Kojuta wamüin tü naainjakat Maleiwa wapüleerua

1, 2. (1) ¿Jamüsü sülanaʼaleeka tü naapakat Jeʼwaa wamüin naashin Pablo? (2) ¿Jarat tü pütchi wasoukteetkalü eʼipajee sünain ekirajaayakat tüü?

AISHAATASHII maʼin waya nüpüla Jeʼwaa, nuluwataainjeseʼe chi Nüchonkai yaa Mmapaʼamüin süpüla naapajiraain nikii waaʼu (Juan 3:16; 1 Juan 4:9, 10). Tia shia wanee kasa anashaatasü maʼin naainjaka Jeʼwaa süpüleerua wayuu. Anuujeseʼe nünüiki Pablo süchiki tia: «Alanaʼaleesia maʼi tü naapakat wamüin suulia kasakat süpüshua» (2 Cor. 9:15). ¿Jamüsü sülanaʼaleeka tü naapakat Jeʼwaa wamüin naashin Pablo?

² Nütüjaatüjülia aaʼu Pablo sünain shiimain nikeraajüinjatüin Maleiwa süpüshuaʼa tü nümatüjütkalia paala sümaiwa sükajee naapajiraaichipain nikii Jesuu süpüla ouktaa (paashajeʼera 2 Corinto 1:20). Eesü waneeirua kasa naapaka Jeʼwaa wamüin, nnojotsü shiain neʼe tü naainjakat wapüleerua wanaa sümaa naapüin chi Nüchonkai waaʼu. Aishii maʼin waya nüpüla otta wainma kasa anasü naapaka wamüin. Müshijeseʼe nümüin Pablo: «Alanaʼaleesia maʼi tü naapakat wamüin suulia kasakat süpüshua». Anashaatasü maʼin tia. ¿Jamüsüche waaʼin sutuma tia kasa anasü naapakat Jeʼwaa wamüin? ¿Kasa waaʼinrüinjatka sutuma sülüʼülüin sükalia tü Outkajawaakat eere Sotuin Waaʼin Ouktüin Jesuu? Soʼu juyakat tüü, aainjüneerü tia outkajawaakat maatsoʼu 23.

ANAʼLEESIA MAʼIN TÜ NAAPAKAT MALEIWA WAMÜIN

3, 4. (1) ¿Jamüsü waaʼin saapünüle wamüin wanee kasa anasü? (2) ¿Jamüsü eeka süpüla shiiʼiranajaain nukuwaʼipa wanee wayuu sutuma wanee kasa aapünaka nümüin?

³ Talatüshii waya saapünüle wamüin wanee kasa anasü. Eepejeʼe waneeirua kasa aapünaka wamüin eeka süpüla shiiʼiranajeʼerüin wakuwaʼipa. ¿Suluʼu jamüin? Jamüshijaʼa puʼutünüinjachire aaʼin saaliijee kaainjalain pia, shiasaʼa nüntataarüle wanee wayuu nnojoikai piʼraajüin sünain maa: «Waʼle, tayeechi aapajiraaka tekii pooʼopünaa», ¿jameerü paaʼin sutuma tia?

⁴ Eesüjaʼa süpüla shiiʼiranajaain pukuwaʼipa suluʼujee tia, ¿aashimüin? Eeshijaʼa süpüla aipüraleechin maʼin pia wayuu, eeshijaʼa süpüla asülajüleechin maʼin pia otta moteerüin paaʼin saainjala wayuu pümüin. Wainmeetkajasaʼa maʼin kasa paaʼinraka süpüla piiʼiyatüin sünain kojutüin pümüin tü naaʼinrakat püpüleerua chia wayuukai.

5. ¿Jamüsü sülanaʼaleeka sünain anain tü naainjakat Maleiwa wapüleerua?

⁵ Alanaʼaleesia maʼin sünain anain tü naainjakat Jeʼwaa wapüleerua suulialeʼeya tü naainjakat chi wayuu waküjakai achiki (1 Ped. 3:18). Sutuma waleʼeruʼuin tü kaainjalaakat, ouktajanayaa paala waya (Roma 5:12). Niasaʼa chi Maleiwakai saaliijee alin waya nüpüla, nuluwataain chi Nüchonkai süpüla naapajiraain nikii waaʼu (Heb. 2:9). Ooʼulaajeerü tü ouktaakat süka naapajiraain nikii Jesuu waaʼu (Is. 25:7, 8; 1 Cor. 15:21, 22, 24-26). Napüshuaʼa na eʼitaakana naaʼin nünain Jesuu, katüinjatü noʼu süpüla kaʼikat süpüshuaʼa sümaa talatüin naaʼin jee anain naaʼin waneepia. Eeshii na chainjanakana aluwataain chaa iipünaa nümaa Kürisüto otta eeshii na yaainjanakana kepiain yaa Mmapaʼa (Roma 6:23, TNM; Alat. Map. 5:9, 10). Eepejeʼe waneeirua kasa anasü naapüinjatka wamüin Maleiwa.

