Párte 4

Ñandejára oikuaauka ñandéve umi mbaʼe ojapótava

1, 2. Mbaʼéichapa jaikuaa Ñandejára oikuaaukataha ñandéve umi mbaʼe ojapótava?

ÑANDEJÁRA ohayhu yvyporakuérape, ha upévare, jahekáramo chupe ñande pyʼaite guive, oikuaaukáta ñandéve umi mbaʼe ojapótava. Pór ehémplo, umi oikuaasévape omombeʼu mbaʼérepa oĩ pe jehasa asy.

² Ñandejára Ñeʼẽ heʼi: “Rehekáramo chupe [Ñandejárape] ojejuhukáta ndéve”. Ñandejára “yvágape oĩvamante ikatu oikuaauka ndéve umi mbaʼe okañýva”. Ñandejára Jehová “ndojapóiva mbaʼeve, heʼiʼỹre umi maranduhárape haʼe oiporavóva hembijokuairã” (1 Crónicas 28:9; Daniel 2:28; Amós 3:7).

Moõpa jajuhu umi mbaʼe jaikuaaséva?

3. Moõpa oñemombeʼu ñandéve mbaʼérepa Ñandejára oheja jahasa asy?

³ Umi mbaʼe jaikuaaséva, pór ehémplo, mbaʼérepa Ñandejára oheja jahasa asy ha mbaʼépa ojapóta opa hag̃ua pe jehasa asy, jatopa pe lívro Ñandejára ohaiukavaʼekuépe. Upe lívro haʼe Iñeʼẽ, la Santa Biblia. “Pe Kuatiañeʼẽ Marangatu oikopavaʼekue [...] Ñandejára remimoĩuka rupi, oporomboʼe ha oporomomarandu hag̃ua, oporomyatyrõ ha oporohekomboʼe hag̃ua pe hekopeteguáva rehe, ikatu hag̃ua pe kuimbaʼe [...] Ñandejára reheguáva oĩmbaite, ojapokuaa hag̃ua opaichagua mbaʼe iporãva” (2 Timoteo 3:16, 17, VP).

4, 5. Mbaʼérepa ndaipóri ótro lívro ikatúva ñambojoja la Bíbliare?

⁴ Ndaipóri ótro lívro ikatúva ñambojoja la Bíbliare. Upépe omombeʼu hendápe porã ha ojavyʼỹre umi mbaʼe ohasavaʼekue yvyporakuéra ymaite guive, ha mbaʼeichavaʼekuépa ojejapo mboyve yvypórape. Avei ndaitujái, jahechágui koʼág̃a oikoha heta mbaʼe heʼivaʼekue ha oĩ umi oikótava gueteri koʼẽrõite.

⁵ La Biblia omombeʼúva oĩ porã. Heta mbaʼe ohechauka upeichaha. Umi ótro lívro importánte yma guarégui saʼíma opyta umi manuscrito ojekopiavaʼekue yma. La Bíbliagui katu oĩ hetaiterei. Oĩ heta manuscrito la Biblia kompletoitégui, térã peteĩ pártegui: oĩ 6.000 rupi pe Escrituras Hebréasgui (umi 39 lívro oñehenóiva “Antiguo Testamento”), ha 13.000 rupi pe Escrituras Griegas Cristiánasgui (umi 27 lívro oñehenóiva “Nuevo Testamento”).

6. Mbaʼérepa ikatu jajerovia la Biblia koʼag̃agua oĩha Ñandejára ohaiukahagueichaite?

⁶ Ñandejára ojapoukavaʼekue la Biblia, ha umi manuscrito rupive oñangareko hese og̃uahẽ hag̃ua ñandéve oñekambiaʼỹre. Upévare umi Biblia koʼag̃agua oĩ gueteri ojehaihagueichaite. Jaikuaa upeichaha oĩgui umi manuscrito ojehaivaʼekue ohasa mboyve 100 áño pe Escrituras Griegas Cristianas ojehai ypy rire. Umi manuscrito oĩva ótro lívro yma guarégui, ndahaʼéiva la Biblia, ojejapovaʼekue heta síglo ojehai ypy rire.

Peteĩ jopói oúva Ñandejáragui

7. Mbaʼeichaite pevépa isarambi la Biblia?

⁷ La Biblia oñemosarambive oimeraẽ ótro lívrogui. Ojejapóma hetave 4.000 millónesgui, ha ndaipóri ótro lívro ni oñemoag̃uíva hese upévape. Oñembohasáma 2.250 ñeʼẽme, kompletoite térã peteĩ párte. Upévare ojeʼe hetave 90%-gui tapichakuéra oĩva ko múndope ikatuha oguereko la Biblia.

8-10. Mbaʼérepa iporã jahecha mbaʼépa oĩ la Bíbliape?

⁸ Naiporãipa jahechami peteĩ lívro upeichagua, ha heʼíva ijehe ouha Ñandejáragui?a La Biblia omombeʼu maʼerãpa jaikove, mbaʼérepa ivaieterei ko múndo, ha mbaʼépa ikatu ñahaʼarõ. Ndaipóri ótro lívro ikatúva ojapo upéva.

⁹ Upeichaite, Ñandejára oñeʼẽ yvypórape la Biblia rupive. Haʼe ohaiuka upe lívro. Upearã oiporu ipuʼaka, ijespíritu sánto, ha oiporu 40 tapicha rupi ohai hag̃ua. Ha upéicha Haʼe oñeʼẽ ñandéve upe lívro rupive. Pe apóstol Pablo ohaivaʼekue: ‘Ha upévare roagradeséva Ñandejárape, pehendúramo guare pe Ñandejára ñeʼẽ romoherakuãvaʼekue peẽme, peroviavaʼekue ndahaʼéi kuimbaʼe ñeʼẽnguéicha, Ñandejára ñeʼẽramo voi katu. Ha Ñandejára ñeʼẽ voi añete upe penembohekoporãva peẽ peroviávape’ (1 Tesalonicenses 2:13).

¹⁰ Abraham Lincoln, pe presidénte dieciseisha oisãmbyhyvaʼekue Estados Unidos, ohenói la Bíbliape “pe jopói iporãvéva omeʼẽvaʼekue ñandéve Ñandejára [...] Upevaʼỹre ndaikatumoʼãi kuri jaikuaa iporãva ha ivaíva”. Upévare, mbaʼépa pe jopói iporãvéva heʼi ñandéve pe jehasa asýre? Mbaʼéichapa oñepyrũrakaʼe, mbaʼérepa Ñandejára oheja jahasa asy ha mbaʼépa ojapóta opa hag̃ua?

[Nóta]

[Nóta oĩva taʼanga ndive páhina 10]

Ñandejára oñeʼẽ yvyporakuérape la Biblia rupive, pe lívro haʼe ohaiukavaʼekue