Agosto

Abrahán ningo iñeʼẽrendu vaʼekue Ñandejárape opaite mbaʼépe, upéicha rupi siémpre oiko iñamigoitéramo. Haʼe oikuaa ikatuha oñeʼẽ hendive oimeraẽ mbaʼégui, umi téma nontendeporãivare jepe. Por ehémplo, Jehová heʼi kuri ohunditaha Sodoma ha Gomorra, ha Abrahán ojepyʼapyeterei. ¿Mbaʼérepa? Pórke opensa Jehová ohunditaha entéro hénte oĩvape umi siudápe, tahaʼe ivuénova ha iñañáva. Oiméne Abrahán imanduʼa isovríno Lot ha hogayguakuérare, oikóva Sodómape. Péro Abrahán ojeroviaiterei Jehováre, haʼéva “pe Hués hekojojavéva ko yvy ape ári”. Upévare omombeʼu porãnte chupe mbaʼérepa ojepyʼapy. ¿Mbaʼéichapa Jehová oipytyvõ Abrahánpe? Ipasiénsia hese ha ohechauka chupe haʼe oporoporiahuverekoha. Avei oexplika chupe oporohusga jave, ohekaha umi persóna ipyʼaporãvape ha osalvaha chupekuéra (Gén. 18:22-33, NM). Jahechaháicha, Abrahán oikuaa porã vaʼekue Jehovápe ha oñemeʼẽ enkuénta mbaʼéichapa oipytyvõ chupe. w16.02 1:11, 12

Enterovéva jaguerohory umi persóna oporohayhu ha opororrespetávape. Jonatán ohechauka porã vaʼekue koʼã kualida. Haʼe norreklamái ipuésto, síno oapoja Davídpe. ¿Mbaʼérepa? Pórke ohayhuve Jehovápe ha orrespeta chupe. Mokõivéva ojoayhu ha ojorrespeta, ha iñeʼẽrendu Jehovápe. Okumpli hikuái pe promésa ojapo vaʼekue ojupe. Ñande jahechauka vaʼerã avei jahayhu ha jarrespetaha ñane héntepe, ñane amigokuéra ha ñane ermanokuéra kongregasionguápe (1 Tes. 2:10, 11). Péro iñimportanteve hína ñaneñeʼẽrendu Jehovápe, pórke haʼe ñandeapo vaʼekue (Apoc. 4:11). Jajapóramo upéva javyʼavéta ha ñañeñandu porãta. Siémpre ñaneñeʼẽrendu vaʼerã Jehovápe, jahasárõ jepe umi mbaʼe ijetuʼúva. w16.02 3:3, 4

Neñeʼẽrendu vaʼerã Jehovápe, rehasárõ jepe umi situasión ijetuʼúva térã oñepresentárõ ndéve umi tentasión ikatúva omokangy nde jerovia. Upéva heʼise ndaikatuiha rejeporta porã guaʼu Salónpe, péro eskuélape térã koléhiope katu reiko umi ndoservíriva Jehovápe oikoháicha (Efes. 4:14, 15). Añetehápe ningo ndaipóri ko yvy ape ári iperféktova. Upéicha rupi, tahaʼe ñanemitã térã ñandeedáramo entéronte jajavy (Ecl. 7:20). Upévare, rejevautisaséramo repensa vaʼerã reimépa dispuésto rejapóvo siémpre Jehová oipotáva. Iporã reñeporandu: “¿Ahechaukámapa cheñeʼẽrenduha aikóvo Jehovápe? ¿Mbaʼéichapa arreaksiona raʼe pe última ves oñepresentárõ guare chéve peteĩ tentasión? ¿Ahechakuaápa chejeheguiete mbaʼépa la oĩ porãva?”. Ikatu rejecha peteĩ situasión ojoguávape Daniel ohasa vaʼekuépe. Por ehémplo, ikatu ojeʼe ndéve ndevaletereiha, ha reaprovecha vaʼerãha upéva ikatu hag̃uáicha rehupyty heta mbaʼe ko múndope. Péicha jave, ¿reikuaa porãpa mbaʼépa Jehová oipota rejapo? (Efes. 5:17.) w16.03 1:7-9

Jaiko hína “umi ára pahápe”, ha koʼẽrõite og̃uahẽta pe gran trivulasión. Upérõ ojehasa asýta arakaʼeve oikoʼỹ haguéicha (2 Tim. 3:1). Avei Satanás ha idemoniokuéra oñemosẽ kuri yvágagui, ha upe guive ombosufri hikuái yvyporakuérape (Apoc. 12:9, 12). Ñande katu japredika hína ko yvy tuichakuére, Jesús omanda haguéicha ñandéve. Japredika hetave persónape ha heta hetave idiómape, ha koʼã mbaʼe arakaʼeve ndojejapóiva gueteri. Upéicharõ, jaipotáramo Jehová ñanevendesi, jasegi vaʼerã umi instruksión oñemeʼẽva ñandéve kongregasión rupive. Koʼág̃ama voi ñaneñeʼẽrendúramo, ifasilvéta ñaneñeʼẽrendu hag̃ua pe “jehasa asy guasu” aja. Upépe Satanás múndo aña oñehundíta avei (Mat. 24:21). Ha pe múndo pyahúpe, ñaikotevẽ jeýta instruksión pyahu. w16.03 4:16, 18

