Wakaalinja na eʼrakana müliaa

1. ¿Kasa naaʼinrawaika Jehová süpüla nusoutuin namüin na aʼyataashiikana nümüin?

¿PÜTÜJAAINCHE AAʼU eein süpüla nusoutuin Jehová nümüin chi achuntakai kaalinwaa nümüin pükajee? Eesü süpüla naaʼinrüin tia Jehová wakajee, jaʼitashii laülaashiin waya, waʼyataale neʼipajee na laülaashiikana, pürekutsoorüle waya, waküjaliire pütchi, tepichire waya, miyoʼule waya, tooloyuule jee jieyuule waya. Eerejeʼe wanee wawala achuntakai kaalinwaa nümüin Jehová, eeshi nümüliajüle nia nakajee na laülaashiikana jee na wane aʼyataashiikana nümüin (Col. 4:11). Talatüsü maʼin waaʼin süka waʼyataain nümüin Jehová otta namüin na wawalayuukana sünain aaʼinraa tia. Eesü süpüla waaʼinrüin tia eejaʼalaa sümüle wanee ayuulii eekai keemain, sülatalaʼa sümüle wanee kasa otta süpüleeruaanüle waaʼin saaʼujee wanoujain.

EEJAʼALAA SÜMÜLE WANEE AYUULII EEKAI KEEMAIN

2. ¿Jamüsü kapüleeka wakaalinjain na wawalayuukana eejaʼalaa sümüle wanee ayuulii keemaka?

² Soʼunnaa wanee ayuulii eekai keemain, eesü kapüleere wakaalinjiraain. Eeshiijaʼa woʼuneere nepialuʼumüin na wawalayuukana, nnojoliipejeʼe waya oʼunuin suulia ayuulin naya watuma jee wayale ayuulin. Eeshiijaʼa wounejaweere sünain ekawaa wepialuʼu na wawalayuu eʼrakana choʼujawaa, nnojotpejeʼe süpüla waaʼinrüin tia. Eeshiijaʼa wakaalinjeere maʼin na waneinnua, isapejeʼe wachiki süka neʼrüin müliaa na wapüshikana. Mayaainjeʼe müin wakuwaʼipa, ayatüsia wachajaain sukuwaʼipa süpüla wakaalinjain na wawalayuukana. Talatüsü naaʼin Jehová sutuma tia (Prov. 3:27; 19:17). ¿Kasa waaʼinrajatka süpüla wakaalinjain naya?

3. ¿Kasa watüjaka sünainjee tü naaʼinrakat na laülaashii kaʼakakana Desi? (Jeremías 23:4).

³ Tü eekat süpüla naaʼinrüin na laülaashiikana. Laülaashire pia suluʼu tü outkajaaleekat, anashii piʼraajüle na wawalayuukana (paashajeʼera Jeremías 23:4). Anuu sünüiki Desi tü wachuntayütkalü anülia suluʼu ekirajaaya 51: «Na laülaashii kaʼakakana taya, ojuʼitawaishii naya tamaa sünain aküjaa pütchi otta namaa waneinnua wawalayuu jee aaʼinrawaishii naya kasa wamaa».b Saaʼujee naaʼinrüin tia naya laülaashiikana, mapüleesat namüin nakaalinjain Desi soʼunnaa outuin kojuyashii süpüshi sutuma tü ayuuliikat COVID-19.

4. (1) ¿Jamüsü nountaka na laülaashiikana nakaalinjain Desi? (2) ¿Kasa watüjaka nanainjee?

⁴ Anuu sünüiki Desi: «Aleewashii na laülaashiikana tamaa, müsüjeseʼe jutatüin takuwaʼipa süpüla taküjain namüin jamüin taaʼin jee kasain shapaain atuma taaʼin». ¿Kasa natüjaka na laülaashiikana sünainjee tia? Anashii juwaraijaale naaʼu na wawalayuukana jee aleewa jia namaa süpülapünaa sülatalaʼa sümüin wanee kasa. Kapüleere jümüin juʼunuin nepialuʼumüin na wawalayuukana sutuma wanee ayuulii keemaka, ayatüinjatü jüchajaain sukuwaʼipa süpüla jaashajaain namaa. Müsü Desi: «Eeshii kojuyale laülaashii ayamaajaka taya jee aluwataaka mensaaje soʼuleʼeya wanee kaʼi. Tü wetsiikulo naküjakat tamüin, antüsü suluʼumüin taaʼin mayaainjeʼe teʼraajüin tia wetsiikulokot».

