Mojutusai Maleiwa sutuma tü iküleesia ekirajakalü alawaa

¿Jamüshii naaʼinraka kasa mojusü na suluʼukana tü wane iküleesiakalüirua? ¿Nnojoishiijasaʼa nümaajanain naya Maleiwa naashin? Shia süka suluʼuin naya tü iküleesia ekirajakalü alawaa nüchiki Maleiwa. Mojutusai Maleiwa natuma. ¿Kasa naaʼinraka mojutuka anainjee Maleiwa natuma? ¿Jamüsü naaʼin Maleiwa sutuma tia? ¿Kaseerü naaʼinraka Maleiwa süka tia iküleesiakalüirua?

1. ¿Kasa nekirajaka nüchiki Maleiwa mojutuka anainjee nia natuma?

Na suluʼukana tü wane iküleesiakalüirua «nayouktüitpa tü shiimüinkat nüchikikat chi Maleiwakai» süpüla nekirajüin tü alawaakat (Roma 1:25). Suunjulajüin waneirua iküleesia süchiki nünülia Maleiwa. Süküjapejeʼe tü Bibliakat wachuntajatüin nünülia Maleiwa (Roma 10:13, 14, TNM). Sülatüle wanee kasa mojusü, aleinjatia shia nutuma Maleiwa naashin na shikiipüʼükana tü wane iküleesiakalüirua, alawaapejeʼe tia. Nnojotsü müliain wayuu nutuma Maleiwa (paashajeʼera Santiago 1:13, TNM). Akayalaasü wayuu nuulia Maleiwa sutuma tia alawaa nekirajakat.

2. ¿Kasa naaʼinraka mojutuka anainjee Maleiwa natuma?

Waneʼeya sümüin nakuwaʼipa na suluʼukana tü iküleesia ekirajakalü alawaa suulia nukuwaʼipa Jehová. «Wattairü maʼi saalii tü saainjalakat» müsü tü Bibliakat süchiki tü iküleesiairua ekirajakalü alawaa nüchiki Maleiwa (Alateetkat Mapeena [Apocalipsis] 18:5). Kakaliairü sünainpünaain poliitika jee atkawaa tü wane iküleesiakalüirua, wattainna naalii na wayuu outakana sünainjee müin saainjala. Eeshii waneinnua shikiipüʼü tü wane iküleesiakalüirua washitkana sünainjee nachuntuin nneerü namüin na wayuukana. Sükajee müin nakuwaʼipa, atüjaana aaʼulu nnojoluin neʼraajüin nukuwaʼipa Maleiwa jee nnojoluin anain naya süpüla nekirajüin nüchiki (paashajeʼera 1 Juan 4:8, TNM).

3. ¿Jamüsü naaʼin Maleiwa sutuma tia naaʼinrakat?

Mojule pümüin tü naaʼinrakat na suluʼukana tü iküleesia ekirajakalü alawaa, mojuleesia maʼin shia nümüin Jehová. Süka alin na wayuukana nüpüla Maleiwa, jashichishi nia namüin na shikiipüʼükana tü iküleesia ekirajakalü alawaa sükajee mojutuin wayuu namüin jee nekirajüin alawaa nüchiki. Nüküjain Maleiwa najaʼttirajatüin tü iküleesiairua ekirajakalü alawaa nüchiki jee müiria nnojoluin eein shia süchikuaʼa (Alateetkat Mapeena 18:21). Alüʼütsü sükalia süpüla najaʼttirüin Maleiwa süpüshuaʼa tü iküleesiairua ekirajakalü alawaa (Alateetkat Mapeena 18:8).

WEKIRAJAA SOOʼOMÜIN

4. ¿Anasüche nümüin Maleiwa süpüshuaʼa tü iküleesiakalüirua?

Eeshii na wayuu makana jaʼitairüin jeʼtsüin tü iküleesia kaluʼukat naya, arütkaashii naya nünainmüin Maleiwa naashin. ¿Shiimainchejeʼe tia namakat? Jaashajeʼera Mateo 7:13, 14 otta yooto jia süchiki tüü:

• ¿Jamüsü sünüiki tü Bibliakat süchiki tü wopu katüinjatkalü atuma woʼu waneepia?

Jünaja tü VIDEOKOT otta yooto jia süchiki tüü:

VIDEO: ¿Anasüche nümüin Maleiwa süpüshuaʼa tü iküleesiakalüirua? (shiʼipa neʼe) (3:22)

• ¿Süküjainche tü Bibliakat anain noʼuluʼu Maleiwa süpüshuaʼa tü iküleesiakalüirua?

