Septiembre

Abrahán ojupi mboyve pe montáñape Isaac ndive, heʼi isirvientekuérape: “Pepyta koʼápe oreraʼarõ ha rohejáta avei koʼápe ore rymba vúrro. Che ha che raʼy katu rohóta amoite roadora hag̃ua Ñandejárape ha upéi roju jeýta pene rendápe” (Gén. 22:5, NM). ¿Mbaʼérepa Abrahán heʼi chupekuéra Isaac ou jeytaha hendive? ¿Ijapúpa chupekuéra? Nahániri. La Biblia heʼi Abrahán ojerovia hague Jehová ikatuha omoingove jey Isaácpe (Heb. 11:19). Abrahán oikuaa Jehová rupivénte haʼe ha Sara ou hague ifamília, pórke mokõivéva ijedáma (Heb. 11:11, 12, 18). Avei oikuaa porã Jehovápe g̃uarã ndaiporiha imposívle. Añetehápe ningo Abrahán ndoikuaái kuri mbaʼépa oikóta upe día. Péro ojerovia Jehová omoingove jeytaha Isaácpe, ikatu hag̃uáicha oñekumpli opa mbaʼe opromete vaʼekue. Upévare la Biblia heʼi Abrahán rehe haʼeha “opavave umi ojeroviáva túva” (Rom. 4:11). w16.02 1:3, 13

Jonatán ha entéro umi ótro isrraelíta ojecha vaʼekue peteĩ situasión ijetuʼúvape. Rréi Saúl “oguapy Jehová trónope”, péro ojapo heta mbaʼe vai (1 Crón. 29:23, NM). Haʼe ou naiñeʼẽrenduvéi, upévare Jehová orrechasa chupe (1 Sam. 15:17-23). Péro opermiti osegi ogoverna heta tiémpore. Upéicha rupi umi isrraelítape hasy kuri iñeʼẽrendu hag̃ua Jehovápe. Jonatán siémpre iñeʼẽrendu Jehovápe. Itúa oñepyrũrõ guare naiñeʼẽrenduvéi, Jonatán ojapo peteĩ mbaʼe ohechaukáva ojeroviaha ipyʼaite guive Jehováre. Ñande ikatu jasegi Jonatán ehémplo ñakumplívo umi goviérno omandáva. Jehová opermiti “umi mburuvicha” omanda ñanderehe, ha oipota jarrespeta chupekuéra (Rom. 13:1, 2). Upévare jarrespeta umi persóna ombaʼapóvape goviérnope g̃uarã, sapyʼánte naiñonrrádoiramo jepe hikuái, térã haʼetéramo jepe nomereseiha jarrespeta chupekuéra. Jehová oipota jarrespeta avei umi ñanemoakãvape ñande rogapýpe ha kongregasiónpe (1 Cor. 11:3; Heb. 13:17). w16.02 3:5, 6, 8

La Biblia heʼi entéro oservíva Ñandejárape, umi imitãva jepe “kyreʼỹme” ojeofresetaha oservi hag̃ua chupe. Upéicharõ, oiméramo repensa rejevautisa, ndete redesidi vaʼerã upéva. Ha koʼýte resegi vaʼerã ko konsého oiméramo rekakuaa raʼe peteĩ família kristiánape. Rekakuaávo rehóvo, oime vaʼerã rehecháma heta persóna ojevautisaha. Umíva apytépe ikatu oĩ ne amigokuéra, ne ermáno o ne ermána. Péro ani repensa nde avei rejevautisa vaʼerãha umi ótro ojevautisáma haguére térã erekógui eda upearã. ¿Mbaʼépa nepytyvõta rehecha hag̃ua pe vautísmo Jehová ohechaháicha? Iporã vaʼerã eñemotiémpo repensa hag̃ua mbaʼérepa iñimportánte pe vautísmo. w16.03 1:11, 12

Ñakumpli porãséramo ko tembiapo Jehová oenkargáva ñandéve, ñaime vaʼerã unído ha ñambaʼapo peteĩ ñeʼẽme kongregasiónpe (Efes. 4:16). Ikatu hag̃uáicha japredika heta hetave persónape tekotevẽ ñañeorganisa porã. Upearã tuicha ñanepytyvõ umi instruksión jarresivíva kongregasión rupive, por ehémplo umi rreunión ojejapóva ñasẽ mboyve japredika. Koʼã instruksión rupive ikatu japredika pe marandu porã oparupiete ko yvy ape ári. Avei ñandeprepara ñaikuaveʼẽ hag̃ua hetaiterei puvlikasión oñeguenohẽva la Bíbliagui. Sapyʼánte ojejerure avei ñandéve japartisipa hag̃ua umi kampáña espesiálpe. Péicha jave jagueraha hína el mísmo mensáhe ñane ermanokuérandi oparupiete ko yvy ape ári. Avei ñambaʼapo umi ánhel ndive, pórke haʼekuéra ñanepytyvõ japredika hag̃ua (Apoc. 14:6). w16.03 3:4, 5

