Noviembre

Ko téxtope heʼíva ndeʼiséi Abrahán ikueraimaha oikove hague. Síno heʼise ovyʼaiterei hague oikove aja pukukue. ¿Mbaʼérepa siémpre ovyʼa? Pórke chupe g̃uarã iñimportanteve kuri iñamista Jehovándi. La Biblia heʼi Abrahán ohaʼarõ hague “pe siuda oguerekóva simiénto teete; upe siuda ningo Ñandejára odesidi vaʼekue mbaʼéichapa ojejapóta ha haʼe voi omopuʼã” (Heb. 11:10). Epensamíntena mbaʼeichaitépa ovyʼáta Abrahán oiko vove pe paraísope, ha amás día oñemoag̃uivévo ohóvo Jehováre. Katuete ovyʼaitereíta oikuaávo iñehémplo oipytyvõ hague hetaiterei Ñandejára siérvope. Upépe oikuaáta ohórõ guare Isaac ndive pe montáñape, orrepresenta hague peteĩ mbaʼe iñimportantetereíva oiko vaʼekue upe rire (Heb. 11:19). Ha oikuaáta umi mbaʼe ohasa vaʼekue osakrifikátarõ guare itaʼýra Isaácpe, oipytyvõ hague hetápe ontende hag̃ua mbaʼéichapa oñeñandu Jehová, omboúrõ guare Itaʼýrape omano hag̃ua ñanderehehápe (Juan 3:16). w16.02 1:15, 16

Sapyʼánte ikatu algún ermáno reiete ñandetrata vai, ha upévare ñañeñandu vai, koʼytevéntema upe ermáno orekórõ priviléhio kongregasiónpe. Péicha jave ikatu jahechauka mávapepa añetehápe jarrespeta. Por ehémplo, Jehová omoĩ vaʼekue rréiramo Saúlpe, péro haʼe itaʼýrape jepe otrata vai. Saúl nontendéi mbaʼéicha rupípa Jonatán ohayhuete Davídpe. Upévare Jonatán oipytyvõsérõ guare Davídpe, Saúl ipochyeterei hese ha omotĩ chupe heta hénte rovake. Upéicharõ jepe, Jonatán osegi orrespeta itúape. Avei ohechauka iñeʼẽrenduha Jehovápe ha oapojaha Davídpe, pe kuimbaʼe Ñandejára oiporavóva ojupi hag̃ua rréiramo Israélpe (1 Sam. 20:31-41). Umi ansiáno oñehaʼãmbaite otrata porã entéro umi ermáno kongregasionguápe. Péro iñimperfékto rupi hikuái, sapyʼánte ikatu nontendeporãi ñane situasión (1 Sam. 1:13-17). Peteĩ ansiáno ñandetrata vaírõ, ani jarahaiterei enkuénta umi mbaʼe ojapo vaʼekue. Upéva rangue jasegínte ñaneñeʼẽrendu Jehovápe. w16.02 3:14, 15

Heta mitãrusu ha mitãkuña heʼi ojededikáma hague Jehovápe, péro noĩriha gueteri preparádo ojevautisa hag̃ua. Umi opensáva péicha añetehápe nontendéi mbaʼépepa idiferénte pe dedikasión ha pe vautísmo. Pe dedikasión haʼe hína peteĩ ñemboʼe ñaprometehápe Jehovápe jaservitaha chupe pára siémpre. Ha upéi jajevautisa ikatu hag̃uáicha entéro oikuaa jajededikáma hague Ñandejárape. Upévare, rejevautisa mboyve, reikuaa porã vaʼerã mbaʼépa heʼise jajededika Jehovápe. Rejededikávo Jehovápe ere hína chupe upe ára guive nde repertenesemaha chupe. Repromete Ñandejárape siémpre remotenondetaha iservísio. Upévare ikatu jaʼe pe dedikasión ndahaʼeiha vyrorei (Mat. 5:33). w16.03 1:14, 15

Pe apóstol oipuru ehémploramo pe kuérpo umáno, omyesakã hag̃ua entéro kristiáno ikatuha ñaipytyvõ oĩ hag̃ua unida kongregasiónpe ha jasegi hag̃ua Jesúspe, haʼéva hína pe akã. Pablo heʼi peteĩ kuérpope entéro umi párte “ojoaju ha ombaʼapo [porãha] oñondive oñekotevẽháicha” (Efes. 4:16). Upéicharõ, entéro ñaiméva kongregasiónpe, tahaʼe imitãva ha ijedáva, hesãiva ha hasykatúva, ñaipytyvõ vaʼerã oĩ hag̃ua unida kongregasiónpe. ¿Mbaʼéichapa ikatu jajapo upéva? Jesús onombra umi ansiánope odirihi hag̃ua pe kongregasión. Haʼe oipota jarrespeta chupekuéra ha jasegi umi instruksión omeʼẽva ñandéve (Heb. 13:7, 17). Ha upéva ningo sapyʼánte hasy ñakumpli porã hag̃ua. Péro jajeruréramo Jehovápe tañanepytyvõ, haʼe omeʼẽta ñandéve ijespíritu sánto ikatu hag̃uáicha ñaneñeʼẽrendu chupekuéra. Ñaneumílderamo ha ñambaʼapo meme umi ansiánondi, ñandedeprovechoitereíta kongregasiónpe. Upéicha entéronte ñaiméta unído ha koʼẽ koʼẽre jajoayhuvéta. w16.03 3:8, 9

