EKIRAJAAYA 20
Lotusü sukuwaʼipa nutuma Jehová tü naaʼinrajatkat na anoujashiikana
Lotusü sukuwaʼipa süpüshuaʼa tü kasa naaʼinrakat Jehová (1 Corinto 14:33, TNM). Müinjatia sukuwaʼipa tü naaʼinrajatkat na anoujashiikana. ¿Kasa naaʼinraka Jehová süpüla lotuin sukuwaʼipa tü nupueulosekat? ¿Kasa waaʼinrajatka waneʼewai wakua süpüla lotuin sukuwaʼipa tü aainjünakat suluʼu nupueulose Jehová?
1. ¿Jarai chi wekiipüʼükai nutuma Jehová?
Nia wekiipüʼükai Cristo (Éfeso 5:23, 24). Jülüjasü naaʼin Jesús chejee iipünaajee tü aʼyatawaa saaʼinrakat nupueulose Jehová sainküinpünaa tü mmakat. Jülüjasü naaʼin nükajee «chi achepchiee oonookai jee kekiikai maʼin». Wawalayuukana naainnua, naya na Laülaashii Jülüjakana Aaʼin na Aküjaliikana Pütchi (paashajeʼera Mateo 24:45-47, TNM). Tü naaʼinrakat maaʼulu na Laülaashii Jülüjakana Aaʼin na Aküjaliikana Pütchi, müsia aka saaʼin tü naaʼinrapuʼukat na aluwataaushikana otta na laülaashii chajanakana Jerusalén (Aluwataaushikana [Hechos 15:2]. Nnojoliipejeʼe shikiipüʼüin tü nupueulosekat Jehová naya wawalayuukana. Naaʼinrüin neʼe tü nümakat Jehová sükajee tü Bibliakat otta jüüjüüshii naya nümüin Jesús.
2. ¿Kasa naaʼinraka na laülaashiikana?
Laülaa aaʼinchii sünain anoujaa na wawalayuu laülaashiikana, nekirajüin waya sünain tü Bibliakat otta alapalaashii naya waaʼu süpüla natütüleʼerüin waaʼin. Nnojoishii naya achekajüin nneerü saaʼu tü naʼyataainkat. Anuu sünüiki tü Bibliakat süchiki tü naaʼinrakat: «Jükaaliija naya süka jaaʼin jümüiwa, [...] Talatüinjatü jaaʼin sümaa süka jüchekalain shia, nnojotsü sükajeejatüin walaain jia sünain» (1 Pedro 5:1, 2). Akaalinjünüshii na laülaashiikana sünain tü naʼyataainkat natuma waneinnua wawalayuu aʼyataakana neʼipajee. Eeshiijaʼa süpüla laülaashiin mapa wawalayuukana naainnua.
Na Laülaashii Jülüjakana Aaʼin na Aküjaliikana Pütchi, naneeküin waneinnua wawalayuu süpüla nalapalaain naaʼu na wawalayuukana. Alapalaashii naya süpüla nekirajüin na wawalayuukana otta natütüleʼerüin naaʼin. Na wawalayuu alapalaakana waaʼu, naneeküin waneinnua wawalayuu süpüla laülaashiinjanain jee naʼyataainjanain neʼipajee na laülaashiikana. Jülüjasü naaʼin tü sümakat tü Bibliakat süpüla natüjaain saaʼu keraale naya wawalayuukana süpüla tia aʼyatawaakat. Müsüjeseʼe naashajeʼerüin palajana tü Bibliakat süpüla naneeküin naya (1 Timoteo 3:1-10, 12; Tito 1:5-9).
3. ¿Kasa naaʼinraka na wawalayuukana waneʼewai nakua?
Napüshuaʼa na Aküjaliikana pütchi, outkajaashii naya süpüla naʼwaajüin nünülia Jehová. Naaʼinrüin tia sükajee neeʼirajüin, nayalerüin najapü jee nasoutuin shiʼipajee tü asakinnakalü anain otta nachajaain sukuwaʼipa süpüla naküjain pütchi sümüin wayuu (paashajeʼera Salmo 148:12, 13).
WEKIRAJAA SOOʼOMÜIN
Wekirajaa süchiki nukuwaʼipa Jesús sünain wekiipüʼüin nia, tü naaʼinrakat na laülaashiikana süpüla nashatüin nukuwaʼipa Jesús otta tü waaʼinrajatkat süpüla jüüjüüin waya nümüin otta namüin na laülaashiikana.
4. Jamaamasü waaʼin nutuma Jesús
Anuu nünüiki Jesús wamüin. Jaashajeʼera Mateo 11:28-30, TNM otta yooto jia süchiki tüü:
Püküja jamüin maʼin nukuwaʼipa Jesús sünain wekiipüʼüin nia. ¿Jamüsü waaʼin nutuma?
