Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
SETTIENPÜROʼU 3-9
KOROLO KOJUTUSÜ SULUʼUKA TÜ WIWÜLIAKAT | JUAN 1, 2
«Tü palajatkat kasa pülasü naainjakat Jesuu»
jy-S süp. 41 püt. 6
Tü palajatkat kasa pülasü naainjakat
Akatchinraasü nanoula na jekenakana nikirajüin Jesuu sutuma naaʼinrüin tü palajatkat kasa pülasü. Süchikijee tü miʼiraa shikiirakat kaʼwayuusee, oʼunushi Jesuu sümaa tü niikat jee na nuwalayuukana suluʼumüin tü mmakat Capernaúm, chaa palaamüin saaʼujee tü palaa kanüliakat Galilea.
Püchajaa süchiki kaaʼürüi suluʼu tü Wiwüliakat
(Juan 1:29, TNM) Shiasaʼa waneemüin kaʼi, niirakaaka nümüin Jesuu sünain antaa nünainmüin, jee nümaka: «¡Jiirakaa nümüin chi Anneetchon nüjünalakai Maleiwa, alaʼajaakai saainjala wayuu!
nwtsty-E pütchi suluʼujeejatü tü Wiwüliakat süchiki Jn 1:29
chi Anneetchon nüjünalakai Maleiwa: Süchikijee woutiisain Jesuu otta nüleʼejüin eejeere nuuʼulakünüin aaʼin nutuma chi Yolujaakai, «Jiirakaa nümüin chi Anneetchon nüjünalakai Maleiwa», müshi Juan chi Owoutisaajüikai nüchiki. Eʼitaanüsü neʼe tia pütchikat suluʼu Juan 1:36 (Paashajeʼera App. A7). Anasü süka niyaawajeʼennüin Jesuu nümaa wanee anneetchon. Aküjünüsü suluʼu tü Wiwüliakat suʼutunuin aaʼin wanee anneerü süpüla sülaʼajaain saainjala wayuu jee talatüin naaʼin Maleiwa sümaa. Tia shiyaawase tü naaʼinrajatkat Jesuu, naapajiraainjachin nikii süpüla taashinjatüin wayuu maʼleekalia suulia saainjala. Aküjünüsü kojuyatua suluʼu tü Wiwüliakat nüchiki «chi Anneetchon nüjünalakai Maleiwa». Süka nütüjaain saaʼu Juan chi Owoutisaajüikai sünüiki tü Wiwülia ashajuushikat süka hebreo, eesüjaʼa shiale naashajaain achiki chi anneerü toolo nuʼutakai aaʼin Abraham nümüin Maleiwa suulia niain nuʼutuin aaʼin Isaac (Gé 22:13), chi anneetchon oʼutunakai aaʼin suʼunnaa tü Pascuakat natuma na israeliitakana wanaa sümaa taashin naya Egiptojee (Éx. 12:1-13), jee niale chi anneerü toolo aʼajünawaikai saaʼu tü aʼajüleekat chaa Jerusalén wattaʼa maalü otta aliika (Éx 29:38-42). Eesüjaʼa shiale naashajaain achiki Juan tü alatajatkat naashin Isaías wanaa sümaa «chi aʼyataakai tamüin» nümüin Jeʼwaa, jee aküjünüsü tüü nüchiki: «Amaanüshi nia maʼaka saaʼin wanee anneerü eekai süüjaanajatüin» (Isa 52:13; 53:5, 7, 11). Nüshajapa Pablo tü palajatkat karaloʼuta namüinjatka na corintojeʼewaliikana, nüküjain müin Jesuu aka naaʼin wanee anneetchon oʼutunakai suʼunnaa tü Pascuakat (1Co 5:7). Anuu nünüiki Pedro nüchiki Kürisüto: «Taashishii jia suulia kaainjalaa sünainjee nüsha Cristo, tü amülakat waaʼujee wanaa sümaa ouktüin nia. Lotüsü nukuaippa maa aka nukuaippa chi anneetchon oʼutinnapüʼükai aaʼin» (1Pe 1:19). Alanaʼaleesia suulia piantua shikii jaʼralimüin aküjünaka oʼu niain Jesuu chi kojutukai, chi makai aka naaʼin wanee anneetchon, aküjünüsü tia suluʼu Alateetkat Mapeena (Anasü paashajeʼerüle Alat 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1).
