EKIRAJAAYA 34
Waaʼinrajatka aire wapüla Jehová
¿Akooʼomüinraasüche naalin Maleiwa püpüla süka pikirajaain sünain tü Bibliakat? ¿Pücheküinche aleeweein pia nümaa? Sukooʼomüinraale naalin Jehová püpüla, meeria paalin nüpülaya jee naaʼinmajeechi pia. ¿Kasa eeka süpüla paaʼinrüin süka alin nia püpüla?
1. ¿Kasa waaʼinrajatka aire wapüla Jehová?
Aire wapüla Jehová, oonoweena waya nümaa (paashajeʼera 1 Juan 5:3). Nnojotsü nüpüleeruain waaʼin süpüla woonooin nümaa. Nuuʼulaain wayainjanain aneeküin waneʼewai wakua müleka woonooinjanale nümaa. Nücheka achikit Jehová woonooinjanain nümaa süka süpüshuaʼa waaʼin (Roma 6:17). Oonooshii waya nümaa süka alin nia wapüla, nnojotsü shiain süka nümajalain shia wamüin. Tü ashajünakat sünain shiʼipa 3 otta 4 sünain karaloʼutakat tüü, süpülajatü paaʼinrajatüin tü anakat nümüin jee piyoutuinjatüin tü nnojotkalü anain nümüin.
2. ¿Jamüsü kapüleʼewaika wamüin weeʼiyatüin naalin Jehová wapüla?
«Wainma tü kasa mojusü alatakat nümüin wanee wayuu anamia» (Salmo 34:19). Sutuma waleʼeruʼuin tü kaainjalaakat, maʼletsein waya, müliain waaʼin atumawaa otta waneirua kasa, kapüleʼewaisü wamüin weeʼiyatüin naalin Jehová wapüla. Eesü kapüleere wamüin waaʼinrüin tü nuluwataakalü anain waya jee woonooin nümaa sülatüle kasa mojusü wamüin. Ayatüle pia süchiirua paaʼinrüin tü nuluwataakalü anain Jehová, piiʼiyatüin naalin püpüla jaʼitairü kasain alatüin pümüin. Waneepiale paaʼin nümaa, waneepieerü naaʼin pümaʼaya jee nnojoleechi pia nüpütüin (paashajeʼera Salmo 4:3).
WEKIRAJAA SOOʼOMÜIN
Wekirajaa sünain jamüin talateetka naaʼin Jehová woonoole nümaa otta wekirajaa süchiki tü waaʼinrajatkat süpüla waneepiain waaʼin nümaa.
3. Mojusü nünüiki Satanás püchiki
Ashajünüsü suluʼu tü karaloʼutakat Job mojuin nünüiki Satanás nüchiki Job ooʼulaka nachiki napüshuaʼa na wayuu aʼyataweekana nümüin Jehová. Jaashajeʼera Job 1:1 otta 1:6–2:10 otta yooto jia süchiki tüü:
¿Jamüshi noonooka Job sümaa nünüiki Jehová naashin Satanás? (Jaashajeʼera süchikuaʼa Job 1:9-11).
¿Jamüsü nünüiki Satanás püchiki namaʼaleeya napüshuaʼa na wayuukana? (Jaashajeʼera süchikuaʼa Job 2:4).
Jaashajeʼera Job 27:52 otta yooto jia süchiki tüü:
¿Kasa naaʼinraka Job sutuma alin Jehová nüpüla?
Waneepiasü naaʼin Job nümaa Jehová süka alin nia nüpüla.
Waneepieena waya nümaa Jehová aire wapüla nia.
4. Talata naaʼin Jehová putuma
Jaashajeʼera Proverbios 27:11 otta yooto jia süchiki tüü:
¿Jamüsü naaʼin Jehová poonoole nümaa jee paaʼinrüle tü kasa anasükat?
5. Eesü süpüla waneepiain paaʼin nümaa Jehová
Aküjashii waya pütchi nüchiki Jehová süka alin nia wapüla. Mayaainjeʼe kapüleein shia wamüin, waaʼinrüin shia süka waneepieein waaʼin nümaa. Jünaja tü VIDEOKOT otta yooto jia süchiki tüü:
¿Kapüleʼewaisü pümüin paashajaain nüchiki Jehová sümüin wayuu?
Sünainjee tü videokot, ¿kasa naaʼinraka Grayson süpüla meimmoluinjatüin naaʼin?
Anale wamüin tü anakat nümüin Jehová jee walerajüle tü kasa nülerajakat, waneepieerü waaʼin nümaa. Jaashajeʼera Salmo 97:10 otta yooto jia süchiki tüü:
Sünainjee tü pikirajaaitpakalü anain, püküja süchiki waneirua kasa anaka noʼuluʼu Jehová jee süchiki waneirua kasa nülerajaka.
¿Kasa paaʼinrajatka süpüla anainjatüin pümüin tü anakat nümüin Jehová jee süpüla pülerajüin tü nnojotkalü anain?
6. Anasü wakuwaʼipa woonoole nümaa Jehová
Süpüla anainjatüin wakuwaʼipa, oonooinjana waya sümaa nünüiki Jehová. Jaashajeʼera Isaías 48:17, 18 otta yooto jia süchiki tüü:
¿Jamüshi niaka Jehová atüjaain saaʼu tü aneetkalü atuma wakuwaʼipa?
¿Kasa anasü piʼraka sünainjee pikirajaain sünain tü Bibliakat jee piʼraajüin nukuwaʼipa Jehová?
EESHII WAYUU EEKAI NAMÜIN: «Nnojotsü kachipünaain naaʼin Maleiwa tü kasa taaʼinrakat».
Süpüla niyaawatüin saaʼu wanee wayuu eein süpüla talatüin naaʼin Jehová jee mojuin naaʼin sutuma tü kasa naaʼinrakat, ¿jarat tü wetsiikulo paashajeʼereetkat nümüin?
WATÜJAAITPAKA AAʼU
Aire püpüla Jehová, poonoojeerü amaa nünüiki jee waneepieerü paaʼin nümaa jaʼitairü kasain alatüin pümüin.
Pusouta shiʼipajee
¿Kasa pütüjaka sünainjee nukuwaʼipa Job?
¿Kaseerü paaʼinraka aire püpüla Jehová?
¿Kasa paaʼinrajatka süpüla waneepiain paaʼin nümaa Jehová?
PÜNAʼLA SOOʼOMÜIN
Pünaja süchiki tü paaʼinrajatkat süpüla poonooin sümaa nünüiki Jehová jee sümaa nanüiki na laülaashiikana.
«Waneepiale wanee wayuu pümaa, waneepieechi pia nümaʼaya» (16:49)
Paashajeʼera süchiki tü nümakat Satanás nüchiki Job jee nachiki napüshuaʼa na wayuukana.
«Waneepiasü naaʼin Job nümaa Jehová» (Tü Bibliakat otta tü sümakat, shiʼipa 6)
Pünaja süchiki tü naaʼinrajatkat na tepichikana süpüla alin napüla Jehová.
¿Kasa naaʼinrajatka na jimaʼaliikana jee na majayünnüükana süpüla noonooin nümaa Jehová mayaainjeʼe süpüleeruaanüin naaʼin?