EKIRAJAAYA 10
¿Kasa anasü piʼreetka puutkajaale namaa na Aküjaliikana pütchi?
Nounejaain pia sünain tü outkajawaakat na Aküjaliikana pütchi, eesüjaʼa japüliiwaale paaʼin sünain oʼunaa soʼu tü palajatkat pukua. Eesüjaʼa müle pünüiki: «¿Kasache naaʼinraka sünain tü outkajawaakat na Aküjaliikana pütchi? ¿Jamüsüche kojutuka maʼin namüin noutkajaain? ¿Choʼujaasüche tamüin toʼunuin sünain?». Sünain ekirajaayakat tüü, pikirajaajeerü anain kooʼomüinjeerüin naalin Maleiwa püpüla puʼunule sünain tü outkajawaakat otta aneerüin pukuwaʼipa sünainjee.
1. ¿Kasapülajatü noutkajaaka?
Anuu nünüiki wanee wayuu ashajakai tü Bibliakat süchiki tia: «Taʼwaajeechi Jehová namaa na tawalayuukana» (Salmo 26:12). Müsia maaʼulu natuma na aküjaliikana pütchi nüchiki Jehová, outkajaashii naya jee talatüsü naaʼin sutuma naaʼinrüin tia. Sainküinpünaa mmakat outkajaʼawaishii naya semaanawai süpüla naʼwaajüin Maleiwa, neeʼirajüin jee noʼuraajüin nümüin. Eeshii noutkajaale kojuyatua soʼu juyakat sünain wanee outkajawaa miyoʼu.
2. ¿Kasa pütüjeetka sünain tü outkajawaakat?
Tü ekirajünakalü anain sünain tü outkajawaakat shia sünain nünüiki Maleiwa otta aküjünüsü jamaluʼuluin shia (paashajeʼera Nehemías 8:8). Pütüjaajeerü aaʼu nüchiki Maleiwa jee süchiki anain maʼin tü nukuwaʼipakat puʼunule sünain tü outkajawaakat. Pütüjaapa saaʼu miyoʼuin paalin nüpüla Maleiwa, keeʼireejeerü paaʼin aleewain pia nümaa. Jee müsia pütüjaajeerü aaʼu tü nümakat Maleiwa süpüla talatüin paaʼin jee anain pukuwaʼipa (Isaías 48:17, 18).
3. ¿Kasa anasü piʼreetka nanainjee na wayuu outkajaakana?
Naashin Jehová akaalinjiraainjana waya wapüshuaʼa sünain kamaneejiraain jee sünain waaʼinrüin tü anasükat. Nnojoluinjatü akulajaain waaʼin sünain jutkatirawaa (Hebreokana 10:24, 25). Sünain tü outkajawaakat piʼreena aijiraain maʼin na wayuukana otta piʼraajeena na wayuu ekirajaweekana nüchiki Maleiwa. Jee müsia paapajeerü süchiki pütchi suluʼujeejatü tü Bibliakat katsüinjeetka atuma paaʼin (paashajeʼera Roma 1:11, 12). Piʼraajeenaʼaya wayuu eekai kaʼwayuusein otta eekai maʼwayuusein. Wayuukana naainnua talatüsü naaʼin mayaainjeʼe sülatüin kasa mojusü namüin. Tia shia süpüshi tü kasa anasü weʼreetka woutkajaale, shiajaʼa makaʼa nümüin Jehová woutkajaainjanain.
WEKIRAJAA SOOʼOMÜIN
Yooto waya süchiki tü aainjünakat sünain tü outkajawaa eekat natuma na aküjaliikana pütchi nüchiki Jehová otta jamüin anaka woʼunule sünain.
4. Tü outkajawaa eekat natuma na aküjaliikana pütchi nüchiki Jehová
Na anoujashii namaiwajanakana, outkajaapuʼushii naya süpüla naʼwaajüin Jehová (Roma 16:3-5). Jaashajeʼera Colosas 3:16 otta yooto jia süchiki tüü:
¿Kasa naaʼinrapuʼuka na anoujashii namaiwajanakana süpüla naʼwaajüin Jehová?
Outkajaashiʼiya maaʼulu na Aküjaliikana pütchi suluʼu Piichi Outkajaalee. Süpüla pütüjaain saaʼu kasain aainjünüin sünain tü outkajawaakat, jünaja tü VIDEOKOT. Süchikijee, jiirakaa sümüin shiyaakua tü outkajawaakat otta yooto jia süchiki tüü:
¿Kasa wanaawaka ama tü sümakat Colosas 3:16 sümaa tü aainjünakat suluʼu tü Piichi Outkajaaleekat?
Süchikijee pünajüin tü videokot jee piʼrüin shiyaakua tü outkajawaakat, ¿kasa kamalainka pümüin sünain tü aainjünakat sünain tü outkajawaakat?
