Diciembre

La Bíbliape Abrahán rehe añoite ojeʼe haʼe hague Jehová amígo, ha mbohapy hendápe jatopa upéva (2 Crón. 20:7; Is. 41:8; Sant. 2:23). ¿Ikatúpa jaʼe upéicharõ ndaiporiha ótra persóna haʼe vaʼekue Ñandejára amígo? Nahániri. Enterovéva ñande ikatu hína jaiko Ñandejára amígoramo. ¿Mbaʼérepa jaʼekuaa upéva? La Biblia heʼi oĩ hague heta kuña ha kuimbaʼe iñeʼẽrendúva Ñandejárape, ojeroviáva hese ha haʼe vaʼekue iñamígo. Apóstol Pablo heʼi hesekuéra: “Jaguereko ñande jerére hetaiterei testígo, haʼetéva peteĩ arai guasu ñanemongoráva” (Heb. 12:1). Umíva hína umi Ñandejára siervokuéra oreko vaʼekue pe priviléhio oikóvo Jehová amígoramo. Upévare, jasegíkena iñehemplokuéra (Heb. 6:11, 12). Jajapóramo upéicha, ñande avei jarekóta pe priviléhio jaikóvo siémpre Jehová amígoramo. w16.02 2:1, 2, 19

Eñeimahinami peteĩ ne amígo heʼiha ndéve: “Naʼáme arregala ndéve nde autorã, ha koʼápe antrega ndéve la veíkulo dokuménto”. Péro upéi heʼi ndéve: “Chénte arekóta la lláve, ha chénte amaneháta. Nde neremanehamoʼãi”. Péicha avei peteĩ persóna ojededikáva Jehovápe, añetehápe heʼi chupe: “Che rekove nembaʼéma hína”. Ha Jehová oreko derécho ohaʼarõvo ñakumpli ñane promésa. Péro, ¿mbaʼépa ikatu jaʼe peteĩ ojededikámava Jehovápe oúramo naiñeʼẽrendúi ha ojegusta ñemiháme peteĩ persóna ndahaʼéivare Testígo? ¿Mbaʼépa ñapensáta pe persóna ojagarráramo peteĩ traváho hoʼupaitéva chugui itiémpo, ha ndaikatuguasuvéima osẽ opredika ni oho rreunionhápe? Peichagua persóna nokumplíri hína opromete vaʼekue Jehovápe. Haʼete pe amígo orregala guaʼúva pe áuto, péro añetehápe nomeʼẽi mbaʼeve. Upévare, jaʼéramo Jehovápe ñande rekove opertenesemaha chupe, siémpre jajapo vaʼerã haʼe oipotáva, sapyʼánte nañandegustáiramo jepe. Iporã vaʼerã jasegi Jesús ehémplo ohechaukaháicha pe téxto kostediagua. w16.03 1:16, 17

Ojapo 3.000 áñorupi, pe proféta Elías oinvita hague peteĩ mitãrusúpe, hérava Eliseo, oipytyvõ hag̃ua chupe iservísiope. Eliseo pyaʼe voi oasepta pe invitasión. Haʼe ningo heta oipytyvõ pe profétape, ha ipyʼaite guive ojapo umi traváho mimi omandáva chupe (2 Rey. 3:11). Elías omboʼe Eliséope seis áñore. Upéi, Elías omohuʼã mbotaitévo iservísio Israélpe, heʼi Eliséope natekotevẽveimaha oservi chupe. Oiméramo ne nemitã, ¿mbaʼéichapa ikatu resegi Eliseo ehémplo? Reasepta vaʼerã nde pyʼaite guive oimeraẽ tembiapo oñemeʼẽva ndéve, haʼetéramo jepe naiñimportanteguasúiva. Ani nderesarái pe ansiáno nembokatupyrýva haʼeha ne amígo. Ere chupe remombaʼeha opa mbaʼe ojapóva nemboʼe hag̃ua ha reaprendeseveha chugui. Reñehaʼãmbaite vaʼerã neñeʼẽrendu ha rekumpli umi tembiapo oñemeʼẽva ndéve. ¿Mbaʼérepa iñimportánte upéva? Péicha umi ansiáno ohechakuaáta Jehová oipotaha rerresivi hetave rresponsavilida pe kongregasiónpe (Sal. 101:6; 2 Tim. 2:2). w15 15/4 2:13, 14

Saúl ndoipotái vaʼekue David opyta hekovia ogoverna hag̃ua Israel. Haʼe oipota Jonatán opyta hendaguépe (1 Sam. 20:31). Upévare Jonatán ikatu kuri opensa ijehénte ha ojapo ikatúva guive oñemeʼẽ hag̃ua chupe pe goviérno. Péro haʼe ohayhu ha orrespeta Jehovápe, ha okumpli pe promésa ojapo vaʼekue Davídpe. Por ehémplo, jajapóramo negósio térã peteĩ kontráto, ñakumpli vaʼerã ijetuʼúramo jepe. Ñaneprovlémarõ ñane ména térã ñane rembirekóndi, jahechauka vaʼerã ñaneñeʼẽrenduha Jehovápe ha nañatraisionamoʼãi ñane rembiayhúpe (Mat. 19:6, 9). Ñamombaʼékena ñane ermanokuérape, sapyʼánte ojapóramo jepe umi mbaʼe nañahaʼarõiva chuguikuéra. Aníkena jaheja Jehovápe, jahasáramo jepe umi situasión ijetuʼúva. Péicha ñambopyʼarorýta chupe, ha upéva ñandéve avei ñanembovyʼáta (Prov. 27:11). Jaikuaa porã ningo Jehová katuete oñangarekotaha ñanderehe. w16.02 3:16, 17