6. (1) Sünainjee tü kasa anasü naaʼinrüinjatkat Maleiwa, ¿kasa piʼreeka amüin? (2) ¿Kasaka waaʼinrüinjatüin süpüla weeʼiyatüin sünain kojutüin wamüin tü naaʼinrakat Jeʼwaa nümaa Jesuu?

⁶ Paʼaraiisüinjatü tü Mmakat nutuma Maleiwa, nnojoleerü ayuulin wayuu otta asoʼiraajeerü naaʼin nachikuaʼa na ouktüshiikana. Tia, süpüshi tü kasa anasü naaʼinrajatkat Maleiwa wapüleerua (Is. 33:24; 35:5, 6; Juan 5:28, 29). Aishaatashi maʼin wapüla Jeʼwaa nümaa Jesuu saaʼujee tü kasa naainjakat wapüleerua. ¿Kasaka waaʼinrüinjatüin süpüla weeʼiyatüin sünain kojutüin wamüin tü naaʼinrakat? Washatüinjatü nukuwaʼipa Jesuu, alinjana wapüla na wawalayuukana otta motoleeinjatia waaʼin naainjala na wawalayuukana wamüin.

WASHATÜINJATÜ NUKUWAʼIPA JESUU

7, 8. (1) ¿Kasa waaʼinreetka naashin Pablo kojutüle wamüin palajana tü naaʼinrakat Jesuu wapüleerua? (2) ¿Jamüinjatü sukuwaʼipa tia watuma?

⁷ Sutuma alin maʼin waya nüpüla Jeʼwaa, keeʼireeinjatü maʼin waaʼin kojutüinjachin Jesuu sümüin wayuu sükajee tü wakuwaʼipakat. Anuujeseʼe nünüiki Pablo: «Süpüshua tü kasa anasü taaʼinrakat, taaʼinrüin süka alin maʼi waya nüpüla Cristo» (paashajeʼera 2 Corinto 5:14, 15). Naashin Pablo, kojutüle wamüin palajana tü naaʼinrakat Jesuu wapüleerua, aijeechi nia wapüla otta weeʼiyateerü nujutü nümüin. Wayaawatapa saaʼu anain maʼin tü naainjakat Jeʼwaa wapüleerua, waaʼinreerü tü kojuteechikalü atuma Jesuu. ¿Jamüinjatü sukuwaʼipa tia watuma?

⁸ Oushikajaainjana waya süchiirua nukuwaʼipa Kürisüto (1 Ped. 2:21; 1 Juan 2:6). Sükajee woonooin sümaa nünüiki Maleiwa otta nünüiki Kürisüto, weeʼiyatüin sünain alin naya wapüla. Müshi Jesuu: «Chi eekai noonooin sümaa tü taluwataakat anain nia, niaʼaya aika apüla taya. Je saaʼu alin taya nüpüla, aijeechi nia nüpüla chi Tashikai. Je aijeechi nia tapülaya sümaa teeʼiyatüin takuaippa nümüin» (Juan 14:21; 1 Juan 5:3).

9. ¿Kasa eejüinjatka oulia waaʼin?

⁹ Süka sükalioʼujanain waya tü Outkajawaakat eere Sotuin Waaʼin Ouktüin Jesuu, anasü wasakireʼerüle waaʼin sünain kasain maʼin tü waaʼinmaakat (paashajeʼera «Pütchi pütüjaainjatka aaʼu»). Wasakireʼera waaʼin sünain tüü: «¿Kasa tashataka sünainjee nukuwaʼipa Jesuu? ¿Kasache tü nnojoyütkalia tashatüin sünainjee nukuwaʼipa?». Anasü jülüjale waaʼin tüü suulia washatüin nakuwaʼipa na manoujainsaliikana (Roma 12:2). Jamüsüjaʼa nnojorüle eejüin waaʼin suulia tia, eesüjaʼa süpüla washatajüin nakuwaʼipa na profesootkana, na ojuʼitakana suluʼu telewisoot otta na ashaittüliikana woola (Col. 2:8; 1 Juan 2:15-17). ¿Kasaka waaʼinrüinjatüin süpüla nnojoluin washatüin nakuwaʼipa na manoujainsaliikana?