La Biblia heʼi pe múndo pyahúpe ojavritaha “umi lívro” ipyahúva, orekótava instruksión pyahu. Posívlemente koʼã ‘lívrope’ oĩta umi mbaʼe Jehová oipotáva ñakumpli upe guive. Jastudia jave koʼã lívro, jaikuaáta mbaʼépa Jehová ohaʼarõ ñandehegui. Ha koʼã mbaʼe jaikuaaukáta avei umi oikove jeývape. Entéronte ñantende porãvéta mbaʼéichapa Jehová opensa. Ha ñantende porãve rupi la Biblia, jajotrata porãvéta ha jajorrespetavéta (Is. 26:9). ¡Ñañeimahinamína mbaʼe mbaʼépa ñaaprendéta ha ñamboʼéta ñande rapichápe, ñaime vove Jesucristo poguýpe pe paraísope! Jasegíramo umi instruksión “ojehaíva umi lívrope”, ha jasegíramo ñaneñeʼẽrendu pe última pruévape, Jehová ohejaitétama ñande réra ‘pe lívro jeikove reheguápe’. Upéicharõ, ikatu hína jahupyty pe vída etérna. w16.03 4:19, 20

Heta ansiáno iñexperiénsiava heʼi avei iñimportanteha oñentrena umi ermánope imitã guive, por ehémplo orekópe 13 térã 14 áño. Umívape ikatu oñemeʼẽ hembiaporã kongregasiónpe umi ikatu vaʼerãichagua okumpli a según ijeda. ¿Mbaʼérepa iñimportánte oñembokatupyry umi ermánope imitã guive? Pórke upéva oipytyvõta chupekuéra oñehaʼãmbaite hag̃ua ohupyty umi méta omoĩ vaʼekue Jehová servísiope, jepe okakuaa ohóvo ha oĩ heta mbaʼe odistraeséva chupekuéra (Sal. 71:17). Reipytyvõ hag̃ua peteĩ ermánope oprogresa hag̃ua, ani erénte chupe mbaʼépa ojapo vaʼerã, síno avei mbaʼérepa iñimportánte ojapo upéva. Péicha ojapo vaʼekue Jesús ombokatupyrýrõ guare idisipulokuérape opredika hag̃ua. Haʼe omanda chupekuéra upe tembiapo, péro avei omombeʼu mbaʼérepa tekotevẽ ojejapo. Jesús heʼi kuri: “Opa mbaʼe oĩva yvágape ha yvy ape ári oñemoĩ che poguýpe. Upévare, tapeho pemboʼe umi hénte opa tetãyguápe oiko hag̃ua chuguikuéra che disípulo” (Mat. 28:18, 19). w15 15/4 2:5, 6

Umi kristiáno ypykue ohasa heta mbaʼe ijetuʼúva. Umi rrománo opersegi ha omaltrata chupekuéra. Áño 64-pe omboja hesekuéra ohapyha pe siuda. Upe tiémpo ijetuʼuetévape, umi rrománo ogueraha préso apóstol Páblope. Haʼe oiméne oñeporandu raʼe ohótapa umi ermáno hendápe. ¿Mbaʼérepa oipyʼapy chupe upéva? Pórke una ves ohóma voi kuri préso ha avave noipytyvõi chupe. Upévare ohai Timotéope: “Ajegueraha ypýrõ guare añedefende hag̃ua pe trivunál renondépe, avave ndohói chendive” (2 Tim. 4:16). Upéicharõ jepe, Pablo orrekonose Jesús oipytyvõ ha omombarete hague chupe upérõ. Haʼe ojerovia Jehováre, pórke imanduʼa oipytyvõma hague voi chupe. Haʼe ningo ojeroviaiterei Jehová omombaretetaha chupe oaguanta hag̃ua upe provléma ohasáva hína ha oimeraẽ ótro provléma oñepresentáva. Upévare heʼi: “Ñande Ruvicha chesalváta opa mbaʼe vaígui” (2 Tim. 4:18). Umi ermáno ndohóiramo jepe hendápe, Pablo ni michĩmi ndodudái Jehová ha Jesús katuete oipytyvõtaha chupe. w15 15/4 4:1-3

Jesús onasérõ guare, Satanás oikuaa chugui oikotaha pe Mesías oñepromete vaʼekue. ¿Opensápa Satanás ipyʼahatãitereitamaha ojukáramo peteĩ mitãraʼy? Nahániri. Chupe ningo ndoúi ni ndohói mbaʼépa iporã térã mbaʼépa ivai. Upévare pyaʼe voi otrama ojukauka hag̃ua Jesúspe. ¿Mbaʼépa ojapo? Rréi Herodes oikuaárõ guare onasemaha “hudiokuéra rréi”, ipochyeterei ha ojukase chupe (Mat. 2:1-3, 13). Upévare ojukauka enterovete umi mitã orekóva guive dos áño térã saʼive, oĩva Belénpe ha umi puévlo oĩvape ijerére (Mat. 2:13-18). Upérõ guare Jesús ojesalva. Péro, ¿jahechakuaápa mbaʼeichagua persónapa Satanás? Chupe g̃uarã ningo ndahaʼéi mbaʼevete yvyporakuéra rekove, ni umi mitã mimi rekove jepe. Péicha jahecha Satanás ipyʼahatãitereiha. Ndareíri la Biblia heʼi hese ojoguaha ‘peteĩ león pochýpe’(1 Ped. 5:8). w15 15/5 1:10, 12, 13

