼinrakat Jehová.

NAAʼINRAKA JEHOVÁ SÜPÜLA WAYAAWAJAAIN SUULIA WAAINJALA

8. ¿Kasa naaʼinraka Jehová nüpüleerua Caín süpüla niyaawajaain suulia naainjala? (Génesis 4:3-7; piirakaa sümüin tü ayaakuaakat).

⁸ Kaainjalashi Caín sünainjee kaainjalain Adán sümaa Eva, na wayuu kachooinkana nia. Nnojotsü nüchecherüin naaʼin suulia tü kasa mojusü jülüjakat naaʼin. Saashin tü Bibliakat nüshatüin nukuwaʼipa chi Yolujaakai (1 Juan 3:12). Soʼu nüsülajüin Caín nümüin Jehová süpüshi nuʼttia, niyoutuin nia sümaa tü nüsülajalakat. Ayatüsia nnojoluin niiʼiratüin Caín nukuwaʼipa, aashichijaashi nia sümaa üttüin maʼin naaʼin. ¿Kasakaʼa naaʼinrüin Jehová? Aashajaashi nia nümaa Caín (paashajeʼera Génesis 4:3-7). Kamaneeshi Jehová soʼu naashajaain nümaa Caín, nüküjaka nümüin naaʼinmajeechin nia naaʼinrüle tü kasa anasükat. Nüküjainña nümüin Caín eein süpüla kaainjalain nia sünainjee naashichijaain. Ayatüshia Caín macheʼein, nnojoishi nia ayaawajaain suulia naainjala. Sünainjee müin nukuwaʼipa, ¿ooʼulaashiche Jehová suulia nükaalinjain na waneinnua süpüla nayaawajaain suulia naainjala? Nnojoishi nia ooʼulaain.

9. ¿Kasa naaʼinraka Jehová nüpüleerua David süpüla niyaawajaain suulia naainjala?

⁹ Aishi maʼin David nüpüla Jehová. Anuujeseʼe nünüiki: «Talatüsü maʼin taaʼin nümaa David» (Aluw. 13:22). Kaainjalashi David, kawalaʼatasü nutuma nuʼwayuuse jee nuʼutira aaʼinchi suʼwayuuse tia wayuukot. Outajachia David saaʼu naainjala saashin tü Pütchi Aapünakat nümüin Moisés (Lev. 20:10; Núm. 35:31). Nükaalinjeein Jehová David süpüla niyaawajaain suulia naainjala. Nuluwataainjeseʼe Natán, chi nünüikimaajachikai süpüla nuʼunuin eemüin David. Nnojotyülia nüküjain achiki David naainjala jee nnojoiyüiya nia ayaawajaain suulia soʼu tia.b Kayaawasesü nutuma Natán nünüiki süpüla niyaawatüin saaʼu David kaainjalain nia. Niyaawataka saaʼu David naaʼinrüin wanee kasa mojuka maʼin nümüin Jehová jee niyaawajaaka suulia naainjala (2 Sam. 12:1-14). Nüshajüin wanee salmo eere nüküjain niyaawajaain suulia naainjala (Sal. 51, pütchi ashajünaka iipünaa sünain). Wainma na wayuu kaainjalakana amülialaakana aaʼin jee ayaawajaakana suulia naainjala sutuma naashajeʼerüin tia salmokot. Talatüsü waaʼin süka watüjaain saaʼu alin David nüpüla Jehová otta nükaalinjain nia süpüla niyaawajaain suulia naainjala.

10. ¿Jamüsü paaʼin süka nnojoluin naashichijaamaatüin Jehová wamüin jee motuin naaʼin waainjala?

¹⁰ Nülerajüin Jehová süpüshuaʼa kasa mojusü (Sal. 5:4, 5). Nütüjaapejeʼe saaʼu waleʼeruʼuin tü kaainjalakat. Aishii waya nüpüla jee nükaalinjain waya kaainjarale waya, nükaalinjainña chi wayuu aaʼinrakai kasa eekai mojuin maʼin süpüla niyaawajaain suulia naainjala jee nürütkaain nünainmüin. Anasü waaʼin saaʼujee motuin naaʼin Jehová waainjala. Jülüjale waaʼin nnojoluin naashichijaamaatüin Jehová jee motuin naaʼin waainjala, waneepiashii waya nümaa jee ayaawajaashii waya suulia waainjala. Wekirajaa süchiki tü nikirajakalü anain Jesús na nikirajüinkana süpüla nayaawajaain suulia naainjala.

