Octubre

Jesús orresusita rire, Jehová oñepyrũ oiporavo ijespíritu sánto rupive umi kristiánope oho hag̃ua yvágape. Amalisia síglo primérope entéro umi kristiáno haʼe vaʼekue unhído. Péro upéi, amáske ohasa pe tiémpo heta hetave oĩ umi heʼínteva ijehe kristianoha, péro añetehápe ndahaʼéi. Upéicharõ jepe, oĩ avei umi kristiáno verdadéro ha Jehová oiporavo chupekuéra ijespíritu sánto rupive, ha oiko chuguikuéra unhído. Koʼãvape Jesús okompara vaʼekue pe trígore, okakuaátava umi ñana apytépe (Mat. 13:24-30). Koʼã ára pahápe, Jehová osegi ombyaty umi kristiánope okompleta hag̃ua ohóvo pe grúpo de 144.000 unhído. Jehová osegíramo oiporavove ko tiémpope unos kuánto unhído, ñande ni mbaʼevéicharõ nañapensamoʼãi upéva oĩ vaiha (Is. 45:9; Dan. 4:35; Rom. 9:11, 16). Jesús omoĩ vaʼekue peteĩ ehémplo oñeʼẽva unos kuánto kuimbaʼe ombaʼapóvare, péro ojekeháva ipatrón opaga haguére chupekuéra la mísma kantida opagáva umi ótro saʼive ombaʼapóvape. ¡Aníkena ñande jajogua chupekuéra! (Mat. 20:8-15.) w16.01 4:15

Ñane tiémpope Jehová ndojeruréi ñandéve jasakrifika hag̃ua ñane famíliape. Péro si oipota ñaneñeʼẽrendu chupe. Por ehémplo, sapyʼánte ikatu ojerure ñandéve peteĩ mbaʼe nañantendeporãiva, térã haʼetévaicha ijetuʼuetereítava ñakumpli hag̃ua. Osino ikatu ñaneotĩeterei ha upévare ñandeforsa japredika hag̃ua. Algúno katu okyhyje ohechauka hag̃ua idiferenteha ikompañéro de traváhogui térã de eskuélagui (Éx. 23:2; 1 Tes. 2:2). ¿Mbaʼépa ikatu jajapo oiméramo ñañeñandu péicha? Iporãta ñapensáramo Abrahán ehémplore. Haʼe ningo ojeroviaiterei vaʼekue Jehováre ha ipyʼaguasu. Ñamboykéramo tiémpo jajepyʼamongeta hag̃ua umi kuña ha kuimbaʼe iñeʼẽrendúva ehémplore, ñañemoag̃uivéta Jehováre (Heb. 12:1, 2). w16.02 1:3, 14

Saúl heʼírõ guare ojukaseha Davídpe, Jonatán odesidímante vaʼerã mávapepa oapojáta: itúape térãpa Davídpe. Upe desisión ningo ijetuʼueterei, pórke haʼe mokõivévapente ohayhu. ¿Mbaʼépa oipytyvõ Jonatánpe? Haʼe oikuaa Ñandejára oipytyvõha Davídpe, péro orrechasa hague Saúlpe. Upévare, odesidi oapojataha Davídpe. Ñepyrũrã oavisa Davídpe mbaʼépa ojapose itúa, ha heʼi chupe okañy hag̃ua. Ha upéi ojerure Saúlpe animínte hag̃ua ojuka Davídpe (1 Sam. 19:1-6). Jahayhúramo Ñandejárape, ñande avei ñamotenondevéta Jehovápe oimeraẽ mbaʼégui, tahaʼe peteĩ club deportívo, ñande eskuéla téra ñande país. Ñapensamína Henry ehémplore. Haʼe ohuga ahedrés peteĩ ekípo ijeskuelapeguápe ha ojedesidíma oganataha pe kampeonáto. Péro oipurueterei rupi itiémpo opraktika hag̃ua káda fin de semána, naitiempovéi osẽ hag̃ua opredika ni oho hag̃ua rreunionhápe. Peteĩ día oñemeʼẽ enkuénta omotenondeveha ijeskuélape Jehovápe rangue. Upévare odesidi osẽ pe ekípo de ahedrésgui (Mat. 6:33). w16.02 3:10, 12

Oiméramo nde nemitã, ¿mbaʼérepa rejevautisase? Reikuaa hag̃ua upéva, iporã repensa mbaʼéichapa reñemboʼe hína. Eñeporandumína: “¿Añemboʼépa Jehovápe heta vése, térãpa sapyʼapyʼánte? ¿Amombeʼúpa chupe espesífikamente la apensáva ha añandúva?”. Koʼã mbaʼe nepytyvõta rehechakuaa hag̃ua reikópa hína Ñandejára amígoramo (Sal. 25:4). Heta vése Jehová orresponde ñane ñemboʼe la Biblia rupive. Upéicharõ, iñimportánte rejeasegura restudia porãpa hína la Biblia (Jos. 1:8). Eñeporandumi: “¿Ajepokuaápa astudia cheaño la Biblia káda semána? ¿Igústopa chéve apartisipa pe estúdio de famíliape?”. Koʼã pregúnta nepytyvõta rehecha hag̃ua oimépa rejevautisase reserviségui Jehovápe nde pyʼaite guive. w16.03 1:11, 13