Jehová omeʼẽ ñandéve pe kapasida ñañeimahina hag̃ua umi mbaʼe ndajahecháiva. Upéva ñanepytyvõ ñapensa hag̃ua umi mbaʼe porã ñaneraʼarõvare, jakalkula hag̃ua mbaʼépa jajapóta, ha jadesidi porã hag̃ua. Jehová oikuaa mbaʼépa oikóta amo gotyove, ha Iñeʼẽme opromete omeʼẽtaha ñandéve hetaiterei mbaʼe iporãva. Ha ndaikatúirõ jepe jahecha gueteri umíva, si ikatúma ñañeimahina mbaʼéichapa oñekumplíta, ha jajerovia katuete oikotaha (2 Cor. 4:18). Ana ndorekóitirõ jepe peteĩ mitã, opromete Jehovápe oguerahataha imemby tavernákulope ombaʼapo hag̃ua umi saserdótendi. ¿Mbaʼépa oipytyvõ chupe okumpli hag̃ua ipromésa? Ana oñeimahináma kuri mbaʼéichatapa upe día ontrega vove imemby. Péro upéva ndeʼiséi oñeimahina reínte hague, síno haʼe odesidíma mbaʼépa ojapóta ág̃a oreko vove peteĩ mitãkuimbaʼe (1 Sam. 1:22). Péicha avei ñande ikatu ñañeimahina umi mbaʼe porãite Jehová oprometéva, jaikuaágui haʼe katuete okumplitaha umíva (2 Ped. 1:19-21). Heta Ñandejára siérvo yma guare oñeimahina vaʼekue mbaʼéichapa oñekumplíta umi mbaʼe Jehová oprometéva. w15 15/5 3:1-3

La Biblia heʼi avei jajapo vaʼerãha Jehová oipotáva, ha ndajaikói vaʼerã ñapensa mbaʼéichapa ñaganáta heta pláta. Jesús heʼi vaʼekue peteĩ persóna ivyroitereiha oikóramo pláta rapykuéri ha ombotapykue Jehovápe. Upeichagua persóna iplátaramo jepe ‘imboriahu Ñandejára renondépe’ (Luc. 12:16-21). Ñambyatýrõ “mbaʼerepy yvágape” ha ñañehaʼãramo jajapo Jehová oipotáva, ñambopyʼarory hína chupe ha ñande avei javyʼa (Mat. 6:20; Prov. 27:11). Jahechaháicha, ñane amista Jehovándi iñimportanteve hína pe plátagui. Ñañehaʼãramo ñandepláta heta ko múndope, jaikóta jajepyʼapyháre (Mat. 6:19). Jesús heʼi vaʼekue jaikóramo ñapensa meme pe plátare, ijetuʼutaha ñamotenonde hag̃ua Jehovápe (Mat. 13:18, 19, 22). w15 15/5 4:15, 16

Ñandejára podér rupive, Jesús ojapo vaʼekue heta milágro ha omonguera heta kláse mbaʼasy. Ñane tiémpope umi doktór tekotevẽ jepi oporoopera térã ojapo trasplánte de órgano omonguera hag̃ua peteĩ hasývape. Péro Jesús natekotevẽi vaʼekue ojapo upéva. Haʼe ikatu omonguera oimeraẽvape upepete voi, ha hiʼarive ikatu oporomonguera mombyry guive (Juan 4:46-54). ¿Mbaʼépa ñanemboʼe koʼã mbaʼe? Ñande rréi Jesucristo ikatuha omongueraite oimehaichagua mbaʼasy, ha ndahaʼéi ikatúnteva, síno ojapose voi upéva. Jesús otrata porãiterei vaʼekue umi hénte hasývape. Upévare ñande ñaime segúro Ñandejára múndo pyahúpe ojapo jeytaha upéicha. La Biblia opromete: “Oiporiahuverekóne imboriahúvape ha chupe oguenohẽne jejopy vaígui” (Sal. 72:13). Ñande ningo jaikuaa porã Jesús omongueraseha entéro umi persóna osufrívape. w15 15/6 2:6

Hetaiterei persóna oikuaa porã pe orasión del padrenuéstro, oĩva Mateo 6:9-13-pe. Ñande testígo de Jehová katu jaipuru meme ko ñemboʼe japredika jave. Por ehémplo, jaipuru pe fráse “tou ne Rréino”, jahechauka hag̃ua pe Rréino haʼeha Ñandejára goviérno, koʼẽrõite ojapótava ko yvýgui peteĩ paraíso. Avei jaipuru pe fráse “toñemomarangatu nde réra”, jahechauka hag̃ua umi héntepe Ñandejára orekoha héra, ha jarrespeta vaʼerãha upe téra haʼe rupi peteĩ nómbre sánto (Mat. 6:9). Heta persóna orrepeti de memória pe padrenuéstro oñemboʼe jave Ñandejárape. Péro, ¿oipotápa raʼe Jesús jajapo upéva? Nahániri. Haʼe heʼi vaʼekue: “Eñemboʼe jave ani ere jey jey peteĩ mbaʼénte” (Mat. 6:7). Ótra okasiónpe, Jesús omboʼérõ guare idisipulokuérape oñemboʼe hag̃ua, omensiona jey pe padrenuéstro, péro oipurúma diferénte palávra (Luc. 11:1-4). Upéva ohechauka Jesús omboʼe hague pe orasión ikatu hag̃uáicha jaikuaa mbaʼérehepa ñañemboʼe vaʼerã. w15 15/6 4:1, 2