Ñanemanduʼa vaʼerã avei Jehová oikuaaha moõ pevépa káda uno ikatu ñaaguanta (Sal. 103:14). Haʼe katuete ñanemombarete ñaikotevẽ jave. Sapyʼánte ikatu ijetuʼueterei umi mbaʼe ñambohováiva ha ñañandu ndajagueropuʼakaveimaha. Péro Ñandejára opromete ñanepytyvõtaha oiméramo ipohyieterei ñandéve ñane provléma. La Biblia heʼi voi haʼe ‘ohechaukataha ñandéve mbaʼéichapa ñasẽta chugui’ (1 Cor. 10:13). Jehová ningo oikuaa porã moõ pevépa ikatu jagueropuʼaka, ha upéva tuichaiterei ñanembopyʼaguapy. Aníkena rejepyʼapy Jehová nokontestapyaʼéiramo ndéve ne ñemboʼe. Ehechauka vaʼerã ehaʼarõkuaaha. Nemanduʼákena haʼe nepytyvõseha ha ohaʼarõnteha pe moménto okonvenivéva ndéve. La Biblia heʼi Ñandejára ihustoha ha ojesarekoha ñanderehe ikatu hag̃uáicha ‘ñandeporiahuvereko ha ñanepytyvõ’. w15 15/4 4:8, 9

Tekotevẽ káda semána jajapo pe estúdio de família. Tuvakuéra odedikáramo tiémpo omboʼe hag̃ua Jehovágui ifamíliape, koʼẽ koʼẽre ojoayhuvéta hikuái. Por ehémplo, ikatu oñensaja oñondive predikasionrã. Péicha entéro oikuaátama mbaʼépa heʼíta umi héntepe. Añetehápe ningo ñane família kompletoite oĩve unído ñahendúramo ñane hénte oñeʼẽha Jehováre, ha jahechakuaárõ mbaʼeichaitépa ohayhu chupe hikuái. Jehová oipota umi ména ha tembireko oñopytyvõ ha oĩ unído. Mokõivéva ohayhúramo Jehovápe ha oñondive oservíramo chupe, imatrimónio imbaretevéta ha ovyʼavéta hikuái. Iñimportánte avei mokõivéva ojoayhu ha ojotrata porã, ojapo haguéicha Abrahán ha Sara, Isaac ha Rebeca, ha Elqaná ha Ana (Gén. 26:8; 1 Sam. 1:5, 8). Ména ha tembireko osegíramo koʼã ehémplo porãite, oĩta unído ha siémpre oikóta Jehová amígoramo (Ecl. 4:12). w16.03 3:12, 13

Koʼág̃a Satanás oñorairõ entéro Jehová siervokuéra kóntrape. Oñemoĩ mbarete umi unhído oĩvare gueteri ko yvy ape ári ha avei umi “ambue ovechakuéra” rehe (Juan 10:16). Oikuaa rupi saʼipaitemaha itiémpo, oñehaʼãmbaite oity iñuhãme umi oservívape Jehovápe, anive hag̃ua oadora chupe (Apoc. 12:9, 12). Upévare tekotevẽterei jasegi ñañemoĩ mbarete hese. Péro, ¿ikatúpa ñandepuʼaka Satanásre? Si, ikatu. La Biblia voi heʼi: “Peñemoĩ mbaretéke pe Añáre ha haʼe odiparáta pendehegui” (Sant. 4:7). Heta oĩ opensáva Satanás ndoexistiriha. Chupekuéra g̃uarã Satanás ha umi demónio ndahaʼéi rreál, síno oñeinventánte oñemoĩ hag̃ua umi pelíkula de terrórpe, umi videohuégope, térã umi lívrope. Ha heʼi voi hikuái ñandetavyetereiha jaroviáramo oĩha umi espíritu aña. Añetehápe, Satanáspe okonveni umi hénte opensa haʼe ndoexistiriha. ¿Mbaʼérepa? Pórke péicha ifasilve ombotavy hag̃ua chupekuéra (2 Cor. 4:4). Upévare haʼe ojapo ikatúva guive oroviaka hag̃ua upéva umi héntepe. w15 15/5 2:1, 2

Moisés sy ha itúva tee, haʼéva evréo, omboʼe chupe heta mbaʼe Jehovágui, por ehémplo Jehová opromete hague omosãsotaha ipuévlope Egipto poguýgui, ha omeʼẽtaha chupekuéra peteĩ lugár iporãitereíva oiko hag̃ua (Gén. 13:14, 15; Éx. 2:5-10). Katuete ningo Moisés opensa meméne raʼe ko promésare. Haʼe oikuaa avei Jehová opromete hague oipeʼataha yvyporakuérape ñemano poguýgui (Job 14:14, 15; Heb. 11:17-19). Moisés ojepyʼamongeta meme rupi umi promésare, ohechakuaa mbaʼeichaitépa Jehová ohayhu yvyporakuérape. Avei oipytyvõ chupe ohayhuve hag̃ua Jehovápe, ojeroviave hag̃ua hese ha osegi hag̃ua iñeʼẽrendu oikove aja pukukue (Deut. 6:4, 5). Ni michĩmi ndokyhyjéi pe rréi de Egipto ojukasérõ guare chupe, oikuaágui Jehová okumplitaha ipromésa (Éx. 10:28, 29). w15 15/5 3:11-13