Javyʼaiterei ningo káda áño jalee jave Anuáriope umi mbaʼe porã ojehupytýva oparupiete predikasiónpe. Umi asambléa tres diagua ñanepytyvõ avei ñaime hag̃ua unído. Ha pe asambléa aja katu enterovéva ñahendu la mísma informasión. Umi diskúrso, demostrasión ha dráma ñanemokyreʼỹ jaservi hag̃ua Jehovápe ñande pyʼaite guive. Pe Konmemorasión ñanepytyvõ avei ñaime hag̃ua unído. Unas kuánta semána upe mboyve, entéronte jaha ñainvita umi héntepe ko rreunión iñimportantetévape g̃uarã. Upéi entéro Testígo ñañembyaty jagueromanduʼa hag̃ua ko akontesimiénto el mísmo día, el 14 de nisán, oike rire kuarahy (1 Cor. 11:23-26). Péicha ñakumpli Jesús mandáto ha jahechauka Jehovápe jaagradeseha chupe pe ojapo vaʼekuére ñanderehehápe. Ñaneañónte ndaikatumoʼãi japredika ko yvy tuichakuére. Péro ojapoháicha umi tuku, entéro ñañomoirũ ñambaʼapo hag̃ua. Upéicha rupi ñañeʼẽ Jehováre hetaiterei persónape, ha ñaipytyvõ chupekuéra ikatu hag̃uáicha omombaʼeguasu avei chupe. w16.03 3:4, 6, 7

Umi ansiáno omboʼéva ótro ermánope, ohechauka vaʼerã chupe tekotevẽha okumpli itraváho la Biblia voi ohechaukágui iñimportanteha ojapo upéva, ha ndahaʼéi peteĩ ansiáno heʼi haguérente chupe. Por ehémplo, renkargátaramo peteĩ ermánope omopotĩ ha omokã hag̃ua jepi pe Salón entráda, ikatu relee chupe Tito 2:10 heʼíva. Upéicha pe ermáno ohechakuaáta iñimportanteha okumpli upe traváho ikatu hag̃uáicha umi persóna og̃uahẽva Salón del Réinope oñeʼẽ porã ñanderehe ha oguerohory “Ñandejára omboʼéva”. Ikatu avei ere chupe umi ermáno ijedáva ikatuha ojapeligra pe entráda hykuepáramo ha upévare iñimportanteha avei ojapo upe traváho. Péicha reñeʼẽramo pe ermánope, haʼe opensáta mbaʼéichapa pe itraváho ovenefisia ótrope, ha ndojapomoʼãi okumpli hag̃uánte. Avei katuete ovyʼáta ikatu haguére oipytyvõ ótrope. Efelisitákena pe ermánope osegi jave umi konsého remeʼẽva chupe. ¿Mbaʼérepa iñimportánte rejapo upéva? Pórke péicha remokyreʼỹ ha reipytyvõta hína chupe oprogresa hag̃ua, haʼetéta ku plánta ojerrega porãva. Refelisitáramo pe ermánope, katuete ojapo porãitereíta hese. w15 15/4 2:7, 8

¿Reñeñandúpa sapyʼánte neaño rehasa jave peteĩ situasión ijetuʼúva? Ikatu oime reperde nde traváho, rereko provléma eskuélape térã koléhiope, nderasykatu térã ereko ótro provléma. Ha ikatu reñembyasy rehechávo avave nanepytyvõiha. Péro jaikuaaháicha, oĩ voi umi provléma yvypóra ndaikatumoʼãiva osolusiona. ¿Mbaʼépa ikatu rejapo upéicha jave? La Biblia ñanemokyreʼỹ ‘jajerovia hag̃ua Jehováre’ (Prov. 3:5, 6, NM). ¿Ikatúpa jajerovia hese? Si ikatu. La Biblia omombeʼu heta istória ohechaukáva Ñandejára añetehápe oipytyvõha isiervokuérape. Oiméramo neprovléma ha avave nanepytyvõi, ani rejepyʼapy. Esegi Pablo ehémplo ha eaprovecha upéva rehechauka hag̃ua rejeroviaha Jehováre nde pyʼaite guive. Eaprovecha avei upe situasión rekomprova hag̃ua mbaʼéichapa Ñandejára oñangareko nderehe rehasa jave umi mbaʼe ijetuʼúva. Umíva katuete omombaretéta nde jerovia ha ne amista Jehovándi. w15 15/4 4:3-5

Satanás ombotavy umi héntepe ikatu hag̃uáicha oñemoĩ hikuái Jehová kóntrape (1 Juan 4:8). Oroviaka umi héntepe ‘noikotevẽiha Ñandejárare’ ha natekotevẽiha oiko iñamígoramo (Mat. 5:3). Satanás “omohesatũ chupekuéra” ani hag̃ua oikuaa Jehovápe. Jehová oipota jaadora chupe añoite, ha Satanás oikuaa upéva (Éx. 20:5). Upévare opaicharei oñehaʼã ombotavy yvyporakuérape, ha koʼýte ojevale umi rrelihión fálsare. Ovyʼa voi ohechávo umi hénte oadoraha iñantepasadokuérape, pe naturalésa, animalkuéra, térã ambue mbaʼe, ndahaʼéima guive Jehovápe. Umi persóna ojapóva koʼã mbaʼe oimoʼã Ñandejára oguerohoryha chupekuéra, péro añetehápe ndovaléi mbaʼeverã umi mbaʼe ogueroviáva ni umi rrituál osegíva hikuái. Upévare Jehová oñehaʼãmbaite oipytyvõ koʼãichagua héntepe. Heʼi chupekuéra: “¿Mbaʼérepa pemombopa rei pene rembiapo repykue pejogua hag̃ua umi mbaʼe napenemoryg̃uatãiva? Pehendu porãna la haʼéva peẽme, ha peʼúta umi mbaʼe iporãva” (Is. 55:2, NM). w15 15/5 1:14, 15

