‹Jaaʼinrüinjatü waneepia› Outkajaweena waya awüriiroʼu 5
1. ¿Jamüsü kojutüka maʼin tü outkajawaakat eere Sotuin Waaʼin ouktüin Jesuu?
1 ‹Tü waaʼinrakat, jaaʼinrüinjatü waneepia süpüla sotüinjachin jaaʼin taya.› (Luc. 22:19.) Shia nünüikika Jesuu tia namüin na nikirajüinkana süpüla sotuinjatüin naaʼin naapajiraain nikii saaʼu tü wayuukalüirua. Sutuma wainmain tü kasa eekat sünainjee waakajinnüin, kojutüsü maʼin namüin na anoujüshiikana tü outkajawaakat eere Sotuin Waaʼin ouktüin Jesuu, eejeerü shia juyakat tüü awüriiroʼu 5. Sümaʼinruʼu waʼatapajüin tia ¿kasa waaʼinrajatka süpüla weeʼiyatüin nümüin Jeowa kojutüin shia wamüin? (Col. 3:15.)
2. ¿Jamüsü weeʼiyataka kojutüin wamüin Sotuin waaʼin ouktüin Jesuu müleka wekirajaale otta wasakirüle waaʼin?
2 Yapaja waya. Yapashii waya waʼatapajüle maʼin wanee kasa. Eeshii süpüla yapajüin waya süpüla tia outkajawaakat müleka wekirajaale sümaa wapüshi sünain tü alatakat nümüin Jesuu süpülapünaa ouktüin nia jee jülüjüle waaʼin shia (Esd. 7:10). Eesü tia wersiikulokalüirua suluʼu tü calendariokat jee müsia suluʼu tü karalouktakat Examinando. Otta suluʼu La Atalaya ojuʼitaka pewüreeroʼu 1 soʼu 2011, süpana 23, 24, aküjünüsü wainma wersiikulo ajütaka waya suluʼumüin karalouktaka El hombre más grande.
3. Waküjüle pütchi ¿jamüsü weeʼiyataka kojutüin wamüin Sotuin Waaʼin ouktüin Jesuu?
3 Waküja pütchi. Tü wanee kasa waaʼinrajatkat süpüla weeʼiyatüin kojutüin wamüin tü outkajawaakat eere Sotuin Waaʼin ouktüin Jesuu shia waküjüle maʼin pütchi weinshi (Luc. 6:45). Oʼtteena waya maatsoʼulüjee 17 sünain aapiraa na wayuukana sainküin mmaka süpüshuaʼa süchiki tia. Eeshi süpüla pükatalüin kaʼi süpüla püküjüin pütchi jee eesü süpüla pürekutsoolüin aaʼusiliaat piaya. Paashajaa süchiki tia suʼunnaa tü ai puʼwaajakat oʼu Maleiwa sümaa püpüshi.
4. ¿Jamüsü anaka woʼunüle sünain tü outkajawaakat eere Sotuin Waaʼin ouktüin Jesuu?
4 ¡Anasü maʼin waaʼin sutuma woʼunüin juyawai sünain tia outkajawaakat! Asülajüi Jeowa naapüinjeseʼe nikii chi waneeshikai nüchon, jülüjüle waaʼin tia, aijeechi maʼin wapüla otta talateena maʼin waya (Juan 3:16; 1 Juan 4:9, 10, NM). Sutuma tia, nnojotsü «waaʼinrüin tü wachekakat wamüiwa» (2 Cor. 5:14, 15). Otta waʼwaajeechi maʼin Jeowa suʼupala wayuu (Sal. 102:19-21). Sutuma talatüin maʼin waaʼin, waʼatapajüin awüriiroʼu 5 ayatüinya ‹waashajaain süchiki ouktüin chi Senyotkai› (1 Cor. 11:26, NM).