Tü waaʼinrajatkat süpüla anain süchiaaya wayuu

1. (1) ¿Jaralii na anakana süpüla achiawaa? (2) ¿Jamüsü naaʼinrajatka tia?

EESHII na wayuu atüjakana süpüleerua anain nanüiki nachiajaapa wayuu jee mapüleein shia namüin. Eepejeʼe na wayuu kapüleekana amüin tia. Eejeerü kaʼi choʼujaajeetka wachiajaainjanain na waneinnua. Jaʼitasü kapüleein maʼin shia wamüin waaʼinreerü tia süka alin naya wapüla. Naashin Jesús shiyaawateerü wayuu jaralin na nikirajüinkana aijiraale naya (Juan 13:35). Sutumajee alin wapüla na wawalayuukana waküjeerü pütchi aneetkalü atuma nakuwaʼipa soʼu tü kaʼi choʼujaakalü oʼu shia namüin. Saashin tü Bibliakat aleeweeshi maʼin wanee wayuu nüchiaale chi naʼaleewainkai «süka anakalü akuwaʼipa» (Prov. 27:9).

2. (1) ¿Kasa jülüjainjatka naaʼin na laülaashiikana nachiajaapa wanee wawala? (2) ¿Jamüsü anakaʼa müle sukuwaʼipa natuma? (Paashajeʼera tü pütchikat «¿Jamüinjatü sukuwaʼipa nünüiki chi wawala oʼunirakai tü outkajawaakat Wakuwaʼipa otta Waʼyataain nümüin Maleiwa?»).

² Sükajee nayain na laülaashiikana suluʼu tü outkajaaleekat aneekünakana nutuma Jehová otta Jesús süpüla naaʼinmajüinjanain na anoujashiikana anainjatü sukuwaʼipa tü pütchi nachiajaakalü aka wayuu (1 Ped. 5:2, 3). Wanee kasa naaʼinmajaka aka waya shia sükajee tü pütchi anakat maʼin ayuʼluushikat suluʼujee tü Bibliakat naküjaka sünain tü outkajawaakat. Wane kasa naaʼinrajatka shia natütüleʼerüin waaʼin waneʼewai wakua jee nakaalinjain na wawalayuu eemiajaakana anoula süpüla naleʼejüin nachikuaʼa. ¿Kasa naaʼinrajatka na laülaashiikana jee napüshuaʼa na wawalayuukana süpüla naküjain wanee pütchi aneetkalü atuma sukuwaʼipa wayuu?

3. (1) ¿Kasa waaʼinrajatka süpüla watüjain süpüleerua wanüiki wachiajaapa wayuu? (Isaías 9:6; paashajeʼera tü pütchikat «Washata nukuwaʼipa Jesús wachiajaapa wayuu») (2) ¿Kasa wekirajaainjatka anain sünain ekirajaayakat tüü?

³ Aneerü sukuwaʼipa wanüiki wachiajaapa wayuu wekirajaale sünain nakuwaʼipa na wayuu saashajaakana achiki tü Bibliakat maʼaka naaʼin Jesús, chi Atüjakai maʼin Achiawaa saashin tü Bibliakat (paashajeʼera Isaías 9:6). Sünain ekirajaayakat tüü, wekirajaajeerü anain tü wanüikinjatkat nümüin wanee wayuu achuntakai nükaalinjünüin süpüla nüneeküin wanee kasa otta tü waaʼinrajatkat weʼrüle wanee wayuu choʼujaakai amüin nüchiajaanüin. Wekirajaajeerü anain jamüin anaka wachiaale wanee wayuu soʼu tü kaʼi anakalü oʼu nümüin otta jamüin anainjatka sukuwaʼipa wanüiki nümüin.

SUCHUNTUNAPA WAMÜIN WAKAALINJAINJANAIN

4, 5. Nuchuntule wanee wayuu kaalinwaa süpüla nüneeküin wanee kasa, ¿kasa wasakireʼerüinjatka anain waaʼin? Püküja wanee sukuwaʼipa.