SETTIENPÜROʼU 10-16
KOROLO KOJUTUSÜ SULUʼUKA TÜ WIWÜLIAKAT | JUAN 3, 4
«Aküjashi pütchi Jesuu sümüin wanee wayuu samariajeʼewat»
(Juan 4:6, 7, TNM) Jee eejatü chayaa tü ishi nüsülekat Jacob. Jee müshia Jesuu mapüsashi sünainjee waraittüin nia, nüikalaaka sünain eemerawaa süʼütpaʼa tü ishikat. Kaleʼujatü tia makat. 7 Süntaka wanee wayuu samariajeʼewat sünain ajaʼitaa. «Tasa maa wüin», nümaka Jesuu sümüin.
nwtsty-E pütchi suluʼujeejatü tü Wiwüliakat süchiki Jn 4:6
mapüsashi sünainjee waraittüin nia: Shiairia neʼe sünain wetsiikulokot tüü eere süküjünüin mapüsain Jesuu. Kaleʼujatü tia, maʼaka saaʼin 12:00. Eeshijaʼa waraittüle Jesuu soʼu tia eejee tü nasapüshii chakat Jordán chamüin Sicar chaa Samaria, yaletüsü maʼaka 900 meetüro jee sülatüle suulia tia (Jn 4:3-5; paashajeʼera App. A7).
Püchajaa süchiki kaaʼürüi suluʼu tü Wiwüliakat
nwtsty-E pütchi suluʼujeejatü tü Wiwüliakat süchiki Jn 3:29
Nütünajut chi kaʼwayuuseshikai: Sümaiwa paala, kaʼwayuuseinjachire wanee wayuu, niapuʼu niʼitaaka wanee nütünajutu süpüla niainjachin asoutuin saaʼu wanee kasa jee keraajüsü nutuma tü miʼiraa shikiirainjatkat kaʼwayuusee. Niapuʼushi eʼikajaaka tü jietkat nümüin chi kaʼwayuuseinjachikai. Wanaa sümaa kasaalüinjachin wanee wayuu, antawaisü tü jietkat namaa na wayuukana nipialuʼumüin chi kaʼwayuuseinjachikai, jee shiale nipialuʼumüin chi nüshikai. Talatüshi nütünajutu chi kaʼwayuuseshikai suʼunnaa tü miʼiraakat süka niʼrüin naashajaain chi nütünajutkai sümaa tü nuʼwayuuseinjatkat, nütüjaa aaʼu anain nutuma sukuwaʼipa tü miʼiraakat. Naashin Juan chi Owoutisaajüikai, müshi aka nia naaʼin «nütünajut chi kaʼwayuuseshikai». Jesuu müshi aka naaʼin chi kaʼwayuuseinjachikai otta na nikirajüinjakana müshii aka saaʼin tü nuʼwayuuseinjatkat. Yapashii nutuma Juan chi Owoutisaajüikai na palajanakana nikirajüin Jesuu, müshii aka saaʼin tü nuʼwayuuseinjatkat Jesukürisüto (Jn 1:29, 35; 2Co 11:2, TNM; Éf 5:22-27; Alat 21:2, 9, TNM). Niashi antaka palajana «nütünajut chi kaʼwayuuseshikai», anakalaka sukuwaʼipa wanee kasa nutuma, süchikijee tia, nnojoluichipa niain chi kojutukai maʼin sünain tü miʼiraakat. Akaataʼaya neʼe Juan, müsü nünüiki nüchikijiraa: «Kasataalejeseʼe niain alanaain sünain kojutüin Jesús sütüma wayuu toulia, jaʼitashije tayain mojutüin sütüma» (Jn 3:30).