Abel ningo ndoikuaái mbaʼeichaitépa oñekumplíta upe promésa, péro oime vaʼerã heta opensa hese. Por ehémplo, oiméne oñeporandu raʼe mávapepa oisuʼúta pe mbói, ha oikuaase mávapa oipytyvõta yvyporakuérape iperfékto jey hag̃ua. Koʼã mbaʼe opensáva omeʼẽne raʼe chupe esperánsa. Upévare, haʼe oikuaveʼẽrõ guare peteĩ sakrifísio, Jehová oguerohory upéva (Gén. 4:3-5; Heb. 11:4). Noé ojeroviaiterei kuri opa mbaʼe Jehová oprometévare. Upévare haʼe ojesalva oúrõ guare pe Ama Guasu (Heb. 11:7). Ojerovia rupi, Noé oikuaveʼẽ peteĩ ofrénda Jehovápe pe Dilúvio rire (Gén. 8:20). Tiémpo riremínte, ko múndo henyhẽte jeýma umi iñañávagui. Peteĩ kuimbaʼe hérava Nemrod oñepyrũ ogoverna ha omboliga umi héntepe opuʼã hag̃ua Ñandejára kóntrape (Gén. 10:8-12). Upéicharõ jepe, Noé osegi ojerovia Jehováre. Ojapo haguéicha Abel, haʼe oñeimahina mbaʼéichapa ojeikóta ág̃a Jehová oipeʼa vove pe pekádo ha ñemano. Ha oiméne opensa avei mbaʼéichatapa ndaiporivéi vove umi governánte aña. Ñande avei ikatu ñañeimahina mbaʼéichapa jaikóta og̃uahẽ vove upe tiémpo (Rom. 6:23). w15 15/5 3:4, 6

Jaikóramo jajepyʼapyháre ikatu jaju ñanderasy ha ikangy ñande fe. Jajeroviákena Jehováre ha ñanemanduʼa pe téxto kostediaguáre. ¿Mbaʼépa ikatu rejapo oiméramo rejepyʼapyeterei reikóvo? Reñemongeta vaʼerã peteĩ Testígo ndekuaa porãvandi, ikatu hína nde tuvakuéra, ne ména térã ne rembireko, ỹrõ peteĩ ne amígo ojepyʼapýva nderehe. Haʼekuéra nepytyvõta rejerovia hag̃ua Jehováre ha anivéma hag̃ua rejepyʼapy. Jehová ningo ontende porãiterei mbaʼéichapa ñañeñandu, ha ikatu ñanepytyvõ jajepyʼapyeterei jave. Pablo heʼi vaʼekue: “Ani pejepyʼapyeterei mbaʼevére, síno opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe. Ha Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare, Cristo Jesús rupive” (Filip. 4:6, 7). Upéicharõ, oiméramo rejepyʼapyeterei reikóvo, repensa vaʼerã Jehová omeʼẽha ndéve heta mbaʼe resegi hag̃ua reiko iñamígoramo. Por ehémplo, haʼe ojevale umi ermáno kongregasionguáre, umi ansiánore, pe tembiguái jeroviaháre, umi ánhel ha Jesúsre nepytyvõ hag̃ua. w15 15/5 4:16, 17

Jerusalénpe oĩ peteĩ piléta ikonosidoitereíva hérava Betzata, opytáva nórte gotyo pe témplogui. ¿Mbaʼérepa hetaite hénte ohómi vaʼekue pe pilétape? Haʼekuéra oimoʼã okuerataha milagrósamente ojahúramo upépe. Péro Jesús oho upépe ohayhu rupi umi héntepe. Ha upe lugárpe ohecha kuri pe kuimbaʼe hasývape, ndaikatúiva oguata ojapóma 38 áño (Juan 5:6-9). Jesús oporandu pe kuimbaʼépe okuerasépa. Pe karai anga heʼi okueraseha, péro ndaiporiha avave oipytyvõ vaʼerã chupe oike hag̃ua pe pilétape. Upémarõ Jesús heʼi ko kuimbaʼépe ojapo hag̃ua peteĩ mbaʼe haʼetévaicha ndaikatumoʼãiva ojapo. Heʼi chupe: “Epuʼã, ejagarra nde rupa ha tereho”. ¿Mbaʼépa ojapo pe karai? Opuʼã, ojagarra ikamílla ha oguata. Ko milágro ñanemopensa umi milágro Jesús ojapótavare Ñandejára múndo pyahúpe. Avei ñanemboʼe haʼe ohayhuetereiha umi persónape. Jesús oho kuri pe pilétape oheka hag̃ua mávapa oikotevẽve ajúda. Ñande avei jasegi vaʼerã iñehémplo ha jaha japredika umi hénte ojepyʼapýva ha ohasa asývape. w15 15/6 2:8-10

