Nnojo washapajaain aaʼin

1. ¿Kasa eeka süpüla süshapajaain atuma waaʼin?

OʼTTÜSÜ tü kaʼi sajaʼttajatkalü oʼu tü kasa nuluwataakalü aaʼu Satanaa soʼujee juyaka 1914, wanaa sümaa nuʼttüin Jesuu sünain aluwatawaa chaa sirumatuʼu. Soʼu juyakat tia eejatü wanee atkawaa chaʼayaa otta nujutünaka Satanaa namaa na yolujaakana chaa iipünaajee nutuma Jesuu (paashajeʼera Alateetkat Mapeena 12:7-9). Saashin tü Wiwüliakat alüʼütsü nükalia Satanaa süpüla «ataʼünnaa» (Alat. Map. 12:12). Akatsaʼa wainmairüin juya alataka süchikijee süküjünüin tia. Makalaka eein süpüla nashapajaain aaʼin noʼutku na aʼyataashiikana nümüin Maleiwa. Jama wayakana, ¿ashapajaasüche waaʼin saaʼu nnojoyülüin najaʼttirüin Jeʼwaa tü kasa nuluwataakalü aaʼu Satanaa?

2. ¿Kasa wekirajaainjatka anain sünain ekirajaayakat tüü?

² Mojushaatasü maʼin süshapajaale waaʼin. Süka jamüin, eesü süpüla waainjüin wanee kasa sümaa nnojoluin jülüjüin waaʼin anale jee mojule shia. ¿Kasa akaaliinjeenaka waya süpüla nnojoluinjatüin süshapajaain waaʼin? Sünain ekirajaayakat tüü, asouktüneerü eʼipajee pütchikalüirua tüü: 1) ¿Kasa shikirajaka anain waya nnojoluin süshapajaain naaʼin Miqueas? 2) ¿Kasa alatajatka süpülapünaa sajaʼttüin kasa süpüshuaʼa? 3) ¿Kasa waaʼinrajatka süka nnojoluin süshapajaain naaʼin Jeʼwaa?

¿KASA SHIKIRAJAKA ANAIN WAYA NNOJOLUIN SÜSHAPAJAAIN NAAʼIN MIQUEAS?

3. ¿Jamapuʼusü nakuwaʼipa na israeliitakana nükalioʼu Miqueas?

³ (Paashajeʼera Miqueas 7:5, 6.a) Niʼrüin Miqueas sümojujaa sümojujaa sümüin nanoula na israeliitakana suʼunnaa nuluwataain Acaz. Naashin Miqueas, na nnojoliikana waneepiain nümaa Jeʼwaa müshii aka naya saaʼin «wunuʼu keipüsesü» otta «kulaala aainjuushi süka jamüche». Süka jamüin, naainjüin kasa mojusü namüin na wayuu arütkaakana nanainmüin. Sutuma mojuin maʼin nakuwaʼipa, nnojoishii aijiraain jee paaʼinwajiraain naya sümaa napüshi. ¿Kasakaʼa naainjüin Miqueas sutuma isain nüchiki nunoukteʼerüin tia? Oʼuraajüshi nia nümüin Jeʼwaa süka süpüshuaʼa naaʼin. Nnojotsü ashapajaain naaʼin. Nütüjaa aaʼu nunoukteʼerüinjatüin Jeʼwaa tia alatakat.

4. ¿Kasa eejiraaka amaa waya?