5. (1) ¿Kasa naaʼinrajatka na laülaashiikana süpüla natüjaain saaʼu kasain choʼujaain namüin na wawalayuukana? (2) ¿Kasa naaʼinrajatka süpüla nakaalinjain naya?

⁵ Wane sukuwaʼipa süpüla natüjaain saaʼu na laülaashiikana kasain choʼujaain namüin na wawalayuukana, shia nasakirüle naya. Eejüinjatpejeʼe naaʼin suulia japülin naya natuma (Prov. 20:5). ¿Eesüche namaʼana tü kasa choʼujaakat namüin maʼaka saaʼin tü eküütkat jee tü nepinasekat? ¿Eesüche süpüla amüloulin naʼyataain jee nepia? ¿Choʼujaashiiche wakaalinjain naya süpüla saapünüin namüin tü nasülajawaikat na sülaülashiikana mma? Eeshii waneinnua wawalayuu asülajakana kasa sümüin Desi. Tü anaʼleekat maʼin aainjünüin süpüleerua saashin Desi shia sükatsüinnüin saaʼin jee sunoula natuma na laülaashiikana. Anuu sünüiki: «Oʼuraajawaishii na laülaashiikana tamaa. Nnojotsü sotuin taaʼin jamüin nanüiki tamüin soʼu tia, shiapejeʼe sotuin taaʼin jamüin taaʼin. ‹Nnojotsü pümüiwaʼain›, müshi nümakai aaʼin Jehová tamüin» (Is. 41:10, 13).

6. ¿Kasa waaʼinrajatka süpüla wakaalinjiraain wapüshuaʼa? (Piirakaa sümüin tü ayaakuaakalüirua).

⁶ Tü eekat süpüla naaʼinrüin napüshuaʼa na wawalayuukana. Watüjaa aaʼuchii nayain na laülaashiikana awataamaatüin sünain akaalinjaa na wawalayuukana. Nuchuntapejeʼe wamüin wapüshuaʼa Jehová wakatsüinrüinjatüin naaʼin na waneinnua jee wakaalinjainjanain naya (Gal. 6:10). Jaʼitairü waapüin wanee kasachon nümüin wanee wayuu eekai ayuulin, kojutusü nümüin tia sümaa niyaawatüin saaʼu alin nia wapüla. Eesü süpüla nakumajüin na tepichikana wanee tarjeta jee naainjale wanee dibujo nümüin wanee wawala. Eesü süpüla nakaalinjain wanee wawala na jimaʼaliikana jee na majayünnüükana sünain ayaʼlajaa wanee kasa sümüin. Eeshii süpüla naʼlakajaain niyaaluʼu wanee eekai ayuulin jee neʼikajaale shia nipialuʼumüin. Sainküinpünaale tü mmakat wanee ayuulii, choʼujaasü sükatsüinnüin waaʼin wapüshuaʼa. Anashiijeseʼe makatüle waya sajaʼttapa tü outkajawaakat süpüla yootuin waya namaa na wawalayuukana, jaʼitasü waainjale tia suluʼupünaa videoconferencia. Akaʼaya na laülaashiikana, choʼujaasü sükatchinnüin naaʼin. Eeshii waneinnua wawalayuu ashajakana pütchi namüin na laülaashiikana süpüla naapüin analuʼut namüin. Wainma maʼin naʼyataain na laülaashiikana soʼunnaa wanee ayuulii keemaka. Anashaatasü maʼin waaʼinrüle wapüshuaʼa pütchikat tüü: «Anakajaʼa ayatüleʼeya jia sünain jümüliajiraain jee jükatchinjiraain jaaʼin» (1 Tes. 5:11, TNM).

SÜLATALAʼA SÜMÜLE WANEE KASA

7. ¿Kasa eeka sutuma sülatalaʼa sümüin wanee kasa?