nwtsty-E pütchi suluʼujeejatü tü Wiwüliakat süchiki Jn 4:10
wüin katajatkat atüma soʼu wayuu: Tü pütchikat griego eʼitaanakat yaa, shia saashajaaka achiki wanee wüin awataaka, wanee wüin suluʼujeejatü manantial, jee shiale wüin jemetüsü ayuʼluushika suluʼujee manantial. Naata maʼin tia suulia wanee wüin jamataka suluʼu ishi. Suluʼu Levítico 14:5 eʼitaanüsü tü pütchikat hebreo «wüin awataaka», wüin kataka atuma soʼu wayuu maluʼulu tia. Suluʼu Jeremías 2:13 otta 17:3 aküjünüsü niain Jeʼwaa «shikiishikai (jee shiale manantial) tü wüin katakat atuma soʼu wayuu», tia shiyaawase tü wüin katakalü atuma soʼu wayuu. Naashajaapa Jesuu sümaa tü wayuu samariajeʼewatkat, nüküjain süchiki tü «wüin katajatkat atüma soʼu wayuu», shiyaawasesü neʼe nutuma, nnojotpejeʼe shiyaawatüin saaʼu tü wayuukot jamaluʼuluin maʼin tü nümakat (Jn 4:11; paashajeʼera pütchi suluʼujeejatü tü Wiwüliakat süchiki Jn 4:14).
SETTIENPÜROʼU 17-23
KOROLO KOJUTUSÜ SULUʼUKA TÜ WIWÜLIAKAT | JUAN 5, 6
«¿Kasa woʼunaka eeʼiree süchiirua nukuwaʼipa Jesuu?»
nwtsty-E pütchi suluʼujeejatü tü Wiwüliakat süchiki Jn 6:10
Eejana maa aka 5.000 tooloyuu saʼaka tü wayuukolüirua süpüshua: Nia neʼe Mateo ashajaka nachiki eein «jieyuu ooʼulaka na tepichi eejanakana» nüküjapa süchiki tü kasa pülasü naainjakat Jesuu (Mt 14:21). Eesüjaʼa süpüla eejanain 15.000 wayuu soʼu tia.
nwtsty-E pütchi suluʼujeejatü tü Wiwüliakat süchiki Jn 6:14
chi Nünüikimaajachikai Maleiwa: Wainma na judíokana eejakana soʼu nükalia Kürisüto aʼatapajaka chi Nünüikimaajachikai Maleiwa maʼaka naaʼin Moisés, aküjünakai achiki suluʼu Dt 18:15, 18, niainjachi chi Mesíaskai. Tü pütchi aküjünakat suluʼu pütchika tüü, chi antajachikai anülia saʼakamüin wayuu, eesü süpüla niain saashajaain achiki chi Mesíaskai. Nia neʼe Juan ashajaka süchiki tia.
(Juan 6:25-27, TNM) Shiasaʼa nantapa nünain Jesuu chejeeruʼu sünain tü palaakat, namaka nümüin: «Ekirajüikalee, ¿joujachi pia antüin yaamüin yaa?». 26 Nusoutakalaka Jesuu namüin: «Shiimain tü tamakat jümüin: Jüchajaa achikichi neʼe taya sutuma emirain jia tatuma süka pan, nnojotsü shiain sutuma tü kasa pülasü taainjakat. 27 Nnojo jiʼyataain süchiirua tü eküülü atüjakalü ajaʼttaa, shia jiʼyataa achiirua tü eküülü katüinjatkalü atuma joʼu waneepia, aapünüinjatka nutuma chi shipayakai wayuu, süka niain aneekuushin nutuma chi Washikai Maleiwa».
(Juan 6:54, TNM) Kateechi oʼu waneepia chi ekakai teʼiruku jee chi asakai tasha otta tasoʼireechi aaʼin nia soʼu tü kaʼi süsaleetkat oʼu saainjala wayuu.