⁴ Kepiashii waya naʼaka na wayuu keeʼireekana aaʼin tü nachekakat namüiwaʼa. Müshii aka saaʼin tü wayuu eejatkalüirua nükalioʼu Miqueas. Wainma wayuu «eekai matüjain aapaa analuʼut, je eekai mojutüin Maleiwa natüma» otta «eekai maalin wayuu napüla» (2 Tim. 3:2, 3). Mojusü waaʼin sutuma weʼrüin mojuin maʼin tü naainjakat na wayuu kepiakana pejepünaa wanain, na waʼyataajiraakana amaa otta na koleejiajiraakana wamaa. Jülüjüsü neʼe naaʼin tü nakuwaʼipakat namüiwaʼa. Akanasaʼa eein na wawalayuu alatakana maʼin amüin kasa mojusü. Naashin Jesuu müliainjachi chi anoujüshikai sutuma wayuu kasayuu nünain. Tü nümakat meematsü aka saaʼin tü pütchi suluʼukat Miqueas 7:6. Müshi Jesuu: «Aʼülüjeechi wane wayuu nümüin chi nüshikai. Aʼülüjeerü wane wayuu sümüin tü shiikat. Aʼülüjeerü wane wayuu sümüin tü saʼütkat. Suluʼu wane miichi, aʼülüjiraweena na apüshiikana maa aka natkaain wayuu eekai paʼünüüwajiraain» (Mat. 10:35, 36). Kapüleesü maʼin nümüin wanee anoujüshi meeʼeraparale otta müliale nia natuma na nüpüshi manoujüinkana. Sülatüle wamüin tia, wachechera waaʼin sünain tü wanoujakalü anain. Ayata waneepiain waya nümaa Jeʼwaa otta nnojo washapajaain aaʼin. Wachuntüle kaaliinwaa nümüin, naapeerü sütchin waaʼin otta kekiijeena waya nutuma süpüla wachecherüin waaʼin.

5, 6. ¿Kasa niʼraka Miqueas nutuma Jeʼwaa? ¿Jarat tü pütchi nnojotkalü ekeraajüin nükalioʼu Miqueas?

⁵ Sutuma nnojoluin nüshapajaain aaʼin Miqueas, eʼrüshi kasa anasü nutuma Jeʼwaa. Eejachi nia suʼunnaa sajaʼlajaain nuluwataaya Acaz otta wanaa sümaa nuʼttüin sünain aluwatawaa Ezequías, chi nüchonkai Acaz. Eejachi nia soʼutpünaa nükaaliinjüin Ezequías na judíokana süpüla naʼwaajüinjachin Jeʼwaa nachikuaʼa. Niʼrüin Miqueas shikeraajüin tü nümakat Jeʼwaa süchiki tü alatajatkat sümüin Samaria. Ashutüshii na asiriokana saaʼu tü poloosükat eʼiruku (Miq. 1:6).

⁶ Nnojotpejeʼe niʼrüin Miqueas ekeraajüin süpüshuaʼa tü kasa nüshajakat nutuma Jeʼwaa. Maʼaka saaʼin tü pütchi makat: «Sajaʼttiamüin tü kasakalüirua, yaleteerü maʼin tü uuchi kaaʼukat tü aʼwaajüleekat Jeʼwaa suulia tü wanee uuchikalüirua, ayalenneerü sooʼopünaa tü wutaikalüirua jee antayaa meerü wayuu sainküinjeejatü mma sünainmüin. Wainma wayuu saʼakajee shiʼiruku wayuu süpüshuaʼa oʼotoojeenaka saaʼu otta meerü nanüiki: ‹Jalainna, woʼotoo saaʼu nuʼuuchise Jeʼwaa›» (Miq. 4:1, 2, NM). Nnojotsü niʼrüin Miqueas shikeraajia pütchikat tüü sutuma ouktüin nia süpülapünaa tia. Akaisaʼa waneepiain nia nümaa Jeʼwaa waneʼereʼeya ouktapa nia. Nnojotsü naainjüin tü naainjakat na wayuu kepiakana pejepünaa nünain. Müshi nia: «Pansaajeerü sukuwaʼipa tü pueulokalüirua sümaa nünülia chi namaleiwasekai. Aluʼusaʼa wayakana, pansaajeerü wakuwaʼipa waneepia sümaa nünülia chi Wamaleiwasekai Jeʼwaa» (Miq. 4:5, NM). Mayaapejeʼe mojuin maʼin tü alatakat nükalioʼu Miqueas, nnojotsü ashapajaain naaʼin. Süka jamüin, niʼitaain naaʼin sünain nikeraajüinjatüin Jeʼwaa süpüshuaʼa tü nümakat.