10. (1) ¿Kasa anaka süpüla wasakireʼerüin anain waaʼin süka sülüʼülüin tü Outkajawaakat eere Sotuin Waaʼin Ouktüin Jesuu? (2) ¿Kasa eeka süpüla wanoukteʼerüin sünain wakuwaʼipa? (Piirakaa sümüin tü ayaakua suluʼukat süpana 12).

¹⁰ Alüʼütsü maʼin tü Outkajawaakat eere Sotuin Waaʼin Ouktüin Jesuu, müsüjeseʼe anain jülüjale waaʼin anale sukuwaʼipa waʼanaaya, jaralin tü muusika kamalainkat wamüin, tü peliikula wanajawaikat ooʼulaka kasain waaʼinrawalin suluʼu waserulaatse, wakonputadootse otta wataapülain. Wasakireʼera waaʼin sünain tüü: «¿Japüijeeiche taya niʼrüle Jesuu tü taʼanaayakat?» (paashajeʼera 1 Timoteo 2:9, 10). «¿Teeʼiyatüinche sükajee taʼanaaya sünain tashatüin nukuwaʼipa Jesuu? ¿Nünajeetche Jesuu tü peliikula tanajawaikat? ¿Naapajeetche tü muusika kamalainkat tamüin? ¿Taʼanapireeiche Jesuu taserulaatse, takonputadootse jee shiale tataapülain süpüla niʼrüinjatüin tü eekat suluʼu? ¿Teeʼiyateetche nümüin Jesuu tü videojuego kamalainkat tamüin sümaa taküjeerüin nümüin jamüin kamalainka shia tamüin?». Müleka shiimainre alin wapüla Jeʼwaa, anasü wojutüle süpüshuaʼa tü kasa eekat süpüla mojuin atuma nukuwaʼipa wanee anoujashi. Anasü wojutüle tia kasakalüirua jaʼitairü kojutüin shia (Aluw. 19:19, 20). Waapaiwaʼaya waaʼin nümüin Jeʼwaa, waküjüin nümüin sünain kojutüinjachin wamüin Kürisüto sükajee tü wakuwaʼipakat. Müsüjeseʼe nnojoluinjatüin eein wamaʼana wanee kasa eekai kapüleejeerüin atuma wamüin ashataa nukuwaʼipa Jesuu (Mat. 5:29, 30, TNM; Filip. 4:8).

11. (1) ¿Kasa eeka süpüla waaʼinrüin sutuma alin wapüla Jeʼwaa nümaa Jesuu? (2) ¿Kasa eeka süpüla waaʼinrüin napüleerua na wawalayuukana suluʼu tü outkajaaleekat?

¹¹ Wanee kasa eeka süpüla waaʼinrüin müleka aire wapüla Jeʼwaa nümaa Jesuu, shia waküjüinjanain maʼin pütchi otta wekirajüin wayuu (Mat. 28:19, 20; Luc. 4:43). Süka sülüʼülüin tü Outkajawaakat eere Sotuin Waaʼin Ouktüin Jesuu, anashii müleka pürekutsoorüle aaʼusiliaat waya süpüla waküjüin pütchi 30 oora jee shiale 50 oora. Eetaashi wanee wawala ouktakai aʼwayuuse, 84 nuuyase. Nnojoishi süpüla pürekutsoolüinjachin nia naaʼinruʼu süka laülaaichin nia jee ayuulin nia. Nayasaʼa na pürekutsoot pejekana epia nünain, nakaaliinjain nia. Nasaajawalin nia süpüla nüküjüinjachin pütchi otta naneeküin eere anain süpüla nüküjüin pütchi. Sutuma tia, nuuntüin nüküjüin pütchi chia wawalakai 30 oora soʼu wanee kashi. Akaʼaya waya, anashi wakaaliinjale wanee wawala süpüla pürekutsoolüin nia maatsoʼu jee shiale aaʼuriiroʼu. Eesüjaʼa süpüla kapüleein wamüin pürekutsoolüin waya. Eepejeʼe süpüla kooʼomüin watuma waʼyataain nümüin Jeʼwaa. Waaʼinrüle tia, weeʼiyateerü sünain kojutüin wamüin tü naainjakat Jesuu wapüleerua maʼaka kojutüin shia nümüin Pablo. ¿Kasa maa waaʼinrajatka süpüla weeʼiyatüin sünain kojutüin wamüin tü naaʼinrakat Jeʼwaa wapüleerua?