Jesús ojapo vaʼekue iprimér milágro Canáme, peteĩ kasamientohápe. Upérõ ofaltapa kuri pe víno, ha umi nóvio tuichaiterei oñemotĩta noñatendeporãiramo umi invitádore. Upémarõ María heʼi Jesúspe oipytyvõmi hag̃ua pe paréhape. Oime vaʼerã haʼe oikuaáma raʼe Jesús ikatuha oipytyvõ chupekuéra, pórke ojepyʼamongeta vaʼekue umi profesía oñeʼẽvare imembýre, ha oikuaa Jesúspe oñehenoitaha “Ñandejára Ijojahaʼỹva Raʼy” (Luc. 1:30-32; 2:52). Péicha jahecha María ha Jesús oipytyvõse hague umi omendávape. Upéi Jesús okonverti 380 lítro y ‘víno iporãvape’ (Juan 2:6-11). ¿Tekotevẽtereípa raʼe Jesús ojapo ko milágro? Nahániri. Haʼe ojapo upéva oñeintereságui umi héntere. Ha osegi rupi Itúva ehémplo, imbaʼeporã opavavéndi. w15 15/6 1:3

Jesús oho jey mboyve yvágape, idisipulokuéra oikuaase kuri upéva. Jesús heʼi chupekuéra nog̃uahẽitiha pe tiémpo haʼekuéra oikuaa hag̃ua arakaʼépa pe Rréino oñepyrũta ogoverna. Upéva rangue, tekotevẽha oñekonsentra hikuái pe tembiapo iñimportantevévape: pe predikasión (Hech. 1:7-8). Upéi heʼi avei chupekuéra ojerure vaʼerãha iñemboʼépe tou Ñandejára Rréino, ha tekotevẽha oñatende porã ikatu hag̃uáicha ohechakuaa hikuái haʼe oñepyrũ vove ogoverna. Upévare ñande avei jasegi jajerure Jehovápe tou Irréino. Oñemoag̃uívo ohóvo pe tiémpo Jesús oñepyrũ hag̃ua ogoverna yvágape, Jehová oipytyvõ isiervokuérape ohechakuaa hag̃ua arakaʼetépa oikóta upéva. Por ehémplo, áño 1876-pe ermáno Charles Taze Russell ohai peteĩ artíkulo hérava: “¿Arakaʼépa opáta pe tiémpo oñemeʼẽva umi tetãme?”. Upépe haʼe omyesakã kuri pe profesía oĩva lívro de Daniélpe oñeʼẽva umi ‘siete tiémpore’. Avei oexplika mbaʼépa heʼise pe profesía Jesús omeʼẽ vaʼekue oñeʼẽva ‘pe tiémpo oñemeʼẽvare umi tetãme’. Ermáno Russell heʼi koʼã mokõi profesía oñeʼẽha la mísma kósare (Dan. 4:16, NM; Luc. 21:24). w15 15/6 4:11, 12

Jesús ningo ombyasyeterei vaʼekue umi héntepe ohechávo chupekuéra osufri. Por ehémplo, oñeñandu vaieterei iñamígo Lázaro omanórõ guare, pórke ohecha ihentekuéra ha iñamigokuéra osufriha (Juan 11:33-36). Jesús oikuaa porã omoingove jeytaha Lázarope, péro upéicharõ jepe hasẽ kuri upe moméntope. Haʼe nopensái iporãveha ojejokónte, pórke oĩta ohecháva chupe hasẽ jave. Jesús ohayhueterei Lázaro ha ihentekuérape, upéicha rupi oipuru Ñandejára podér orresusita hag̃ua chupe (Juan 11:43, 44). La Biblia heʼi Jesús ojoguaitereiha Itúvape (Heb. 1:3). Upévare ikatu jaʼe umi milágro haʼe ojapo vaʼekue ohechaukaha Ñandejára oñeinteresaha avei ñanderehe. Jehová oipeʼase avei opa mbaʼe ñanembosufríva, por ehémplo umi mbaʼasy ha ñemano. Koʼẽrõitéma Jehová ha Jesús omoingove jeýta hetaiterei umi omano vaʼekuépe. Jesús heʼi kuri oñemoingove jeytaha “opavave umi oĩva pe sepultúrape” (Juan 5:28, 29). w15 15/6 2:13, 14

Heta persóna oimoʼã omano rire ohotaha yvágape ha upépe ae omombaʼeguasutaha Ñandejárape. Ñande katu jaikuaa porã koʼág̃ama jaadora vaʼerãha Jehovápe. Jaadora jave Jehovápe jajapo hína Ñandejára siervokuéra yma guare ojapo haguéicha. Por ehémplo Moisés, Aarón ha Samuel oaprovecha vaʼekue umi médio Jehová omoĩva ojeadora hag̃ua chupe (Sal. 99:1-3, 5-7). Ñane tiémpope oĩ mokõi grúpo omombaʼeguasúva Jehovápe oñondive. Pe primer grúpo haʼe hína umi unhído ohótava yvágape oservi hag̃ua kómo saserdóte Jesús ndive, péro koʼág̃a oservi hikuái ko yvy ape ári. Pe segundo grúpo katu haʼe umi “ambue ovechakuéra” oipytyvõ meméva umi kristiáno unhídope (Juan 10:16). Upéicharõ, káda uno ñañeporandu vaʼerã: “¿Aaprovecha porãpa hína umi médio Ñandejára omoĩva aadora hag̃ua chupe?”. w15 15/7 1:4, 5

