TÜ WAAʼINRAJATKAT KOJUTUJAALE TÜ KASAKALÜIRUA
Wayaawata saaʼu isain wachiki wanouteerü wanee kasa
Eesü nnojorüle watüjaain saaʼu kojutujaʼawalin tü kasakalüirua sutuma sükooʼomüinrüin tü nneerü awalaajünawaikat wamüin. Eepejeʼe süpüla shapaain maʼin waaʼin weʼrapa kojutujaain maʼin tü kasakalüirua sümaa nnojoluin walaain maʼin tü waʼyataakalü anain shialeekajaʼa waapüinjatüle tü kasa choʼujaakat sümüin wapüshi.
Nnojoleerü shapaain maʼin waaʼin wayaawatüle saaʼu eein tü isakat wachiki wanouteʼerüin maʼaka saaʼin kojutujaale sülia tü kasakalüirua.
¿JAMÜSÜ CHOʼUJAAKAʼA WAAʼINRÜIN TIA?
Anuu waneirua kasa eeka sutuma wayaawatüin saaʼu isain wachiki wanouteʼerüin wanee kasa:
Jimatüsü waaʼin. Jimatüle waaʼin wayaawatüin saaʼu tü waaʼinrajatkat jee anasü tü kasa waneekakat.
Wayaʼlajüin neʼe tü kasa choʼujaakat. Nnojotsü anain wayaʼlajüle waneirua kasa suulia wawalaajüin tü choʼujaakat maʼin maʼaka tü luusakat, tü wüinkat jee waneirua kasa.
Nnojoishii aʼülüjiraain waya sümaa wapüshi saaʼujee tü nneetkat.
Jülüjasü waaʼin tü kasa choʼujaakat wamüin. Nnojo wakataajüin maʼin tü nneetkat sünain wanee kasa nnojotka choʼujaain maʼin.
TÜ EEKAT SÜPÜLA PAAʼINRÜIN
Ana paaʼin sümaa tü eekat pümaʼana. Kojutujaale maʼin tü kasakalüirua nnojo wayaʼlajüin kasa nnojoleetka choʼujaain maʼin wamüin. Eeshii wayuu wainmapuʼukana kasa namaʼana, shiasaʼa sutuma suʼwanajaʼalaa sümüin sukuwaʼipa tü mmapaʼakat, aʼyataashii maʼin naya jee eeshii kojuyaarale naya süka meein nakuwaʼipa maʼakaapuʼu shia paala. Nnojotpejeʼe anain naaʼinrüle tia wanee wayuu süka shapaajeerü maʼin naaʼin jee mapüseechi maʼin nia. Nnojotsiaajeʼe mojuin niʼyataale wanee wayuu süpüleerua tü choʼujaakat sümüin nüpüshi, shiapejeʼe naaʼinmaainjatüin nülatirüin kaʼi sümaa nüpüshi, naaʼinmajüin naya jee alin naya nüpüla.
Mapüseena maʼin waya otta shapaajeerü waaʼin waʼyataale maʼin süpüla müin wakuwaʼipa maʼakaapuʼu paala