¿Pütüjaa aaʼu tüü?

¿Jamüshi «kaʼruwarannuu» nümaka Jesuu namüin na oikaaliikana suluʼu tü aʼwaajüleekat Maleiwa?

MÜSÜ tü karaloʼutakat Mateo: «Süchikijee nüntüin Jesús Jerusalénmüin, nikerotokalaka suluʼumüin tü aʼwaajüleekat Maleiwa. Eesü nüpüla wane wayuu oikaasüirua sünain süikaain tü mürüt oʼutinnajatkat aaʼin nümüin Maleiwa, je na ayalajüshiikana. Nujuittirakalaka na wayuukana sümaa tü mürütkalüirua anooipaʼamüin. Nujunnajakalaka nemeesain na aʼwanajaaliikana neerü ooʼulaka neinase na oikkaaliikana wuchii toomasü. Müshi Jesús [...]: Tü nünüiki Maleiwa ashajuushikat paala sümaiwa, müsü mayaa: ‹Tü tepiakat, nachuntiajatü na tapüshikana tamüin›, müshi. Otta jiakana, saaʼu nnojolüin lotüin jukuaippa sünain jüikküin tü mürütkat, müsü aka saaʼin shipia kaʼruwarannuu jütüma» (Mat. 21:12, 13).

Sümaiwa paala, kojutushaatasü tü mürüt otta wüchii toomasü noikaakat na judíokana suluʼu tü aʼwaajüleekat Maleiwa. Noʼoteʼerüin maʼin tü süliakat. Saashin tü karaloʼutakat Misná (Keritot 1:7), nakalioʼu na nikirajüinkana Jesuu, wanee nneerü denario aainjuushi süka ooro sülia piamasü toomasü. Tia shia tü niʼyataainjutkat wanee wayuu soʼu 25 kaʼi. Saashin tü Pütchi aapünakat nümüin Moisés, eesü süpüla naapüin nümüin Maleiwa na israeliita maʼletsekana wanee wawaachi jee shiale wanee toomasü. Isapejeʼe nachiki naapüin tia süka kojutushaatain shia (Lev. 1:14; 5:7; 12:6-8). Sutuma mojushiin tia nümüin chi ekirajüikai judío Simeón ben Gamaliel, nnojoluitpa wainmain kasa süsülajüinjatka wayuu nümüin Maleiwa nutuma. Süshakajaka sülia tü toomasükalüirua, jayashaanasü maʼin.

Sutuma tia watüjaaitpa aaʼu lotuin nünüiki Jesuu namüin na oikaaliikana suluʼu tü aʼwaajüleekat Maleiwa, soʼu «kaʼruwarannuu» nümüin namüin.