Ymaite guivéma Jehová omeʼẽ heta profesía, ha isiervokuéra ipasiénsia ohaʼarõ aja oñekumpli umíva. Isaías oprofetisa vaʼekue Judá oñehundi rire, Jehová oipytyvõtaha umi hudíope osẽ hag̃ua Babilóniagui ha oho jey hag̃ua hetãme. Upévare heʼi kuri: “Ovyʼaite umi hese ojeroviáva” (Is. 30:18, NM). Proféta Miqueas avei oĩ vaʼekue segúro umi profesía oñekumplitaha. Upéicha rupi haʼe heʼi: “Che añatende porãta” (Miq. 7:7, NM). Ha heta tiémpore Ñandejára siervokuéra ohaʼarõ pe Mesías oñepromete vaʼekue (Luc. 3:15; 1 Ped. 1:10-12). Ñane tiémpope avei, ñande ñahaʼarõ oñekumpli umi profesía oñeʼẽva Ñandejára Rréinore. Jesús haʼe hína pe Rréi ogovernáva upe Rréino ha koʼẽrõite ohundíta ko múndo aña ha ñandesalváta. Og̃uahẽ vove pe fin, haʼe ohundíta umi hénte aña ha oipeʼaitéta opa mbaʼe ñanembosufríva (1 Juan 5:19). Pe fin og̃uahẽta en kualkiér moméntontema, upévare ñaime vaʼerã preparádo. w15 15/8 2:1, 2

Jehová heʼi vaʼekue umi isrraelítape ojapo hag̃ua peteĩ tavernákulo oadora hag̃ua chupe (Éx. 25:8). Ha tiémpo rire, haʼe omopuʼãka peteĩ témplo (1 Rey. 8:27, 29). Umi isrraelíta osẽ rire Babilóniagui oñepyrũ oñerreuni umi sinagógape (Mar. 6:2; Juan 18:20; Hech. 15:21). Kristianokuéra síglo primérope guare katu oñembyaty umi ermáno rógape (Hech. 12:12; 1 Cor. 16:19). Ha ñane tiémpope, entéro testígo de Jehová ñañerreuni jaadora hag̃ua Jehovápe umi Salón del Réinope, oĩva hetaiterei ko yvy tuichakuére. Jesús ningo omombaʼeterei vaʼekue pe témplo oĩva Jerusalénpe. Idisipulokuéra ohechakuaárõ guare mbaʼeichaitépa haʼe ohayhu pe témplo, imanduʼa pe téxto kostediaguáre (Sal. 69:9). Añetehápe ningo umi Salón del Reino ndahaʼéi “Jehová róga” haʼe haguéicha Jerusalén témplo (2 Crón. 5:13; 33:4). Upéicharamo jepe ñamombaʼe vaʼerã, pórke umi Salónpe ñañembyaty jaadora hag̃ua Ñandejárape. w15 15/7 4:1, 2

Koʼág̃ama jajepokuaáramo ñaporoperdona, ifasilvéta ñandéve jajogueraha porã hag̃ua entérondi Jesús goviérno de 1.000 áño poguýpe (Col. 3:12, 13). Pe paraísope ideprovechopaitéta ñandéve umi kualida Jehová ñanemboʼéva koʼág̃a. Por ehémplo, haʼe ñanemboʼe ñandeagradesído ha javyʼa hag̃ua umi mbaʼe jahupytývare. Pe paraísope sapyʼánte tekotevẽtamante ñahaʼarõʼimi jarresivi hag̃ua umi mbaʼe jaipotáva. Jahechaukáramo koʼág̃a umi kualida porãite Jehová orekóva, ojekuaáta ñanderehe jajepreparamaha jaiko hag̃ua pe ‘yvy oútavape amo gotyove’, térã pe paraísope. Avei jahechaukáta ñaimeseha pe múndo pyahúpe, oĩtahápe umi persóna iñeʼẽrendúva Jehovápe añoite (Heb. 2:5; 11:1). w15 15/8 3:11, 12

Umi frúta hiʼajúramo jepe ndahaʼéi peteĩchapa. Ikatu oĩ michĩvéva ha oĩ avei tuichavéva. Péro ñamañávo ipíntare térã ikolór rehe, japilla hiʼajúmapa. Umi kristiáno madúro péicha avei. Por ehémplo, ndahaʼéi ojoaveguapa, ndorekói la mísma kultúra, ha naentéroipe ogusta la mísma kósa. Péro umi mbaʼe heʼi ha ojapóvare, ojekuaa hesekuéra imaduroha espirituálmente. Por ehémplo, umi kristiáno madúro ‘oguata hekoitépe [Cristo] pyporére’ (1 Ped. 2:21). Jesús heʼi vaʼekue jahayhu vaʼerãha Jehovápe ñande pyʼaite guive, ñane álma rugua guive, ha opa ñane arandukue reheve. Avei heʼi vaʼekue jahayhu vaʼerãha ñande rapichápe ñande jajehayhuháicha (Mat. 22:37-39). Peteĩ kristiáno madúro oñehaʼãmbaite ojapo koʼã mbaʼe. Haʼe ovaloraiterei iñamista Jehovándi ha otrata porã hapichakuérape. w15 15/9 1:3-5