Jehová omeʼẽ ñandéve ijespíritu sánto ipoderosoitéva ikatu hag̃uáicha ñanepytyvõ jarrechasa hag̃ua umi tentasión. Avei omeʼẽ ñandéve Iñeʼẽ ha pe kongregasión ñandeavisa hag̃ua umi pelígrogui. Por ehémplo, heʼi ñandéve ani hag̃ua jaipurupa rei ñane tiémpo, ñande pláta ha ñane enerhía, ñakonsegi hag̃ua umi mbaʼe nañaikotevẽiva. Jahechamína mbaʼépa ojapo Espen ha Janne. Ko matrimónio orekóva mokõi mitã oservi vaʼekue kómo prekursór rregulár. Pe ermáno heʼi: “Koʼág̃arupi ndaikatuvéima rojapo heta mbaʼe Jehová servísiope yma guaréicha. Upévare pyʼỹi rojerure Jehovápe ani hag̃ua roʼa umi tentasiónpe. Ha avei rojerure chupe taorepytyvõ ikatu hag̃uáicha siémpre rojerovia mbarete ha ropredika kyreʼỹ”. Oĩ avei ótro ñuhã ipeligrosoitereíva: pe pornografía. Umi ohecháva pornografía nomboykéi hína umi pensamiénto vai. Péro oĩ heta ermáno ha ermána orrechasáva ko tentasión, ha ñande avei ikatu jajapo upéva (1 Cor. 10:13). w15 15/6 5:15, 16

¿Mbaʼépa oikóta oñehundi rire entéro umi rrelihión fálsa? Upe tiémpope la majoría umi hénte ohóta ojeprotehe hag̃ua “umi sérro paʼũme ita guasu apytépe”. Upéva heʼise haʼekuéra ojeroviataha umi organisasión yvyporakuéra okrea vaʼekuére. Péro ñande jajeroviáta Jehováre, pórke haʼe ñandeprotehéta. Áño 66 rire, oĩ vaʼekue peteĩ tiémpo de kálma, péro pe tiémpo mbykymi ndahaʼéi kuri oiko hag̃ua kristiáno heta hudíogui, síno ikatu hag̃uáicha umi kristiáno iñeʼẽrendúva Jesúspe osẽ pe siudágui. Upéicha avei, pe gran trivulasiónpe oĩta peteĩ tiémpo de kálma, péro ndahaʼemoʼãi oiko hag̃ua kristiáno heta héntegui. Upe moméntope entéro jaservíva Jehovápe jahechauka vaʼerã jahayhuha chupe ha jaapojaha umi unhídope (Mat. 25:34-40). w15 15/7 2:7

Entéro jaservíva Jehovápe ko yvy tuichakuére ñaime unído. Upévare arakaʼeve nañapensái vaʼerã ñande siuda térã ñande país iñimportanteveha ótrogui. Ikatu ningo ñande rogayguakuéra térã umi hénte oikóva pe lúgar jakakuaa haguépe, ñanemboʼe jahayhu vaʼerãha ñande país. Ha upévare ikatu koʼág̃a peve sapyʼánte ndajahayhupái umi extranhérope, umi orekóvape ótra kultúra, oñeʼẽva ótro idióma, térã umi hénte de ótra rrásare. Oiméramo oiko jepi nderehe upéva, ¿mbaʼépa nepytyvõta rekambia hag̃ua? Iporã vaʼerã repensa mbaʼépa Jehová heʼi umi persóna omombaʼévare hetã ha oimoʼãva voi ndaiporiha haʼekueraichagua. Upéi, eheka informasión oñeʼẽva upe témare. Avei ejerure Jehovápe tanepytyvõ ani hag̃ua redespresia avavépe (Rom. 12:2). Ñande ningo ñaneñeʼẽrendu Jehovápe, upévare sapyʼánte ñane vesinokuéra, ñane hénte, ñane kompañéro de traváho térã koléhiopegua ohechakuaa ñanediferenteha. w15 15/7 3:14, 15