Peteĩ jey, Jehová ohechauka apóstol Juánpe peteĩ visión rupive 7 ánhel ombopúva trompéta. Pe quinto ánhel ombopu rire itrompéta, Juan ohecha “peteĩ estrélla” hoʼáva yvágagui ko yvy ape ári. Ko estrélla oipuru peteĩ lláve oavri hag̃ua “pe yvykua pypuku”. Upéi pe yvykuágui oñepyrũ ojupi tuicha tatatĩ. Ha pe tatatĩgui osẽ hetaiterei tuku. Péro koʼã tuku ndoʼúi umi yvyramáta rogue ni umi plánta, síno oataka umi persóna ndoguerekóivape “Ñandejára séllo isyváre” (Apoc. 9:1-4). Juan oikuaa porã umi tuku ikatuha oporoperhudika vai, oiko haguéicha Egíptope Moisés tiémpope (Éx. 10:12-15). Umi tuku Juan ohecháva orrepresenta umi kristiáno unhídope, opredikáva oikóvo entéro rrelihión fálsa oñehunditaha. Chupekuéra omoirũ heta kristiáno orekóva esperánsa oikove hag̃ua ko yvy ape ári pára siémpre. Enterovéva ombaʼapo oñondivepa ikatu hag̃uáicha oipytyvõ umi héntepe ojei hag̃ua Satanás poguýgui ha umi rrelihión japúgui. w16.03 3:3

Oiméramo nde peteĩ ansiáno, reikuaa vaʼerã mbaʼéichapa pe añetegua opoko pe ermáno rembokatupyryséva korasõre. Ikatu reporandu chupe: “¿Mbaʼéichapa reiporu nde rekove reñemeʼẽ guive Jehovápe?”. Ko porandu omeʼẽta ndéve oportunida remokyreʼỹ hag̃ua pe ermánope oservi hag̃ua Jehovápe ipyʼaite guive (Mar. 12:29, 30). Ikatu rejapo peteĩ orasión hendive ha ejerure Jehovápe toipytyvõmi pe ermánope ijespíritu sánto rupive okumpli porã hag̃ua umi traváho oñemeʼẽtava chupe. Haʼe ohendúvo reñemboʼeha hese, ikyreʼỹvéta ombaʼapove hag̃ua kongregasiónpe. Reñepyrũ vove rembokatupyry peteĩ ermánope, emombeʼu chupe umi ehémplo vívliko oipytyvõtava chupe iñumílde ha imbaʼeporã hag̃ua ótrondi, ha avei ohechauka hag̃ua ikatuha ojejerovia hese. Koʼãichagua ehémplo jatopa 1 Reyes 19:19-21, Nehemías 7:2; 13:13, ha Hechos 18:24-26-pe. Umi kualida oñemensionáva koʼã téxtope haʼete hína pe avóno oipurúva peteĩ chokokue. Umi téxto oipytyvõta pe ermánope okakuaa térã oprogresa pyaʼeve hag̃ua ha ontende hag̃ua heta mbaʼe “iporãitereíva” oĩva la Bíbliape. w15 15/4 2:3, 4

Ñañemoag̃uiséramo Jehováre, ñañemongeta vaʼerã hendive. ¿Mbaʼéichapa ikatu jajapo upéva? Pe orasión rupive (Sal. 142:2). Ha ¿mbaʼéichapa haʼe oñeʼẽ ñandéve? La Biblia rupive. Upéicharõ, ñahendu hag̃ua haʼe heʼíva, pyʼỹinte jalee vaʼerã Iñeʼẽ ha jajepyʼamongeta hese (Is. 30:20, 21). Ikatu ningo sapyʼánte ndajahechakuaái mbaʼéichapa Ñandejára okontesta ñane ñemboʼe. Péro jajeruréramo chupe espesífikamente pe ñaikotevẽva, ifasilvéta jahecha hag̃ua mbaʼéichapa ombohovái ñandéve. Upépe ñañandúta Jehová añetehápe haʼeha ñane Amígo. Ñamombeʼúramo chupe sinséramente mbaʼépa ñandepyʼapy, haʼe oñemoag̃uíta ñanderehe. Ñande ningo ikatúta ñañemoag̃ui Jehováre opa árare. Upévare, jasegíkena ñahendu chupe jastudiávo la Biblia káda día, ha ñañeʼẽ meme hendive pe orasión rupive. Jajapóramo péicha, koʼẽ koʼẽre ñamombaretevéta ñane amista Ñandejárandi ha haʼe ñanepytyvõta jagueropuʼaka hag̃ua umi provléma. w15 15/4 3:3, 14, 16

