Asakinnaka Anain
◼ ¿Neitajüinjatche na aküjüliikana pütchi nüchiki Jeowa wanee pütchi ashajuushi otta akürawaajuushi?
Atütülaasü otta katchinsü waaʼin sutuma tü pütchi nekirajakat aka na wawalayuukana (Aluw. 15:32). Makalaka keeʼireein waaʼin naapajüin shia na mantüinkana sünain tü outkajawaakat. Süka wainmain tü akürawaajiakat, eesü süpüla sükürawaajünüin otta shiitajünamaatüin wanee pütchi. Eeshii na wainmakana amaʼana pütchi akürawaajuushi, jaʼitairü kakaliairüin süküjünüin, süka nakaaliinjeein na naʼaleewainkana naʼanapajirüin otta nakürawaajüin shia namüin. Eeshii na kapülajanakana atuma shia suluʼu Internet süpüla nashakatirüin shia na aainjeekana tia.
Nnojotsü mojuin pükürawaajüle wanee pütchi pümüinjatü otta sümüinjatü püpüshi. Eesü süpüla naainjirüin tia na laülaashiikana namüin na wawalayuu isakana achiki oʼunaa sünain tü outkajawaakat süka ayuulin naya. Akatsaʼa, eesü tü kasairua eeʼiyatakat wamüin nnojoluin anain eitajaa wanee pütchi ashajuushi otta akürawaajuushi.
Süka yapain atumaa tü pütchikat wanaajiraa sümaa tü anoukteʼennüinjatkat eeinjatüle süküjünüin, eesü süpüla mojuin namüin na eitajünakana amüin shia süka nnojoluin natüjaain saaʼu tü alatakat wanaa sümaa süküjünüin. Otta müsia, kapüleejeerü atüjawaa naaʼu jaralin aküjüin shia otta joujain nüküjüin shia süpüla sütüjaanüin aaʼu, pansaale shia sümaa tü wanoujakat anain otta lotule shikirajia (Luc. 1:1-4). Eere wanee wayuu eitajakai wanee pütchi ashajuushi otta akürawaajuushi, eesü süpüla keeʼireein naaʼin kojutüin nia atumawaa jee kojutüin nutuma chi aapakai shia nümüin (1 Cor. 3:5-7).
Aʼyataashi maʼin chi achepchiee oonookai otta kekiikai maʼin süpüla naapüin wamüin tü anakat atuma wanoula, «yaawasü shia» otta naapüin wamüin «wanaa sümaa choʼujaain maʼin shia» (Luc. 12:42, NM). Saʼakajee tü naapakat Jeowa süpüla anain wanoula, eesü tü pütchi ekirajünakat aka na wawalayuukana otta tü pütchi akürawaajuushi eekat süpüla süshakatinnüin suluʼujee Internet www.jw.org. Watüjaa aaʼu naapeerüin wamüin chi achepchiee oonookai otta kekiikai maʼin otta na Laülaayuu Nekiipüʼükana na Aküjüliikana Pütchi tü choʼujaakat wamüin süpüla wachecherüin waaʼin sünain anoujaa (Aluw. 16:4, 5).