Jehová ningo ñanerendu ha ñanentende, ndaipórirõ jepe ótra persóna ojapóva upéva. Ha okontestávo ñane orasión ohechauka avei ñanderayhuetereiha. La Bíbliape ojehai vaʼekue heta orasión, ha umíva ikatu ñanemboʼe heta mbaʼe. Upévare iporã vaʼerã sapyʼánte jastudiáramo umi orasión jajapo jave ñane adorasión en família. Por ehémplo, ikatu ñahesaʼỹijo pe orasión ojapo vaʼekue Jonás oĩrõ guare pe pira ryepýpe (Jon. 1:17–2:10). Avei ikatu jastudia pe orasión ojapo vaʼekue ipyʼaite guive Salomón oñeinagurárõ guare pe témplo (1 Rey. 8:22-53). Iñimportánte avei ñapensa pe orasión Jesús omboʼe vaʼekuére (Mat. 6:9-13). Jajepokuaáramo jajepyʼamongeta koʼãichagua orasión rehe, ñanepytyvõta ñañemboʼe porãve hag̃ua. Tekotevẽ avei ñanemanduʼa siémpre ‘ñamombeʼu vaʼerãha Ñandejárape jaipotáva’. Upéicha jajapóramo, ‘Ñandejára pyʼaguapy tuichavéva opa mbaʼe ikatúvagui ñantende, oñangarekóta ñane korasõre ha umi mbaʼe ñapensávare’ (Filip. 4:6, 7). w15 15/8 1:11, 12

Jaikoséramo pe paraísope, koʼág̃ama jajepokuaa vaʼerã ñaneñeʼẽrendu Jehová organisasiónpe. ¿Mbaʼérepa iñimportánte upéva? Pórke pe paraísope oñemeʼẽta ñandéve heta instruksión jajapo hag̃ua ko yvýgui peteĩ hardín neporãva. Avei tekotevẽta ñaipytyvõ umi orresusitávape ikatu hag̃uáicha oikuaa Jehovápe. Oĩta ningo hetaiterei traváho. Upévare iporã ñañeporandu: “¿Ajapótapa kyreʼỹme Jehová organisasión omandáva chéve, jepe ndachegustapái?”. Ikatu hag̃uáicha jajeprepara jaiko hag̃ua pe paraísope, ndahaʼéi ñaneñeʼẽrendúnte vaʼerã Jehová organisasiónpe. Tekotevẽ avei javyʼa umi traváho térã asignasión otokávare ñandéve, ha ñambaʼapo meme umi omotenondévandi Jehová organisasión. Por ehémplo, ikatu koʼág̃a jarresivi peteĩ asignasión pyahu. ¿Ñañehaʼãmbaitépa ñakumpli porã ñande traváho ha javyʼa upe jajapóvare? Jajepokuaáramo jaapoja koʼág̃ama voi Jehová organisasión, ifasilvéta ñandéve jajapo hag̃ua upéva pe paraísope. w15 15/8 3:6, 7

Ko rréi iñaranduetéva jepe ou omboyke Jehová omandáva pórke noñatendéi mávarepa ojeheʼa (1 Rey. 11:1-6). Ha nañañatendéiramo, upéva ikatu avei oiko ñanderehe. Upévare ndovaléi ni ñapensa ñamenda peteĩ ndohayhúivare Jehovápe. Péro, ¿mbaʼépa ikatu ojapo peteĩ persóna omendámava oiko mboyve chugui Testígo? La Biblia heʼi umi tembirekópe: “Peñemoĩ vaʼerã pene ména poguýpe, upéicha oĩramo naiñeʼẽrendúiva Ñandejára Ñeʼẽme, ikatúta ojerovia Ñandejárare ojeʼeʼỹre chupe mbaʼeve, hembireko hekoporã rupi” (1 Ped. 3:1). ¿Mbaʼépa ñanemboʼe ko téxto? Peteĩ ermána iména ndahaʼéiva Testígo, oñehaʼã vaʼerã okumpli porã irresponsavilida hogapýpe ha osegi umi konsého oĩva la Bíbliape. Upéicha iména ikatu hína ohechakuaa hembireko amás día ikondúkta porãveha, ha upéi odesidi avei oservi Jehovápe. Upéva ojehecháma oikoha heta matrimóniope. w15 15/8 4:15, 16

Koʼág̃a ningo oĩ heta mbaʼasy naipohãiva gueteri. Upévare, ñapensa porã vaʼerã oĩ jave heʼíva ñandéve oikuaaha peteĩ pohã térã tratamiénto katuete ñanemonguerátava. Pablo heʼi vaʼekue: “Opavave toikuaa peneakãguapyha” (Filip. 4:5). Upéva heʼise ñañatende vaʼerãha ani hag̃ua jadeskuida ñande servísio Jehovápe, jaikógui jajepyʼapyeterei ñande salúre. Jajepreokupaitereírõ ñande salúre, amo ipahápe ñapensaitereíta ñandejehéntema (Filip. 2:4). Jaikuaa ningo ñaneimperfékto aja ikatuha gueteri ñanderasy. Upévare jahechauka vaʼerã pe iñimportantevéva ñandéve g̃uarã ndahaʼeiha ñande salu, síno ñande servísio Jehovápe (Filip. 1:10). Amo ipahápe, káda uno odesidi vaʼerã la ojapótava ha oĩ rresponsávle la odesidívare. w15 15/9 2:8, 10