Satanás orekóma ipoguýpe ko múndo kompletoite, ha ni upeichavérõ noñekontentái. Upévare ojevale yvyporakuérare ikatu hag̃uáicha opersegi umi kristiáno teépe síglo primero guive koʼag̃aite peve. Peteĩ león ivareʼáva ni michĩmi ndoiporiahuverekói iprésape. Upéva rangue oñemboharái vaipa hese ojuka rire jepe. Péicha avei Satanás ni michĩmi nombyasýi umi persóna oatakávape. Ñapensamíntena mbaʼéichapa oataka vaʼekue umi isrraelítape. Por ehémplo, ombotavy Zimrípe hoʼa hag̃ua pe inmoralida sexuálpe. Avei omoñuhã Guehazípe ikatu hag̃uáicha itaryrýi. Koʼã pekádo oporombosufrieterei vaʼekue. Katuete Satanás ovyʼaitereíne raʼe ohechávo koʼã persóna opekaha. Jaleévo koʼã rreláto, jahechakuaa Satanás ipyʼahatãitereiha (Núm. 25:6-8, 14, 15; 2 Rey. 5:20-27). w15 15/5 1:8, 9

¿Mbaʼéichapa ikatu ñandepuʼaka Satanásre? Jesús heʼi vaʼekue: “Peaguantáramo, pesalváta pende rekove” (Luc. 21:19). Ni peteĩ yvypóra ndaikatumoʼãi ñandeperhudika pára siémpre. Jaservi aja Jehovápe ñande pyʼaite guive, siémpre ñaiméta ijykére ha jaikóta iñamígoramo (Rom. 8:38, 39). Ha jasegíramo ñaneñeʼẽrendu, ñamanóramo jepe Satanás noganamoʼãi, pórke Jehová ñanemoingove jeýta (Juan 5:28, 29). Péro ¿mbaʼépa oikóta Satanásgui? Ñandejára ohundi rire ko múndo, Cristo oapresáta chupe 1.000 áñore, ha upe aja ndaikatumoʼãi oataka avavépe (Apoc. 20:1-3). Upe rire, ojepoi jeýta chugui, ha oñehaʼãta ombotavy jey yvyporakuérape. Ha upéi oñehundietétama chupe (Apoc. 20:7-10). Jahechaháicha, Satanáspe ningo nohaʼarõi mbaʼeve iporãva. Péro ñandéve katu ñaneraʼarõ heta mbaʼe ijojahaʼỹva. Upévare, aníkena ñanekangy. Upéva rangue, jajerovia mbarete Jehováre ha ñañemoĩ Satanásre (1 Ped. 5:9). Péicha añoite ñandepuʼakáta hese. w15 15/5 2:1, 18

Ñanearandúramo ndajaikomoʼãi ñapensa umi mbaʼe naiporãivare. Umi mbaʼe ñapensáva ikatu ñakompara tatarendýre. Pe tata ningo ideprovécho hína jaipuru porãramo, por ehémplo ñañekosina hag̃ua. Péro nañañatendéiramo hese ikatu hína jakái térã okaipa ñande róga. Upéicha avei, ñapensa meméramo umi mbaʼe Jehová ñanemboʼévare, katuete ñasẽ porãta. Péro jaikóramo ñapensa ivaívare, tuicha jajeperhudikáta. Por ehémplo, jaikóramo ñañeimahina ñakometeha inmoralida, upéi ndahasymoʼãiete japeka hag̃ua. Ha oikóramo upéva, japyta vaítama Jehovándi (Sant. 1:14, 15). La Biblia heʼi porã ndovaleiha ñañeimahina jarekoha rrelasión sexuál peteĩ ndahaʼéivandi ñane ména térã ñane rembireko. Jesús heʼi vaʼekue: “Entéro osegíva omaña peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩma hína” (Mat. 5:28). w15 15/5 4:11, 12, 14

Jesús ojapo vaʼekue heta milágro opredika tiémpope ko yvy ape ári. Péicha ohechauka ohayhuha umi héntepe. Jesús opredika aja Galiléape, ohecha peteĩ kuimbaʼe iléprava (Mar. 1:39, 40). Ko karai hasy vaieterei anga, upévare Lucas, haʼéva doktór, heʼi hese ‘henyhẽha lépragui’ (Luc. 5:12). Ko kuimbaʼe ohechávo Jesúspe, oñesũ henondépe ha heʼi chupe: “Karai, nde reipotáramo ningo ikatu chemonguera”. Haʼe oikuaa porã Jesús ikatuha omonguera chupe, péro ndoikuaái oimépa omonguerase chupe. Jesús ojapo peteĩ mbaʼe oñehaʼarõʼỹva: “Opoko hese ha heʼi: ‘Si, romonguerase’. Ha upepete pe lépra opa chugui” (Luc. 5:13). Péicha Jesús ohechauka ohayhuetereiha umi héntepe (Luc. 5:17). w15 15/6 2:3-5

Umi ermáno iñexperiensiavéva ikatu oipuru la Biblia ohechauka hag̃ua ndéve mbaʼépepa tekotevẽ rekambia (Heb. 3:12, 13). Ha rejapóramo umi kámbio, esegíta ereko Jehovápe ne amígoramo. Umi ansiáno kongregasiongua la ñanepytyvõ porãvétava (Sant. 5:13-15). Oiméramo nde rehecha jepi pornografía, tekotevẽ pyaʼe rejerure ajúda. ¿Mbaʼérepa? Pórke amáske rehaʼarõ, ifasilvéta reʼa hag̃ua pe inmoralida sexuálpe. Upéva oikóramo katu embosufrietereíta ne hentekuérape ha umi ne amígope. Avei nde káusare ikatu oñeñeʼẽ vai Ñandejárare. Heta ermáno ha ermána ojerure ajúda ansianokuérape ha osegi umi konsého oñemeʼẽva chupekuéra. Péicha ndoperdéi hikuái iñamista Jehovándi ha osegi kongregasiónpe (Sant. 1:15; Sal. 141:5; Heb. 12:5, 6). w15 15/6 3:15-17

