Julio

Pe fráse “perresivi porã” ojepurúva ko téxtope, heʼise hína “peneamávle umi extráñondi”. Oiméne ñanemanduʼa Abrahán ha Lot ehémplore. Haʼekuéra ningo iñamavleterei ha orresivi hógape umi deskonosídope jepe. Upe riréntema oñentera hikuái umi extráño ovisita vaʼekue chupekuéra haʼe hague ánhel (Gén. 18:2-5; 19:1-3). ¿Mbaʼéichapa ikatu jahechauka japororresivi porãha? Ikatu ñainvita umi ermánope ñande rógape okaru hag̃ua, térã jahasa porã hag̃ua oñondive sapyʼaitemi jepe. Natekotevẽi ningo jajapo peteĩ karu guasu, ni jagasta heta. Ha ani ñainvita sólamente umi orekóvape omyengovia jey hag̃ua ñandéve (Luc. 10:42; 14:12-14). Ñande ñainvita ñane ermanokuérape ñañomokyreʼỹ hag̃ua, ndahaʼéi jajechauka hag̃ua. Ha pe superintendénte de sirkuíto ha hembireko ovisita jave ñane kongregasión, ñañehaʼã avei ñainvita koʼã ermánope ñande rógape, ndajaikuaaporãiramo jepe chupekuéra (3 Juan 5-8). Ñanerembiapo hetáramo jepe, ñañehaʼãmbaite ‘jarresivi porã ñande rapichakuérape’. w16.01 1:11, 12

Ñandejára omeʼẽ umi unhídope espíritu sánto kómo garantía, ikatu hag̃uáicha ohechauka chupekuéra mbaʼeichagua esperánsapa oreko hikuái. Upévare haʼekuéra ni michĩmi ndodudái ojeporavo hague oho hag̃ua yvágape (2 Cor. 1:21, 22; 5:5). Haʼekuéra oĩ segúro oñeinvitaha oho hag̃ua yvágape, péro orresivíta hikuái irrekompénsa sólamente osegíramo iñeʼẽrendu ipyʼaite guive Ñandejárape ipahaite peve. Upévare Pedro heʼi vaʼekue umi ermáno unhídope: “Peẽme ningo che ermanokuéra Ñandejára penerenói ha pendeporavo vaʼekue, upévare peñehaʼãmbaitéke haʼe akóinte pendeguerohory hag̃ua. Pesegíramo pejapo koʼã mbaʼe, ni mbaʼevéicharõ napeñepysangamoʼãi. Añetehápe, upéicha peẽ tuichaiterei pejehovasáta ha peikéta ñande Ruvicha ha Salvadór Jesucristo Rréinope; upe Rréino ndopamoʼãi arakaʼeve” (2 Ped. 1:10, 11). Jahechaháicha, káda uno umi unhído osegi vaʼerã iñeʼẽrendu Jehovápe. Peichaʼỹrõ ndovalemoʼãi mbaʼeverã chupekuéra pe invitasión porãite orresivi vaʼekue (Heb. 3:1; Apoc. 2:10). w16.01 3:6, 7

Naiporãi ñambotuicha ñande rapichápe, térã jatrata porãve chupe unhído haguérente. Por ehémplo, la Biblia heʼi jajerovia vaʼerãha Ñandejárare umi ansiáno ojapoháicha. Péro ndeʼíri oiko vaʼerãha ñandehegui peteĩ umáno segidór (Heb. 13:7). La Biblia heʼi avei oĩha kristiáno tekotevẽva “ojerrespetave”, péro ndahaʼéi unhído haguére, síno ombaʼapo jejopy rupi “oñeʼẽ ha oporomboʼe hag̃ua” (1 Tim. 5:17). Ñameʼẽramo preferénsia umi unhídope, ikatu otĩ hikuái, térã ivaiveha, ikatu voi oñepyrũ oñemombaʼeguasu (Rom. 12:3). ¡Ajépa ndajaipotaiete oiko upéva! Ñañatendékena ani hag̃ua ñambotropesa Cristo ermanokuérape (Luc. 17:2). w16.01 4:9