TÜ NIKIRAJAKALÜ ANAIN JESÚS NA NIKIRAJÜINKANA

11, 12. ¿Kasa nüküjaka achiki Jesús süpüla watüjaain saaʼu motuin naaʼin Jehová waainjala? (Piirakaa sümüin tü ayaakuaa sünainkat süta tü rewiisütakat).

¹¹ Soʼu juyakat 29 soʼu wakalia, antüsü tü kaʼi nüntajachikalü oʼu chi Mesíaskai maʼaka süküjünüin suluʼu ekirajaaya 31. Nuluwataain Jehová Juan chi Awoutisaajüikai otta müshia Jesús süpüla nekirajüin wayuu süpüla shiyaawajaain suulia saainjala (Mat. 3:1, 2; 4:17).

¹² Soʼu yaajachin Jesús saaʼu tü mmakat nikirajüin wayuu sünain motuin naaʼin Jehová saainjala wayuu. Nüküjain Jesús nüchiki wanee wayuu nümaa nüchon. Oʼunushi chi nüchonkai nipialuʼujee jee naaʼinraka kasa mojusü. Aleʼejüshi nia nüchikuaʼa nipialuʼumüin niyaawajaapa naaʼin. Naashin Jesús «niʼnnaiwaʼaya wattajee nutuma chi nüshikai, sümülialaaka naaʼin naalin». Süpülapünaa nüsakirüin chi nüshikai müleka eere süpüla niʼyataain nümüin, «nuwataakalaka nüpanapa sümaa nukoʼojooin nünain jee nutuʼlaka nuwalapaʼa». Nnojotsü antapünaain suluʼu naaʼin chi jimaʼaikai motuinjatüin naaʼin chi nüshikai tü naainjalakat. «Chi tachonkai [...] machikisai paala, aniikaʼa nia aleʼejüin nüchikuaʼa», müshi nia nümüin (Luc. 15:11-32). Chaiwaʼaya Jesús nümaa chi Nüshikai chaa sirumatuʼu, niʼrüin nümülialaain naaʼin naalin na wayuu kaainjalakana jee motuin naaʼin naainjala na ayaawajaakana suulia naainjala. Atütülaasü waaʼin sutuma tü nikirajakalü anain Jesús süka watüjaain saaʼu amüliajülin maʼin Jehová, chi Washikai.

13, 14. ¿Kasa niyaawataka aaʼu Pedro niyaawajaale suulia naainjala wanee wayuu otta kasa nikirajaka anain na waneinnua? (Piirakaa sümüin tü ayaakuaakat).

¹³ Wainma tü kasa nütüjakat chi aluwataaushikai Pedro sünainjee tü kasa nikirajakalü anain Jesús süchiki motuin naaʼin Jehová naainjala na ayaawajaakana suulia naainjala. Wainma tü kasa mojukat nutuma Pedro, motopejeʼe naaʼin Jesús naainjala. Jamüshijaʼa nia, shapaasü maʼin naaʼin saaʼujee nüküjain apünüintua nnojoluin niʼraajüin chi Señotkai (Mat. 26:34, 35, 69-75). Süsoʼiraapa naaʼin Jesús, eeʼiyalaashi nia nümüin Pedro soʼu chajachin Pedro nümüiwaʼa (Luc. 24:33, 34; 1 Cor. 15:3-5). Nütüjaa aaʼu Jesús niyaawajaain Pedro suulia naainjala, sümülialaaka naaʼin naalin jee motoko naaʼin naainjala (anasü paashajeʼerüle Marcos 16:7).