¿Kasa naaʼinraka na laülaashiikana süpüla nashatüin nukuwaʼipa Jesús? Jünaja tü VIDEOKOT.
Süküjain tü Bibliakat jamüinjatüin natuma na laülaashiikana sukuwaʼipa naʼyataain suluʼu tü outkajaaleekat.
Jaashajeʼera Isaías 32:2 otta 1 Pedro 5:1-3 otta yooto jia süchiki tüü:
Nachajaain sukuwaʼipa na laülaashiikana süpüla nashatüin nukuwaʼipa Jesús otta süpüla jamaamain naaʼin na waneinnua natuma. ¿Jamüsüjaʼa paaʼin sutuma tia?
¿Kasa maa naaʼinraka na laülaashiikana süpüla nashatüin nukuwaʼipa Jesús?
5. Anasü nakuwaʼipa na laülaashiikana napüleerua na nawalayuukana
¿Kasa naaʼinrajatka wanee laülaashi naashin Jesús? Jünaja tü VIDEOKOT.
Pansaasü nünüiki Jesús süchiki tü nakuwaʼipainjatkat na laülaashiikana. Jaashajeʼera Mateo 23:8-12, TNM otta yooto jia süchiki tüü:
¿Jamüsü sünüiki tü Bibliakat süchiki tü nakuwaʼipainjatkat na laülaashiikana? ¿Pansaasüche nakuwaʼipa na sacerdotekana jee na shikiipüʼükana tü wane iküleesiakalüirua sümaa tia pütchikat?
1. Kojutusü nümüin wanee laülaashi tü nukuwaʼipakat nümaa Jehová jee nükaalinjain nuʼwayuuse otta nüchonnii süpüla müinya shia natuma.
2. Kapülasü naaʼin na laülaashiikana nakuwaʼipa na nawalayuukana.
3. Aküjawaishii pütchi na laülaashiikana.
4. Na laülaashiikana nekirajüin na nawalayuukana otta akaaliijashii naya sünain epitajaa tü outkajaaleekat jee sünain waneirua kasa.
6. Jüüjüüinjana waya namüin na laülaashiikana
Süküjain wamüin tü Bibliakat jamüin jüüjüüinjanaka waya namüin na laülaashiikana. Jaashajeʼera Hebreokana 13:17 otta yooto jia süchiki tüü:
¿Jamüshii jüüjüüinjanaka waya namüin na laülaashiikana saashin tü Bibliakat? ¿Anasüche tia sümakat? ¿Jamüsüjaʼa saaʼin pümüin?
Jaashajeʼera Lucas 16:10, TNM otta yooto jia süchiki tüü:
¿Jamüshii woonooinjanaka sümaa tü namakat wamüin na laülaashiikana jaʼitasü müin malaacheinkai saaʼin wamüin tü waaʼinrajatkat?
EESHII WAYUU EEKAI NAMÜIN: «Nnojotsü choʼujaain suluʼuinjanain waya wanee iküleesia süpüla waʼwaajüin Maleiwa».
¿Jamüshi anaka waʼwaajüle Maleiwa namaa na wawalayuukana?
WATÜJAAITPAKA AAʼU
Nia Jesús chi wekiipüʼükai, jüüjüüshii na laülaashiikana nümüin jee müshiʼiya wayakana, jüüjüüinjana waya namüinya süka naaʼinmajüin jee nekirajüin waya.
Pusouta shiʼipajee
¿Jarai chi wekiipüʼükai?
¿Kasa naaʼinraka na laülaashiikana napüleerua na nawalayuukana?
¿Kasa naaʼinraka waneʼewai nakua na Aküjaliikana pütchi?
PÜNAʼLA SOOʼOMÜIN
Pünaja tü naaʼinrakat na Laülaashii Jülüjakana Aaʼin na Aküjaliikana Pütchi jee tü naaʼinrakat waneinnua laülaashii napüleerua na nawalayuukana.
Nakatsüinrüin naaʼin na apüleeruaanakana aaʼin sünainjee nanoula (4:22)
Jünaja süchiki tü naaʼinrakat na wawalayuu alapalaakana waaʼu.
Nüchiki wanee wawala alapalaakai naaʼu na wawalayuu kepiakana watta suulia pueulo (4:51)
Paashajeʼera süchiki tü aʼyatawaa naaʼinrakat na jieyuukana suluʼu tü outkajaaleekat.
Paashajeʼera süchiki tü naaʼinrakat na laülaashiikana süpüla natütüleʼerüin naaʼin na nawalayuukana.
«Aʼyataashii na laülaashiikana süpüla talatüinjatüin waaʼin» (Aapiria Wayuu, eneeroʼu 2013)