Umi rrelihión fálsa oñehundi vove, ¿omanombátapa entéro umi hénte oĩva koʼã rrelihiónpe? Nahániri. Zacarías oprofetisa vaʼekue ojeataka vove umi rrelihión fálsape, oĩtaha líder rrelihióso ohejáva irrelihión ha hiʼarive onegáva opertenese hague pe rrelihión fálsape (Zac. 13:5, 6). ¿Mbaʼépa oikóta Ñandejára puévlogui ojeataka vove umi rrelihión fálsape? Jesús heʼi vaʼekue: “Umi ára noñemombykýiramo, ni peteĩ yvypóra ndojesalvamoʼãi, péro umi ojeporavo vaʼekue rehehápe, umi ára oñemombykýta” (Mat. 24:22). Áño 66-pe, Jehová ndohejái kuri umi rrománo oataka Jerusalén. Upéicha rupi “umi ojeporavo vaʼekue”, térã umi kristiáno unhído ikatu kuri osẽ upégui. Ñane tiémpope oikóta avei upéicha. Jehová ndohejamoʼãi umi goviérno ohundi ‘umi ojeporavo vaʼekuépe’. Haʼe ojokoʼimíta pe primer atáke oikótava pe jehasa asy guasúpe, oprotehe hag̃ua ipuévlope (Apoc. 17:16). Upe rire pe situasión oñekalmamiéta peteĩ tiempoʼimíre. w15 15/7 2:5, 6

Satanás siémpre ‘oñehaʼãmbaite ñandereity iñuhãme’. Péro káda uno jadesidi vaʼerã jarrechasátapa umi tentasión térãpa nahániri (Mat. 6:13; Sant. 1:13-15). Ñapensamína Jesús ojapo vaʼekuére Satanás omoñuhãsérõ guare chupe. Haʼe pyaʼe voi orrechasa pe tentasión ha upepete osita Ñandejára Ñeʼẽ heʼíva. Jesús odesidi iñeʼẽrendu Jehovápe. Upéicharõ jepe Satanás noñentregái, ohaʼarõ ótro moménto oprova jey hag̃ua chupe (Luc. 4:13). Péro Jesús siémpre iñeʼẽrendu Itúvape. Ñanemanduʼa vaʼerã Satanás ñandeprovaha avei oipotágui jadesovedese Jehovápe. Umi mbaʼe Satanás okuestiona vaʼekue noñesolusionambái gueteri. Upévare Jehová oheja gueteri Satanáspe ñandeprova. Péro siémpre ñanemanduʼa vaʼerã ndahaʼeiha Jehová la omoĩva ñandéve umi tentasión. Haʼe ojeroviaiterei ñaneñeʼẽrendutaha chupe ha ñanepytyvõse upearã. Péro Jehová nañandejopýi jajapo hag̃ua haʼe heʼíva, síno oheja káda uno jadesidi. ¿Mbaʼépa jajapo vaʼerã ani hag̃ua jaʼa Satanás ñuhãme? Jajapo vaʼerã mokõi mbaʼe: Primero, jakuida vaʼerã ñane amista Jehovándi, ha segundo, siémpre jajerure vaʼerã chupe tañanepytyvõ. w15 15/6 5:13, 14

Oiméramo jahechakuaa jafavorese térã jaladeaha peteĩ grúpo de persónape, pyaʼe ñakambia vaʼerã (Rom. 14:19). Jahechamína peteĩ ermána hérava Mirta ehémplo. Haʼe onase peteĩ país héra vaʼekuépe Yugoslavia, ha okakuaa peteĩ lugár ndojechaʼeihápe umi hénte oikóvare Sérbiape. Péro upéi ou oaprende Jehovápe g̃uarã entéro rrása peteĩchanteha. Avei oaprende Satanás oipotaha umi hénte ndaijaʼéi ojuehe. Upévare, oñehaʼãmbaite okambia hag̃ua. Péro oikórõ guare peteĩ gérra pe lugár Mirta oikohápe, haʼe oñepyrũ jey ndochaʼéi umi sérbiore, ha ni ndopredikaséi voi chupekuéra. Haʼe oikuaa porã upéva noĩporãiha. Upévare, oñemboʼe Jehovápe ha ojerure chupe oipeʼamínte hag̃ua ikorasõgui umi sentimiénto vai. Mirta heʼi: “Ahechakuaa pe predikasión chepytyvõtaha, upévare asẽve apredika. Añehaʼãmbaite asegi Jehová ehémplo ha añeinteresa umi héntere. Upéva tuichaiterei chepytyvõ aipeʼaite hag̃ua pe ódio che korasõgui”. w15 15/7 3:11-13

