Namaa püpüshi otta paʼaleewainyuu
Eeshii wayuu kapüleekana amüin anajiraain naya sümaa kasayuu nanain otta naʼaleewainyuu. Wekirajaa sünain waneirua wetsiikulo, eere süküjünüin tü waaʼinrajatkat süpüla aleewain waya.
NNOJO KAPÜLAIN WAAʼIN WAKUWAʼIPA WAMÜIWAʼA
TÜ SÜMAKAT TÜ WIWÜLIAKAT: Anasü kapürale «jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa» (Filipos 2:4, 5).
TÜ SÜNAINPÜNAAKAT. Anajiraweena waya namaa na waneinnua müleka wasülajüliire, nnojoishii wayainjanain neʼe asülajünüin amüin. Eesü mojujirawaa müleka kapürale neʼe waaʼin wakuwaʼipa wamüiwaʼa. Jamüsüjaʼa müle nukuwaʼipa wanee wayuu, eesü süpüla kawalaʼatain nuʼwayuuse nutuma. Müshia chi wayuu aʼwaataakai pejeewa saaʼu nuwashirüin jee nütüjain maʼin, akatalaajeena nuulia na naʼaleewainyuukana. Süküjain tü karaloʼutakat El camino del carácter, nnojoluin kaluʼuin anajirawaa kachiiruale waaʼin wakuwaʼipa wamüiwaʼa.
TÜ PAAʼINRAJATKAT
Pükaalinja na waneinnua. Chi shiimainkai waʼaleewain, wanoujain nünüiki jee nükaalinjamaatüin waya. Naashin na ekirajaakana süchiirua tia, na akaalinjakana wayuu nnojotsü mojuin maʼin naaʼin otta anasü naaʼin namaajiraa.
Amüliajülinjachi pia wayuu. Amülialaasü waaʼin saalin wayuu wanaa sümaa müin sülatakai aaʼin wamüin tü namülialakat. Müleka pümüliajüire wayuu, nnojoleerü pülain paaʼin sümaa pünüiki. Tia shia nujuʼitirüle wanee wayuu pütchi airuʼulu süpüla alinjatüin shia sümüin wayuu.
Müleka nümüliajüire wanee wayuu, nnojoleerü mojuin nümüin naatain nakuwaʼipa na waneinnua nuulia. Nnojoleerü koʼuin pukuwaʼipa otta paʼaleewainjeerü wayuu maʼleekalia jaʼitairü mojupuʼuin nakuwaʼipa.
Walatira kaʼi sümaa wayuu. Süpüla weʼraajüin nukuwaʼipa wanee wayuu, acheküshii walatirüinjanain kaʼi nümaa. Yootuinjana waya namaa na waʼaleewainkana süpüla aleewain naya wamaa. Atüjeeshi pia yootoo namaa na pütünajutkana jee püsakireein naya sünain tü kasa alatakat namüin. Naküjain jekenainka na ekirajaakana süchiirua tia, nayain talatüin aaʼin na wayuu yootojiraakana.
PAʼALEEWAJAA NAMAA NA ANAKANA AKUWAʼIPA
TÜ SÜMAKAT TÜ WIWÜLIAKAT: «Jaʼaleewajaale sümaa wayuu mojulaasü, amojujaajeerü jukuwaʼipa» (1 Corinto 15:33, TNM, noota).
TÜ SÜNAINPÜNAAKAT. Eesü süpüla anain jee mojuin wakuwaʼipa nanainjee na wayuu waʼaleewajaakana amaa. Shiimainya müin tia naashin na sociólogo münakana. Jamüsüjaʼa naashin nayakana, walatirüle kaʼi nümaa wanee wayuu akamüjai jee niale wanee ooʼulaweekai nuʼwayuuse, eesü süpüla waaʼinreejeerüin neʼe tia nüchiirua.
TÜ PAAʼINRAJATKAT. Naya paʼaleewajaa amaa na anakana akuwaʼipa piʼrüin süpüla püshatüin nachiirua tü kasa anasü naaʼinrakat. Paʼaleewajaa namaa na eekai nayaawateʼerüin naaʼin, na kojutukana amüin wayuu, na asülajüliikana jee na kamaneekana.
SOOʼOMÜIN TÜ SÜMAKAT TÜ WIWÜLIAKAT
Pünaja video suluʼujeejatka tü Wiwüliakat akumajuushika süpüla anain nakuwaʼipa na kaʼwayuusekana, na jimaʼaliikana jee na majayünnüükana otta na tepichikana.
NNOJO AIRUʼULUIN WANÜIKI
«Eeshi chi eekai mayaawajaain saaʼu nünüiki, müshi nusotokai saaʼin wayuu süka shiʼichi chajaruuta» (PROVERBIOS 12:18).
ASÜLAJÜLIINJANA WAYA
«Chi wayuu eekai nüsülajülin, anakuwaʼipaleechi» (PROVERBIOS 11:25).
KOJUTA WAYUU WAMÜIN MAʼAKA WACHEKÜIN KOJUTUIN WAYA ATUMAA
«Anasü müleka jaaʼinrüle tü anasükat sümüin wayuu, maa aka jücheküin saaʼinreein tü anasükat jümüin» (MATEO 7:12).