Heta ermáno imitãvape noñemokyreʼỹi oreko hag̃ua méta espirituál. Péicha rupi, umi mbaʼe ojejapóva Jehová servísiope naiñimportanteguasúi chupekuéra g̃uarã (Mat. 10:24). Oiméramo nde peteĩ ansiáno, reñemotiémpo vaʼerã ikatu hag̃uáicha reñemoamígo pe ermánore. Ere chupe pe kongregasión oikotevẽha hese ha elee hendive umi téxto oipytyvõtava chupe opensa hag̃ua mbaʼérepa oñemeʼẽ vaʼekue Jehovápe (Ecl. 5:4; Is. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Eporandu vaʼerã chupe umi mbaʼe opokótava ikorasõre, por ehémplo: “¿Mbaʼépa repromete raʼe Jehovápe reñemeʼẽrõ guare chupe? ¿Mbaʼéichapa oiméne oñeñandu haʼe rejevautisárõ guare?” (Prov. 27:11). “Ha, ¿mbaʼéichapa oñeñandúne raʼe Satanás?” (1 Ped. 5:8.) Reiporavo porãramo umi téxto releétava pe ermánondi, katuete repokóta ikorasõre ha reipytyvõta chupe ojepyʼamongeta hag̃ua isituasiónre. w15 15/4 2:9, 11

¿Mbaʼérepa sapyʼánte Jehová nokontestái ensegída ñaneñemboʼe? Ñantende hag̃ua upéva, iporã ñanemanduʼa la Biblia okomparaha Ñandejárape peteĩ túvare (Sal. 103:13). Umi túva ningo nomeʼẽi ifamíliape opa mbaʼe ojeruréva chupe. Ha omeʼẽtaramo jepe, hetave vése ohaʼarõʼimi omeʼẽ hag̃ua. Sapyʼánte avei umi mitã ojerure peteĩ mbaʼe ha sapyʼaitérõ g̃uarã ndoipotavéima. Umi túva oikuaa avei oĩ porãpa hína pe ifamília ojeruréva, térãpa operhudikáta chupe térã ótrope. Avei tuvakuéra siémpre omeʼẽramo ifamíliape opa mbaʼe ojeruréva, haʼetéta hikuái ifamília esklávo. Umi túva ningo oikuaa porã mbaʼépa oikotevẽ ifamília ha arakaʼépa iporãvéta omeʼẽ chupe. Jehová upeichaite avei. Haʼe ningo ñanderayhueterei, oikuaa mbaʼépa ñaikotevẽ, ha mbaʼe moméntopepa iporãvéta omeʼẽ ñandéve. Upévare, ñahaʼarõkuaa vaʼerã ha jahecháta mbaʼéichapa haʼe okontesta ñandéve ñane ñemboʼe (Is. 29:16; 45:9). w15 15/4 4:6, 7

Ko múndo aña oñehundi potaitéma. Upévare koʼã tiémpo jaikoha iñimportanteterei. Péro Satanás oipota ñapensa ñandejehénte ha jaiko trankílamente jajepyʼapyʼỹre mbaʼevére. Oipota jaiko ko múndo oikuaveʼẽva rapykuéri ha ñapensa ofaltaha gueteri heta tiémpo ou hag̃ua pe fin, térã ndoumoʼãiha voi. Péro upéva japu hína. Ñande ñañatende porã vaʼerã ha ani ñanderesarái jaikoha umi ára pahápe (Mat. 16:22, 23; 24:42). Satanás oipota avei ñapensa Jehová nañanderayhuiha ha núnka noperdonamoʼãiha ñande pekádo. Péro upéva japúnte avei. La Biblia heʼi: “Ñandejára ningo hekojoja hína ha ndahesaraimoʼãi umi mbaʼe pejapo vaʼekuégui [ha] mbaʼéichapa pehayhu héra” (Heb. 6:10). Jahechaháicha, Jehová omombaʼeterei entéro mbaʼe jajapóva hesehápe (1 Cor. 15:58). Jehová ningo Satanáspe la ndohayhúi ha noperdonamoʼãi. Upévare, aníkena jaheja pe Diablo ñanembotavy. w15 15/5 1:16-19