Jesús omoñepyrũ pe orasión del padrenuéstro heʼívo: “Ore Ru”. Upéva ñanemomanduʼa Jehová haʼeha ñande Túva ha avei ‘enterove ermáno’ oĩva ko yvy tuichakuére Túva (1 Ped. 2:17). Umi kristiáno unhído heʼi Jehovápe “che Ru”, pórke haʼe oadoptáma chupekuéra itaʼýra teerã (Rom. 8:15-17). Péro umi kristiáno oikótava ko yvy ape ári opa árare, ikatúnte avei heʼi Jehovápe “Ore Ru”. ¿Mbaʼéicha rupípa? Pórke Jehová omeʼẽ chupekuéra vída ha opa mbaʼe oikotevẽva. Ha ág̃a ohupyty vove hikuái perfeksión ha ohasa pe última pruéva, oikóta avei chuguikuéra Ñandejára raʼy tee (Rom. 8:21; Apoc. 20:7, 8). Umi túva oservíva Jehovápe ikatu omeʼẽ ifamíliape peteĩ rregálo ijojahaʼỹva. ¿Mbaʼépa hína upéva? Omboʼe chupekuéra Jehová haʼeha avei Itúva, ha ohechauka chupekuéra mbaʼéichapa oñemboʼe vaʼerã. Jahechaháicha, tuvakuéra omboʼe vaʼerã ifamíliape Jehová haʼeha peteĩ persóna rreál ha ikatuha oiko chuguikuéra iñamígo. w15 15/6 4:4-6

¿Mbaʼéichapa jahechaukáta jaipotaha Jehová ‘ñandepeʼa pe ivaívagui’? Upearã ‘ndajajeheʼái vaʼerã ko múndore’, ni ndajahayhúi vaʼerã “umi mbaʼe oĩva ipype” (Juan 15:19; 1 Juan 2:15-17). ¡Ajépa javyʼaitéta Jehová ohundi vove Satanás ha imúndope! Péro upéva oiko mboyve, Satanás ojapóta ikatúva guive ani hag̃ua jaservi Jehovápe, pórke “orrenegaiterei hína oikuaágui mbykypaitemaha itiémpo”. Upévare jasegi vaʼerã jajerure Jehovápe ani hag̃ua Satanás ñanemoñuhã (Apoc. 12:12, 17). Jahechaséramo mbaʼéichapa Jehová ñandepeʼáta opaichagua jehasa asýgui, jasegi vaʼerã jajerure chupe tou Irréino, toñemopotĩ héra ha tojejapo hembipota ko yvy ape ári. Jajerovia vaʼerã Jehová nombofaltamoʼãiha ñandéve mbaʼeve ha ñanepytyvõtaha jasegi hag̃ua ñaneñeʼẽrendu chupe (Mat. 6:9-13). w15 15/6 5:12, 17, 18

¿Mbaʼépa oikóta pe jehasa asy guasúpe? Ndajaikuaaporãi gueteri. Péro ikatu hína heta mbaʼe ijetuʼuve ha tekotevẽta jajapo heta sakrifísio. Por ehémplo, Jerusalén oñehundi mboyve, umi kristiáno oheja kuri hóga ha ombohovái hetaiterei situasión ijetuʼúva ikatu hag̃uáicha ojesalva (Mar. 13:15-18). Upévare ñañeporandu vaʼerã: “¿Ambyasýtapa tekotevẽramo aheja umi kósa materiál térã ojepeʼáramo chehegui? ¿Aimépa dispuésto aaguantávo oimeraẽ mbaʼe cheñeʼẽrendu hag̃ua Jehovápe?”. Ñanemanduʼa vaʼerã upe tiémpope ñande añoite jaadoráta Jehovápe toiko la oikóva, ojapo haguéicha proféta Daniel (Dan. 6:10, 11). Pe gran trivulasión aja ndajapredikamoʼãvéima umi “marandu porã oñeʼẽva Ñandejára Rréinore”, pórke pe fin og̃uahẽtama (Mat. 24:14). Péro japredikáta pyʼaguasúpe peteĩ mensáhe de kondéna ndogustamoʼãiva umi héntepe. Posívlemente jaʼéta hína chupekuéra Satanás múndo oñehunditamaha. w15 15/7 2:3, 8, 9

Jesús heʼi vaʼekue oĩtaha ndaijaʼéiva ñanderehe upe haguére. Ani ñanderesarái la majoría umi hénte ndoikuaaiha mbaʼeve Ñandejára goviérnogui. Upévare nontendéi hikuái mbaʼérepa iñimportanteterei ñandéve jaapoja Jehová goviérno añoite. Jaapojaséramo Jehová goviérno, ñañehaʼãmbaite vaʼerã siémpre ñaneñeʼẽrendu chupe, tahaʼe haʼéva ojeʼéva térã ojejapóva ñanderehe (Dan. 3:16-18). Ikatu ningo umi imitãvévape ijetuʼu ohechauka hag̃ua idiferenteha hapichakuéragui. Por ehémplo, ikatu voi okyhyje ojejopy jave chupekuéra omombaʼe hag̃ua pe vandéra, térã opartisipa hag̃ua umi aktivida ojejapóvape oñembotuicha hag̃ua hetã. Upévare, isy ha itúva oipytyvõ vaʼerã chupekuéra ikatu hag̃uáicha odefende ijerovia eskuélape. Pejapo jave pene adorasión en família, peñemongeta ha pehecha mbaʼépa Jehová opensa koʼã mbaʼére. Ikatu avei pemboʼe chupekuéra oexplikakuaa hag̃ua umi mbaʼe ogueroviáva, ha tekotevẽha opororrespeta ojapóvo upéva (Rom. 1:16). Ha oiméramo tekotevẽ, peñeʼẽ iprofesorkuérandi peexplika hag̃ua chupekuéra umi mbaʼe pegueroviáva. w15 15/7 3:15, 16