Pe rréi Judagua hérava Jehosafat odesidi vai vaʼekue ha omoirũ pe rréi de Israélpe oñorairõ hag̃ua umi sírio kóntrape. Oĩ kuri 400 proféta fálso heʼíva pe rréi de Israélpe oganataha pe gérra. Péro Jehová proféta hérava Micaya heʼi Jehosafátpe operdetaha hikuái ohóramo oñorairõ. Ha upeichaite oiko. Pe rréi Israelgua omano pe gerrahápe, ha Jehosafat katu apenaite ojesalva. Upéi Jehová omondo Jehúpe okorrehi hag̃ua Jehosafátpe odesidi vai haguére, péro heʼika avei chupe: “Oĩ iporãva rejapo vaʼekue” (2 Crón. 18:4, 5, 18-22, 33, 34; 19:1-3). Péro upéi Jehosafat ou odesidi vai, upéicharõ jepe Jehová ndahesarái umi mbaʼe porã ojapo vaʼekuégui (2 Crón. 17:3-10). ¿Mbaʼépa ñanemboʼe ko ehémplo? Ñañehaʼãramo jaservi Jehovápe, haʼe ñanderayhúta ha ndahesaraimoʼãi umi mbaʼe porã jajapo vaʼekuégui, jepe sapyʼánte jajavy henondépe. w15 15/8 1:8, 9

¿Mbaʼéichapa ikatu koʼág̃a guivéma jajeprepara jaiko hag̃ua pe paraísope? Ñapensamína ko ehémplore: Peteĩ persóna ovátava ótro paíspe katuete ojeprepara upearã. Por ehémplo, oaprende pe idióma oñeñeʼẽva upépe, umi kostúmbre, ha ikatúramo otantea mimi hembiʼukuéra. Péicha avei ñande ikatúma jajeprepara koʼág̃a guive jaiko hag̃ua pe paraísope. Jaikóma vaʼerã ku ñaimerõguáicha upépe. Péro heta persóna opensa natekotevẽiha iñeʼẽrendu Ñandejárape ha ikatuha ojapo ojaposéva. ¿Mbaʼe konsekuénsiapa ogueru upéva? Umi hénte osufrieterei ha ndovyʼái (Jer. 10:23). Péro ñande jaikuaa Jehová haʼeha peteĩ governánte oporohayhúva, upévare jaovedese chupe. ¡Ajépa javyʼaitéta pe paraísope, oĩtahápe umi iñeʼẽrendúva Ñandejárape añoite! w15 15/8 3:4, 5

Oiméramo ñamendase hína, tekotevẽ ñañatende porã mávapepa jaiporavóta ñane ména térã ñane rembirekorã. La Biblia avei heʼi ñamenda vaʼerãha ‘peteĩ ojeroviávare ñande Ruvicháre’ añoite (1 Cor. 7:39). Upéva heʼise ñamenda vaʼerãha peteĩ testígo de Jehová vautisádore ha orrespetáva Ñandejára léi. Ñamendáramo peteĩ ohayhúvare Jehovápe, upe persóna katuete ñanepytyvõta jasegi hag̃ua jaservi Ñandejárape. Jehová oikuaa mbaʼépa pe iporãvéva ñandéve g̃uarã. Ha ymaite guive omanda isiervokuérape omenda vaʼerãha umi persóna oservívare chupe. Por ehémplo, heʼi vaʼekue umi isrraelítape ani hag̃ua omenda umi oadorávare ótro dióspe. ¿Mbaʼérepa? Pórke umichagua persóna omboligáta chupekuéra oadora hag̃ua avei umi dios fálsope. Upévare ojeʼe umi isrraelítape: “Ani pemenda hesekuéra. [...] Haʼekuéra omomombyrýta pene famíliape chehegui ha oñepyrũta oservi avei hikuái ótro dióspe” (Deut. 7:3, 4). w15 15/8 4:12, 13

Ñahekomboʼeséramo ñane konsiénsia, ndahaʼéi jaleénte vaʼerã la Biblia ha ñaaprende de memória heta mbaʼe oĩva pype. Tekotevẽ jastudia meme, jajepyʼamongeta pe jaleévare ha jajerure Jehovápe tañanepytyvõ jajapo hag̃ua umi mbaʼe ñaaprendéva. Jastudia jave la Biblia, ñañehaʼãmbaite vaʼerã jaikuaa porã Jehovápe ha jahecha mbaʼépa ogusta térã ndogustái chupe. Péicha ñahekomboʼéramo ñane konsiénsia, amás día ñapensáta Ñandejára opensaháicha. Sapyʼánte ningo ikatu nañandegustapái peteĩ mbaʼe odesidíva peteĩ ermáno, por ehémplo okuida lája isalúre. Péro ndovaléi jakritika ni jajopy chupe okambia hag̃ua opensáva. Ikatu hína pe ermáno ofalta ohekomboʼeve ikonsiénsia. Térã ikatu avei ñande hína la tekotevẽva ñahekomboʼeve ñane konsiénsia (1 Cor. 8:11, 12). w15 15/9 2:4, 8, 10