Jehová ‘núnka ndofallái avavépe’ ha ogia porã ifamiliakuérape (Sal. 31:5). Avei ohechauka mbaʼeichagua persónapa haʼe ha omombeʼu ñandéve mbaʼéichapa jaadora vaʼerã chupe. Hiʼarive ñanemboʼe mbaʼéichapa jaiko porãvéta. Jahechamína mbaʼe mbaʼépa Jehová ñanemboʼe ñanderayhúgui. Jehová ñanemboʼe heta mbaʼe iñimportánteva oipotágui jaikuaa porãve chupe (Sant. 4:8). Omombeʼu avei ñandéve mbaʼéichapa héra. Jehová réra oaparese hetaiterei vése la Bíbliape, hetaiteve vése umi ótro téragui. Avei ñanemboʼe mbaʼeichagua persónapa haʼe. Por ehémplo, ñapensávo pe kreasiónre jahechakuaa iñarandu ha ipoderosoitereiha (Rom. 1:20). Ha jaleévo la Biblia katu jahecha hekojoja ha ñanderayhuha. Jaikuaavévo Jehovápe, koʼýte ñañemoag̃uive hese. w15 15/9 4:8, 9

Heta persóna opensa Ñandejárape nointeresaiha mbaʼépa jajapo ni mbaʼépa ojehu ñandéve. Por ehémplo, noviembre de 2013-pe, Filipínaspe ou peteĩ torménta ndevaíva, ha sarambi ojapo upérupi. Upe rire peteĩ intendénte heʼi: “Oiméne Ñandejára hembiapoiterei raʼe, upévare naitiémpoi ñanepytyvõ hag̃ua”. Heta persóna opensa avei Ñandejára ndohechaiha umi mbaʼe ojapóva hikuái (Is. 26:10, 11; 3 Juan 11). Apóstol Pablo tiémpope oĩ vaʼekue peichagua tapicha. Upévare haʼe heʼi: “Haʼekuéra oimoʼã ndaideprovechoiha oikuaa porã Ñandejárape”. ¿Mbaʼérepa opensa hikuái upéicha? Pórke “ndahekojojái, hembiapo vai, itaryrýi, [ha] iñaña” (Rom. 1:28, 29). Ñande jaikuaa porã Jehová ohechaha opa mbaʼe jajapóva. Péro iporã ñañeporandu: “¿Añetehápepa apensa Ñandejára oñeinteresaha cherehe? ¿Ahechakuaápa haʼe chepytyvõha?”. w15 15/10 1:1-3

Japredika jave jahechauka hína jarekoha fe. ¿Mbaʼérepa jaʼe upéva? Pórke péicha ñademostra jagueroviaha pe fin hiʼag̃uimaha ha ‘upe día nog̃uahẽmoʼãiha tárde’ (Hab. 2:3, NM). Jaikuaaséramo oimépa ñande fe imbarete hína, ñañeporandu vaʼerã: “¿Iñimportántepa chéve g̃uarã pe predikasión? ¿Ajapópa ikatúva guive añeʼẽ hag̃ua Ñandejárare tahaʼe haʼévape? ¿Añehaʼãpa ambaʼapove Jehová servísiope?” (2 Cor. 13:5). Jasegíramo ‘ñamombeʼu pe marandu porã’, jahechauka imbareteha ñande jerovia (Rom. 10:10). Jahechauka avei jarekoha fe ñaaguantávo umi provléma oñepresentáva káda día. Oiméramo ñanemboriahu, ñanderasy, ñañedesanima, ñañedeprimi térã jareko peteĩ provléma, ñakonfia vaʼerã Jehová ha Jesús ‘ñanepytyvõtaha ñaikotevẽ jave’ (Heb. 4:16). Jajeruréramo Jehovápe ajúda, jahechauka hína jajeroviaha hese. w15 15/10 2:12-14

¿Mbaʼépa oikóta algún día ojeproivíramo ñandehegui jareko la Biblia? Vuéno, ikatu ojepeʼa ñandehegui ñande Biblia, péro avave ndaikatúi oipeʼa ñane akãgui umi téxto vívliko, ni umi kántiko ñaaprende vaʼekue de memória (Hech. 16:25). Jehová ñanepytyvõta ijespíritu sánto rupive ñanemanduʼa hag̃ua umi mbaʼe ñaaprende vaʼekue, ha avei ñaneñeʼẽrendu hag̃ua chupe. ¿Mbaʼépa jajapo vaʼerã ikatu hag̃uáicha jalee la Biblia káda día? Jahechamína peteĩ suherénsia. Ikatu jaipuru unos kuánto día de la semána jajapo hag̃ua pe lektúra semanál de la Biblia. Upéi ñamboykeʼimi tiémpo ñapensa porã hag̃ua pe jaleévare. Umi ótro día ikatu jalee algún kapítulo de Mateo, Marcos, Lucas térã Juan, ha jajepyʼamongeta umi mbaʼe Jesús ojapo ha omboʼe vaʼekuére (Rom. 10:17; Heb. 12:2; 1 Ped. 2:21). Ha ideprovechove hag̃ua ñandéve pe jaleéva, ikatu jaipuru peteĩ puvlikasión omyesakãva por órden umi mbaʼe Jesús ojapo vaʼekue oĩrõ guare ko yvy ape ári (Juan 14:6). w15 15/10 4:11, 12