⁴ Nuchuntule wanee wayuu nükaalinjünüin süpüla nüneeküin wanee kasa nnojotsü anain waküjamaatüle nümüin tü naaʼinrüinjatkat. Anashii wasakirüle waaʼin sünain tüü: «¿Tatüjaa aaʼuche tü nütüjaweekalü aaʼu chi wayuukai süpüla takaalinjain nia?». Eepejeʼe süpüla wakaalinjain nia süpüla yootuin nia nümaa wanee wayuu atüjakai süpüleerua tü nütüjaweekalü aaʼu.

⁵ Jülüjataa waaʼin ayuulin wanee waʼaleewain. Nüküjaka wamüin ekirajaain nia süchiki tü eekat süpüla nipinasein, nüsakitka waya mapa jeʼtsüin tü anakat süpüla nüneeküin. Mayaainjeʼe watüjaain saaʼu tü anakat süpüla nüneeküin saaʼin wamüin nnojotsü anain waküjale shia nümüin, jama nnojoluin tottooluin waya süpüla waküjain nümüin tü nipinaseinjatkat. Shia anaka aluʼu wakaalinjale chi waʼaleewainkai süpüla yootuin nia nümaa wanee wayuu atüjakai süpüleerua tia.

6. ¿Jamüsü nnojotkaʼa anain waküjamaatüle nümüin wanee wayuu tü naaʼinrüinjatkat?

⁶ Mayaainjeʼe watüjaain saaʼu tü nüsakirakalü anain waya wanee wayuu, nnojotsü waküjamaatüinjatüin nümüin tü naaʼinrajatkat. Jülüjainjatü waaʼin tü wanüikinjatkat süpülapünaa wasoutuin. Anuu tü sümakat Proverbios 15:28: «Chi wayuu lotokoi akuwaʼipa, jülüjasü naaʼin palajana jamüinjatüin nusoutia». Eesüjaʼa jülüjale waaʼin watüjaain saaʼu tü wanüikinjatkat saaʼin wamüin. Anapejeʼe wekirajaale palajana jee wasakireʼerüle waaʼin sünain tü wanüikinjatkat otta wachunta nümüin Jehová nükaalinjai waya. Müle shia watuma eesüjaʼa süpüla pansaain tü wamakat sümaa tü anakat nümüin Jehová. Wekirajaa süchiki tü alatakat nümüin Natán, chi nünüikimaajachikai Maleiwa.

7. ¿Kasa watüjaka sünainjee tü alatakat nümüin Natán?

⁷ «Takumajireein tü aʼwaajüleekat Jehová», müshi David nümüin Natán. Anaka saaʼin nümüin Natán tia. Nnojotpejeʼe nücheküin Jehová nüpüleerua David niainjachin akumajüin tü aʼwaajüleekat. Anayülejeʼe naʼatapajüle Natán niain Jehová aküjain nümüin tü aainjünajatkat (1 Crón. 17:1-4). Wachuntunüle amüin kaalinwaa süpüla süneekünüin wanee kasa nnojoishii waya asoutamaatüinjanain shiʼipajee tü münakat wamüin (Sant. 1:19).

8. ¿Kasa tü eejüinjatkat oulia waaʼin?

⁸ Eejeesü waaʼin suulia wasounnajaamaatüin shiʼipajee tü münakat wamüin süka eein süpüla wayain kasirüin mojuin süneekia wanee kasa nutuma chi wayuu wakaalinjakai. Müsüjeseʼe nnojoluin anain waküjamaatüle namüin na waneinnua tü naaʼinrüinjatkat.

CHOʼUJAAPA NÜMÜIN WANEE WAYUU NÜCHIAANÜIN

9. ¿Kasa natüjaweeka aaʼu palajana na laülaashiikana süpülapünaa nachiajaain wanee wawala? (Galacia 6:1).