(Juan 6:60, TNM) Shiasaʼa naapaiwaʼaya tia na nikirajüinkana, namajiraaka: «Airuʼulu tia pütchikat; ¿jaraikai aapajeeka shia?».
(Juan 6:66-69, TNM) Jee suluʼujee tia, wainma na nikirajüinkana aaʼinrakana nachikuaʼa tü kasa naaʼinrapuʼukat sümaiwa otta nnojoliinnapa naya nümaain. 67 Müshijeseʼe nümüin Jesuu namüin na 12 nikirajüinkana: «¿Jama jiakana? ¿Nnojoishii oʼunajanain jia?». 68 Nusoutakalaka Simón Pedro: «Senyotkalee, ¿jaraikai woʼunajachika anainmüin? Sümaajachi pia pütchi katakalü atuma soʼu wayuu; 69 otta anoujashii waya pünain sümaa watüjaain saaʼu piain chi Wulekai akuwaʼipa nümaʼanajeejachikai Maleiwa».
nwtsty-E pütchi suluʼujeejatü tü Wiwüliakat süchiki Jn 6:27, 54
tü eküülü atüjakalü ajaʼttaa [...] tü eküülü katüinjatkalü atuma joʼu waneepia: Niyaawata aaʼu Jesuu eein wayuu oʼunaka nüchiirua namaa na nikirajüinkana, shiiʼiree naapüin Jesuu kasa namüin. Katüsü soʼu wayuu soʼukaiwai sutuma tü shikakat, shiapejeʼe kateerüin atuma soʼu waneepia tü Nünüikikat Maleiwa. Naashin Jesuu kachiiruainjatü naaʼin na wayuukana tü eküülü katüinjatkalü atuma noʼu waneepia, tia makat, shia kapülainjatüin naaʼin tü kasa sünainpünaakat nanoula jee neʼitaainjatü naaʼin sünain tü nekirajaakalü anain (Mt 4:4; 5:3; Jn 6:28-39).
ekakai teʼiruku jee chi asakai tasha: Sünain pütchikat tüü, shiyaawasesü neʼe shikünüin niʼiruku Jesuu jee süsünüin nüsha, tü naaʼinrakat na wayuukana shia neʼitaain naaʼin nünain Jesukürisüto (Jn 6:35, 40). Nüküjain tia Jesuu soʼu juyaka 32 Sü. W, makalaka nnojoluin shiain naashajaain achiki tü Ekawaa aipaʼajatkat nutuma chi Senyotkai süka süikaleʼennüin ekii tia wanee juya mapa. Nüküjain Jesuu tia pütchikat süpülapünaachon «sükalia tü Pascuakat, tü nemiʼirakat na judíokana» (Jn 6:4), makalaka shiain sotuin naaʼin na aapajakana nünüiki sülüʼülüin tia miʼiraakat jee kojutushaatain maʼin nüsha chi anneetchon oʼutunakai aaʼin süpüla taashinjanain na israeliitakana soʼu tü ai nojuʼitakalü oʼu chejee Egiptojee (Éx 12:24-27). Shia nüküjeeka achiki Jesuu kojutushaatain maʼin tü nüshakat süka eein süpüla katüin noʼu waneepia na nikirajüinkana sutuma.