7, 8. (1) ¿Jamüsü anaka maʼin weʼitaale waaʼin nünain Jeʼwaa? (2) ¿Kasa waaʼinmaainjatka süpüla nnojoliinjanain washapajaain aaʼin?

⁷ ¿Weʼitaainche waaʼin nünain Jeʼwaa maʼaka naaʼin Miqueas? Anasü weʼitaale waaʼin nünain süka weʼrüin maaʼulu shikeraajüin tü pütchi nümakat Miqueas. Maaʼulu yaa, «sajaʼttiamüin tü kasakalüirua» wainma wayuu sainküinjee mmaka süpüshuaʼa otta saʼakajee eʼirukuuka süpüshuaʼa oʼunaka saaʼumüin «tü uuchi kaaʼukat tü aʼwaajüleekat Jeʼwaa». Paʼünüüwajiraapuʼushii naya wayuukana. Akanasaʼa nnojoluinnapain atkaajiraain naya maaʼulu otta nnojoishii naya ekirajaain sünain tü atkawaakat (Miq. 4:3). ¡Anakatche maʼin wakuwaʼipa süka saʼakain waya nupueulose Jeʼwaa!

⁸ Keeʼireesü waaʼin najaʼttirajatüin Jeʼwaa tü kasa nuluwataakalü aaʼu Satanaa. Akatsaʼa jülüjüinjatüin waaʼin tü jülüjakat naaʼin Jeʼwaa süpüla nnojoluinjatüin süshapajaain waaʼin. Niʼitaain Jeʼwaa tü kaʼi kasalajanainjatkalü oʼu saainjala wayuu otta nikeraajüinjatü nükajee Jesuu (Aluw. 17:31). Akatsaʼa nüchajaain sukuwaʼipa süpüla sütüjaainjatüin aaʼu wayuu tü shiimüinkat süpülapünaa süntüin tia kaʼikat. Keeʼireesü naaʼin suʼttaainjatüin wayuu sükajee soonooin sümaa tü shiimainkat (paashajeʼera 1 Timoteo 2:3, 4). Wekirajüle maʼin wayuu sünain tü shiimainkat nüchiki Maleiwa, nnojoleena waya ashapajaain aaʼin. Alüʼütsü süpüla süntüinjatüin tü kaʼi sajaʼlajaainjatkalü oʼu kasa mojusü otta antalaa meerü shia. Sülatapa tia, talateerü maʼin waaʼin süka shiain waaʼinmaain tü aküjaakat pütchi süchiki Nuluwataaya Maleiwa.

¿KASA ALATAJATKA SÜPÜLAPÜNAA SAJAʼTTÜIN KASA SÜPÜSHUAʼA?

9-11. ¿Ekeraajüitpache tü pütchi suluʼukat 1 Tesalónica 5:3?

⁹ (Paashajeʼera 1 Tesalónica 5:1-3.) Alüʼütsü süpüla saashajaʼalaataain wayuu süchiki «anaa akuaippa, [jimataa aaʼin]». Nnojorüle keeʼireein waaʼin shimeejüin wakuwaʼipa tia, oonooinjana waya sümaa tü nümakat Pablo, müshi nia: «Eeinjatü jaaʼin sünain nüntajachin chi Senyotkai süpüla laülaainjatüin jaaʼin sünain süpüshua tü jaaʼinrakat» (1 Tes. 5:6). Süpüla eejüinjatüin waaʼin sünain anoujaa, wekirajaa sünain tü kasairua alatajatkat süpülapünaa tia.