¹⁴ Niyaawata aaʼu Pedro talatüin naaʼin wanee wayuu niyaawajaale suulia naainjala jee motule naaʼin Maleiwa shia. Nikirajaka na waneinnua süchiki tia. Süchikijee tü miʼiraa kanüliakat Pentecostés, nüküjain Pedro namüin na judíokana nuʼutunuin aaʼin chi Mesíaskai. Anuujeseʼe nünüiki namüin sümaa kamaneein nia: «Anakajaʼa jiyaawajaale suulia jaainjala jee jüleʼeja nünainmüin Maleiwa süpüla sülatinnajatüin jaainjala juulia süsamalaajeetka jaaʼin nutuma Jehová» (Aluw. 3:14, 15, 17, 19). Nüküjain Pedro niyaawajaain wanee wayuu suulia naainjala nuuʼulaale suulia, niiʼiratüle tü kasa mojusü jülüjakat naaʼin otta naaʼinrüle tü kasa nüchekakat Maleiwa. Motule naaʼin Jehová naainjala wanee wayuu naashin Pedro müsü nülaʼajaakai saaʼin tü naainjalakat nuulia. Anuu nünüiki namüin na anoujashiikana: «Nnojoishi ashapajaain [Jehová] suulia amüloulin jia, aluʼu shiainjaʼa nücheküin shiyaawajaainjatüin wayuu süpüshuaʼa suulia saainjala» (2 Ped. 3:9). Wayaawajaale suulia waainjala, jaʼitairü mojuin maʼin shia, jimatüsü waaʼin süka motoleeinña naaʼin Jehová shia.

15, 16. (1) ¿Kasa niyaawataka aaʼu Pablo sünainjee motuin naaʼin Maleiwa naainjala wanee wayuu? (1 Timoteo 1:12-15). (2) ¿Kasa wekirajaajeetka anain sünain tü wane ekirajaayakat?

¹⁵ Wainma kasa mojusü naaʼinraka Saulo chi chejeʼewaikai Tarso. Müliashii maʼin nutuma na nümaajanakana Cristo. Eesüjaʼa jülüjale naaʼin na anoujashiikana nnojoluin süpüla niiʼiratüin nukuwaʼipa Saulo. Nütüjaapejeʼe aaʼu Jesús eein süpüla niyaawajaain Saulo suulia naainjala. Niʼrüin Jesús nümaa Jehová, eein waneirua kasa anaka nutuma Pablo. Anuu nünüiki nüchiki: «Wayuukai chia taneekala süpüla saapajatüin wayuu tachiki» (Aluw. 9:15). Süpüla niyaawajaain Saulo suulia naainjala, aaʼinrüshi Jesús kasa pülasü nüpüleerua (Aluw. 7:58–8:3; 9:1-9, 17-20). Saulo, chi Pablo münakai mapa, ayaawajaashi nia suulia naainjala jee nunoujaka nünain Jesús, aapünüsü aʼyatawaa nümüin nutuma Jesús. Nüküjain Pablo kojuyatua kojutuin nümüin tü naaʼinrakat Jesús otta Jehová nüpüleerua, kamaneeshii naya nümüin jee amülialaasü naaʼin naalin (paashajeʼera 1 Timoteo 1:12-15). Anuujeseʼe nünüiki Pablo namüin na nuwalayuukana: «¿Nnojotsükai piyaawatüin saaʼu nükaalinjain pia Maleiwa süpüla piyaawajaainjachin suulia paainjala?» (Roma 2:4).

¹⁶ Soʼu wanee kaʼi naapüin Pablo nüchiki wanee wayuu aʼluwajiraakai nukuwaʼipa sümaa ayatüin nia naʼaka na anoujashii chajanakana Corinto. ¿Kasa naaʼinrajatka na anoujashiikana naashin Pablo? Sünainjee tü nümakat namüin wayaawata aaʼu aipüralin maʼin Jehová nüchiaale wanee wayuu anoujakai jee nümülialaain naalin niyaawajaale suulia naainjala. Washata sukuwaʼipa tü naaʼinrakat Jehová. Sünain tü wane ekirajaayakat, wekirajaajeerü anain tü naaʼinrajatkat na anoujashii chajanakana Corinto.