w05-S 1/9 süp. 21 püt. 13, 14
Pansaajeerü wakuwaʼipa [...] sümaa nünülia chi Wamaleiwasekai Jeʼwaa
13 Ayatapejeʼe na wayuukana nüchiirua Jesuu, nantaka nünain «chejeeruʼu sünain tü palaakat», maʼaka nüküjain Juan. ¿Jamüshii noʼunaka nüchiirua süchikijee niyoutuin Jesuu nüneekünüin süpüla aluwatawaa? Wainma na eeʼiyatakana shiain naaʼinreein tü suchuntaakat naaʼin süka shiain naashajaain achiki tü eküülü naapakat Jeʼwaa namüin na israeliitakana soʼu nükalia Moisés. Naaʼinruʼu nayakana, naapüinjatü Jesuu tü neküinjatkat. Niyaawataka saaʼu Jesuu tü suluʼukat naaʼin, makalaka nikirajüin naya tü shiimainkat süpüla nanoutuin tü jülüjakat naaʼin (Juan 6:17, 24, 25, 30, 31, 35-40). Eeshii na mojukana anüiki nüchiki Jesuu, shialeekajaʼa wanaa sümaa nümüin: «Shiimain tü tamakat jümüin: Nnojorüle jiküin niʼiruku chi Shipayakai Wayuu, jee nnojorüle jüsüin tü nüshakat, shiimain nnojoleerüin katüin joʼu. Kateechi oʼu waneepia chi ekakai teʼiruku jee chi asakai tasha otta tasoʼireechi aaʼin nia soʼu tü kaʼi süsaleetkat oʼu saainjala wayuu» (Juan 6:53, 54, TNM).
14 Sükajee kayaawasein nünüiki Jesuu, neeʼiyatüin na wayuukana müleka shiimainre nümaweein naya Maleiwa, jee soʼu nüküjain tia Jesuu airuʼutsü namüin na wayuukana. Müsü tü pütchikat: «Shiasaʼa naapaiwaʼaya tia na nikirajüinkana, namajiraaka: ‹Airuʼulu tia pütchikat; ¿jaraikai aapajeeka shia?›». Anuuka nünüiki Jesuu namüin shiiʼiree nayaawatüin saaʼu jamaluʼuluin nünüiki: «Katüsü soʼu wayuu nutuma chi naaʼinkai Maleiwa, akaajasaʼa niʼiruku wanee wayuu nnojotsü kasain anain apüla. Nünainjeejatü chi naaʼinkai Maleiwa tü taküjakat jümüin otta kateerü joʼu sutuma». Wainmapejeʼe na wayuu nnojoliikana oonooin sümaa nünüiki, anuu sooʼomüin tü pütchikat: «Jee suluʼujee tia, wainma na nikirajüinkana aaʼinrakana nachikuaʼa tü kasa naaʼinrapuʼukat sümaiwa otta nnojoliinnapa naya nümaain» (Juan 6:60, 63, 66, TNM).
Püchajaa süchiki kaaʼürüi suluʼu tü Wiwüliakat
nwtsty-E pütchi suluʼujeejatü tü Wiwüliakat süchiki Jn 6:44
eenakuushin nütüma: Tü pütchikat griego «eenakaa» eʼitaanüsü shia süpüla saashajaanüin achiki ajarattaa jime süka kusu (Jn 21:6, 11), nnojotpejeʼe shiain saashajaain achiki najarattüin Maleiwa na wayuukana süpüla naaʼinrüin tü keeʼireekat naaʼin. Shia nüküjeeka achiki Jesuu tü suluʼukat Jeremías 31:3, wanaa sümaa nümüin Jeʼwaa sümüin nupueulose: «Teenaküin pia tanainmüin süka alin pia tapüla waneepia». (Tü pütchikat griego shia neʼe tü eʼitaanakat suluʼu tü kanüliakat Septuaginta). Saashin Juan 12:32 neenaküin Jesuu wayuu maʼleekalia nünainmüin. Saashin tü Wiwüliakat nuuʼulaain Jeʼwaa naneeküin na wayuukana tü keeʼireekat naaʼin. Naneeküinjatü na wayuukana naʼyataainjanale nümüin Maleiwa (Dt 30:19, 20). Neenaküin Maleiwa süka anaka akuwaʼipa na wayuu achekakana naʼyataain nümüin (Sl 11:5; Pr 21:2). Naaʼinrüin tia Jeʼwaa sükajee sünüiki tü Wiwüliakat jee nükajee chi naaʼinkai. Tü pütchi aküjünakat suluʼu Isaías 54:13, aashajaanaka achiki suluʼu Juan 6:45, naya ekeraajaka anain na neenakakana chi Washikai Maleiwa (Anasü paashajeʼerüle Juan 6:65).