⁷ Sülatalaʼa sümüle wanee kasa, eesüjaʼa süpüla suʼwanajaain nukuwaʼipa wanee wayuu. Eesüjaʼa sajaʼttaleere nuulia tü kasa nümaʼanakat, tü nipiakat jee outule wanee wayuu aikai nüpüla. Alatüsiaʼaya tia namüin na wawalayuukana. ¿Kasa waaʼinrajatka süpüla wakaalinjain naya?

8. ¿Kasa naaʼinrajatka na laülaashiikana otta na kachonshiikana süpülapünaa sülatalaʼa sümüin wanee kasa?

⁸ Tü eekat süpüla naaʼinrüin na laülaashiikana. Jia laülaashiikana, jükaalinja na wawalayuukana süpüla yapain naya süpülapünaa sülatalaʼa sümüin wanee kasa. Jikiraja naya süpüla natüjaain saaʼu tü naaʼinrajatkat süpüla noʼttaain otta tü naaʼinrajatkat süpüla natüjaain saaʼu jaleenain jia napüla. Anuu tü sümakat Margaret, tü wachuntayütkalü anülia suluʼu ekirajaaya 51: «Sünain tü pütchi anouteʼennajatkat eere woutkajaain, nasoʼirüin waaʼin na laülaashiikana eejüinjatüin waaʼin süka nnojotyüliain alatüin sükalia saʼajaain tü wunuʼuliakalüirua. Nachuntule wamüin na pulusiiakana woʼunuinjanain wepialuʼujee jee shiale wayaawatüin saaʼu eein süpüla jamajüin waya, oʼunamaatüinjana waya». Anasü maʼin tia pütchikat, jaʼrai semaana süchikijee tia, aʼajaasü tü wunuʼuliakalüirua, keemasü maʼin. Jia kachonshiikana, jaashajaa namaa na jüchonniikana soʼu tü ai juʼwaajakalü oʼu Maleiwa namaa süpüla jütüjaain saaʼu waneʼewai jukua tü jaaʼinrajatkat sülatalaʼa sümüle wanee kasa. Jütüjaale saaʼu tü jaaʼinrajatkat namaa na jüchonniikana, jimateerü jaaʼin soʼunnaa tia.

9. ¿Kasa naaʼinrajatka na laülaashiikana süpülapünaa jee süchikijee sülatalaʼa sümüin wanee kasa?

⁹ Piale wanee laülaashi jülüjakai aaʼin na wawalayuu püküjakana amaa pütchi, nnojo paʼatapajüin sülatalaʼa sümüin wanee kasa süpüla puchuntuin namüin sunuumerose nepia jee sunuumerose naserulaatse. Püshaja tia sünain wanee karaloʼuta jee jülüja paaʼin neeʼiratüle sunuumerose nepia jee sunuumerose naserulaatse. Mülejeʼeya tia, pütüjaajeerü aaʼu jaleenain naya püpüla otta kasain choʼujaweerüin namüin sülatalaʼa sümüle wanee kasa. Paapa tia nümüin chi laülaashi akumajakai napüleerua na laülaashiikana tü aainjünajatkat jee müshia niakai naapeerü shia nümüin chi wawala alapalaaikai waaʼu. Paaʼinwale jia sünain aʼyatawaa, aneerü tü jaaʼinrakat napüleerua na wawalayuukana. Shiimalaapa suulia saʼajaain tü wunuʼuliakalüirua, chi wawala alapalaaikai naaʼu na wawalayuukana eere suutkajaain Margaret, alatüsü suulia 36 oora meemeraain nia otta aʼyataashi maʼin nia süpüla nukumajüin tü naainjainjatkat na laülaashiikana süpüla nousütüin anain jee nakaalinjain na 450 wawalayuu apütakana nepia (2 Cor. 11:27). Saaʼujee tü aainjünakat, ousütünaa anainrü jalainjanain makatüin na choʼujaakana amüin tia.

10. ¿Jamüsü kojutuka namüin na laülaashiikana naaʼinmajüin na wawalayuukana? (Juan 21:15).