Ñahekomboʼe porãramo ñane konsiénsia, ndahaʼéi ñandeavisátanteva ani hag̃ua jajapo ivaíva, síno heʼíta avei ñandéve jajapo hag̃ua iporãva. Por ehémplo, ñanemokyreʼỹta japredika hag̃ua, tahaʼe de kása en kása térã oimeraẽ lugárpe. Pablo oñandu vaʼekue opredika vaʼerãha, upévare oskrivi: “Upéva ningo che ajapónte vaʼerã voi. ¡Añetehápe ivaíta chendive ndapredikáiramo umi marandu porã!” (1 Cor. 9:16). Jasegíramo Pablo ehémplo, ñakumplíta ñane rresponsavilida ha ñane konsiénsia nañandestorvamoʼãi. Avei pe predikasión rupive ñameʼẽta oportunida umi héntepe ohekomboʼe hag̃ua ikonsiénsia. Iñimportanteterei ningo ñahekomboʼe porã ñane konsiénsia. Ha upéva ningo iñimportanteterei, pórke ñanepytyvõta ñaneñeʼẽrendu hag̃ua Jehovápe ha siémpre jajapóta haʼe oipotáva. ¡Ajépa enterove kristiáno jahupytyse upéva! w15 15/9 2:16, 18

La Biblia omombeʼu Ñandejára opermiti hague José, Moisés ha David ohasa umi provléma ijetuʼúvare. Koʼã situasiónpe haʼekuéra oaprende heta mbaʼe ideprovéchova, ikatu hag̃uáicha okumpli porã umi rresponsavilida Jehová omeʼẽva chupekuéra upe rire. Koʼã ehémplo ohechauka Jehová oapojaha isiervokuérape ha oipytyvõha chupekuéra omehora hag̃ua. Jaleévo koʼã rreláto jahechakuaa mbaʼeichaitépa Jehová ñanderayhu. Jajavy jave Jehová ñandekorrehi, ha jaaseptáramo pe disiplína, jahechakuaáta haʼe ñanderayhuha. Proféta Isaías heʼi vaʼekue Jehová ‘operdonakuaaha’ ñane rembiapo vaikue (Is. 55:7, ÑÑB). Ha rréi David heʼi avei: “Haʼe ningo operdona umi mbaʼe vai jajapóva, ha omonguera entéro ñane mbaʼasy. Ñandejára ñandesalva ani hag̃ua ñamano, haʼe ohechauka ñanderayhu ha ñandeporiahuverekoha” (Sal. 103:3, 4, NM). Jehová siémpre oĩ dispuésto ñaneperdonávo. Péro ñande jaasepta vaʼerã pe konsého ha korreksión, ha ñakambia tekotevẽhápe. Ñanemanduʼákena Jehová ñandekorrehiha ñanderayhu rupínte (Sal. 30:5). w15 15/9 4:13, 14

Marta oñemoĩ oñekosina ha oprepara heta mbaʼe ikatu hag̃uáicha oservi porã Jesúspe. Ohechávo iñermána noipytyvõiha chupe, ipochy ha ojeplagea Jesúspe. Péro Jesús oikuaa haʼe opreparaha hetaiterei kósama, upévare heʼi: “Marta, Marta, rejepyʼapyeterei hína heta mbaʼére”. Avei heʼi chupe ikatúnte hague oprepara peteĩ tembiʼu sensillomi. Upéi ofelisita Maríape ojapysaka porã haguére hese, ha heʼi: “María katu oiporavo pe iporãvéva ha ndojepeʼamoʼãi chugui” (Luc. 10:38-42). Oiméne tiémpo rire María ni naimanduʼavéima mbaʼépa hoʼu raʼe upe díape, péro katuete imanduʼapaiténe umi mbaʼe Jesús heʼi vaʼekuére. Ohasa rire mas de 60 áño, apóstol Juan heʼi: “Jesús ohayhu Marta, María ha Lázarope” (Juan 11:5). Upéva ohechauka Marta oaprende hague Jesús omboʼeséva chupe, ha upe rire osegi hague oservi porã Jehovápe oikove aja pukukue. w15 15/10 3:3, 4

Jareko ningo heta pruéva ohechaukáva Jehová koʼag̃aite peve oipytyvõha umi iñeʼẽrendúvape. Pyʼỹinte ñahendu mbaʼéichapa Ñandejára orresponde iñorasión umi persóna oikuaasévape chupe (Sal. 53:2). Por ehémplo, peteĩ Testígo hérava Alan, opredika oikóvo peteĩ islaʼípe Filipínaspe. Peteĩ kuñakarai ohendu porãva chupe oñemoĩ hasẽ. ¿Mbaʼépa ojehu chupe? Alan omombeʼu upe pyharevépente pe kuñakarai oñemboʼe hague Jehovápe ha ojerure chupe omboumi hag̃ua hendápe peteĩ testígo de Jehová. Ko kuñakarai oagradeseterei Jehovápe orresponde pyaʼe haguére iñorasión, ha un áño mboyve, ojevautisáma. Ñane tiémpope, Jehová oipytyvõma heta isiérvope. Por ehémplo, heta persónagui oiko mboyve Testígo, opita, ojedroga térã ohecha vaʼekue pornografía. Ha oñehaʼãramo jepe oheja koʼã vísio, ndaipuʼakái hikuái umívare. Péro upéi ojerure Jehovápe ajúda, ha haʼe omeʼẽ chupekuéra “pe podér ijojahaʼỹva” ikatu hag̃uáicha opoi koʼã mbaʼe vaígui (Sal. 37:23, 24). w15 15/10 1:10, 11