Jehová oprepara vaʼekue ko yvy ikatu hag̃uáicha jaikove pype. Hiʼarive ojapo voi chugui peteĩ lugár iporãitereíva, ikatuhápe javyʼa ha jaiko trankílo porã (Is. 45:18). Ñapensávo koʼã mbaʼére, katuete jahechakuaa Jehová ñanderayhuetereiha (Job 38:4, 7; Sal. 8:3-5). Jehová ohechauka avei ñanderayhuha ñandeapóvo ijoguaháramo (Gén. 1:27). Upéicha rupínte ikatu jahechakuaa haʼe ñanderayhuha ha ñande avei ikatu jahayhu chupe. Upéva ningo ñanembovyʼa, umi taʼýra ovyʼaháicha itúva odemostrávo ohayhuha chupekuéra. Jesús heʼi vaʼekue ovyʼaha “umi ohechakuaáva oikotevẽha Ñandejárare”. Upévare ñañemoag̃ui vaʼerã Jehováre (Mat. 5:3). La Biblia heʼi haʼe ‘omeʼẽrasapaha ñandéve opa mbaʼe ñanembovyʼáva’ (1 Tim. 6:17). Upéicharõ, ikatu hína ñaĩ segúro Jehová imbaʼeporãitereiha ha ñanderayhuha (Sal. 145:16). w15 15/9 4:6, 7

Pe kuimbaʼe ohai vaʼekue Salmo 42 okonfia vaʼekue Jehováre ohasa jave umi situasión ijetuʼúvare. Haʼe heʼi: “Chéngo ahaʼarõnte vaʼerã Ñandejára chepytyvõ. Haʼe ningo upe chesalváva, upévare asegíta amombaʼeguasu che Járape. Ñandejára, ndaikuaavéima mbaʼépa ajapóta. Chemanduʼa nderehe” (Sal. 42:5, 6, NM). ¿Ndépa rekonfia avei Jehováre? Katuete ningo rekonfiáma voi hese, upéicharõ jepe enterovéva ikatu ñakonfiave Ñandejárare. La Biblia heʼi: “Ejerovia [Jehováre] nde pyʼaite guive, ha ani ndejehe añónte. Eikuaáke haʼe oĩha opárupi, ha haʼe omyesakãtaha ndéve nde rape” (Prov. 3:5, 6). Jahecha haguéicha, Jehová raẽve ñanderayhu vaʼekue, ha péicha omoĩ ñandéve la ehémplo (1 Juan 4:19). Siémpre ñapensa vaʼerã umi mbaʼe ojapóvare ñanderehehápe, ha ñanemanduʼa mbaʼeichaitépa ñanderayhu. Jahechaukákena jahayhuha chupe ‘ñande pyʼaite guive, ñane álma rugua guive ha opa ñane arandu ha ñane mbaretekue reheve’ (Mar. 12:30). w15 15/9 5:17-19

Ikatu hag̃uáicha ñande fe imbareteve, tekotevẽ avei ñamboʼe ñande rapichakuérape pe marandu porã oĩva la Bíbliape. Jajapóvo upéva, ñakonfiave Jehováre ha avei ñandepyʼaguasu umi kristiáno ypykuéicha (Hech. 4:17-20; 13:46). Jahechakuaávo mbaʼéichapa Jehová okontesta ñane orasión ha ñanepytyvõ, jajeroviave hese. Upéva oiko vaʼekue Josué ha Caleb rehe. Haʼekuéra ohórõ guare oespia pe Tiérra Prometída, ohechauka okonfiaitereiha Jehováre. Ha ohasávo pe tiémpo, ife imbareteve, pórke okomprova Ñandejára siémpre oipytyvõha chupekuéra. Upévare Josué heʼi umi isrraelítape Jehová siémpre okumpliha opa mbaʼe oprometéva. Heʼi chupekuéra: “Pemombaʼéke Ñandejárape ha pejapo hembipota” (Jos. 23:14; 24:14). Ñande avei ñakonfiáramo Jehováre ha jahechakuaa haʼe ñanepytyvõha, katuete ñande fe imbaretevéta (Sal. 34:8). w15 15/10 2:10, 11

¿Mbaʼe mbaʼérehepa ikatu avei jajepyʼamongeta? Oiméramo ñaanota raʼe algúna kósa rreunionhápe térã asambléape, iporã vaʼerã jarrepasáramo umíva ha ñañeporandu: “¿Mbaʼépa chemboʼe la Bíbliagui ha Ñandejára organisasióngui?”. Avei ikatu ñapensa umi mbaʼe jaleévare rrevísta Ñemañaha ha ¡Despertad!-pe, ha umi puvlikasión osẽvare ñane asambleakuérape. Jalee jave Anuáriope algún ermáno rembiasakue, ñañemotiémpo vaʼerã ñapensa hag̃ua iñehémplore, ikatu hag̃uáicha opoko ñane korasõre. Ha jalee jave umi puvlikasión, iporã ñamarka umi púnto iñimportantevéva, térã ñaanota hese algúna idéa ideprovéchotava ñandéve. Upéva ñanepytyvõta ñanemanduʼa hag̃ua umi mbaʼe iñimportantevévare. Upéi ikatu jaipuru pe informasión japrepara hag̃ua diskúrso, javisita jave peteĩ ermánope térã peteĩ persóna ohendu porãvape pe predikasión. Péro ikatu hag̃uáicha pe informasión og̃uahẽ ñane korasõme ha jaagradese Jehovápe, tekotevẽ japausaʼimi ha ñapensa porã la jaleévare. w15 15/10 4:9, 10