Abrahán ojerovia vaʼekue Jehová promesakuérare, upévare iñeʼẽrendu ha ojerovia mbarete, ohasárõ jepe heta mbaʼe ijetuʼúva. Haʼe oikuaa porã Jehová okumplíma hague heta promésa, ha oĩ segúro okumpli jeytaha. Abrahán ojeroviaiterei Jehová promésare, upévare siémpre ojapo opa mbaʼe Ñandejára omandáva chupe. Por ehémplo, oheja pe hóga oĩ vaʼekue siuda de Úrpe, ha upe guive ndopytavéi oiko are peteĩ siudápe. Haʼe oikuaa porã umi siuda oĩva ijerére ndopytaʼaremoʼãiha, pórke igovernantekuéra ndoservíri Jehovápe (Jos. 24:2). Abrahán oipotaitereíma og̃uahẽ pe tiémpo Jehová ogovernatahápe ko yvy tuichakue. La Biblia heʼi Ñandejára goviérno haʼeha “pe siuda oguerekóva simiénto teete; upe siuda ningo Ñandejára odesidi vaʼekue mbaʼéichapa ojejapóta ha haʼe voi omopuʼã” (Heb. 11:10). Abrahán, Abel, Enoc, Noé ha ambue Ñandejára siérvo orovia avei oñemoingovetaha umi omanóvape. Haʼekuéra oñeimahina meme mbaʼéichapa ovyʼáta oiko vove pe Paraísope opa árare, ha upéva oipytyvõ chupekuéra ojerovia mbareteve hag̃ua (Heb. 11:15, 16). w15 15/5 3:8, 9

Jesús oĩro guare ko yvy ape ári, ojapo vaʼekue heta milágro ndetuicháva. Katuete ningo imbareteve ñande jajerovia jaleévo la Bíbliape umi rreláto oñeʼẽva koʼã milágrore (Mat. 9:35; Luc. 9:11). Jesús ojapo vaʼekue heta milágro Jehová omeʼẽ rupi chupe podér. Upévare apóstol Pablo heʼi vaʼekue: ‘Ñandejára [...] podér ojehechauka Cristo rupive’. Péro, ¿mbaʼépa ikatu ñaaprende umi milágro Jesús ojapo vaʼekuégui? Ohechauka haʼe ogoverna vove 1.000 áñore, ojapotaha heta milágro oipytyvõ hag̃ua entéro yvypórape. Avei umi milágro Jesús ojapo vaʼekue, ñanepytyvõ jaikuaa porã hag̃ua chupe ha Jehovápe. Jahechaháicha, umi “milágro” Jesús ojapo vaʼekue, ñanemboʼe heta mbaʼe iñimportánteva (Hech. 2:22). w15 15/6 1:1, 2

Jesús ohechakuaa Jehová omonguera hague pe kuña opoko vaʼekuépe ijaóre. Upévare heʼi pe kuñáme: “Che rajy, rejerovia rupi ningo rekuera ko mbaʼasy nembohasa asyetévagui” (Mar. 5:34). Upéi heʼi chupe anínte hag̃ua ojepyʼapy, tohónte pyʼaguapýpe. Jahechaháicha, Jesús ohayhueterei umi hasykatúvape. ¡Ajépa ivuenoite Jesús! Haʼe ningo ohayhueterei yvyporakuérape, koʼýte umi hasykatúvape. Satanás katu oipota ñapensa ndajavaleiha mbaʼeverã ha ndaiporiha ñanderayhúva. Péro umi milágro Jesús ojapo vaʼekue ohechauka ojepyʼapyha ñanderehe ha ointeresaha chupe umi mbaʼe jahasáva. ¡Ajépa javyʼaite jareko haguére peteĩ rréi ha saserdóte peichaite peve ñanderayhúva! (Heb. 4:15.) Oiméramo ñaneresãi, sapyʼánte ikatu ijetuʼu ñandéve ñantende hag̃ua peteĩ persóna hasýmavape heta tiémpore. Péro ñañehaʼã vaʼerã jasegi Jesús ehémplo. Haʼe núnka ndahasýiramo jepe, ontende umi persóna hasykatúvape ha oiporiahuvereko chupekuéra (1 Ped. 3:8). w15 15/6 2:11, 12

