Atüjüinjana waya aküjaa pütchi: pikiraja na pikirajüinkana süpüla naküjüinjanain pütchi

¿Jamüsü choʼujaaka? Na jekennuukana anoujain, ekirajünüinjana sünain tü nuluwataakalü anain Jesuu maʼaka saaʼin ekirajaa wayuu (Mat. 28:19, 20). Eeshii na wekirajüin ashajirakana nanülia süpüla nekirajüinjanain sünain tü Ekirajawaakat süpüla Aküjaa Pütchi. Eeshii naküjüle pütchi namüin na napüshikana jee na neʼraajüinkana. Kooʼomüinjeerü nanoula otta nayaawateerü aaʼu nücheküin Jeʼwaa saapüinjatüin wayuu süpüshuaʼa süchiki tü shiimainkat. Nachunteetka nojuʼitüin wamaa sünain aküjaa pütchi (Roma 10:13, 14). Kettaapa naya süpüla naküjüin pütchi wamaa, wekirajüinjana süpüla natüjain ekirajaa otta aküjaa pütchi (Luc. 6:40).

Anuu tü sukuwaʼipainjatkat:

Püküja nümüin jaralüin tü karaloukta nüküjüinjatkalü aka pütchi otta nikirajüinjatkalü aka wayuu. Piiʼiyata nümüin tü karaloukta pülüʼüjakat piakai. Püküja nümüin kasapülajatüin tü karalouktairua pülüʼüjakat.
Püneeka nümaa niakai suluʼujee Waʼyataain Nümüin Maleiwa tü pütchi naashajaainjatkalü achiki nüküjapa pütchi. Jüneeka suluʼujee tü karalouktakat Benefíciese, süpana 82 tü sukuwaʼipainjatkat nüküjia pütchi; pansaainjatü sümaa nakuwaʼipa na wayuu kepiakana eere jüküjüin pütchi. Pükaaliinja nia süpüla nnojolinjachin niimolojooin jee püma nümüin anainjatüin naʼanaaya (2 Cor. 6:3, 4).
Anuu sooʼomüin tü kasa paaʼinrajatkat. Piiʼiyata nümüin wanee tarjeta kanainka tü mma jüküjakalü aluʼu pütchi. Püküja nümüin tü kasa nüshajüinjatkat nüchiki wanee wayuu aapajakai tü pütchikat. Püma nümüin nuuyantüinjachin nüchikuaʼa (1 Cor. 3:6). Piiʼiyata nümüin jamüinjatüin nikirajia wanee wayuu süka tü paajinakat jw.org jee shiale süka tü poyeetokot Pütchi Anasü sümüinjatü wayuu süpüshuaʼa.
Nnojo püshapataain aaʼin, püküja nümüin tü kasa anasü naainjakat (Prov. 25:11). Piiʼiyata sükajee pukuwaʼipa jamüin saainjia wanee kasa. Nnojoleerü motuin naaʼin tü kasa paainjakat nüpüleerua otta soteerü naaʼin pücheküin maʼin aküjaa pütchi.

Puuʼulaka süpüla kashikat tüü:

Püküja pütchi sainküin piichi nümaa chi pikirajüinkai otta pümaa nia sünain ekirajaa wayuu. Mekirajüinre pia maaʼulu, puunejaa wanee aküjüi pütchi eiwaʼaikai ojuʼitaa sünain aküjaa pütchi.