Sy ha túva haʼéva testígo de Jehová ovyʼaiterei ifamiliakuéra ojevautisa jave. Peteĩ ermána hérava Berenice, cuatro imemby ha entéro ojevautisa vaʼekue okumpli mboyve 14 áño. Haʼe omombeʼu: “Che ména ha che ningo rovyʼaiterei entéro ore família odesidi haguére oservi Jehovápe. Péro roikuaa avei haʼekuéra ikariaʼy ha ikuñataĩha ohóvo, ha ombohovaitaha gueteri heta mbaʼe ijetuʼúva”. Peteĩ sikólogo heʼi oĩha túva opensáva ifamíliape ogustaha vyroreínte koʼã edápe, ha oñekomportaha mitãicha. Péro ko sikólogo heʼi umi mitãrusu ha mitakuña orekoha heta idéa porã, ikyreʼỹeterei voi ojapo hag̃ua heta mbaʼe, ha oikotevẽha ohasa tiémpo iñamigokuérandi. Añetehápe mitãrusukuéra ikatu ojapo heta mbaʼe porã. Por ehémplo, ikatu oiko Jehová amígoramo, ojapo haguéicha Jesús imitãrusúrõ guare. w15 15/11 2:1, 2

Jehová ohechauka ñanderayhuha pe Rréino Mesiániko rupive. Upéva haʼe hína peteĩ goviérno Ñandejára voi omoĩva, ha oiporavo peteĩ governánte ohayhúva yvyporakuérape, ha ikatupyrýva ogoverna hag̃ua (Prov. 8:31). Ko governánte hína Jesucristo, pe Mesías. Avei Ñandejára oiporavo 144.000 kristiáno ogoverna hag̃ua yvágape Crístondi. Koʼã persóna ohasa heta mbaʼe ko yvy ape ári, ha pe experiénsia orekóva oipytyvõta chupekuéra ogoverna porã hag̃ua (Apoc. 14:1). Jesús oĩrõ guare ko yvy ape ári ohechauka Ñandejára Rréino iñimportantetereiha chupe g̃uarã, upévare heʼi idisipulokuérape oñemboʼe hag̃ua pe Rréinore ha umi vendisión oguerútavare. La Biblia ohechauka Ñandejára Rréino oñepyrũ hague ogoverna yvágape áño 1914-pe, ha upérõ oñepyrũ avei Cristo presénsia. Ha Cristo presénsia aja oñembyaty hína umi unhído ofaltáva oñekompleta hag̃ua umi 144.000 ogovernátava Jesúsndi yvágape. Avei oñembyaty “peteĩ aty guasu” ojesalvátava oñehundi vove ko múndo aña, ha koʼãva ikatúta oiko pe paraísope (Apoc. 7:9, 13, 14). w15 15/11 3:16, 18

Ñepyrũrã Jehová okrea vaʼekue Jesúspe. La Biblia ohenói chupe “pe Ñeʼẽ” (Juan 1:1; Apoc. 3:14). Jehová oñekomunika vaʼekue hendive ha omombeʼu chupe opensáva ha oñandúva (Juan 1:14, 17; Col. 1:15). Apóstol Pablo heʼi avei umi anhelkuéra oñekomunikaha oñondive ha orekoha ‘iñidióma’. Péro ko idióma idiferenteterei yvyporakuéra oñeʼẽvagui (1 Cor. 13:1). Jehová oikuaa porãiterei entéro umi ánhel ha yvyporakuéra okrea vaʼekuépe. Haʼe ikatu ohendu hetaiterei ñemboʼe al mísmo tiémpo, tahaʼe haʼéva idiómape. Ha upe aja ogia avei umi ánhelpe ha oñekomunika hendivekuéra. Ñandejára ikatu ojapo koʼã mbaʼe, pórke haʼe tuichave ha iñarandueteve ñandehegui, tahaʼe opensa lája ha oñekomunika lája (Is. 55:8, 9). Jehová ningo oñekomunika ñanendive de fórma sensílla, ikatu hag̃uáicha ñantende porã chupe. w15 15/12 1:1, 2

Heta paíspe umi Biblia hepyeterei oñevende ha hasy oñekonsegi hag̃ua. Upévare saʼieterei oĩ orekóva peteĩ Biblia. Por ehémplo, Ruándape heta persóna ostudiáva umi Testígondi, ndaikatúi oprogresa pórke ndorekói Biblia. Pe rrelihión upepegua hepyeterei ovende ha hasy oñentende porã hag̃ua. Osẽ rire pe Traducción del Nuevo Mundo iñidiomakuérape, peteĩ família heʼi: “Roagradeseterei Jehovápe ha pe tembiguái jeroviahápe omeʼẽ haguére oréve ko Biblia. Ore ningo ndaikatúi vaʼekue rojogua peteĩ Biblia káda únope g̃uarã, pórke ndoroguerekói la hepyrã. Péro koʼág̃a katu enterovetéva rorekóma la Biblia. Ha káda día rolee en família, rohechauka hag̃ua Jehovápe roagradeseha chupe”. w15 15/12 2:15, 16