Ñande testígo de Jehová jareko peteĩ priviléhio ijojahaʼỹva: jaikuaa Ñandejára réra, ha oiko ñandehegui “peteĩ tetã ogueraha vaʼerã héra” (Hech. 15:14; Is. 43:10). Pe padrenuéstrope Jesús ñanemboʼe jajerure hag̃ua Jehovápe: “Toñemomarangatu nde réra” (Mat. 6:9). Upéva heʼise jaipotaha oñemopotĩ Ñandejára réra. ¿Mbaʼéichapa jahechauka ñamombaʼeha upe priviléhio? Jajerure vaʼerã Jehovápe tañanepytyvõ ani hag̃ua jaʼe ni jajapo mbaʼeve omongyʼátava héra. Síglo primérope oĩ vaʼekue heta kristiáno nokumplíriva umi mbaʼe omboʼéva, ohechaukaháicha pe téxto kostediagua. Aníkena jajogua umívape. Jehová osantifikáta térã omopotĩetéta héra ohundi vove umi odespresiávape chupe ha orrechasáva igoviérno (Ezeq. 38:22, 23). Upe rire yvyporakuéra ohupytýta perfeksión, ha entéro oikóva yvágape ha ko yvy ape ári omombaʼeguasúta Jehovápe ha ombotuicháta héra marangatu. “Upéicha Ñandejára añoite omoakãta opa mbaʼe.” (1 Cor. 15:28.) w15 15/6 4:7, 10

Escrituras Hebréaspe pe palávra “pyrenda” ojepuru jepi oñeñeʼẽ jave Israel témplore (1 Crón. 28:2; Sal. 132:7). Pe témplo ningo iporãiterei vaʼekue Jehovápe g̃uarã, pórke isiervokuéra oho upépe oadora hag̃ua chupe (Isa. 60:13). Ñane tiémpope ndojeadoravéima Jehovápe peteĩ témplo tuichávape yma ojejapo haguéicha, síno peteĩ “témplo espirituálpe”. ¿Mbaʼépa pe témplo espirituál? Upéva haʼe hína umi médio Ñandejára oprepara vaʼekue ikatu hag̃uáicha ñande yvypóra jaadora chupe ha jaiko iñamígoramo. Ko vendisión jahupyty Jesús omano haguére ñanderehehápe. ¿Arakaʼe guivépa oĩ pe témplo espirituál? Pe témplo espirituál oñeforma áño 29 guive, Jesús ojevautisárõ guare ha ojeporavo oservi hag̃ua kómo Saserdóte Prinsipál Jehová témplo espirituálpe (Heb. 9:11, 12). w15 15/7 1:1-3

Og̃uahẽvo upe tiémpo, Jesús orrekompensáta umi iñeʼẽrendúvape Jehovápe, péro okastigáta umi naiñeʼẽrendúivape (Mat. 24:46, 47, 50, 51; 25:19, 28-30). ¿Mbaʼéichapa ojapóta upéva? Jesús heʼi: “Pe Yvypóra Raʼy og̃uahẽ vove tuicha podér reheve entéro umi ánhel ndive, oguapýta itróno omimbipávape. Ha opa tetãnguéra oñembyatýta henondépe, ha haʼe omoĩta umi héntepe mokõi atýpe, pe ovecharerekua oipeʼaháicha ovecha, kavarágui. Omoĩta umi ovecha iderécha gotyo ha umi kavara ijiskiérda gotyo” (Mat. 25:31-33). Upéva heʼise Jesús ohusgataha entéro yvypórape. Umi “kavara” térã umi persóna naiñeʼẽrendúiva, “oñehundíta opa ára g̃uarã”. Péro umi “ovecha” térã umi iñeʼẽrendúva, “oikovéta opa ára g̃uarã” (Mat. 25:46). w15 15/7 2:11, 12

Katuete ningo ñandegusta ñane idióma, ñane kostúmbre, umi lugár jaikoha ha umi tembiʼu jajepokuaáva jaʼu ñanemichĩ guive. Péro ani ñapensa umi mbaʼe ñandéve ñandegustávante iporãveha. ¿Mbaʼérepa? Pórke Jehová okrea heta mbaʼe de diferénte kláse, ikatu hag̃uáicha jadisfruta ikreasióngui (Sal. 104:24; Apoc. 4:11). Upévare, aníkena ñapensa ñande jajapóvante oĩ porãha. Jehová oipota opaichagua persóna oikuaa ha oadora chupe, ha oikove pára siémpre (Juan 3:16; 1 Tim. 2:3, 4). Upévare, ñahendu vaʼerã ñande rapicha opensáva, idiferénteramo jepe ñande ñapensa lájagui. Péicha jajapóramo, javyʼavéta ha jaikóta pyʼaguapýpe ñane ermanokuérandi. Ñande ningo jaapoja Jehová goviérno añoite, upévare nañañentremetéi umi provléma oikóvare ko múndope, ni nañapensái ñaneimportanteveha ótrogui. Jaagradesete ningo Jehovápe ñanemboʼe haguére ñandepyʼaguapy ha ñaneumílde hag̃ua. w15 15/7 3:17, 18