¹⁰ Nayainjana na laülaashiikana akatchinraka nanoula jee akatchinraka naaʼin na wawalayuukana (1 Ped. 5:2). Tü natüjaainjatkalü aaʼu palajana sülatalaʼa sümüle wanee kasa shia anale na wawalayuukana jee choʼujaale namüin eküülü, nasheʼin otta eeinjanale makatüin naya. Ayatüinjanapejeʼe jülüjain naya naaʼin jaʼitasü alatüin kojuya kashi, choʼujaasia sükatsüinnüin nanoula jee sükatsüinnüin naaʼin (paashajeʼera Juan 21:15). Eeshi wanee wawala kanüliashi Harold aashajaakai namaa wainma wawalayuu alatakana amüin kasa kapüleesü. Noʼutku nia na laülaashii jülüjakana aaʼin tü aʼyatawaakat suluʼu Weteet. Müshi nia: «Mayaainjeʼe eein süpüla kepiain nachikuaʼa, naʼyataain jee namaʼanain waneirua kasa, eesü kakaliale süpüla anainjatüin naaʼin nachikuaʼa. Eesü sotowaire naaʼin tü kasa alatakat namüin maʼaka saaʼin nünaajaale wanee wayuu aikai napüla, nnojoluitpa namaʼanain wanee kasa nasülajaka wanee napüshi namüin kojutuka maʼin namüin jee najachajuule. Eesü mojule naaʼin sotopa naaʼin tü kasa alatakat namüin. Nnojoliipejeʼe manoulain naya, maʼwaisü waaʼin sutuma wanee kasa alataka wamüin».

11. ¿Kasa ayatüinjatka naaʼinrüin na laülaashiikana napüleerua na wawalayuu alatakana amüin kasa kapüleesü?

¹¹ Anasü maʼin naaʼinrüle na laülaashiikana pütchikat tüü: «Jiʼyalaja namaa na aʼyalajakana» (Roma 12:15, TNM). Süpüla anain naaʼin na wawalayuu oʼttaakana süchikijee wanee kasa alataka namüin, aküjüneesü namüin alin naya nüpüla Jehová otta alin naya napüla na wawalayuukana. Eeshii süpüla nakaalinjain naya na laülaashiikana süpüla ayatüin noʼuraajüin, nekirajaain sünain tü Bibliakat, noutkajaain jee naküjain pütchi. Otta müsia, eesü süpüla nakatsüinrüin naaʼin na kachonshiikana süpüla naküjain namüin nachonnii eein waneirua kasa nnojotka sajaʼttirüin tü alatakat namüin. Jia kachonshiikana, jüküja namüin jüchonnii ayateechin aleewain Jehová namaa otta ayateechin eein nia namaa waneepia. Jüküja namüin eejeenain waneepia na wawalayuukana namaa sümaa nakaalinjeenain naya (1 Ped. 2:17).

12. ¿Kasa naaʼinrajatka napüshuaʼa na wawalayuukana süpüla nakaalinjain na alatakana amüin kasa? (Piirakaa sümüin tü ayaakuaakat).

¹² Tü eekat süpüla naaʼinrüin napüshuaʼa na wawalayuukana. Kepiale pia peje sünainjee tü alatakat, püsakira na laülaashiikana süchiki tü paaʼinrajatkat süpüla pükaalinjain. Eesüjaʼa süpüla püküjain namüin eein süpüla makatüin pipialuʼu waneinnua wawalayuu mepiakana jee nayale na wawalayuu antakana sünain akaalinjaa. Eeshijaʼa süpüla pükaalinja sünain eitajaa eküülü jee shiale sünain waneirua kasa choʼujaaka. ¿Eeshiche süpüla pükaalinjain na wawalayuu alatakana amüin kasa wattale pipia noulia? Jamüsaʼa, eeshi süpüla puʼuraajüin naaʼu otta püsülajüin nneerü (2 Cor. 1:8-11; 8:2-5). Eerejeʼe süpüla puʼunuin eere sülatüin tia kasa mojusükat, püsakira na laülaashiikana süpüla pütüjaain saaʼu tü paaʼinrajatkat. Puunejaanüle, eeshijaʼa süpüla pikirajünüin süpüla jaloulin pia eere choʼujaain kaalinwaa.