Jaashajeʼera 2 Corinto 9:7 otta yooto jia süchiki tüü:
¿Jamüsü nnojotka suchuntunuin nneerü sünain tü outkajawaa eekat natuma na Aküjaliikana pütchi?
Pünaʼla nümaa chi wayuu ekirajakai pia tü ekirajaanajatkalü anain soʼu semaanaka.
¿Jarat tü kamalainkat pümüin sünainjee tü ekirajaanajatkalü anain?
¿Pütüjaa aaʼu tüü?
Pünaʼla suluʼu jw.org jalain otta joujain saainjünaka oʼu wanee outkajawaa.
1. Sünain tü outkajawaakat, aküjünüsü pütchi süpülajatü wayuu süpüshuaʼa, eeʼiyatünüsü video otta sukuwaʼipa wekirajia. Eeʼirajüna jee oʼuraajüna amüinchi Jehová suʼttiajee otta sajaʼttiamüin tü outkajawaakat.
2. Sünain süpüshi tü pütchikat, eeshii nayalerüle najapü na jutkatakana jee asoutushii naya shiʼipajee tü asakinnakalü anain.
3. Süpülajatü wayuu maʼleekalia: tooloyuu otta jieyuu, wayuu miyoʼuyuu otta tepichi...
4. Nnojotsü achuntunuin nneerü sünain tü outkajawaa eekat natuma na Aküjaliikana pütchi.
5. Outkajaʼawalinjana waya jaʼitairü kapüleein shia wamüin
Jülüjataa waaʼin nakuwaʼipa na kachooinkana Jesús. Chajana kepiain naya Nazaret, oʼunawaishii naya Jerusalénmüin uwatua süpüla juyakat. Apünüin kaʼi waraittüin naya saaʼupünaa uuchi süpüla nantüin suluʼumüin tü aʼwaajüleekat Maleiwa. Jaashajeʼera Lucas 2:39-42 otta yooto jia süchiki tüü:
¿Mapüleesatche namüin noʼunajanain chaʼaya Jerusalénmüin?
¿Kasajaʼa tü kapüleekat atuma pümüin puutkajaʼawalin?
¿Kasa tü eekat süpüla paaʼinrüin süpüla puutkajaʼawalin? ¿Jamüsü aneetka pukuwaʼipa puutkajaʼawaire?
Süküjain tü Bibliakat woutkajaʼawalinjanain süpüla waʼwaajüin Jehová. Jaashajeʼera Hebreokana 10:24, 25 otta yooto jia süchiki tüü:
¿Jamüshii woutkajaʼawalinjanaka?
EESHII WAYUU EEKAI NAMÜIN: «Nnojotsü choʼujaain toʼunuinjatüin suluʼumüin wanee iküleesia süpüla taʼwaajüin Maleiwa».
Püküja wanee wetsiikulo jee shiale wanee akuwaʼipaa suluʼujeejatü tü Bibliakat wayaawataka anainjee keeʼireein naaʼin Jehová woutkajaʼawalinjanain.
WATÜJAAITPAKA AAʼU
Puʼunule sünain tü outkajawaakat, pütüjeerü sooʼomüin nüchiki Jehová, paʼaleewainjeechi maʼin nia otta puʼwaajeechi nia namaa na waneinnua.
Pusouta shiʼipajee
¿Jamüshii woʼunuinjanaka sünain tü outkajawaakat naashin Jehová?
¿Kaseerü pütüjaka sünainjee tü outkajawaa eekat natuma na Aküjaliikana pütchi?
¿Kasa maa piʼreetka puʼunawaire sünain tü outkajawaakat?
PÜNAʼLA SOOʼOMÜIN
¿Eeshiche nnojoire puʼuneein sünain tü outkajawaakat sutuma japüliwaain paaʼin? Eeshi wanee wayuu mapuʼukai aaʼin. Süchikijee nuʼunuin, kamalainsü shia nümüin. Pünaja jamüin kamalainka shia nümüin.
Anuu nüchiki wanee jimaʼai kamalainkai amüin tü outkajawaakat jee tü naaʼinrakat süpüla ayatüinjachin nia sünain oʼunaa.
Paashajeʼera süchiki tü namakat na waneinnua süchiki tü outkajawaakat.
«¿Jamüsü aneetka wakuwaʼipa woʼunule sünain tü outkajawaakat?» (Pütchi suluʼuka jw.org)
Anuu nüchiki wanee wayuu mojulaapuʼukai nümaiwa, niiʼiratüin nukuwaʼipa süchikijee nuʼunuin sünain tü outkajawaa eekat natuma na Aküjaliikana pütchi.
«Eepünaale jalain taya, talüʼüjain taʼapüla» (Aapiria Wayuu, juulioʼu 1, 2014)