Ñande ikatu jahechauka Jehovápe jahayhuha chupe, japredikávo kyreʼỹme pe notísia porã oñeʼẽva Ñandejára Rréinore (Mat. 24:14; 28:19, 20). Avei tekotevẽ ñaneñeʼẽrendu chupe jahasa jave umi pruéva omokangyséva ñande jerovia (Sal. 84:11; Sant. 1:2-5). Upéicharõ, ñambohováiramo jepe umi provléma ijetuʼuetereíva, ñanemanduʼa vaʼerã Jehová ohecha ha ontendeha umi mbaʼe jahasáva, ha katuete ñanepytyvõtaha, pórke haʼe ñanderayhueterei (Sal. 56:8). ¿Mbaʼépa jajapo vaʼerã jahechauka hag̃ua jahayhuha Jehovápe? Primero, jajepyʼamongeta umi mbaʼe porãita haʼe ojapo vaʼekuére. Segundo, jastudia meme la Biblia. Tercero, ñañemboʼe pyʼỹi ikatu hag̃uáicha amás día ñañemoag̃uive hese. Ha cuarto, jajepyʼamongeta Jesús sakrifísiore, haʼéva hína peteĩ rregálo Jehová omeʼẽva ñandéve (1 Juan 2:1, 2). Jajapóramo koʼã mbaʼe, ñaĩta segúro Jehová ñanderayhuha ha ñande avei jahayhuvéta chupe koʼẽ koʼẽre. w15 15/8 1:6, 17, 18

Pe paraísope sapyʼánte tekotevẽta avei ñanepasiénsia. Por ehémplo, oiko vove pe rresurreksión, oĩta heta orresivímava vyʼápe ihénte ha iñamigokuéra omano vaʼekuépe. Péro, ¿mbaʼépa jajapóta tekotevẽramo ñande ñahaʼarõmie orresusita peve umi jahayhúva? ¿Javyʼátapa umi ótrondi ha ñanepasiénsiata ñahaʼarõ aja? (Rom. 12:15.) Koʼág̃ama voi ñanepasiénsiaramo ha ñahaʼarõ oñekumpli Jehová promesakuéra, katuete pe paraísope ñanepasiénsiata avei. ¿Mbaʼéichapa avei ikatu jajeprepara jaiko hag̃ua pe paraísope? Por ehémplo, sapyʼánte ñane puvlikasionkuérape osẽ peteĩ entendimiénto pyahu. Péicha jave tekotevẽ ñanepasiénsia ikatu hag̃uáicha ñantende porã umíva. Ñañeporandumína: “¿Astudia porãpa hína koʼã informasión pyahu? ¿Mbaʼéichapa arreaksiona oiméramo nantendepái umíva?”. Koʼág̃ama voi ñanepasiénsiaramo, pe paraísope ifasilvéta ñandéve jasegi hag̃ua umi instruksión pyahu Jehová omeʼẽva (Prov. 4:18; Juan 16:12). w15 15/8 3:9, 10

Apóstol Pablo heʼi vaʼekue umi kristiáno Efesoguápe oĩ hag̃ua unído ha osegi hag̃ua oaprende Jesúsgui. Péicha oikóta chuguikuéra “peteĩ kuimbaʼe okakuaapámava ha ohupytýva Crístope” (Efes. 4:13). Pablo oskrivírõ guare kongregasión de Éfesope, oĩma vaʼekue heta kristiáno ijerovia mbaretéva ha heta áñorema oservíva Jehovápe. Péro ijapytepekuéra oĩ avei kristiáno tekotevẽva omadurave espirituálmente. Upeichaite avei oiko ñane tiémpope. Heta kongregasiónpe oĩ ermáno ha ermána heta áñorema oservíva Jehovápe. Péro oĩ avei kristiáno tekotevẽva omadurave espirituálmente, umíva apytépe umi ermáno ojevautisa ramóva. ¿Ha nde? ¿Ofaltápa avei remadurave en sentído espirituál? (Col. 2:6, 7.) w15 15/9 1:2, 3

Heta oĩ opensáva iporãha jajapo ehersísio ikatu hag̃uáicha ñaneresãive. Péro upéva ndeʼiséi ikatuha jajapo ehersísio oimehaichagua persónandi. Proverbios 13:20 heʼi: “Pe oikóva iñarandúvandi, iñarandúta avei. Pe ojeheʼáva ivýrovandi katuete osẽ vaíta” (NM). Jahechaháicha, jadesidi porãséramo jaiporavo jave ñane diversionrã, tekotevẽ ñahekomboʼe ñane konsiénsia la Biblia rupive. ¿Mbaʼépa ndéve g̃uarã la iñimportantevéva? ¿Igústopa ndéve reho rreunionhápe, repredika ha restudia la Biblia? ¿Térãpa rejedivertisénte? Jesús omeʼẽ vaʼekue peteĩ konsého ñanepytyvõtava jadesidi hag̃ua mboy tiémpopa jaipurúta jajediverti hag̃ua. Haʼe heʼi: “Pemotenonde meméke Ñandejára Rréino ha ihustísia, ha opa koʼã mbaʼe oñemeʼẽta avei peẽme” (Mat. 6:33). Jadesidíta jave mbaʼéichapa jaipurúta ñane tiémpo, ñane konsiénsia ñanemomanduʼa vaʼerã ko konséhore. w15 15/9 2:13, 15

