Tü ekawaa aipaʼajatkat nutuma Jesús

Naaʼinrapuʼuin juyawai na judíokana tü miʼiraa kanüliakat Pascua, naaʼinrüin shia soʼu kaʼikat 14 soʼu kashikat nisán. Sutuma tia miʼiraakat, sotusü naaʼin taashin naya nutuma Jehová suulia achepchieein naya chaa Egipto otta nuʼunirüin naya sünainmüin tü Mma Anasü nüküjakalü achiki paala namüin. Soʼu tü juyakat 33 soʼu wakalia, yalajachi Jesús namaa na aluwataaushikana sünain tü ekawaa süpülajatkat tü Pascuakat. Sulujana naya wanee miichi iipünaasü chaa Jerusalén. «Aapüneechi ekii taya nutuma wanee jaʼakajee», nümaka Jesús namüin na aluwataaushikana süchikijee nekaain. Mojusü maʼin naaʼin na nikirajüinkana sutuma tü nümakat Jesús namüin. «¿Jarai chi paashajaakai achiki?», namaka nümüin. Nusoutaka Jesús namüin: «Chi aapüinjachikai tekii, nieechi chi taapüinjachikai amüin shiʼipa tü pankat». Naapaka shiʼipa pan nümüin chi kanüliakai Judas Iscariote, nujuʼitamaataka Judas namaʼanajee.

Naapaaka Jesús wanee pan sünain naapüin analuʼut nümüin Maleiwa saaʼu. Nüshaletaka shiʼipawalin shia namüin na aluwataaushikana. «Jaapaa jikaiwa tü pankat. Maʼaka taapüin jooluʼu jümüin tü pankat, shiyaawasesü taapajiraainjachin tekii jaaʼu jiakana», nümaka namüin. Naapaaka joo Jesús wanee iita kaluʼusü wiino sünain naapüin analuʼut nümüin Maleiwa saaʼu. Naapaka shia namüin sünain nümüin namüin: «Anakajaʼa müleka jüsüle tü wiinokot. Wiinokot tüü, shiyaawasesü tü tasha amülainjatkat süpüla sülatinnajatüin saainjala wayuu süpüshuaʼa. Shiimain sünain aluwataainjanain jia tamaa chaa iipünaa. Tü waaʼinrakat jooluʼu, süpülajatü jaaʼinrüin waneepia süpüla sotuinjachin jaaʼin taya». Ayatüsü naaʼinrüin tia juyawai na nümaajanakana Jesús. Sünülia tia outkajawaakat natuma: Tü Ekawaa aipaʼajatkat nutuma chi Señotkai.

Jee süchikijee, oʼttushii naya sünain aʼülüjaajirawaa saaʼu jaralin miyoʼuin naʼakajee. «Chi wayuu laülaweekai jaʼaka, acheküshi jüüjüüinjachin jümüin jüpüshuaʼa», nümaka Jesús namüin.

Anuu sooʼomüin nünüiki Jesús namüin: «Aluʼujasaʼa jiakana, tatünajunnuu süka taküjain jümüin süpüshuaʼa tü aküjünakat tamüin nutuma chi Tashikai. Alüʼütsü takalia süpüla toʼunuinjachin nümaʼanamüin chi Tashikai. Akanasaʼa jiakana, makatüinjana jia yaa saaʼu tü Mmakat. Müleka shiimainre sünain aijiraain jia jüpüla, ayaawatüneena jia sutuma wayuu süpüshuaʼa sünain tekirajanain jia. Anashii aijiraale jia jüpüshuaʼa maʼaka alin maʼin jia tapüla».

Nuchuntaka mapa Jesús nümüin Jehová süpüla nükaalinjain na nikirajüinkana otta süpüla paaʼinwain naya otta talatüin naaʼin sünain aʼyatawaa nümüin Maleiwa. Achuntushi mapa Jesús süpüla wuleinjatüin tü nünüliakat Jehová. Süchikijee tia, eeʼirajüshii naya wanee jayeechi süpüla naʼwaajüin Jehová, nojuʼitaka mapa. Alüʼütsü maʼin sükalia süpüla nütaʼünüinjachin Jesús.