Heta ermáno opuʼã voi porã ikatu hag̃uáicha oñemboʼe, olee la Biblia ha ojepyʼamongeta hese. Oĩ avei ojapóva upéva asajekue opytuʼu aja, kaʼaru, térã pyhare oñeno mboyve. Ótro katu olee ivívlia michĩmi pyhareve ha michĩmi pyhare (Jos. 1:8). Jahechaháicha, ikatu jaiporavo oimeha óra, péro ani ñanderesarái jalee vaʼerãha káda día. Ñamboykékena umi mbaʼe naiñimportanteguasúiva, ikatu hag̃uáicha jalee la Biblia ha jajepyʼamongeta hese. Jehová opromete ovendesitaha umi ojepyʼamongetávape la Bíbliare ha oñehaʼãmbaitéva ojapo umi mbaʼe oaprendéva (Sal. 1:1-3). Jesús heʼi vaʼekue: “Ovyʼa [...] umi ohendúva Ñandejára Ñeʼẽ ha ojapóva” (Luc. 11:28). Ñameditáramo káda día umi mbaʼe ñanemoag̃uívare Jehováre, ikatúta ñambotuicha chupe umi mbaʼe jajapóvare. Upéicha, ñande Apohare katuete ñanerrekompensáta koʼág̃ama voi, ha amo gotyove ikatúta jaiko pára siémpre pe múndo pyahúpe (Sant. 1:25; Apoc. 1:3). w15 15/10 4:17, 18

Jesús omombeʼúrõ guare ojejukataha chupe, Pedro osẽ heʼi chupe opensave vaʼerãha ijehe, ha ndoikomoʼãiha voi hese upéva. Jesús oikuaa Pedro tuicha ojavyha. ¿Mbaʼéichapa haʼe oipytyvõ Pédrope ha umi ótro disípulope? Primero, okorrehi chupe opensa haguére péicha. Segundo, oexplika chupekuéra mbaʼépa oikóta umi oúvagui naiñeʼẽrenduvéi Jehovápe iprovléma haguére. Ha tercero, heʼi Jehová orrekompensataha umi ojesakrifikávape hesehápe (Mat. 16:21-27). Pedro oaprende Jesús omboʼeséva chupe (1 Ped. 2:20, 21). Ejerure Jehovápe tanepytyvõ rentende hag̃ua ne famíliape ha reikuaa hag̃ua mbaʼéichapa reajudáta chupe (Sal. 32:8). Rehecháramo ndovyʼaveiha oikóvo, oñeʼẽ vaiha ermanokuérare, térã haʼeteha omokañýva ndehegui álgo, aníkena redeskonfiáma voi hese ojapoha oikóvo ñemihãme peteĩ mbaʼe vai. Péro ndovaléi avei reiko ku mbaʼeveʼỹrõguáicha ha nerepenáinte hese, reimoʼãgui pe provléma haʼeñónte oñesolusionataha. Ikatu hína ne família operde ohóvo ife ha oikotevẽ reipytyvõ chupe. w15 15/11 2:12, 13

Ñande testígo de Jehová jajoayhu ha ñaime unído, upévare ikatu jaʼe ñaimeha pe rrelihión verdadérape. Jesús heʼi vaʼekue: “Péicha pejoayhúramo, enterove ohechakuaáta peẽ haʼeha che disípulo” (Juan 13:34, 35). Ha apóstol Juan oskrivi: “Japilla hag̃ua mávapa Ñandejára raʼy ha mávapa Satanás raʼy jahecha vaʼerã ko mbaʼe: entéro ndojapomeméiva iporãva ha pe ndohayhúiva iñermánope, ndahaʼéi Ñandejára raʼy. Kóva hína pe marandu peẽ pehendu vaʼekue iñepyrũ guive, jajoayhu vaʼerãha” (1 Juan 3:10, 11). Pe mborayhu ha unida oĩva Jehová puévlope ohechauka porã ñande haʼeha Cristo disípulo. Avei ohechauka Ñandejára ñandepuruha ikatu hag̃uáicha pe marandu porã ojekuaa opárupi (Mat. 24:14). w15 15/11 4:10, 11

Ñande jahechakuaa vaʼerã mbaʼe kultúra, kostúmbre ha kreénsiapa oreko umi hénte oikóva japredikahárupi. Péicha jaikuaáta mbaʼe moméntopepa iporãve ñañeʼẽ chupekuéra. Avei, iporãve ñahaʼarõnte ñañeʼẽ hag̃ua oĩ jave heʼíva peteĩ mbaʼe nañandegustáiva. Ensegída ñarrespondéramo chupe, ikatu hína jaʼe peteĩ mbaʼe upéi ñambyasýtava. Upévare, ñarresponde mboyve, ñañeporandu raẽ vaʼerã: “¿Añetehápe piko ivaieterei la heʼíva chéve?”. Oiméramo vyroreínte hína, ikuentave ñakirirĩ. Péro ñapensáramo tekotevẽha ñañemongeta pe persónandi, iporãvéta ñahaʼarõ ha ñañetrankilisa raẽ (Prov. 15:28). ¿Mbaʼe situasiónpepa tekotevẽ avei ñañatende ñañeʼẽ hag̃ua? Ñañeʼẽta jave Jehováre ñane hénte ndahaʼéivape Testígo. Ani ñandeatropelládo, upéva rangue ñañehaʼã vaʼerã ñanepasiénsia. Ñañeʼẽ mboyve chupekuéra, ñapensa porã vaʼerã mbaʼépa jaʼéta ha jaheka pe moménto opyta porãvétava. w15 15/12 3:6, 8, 9