Salmo 41 omombeʼu David hasyete hague. Amalisia upérõ haʼe ojepyʼapyeterei pórke itaʼýra Absalón oipeʼase chugui irréino. Péro David hasyete ha ndaikatúi ojapo mbaʼeve. Avei haʼe oikuaa porã orekoha provléma ifamíliape opeka haguére Bat-seba ndive (2 Sam. 12:7-14). ¿Mbaʼépa ojapo ojechávo ko situasiónpe? David oikuaa porã Jehová operdonáma hague ipekádo, upévare ojerure chupe ajúda hasyetérõ guare (Sal. 41:3). Upéicharõ, ¿oipotápa raʼe David Jehová omonguera chupe peteĩ milágro rupive? Nahániri. Haʼe oikuaa Ñandejára oñangarekoha ‘umi oipytyvõvare umi imboriahúvape’, ha oipota péichante avei oñangareko hese. David ningo Jehová amigoite ha upévare ojerure chupe konsuélo ha oñangarekomi hag̃ua hese hasy aja. Ojerure avei Ñandejárape toipytyvõ chupe ojerrekupera jey hag̃ua. Ñande avei ikatu jajerure koʼã mbaʼe Jehovápe (Sal. 103:3). w15 15/12 4:8, 9

Umi orresivíva ko invitasión ijojahaʼỹva noikotevẽi ótra persóna okonfirma chupekuéra ojeporavoha espíritu rupive. Jehová voi oñenkarga ani hag̃ua oduda. Apóstol Juan heʼi koʼã kristiánope: “Peẽme katu pendeporavo Ñandejára Imarangatúva, ha enterove peikuaa pe añetegua. Peẽme katu Ñandejára pendeporavo ipodér rupive, ha upéva opyta pene korasõme, ha napeikotevẽi avave penemboʼe. Pe podér oúva chugui añete hína, ndaijapúi ha penemboʼe opa mbaʼe. Pesegíkena pepyta hendive” (1 Juan 2:20, 27). Koʼápe Juan ndeʼiséi kuri umi unhído natekotevẽiha orresivi pe enseñánsa oúva Jehovágui. Haʼekuéra oikotevẽ avei upe enseñánsa umi ótro kristiánoicha. Juan ohechaukánte natekotevẽiha avave okonfirma chupekuéra oñeinvitaha oho hag̃ua yvágape. ¿Mbaʼérepa? Pórke pe espíritu sánto, haʼéva hína pe fuérsa ipoderosovéva ko univérsope, okonfirmáma chupekuéra upéva. w16.01 3:9, 10

Jajeroviáramo Jehováre, javyʼáta umi mbaʼe jarekomívare. ¿Mbaʼéichapa upéva ñanepytyvõ jahechauka hag̃ua jahayhuha ñane ermanokuérape? Ñañekontentáramo umi mbaʼe jarekóvare, jahechakuaáta ñane ermáno ha ermanakuéra iñimportanteveha umi mbaʼerepy ha pe plátagui (1 Tim. 6:6-8). Ndajaikomoʼãi jakritika ótrore, ni ndajajekehamoʼãi umi situasión jahasávagui. Avei nañaenvidiamoʼãi avavépe, ni ndajaikomoʼãi jaipota potave umi kósa materiál. Upéva rangue, ñañehaʼãmbaitéta ñandepojera opa ikatúvandi (1 Tim. 6:17-19). Avei jajeroviáramo Jehováre, ñanekyreʼỹta ha ndajakyhyjemoʼãi ñambohovái hag̃ua umi provléma ijetuʼúva, síno ñandepositívota (Heb. 13:6). Upéva ñanepytyvõta ñaanima ha ñakonsola hag̃ua ñane ermanokuérape (1 Tes. 5:14, 15). Avei jajeroviáramo Jehováre, og̃uahẽ vove pe jehasa asy guasu ‘ñañemboʼy ha ñañakãrapuʼãta’, pórke jaikuaa haʼe pyaʼe ñandesalvataha (Luc. 21:25-28). w16.01 1:16, 17

Heta tiémpore, umi kristiáno hoʼúva pe pan ha pe víno Konmemorasionhápe saʼive vaʼekue oúvo. Péro umi áño ohasa ramóvape heta hetave. ¿Jajepyʼapy vaʼerãpa upe haguére? Nahániri. Jehová oikuaa mávapa haʼe unhído ha mávapa ndahaʼéi. Konmemorasionhápe siémpre oñekonta mboýpa oĩ hoʼúva pe pan ha pe víno, péro upéva ndeʼiséi ojekuaatamaha mboy unhídopa hemby ko yvy ape ári. ¿Mbaʼérepa jaʼe upéva? Pórke pe kantida totál oñekontávape, oike avei umi oimoʼãva haʼeha unhído. Por ehémplo, oĩ orekóva depresión, oñekevrantaitereíva, térã opensaitereíva pe esperánsa selestiálre ha oimoʼãma haʼeha unhído. Ótro katu hoʼúmi vaʼekue pe pan ha pe víno, péro upe rire ndojapovéi upéva. Opa umívare, ndajaikuaái mboy unhídopa hemby ko yvy ape ári. Ha la Biblia ndeʼíri mboýpa oĩta ág̃a oñepyrũ vove pe jehasa asy guasu. w16.01 4:12-14