¹⁰ Süchikijee tü piamasü atkawaa miyoʼu eejatkat saaʼu tü mmakat, nachajaa achikit na wayuukana tü anaakalü akuwaʼipaa. Sajaʼttapa tü palajatkalü atkawaa miyoʼu, aikkaleʼennüsü joo tü kanüliakat Liga de Naciones süpüla shiainjatüin eein atuma tü anaakalü akuwaʼipaa. Shiasaʼa süchikijee tü wanee atkawaakat miyoʼu, watta saalii wayuu eʼitaaka saaʼin sünain tü kanüliakat Naciones Unidas. Makalaka shiainjatüin eein atuma anaa akuwaʼipaa naashin na poliitikokana otta na shikiipüʼükana tü iküleesiakalüirua. Jamüsüjaʼa tü kanüliakat Naciones Unidas, süneeküin tü juyakat 1986 süka shiain tü Juya eeinjatkalü oʼu Jimataa Aaʼin saashin. Soʼu juyakat tia, outkajaashii watta naalii sülaüla mma otta na shikiipüʼükana tü Iküleesia Katoolikakat süpüla oʼuraajaa süpüleerua eeinjatüin jimataa aaʼin. Chajana naya outkajaain Italia suluʼu tü pueulokot Asís.

¹¹ Akatsaʼa nnojoluin shiain ekeraajüin tü pütchi suluʼukat 1 Tesalónica 5:3 sutuma tü münakat süchiki tü jimataakalü aaʼin. ¿Jamüsü watüjaaka saaʼu tia? Süka nnojoyülüin süntüin tü müliaa antalaa müinjatkat.

12. ¿Kasa watüjaaka aaʼu süchiki tü «anaa akuaippa» aküjüneetkalü achiki?

¹² ¿Jarai chi aashajaainjachikai süchiki eeinjatüin «anaa akuaippa»? ¿Kaseerü naaʼinraka na shikiipüʼükana tü iküleesiakat katoolika otta waneeirua iküleesia? ¿Kaseerü naainjaka na sülaülashiikana mma? Nnojotsü süküjüin tü Wiwüliakat süchiki tia. Watüjaapajaʼa aaʼu alawaain tia aküjüneetkat süchiki jimataa aaʼin. Ayateechia Satanaa aluwataain saaʼu tü kasa eekat saaʼu tü mmakat. Makalaka mojuin maʼin sukuwaʼipa tü nuluwataakalü aaʼu otta nnojoleerü anouktaain. Sutuma tia nnojoishii oonooinjanain waya sümaa tü alawaa aküjünakat sümüin wayuu otta nnojoishii sünainpünaainjanain waya poliitika jee tü saaʼinrakat tü iküleesia nnojotkat shiimain.

13. ¿Jamüsü nnojoyütkalia najütüin süchiki tü jouktaikat na aapieekana?

¹³ (Paashajeʼera Alateetkat Mapeena 7:1-4.) Sümaʼinruʼu waʼatapajüin shikeraajüin tü sümakat 1 Tesalónica 5:3, najapuluʼujüin na aapiee pülashiikana maʼin tü jouktai eeinjatkalü atuma tü müliaa miyoʼukat. ¿Jamüsü nnojoyütkalia najütüin süchiki tia jouktaikat? Naashin chi aluwataaushikai Juan, eʼitaanajatü nejeetse Jeʼwaa neʼipoʼunain na nüchepchiakana, na chainjanakana aluwataain iipünaa.b Shiasaʼa kettaapa tia, najüteerü na aapieekana tia jouktaikat. ¿Kaseetka alatüin naainjapa tia?

14. ¿Jamüsü watüjaaka saaʼu sülüʼülüin süpüla sajaʼttinnajatüin tü Babilonia Miyoʼukat?