Pe amista ningo peteĩ mbaʼe ivaliosoitereíva, péro odura hag̃ua tekotevẽ ñanerakateʼỹ hese. Pe amista ndojoguái peteĩ jóyape jaipurúva adornorãnte. Síno ikatu ñakompara peteĩ plántare, pórke tekotevẽ ñañangareko hese. Abrahán ovaloraiterei vaʼekue pe amista orekóva Jehovándi, upévare siémpre hakateʼỹ hese. ¿Mbaʼéichapa ojapo upéva? Abrahán siémpre iñeʼẽrendu ha orrespeta Ñandejárape. Por ehémplo, oviaha aja hogayguakuéra ha isirvientekuérandi pe tetã Ñandejára heʼihápe chupe, siémpre oreko enkuénta Jehovápe odesidíta jave, tahaʼe umi mbaʼe iñimportántevape térã naiñimportanteguasúivape. Un áño Isaac onase mboyve, Jehová omanda Abrahánpe osirkunsida hag̃ua entéro umi kuimbaʼépe oĩva ikárgope. Upe tiémpope haʼe orekóma 99 áño. ¿Mbaʼépa ojapo Abrahán? ¿Oñemoĩpa okuestiona Jehová ojeruréva chupe? ¿Ohekápa exkúsa ani hag̃ua okumpli Ñandejára mandáto? Ni mbaʼevéicharõ. Upéva rangue, ojerovia Jehováre ha ojapo “heʼi hagueichaite chupe” (Gén. 17:10-14, 23, NM). w16.02 1:9, 10

Peteĩ mitãʼi ha mitãkuñaʼi jepe ikatu oikuaa mbaʼépa oĩ porã térã mbaʼépa oĩ vai, ha ikatu avei ontende porã mbaʼépa heʼise jajededika Jehovápe. Upévare, peteĩ mitãrusu ohechaukáramo iñakãguapymaha ha ojededikáma Jehovápe, iporã vaʼerã ojevautisáramo (Prov. 20:7). ¿Mbaʼépa heʼise peteĩ persóna iñakãguapymaha? Upéva nodependéi ijedáre térã okakuaapáma haguére. La Biblia heʼi umi persóna iñakãguapývare ‘oipuru memeha iñakã ha upévare ikatupyryha oikuaa hag̃ua mbaʼépa iporã ha mbaʼépa ivai’ (Heb. 5:14). Ko téxto ohechauka peteĩ persóna iñakãguapýva oikuaaha mbaʼépa oĩ porã, ha ojapose voi upéva ipyʼaite guive. Avei oñehaʼãmbaite ani hag̃ua ojapo ivaíva, ha natekotevẽi manterei oñemomanduʼa chupe ojapo hag̃ua iporãva. Upéicharõ, rejedesidíramo rejevautisa, oñehaʼarõta ndehegui reaktua porã, nde tuakuéra térã ótra persóna nanderecháiramo jepe (Filip. 2:12). w16.03 1:4, 5

Jonatán oñesorprende ohechárõ guare David ojuka hague peteĩ higántepe hérava Goliat. Upéi David oraha “ipópe pe filistéo akã” Jonatán túape, haʼéva rréi Saúl (1 Sam. 17:57, NM). Jonatán oĩ segúro Jehová oĩha David ndive. La Biblia heʼi: “Upe guive Jonatán ohayhu chupe ha opyta oñoamigoite hikuái”. Haʼekuéra “ojapo peteĩ kompromíso oñoamigoite hag̃ua” (1 Sam. 18:1-3, NM). Jonatán oikove aja pukukue, ohechauka ohayhuha iñamígope. Jonatán opyta vaʼerã kuri rréiramo itúa rekovia, péro Jehová ndoelehíri chupe, síno oiporavo Davídpe. Péro Jonatán noñeakontrariái David rehe, upéva rangue oapoja chupe opa mbaʼépe. Por ehémplo, Saúl ohekárõ guare Davídpe ojuka hag̃ua chupe, Jonatán ojepyʼapyeterei hese. Haʼe oikuaa David okañyha oikóvo peteĩ desiértope Hórespe, oĩva Judápe. Upémarõ oho hendápe ha omokyreʼỹ chupe “osegi hag̃ua ojerovia Jehováre”, ha heʼi pe jaleéva pe téxto kostediaguápe (1 Sam. 23:16, NM). w16.02 3:1, 2

