Nikirüin wainma wayuu

ALATÜSÜ wanee kasa mojusü. Niʼyoteʼerüin chi aluwataaikai nikii Juan chi Owoutisaajüikai. Süʼürülashi nia Herodías, suʼutiraka naaʼin.

Mojusü naaʼin Jesús naapapa tia. Nuʼunaka suluʼumüin wanee mma jimatuuisü. Noʼunaka na wayuukana nüchiirua. Niʼrapa Jesús naya, amülialaasü naaʼin naalii. Naashajaaka namaa süchiki nuluwataaya Maleiwa otta niiyajüin naya.

Nantaka na nikirajüinkana nünainmüin, namaka: ‹Aipaʼairü otta yüütüüisü tü mmakat yaaya. Anashii püjütüle na wayuukana süpüla nayaʼlajüin neküin›.

Nümaka Jesús: ‹Anashii makatüle naya. Jaapa neküin›. Nümaka Jesús nümüin Felipe: ‹¿Jaleena waya ayaʼlajüin eküülü namüin na wayuukana?›

Nümaka Felipe: ‹Wainma nneerü choʼujaaka süpüla shiyaʼlajünüin eküülü›. Nümaka Andrés: ‹Anii wanee jintüi kamaʼanashi jaʼraisü pan otta piamasü jimechein. Nnojoleerü keraain shia namaa napüshuaʼa na wayuukana›.

Nümaka Jesús: ‹Jüma namüin na wayuukana naikkalaai saaʼu tü alamakat›. Naapaka analuʼut Jesús nümüin Maleiwa saaʼu tü eküütkat. Niitajaka shia namüin na nikirajüinkana süpüla neitajüin namüin na wayuukana. Eejana maa aka 5.000 tooloyuu, kojuya jieyuu otta tepichi. Eküshii napüshuaʼa jee emirashii naya. Süchikijee tia, apütaasü 12 iita sümaajatü eküülü.

Mapa nuʼuniraka na nikirajüinkana suluʼu wanee anua süpüla nalatüin tü palaakat Galilea. Müliaka naya sutuma wanee wawai. Mmotshii naya. Mapa neʼraka wanee wayuu waraittüshi sooʼopünaa tü palaakat. Naʼwaataka süka mmoluin naya sutuma tü neʼrakat.

Nümaka Jesús: ‹Nnojo mmoluin jia. ¡Taya jiʼraka!› Nnojotsü nanoujain tia. Nümaka Pedro: ‹Shiimainre piain Jesús, anakajaʼa peenaküle taya süpüla tantajachin pünainmüin sooʼopünaa tü palaakat›. Nümaka Jesús: ‹Anakajaʼa›. ¡Nuʼunaka Pedro nünainmüin sooʼopünaa tü palaakat! Mmotka nia nimerotoko shiroku. Nükaaliinjaka nia Jesús.

Nikirüin Jesús wainma wayuu süchikuaʼa. Naainjüin shia süka 7 pan otta wanee jimechein. Eküshii naya napüshuaʼa. ¡Nükaaliinjüin Jesús na wayuukana! ¡Nuluwataapa nnojoleerü shapaain waaʼin sutuma wanee kasa!