SÜPÜLEERUAANÜLE WAAʼIN SAAʼUJEE WANOUJAIN

13. ¿Kasa müliaa neʼraka na wawalayuukana eere süpülajünüin noulia tü naʼyataainkat nümüin Maleiwa?

¹³ Kapüleesü wamüin wapüshuaʼa tü alatakat maaʼulu, shialeekajaʼa süpüleeruaanüle waaʼin saaʼujee wanoujain. Nnojoishii neʼe müliain na wawalayuukana saalinjee süpülajünüin noulia tü naʼyataainkat nümüin Maleiwa, müliashiʼiya naya sutuma maʼletsein, ayuulin jee shiale amüloulin wanee napüshi. Shapaasü naaʼin na laülaashiikana eere süpülajünüin noulia tü naʼyataainkat nümüin Maleiwa süka nnojoluin jutatüin nakuwaʼipa süpüla naashajaain namaa na wawalayuukana sümaa nakatsüinrüin naaʼin. Tia shia tü alatakat nümüin Andréi chi wachuntayüikai anülia suluʼu ekirajaaya 51. Eesü wanee wawala naʼakaka sünain aküjaa pütchi eʼraka choʼujawaa jee pasiruwaaka sutuma wanee kemion. Kojuyatua suwaʼnnüin jee nnojotsü süpüla shiʼyataain. Mayaainjeʼe süpülajünüin noulia tü naʼyataainkat nümüin Maleiwa natuma na sülaülashiikana mma otta tü apülajünakat noulia sutuma tü ayuulii keemakat, ayatüsia nachajaain sukuwaʼipa na wawalayuukana süpüla nakaalinjain shia otta jülüjasü maʼin naaʼin Jehová tü alatakat soʼu tia.

14. ¿Kasa naaʼinraka na laülaashiikana süka neʼitaain naaʼin nünain Jehová?

¹⁴ Tü eekat süpüla naaʼinrüin na laülaashiikana. Achuntushi Andréi nümüin Jehová süpüla nükaalinjain tü wawalakat otta naaʼinrüin tü eekat süpüla nuuntuin. ¿Kasa naaʼinraka Jehová süpüla nusoutuin nümüin? Asoutushi nia nümüin nakajee na wawalayuu jutatakana akuwaʼipa süpüla nakaalinjain shia. Eeshii wawalayuu oʼunakana sümaa sünain eʼrajeʼeraa shia otta na asülajakana nneerü sümüin. Anakuwaʼipaliishii naya nutuma Jehová süka paaʼinwajiraain naya otta süka meimmoluin naya sünain aaʼinraa tia (Heb. 13:16). Jia laülaashiikana, süpülajünapa juulia tü jiʼyataainkat nümüin Maleiwa eere kepiain jia, jaapa aʼyatawaa namüin na waneinnua (Jer. 36:5, 6). Shiapejeʼe anain maʼin jiʼitaale jaaʼin nünain Jehová. Nükaalinjeena jia süpüla jaapüin namüin na wawalayuukana tü kasa choʼujaakat namüin.

15. ¿Kasa waaʼinrajatka süpüla paaʼinwajiraain waya soʼunnaa süpüleeruaanüin waaʼin saaʼujee wanoujain?

¹⁵ Tü eekat süpüla naaʼinrüin napüshuaʼa na wawalayuukana. Soʼunnaa süpüleeruaanüin waaʼin saaʼujee wanoujain, eeshii paliʼirüle waya sünain outkajawaa. Anasüjeseʼe maaʼulu yaa anajiraale waya namaa na waneinnua, nia watkaainjachika amaa Satanás, nnojoishii nayainjanain watkaain amaa na wawalayuukana. Motowalinjatü waaʼin tü kasa mojusü naaʼinrakat na wawalayuukana jee wakumajamaatüinjatü sukuwaʼipa wanee mojujirawaa namaa (Prov. 19:11; Éf. 4:26, TNM). Anashii wakaalinjamaatüle na wawalayuukana, nnojo waʼatapajüin naaʼinrüin tia na waneinnua (Tito 3:14). Nnojotsü neʼe anain sukuwaʼipa tü wawala kaʼakakat Andréi süka sükaalinjünüin, anasiaʼaya nakuwaʼipa napüshuaʼa na wawalayuu kaʼakakana shia. Suluʼujee tia, paaʼinwajiraashii sümaa pawalaawajiraain naya (Sal. 133:1).