Jehová okrea vaʼekue Jesúspe raẽvete, ha upéi ombaʼapo hikuái oñondive ojapo hag̃ua opaite mbaʼe. Jesús ombaʼapo Itúandi “peteĩ travahadór ivaletereívaicha”. Upeichaite avei Ñandejára siervokuéra, siémpre ombaʼapo peteĩ ñeʼẽme. Por ehémplo, Noé ha ifamília ombaʼapo oñondive ojapo hag̃ua pe árka. Heta áño upe rire, umi isrraelíta ombaʼapo avei oñondivepa ojapo hag̃ua pe tavernákulo. Ha oviaháta jave hikuái ótro lugárpe, oñopytyvõmba ikatu hag̃uáicha odesarma pe tavernákulo, oraha ha upéi oarma jey hag̃ua. Avei pe témplope, haʼekuéra opurahéi oñondivepa ha ombopu músika ombotuicha hag̃ua Jehovápe. Ñandejára siervokuéra ojapo koʼã mbaʼe oĩ rupi unído ha ombaʼapo rupi oñondivepa (Gén. 6:14-16, 22; Núm. 4:4-32; 1 Crón. 25:1-8). Umi kristiáno ypykue siémpre ombaʼapo avei oñondivepa. Pablo heʼi vaʼekue káda kristiáno idiferenteha ha ikatupyryha peteĩ mbaʼépe, ha káda únope oñenkargaha “diferénte tembiapo”. Péro amo ipahápe entéro oĩ unído pórke osegi Jesucristo ehémplo. Pablo okompara pe kongregasión peteĩ kuérpore orekóva diferénte párte, péro ombaʼapo porãmbáva oñondivepa (1 Cor. 12:4-6, 12). w16.03 3:1, 2

Yma ningo umi oserviséva Jehovápe péro ndahaʼéiva isrraelíta, oho vaʼerã Israélpe oĩháme Ñandejára puévlo (1 Rey. 8:41-43). Péro upéi Jesús omanda umi idisípulope pe oĩva pe téxto kostediaguápe. Pentekostés áño 33-pe, Jehová ohechauka porã vaʼekue oipotaha isiervokuéra opredika ko yvy tuichakuére. Upe díape, 120 persóna oĩva pe kongregasión pyahúpe orresivi espíritu sánto. Haʼekuéra oñepyrũ opredika diferénte idiómape, tahaʼe umi hudíope térã umi persóna ótro tetãgua oike vaʼekuépe avei rrelihión hudíape (Hech. 2:4-11). Upéi oñepyrũ hikuái opredika umi samaritánope. Ha áño 36-pe oñepyrũ opredika umi ndahaʼéivape hudío. Péicha jahecha kristianokuéra opredika vaʼerãha enterove héntepe oĩva opaichagua lugárpe. w16.03 4:12

Jehová siervokuéra oikuaa porã tekotevẽha oñentrena ikatu hag̃uáicha osẽ porã chupekuéra opa mbaʼe. Por ehémplo, Abrahán oraha kuri hendive heta kuimbaʼe oñorairõkuaáva orreskata hag̃ua Lot ha ifamiliakuérape umi iñenemígogui, ha ogana kuri hikuái (Gén. 14:14-16). David tiémpope avei oĩ vaʼekue heta persóna oñensaja meméva opurahéi hag̃ua Jehovápe (1 Crón. 25:7). Ñande avei koʼág̃a tekotevẽ ñañembokatupyry. ¿Maʼerãpa? Primero, pórke ñañorairõ vaʼerã Satanás ha imúndo kóntrape (Efes. 6:11-13). Segundo, ñañembokatupyry vaʼerã ñamombaʼeguasu hag̃ua Jehovápe opa mbaʼe jajapóvape (Heb. 13:15, 16). Ñandejára siervokuéra yma guare ojapo haguéicha, ñande avei tekotevẽ ñañentrena osẽ porã hag̃ua ñandéve entéro mbaʼe. Ha Jehová oheja ansianokuéra kárgope ombokatupyry hag̃ua umi ermánope kongregasiónpe. Peteĩ ansiáno ombokatupyrýtava peteĩ ermánope, oprepara raẽ vaʼerã chupe. Upearã ikatu ohesaʼỹijo hendive unos kuánto téxto oipytyvõtava chupe ojapose hag̃ua opa mbaʼe oaprendétava (1 Tim. 4:6). w15 15/4 2:1, 2