Caín nopenái Jehováre ha upe rire heta osufri (Gén. 4:11-13). Heta tiémpo rire, Jehová ohecha peteĩ isiérvo hérava Baruc nopensaiha hekópe, ha upevakuére ou ikaneʼõ ha oñedesanima. Upémarõ Jehová heʼi chupe tekotevẽha okambia opensa lája. Baruc ohendu ikonsého ha upéicha rupi ojesalva (Jer. 45:2-5). Pablo heʼi vaʼekue: “Jehová okorrehi umi ohayhúvape; añetehápe haʼe oinupã umi oguerekóvape itaʼýraramo” (Heb. 12:6). Jahechaháicha, Jehová ñandegia ha ñandekorrehi ñanderayhu rupi. Haʼe ningo ñanedisiplina tekotevẽ jave, ha avei ñanepytyvõ ñamehora hag̃ua. w15 15/9 4:12, 13

Umi gavaoníta ohechauka vaʼekue iñaranduha orrekonosévo Jehová haʼeha pe Dios verdadéro. Rahab ndahaʼéiramo jepe isrraelíta, orrekonose vaʼekue avei Jehová oipytyvõha ipuévlope. Haʼe oñentera kuri Jehová oguenohẽ hague Israélpe Egipto poguýgui. Upévare, mokõi isrraelíta og̃uahẽrõ guare hógape, heʼi chupekuéra: ‘Aikuaa Ñandejára omeʼẽtaha peẽme ko yvy’. Jahechaháicha, Rahab odemostra ojeroviaha Jehováre, oikuaárõ jepe upéva oapeligraha chupe ha ifamíliape. Péro haʼe oĩ segúra Ñandejára osalvataha chupekuéra (Jos. 2:9-13; 4:23, 24). La Bíbliape omombeʼu oĩ hague persóna norrekonoseséiva Jehová oipytyvõha isiervokuérape, péro oĩ avei umi orrekonoséva. ¿Mbaʼéichapa ñande ikatu jahechakuaa Jehová oipytyvõha isiervokuérape? Jaikuaavévo jahávo chupe. Jajapóramo upéva, haʼetéta ‘ojeavríva ñane korasõ jahecha hag̃ua’ mbaʼéichapa Jehová ñanepytyvõ (Efes. 1:18). w15 15/10 1:6, 7, 9

La Biblia heʼi Jesús oapresiaiterei hague Mártape, ha haʼe hague iñamigaite. Péro ndahaʼéi chupénte la Jesús oguerohory ha orrespeta vaʼekue. Por ehémplo, haʼe ohayhu vaʼekue avei isy Maríape, ha oapresiaiterei Marta ermánape hérava María, haʼéva avei iñamíga (Juan 19:25-27). Péro, ¿mbaʼérepa Jesús oguerohoryeterei vaʼekue Mártape? Pórke imbaʼeporã ha iguapaiterei, ha ohechauka ojeroviaitereiha Ñandejárare ha Jesúsre. Marta orovia opa mbaʼe Jesús omboʼéva, ha oĩ segúra haʼeha pe Mesías oñepromete vaʼekue (Juan 11:21-27). Upéicharõ jepe, iñimperfékta ha heta vése ojavy. Por ehémplo, peteĩ okasiónpe Jesús ohórõ guare ovisita chupekuéra, Marta ipochy iñermána Maríare, ha heʼi Jesúspe oñemoñeʼẽ hag̃ua chupe. Marta heʼi: “Che Ruvicha, ¿nderehechái piko che ermána ohejapaiteha che ári la tembiapo? Eréna chupe tachepytyvõmi” (Luc. 10:38-42). w15 15/10 3:1, 2

Jajepyʼamongetáramo Jehová ha Jesúsre, ñanekyreʼỹvéta jaservi hag̃ua Jehovápe. Avei ñane ermanokuéra ha umi persóna japredikáva ikyreʼỹta ohechávo upéva. Ñameditáramo Jehová ojapo vaʼekuére omboúvo Jesúspe omano hag̃ua ñanderehehápe, jahechakuaáta tuichaiterei mbaʼeha jaiko Jehová amígoramo (Rom. 3:24). Peteĩ ermáno Sudafricagua hérava Mark, ohasa tres áño kárselpe iñeʼẽrendu haguére Jehovápe. Haʼe heʼi: “Igustoiterei ningo jajepyʼamongeta Jehováre. Amáske ñapensa hese, hetave mbaʼe ñaaprende chugui. Sapyʼánte ningo añedesanima térã ajepyʼapy che renonderãre. Péicha jave ajagarra che Biblia, alee ha amedita, ha upéva tuicha chembopyʼaguapy”. w15 15/10 4:15