⁹ Eeshii nachiajaale na laülaashiikana suluʼu tü outkajaaleekat «wanee wayuu eekai nükatalaweein suulia tü nukuwaʼipakat sünain anoujaa» maʼaka süküjain Galacia 6:1 (paashajeʼera). Chi saashajaakai achiki pütchikat tüü nia wanee wayuu amatchinjaakai nunoula, nnojoyüipejeʼe kaainjalain nia. Nakaalinjeein maʼin nia na laülaashiikana süpüla katchin nunoula jee ayatüin nia suluʼu tü wopu katüinjatkalü atuma noʼu (Sant. 5:19, 20). Natüjawee aaʼu na laülaashiikana eere tü kasa nükatalaweekalü atuma suulia nukuwaʼipa sünain anoujaa. Sotuinjatü naaʼin na laülaashiikana nuuʼulaain Jehová waneeküinjatüin süka waaʼin wamüiwaʼa tü anakat saaʼin wamüin (Roma 14:1-4). Neʼrüle na laülaashiikana choʼujaain nümüin nüchiajaanüin, ¿jameerü sukuwaʼipa natuma?

10-12. ¿Jamüinjatü sukuwaʼipa natuma na laülaashiikana neʼrüle choʼujaain nüchiaanüin wanee wawala? Püküja wanee sukuwaʼipa (Piirakaa sümüin tü ayaakuaakat).

¹⁰ Eesüjaʼa kapüleere namüin na laülaashiikana nakaalinjain wanee wayuu choʼujaakai amüin achiaanüin. Nüküjain chi aluwataaushikai Pablo eeshijaʼa nnojorüle niyaawatüin saaʼu nukuwaʼipa chia wayuukai. Müsüjeseʼe nachajaainjatüin sukuwaʼipa na laülaashiikana mapüleeinjatüin sukuwaʼipa süpüla naapaainjatüin amaa tü achiajaanakalü oulia nia.

¹¹ Weʼitaa wanee sukuwaʼipa. Jamüsüjeʼe süpünajünüinjatüle suluʼu wanee mma eekai josoin jee ichein maʼin aʼyataanüsü tü mmakat palajana süpüla kettaain shia süpüla apünajaa suluʼu. Süchikijee ejitünüsü tü waüyeekat jee oʼyotunüsü wüin saaʼu. Akaʼaya na laülaashiikana, nachajaainjatü sukuwaʼipa süpüla nakaalinjain chi wawala choʼujaakai amüin nüchiajaanüin. Kamaneere jee anamiale chi laülaashikai mapüleejeerü nümüin chi wawala achiajaanakai naapaain amaa tü münakat nümüin. Shiasaʼa anapa saaʼin nümüin yootoo nümaa, eeshi süpüla nüküjain chi laülaashikai alin nia nüpüla, niʼreein aneein nukuwaʼipa jee yooteein nia nümaa.

¹² Nüküjale chi laülaashikai suluʼu tü outkajaaleekat eein tü kasa nnojotkat anawalüin watuma wapüshuaʼa jee choʼujaain wamüin wachiajaanawalüin, mapüleejeerü nümüin chi wawalakai naapaain amaa tü münakat nümüin (Roma 3:23). Nüchajaainjatü sukuwaʼipa süpüla nnojoluinjatüin alin nünüiki nümüin süka kojutuin nümüin. Nükaalinjainjachin nia sükajee tü Bibliakat süpüla niyaawatüinjatüin saaʼu kasain wayuu tü nunouteʼerüinjatkat sünain nukuwaʼipa. Shiasaʼa niyaawatapa saaʼu tia, nüküjeerü chi laülaashikai nümüin tü sukuwaʼipainjatkat süpüla nunouteʼerüin shia. Shiasaʼa kettaapa nüchiajaain nia anashi nütütüleʼerüle naaʼin sutuma eein tü kasa anasü naaʼinrakat otta anashi nuʼuraajüle nümaa (Sant. 5:15).

13. ¿Kasa eeka süpüla naaʼinrüin na laülaashiikana süpüla natüjaain saaʼu niyaawatüle chi wawalakai tü naaʼinrüinjatkat?

¹³ Eesüjaʼa kapüleere nümüin wanee wayuu niyaawatüin saaʼu kasain wayuu tü nunouteʼerajatüin sünain nukuwaʼipa. ¿Kasa naaʼinrajatka na laülaashiikana süpüla nakaalinjain nia? Eeshii süpüla nasakirüin nia niyaawatülejeʼe saaʼu chi wawalakai tü naaʼinrajatkat (Ecl. 12:11).