Upéva ndeʼiséi Satanás voi ikatuha ojukapaite umi persónape. Upéicharõ, ¿mbaʼére la Biblia heʼi hese ikatuha oporojuka? Primero, pórke haʼe omoñañamba umi héntepe, upévare ou hikuái ndaijaʼéi ojuehe ha iviolénto. Segundo, pórke Adán ha Eva opeka ikúlpare, ha upévare entéro japeka ha ñamano (Rom. 5:12). Ndareíri Jesús heʼi Satanás ‘oporojukaha’ (Juan 8:44). Añetehápe, opa umívare ikatu jaʼe Satanás ipoderosoitereiha. Ñañemoĩvo Satanás kóntrape, ñañemoĩ avei isegidorkuéra kóntrape. Ha umíva apytépe oĩ hína umi demónio, haʼéva umi ánhel opuʼã vaʼekue Ñandejárare (Apoc. 12:3, 4). La Bíbliape oĩ heta ehémplo ohechaukáva umi demónio imbareteveha ñandehegui ha ikatuha ñanembohasa asyeterei (Mat. 8:28-32; Mar. 5:1-5). Aníkena ñanderesarái Satanás ha umi demónio ipoderosoitereiha (Mat. 9:34). Péro Jehová ñanepytyvõramo ikatúta ñandepuʼaka hesekuéra. w15 15/5 1:6, 7

Ikatu ningo rehechakuaa ndestiraha pe inmoralida sexuál. Oiméramo upéicha hína, primeroite rerrekonose vaʼerã rerekoha upe devilida (Rom. 7:22, 23). Eñemboʼe Jehovápe ha ejerure chupe tanemombarete (Filip. 4:6, 7, 13). Ani voi reñemoĩ umi situasión ikatutahápe reʼa upe pekádope (Prov. 22:3). Ha oñepresenta jave ndéve peteĩ tentasión, upepete remboyke vaʼerã (Gén. 39:12). ¿Mbaʼépa ojapo vaʼekue Jesús omoñuhãsérõ guare chupe Satanás? Jesúspe nombotavýi umi mbaʼe Satanás oprometéva chupe. Haʼe noñepyrũi opensa umi mbaʼére, síno ensegída orrechasa. Upepete voi oipuru Ñandejára Ñeʼẽ ha heʼi: “Ñandejára Ñeʼẽme ojehai” (Mat. 4:4-10). ¿Mbaʼépa ñaaprende Jesús ehémplogui? Jahecha haʼe oikuaa porã hague Ñandejára Ñeʼẽ. Upévare, Satanás omoñuhãsérõ guare chupe, pyaʼe voi ou iñakãme umi téxto oĩva Ñandejára Ñeʼẽme. Ñande avei, ñandepuʼaka hag̃ua Satanásre, jajehekyiete vaʼerã umi tentasión ikatúvagui ñandegueraha inmoralida sexuálpe. w15 15/5 2:15, 16

Jehová ningo iñarandueterei ha oikuaapaite mbaʼépa oikóta amo gotyove. Ñande katu ndajaikuaái ñane renonderã, péro ikatu ñanearandu. Upévare, jadesidi mboyve peteĩ mbaʼe ñañeimahináma vaʼerã mbaʼéichapa ñandeafektáta ñandéve ha umi ótra persónape. Aníkena jajogua umi isrraelítape. Ñamoĩmína peteĩ ehémplo ñantende hag̃ua mbaʼéichapa jahechauka hína ñanearanduha. Ñamoĩ chupe nde reĩha de nóvio. Oime vaʼerã sapyʼánte rehechakuaa ijetuʼuha rekontrola hag̃ua umi mbaʼe repensáva ha reñandúva. ¿Mbaʼéichapa rehechaukáta upéicha jave nearanduha? Reevita vaʼerã umi situasión ikatúva ndereity inmoralida sexuálpe. Aníkena arakaʼeve rejapo mbaʼeve nemoĩ vaítava Jehovándi. Ha siémpre nemanduʼa vaʼerã Jehová oipotaha rejeporta porã. Péicha rejehekýita heta provlémagui (Prov. 22:3). w15 15/5 4:10, 11