Jesús ningo haʼe vaʼekue ijapostolkuéra amígo, ndahaʼéi imboʼeharakuérante. Ymave, umi patrón noñemongetái vaʼekue ijesklávondi, por ehémplo, nomombeʼúi chupekuéra opensáva ni oñandúva. Péro Jesús ndotratái péicha ijapostolkuérape. Haʼe ohayhu ha ohasa tiémpo hendivekuéra, ha ojapysaka porã hesekuéra omombeʼu jave hikuái opensáva ha oñandúva. Avei Jesús voi omombeʼu chupekuéra mbaʼépa opensa ha mbaʼéichapa oñeñandu (Mar. 6:30-32). Koʼã mbaʼe oipytyvõ umi apóstolpe okonfiave hag̃ua Jesúsre, ha ikatu hag̃uáicha oĩ preparádo ojapo hag̃ua pe tembiapo ohejátava chupekuéra. Jesús oikuaa vaʼekue idisipulokuéra ovyʼaitereitaha oservíramo kyreʼỹme Ñandejárape ha opredika meméramo. Upévare omokyreʼỹ chupekuéra omotenonde hag̃ua pe predikasión, ha opromete oipytyvõtaha chupekuéra ojapo porã hag̃ua upe tembiapo (Mat. 28:19, 20). w15 15/11 2:3, 5

Jehová ningo ñanderayhueterei (1 Juan 4:16). Ha Jesucristo ojogua avei Itúvape. Jehová ojapo vaʼekue Itaʼýrape raẽvete, ha haʼe oiko Itúvandi hetaiterei tiémpore yvágape. Upéicha rupi, Jesús oaprende heta mbaʼe Jehovágui (Col. 1:15). Por ehémplo, haʼe siémpre oporohayhu avei, tahaʼe oĩrõ guare yvágape térã ko yvy ape ári. Upévare, jaikuaa porã Jehová ha Jesús siémpre ñanegovernataha mborayhúpe. Peteĩ okasiónpe, peteĩ kuimbaʼe oporandu Jesúspe mbaʼe mandamiéntopa la iñimportantevéva. Haʼe heʼi chupe: “‘Rehayhu vaʼerã Jehová nde Járape nde pyʼaite guive, ne álma rugua guive, ha opa ne arandukue reheve’. Kóva hína pe mandamiénto tuichavéva ha tenondegua. Pe segundo ojoguáva avei chupe heʼi kóicha: ‘Rehayhu vaʼerã nde rapichápe nde rejehayhuháicha’” (Mat. 22:37-39). Iñimportanteterei ningo jahechauka jahayhuha entéro ñande rapichápe. Jesús heʼi vaʼekue voi jahayhu vaʼerãha Jehovápe ha ñande rapichápe. w15 15/11 4:1-3

Ndahaʼéi ningo idióma evréopente Jehová oñekomunika vaʼekue yvyporakuérandi. Umi isrraelíta osẽrõ guare Babilóniagui, heta oĩ ojepokuaáva oñeʼẽ idióma araméope. Upévare oiméne rakaʼe Jehová heʼi Daniel, Jeremías ha Ésdraspe oskrivi hag̃ua unas kuánta párte de la Biblia idióma araméope. Tiémpo rire, Alejandro Magno ojagarra heta país. Upévare hetaiterei persóna oñepyrũ avei oñeʼẽ griégo (griégo komún térã koiné). Ha umíva apytépe oĩ heta hudío. Ko idióma ojekuaa vaʼekue opárupi. Upéicha rupi umi Escrituras Hebreas ojetradusi griégope. Pe primera traduksión ojejapo vaʼekue héra Septuaginta, ha oĩ hína umi traduksión iñimportantevéva apytépe. Amalisia 72 persóna ombaʼapo otradusi hag̃ua ko Biblia. Koʼãva apytépe oĩ vaʼekue otradusíva de diferénte fórma. Por ehémplo oĩ oñehaʼãva otradusi umi idéa, ha ótro katu otradusi palávra por palávra. Upévare ko traduksión oreko diferénte estílo. Upéicharõ jepe, umi hudío oñeʼẽva griégo ha umi kristiáno, omombaʼe ko Biblia. Chupekuéra g̃uarã pe Septuaginta haʼe vaʼekue Ñandejára Ñeʼẽ. w15 15/12 1:4-6

