Kamaʼa pia sünain aküjaa pütchi

Eeshii wawalayuu aneekakana jeʼrainjatüin oora naküjaka oʼu pütchi, eeshii na aküjakana pütchi kaleʼumüinreʼeya. Eeshii wawalayuu kapüleekana amüin kamaʼain naya sünain aküjaa pütchi sutuma eein tü kasa naainjüinjatkat. Anuu wanee pütchiirua sotuinjatka waaʼin: Ayatüinjanaʼaya waya aküjüin pütchi mayaapejeʼe naneeküin na wawalayuukana wanee oora noʼunajatka oʼu. Nnojoishii waya oʼunajaainjanain suulia tü aküjaakat pütchi süka noʼunayaa namüin na wanee wawalayuukana. Kamaʼale waya sooʼomüin süchikijee tü aküjaakat pütchi, aneerü tia. Eeshii süpüla waküjüin pütchi kaayeruʼupunaa jee shiale eere wainmain wayuu. Süpülapünaa woʼunüin wepialuʼumüin, weʼrajaa nüchikuaʼa wanee jee piama wayuu waküjakainka amüin pütchi paalainka. Puwaraijaale naaʼu wanee wayuu kamalainkai amüin tü pikirajakat anain aneerü nukuwaʼipa sutuma, meeria nukuwaʼipa wanee wayuu paapüle wanee rewiisütairua nümüin. Kamaʼale waya sünain aküjaa pütchi, waʼwaajeechi waneepia chi Maleiwakai sükajee waküjüin süchiki nünülia (Heb. 13:15, NM).