ALINJANA WAPÜLA NA WAWALAYUUKANA

12. ¿Kasa waaʼinrajatka süpüla alinjanain waya nüpüla Maleiwa?

¹² Wanee kasa waaʼinrajatka saaʼu alin waya nüpüla Maleiwa shia alinjanain wapüla na wawalayuukana. «Saaʼu alin maʼi waya nüpüla chi Maleiwakai, anakaja aijiraale waya wapüshua», müshi chi aluwataaushikai Juan (1 Juan 4:7-11). Müleka keeʼireere waaʼin alin waya nüpüla Maleiwa, alinjana wapüla na wawalayuukana (1 Juan 3:16). ¿Kasa waaʼinrajatka süpüla weeʼiyatüin naalin wapüla na wawalayuukana?

13. ¿Kasa washatüinjatka sünainjee nukuwaʼipa Jesuu?

¹³ Niiʼiyatüin Jesuu wamüin sünain jamüinjatüin sukuwaʼipa saalin wayuu wapüla. Jamüshijaʼa nia yaaiwaʼaya yaa Mmapaʼa, nümüliajüin na wayuu anamiakana. Niiyajüin na ayuuikana, na eekai masaʼain, na moʼusaliikana, na moʼukana ekii otta na manüisaliikana (Mat. 11:4, 5). Naatashaana maʼin nukuwaʼipa Jesuu suulia nakuwaʼipa na fariseokana, süka jamüin, keejiashaanain nümüin Jesuu ekirajaa na wayuu atüjeekana nüchiki Maleiwa (Juan 7:49). Akaʼaya nia, aishii nüpüla na wayuu müliakana aaʼin otta nüchajaain sukuwaʼipa süpüla nükaaliinjain naya (Mat. 20:28).

14. ¿Kasa eeka süpüla waaʼinrüin süpüla weeʼiyatüin sünain alin wapüla na wawalayuukana?

¹⁴ Anasü wachajaale sukuwaʼipa süpüla wakaaliinjain na wawalayuukana maaʼutpünaa yaa süka sülüʼülüin sükalia tü Outkajawaakat eere Sotuin Waaʼin Ouktüin Jesuu. Nayainjanapajaʼa jülüjain maʼin waaʼin na laülaayuuinnakana. Eeshii süpüla wawaraijaain naaʼu, wakolojuin wanee kasa neküin, eeshii süpüla wakaaliinjain naya sünain epitajaa nepia, oʼlojoo iita jee anaataa wanee kasa nepialuʼu, eeshii süpüla wamaain naya sünain tü outkajawaakat otta sünain aküjaa pütchi (paashajeʼera Lucas 14:12-14). Süka alin waya nüpüla Maleiwa, weeʼiyatüinjatü sünain alin wapüla na wawalayuukana.

MOTOLEEINJATIA WAAʼIN NAAINJALA NA WAWALAYUUKANA WAMÜIN

15. ¿Kasa wayuu tü kojutüinjatka wamüin?

¹⁵ Tü wanee kasa waaʼinrajatkat saaʼu alin waya nüpüla Maleiwa shia motuinjatüin waaʼin naainjala na wawalayuukana wamüin. Saaʼu nuuʼuliwoʼuin waya Adán, waleʼeruʼusü tü kaainjalaakat jee ouktüshii waya, müsüjeseʼe choʼujaain wamüin wayakana wapüshuaʼa naapajiraain nikii Jesuu waaʼu. Jaʼitaichi chi eekai jüüjüüshaanain nümüin Maleiwa, choʼujaasia nümüin tia. Makalaka kojutüinjatüin wamüin naawalüin waya Maleiwa suulia tü wojuyaalakat nuulia. ¿Jamüsü kojutüinjatka tia wamüin? Wekirajaa sünain tü nümakat Jesuu.

16, 17. ¿Kasa nikirajeeka anain waya Jesuu sükajee tü nukuentajakat?