Ñanemanduʼámína mbaʼépa oiko vaʼekue rréi David rehe. La Biblia omombeʼu haʼe oĩ hague hóga terrásape ha upe guive ohecha “peteĩ kuña porãite ojahúva” (2 Sam. 11:2). Ko kuña ningo omendáva, péro David omaña rangue ótro ládo, osegi omaña hese ha ndoipeʼái chupe iñakãgui. Amo ipahápe, pe deséo vai ipuʼaka hese ha oreko hendive rrelasión sexuál. Job haʼe avei peteĩ ehémplo iporãitereíva ñandéve g̃uarã. Haʼe heʼi: “Che adesidíma peteĩ mbaʼe, ni mbaʼevéicharõ ndaikomoʼãi amaña ni cheakãraku ótro kuñáre” (Job 31:1, 7, 9, NM). ¿Mbaʼérepa iñimportánte jasegi Job ehémplo? Pórke péicha ndajarekomoʼãi deséo vai. ¿Mbaʼéichapa ikatu jajapo Job ojapo haguéicha? Jajedesidi vaʼerã ndajadeseamoʼãiha peteĩ ndahaʼéivape ñande paréha. Ha oiméramo osẽ peteĩ taʼanga tieʼỹ télepe, komputadórape, kartélpe, diáriope, rrevístape, térã oimeraẽ ótro lugárpe, pyaʼe voi ñamaña vaʼerã ótro ládo. Ha oiméramo rehechakuaa tekotevẽha rekambia algúna kósape, pyaʼe rekambia vaʼerã. Ñaneñeʼẽrendúramo Jehovápe, jajehekýita pe inmoralida sexuálgui ha siémpre ñanderekopotĩta (Sant. 1:21-25). w15 15/6 3:12-14

Jesús ojevautisa riremi, “pe Aña ou omoñuhã hag̃ua chupe”. Ko mbaʼe ohechauka ñandéve mbaʼérepa tekotevẽ jajerure pe téxtope jaleéva (Mat. 4:1). Jaikuaaháicha, Jesús ou oprova hag̃ua siértopa la ojeʼe vaʼekue Adán ha Eva orrechasárõ guare Jehová goviérno. Péro upearã oñekotevẽ heta tiémpo. Por ehémplo, ojehecha vaʼerã oimépa Jehová ndojapoporãi rakaʼe yvypórape, ajeve opeka hikuái. Ojeprova vaʼerã añetehápepa yvypóra naiñeʼẽrendumoʼãi Jehovápe ojecha vaíramo. Avei ojehechauka vaʼerã siértopa yvyporakuéra oiko porãvéta Jehová reheʼỹ (Gén. 3:4, 5). Péro Jesús iñeʼẽrendu rupi oprova Satanás ijapuha. Ha umi mbaʼe Satanás okuestiona vaʼekue, koʼẽrõite oñemyesakãmbaitéta. Upe rire, entéro oikóva yvágape ha ko yvy ape ári okomprováta Jehová goviérno iporãveha opavavépe g̃uarã. w15 15/6 5:12

Pe jehasa asy guasúpe primeroite oñehundíta umi rrelihión fálsape. La Biblia ohenói umi rrelihión fálsape “Babilonia Guasu, [...] umi kuña rekovai sy” (Apoc. 17:5-7). ¿Mbaʼérepa oñekompara chupekuéra peteĩ prostitútare? Pórke umi omoakãva koʼã rrelihión oñentremete yvyporakuéra goviérnore ha otraisiona Ñandejárape. Haʼekuéra oapoja rangue Jesúspe ha Ñandejára goviérno, oapoja yvypóra goviérno. Avei omboykénte heta enseñánsa oĩva la Bíbliape ikatu hag̃uáicha orekove autorida. Péro pe adorasión haʼekuéra omeʼẽva ikyʼa, upévare Jehová ndoaseptái chupekuéra. Ndojoguaiete hikuái umi unhídope. Koʼãvape oñekompara voi vírhenre, pórke pe adorasión omeʼẽva ipotĩ Jehová renondépe (2 Cor. 11:2; Sant. 1:27; Apoc. 14:4). ¿Mávapa ohundíta umi rrelihión fálsape? La Biblia heʼi oĩha “peteĩ mymba ñarõ pytã” ‘diez hatĩva’. Ko mymba ñarõ orrepresenta pe Organización de las Naciones Unídaspe (ONU), ha umi diez hatĩ katu orrepresenta entéro umi goviérno oapojávape ko Organizaciónpe. Umi goviérno oapojáva pe ONU-pe ohundíta umi rrelihión fálsape (Apoc. 17:3, 16-18). w15 15/7 2:3, 4