Jehová ohechauka avei ñanderayhuha ontregávo Itaʼýra sakrifísioramo. Ñandejára omeʼẽ ñandéve ko rregálo “ikatu hag̃uáicha [Jesús] rupive jahupyty pe jeikove” (1 Juan 4:9). Apóstol Pablo heʼi vaʼekue: “Cristo omano iñañáva rehehápe. Haʼe ojapo upéva ñande pekadór aja gueteri. Hasy hína oĩ hag̃ua omanóva peteĩ hekojojáva rehehápe, péro añetehápe ikatu oĩ omanoséva peteĩ ivuénova rehehápe. Ñandejára katu ohechauka ñanderayhuha, Cristo omanóvo ñande rehehápe ñande pekadór aja gueteri” (Rom. 5:6-8). Jehová omeʼẽvo Itaʼýra sakrifísioramo ohechauka pe mborayhu tuichavéva. Avei péicha jareko oportunida jaiko hag̃ua iñamígoramo. Jesús sakrifísio ohechauka Jehová ohayhuetereiha entéro yvypórape. Jasegíramo ñaneñeʼẽrendu Ñandejárape, ikatúta jadisfruta heta mbaʼe porã jaiko vove pe paraísope. ¡Ajépa javyʼaite jaikuaávo upéva! Añetehápe, Jehová omeʼẽvo Itaʼýrape omano hag̃ua ñande rehehápe ohechauka pe mborayhu tuichavéva. Upévare, jasegíkena jahechauka jaagradeseha chupe ñande pyʼaite guive. w15 15/8 1:13, 15

¡Ajépa tuichaite priviléhio jarekóta pe paraísope jaservi vove Ñandejárape Irréino poguýpe! Upévare, koʼág̃a guivéma kyreʼỹme jaapoja vaʼerã iñorganisasión. Péro ikatu sapyʼánte ojejerure ñandéve jaha hag̃ua jaservi ótro lugárpe. Por ehémplo, heta ermáno oservi vaʼekuépe Betel de Estados Unídospe, ojejerure oho hag̃ua oservi kómo prekursór ótro lugárpe. Ha heta superintendénte viahántepe oñeasigna oservi hag̃ua kómo prekursór espesiál, ijedáma rupi térã ambue mbaʼére. Entéro koʼã ermáno ovyʼa iñasignasión pyahúre, ha Jehová ovendesi chupekuéra. ¿Mbaʼépa jajapo vaʼerã avei jaserviséramo Jehovápe vyʼápe ha jaipotáramo haʼe ñanevendesi? Jajerure vaʼerã chupe tañanepytyvõ. Avei jajapo vaʼerã opa ikatúva jaservi porã hag̃ua chupe ha vyʼapópe jaasepta oimeraẽ tembiapo oñemeʼẽva ñandéve (Prov. 10:22). Ikatu ningo ñañeimahináma mbaʼe lugárpepa jaikóta pe paraísope. Péro, ¿mbaʼépa jajapóta ág̃a ñaime vove upépe ha ojejeruréramo ñandéve jaiko hag̃ua ótro lugárpe? Katuete javyʼáta pe lugár ha pe traváho otokávare ñandéve. Avei jaagradesetereíta Jehovápe opermiti haguére ñandéve jaiko pe paraísope. w15 15/8 3:8

Noé tiémpope umi hénte iñañaiterei, péro haʼe arakaʼeve ndojeheʼáiva umi ndohayhúivare Jehovápe. Upéva rangue, haʼe, hembireko, umi itaʼýra ha inuerakuéra ombaʼapo oñondivepa ojapo hag̃ua pe árka. Avei Noé ‘opredika vaʼekue umi mbaʼe hekopeguáva’ (2 Ped. 2:5). Koʼã mbaʼe oipytyvõ Noé ha ifamíliape ojesalva hag̃ua oúrõ guare pe Dilúvio. ¡Ajépa jaagradesete haʼekuéra iñeʼẽrendu haguére ha ndojeheʼái haguére umi hembiapo vaívare! Upéicha rupi, ñande jaikove koʼág̃a. Umi kristiáno ypykue avei iñeʼẽrendu vaʼekue ha ndojeheʼái umi ndohayhúivare Jehovápe. Upévare haʼekuéra ojesalva Jerusalén oñehundírõ guare áño 70-pe (Luc. 21:20-22). w15 15/8 4:17, 18

Ikatu hag̃uáicha ideprovécho ñandéve umi diversión, tekotevẽ jaiporavo porã ha jahecha mboy tiémpopa jaipurúta upearã. ¿Mbaʼéichapa ñanepytyvõ ñane konsiénsia jadesidi porã hag̃ua? La Biblia heʼi ndoikemoʼãiha Ñandejára Rréinope umi “hekovaíva, hekokyʼáva, notĩriva hembiapo vai hag̃ua, omombaʼeguasúva ñandejára guaʼu, ojapóva paje, ijarhélva, ipyʼaróva, ipochy reíva, oiko vaíva ótrondi, ojoavýva, osegíva yvyporakuéra omboʼéva, iñenvidiósova, ikaʼúva, ofarreáva itarovávaicha” (Gál. 5:19-21). Upévare, iporã ñañeporandu: “¿Opermitípa chéve che konsiénsia añentretene umi depórte violéntore, térã chemoakãrakúva chefanátiko hag̃ua? ¿Opermitípa chéve che konsiénsia ahecha umi pelíkula ohechaukáva iporãrõguáicha pe inmoralida sexuál, jekaʼu térã pe espiritísmo?”. w15 15/9 2:11, 12