Tekotevẽ ñanearandu ha ñapensa porã jadesidíta jave mbaʼe estúdio médikopa jajapóta, térã mbaʼe tratamiéntopa jasegíta (Tito 2:12). Upéva ningo iñimportanteterei, koʼýte haʼetéramo idudóso léntova la oñerrekomendáva ñandéve. Iporã ñañeporandu: “¿Ikatu piko ojeexplika porã ñandéve mbaʼéichapa ojejapo upe estúdio térã tratamiénto? ¿Oĩpa algúna kósa ñanembodudáva? ¿Oĩpa heta doktór orrekomendáva upéva?” (Prov. 22:29). Ikatu oĩ heʼíva ñandéve ojetopa hague mombyry peteĩ pohã iporãitereíva, péro heta doktór ni ndoikuaaiha gueteri. Péro, ¿oñekomprováma piko añetehápe upe pohã oporomongueraha? Peichahágui ikatu avei oĩ oikuaveʼẽva ñandéve peteĩ prodúkto orekóva algún ingrediénte sekréto térã podér. Koʼã mbaʼe ningo ipeligrosoiterei. Jehová ndoipotaiete jaipuru mbaʼeve orekóva “podér máhiko” (Is. 1:13, NM; Deut. 18:10-12). w15 15/12 4:16

La Bíbliape omombeʼu oĩ hague heta persóna iñeʼẽrendúva Jehovápe ha oñandúva mbaʼeichaitépa pe espíritu sánto oipytyvõ chupekuéra, ndorekóiramo jepe hikuái esperánsa oho hag̃ua yvágape. Por ehémplo Juan el Bautista. Jesús ningo oñeʼẽ porãiterei vaʼekue hese, péro heʼi avei haʼe noĩmoʼãiha pe Rréino yvagapeguápe. David avei ohecha vaʼekue mbaʼéichapa pe espíritu sánto ogia chupe (1 Sam. 16:13). Por ehémplo oipytyvõ chupe ontende hag̃ua umi mbaʼe ipypukúva oúva Jehovágui, ha oskrivi hag̃ua unas kuánta párte oĩva la Bíbliape (Mar. 12:36). Upéicharõ jepe apóstol Pedro heʼi hese ‘ndojupíri hague yvágape’ (Hech. 2:34). Jehová omeʼẽ ijespíritu sánto koʼã kuimbaʼépe ojapo hag̃ua heta mbaʼe tuicháva, péro upéva ndeʼiséi oinvita hague chupekuéra oho hag̃ua yvágape. Upéicharõ, ¿ikatúpa jaʼe koʼã kuimbaʼe ndokalifikái hague oho hag̃ua ogoverna yvágape? Nahániri. Haʼekuéra ningo iñeʼẽrendu Jehovápe ha oikove jeýta, péro ndahaʼéi yvágape, síno ko yvy ape ári (Juan 5:28, 29; Hech. 24:15). w16.01 3:16

Ñambaʼapo jave peteĩ persóna jahayhúvandi, katuete ñañemoag̃uive hese. Péicha jaikuaa porãve chupe, jaikuaa mbaʼe métapa oreko ha mbaʼépa ojapo hína ikatu hag̃uáicha ohupyty. Upéva oiko vaʼekue Jehová ha Jesús rehe. Hetaiterei tiémpore haʼekuéra ombaʼapo oñondive, upéicha rupi oñoamigoite ha ojoayhueterei hikuái. Haʼekuéra ojokuaa porãiterei. Jehová ha Jesús oĩ peteĩ ñeʼẽme ha ojapo opa mbaʼe oñondive. Jesús ojerure vaʼekue Itúvape oñangareko hag̃ua idisipulokuérare. ¿Maʼerãpa? Haʼe heʼi: “Oiko hag̃ua chuguikuéra peteĩnte, ñande peteĩnteháicha avei” (Juan 17:11). Ñaneñeʼẽrendúramo Jehovápe ha japredika pe marandu porã, jaikuaa porãve chupe. Jehechakuaa ikuentaveha jajerovia hese ha jasegi umi konsého omeʼẽva. Amáske ñañemoag̃ui Jehováre, haʼe avei oñemoag̃uive ñanderehe (Sant. 4:8). Ñaneñeʼẽrendúvo Jehovápe ha japredika, ñañemoag̃uive avei ñane ermanokuérare. ¿Mbaʼérepa jaʼe upéva? Pórke umi provléma jahasáva, ohasa avei ñane ermanokuéra ha entéronte ñañehaʼã jahupyty la mísma méta. w16.01 5:9, 10