nwtsty-E pütchi suluʼujeejatü tü Wiwüliakat süchiki Jn 6:64
nütüjaatüjülüʼinya saaʼu [...] jaralinjachin chi wayuu aapüinjachikai nikii: Nia Judas Iscariote chi naashajaakai achiki Jesuu. Siraasü aika nümaa Jesuu sünain achuntaa nümüin chi Nüshikai süpülapünaa nüneeküin na 12 aluwataaushiikana (Lu 6:12-16). Oonooshi paala Judas nümüin Maleiwa. Nütüjaapejeʼe saaʼu Jesuu sükajee tü Pütchi Ashajünakat süka Hebreo eeinjachin wanee naʼaleewain aapüinjachikai nikii (Sl 41:9; 109:8; Jn 13:18, 19). Niyaawata aaʼu Jesuu sumojujaain naaʼin Judas, nuuntuin tia süka nütüjain süpüleerua ayaawataa saaʼu tü suluʼukat naaʼin wanee wayuu jee tü jülüjakat naaʼin (Mt 9:4). Süka eein süpüla nütüjaatüjülin saaʼu Maleiwa tü kasa alatajatkat, eesüjaʼa süpüla nütüjaain saaʼu eeinjachin wanee naʼaleewain Jesuu aapüinjachikai nikii. Nnojotpejeʼe maajüin tü nukuwaʼipakat Maleiwa, jee nnojotpuʼusü müin nukuwaʼipa sümüin wayuu, nnojotkalaka anain wamüle niain eʼitaanüin Judas süpüla niainjachin aapüin nikii Jesuu.
nütüjaatüjülüʼinya saaʼu paala: Tia pütchikat nnojotsü aashajaain süchiki tü kaʼi joʼuuka oʼu Judas, jee nnojotsü shiain wanaa sümaa siraain aika nümaa Jesuu sünain aneekaa na aluwataaushiikana (Lu 6:12-16). Shia saashajaaka achiki wanaa sümaa sukumajaain suluʼu naaʼin Judas naapeein nikii Jesuu, otta niyaawatamaatüin Jesuu saaʼu tia (Jn 2:24, 25; Alat 1:1; 2:23; paashajeʼera pütchi suluʼujeejatü tü Wiwüliakat süchiki Jn 6:70; 13:11). Tia shiiʼiyatüin jülüjain naaʼin Judas tü naaʼinrajatkat otta «meerü tatuma», müshi nia, nnojotsü naaʼinrüin tia sutuma suʼwanajaʼalaa sümüin tü suluʼukat naaʼin. Suluʼu tü Pütchi Ashajuushikat süka Griego, tü pütchikat «paala» (suluʼu griego ar kheʹ) ayaawatünüsü jamaluʼuluin shia wanaapünaa sümaa tü saashajaakalü achiki. Jamüsüjaʼa suluʼu 2 Pedro 3:4, tü pütchikat «paala», shia saashajaaka achiki sukumajünaiwaʼaya kasa süpüshuaʼa. Eepajaʼa shiʼitaanüle süpüla süküjünüin süchiki wanee kasa nnojotka shiain suʼttiajee wanee kasa. Jamüsüjaʼa tü nümakat Pedro süchiki nüntüin chi naaʼinkai Maleiwa naaʼu na gentiilekana, müshi nia: «maa aka paala nüntüin suluʼumüin waaʼin wayakana» (Alu 11:15). Nnojotsü shiain naashajaain achiki Pedro tü kaʼi joʼuuka oʼu nia, jee nnojotsü shiain wanaa sümaa nüneekünüin süpüla nuluwataaushin. Shia naashajaaka achiki tü alatakat soʼu Pentecostés soʼu juyaka 33 So.W., wanaa sümaa nüshakatüin chi naaʼinkai Maleiwa naaʼu süpüla nüneekünüin nutuma Maleiwa (Alu 2:1-4). Eesü waneirua wetsiikulo eeʼiyataka naatain sukuwaʼipa tü pütchikat «paala», eesü shia suluʼu Juan 15:27; otta 1 Juan 2:7.