La Biblia heʼi Jehová nañandeapói hague jadesidi hag̃ua ñandejeheguínte mbaʼépa oĩ porã ha mbaʼépa oĩ vai. Haʼe oikuaa mbaʼépa iporãve ñandéve g̃uarã. Upéicha rupi, javyʼaséramo ha jaikoséramo pyʼaguapýpe, ñaneñeʼẽrendu ha jarrespeta vaʼerã chupe. Jehová ñanemboʼe koʼã mbaʼe pórke ñanderayhu. Umi túva ojepyʼapy ifamília renonderãre ha oipota osẽ porã hikuái. Péro la majoría umi hénte ndoikuaái mbaʼépa ohaʼarõ chupekuéra, upévare oipurupa lénto itiémpo ombaʼapo ha okonsegi hag̃ua umi mbaʼe ko múndo oikuaveʼẽva (Sal. 90:10). Péro ñande jaservíva Jehovápe jaagradese chupe ñanepytyvõ haguére javyʼa hag̃ua, ha opromete rupi omeʼẽtaha ñandéve peteĩ futúro iporãitereíva. w15 15/9 4:10, 11

Umi isrraelíta tiémpope, heta persóna oreko vaʼekue oportunida ohecha hag̃ua mbaʼéichapa Jehová oipytyvõ ipuévlope. Por ehémplo, Ñandejára ojapo heta milágro ikatu hag̃uáicha umi isrraelíta osẽ Egíptogui, ha avei ogana hag̃ua heta gérra pe Tiérra Prometídape (Jos. 9:3, 9, 10). Heta enemígo oikuaa mbaʼépa Jehová ojapo ipuévlo rehehápe. Upéicharõ jepe, norrekonoseséi Jehová oipytyvõha ipuévlope. Upévare operde pe gérra Tiémpo rire, peteĩ rréi iñañaitereíva hérava Acab ohecha kuri mbaʼéichapa Ñandejára oipytyvõ ipuévlope. Ótra vuéltape katu Elías ojerure Jehovápe ombou hag̃ua tata yvágagui, ha Jehová okontesta chupe iñorasión. Elías heʼi avei Acábpe Jehová oguerutaha peteĩ ama tuichaitereíva, ha upeichaite oiko (1 Rey. 18:22-45). Péro Acab ni mbaʼevéicharõ ndoaseptaséi Jehová ojapoha koʼã milágro. ¿Mbaʼépa ñanemboʼe ko ehémplo? Tekotevẽha ñaime aténto ikatu hag̃uáicha ñañemeʼẽ enkuénta Jehová ñanepytyvõ jave. w15 15/10 1:4, 5

Jehová ningo katuete ñanepytyvõta jajeroviáramo hese ha jajapóramo haʼe ojeruréva ñandéve. Pablo heʼi: “Ñandejára ningo oiporúma ipodér ñanderehehápe, ha pe podér rupive ikatu ojapo hetaitereive mbaʼe jajerure térã ñaimoʼãvagui” (Efes. 3:20). Ñande ñañehaʼã jaservi porã Jehovápe, péro sapyʼánte ndaikatúi jajapo heta mbaʼe. Upéicharõ jepe, ñañehaʼã jajapo opa ikatúva, ha ñakonfia Jehová ñanepytyvõtaha osẽ porãmbaite hag̃ua ñandéve entéro mbaʼe jajapóva. Jehová opromete omeʼẽtaha ñandéve opa mbaʼe jajeruréva chupe, “oĩ porãramo hembipotándi” (1 Juan 5:14). Upévare ikatu jaʼe katuete omeʼẽvetaha ñandéve fe, jajeruréramo chupe. Ñakonfiáramo ñande pyʼaite guive Jehováre, haʼe ñanevendesíta. Ha jajeruréramo chupe omombareteve hag̃ua ñande fe, haʼe katuete orrespondéta ñane orasión. Péicha ñamereséta jaiko “Ñandejára Rréino” poguýpe (2 Tes. 1:3, 5). w15 15/10 2:16-18

Jajepyʼamongeta meméramo Jehová ha Jesúsre, oikóta ñandehegui kristiáno madúro ha jajerovia mbaretéta (Heb. 5:14; 6:1). Nañanemanduʼaguasúiramo Jehováre katu, saʼi saʼípe ñañemomombyrýta chugui ha ndahaʼevéitama ñane amígo (Heb. 3:12). Jesús ñandeavisa vaʼekue ndajaaseptáiramo ‘ñande pyʼaite guive’ Ñandejára Ñeʼẽ, jajutaha ‘jajepyʼapyeterei ñane remikotevẽre, ha jaikotaha pláta ha vyʼarã rapykuéri’. Ha oikóramo upéva ñanderehe, katuete ñañemomombyrýta Jehovágui (Luc. 8:14, 15). Upévare iñimportanteterei káda día jajepyʼamongeta la Biblia heʼívare, ha koʼẽ koʼẽre jaikuaave jahávo Jehovápe. Upéva ñanepytyvõta jasegi hag̃ua iñehémplo (2 Cor. 3:18). Jasegíramo ñaaprende Jehovágui, jaikuaa porãvéta mbaʼeichagua persónapa haʼe ha ikatúta ñahaʼanga chupe jaikove aja pukukue. ¡Ajépa tuichaite mbaʼe upéva! (Ecl. 3:11). w15 15/10 4:13, 14