Redesidi jave peteĩ mbaʼe oafektáva ne famíliape, ikatúma guive reexplika vaʼerã chupe mbaʼérepa redesidi upéva. Péicha ifasilvéta ne famíliape iñeʼẽrendu hag̃ua ndéve. Por ehémplo, peteĩ ermáno hérava Barry, oreko cuatro família. Haʼe heʼi: “Ñane família ningo okonfiave ñanderehe jaexplikáramo chupekuéra mbaʼérepa jadesidi peteĩ mbaʼe. Avei ontendéta hikuái ñapensa porã hague jadesidi mboyve”. Ha upeichaite ningo. Ani ñanderesarái haʼekuéra ndahaʼeveimaha mitãtavy, síno oaprendeha ohóvo opensakuaa ha odesidi porã hag̃ua (Rom. 12:1). Barry heʼi avei: “Umi mitãrusu ha mitãkuña oaprende vaʼerã iñimportanteha odesidi akãguapýpe porã, ha ndojegiái vaʼerãha umi mbaʼe oñandúvarente”. Upévare, peẽ tuvakuéra peneumílde ha penesinséro vaʼerã pene famíliandi. Upéicha haʼekuéra osegíta pene ehémplo ha avei ohechakuaáta ndapetrataveimaha chupekuéra mitãicha. w15 15/11 2:11

Koʼág̃arupi oĩ hetaiterei persóna oservíva Jehovápe. ¿Mbaʼéichapa jatrata vaʼerã chupekuéra? (Rom. 12:10). Apóstol Pedro heʼi vaʼekue ñaneñeʼẽrendúramo Ñandejárape, jahayhutaha ñane ermanokuérape ‘ñande pyʼaite guive’. Avei ohechauka iñimportantetereiha upéva, heʼívo: “Koʼýte pejoayhueterei vaʼerã” (1 Ped. 1:22; 4:8). Ñande ñaiméva Jehová puévlope ningo ñanediferénte. ¿Mbaʼérepa? Pórke jajoayhueterei. Avei jahayhu Jehovápe ha ñaneñeʼẽrendu chupe. Upévare haʼe omeʼẽ ñandéve ijespíritu sánto. Ko fuérsa ipoderosovéva oĩva ko univérsope, ñanepytyvõ ñaime hag̃ua unído ñane ermanokuéra opa tetãygua ndive (1 Juan 4:20, 21). w15 15/11 4:8, 9

Jehová nañandeovligái ñaaprende hag̃ua peteĩ idióma, ikatu hag̃uáicha jaikuaa chupe ha jaikuaa ipromesakuéra (Apoc. 7:9, 10). Yvyporakuéra ningo oñeʼẽ heta idiómape, péro upéva ndeʼiséi Jehová ndaikatuiha oñekomunika enterovévandi. Haʼe voi otradusika Iñeʼẽ heta idiómape. Por ehémplo, umi mbaʼe Jesús heʼi vaʼekue ojetradusipa lénto. Mbovymi palávrante ojeheja la Bíbliape pe idióma haʼe oñeʼẽ haguépe (Mat. 27:46; Mar. 5:41; 7:34; 14:36). Jehová oñenkarga ikatu hag̃uáicha Jesús enseñánsa ojeskrivi ha ojetradusi griégope, ha upéi hetave idiómape. Avei Ñandejára mensáhe osegi ojekuaa opárupi, pórke umi hudío ha kristianokuéra ojapo heta kópia la Bíbliagui, ha koʼã kópiagui ojetradusi heta idiómape. Upéi, 400 áñorupi d.C., peteĩ eskritór rrelihióso hérava Juan Crisóstomo heʼi lívro de Mateo, Marcos, Lucas ha Juan ojetradusimaha umi idióma oñeñeʼẽvape Siria, Egipto, India, Persia, Etiopía ha hetave lugár rupi. w15 15/12 1:10, 11

Ñañeʼẽramo hendapeʼỹ, ikatu hína umi hénte nontendéi térã ndoaseptái la jaʼéva. Por ehémplo, marzo de 2011-pe oiko peteĩ terremóto ha sunámi Japónpe, ha sarambi ojapo heta siudápe opytáva éste gotyo. Omano mas de 15.000 persóna. Heta ñane ermáno operde ihénte ha iñamigokuéra. Upéicharõ jepe, haʼekuéra oipytyvõse ivesinokuérape la Biblia rupive. Péro koʼã ermáno ohechakuaa oñeʼẽ reitaha gueteri umi héntepe pe rresurreksiónre. ¿Mbaʼérepa? Pórke la majoría vudísta ha ndoikuaaguasúi hikuái la Biblia. Upévare umi ermáno ñepyrũrã oñehaʼãnte okonsola umi héntepe, ha oexplika chupekuéra mbaʼérepa oiko umi mbaʼe vaiete umi persóna ivuénovare. w15 15/12 3:7

