¿Nünüiki Maleiwa tü sümakat tü Wiwüliakat?

1. ¿Jara kashajiralaka tü Wiwüliakat?

Aküjünüsü wamüin suluʼu tü Wiwüliakat kepiainjanain waya waneepia saaʼu tü Mmakat (Salmo 37:29). Eesü 66 karalouktachein suluʼu tü Wiwüliakat otta nüshajirala shia Maleiwa nakajee 40 wayuu. Tü jaʼraisükat karalouktachein suʼttiajeeka, nüshajala Moisés; alatüirü maʼaka 3.500 juya süchikijee tia. Tü karaloukta sajaʼttiamüinkat, nüshajala Juan; alatüirü maʼaka 1.900 juya süchikijee tia. Nünüiki Maleiwa tü Wiwüliakat. Aashajaashi nia nükajee chi naaʼinkai namaa na ashajakana shia (2 Samuel 23:2). Nashajüin tü nikiiruʼujeejatkat Maleiwa, nnojotsü shiain tü nekiiruʼujeejatkat. Sutuma tia, nüshajirala Jeʼwaa tü Wiwüliakat. Püleeja 2 Timoteo 3:16 otta 2 Pedro 1:20, 21.

Pünaja tü videokot ¿Jara kashajiralaka tü Wiwüliakat?

2. ¿Jamüsü wanoujüinjatka sünain tü sümakat tü Wiwüliakat?

Shia süka nümaʼanajeejatüin shia Maleiwa. Shiimain tia, pansaasü maʼin sutuma süküjia tü kasa alatajatkat mapeena, tü nutchejaakalü amaa wanee wayuu (Josué 23:14). Nia neʼe chi Maleiwa Pülashikai maʼin ountaka tia. Püleeja Isaías 42:9 otta 46:10.

Nünüikire Maleiwa tü Wiwüliakat, kojutüinjatü shia wamüin. Wainmashaata maʼin tü Wiwülia eitajünakat sümüin wayuu suluʼu wainma anüikii. Mayaainjeʼe kakaliairüin maʼin shia, pansaasü tü sümakat sümaa tü naküjakat na atüjüshiikana maʼin. Wanaawasü tü nekirajakalü anain na 40 wayuu ashajakana shia.a Süpüshuaʼa tü pütchi suluʼukat tü Wiwüliakat, shiiʼiyatüin aipüralin maʼin Maleiwa otta suʼwanajeʼerüin nakuwaʼipa na wayuukana. Sutuma tia, wainma maʼin wayuu anoujaka sünain nünüikin Maleiwa tü Wiwüliakat. Püleeja 1 Tesalónica 2:13.

Pünaja tü videokot ¿Jamüsü wanoujüinjatka sünain tü sümakat tü Wiwüliakat?

3. ¿Kasa saashajaaka achiki tü Wiwüliakat?

Aashajaasü tü Wiwüliakat süchiki pütchi anasü. Süküjüin tü nüchekakat Maleiwa wapüleerua. Saashin tü Wiwüliakat, kaainjalashi chi palajachikai wayuu otta nujutünaka suluʼujee tü paʼaraiisükat. Süküjüin eeinjatüin tü paʼaraiisükat süchikuaʼa. Püleeja Alateetkat Mapeena 21:4, 5.

Ashajünüsü suluʼu tü Wiwüliakat tü pütchi aluwataanakalü anain waya, tü nümakat Jeʼwaa wamüin otta tü achiaanakalü anain waya. Süküjüin wamüin alin maʼin waya nüpüla Jeʼwaa. Sutuma tia, sükaaliinjüin waya tü Wiwüliakat süpüla weʼraajüin maʼin nia otta süpüla naʼaleewain waya. Püleeja Salmo 19:7, 11; Santiago 2:23 otta 4:8.

4. ¿Kaseerü wayaawataka atuma tü sümakat tü Wiwüliakat?

Süpüla shiyaawatünüin saaʼu tü Ashajuushikat, naashajeʼerüin Jesuu wanee wersiikulo süpüla nüküjüin jamaluʼuluin shia. Meeria shia sutuma karalouktakat tüü, sükaaliinjeena waya süpüla wayaawatüin saaʼu tü shikirajakalü anain tü Wiwüliakat. Püleeja Lucas 24:27, 45.

Watüjaa aaʼu aneerüin pümüin pikirajaain sooʼomüin süchiki tü pütchi anasü nüküjüinjatka pümüin Maleiwa. Eeshii na wayuu nnojoliikana acheküin ekirajawaa otta eeshii na jashichikana sutuma süküjünüin namüin tü pütchikat. Nnojo puuʼulaain sutuma tia. Na ekirajaakana nüchiki Maleiwa, kateena oʼu waneepia saashin tü Wiwüliakat. Püleeja Juan 17:3, TNM.