¹⁴ Alüʼütsü süpüla sajaʼttinnajatüin tü Babilonia Miyoʼukat, tia shia süpüshuaʼa tü iküleesia nnojotkat shiimain. ¿Jamüsü watüjaaka saaʼu? Weʼrüin tü kasa alatajatkat süpülapünaa sajaʼttinnüin otta nnojoleerü akaaliinjünüin shia sutuma tü shiʼitaakalü anain saaʼin, tü «wayuu eekat sainküin mmakat süpüshua je eʼirukuukat süpüshua» (Alat. Map. 16:12; 17:15-18; 18:7, 8, 21). Nnojotsü anain pütchi süchiki tü iküleesia nnojotkat shiimain otta nachiki na shikiipüʼükana. Shiiʼiyatüin tia nnojoluin nakaaliinjünüin natuma na wayuu neʼitaakana anain naaʼin. Mayaapejeʼe sülatüin tia, nnojotsü shapaain naaʼin na shikiipüʼükana tü Babilonia Miyoʼukat. ¡Eetaayaai natüjaain saaʼu tü alatajatkat namüin! Süchikijee saashajaanüin maʼin achiki «anaa akuaippa», ashuteena na poliitikokana saaʼu tü iküleesia nnojotkat shiimain otta najaʼttireerü shia. Sajaʼttapa, müiria nnojoluin eein shia. Nnojoliinjana waya ashapajaain aaʼin süpülapünaa sülatüin tia (Alat. Map. 18:8, 10).

¿KASA WAAʼINRAJATKA SÜKA NNOJOLUIN SÜSHAPAJAAIN NAAʼIN JEʼWAA?

15. ¿Jamüsü nnojotka süshapajaain naaʼin Jeʼwaa sünain ajaʼttiraa tü kasakalüirua?

¹⁵ Mayaainjeʼe wainmain na wayuu mojutükana amüin nünülia Maleiwa, nnojotsü ashapajaain naaʼin sünain ajaʼttiraa tü kasakalüirua. ¿Jamüsü nnojotka naainjüin tia? Süka «nnojolüin nücheküin süpüleerua eeinjatüin wayuu eekai amüloulin saaliijee manoujain» (2 Ped. 3:9, 10). ¿Müsüchejeʼe waaʼin maʼaka naaʼin Jeʼwaa? Süpülapünaa süntüin tü nükaliakat, anuu tü waaʼinrajatkat süka nnojoluin süshapajaain naaʼin Jeʼwaa.

16, 17. (1) ¿Jamüshii wakaaliinjüinjanaka na eemiajaakana anoula? (2) ¿Jamüsü choʼujaaka naleʼejüin jooluʼuleʼeya na eemiajaakana anoula?

¹⁶ Wakaaliinja na eemiajaakana anoula. Naashin Jesuu talatüshi maʼin Jeʼwaa otta na aapieekana nüleʼejüle wanee wayuu nüchikuaʼa sünain anoujaa (Mat. 18:14; Luc. 15:3-7). Nükaaliinjeein maʼin Jeʼwaa na wayuu aikana apüla nia, jaʼitainna nnojoliin aʼyataain nümüin maaʼulu. Wakaaliinjüle wanee wayuu süpüla nüleʼejüinjachin nüchikuaʼa sünain anoujaa, talatüsü maʼin naaʼin Jeʼwaa otta na aapieekana.

¹⁷ ¿Piache wanee wayuu ooʼulaakai suulia aʼyatawaa nümüin Jeʼwaa? Eeshijaʼa matüüle pia suulia tü outkajawaakat süka mojuin nünüiki pümüin wanee wawala. ¿Eeirü pükalia sünain matüüin pia? Müle pukuwaʼipa, püsakireʼera paaʼin mayaa: «¿Anasüche maʼin takuwaʼipa maaʼulu? ¿Talatüsüche maʼin taaʼin? ¿Niache Jeʼwaa mojuka anüiki tamüin? ¿Niataapa wanee wayuu nnojoikai lotuin akuwaʼipa maʼaka taaʼin tayakai? ¿Niache Jeʼwaa aainjaka tamüin kasa mojusü?». Anamia maʼin Jeʼwaa wamüin. Jaʼitashi eekai kaainjalain, nüsülajüin nümüin wainma kasa süpüla talatüinjatüin naaʼin (Sant. 1:16, 17). Akatsaʼa nnojoluinjatüin motuin waaʼin sülüʼülaain maʼin tü nükaliakat Jeʼwaa. Choʼujaasü maʼin püleʼejüin jooluʼuleʼeya nünainmüin Jeʼwaa otta naʼakamüin na puwalayuukana. Nayeena akaaliinjaka pia maaʼulu süpülapünaa sajaʼttüin tü kasakalüirua (Deut. 33:27; Heb. 10:24, 25).