¹⁶ Nukuentajüin Jesuu nüchiki wanee achepchiee kojuyaalakai 60 miyoone nneerü pülaata nuulia wanee aluwataai. Naawalapejeʼe nia chi aluwataaikai, nuuʼulaain nüpüla tü nünneetsekat mayaapejeʼe wainmain maʼin shia. «Otta chi achepchieekai, nuʼunakalaka nünainmüin wane achepchiee wanaa nümaa. Nujuyaajirüin paala wane palitchon neerü [100 nneerü pülaata]», nüchekajaka nümüin sümaa nnojoluin naawalüin nia. Kojutüle nümüin chia achepchieekai tü naainjakat chi aluwataaikai nüpüleerua, nnojotsüjeʼe nüchekajüin tü ojuyaalaakat nuulia. Shiasaʼa nütüjaapa saaʼu tia chi aluwataaikai, jashichishaatashi maʼin nia. Nuunejirüinjeseʼe chi achepchieekai sünain nümüin nümüin: «Aashin tooʼulaayaainkain tü tanneetsekat püpüla süka püchuntüin tamüin taawalüin pia. Mojushiisü tamüin nnojolüin pümüliajüin chi püpüshikai maa aka tamüliajüin pia» (Mat. 18:23-35). ¿Kasa nikirajeeka anain Jesuu sükajee tü nukuentajakat? Wanaa sümaa motuin naaʼin Jeʼwaa tü waainjalakat müsü nuuʼulaakai saaʼin wapüla wainmashaata nneerü wojuyaalaka paala nuulia. Kojutüle wamüin tü naainjakat Jeʼwaa wapüleerua, ¿kasa waaʼinrüinjatka?

¹⁷ Süka pejein sükalia tü Outkajawaakat eere Sotuin Waaʼin Ouktüin Jesuu, anasü wasakireʼerüle waaʼin sünain tüü: «¿Kapüleesüche tamüin motuin taaʼin naainjala wanee tawala eekai airuʼuluin nünüiki tamüin?». Müle shia, washata nukuwaʼipa Jeʼwaa, nücheküin nülatirüin suulia wayuu tü saainjalakat (Sal. 86:5; Neh. 9:17). Kojutüle wamüin motuin naaʼin Jeʼwaa tü waainjalakat, motoleejeeria waaʼin naainjala na wawalayuukana woulia. Müleka keeʼireere waaʼin alin waya nüpüla Jeʼwaa otta motuin naaʼin waainjala, alinjana wapüla na wawalayuukana otta motuinjatü waaʼin naainjala wamüin (Mat. 6:14, 15). Talateerü maʼin waaʼin motule waaʼin tü aainjünakat wamüin, jaʼitasü alin paala shia wamüin.

18. ¿Kasa saaʼinraka Lily süpüla ayatüinjatüin sükaaliinjain Carol?

¹⁸ Eesü kaʼi eere alin maʼin wamüin tü naainjakat wanee wawala (paashajeʼera Éfeso 4:32 otta Colosas 3:13, 14). Anuu tü alatakat sümüin wanee wawala, Lily sünülia.^[1] Saashin shiaka, sükaaliinjain wanee wawala oukta aʼwayuuset, Carol sünülia. Sümaʼawaisü shia sünain ayaʼlajaa jee suʼunajaale jalapünaa. Mayaapejeʼe sükaaliinjain maʼin Lily Carol, younakuʼu müsü Carol. Kapüleʼewaisü sümüin Lily anajiraainjatüin shia waneepia sümaa Carol. Shiapejeʼe jülüjain saaʼin Lily tü akuwaʼipaa anasü eekat sünain Carol. Sutuma saaʼinrüin tia, ayatüsia sükaaliinjain Carol soʼu kojuyasü juya; ouktüsü mapa Carol sutuma wanee ayuulii. Saashin Lily, shiʼree amüinrü Carol süsoʼiraapa saaʼin süchikuaʼa, lotopa sukuwaʼipa. Müleka kojutüle wamüin tü naainjakat Jeʼwaa wapüleerua saaʼu alin waya nüpüla, nnojoleena waya mojujiraakuʼu müin namaa na wawalayuukana sutuma tü naainjakat wamüin. Waʼatapajüin maʼin süntüin sükalia süpüla lotuinjatüin wakuwaʼipa otta nnojotpa waaʼinrüin kasa mojusü.

19. ¿Kasa waaʼinrüinjatka müleka kojutüle wamüin tü naainjakat Jeʼwaa wapüleerua?

¹⁹ Wayaawatüitpa saaʼu jamüin anaka maʼin tü naapakat Jeʼwaa wamüin. Wajayata sükalia tü Outkajawaakat eere Sotuin Waaʼin Ouktüin Jesuu süpüla jülüjainjatüin waaʼin süpüshuaʼa tü kasa naainjakat Jeʼwaa nümaa Jesuu wapüleerua. Weeʼiyata waneepia sünain kojutüin wamüin tia naainjakat. Washata nukuwaʼipa Kürisüto, ai wapüla na wawalayuukana otta moto waaʼin naainjala na wawalayuukana wamüin.