Pütchi anasü süpülajatü wayuu süpüshuaʼa

Sutuma süsoʼiraain naaʼin Jesuu, akatsüinraasü nanoula na nikirajüinkana sümaa naʼyataweein maʼin nümüin Jeʼwaa. Jamüshijaʼa chi aluwataaushikai Pablo, oʼunüshi nia sainküinpünaa tü mmakat Asia Menor otta Mediterráneo sünain nikirajüin wayuu nüchiki Maleiwa süpüla nanoujüinjanain nünain. Nütütüleʼerüin naaʼin na anoujüshiikana süpüla eejiraainjanain naya sümaa tü müliaa neʼrakat otta süpüla nnojoliinjanain naya sünainpünaain akuwaʼipaa yarüttüsü. Sutuma tü naaʼinrakat Pablo, akooʼomüinraashii na anoujüshiikana.

Süchikijee tia, püreesashi Pablo atumawaa. Akatsaʼa nuluwataain karaloukta namüin na anoujüshiikana süpüla nütütüleʼerüinjatüin naaʼin, nüchiaain naya otta naapirüin naya noulia na ekirajüliikana sünain alawaa. Sutuma eejachin naaʼu Pablo chi naaʼinkai Maleiwa, nüküjüin eejeenain wayuu eʼikeʼerüinjanaka na anoujüshiikana. Ekirajüinjana alawaa shiiʼiree noushikajaanüin achiirua (Aluwataaushikana 20:29, 30).

Eetüjülia wayuu ekirajaka sünain alawaa süpülapünaa tü juyakat sien. Soʼutpünaa tia, niiʼiyatüin Jesuu nümüin chi aluwataaushikai Juan tü alatajatkat mapeena. Naashin Juan iseerü nachiki na nüʼünüükana Maleiwa otta na ekirajüliikana sünain alawaa, namalajeʼerüin tü naainjüinjatkat Maleiwa süpüleerua wayuu otta süpüleerua tü Mmakat. Saapeerü tü «eʼirukuukat süpüshua sainküin mmakat süpüshua», tü pütchi anasükat süchiki Nuluwataaya Maleiwa (Alateetkat Mapeena 14:6). Paʼaraiiseerü tü Mmakat otta nayeena kepiaka suluʼu na wayuu aainjeekana tü nuluwataakalü anain Maleiwa.

¡Anashaatasü maʼin pütchikat tüü! Makalaka anain pikirajaale maʼin süchiki tü nümakat Maleiwa suluʼu tü Wiwüliakat. Paainjüle tia, aneerü maʼin pukuwaʼipa maaʼulu otta süpüla kaʼikat süpüshuaʼa.

Püleeja tü Wiwüliakat suluʼu www.jw.org. Alatüsü suulia 50 anüikii süshajünaka aluʼu. Püleeja suluʼu www.jw.org/guc tü poyeetokot Pütchi anasü nutuma Maleiwa, tü karalouktakat ¿Kasa shikirajaka maʼin tü Wiwüliakat? Otta müsia waneeirua karaloukta aküjaka jamüin wanoujüinjanaka sünain tü sümakat tü Wiwüliakat, tü waaʼinrajatkat süpüla anainjatüin wakuwaʼipa otta sukuwaʼipa wapüshi. Pütüjeere sooʼomüin, paashajaa namaa na aküjüliikana pütchi nüchiki Jeʼwaa süpüla nekirajüin pia.

(Suluʼujeejatü Aluwataaushikana, Éfeso, Filipos, Colosas, Filemón, 1 Juan otta Alateetkat Mapeena.)