SETTIENPÜROʼU 24-30
KOROLO KOJUTUSÜ SULUʼUKA TÜ WIWÜLIAKAT | JUAN 7, 8
«Kojutushi Jeʼwaa nutuma Jesuu»
cf-S süp. 100 püt. 5, 6
«Müsü tü ashajuushikat»
5 Shia keeʼireeka naaʼin Jesuu nayaawatüinjatüin saaʼu na wayuukana jalejeekuwalin tü nikirajakalü anain. Müshijeseʼe nümüin: «Tü tekirajakat anain, nnojotsü pütchin taleʼeruʼujeejatü neʼe, naapajala tamüin chi kajünalakai taya» (Juan 7:16). Jee müshi nia: «Sümaa nnojolüin talaülaajain tamüiwa sünain aaʼinraa tü kasa anasü taaʼinrakat. Tü tamakat jümüin, shia tü pütchi naapajalakat tamüin chi Tashikai» (Juan 8:28). Otta «tü pütchi taküjapüʼükat jümüin, nnojotsü pütchi neʼe taleʼeruʼujeejatü. Je tü kasa anasü taaʼinrapüʼükat, tountüin taaʼinruin süka saʼaniraain nukuaippa chi Tashikai tamaa» (Juan 14:10). Wanee kasa naaʼinraka Jesuu süpüla niiʼiyatüin shiimain tü nümakat shia sükajee nüküjain tü sümakat tü Wiwüliakat.
6 Jülüjataale waaʼin tü nümakat Jesuu suluʼu tü Wiwüliakat, wayaawateerü aaʼu wainmatuain maʼin nüküjain sünüiki tü Pütchi Ashajuushikat süka Hebreo. Eesüjaʼa nnojorüle kasajatüin tia wamüin otta eeshiijaʼa wayuu asakirakana naaʼin jamüin nnojoika nüküjain Jesuu sünüiki süpüshuaʼa tü ashajuushikat, nülatirüle apünüin juya shiatapünaamüin sünain ekirajaa jee aküjaa pütchi. Eesüjaʼa müle sukuwaʼipa nutuma. Soto waaʼin shiain ashajünüin süpüshi neʼe tü pütchi nüküjakat jee tü naaʼinrakat (Juan 21:25). Waashajeʼerüin neʼe soʼu jeʼra oora tü pütchi nüküjakat Jesuu suluʼu tü Wiwüliakat. Jülüjataale waaʼin tia, poneerü maʼin waaʼin nikirajüin Jesuu nüchiki Maleiwa sümaa Nuluwataaya soʼu palitchon oora sümaa sülanaʼaleein suulia shiatapünaa tü Pütchi Ashajuushikat süka Hebreo naashajaaka achiki. Eesü nnojotpuʼule rooyo nümaʼana Jesuu. Wanaa sümaa nikirajüin Jesuu saaʼu wanee Namüna, aashajaashi nia süchiki tü Pütchi Ashajuushikat süka Hebreo otta eeshi nüküjale tü sümakat, niyuʼluin tia suluʼujee nikii.
w11-S 15/3 süp. 11 püt. 19
Eejiraa waya sümaa tü naaʼinrakat na manoujainsaliikana, wacheka chi naaʼinkai Maleiwa
19 Woonoo waneepia nümüin Jeʼwaa. Shia naainjaka Jesuu waneepia tü anakat noʼuluʼu Maleiwa. Eepajaʼa wanee kasa alataka nümüin nnojotka naainjeein atuma tü keeʼireekat naaʼin chi Nüshikai. Mayaapejeʼe müin tia, niʼitaain maʼin naaʼin nünain chi Nüshikai jee nümaka nümüin: «Nnojolüin shiainjatüin paaʼinrüin tü tachekakat neʼe tamüiwa, shia paaʼinrüinjatka tü püchekakat tapüleerua» (Luc. 22:42). Wasakira waaʼin: «¿Oonooshiche taya nümüin Maleiwa jaʼitasü kapüleein tia tamüin?». Kateerü woʼu waneepia müleka waaʼinrüle tia. Soto waaʼin niainjachin neʼe woonooinjachin amüin niakai süka niain katüin atuma woʼu jee nia aapaka tü kasa choʼujaakat wamüin süpüla ayatüin katüin woʼu (Sal. 95:6, 7). Choʼujaashaatasü woonooin nümüin Maleiwa. Nnojoleerü anain naaʼin wamaa, moonooinre waya nümüin.