Santiago heʼi vaʼekue: “Ñande juru ningo ojogua tatápe” (Sant. 3:6). Ko versíkulope, “ñande juru” orrepresenta pe kapasida jarekóva ñañeʼẽ hag̃ua. Pe tata ikatuháicha ojapo tuicha perhuísio, umi mbaʼe jaʼéva ikatu avei operhudika ñande rapichápe. ¿Heʼisépa upéva ikuentaveha ñakirirĩnte ani hag̃ua ñamoñeñandu vai ótrope? Nahániri. Ñapensamíntena: Jaikuaáramo jepe pe tata ikatuha ñandeperhudika, upéva ndeʼiséi ndajaipurumoʼãveimaha. Katuete ningo ñañatendétante jaipuru jave, por ehémplo ñañekosina, jajepeʼe térã jahesape jave pytũmbýpe. Péicha avei, la Biblia heʼi umi “mbaʼe jaʼéva” ikatuha ojapo porã ñande rapicháre, térã omoñeñandu vai chupe (Prov. 18:21). Upévare, ñañatende vaʼerã mbaʼéichapa jaipuru pe kapasida jarekóva ñañeʼẽ hag̃ua. Por ehémplo, ñañehaʼãmbaite vaʼerã jaʼe umi mbaʼe ikatúva ombotuicha Jehovápe ha oipytyvõ ñande rapichakuérape (Sal. 19:14). Jehová omeʼẽ ñandéve pe kapasida ñamombeʼu hag̃ua ñapensáva ha ñañandúva, tahaʼe jaʼéva rupive, térã umi hésto rupive (Sant. 3:9, 10). Upévare, jaipuru porãkena ko rregálo porãite. w15 15/12 3:1-3

“Lucas, haʼéva doktór”, omoirũmi vaʼekue Páblope iviáhepe. Oiméne haʼe oipytyvõ raʼe chupe ha umi ótro kristiánope hasy jave umi viáhe aja (Gál. 4:13). Jesús heʼi vaʼekue voi: “Hesãiva noikotevẽi doktór, péro umi hasýva oikotevẽ” (Luc. 5:31). Lucas ndahaʼéi vaʼekue peteĩ persóna omeʼẽsénteva konsého de salu. La Biblia heʼi hese haʼe hague doktór. Upévare oskrivírõ guare umi lívro hérava Lucas ha Hechos, oipuru umi palávra oipurúva umi doktór ha oñeʼẽ umi kurasión Jesús ojapo vaʼekuére. ¿Arakaʼe ha moõpa ostudia rakaʼe medisína? La Biblia nomombeʼúi, péro oime vaʼerã ostudia raʼe peteĩ eskuéla de medisínape Laodicéape, peteĩ siuda namombyrýiva Colósasgui. Ikatu oime upévare Pablo imanduʼa Lúcasre oskrivírõ guare umi Colosasguápe, ha heʼi Lucas oguerahaukaha chupekuéra salúdo. w15 15/12 4:11, 12

Jehová ñanderayhueterei rupi, ombou Itaʼýra ko yvy ape ári omano hag̃ua ñanderehehápe (Juan 3:16; 1 Juan 4:9, 10). Ndaipóri ni peteĩ rregálo ivaliosovéva upévagui. Ndareíri apóstol Pablo imanduʼávo pe sakrifísiore, heʼi haʼeha “pe rregálo ijojahaʼỹva”. Haʼe oikuaa porã Jesús sakrifísio rupive Jehová katuete okumplitaha opa mbaʼe oprometéva (2 Cor. 1:20). Péro “pe rregálo ijojahaʼỹva” ndahaʼéi Jesús sakrifísionte. Upévape oike opa mbaʼe porã Ñandejára omeʼẽtava ñandéve ñanderayhúgui. Añetehápe ningo ko rregálo ndaijojahái. Upévare iporã ñañeporandu: “¿Mbaʼéichapa añeñandu ko rregálo porãitére? ¿Mbaʼépa ikatu ajapo?”. Por ehémplo, ikatu reporohayhuve, nembaʼeporãve ótrondi ha reperdona umi ofallávape nendive. Avei siémpre ñanemanduʼa vaʼerã pe rregálo Jehová omeʼẽva ñandéve tuichaiteve hína oimeraẽ ótro rregálogui. w16.01 2:1, 2, 4, 5

Umi kristiáno ojeporavóva espíritu sánto rupive ikatu oñeporandu: “¿Mbaʼére piko cheelehi chéve? ¿Mbaʼére piko ndojeporavói ótrope?”. Ikatu avei oñeporandu okumpli porãtapa upe rresponsavilida. Péro arakaʼeve noñeporandúi hikuái oimépa haʼe hína unhído térã nahániri. ¿Mbaʼérepa? Pórke haʼekuéra oĩ segúro Jehová oiporavo hague chupekuéra. Avei ovyʼaiterei ha oagradese hikuái orresivi haguére pe priviléhio, ha heʼi apóstol Pedro heʼi haguéicha: “Toñembotuicha Ñandejárape, ñande Ruvicha Jesucristo Túva. Haʼe ñandeporiahuverekoiterei rupi, ñande ñanase jey jaguereko hag̃ua peteĩ esperánsa oikovéva. Ha upéva oiko Jesucrístope oñemoingove jey rupi omanóva apytégui. Ha upéicha ñahaʼarõ peteĩ erénsia oñembyaiʼỹva, ndaikyʼáiva ha noñehundimoʼãiva. Upéva oñeñongatu peẽme g̃uarã yvágape” (1 Ped. 1:3, 4). Peteĩ kristiáno unhído olee vove koʼã versíkulo, oikuaa porã Itúva yvagapegua oñeʼẽha chupete voi. w16.01 3:11, 12