TÜ KAʼI ANAKALÜ OʼU SÜCHIAANÜIN WAYUU OTTA TÜ SUKUWAʼIPAINJATKAT

14. ¿Jamüsü nnojotkaʼa anain wachiajaale wanee wayuu sümaa jashiee?

¹⁴ Eesüjaʼa nnojorüle anain namüin na waneinnua tü waaʼinrakat jee tü wamakat, jama kaainjaralin waya wapüshuaʼa (Col. 3:13). Süküjain tü Bibliakat eejeerüin kaʼi jashichijiraajeenakalü oʼu waya namaa na waneinnua (Éf. 4:26). Nnojotpejeʼe anain wachiajaale wanee wayuu sümaa jashiee süka «naashichijaale wanee wayuu nnojotsü nuuntuin lotuin nukuwaʼipa maʼaka tü nüchekakat Maleiwa süpüleerua wayuu» (Sant. 1:20). Wachiajaale wanee wayuu sümaa jashichin waya amojujalejeerü sukuwaʼipa, shia anaka aluʼu jimatüle waaʼin süpülapünaa yootuin waya nümaa chi wayuu mojukai anüiki paala wamüin. Wekirajaa sünain nukuwaʼipa Elihú sükajee anain sukuwaʼipa nünüiki nümüin Job.

15. ¿Kasa watüjaka sünainjee nukuwaʼipa Elihú? (Piirakaa sümüin tü ayaakuaakat).

¹⁵​Niʼrüin Elihú nnojolin koʼutuin Job shiʼipajee airuʼuluin nanüiki nümüin na naʼaleewainyuukana. Mayaainjeʼe nümülialaain naaʼin Elihú naaʼujee Job aashichijaashi nia sutumajee nnojolin anain nünüiki Job nüchiki Jehová. Naʼatapajüin Elihú jimatüinjatüin naaʼin süpüla nüchiaanüinjachin Job nutuma jama kojutuin nia nümüin (Job 32:2; 33:1-7). Tü watüjakat sünainjee nukuwaʼipa Elihú shia anain wachiajaale wayuu soʼu tü kaʼi anakalü oʼu shia namüin sümaa kojutuin naya wamüin jee alin naya wapüla (Ecl. 3:1, 7).

AYATA WAKAALINJAIN NA CHOʼUJAAKANA AMÜIN ACHIAJAANAA OTTA WAAPAA SÜMAA TÜ ACHIAJAANAKALÜ OULIA WAYA

16. ¿Kasa watüjaka sünainjee tü sümakat Salmo 32:8?

¹⁶​«Tachiajaajeechi pia sümaa jülüjain pia taaʼin», müsü nünüiki Jehová (paashajeʼera Salmo 32:8). Wanaa sümaa nüchiaain waya Jehová nükaalinjain waya süpüla wanouteʼerüin wakuwaʼipa. Anasü washatüle nukuwaʼipa Jehová wachiajaapa wayuu. Wakaalinja naya süpüla naapaainjatüin amaa tü münakat namüin.

17. Saashin Isaías 32:1, 2, ¿kasa maka aaʼin na laülaashiikana nachiajaapa waya?

¹⁷ Choʼujaashaatasü maaʼulu yaa wachiajaanüin jee wakaalinjain na choʼujaakana amüin nachiaanüin (2 Tim. 3:1). Na laülaashiikana suluʼu tü outkajaaleekat müshii aka saaʼin «wüin palatüsü suluʼu wanee mma jososhiisü». Pansaale nachiajaaya jee wanaapünaale shia sümaa tü nümakat Jehová (paashajeʼera Isaías 32:1, 2). Kojutusü wamüin nachiaale waya na waʼaleewainkana wanaapünaa sümaa tü wanouteʼerajatkat sünain wakuwaʼipa, tü nanüikikat «müsü aka saaʼin mansaana aainjuushi süka ooro otta akanoʼujunaka süka pülaata» (Prov. 25:11). Wachajaa sukuwaʼipa süpüla watüjainjanain akaalinjaa na choʼujaakana amüin achiaanaa jee waapaa sümaa tü münakat wamüin.