16. Saashin Colosas 4:3, 18, ¿kasa waaʼinrajatka napüleerua na wawalayuu apüleeruaakana aaʼin saaʼujee nanoujain?

¹⁶ Watta naalii na wawalayuu ayatakana aʼyataain nümüin Jehová mayaainjeʼe süpülajünüin noulia tü naʼyataainkat natuma na sülaülashiikana mma. Eeshii na püreesakana atumawaa. Wachunta naaʼu, saaʼu napüshi otta naaʼu na wawalayuu akaalinjakana naya süpüla naapüin tü kasa choʼujaakat namüin otta süpüla nakatsüinrüin nanoula otta wachunta naaʼu na asoutuinjanakana naaʼu chaa laülaapialuʼu (paashajeʼera Colosas 4:3, 18).c Nnojo jülüjain waaʼin amülain neʼe tü wachuntakat napüleerua (2 Tes. 3:1, 2; 1 Tim. 2:1, 2).

17. ¿Kasa waaʼinrajatka maaʼulu süpüla yapain waya süpülapünaa süpüleeruaanüin waaʼin saaʼujee wanoujain?

¹⁷ Eeshi süpüla yapain pia sümaa püpüshi maaʼulu süpülapünaa süpüleeruaanüin jaaʼin saaʼujee junoujain (Aluw. 14:22). Nnojo jaaʼinmaain tü kasa eekat süpüla sülatüin jümüin. Shia anaka aluʼu jüchajaale maʼin sukuwaʼipa süpüla aleewain maʼin jia nümaa Jehová otta süpüla jükaalinjain na jüchonniikana süpüla naaʼinrüin tia. Shapaale maʼin jaaʼin soʼu wanee kaʼi, jüküja tia nümüin Jehová (Sal. 62:7, 8). Jaashajaa namaa jüpüshi süchiki tü kasa naaʼinrakat Jehová jüpüleerua süpüla jiʼitaainjatüin jaaʼin nünain.d Anashii jükaalinjale na jüchonniikana süpüla yapain naya süpülapünaa sülatalaʼa sümüin wanee kasa. Jee müsia anashii jükaalinjale naya süpüla yapain naya süpülapünaa süpüleeruaanüin naaʼin saaʼujee nanoujain otta jikirajüin naya süpüla neʼitaainjatüin naaʼin nünain Jehová. Jaaʼinrüle tia, meimmoluinjeena naya jee jimateerü naaʼin.

18. ¿Kasa anasü eejeetka mapeena?

¹⁸ Jutatüsü waaʼin sutuma tü jimataa aaʼin naapakat wamüin Maleiwa (Filip. 4:6, 7). Sutuma tia, nnojotsü shapaain maʼin waaʼin eejaʼalaa sümüle wanee ayuulii keemaka, sülatalaʼa sümüle wanee kasa otta süpüleeruaanüle waaʼin saaʼujee wanoujain. Nükaalinjain waya Jehová nakajee na laülaashii aʼyataakana maʼin wapüleerua otta naapüin wamüin wanee aʼyatawaa anaka maʼin, shiajaʼa wakaalinjiraain. Sutuma tü jimataa aaʼin naapakat wamüin Jehová, yapashii waya süpüla tü alateetkat mapeena maʼaka saaʼin tü alateetkat wamüin soʼunnaa tü müliaa miyoʼusükat (Mat. 24:21). Soʼu kaʼikat tia, choʼujaweerü jimatüin waaʼin otta wakaalinjain na waneinnua süpüla jimatüin naaʼin. Süchikijee tü müliaa miyoʼusükat, nnojoleerü eein wanee kasa shapaajeetka atuma waaʼin. Jimateetkalaka waaʼin süpüla kaʼikat süpüshuaʼa maʼaka nücheküin shia Jehová (Is. 26:3, 4).