Peẽ sy ha túa ningo katuete peipota pene famíliagui oiko Jehová amígo. Ha Jehová voi omeʼẽ peẽme pe rresponsavilida pemboʼe ha pekorrehi hag̃ua chupe (Efes. 6:4). Upévare siémpre pehekomboʼe vaʼerã pene famíliape la Biblia heʼiháicha. Pepensamína: ¿Mbaʼérepa pemondo pene famíliape eskuélape? Pórke peikuaa pe edukasión orresivíva upépe ideprovechotaha chupe. Upéicharõ, koʼytevéntema pejeasegura vaʼerã ani hag̃ua ofalta rreunionhápe, asambleahápe ha pende estúdio de famíliape. Pemanduʼákena umi mbaʼe oaprendéva Jehovágui ikatuha osalva chupe. Upévare, peipytyvõkena pene famíliape odisfruta hag̃ua ostudiávo la Biblia. Péicha haʼe ohechakuaáta Jehová ikatuha oipytyvõ chupe odesidi porã hag̃ua. Avei pemboʼe vaʼerã chupe iñimportanteha pe predikasión. Jesús oipytyvõ haguéicha idisipulokuérape, iporãta peipytyvõramo pene famíliape odisfruta hag̃ua oñeʼẽ jave umi héntendi la Bíbliagui. w15 15/11 2:6

Jehová odesidi vaʼekue pe ména omoakã vaʼerã hogapy. Péro upéva ndeʼiséi haʼe ikatuha otrata vai hogayguakuérape, Jehová oipota otrata mborayhúpe chupekuéra. La Biblia voi heʼi ména omoakã vaʼerãha hembirekópe. Péro heʼi avei ‘omombaʼe vaʼerãha chupe’ (1 Ped. 3:7). ¿Mbaʼéichapa menakuéra ikatu ohechauka omombaʼeha hembirekópe? Oñangareko porãvo hese, ha ikatúma guive omotenondévo chupe. La Biblia heʼi: “Menakuéra, pesegíkena pehayhu pene rembirekópe, Cristo ohayhu haguéicha pe kongregasión ha omeʼẽ hekove hesehápe” (Efes. 5:25). Jesús ningo ohayhueterei vaʼekue idisipulokuérape, upévare hekove jepe omeʼẽ hesehapekuéra. Menakuéra osegíramo Jesús ehémplo ha mborayhúpe otrata hembirekópe, katuete pe tembirekópe ifasilvéta avei ohayhu, orrespeta ha oapoja hag̃ua iménape umi mbaʼe odesidívape (Tito 2:3-5). w15 15/11 4:6, 7

Hetavévo ohóvo umi kristiáno, hetavéma avei umi oñeʼẽva griégo ha saʼivéma oĩ oñeʼẽva evréo. Ha oñeñeʼẽve rupi idióma griégope, umi lívro de Mateo, Marcos, Lucas ha Juan ojeskrivi kuri ko idiómape. Umi kárta Pablo oskrivi vaʼekue ha ambue lívro oĩva la Bíbliape, ojeskrivi avei griégope. Umi kuimbaʼe oskrivi vaʼekue Escrituras Griegas ningo osita avei unos kuánto téxto Escrituras Hebréasgui. Péicha jave haʼekuéra pyʼỹinte oipuru pe Septuaginta, pórke ko Biblia ojetradusíma voi griégope. Péro sapyʼánte umi palávra oipurúva hikuái pe Septuagíntagui, noĩri pe Escrituras Hebreas orihinálpe oĩ hagueichaite. Upéicharõ jepe, koʼã traduksión ojapo vaʼekue umi kuimbaʼe imperfékto, koʼág̃a ojepuru avei Ñandejára Ñeʼẽme. ¿Mbaʼépa ñanemboʼe upéva? Jehovápe g̃uarã ndaiporiha idióma térã kultúra iñimportantevéva (Hech. 10:34). w15 15/12 1:8, 9

La Biblia heʼi oĩha tiémpo “oñekirirĩ hag̃ua” (Ecl. 3:7). Upéva heʼise oĩha moménto tekotevẽhápe ñakirirĩ. Por ehémplo, oĩ jave peteĩ persóna oñeʼẽva, jahechaukáta jarrespetaha chupe ñahendu porãvo umi mbaʼe heʼíva (Job 6:24). Avei, jaikuaáramo ndovaleiha ñamombeʼu peteĩ mbaʼe, nañañeʼẽi vaʼerã ótrondi upe témare (Prov. 20:19). Ha oĩ jave heʼíva peteĩ mbaʼe nañandegustáiva, ñañehaʼã vaʼerã ñañetrankilisa ha ñakirirĩnte (1 Ped. 3:10, 11). Péro oĩ avei tiémpo “oñeñeʼẽ hag̃ua” (Ecl. 3:7). Por ehémplo, ikatu ñañeʼẽ ñambotuicha hag̃ua Jehovápe, ñamokyreʼỹ hag̃ua ótrope, ñamombeʼu hag̃ua ñane remiandu, térã jaʼe hag̃ua mbaʼépa ñaikotevẽ. Péicha jave jahechauka hína Jehovápe jaagradeseha chupe omeʼẽ haguére ñandéve pe kapasida ñañeʼẽ hag̃ua, ha ñañehaʼã vaʼerã jaipuru porã upe rregálo. w15 15/12 3:4, 5