18. ¿Jamüshii waʼyataajiraainjanaka namaa na laülaakana napüleerua na wawalayuukana?

¹⁸ Waʼyataajiraa namaa na laülaakana napüleerua na wawalayuukana. Nuʼunirüin wakuwaʼipa Jeʼwaa otta naaʼinmajüin waya süka niain wanee anneetpüʼü aipürai. Nüneeküin Jesuu, chi Anneetpüʼü Miyoʼushikai süpüla naaʼinmajüinjanain na naʼanneetsekana (1 Ped. 5:4). Eeshii wainma laülaashii sainküin tü mmakat aaʼinmajaka nanoula na wawalayuu eekana suluʼu sienmiit outkajaalee, müshii naya maʼaka naaʼin wanee wayuu aaʼinmajaka naʼanneetse (Aluw. 20:28). Waʼyataajiraale namaa na laülaakana napüleerua na wawalayuukana, weeʼiyateerü nümüin Jeʼwaa otta Jesuu, waapüin tü analuʼutkat namüin saaʼu tü naainjakat wapüleerua.

19. ¿Kasa waaʼinrajatka süpüla paaʼinwajiraainjanain waya namaa na wawalayuukana?

¹⁹ Warütkaa nanainmüin na wawalayuukana. ¿Kasa sünainpünaaka tia pütchikat? Jamüshiijaʼa na surulaatkana, arütkaashii naya nanainmüin na waneeinnua wanaa sümaa nashutünüin aaʼu natuma na naʼünüükana. Sutuma naainjüin tia, nnojoishii akanajuuin. Ashutüshi maʼin Satanaa maaʼulu saaʼu tü nupueulosekat Maleiwa. Makalaka nnojoliinjanain waya atkaakuʼu müin namaa na wawalayuukana. Tü waaʼinrajatkat shia warütkaainjanain nanainmüin, motuinjatüin waaʼin tü naainjalakat otta weʼitaainjatüin waaʼin nünain Jeʼwaa.

20. ¿Kasa waaʼinrajatka maaʼulu?

²⁰ Wapüshuaʼa wayakana eeinjatü waaʼin sünain tü wanoulakat otta nnojoluinjana waya ashapajaain aaʼin. Waʼatapaja tü aküjüneetkat süchiki «anaa akuaippa» otta shiʼitaanüin nejeetse Jeʼwaa neʼipoʼunain na chainjanakana aluwataain iipünaa. Süchikijee tia, najüteerü na pienchishiikana aapiee süchiki tü jouktai antirajatkat müliaa otta sajaʼttinneetka Babilonia tü Miyoʼukat. Sümaʼinruʼu sülatüin tia, woonoo sümaa tü namakat na oʼunirakana sukuwaʼipa nupueulose Jeʼwaa. Warütkaa nanainmüin na wawalayuukana süpüla eejiraainjanain waya nümaa Satanaa otta na yolujaakana. Woonoo sümaa tü nümakat chi eeʼiraikai nümüin Jeʼwaa, müshi nia: «Yalayala jaaʼin otta katchin jaaʼin, jiakana jüpüshuaʼa aʼatapajakana Jeʼwaa» (Sal. 31:24, NM).