5. Nnojoishii aijiraain na wayuukana sutuma tü iküleesia ekirajakalü alawaa

Mojutusai Maleiwa sutuma tü naaʼinrakat na suluʼukana tü iküleesia ekirajakalü alawaa. Wanee sukuwaʼipa mojutuin Maleiwa natuma shia süka sünainpünaain naya tü atkawaakat. Anuu süchiki wanee kasa naaʼinraka. Jünaja tü VIDEOKOT otta yooto jia süchiki tüü:

VIDEO: Sünainpünaasü tü kanüliakat Segunda Guerra Mundial tü wane iküleesiakalüirua (2:22)

• ¿Kasa naaʼinraka na shikiipüʼükana tü wane iküleesiakalüirua soʼunnaa tü kanüliakat Segunda Guerra Mundial?

• ¿Jamüsüjaʼa saaʼin pümüin tia naaʼinrakat?

Jaashajeʼera Juan 13:34, 35 otta 17:16. Süchikijee, yooto jia süchiki tüü:

• ¿Jamüsü naaʼin Jehová niʼrapa sünainpünaain atkawaa na suluʼukana tü wane iküleesiakalüirua?

• Wainma maʼin naainjala na wayuu suluʼukana tü wane iküleesiakalüirua. Maaliinsalii na wayuukana napüla. Püküja jamüin nnojotka pansaain nakuwaʼipa sümaa nukuwaʼipa Maleiwa.

6. Nükaalinjeein Maleiwa na wayuukana süpüla nojuʼitüin suulia tü iküleesia ekirajakalü alawaa

Jaashajeʼera Alateetkat Mapeena 18:4, TNMa otta yooto jia süchiki tüü:

• ¿Jamüsü paaʼin süka pütüjaain saaʼu nükaalinjain Maleiwa na wayuu emeejünakana sutuma tü iküleesia ekirajakalü alawaa?

7. Ayataʼaya pikirajaain nüchiki chi Maleiwa shiimainshikai

¿Mojuinjatche wanüiki nüchiki Maleiwa sutuma tü kasa mojusü naaʼinrakat na suluʼukana tü iküleesia ekirajakalü alawaa? Jamüshijaʼa eere wanee jintüi nnojoikai oonooin sümaa nünüiki nüshi, nuʼunule nipialuʼujee jee naaʼinrüle kasa mojusü, nnojotsü anain tia nümüin chi nüshikai, ¿aashi müin? «Nia kasitka chi nüshikai tü kasa mojusü naaʼinrakat chi nüchonkai», ¿müinjatche wanüiki nüchiki chi nüshikai?

• ¿Niache kasitka Jehová tü kasa mojusü naaʼinrakat na suluʼukana tü iküleesia ekirajakalü alawaa? ¿Ooʼulaainjanache waya suulia ekirajawaa nüchiki Jehová sünainjee tia?

WATÜJAAITPAKA AAʼU

Mojutusai Maleiwa atumawaa sünainjee tü kasa mojusü shikirajakat otta tü saaʼinrakat tü iküleesia ekirajakalü alawaa. Najaʼttireetpejeʼe shia Maleiwa.

Pusouta shiʼipajee

• ¿Jamüsü saaʼin pümüin tü shikirajakalü anain otta tü saaʼinrakat tü iküleesia ekirajakalü alawaa?

• ¿Jamüsü naaʼin Jehová sutuma tü kasa mojusü saaʼinrakat tü iküleesia ekirajakalü alawaa?

• ¿Kaseerü naaʼinraka Jehová süka tü iküleesia ekirajakalü alawaa?

PÜNAʼLA SOOʼOMÜIN

Anuu süchiki piamasü kasa mojutuka anainjee Maleiwa sutuma tü wane iküleesiakalüirua.

«¿Arütkaashiiche waya nünainmüin Maleiwa sutuma tü iküleesia kaluʼukat waya?» (Pütchi suluʼuka jw.org)

¿Jamüshii woutkajaainjanaka naashin Jehová namaa na waneinnua?

«¿Choʼujaasüche wekerotüinjanain sünain anouja?» (Pütchi suluʼuka jw.org)

Wainmajüsü naaʼin wanee sacerdote saaʼu tü kasa ekirajünakalü anain suluʼu tü iküleesia kaluʼupuʼukat nia. Nnojoipejeʼe ooʼulaain nia suulia ekirajawaa nüchiki Maleiwa.

«¿Jamüshi nujuʼitaka wanee sacerdote suulia tü iküleesia kaluʼupuʼukat nia?» (¡Eeja Waaʼin!, peʼureeroʼu 2015)

Kakaliairü aküjain alawaa nüchiki Maleiwa tü iküleesia ekirajakalü alawaa. Wattashi Maleiwa woulia jee mojulaashi nia saashin. Anuu süchiki apünüinsü alawaa shikirajaka.

«¿Eeshiche süpüla alin wapüla Maleiwa?» (Aapiria Wayuu, nowienpüroʼu 1, 2013)