Püchajaa süchiki kaaʼürüi suluʼu tü Wiwüliakat
w07-S 1/2 süp. 6 püt. 4
¿Jamüshii waküjainjanaka tü shiimainkat?
¿Jamüsü nukuwaʼipa Jesuu wapüleerua? Eejana waneinnua wayuu manoujainkana nünain, jee müshii naya nümüin: «Anakaja puʼunüle yaajee yaa chamüin chaʼaya Judeamüin». Nusoutakalaka Jesuu: «Juʼuna jumata sünainmüin tü miʼiraakat chaʼaya Judeamüin. Nnojoishi taya oʼunajachin jooluʼu, süka nnojoliyülüin kettaain takalia süpüla oʼunaa». Shiasaʼa mapa, oʼunushi Jesuu chamüin Judea sünain tü miʼiraa aainjünakat chaa Jerusalén. ¿Jamüsüche maka nünüiki namüin? Süka nnojoluin choʼujaain natüjaain saaʼu jalainjachin Jesuu. Nnojoishi aküjain naʼalain Jesuu, shiajaʼa neʼe nnojoluin nüküjain süpüshuaʼa tü naaʼinrajatkat, jee sünainjee tia nnojoishi jamajüin nia atumawaa namaʼaleʼeya na nikirajüinkana. Anuu nünüiki Pedro nüchiki Kürisüto: «Maainjalasai Cristo je matüjainsai aküjaa alawaa» (Juan 7:1-13; 1 Pedro 2:22).
(Juan 8:58, TNM). Nümakalaka Jesuu namüin: «Shiimain tü tamakat jümüin: Eetüjüiya taya nüpülapünaa Abraham».
nwtsty-E pütchi suluʼujeejatü tü Wiwüliakat süchiki Jn 8:58
Eetüjüiya taya: Naʼinaʼaleein Jesuu na wayuu mojushiikana amüin tü nümakat süka niʼraajüin Abraham naashin, jee maʼaka namüin nayakana, nnojotsü nüsaʼwatüin Jesuu jaʼralin shikii nuuyase (Jn 8:57). Nüküjaka Jesuu namüin chapuʼuin nia kepiain chaa sirumatuʼu sümaa meʼrujuin nia süpülapünaa joʼuuin Abraham. Eeshii na makana Maleiwain Jesuu saashin wetsiikulokot tüü. Naashin nayakana, tü pütchikat griego e·goʹ ei·miʹ («Tayakai», maka suluʼu waneirua Wiwülia) sünainjeejatü tü kanüliakat Septuaginta, suluʼujeejatü Éxodo 3:14 otta naashin naya wayuukana wanaawainjatü sülatiria tia wetsiikulokalüirua (Paashajeʼera pütchi suluʼujeejatü tü Wiwüliakat süchiki Jn 4:26). Tü pütchikat griego ei·miʹ shia saashajaweeka achiki eetüjülin nia süpülapünaa eein Abraham otta ayatüshia nia eein. Makalaka anain sülatinnüle «Eetüjüiya taya» suulialeʼeya «Tayakai» otta watta saalii Wiwülia alatinnaka sümaiwa jee maaʼulu eʼitaaka tü pütchikat «Eetüjüiya taya». Otta müsia tü nümakat Jesuu suluʼu Juan 8:54, 55 shiiʼiyatüin nnojoluin nüküjeein niainya neʼe chi Nüshikai.