Koʼág̃arupi ndaipóri ni peteĩ ermáno ikatúva ojapo milágro ‘ñanemonguera hag̃ua’ (1 Cor. 12:9). Péro oĩ umi ñanepytyvõséva ñaneresãi hag̃ua, ha omeʼẽ ñandéve konsého ndajajeruréiramo jepe chupe. Añetehápe ningo oĩ umi konsého ou porãitereíva ñandéve. Por ehémplo, Pablo heʼi vaʼekue Timoteo hoʼu hag̃ua michĩmi víno, pórke oikuaa hasyha ipyʼágui, oiméne hoʼu haguére y oñekontamináva. Péro ñañatendékena ha ani jajapo oimeraẽ mbaʼe ojeʼéva ñandéve. Sapyʼánte ningo peteĩ ermáno ikatu heʼi ñandéve jaʼu hag̃ua algún pohã votíka, pohã naturál, térã pohã ñana. Ikatu avei oĩ orrekomendáva ñandéve algúna diéta. Ikatu voi heʼi peteĩ ihénte oreko hague el mísmo provléma ñande jarekóva, ha oĩha peteĩ tratamiénto ojapo porãva hese. Péro ñañatendékena; upéva ndeʼiséi jakuerataha katuete jasegíramo el mísmo tratamiénto. Ani ñanderesarái peteĩ pohã térã tratamiénto ikatuha ou porã heta persónape, péro ótrope ikatuha ombyai (Prov. 27:12). w15 15/12 4:13

Opavave ñande ningo pekadór, upéicha rupi entéro ñaime kondenádo a muérte (Rom. 5:12). Upéicharõ jepe, Ñandejára ñanderayhueterei ha ombou Itaʼýra “omano [hag̃ua] opavave rehehápe” (Heb. 2:9). Jesús sakrifísio rupive ikatu jahupyty heta mbaʼe. Por ehémplo, yvyporakuéra nomanomoʼãvéima (Is. 25:7, 8; 1 Cor. 15:22, 26). Entéro persóna ojeroviáva Jesúsre oikóta vyʼápe ha pyʼaguapýpe opa árare. Oĩta umi oikótava yvágape Cristo ndive, ha umi ótro katu ko yvy ape ári (Rom. 6:23; Apoc. 5:9, 10). Péro oĩ hetaiteve mbaʼe ojehupytýva Jesús sakrifísio rupive. Por ehémplo, ko yvýgui oikóta peteĩ paraíso, umi hasýva okueráta, ha umi omano vaʼekue oikove jeýta (Is. 33:24; 35:5, 6; Juan 5:28, 29). ¡Ajépa jahayhuete Jehová ha Jesúspe omeʼẽ haguére ñandéve ko “rregálo ijojahaʼỹva”! (2 Cor. 9:15.) w16.01 2:5, 6

Jehová oinvita mboyve umi unhídope oho hag̃ua yvágape, haʼekuéra oreko kuri esperánsa oiko hag̃ua ko yvy ape ári opa árare. Upévare katuete oipotáne raʼe hikuái og̃uahẽ pe tiémpo Jehová ojapotahápe ko yvýgui peteĩ paraíso, ha oipeʼatahápe opaichagua inhustísia. Oime vaʼerã oñeimahina raʼe hikuái orresivívo peteĩ ihénte térã iñamígo omano vaʼekuépe. Térã opensa omopuʼã hogarã, oñemitỹ ha hoʼu iproduktokue (Is. 65:21-23). Péro, ¿mbaʼérepa okambia hikuái opensa lája? ¿Oimépa ndovyʼavéi térã osufrieterei? ¿Térãpa ikuerái oikove haguére ko yvy ape ári ha opensa ndovyʼamoʼãiha koʼápe opa árare? ¿Oime piko ohosénte yvágape oikuaa hag̃ua mbaʼéichapa ojeiko upépe? Nahániri. Jehová voi oiporavo koʼã kristiánope oho hag̃ua yvágape. Ha pe espíritu sánto rupive, okambia hikuái opensa lája ha oreko peteĩ esperánsa ipyahúva. w16.01 3:11, 13

Jehová hína pe Dios Todopoderóso, ojapo vaʼekue opa mbaʼe. Haʼe ningo pe persóna iñaranduvéva ko univérsope. Job oikuaa porã vaʼekue upéva, upéicha rupi Ñandejára oñeʼẽrõ guare chupe pe kreasiónre, haʼe heʼi: “Koʼág̃a aikuaa nde ikatuha rejapo opaite mbaʼe, ha umi mbaʼe rejaposéva guive katuete rejapóta” (Job 42:2, NM). Jahechaháicha, Jehová ikatu ojapo oimeraẽ mbaʼe ojaposéva ha noikotevẽi avave oipytyvõ chupe. Upéicharõ jepe, haʼe oporohayhúgui oinvita isiervokuérape ombaʼapo hag̃ua hendive. Jehová okrea vaʼekue Jesúspe raẽvete, ha upéi ojerure chupe ojapo hag̃ua hendive opa mbaʼe oĩva yvágape ha ko yvy ape ári (Juan 1:1-3, 18). Jehová oheja Jesús oipytyvõ chupe ojapo hag̃ua umi tembiapo ijojahaʼỹva, ha oikuaauka upéva enterovépe. ¡Ajépa tuichaite priviléhio omeʼẽ chupe! (Col. 1:15-17). w16.01 5:1, 2