Noemí ningo odesidíma ndohomoʼãveimaha Moábpe. ¿Mbaʼépa ojapo upémarõ Rut? ¿Ojevy jeýtapa Moábpe opyta hag̃ua ihentekuérandi, terãpa ohóta Noemíndi? (Rut 1:1-8, 14.) Añetehápe Rut odesidi vaʼerã peteĩ mbaʼe ijetuʼuetereíva chupe g̃uarã. ¿Mbaʼérepa jaʼe upéva? Rut oho jeýramo Moábpe, ikatúta oiko jey hógapente ha ihentekuéra oñangarekóta hese. Avei oikóta peteĩ lugár haʼe ojepokuaahápe ha oñeñeʼẽhápe iñidióma. Hiʼarive Noemí ndaikatúi oasegura Rútpe oiko porãvetaha Belénpe. Avei oipyʼapy chupe ndaikatúine hag̃ua oipytyvõ Rútpe ojuhu jey hag̃ua imenarã térã ifamiliarã. Opa umívare Noemí heʼi Rútpe oho jey hag̃ua Moábpe. Jaikuaaháicha, Orpá oho jey ‘ivállepe ha omombaʼeguasu jeýta idioskuérape’ (Rut 1:9-15, NM). Péro Rut odesidi ndohomoʼãiha ivállepe ni ndoadoramoʼãiha umi dios fálsope. w16.02 2:4, 5

David ha isoldadokuéra okañy hína desiérto de Judápe. Rréi Saúl ha ijehérsito de 3.000 soldádo katu oheka oikóvo Davídpe ojuka hag̃ua chupe. Peteĩ pyharépe, David ha umi kuimbaʼe omoirũva chupe otopa Saúl ha isoldadokuéra okeha hína peteĩ lugárpe. Kirirĩhaitépe, David ha peteĩ isoldádo hérava Abisai, oike Saúl oĩha meve. Abisai ojerure permíso Davídpe ojuka hag̃ua Saúlpe, péro David heʼi chupe: “¿Nde piko reimoʼã opyta reitaha upe opokóva Ñandejára elehídore?”. Upéi heʼi avei chupe: “Mbaʼéiko opensáta Jehová che ajapóramo algúna kósa upe haʼe oiporavo vaʼekuére. Ivaietereíta ningo Jehovápe g̃uarã” (1 Sam. 26:8-12, NM). David oikuaa porã Jehová oiporavo hague Saúlpe ogoverna hag̃ua Israélpe. Ha ontende porãiterei orrespeta vaʼerãha chupe, ha péicha ohechaukaha hína orrespetaha avei Jehovápe. Upévare David ni nopensái ojapóvo mbaʼeve ivaíva Saúlre. Ñane tiémpope, Jehová oipota avei jahayhu ha jarrespeta chupe. Ha oipota avei jarrespeta umi haʼe omoĩvape ñanemoakã hag̃ua. w16.02 4:1, 2

¿Ndépa nemitã ha rejevautisase? Oiméramo upéicha, rejapose hína peteĩ mbaʼe iporãitereíva. Péro upéva haʼe hína peteĩ desisión iñimportánteva. Peteĩ persóna ojevautisáva ohechauka hína entérope ojededikáma hague Jehovápe. Upéva heʼise opromete hague Jehovápe oservitaha chupe pára siémpre, ha ndaiporimoʼãiha ótra kósa iñimportantevéva upévagui. Upéicharõ, nemanduʼákena pe promésa rejapótava Jehovápe ndahaʼeiha vyrorei. Upévare, rejevautisa mboyve rehechauka vaʼerã neakãguapyha, reikuaa porã vaʼerã mbaʼérepa rejevautisase, ha rentende porã vaʼerã mbaʼépa heʼise jajededika Jehovápe. Upéicharõ, ¿reimépa preparádo rejevautisa hag̃ua? Ikatu repensa neʼĩraha gueteri. Térã ikatu reñandu reimemaha preparádo, péro nde tuakuéra oipota rehaʼarõmie pórke nemitãiterei gueteri. ¿Mbaʼépa ikatu rejapo oikóramo upéva? Ani reñedesanima, upéva rangue reñehaʼãmbaite vaʼerã ikatu hag̃uáicha emehorave rehóvo reime peve preparádo. w16.03 2:1, 2

Oĩ heta kristiáno iména térã hembireko ndahaʼéiva Testígo. Heta vése, koʼãichagua ermáno ha ermána omenda riréma oiko chugui Testígo, ha la iména térã hembireko ndostudiái la Biblia. Térã ikatu avei omenda raʼe peteĩ Testígore, péro upéi hembiayhu ou oñemomombyry Jehovágui. Oiméramo jajecha ko situasiónpe, jasegi vaʼerã jajapo la Biblia heʼíva ijetuʼúramo jepe ñandéve. Péichamante ñane matrimónio imbaretéta. Satanás ombyaise umi famíliape. Upévare, ména ha tembireko tekotevẽ oñopytyvõ ha oĩ unído. Mokõivéva oñatende vaʼerã ani hag̃ua umi mbaʼe heʼi ha ojapóva omokangy imatrimónio, tove jepe tomenda ramo térã aréma. Umi ermáno ha ermána aréma omenda vaʼekue, omoĩ vaʼerã ehémplo umi omenda ramovévape. Ikatu oinvita sapyʼapyʼa umi matrimónio imitãvévape ijestúdio de famíliape. Péicha haʼekuéra ohechakuaáta umi omendáva osegi vaʼerãha oĩ unído ha ojotrata porã, ohasáramo jepe heta áñoma oñondive (Tito 2:3-7). w16.03 3:14, 15