Heta persóna térã emprésa ikatu heʼi ñandéve orekoha peteĩ tratamiénto ñanemonguerátava. Péro oĩ heta umi ojapóva peichagua propagánda ogana hag̃uánte pláta. ¡Ñañatendékena! Ndovaléi ñatantea oimeraẽ mbaʼe ojeʼéva ñandéve, ñaime porãségui rei térã ñapenságui jaiko arevetaha. Ñanearandu ha ñapensa porãramo, ndajajapomoʼãi oimeraẽ mbaʼe ojeʼéva ñandéve, koʼytevéntema heʼíramo peteĩ persóna ndahaʼéiva peteĩ profesionál. Iporã ñañeporandu: “¿Añetehápepa ko tratamiénto, vitamína térã pohã naturál oipytyvõma heta persónape omehora hag̃ua? Ha oiméramo ideprovécho ótrope, ¿mbaʼérepa apensa ojapo porãtaha cherehe avei? ¿Tekotevẽpa ainvestigave ha aporandu raẽ peteĩ doktórpe?” (Deut. 17:6). w15 15/12 4:14, 15

Pablo oikuaa jaagradeséramo Jesús ñanderayhu haguére, jahayhúta ha ñambotuichataha avei chupe. Ñantende porãramo Jehová ojapo vaʼekue ñanderehehápe, jaikóta Jesús oipotaháicha jaiko. ¿Mbaʼéichapa jajapo upéva? Jesús oheja ñandéve ehémplo ‘jaguata hag̃ua hekoitépe ipyporére’ (1 Ped. 2:21; 1 Juan 2:6). Ñaneñeʼẽrendúramo Ñandejárape ha Crístope, jahechauka hína jahayhuha chupekuéra. Jesús heʼi vaʼekue: “Pe oguerovia ha ojapóva che mandamiénto, upéva cherayhu hína. Che Ru ohayhúta upe cherayhúvape ha che avei ahayhúta chupe” (Juan 14:21; 1 Juan 5:3). Iporã ñañeporandu: “¿Mbaʼéichapa asegi hína koʼág̃a Jesús ehémplo? ¿Mbaʼépepa ikatu amehorave?”. Tekotevẽ ningo jajepyʼamongeta koʼã mbaʼére, pórke ko múndo aña ñandejopy jaiko hag̃ua umi hénte oikoháicha (Rom. 12:2). w16.01 2:7-9

¿Nekyreʼỹetevépa heta ermánogui repredika hag̃ua? ¿Restudiasetereípa la Biblia ha reaprendese “umi mbaʼe ipypukuvéva oúva Ñandejáragui”? (1 Cor. 2:10). ¿Haʼetépa ndéve Jehová ovendesiha de fórma espesiál umi mbaʼe rejapóva iservísiope? ¿Nekyreʼỹeterei voípa rejapo hag̃ua Ñandejára rembipota? ¿Rehayhúpa umi héntepe ha rejapo opa ikatúva reipytyvõ hag̃ua chupekuéra ikatu hag̃uáicha oikuaa Ñandejárape? ¿Rehechakuaápa Jehová nepytyvõ hague espesífikamente heta vése? Oiméramo rehechakuaa koʼã mbaʼe oikopaiteha nderehe, ¿heʼisépa nde haʼeha peteĩ unhído? Nahániri, pórke ndahaʼéi umi unhídorente oikóva koʼã mbaʼe. Pe espíritu sánto ikatu avei ombaʼapo upéicha entéro kristiánore, tahaʼe ohótaramo yvágape térã oikótarõ ko yvy ape ári. Añetehápe, oiméramo reduda hína, nde ndahaʼéi unhído. w16.01 3:14, 15

Jesús kyreʼỹme ombaʼapo Ñandejárandi, oñeñandu porã umi mbaʼe ohupytývare, ha ovyʼa Itúva ohayhu haguére chupe. Jesús heʼi vaʼekue javyʼaha ñameʼẽ ha jarresivi jave (Hech. 20:35). Katuete ningo javyʼaiterei kuri jaikuaa ypýrõ guare Jehovápe. Avei javyʼa ñamombeʼúvo umi héntepe umi mbaʼe ñaaprendéva. Heta persóna oikuaaséva Ñandejárape oñepyrũ ostudia la Biblia. Upéi, mbeguekatúpe ontende ha ovalorave umi mbaʼe oaprendéva, ha okambia ohóvo. ¡Ajépa ñanembovyʼaite upéva! Pe predikasión ningo iñimportanteterei, pórke omeʼẽ oportunida umi héntepe oñemoĩ porã hag̃ua Ñandejárandi ha oikove hag̃ua opa árare (2 Cor. 5:20). Añetehápe, ndaipóri ótro traváho ñanembovyʼavéva upévagui. w16.01 5:6, 7