Ko provléma ikatu kuri odividi pe kongregasión. Upévare Pablo oskrivi chupekuéra: “Ani oĩ joavy pende apytépe, ikatu hag̃uáicha peiko oñondivepa peteĩ ñeʼẽme ha pepensa hag̃ua peteĩchapa” (1 Cor. 1:10, 11, 13). Ñande avei jasegi vaʼerã ko konsého, ha ndajahejái vaʼerã mbaʼeve odividi ñane kongregasión (Rom. 16:17, 18). Pablo heʼi vaʼekue umi kristiáno unhídope haʼekuéra ohóta yvágape, upévare nopensái vaʼerãha “umi mbaʼe ko mundopeguáre” (Filip. 3:17-20). Avei ohenói umi unhídope Ñandejára ha Cristo rrepresentánte, térã embahadór. Peteĩ embahadór oĩva ótro paíspe, noñentremetéi umi provlémare térã pe polítika upepeguáre. Upéicha avei umi unhído noñentremetéi polítikare ni umi provléma oĩvare ko múndope (2 Cor. 5:20). Umi kristiáno oikótava opa ára g̃uarã ko yvy ape ári, oapoja avei Jehová goviérno añoite ha ndojeheʼaiete ko múndore. w15 15/7 3:9, 10

Jajepyʼamongetávo ko téxtore, ñanepytyvõ ñaime hag̃ua segúro Jehová ñanderayhuetereiha ha ojepyʼapyha ñanderehe (1 Ped. 5:6, 7). Ñandéve g̃uarã la Biblia ivaliosoiterei. ¿Mbaʼérepa? Pórke Jehová ojevale Iñeʼẽre oñekomunika hag̃ua ñanendive. Peteĩ túva siémpre oñekomunikáramo itaʼýrandi, koʼẽ koʼẽre ojoayhuve ha okonfiave ojuehe. Jehová haʼe hína ñande Ru ñanderayhuetéva. Ha haʼe oñeʼẽ ñandéve la Biblia rupive, ndaikatúiramo jepe jahecha ni ñahendu chupe. Upévare, jalee jave la Biblia, ñañatende porã vaʼerã jaikuaa hag̃ua mbaʼépa haʼe heʼi ñandéve (Is. 30:20, 21). Jehová ñandegia ha oñangareko ñanderehe. Avei oipota jaikuaa porã chupe ha jajerovia hese (Sal. 19:7-11; Prov. 1:33). w15 15/8 1:6, 7

Heta mbaʼe porã ojehupytýta pe paraísope, péro iñimportanteveha enterovéva omombaʼéta Jehová réra porãite ha opavavénte iñeʼẽrendúta chupe (Mat. 6:9, 10). Avei saʼi saʼípe jahupytýta pe perfeksión ha koʼẽ koʼẽre ñañemoag̃uivéta jahávo Jehováre (Sal. 73:28). Añetehápe, ko yvy henyhẽta persóna perféktagui, Jehová oipota haguéicha ymaite guive. Ñande ñaĩ segúro Jehová okumplitaha opa mbaʼe opromete vaʼekue. ¿Mbaʼérepa? Pórke la Biblia heʼi ‘ndaiporiha mbaʼeve’ Ñandejára ikatuʼỹva ojapo (Mat. 19:25, 26). Pablo heʼi vaʼekue ñañehaʼãmbaite vaʼerãha opa ikatuháicha jahupyty hag̃ua pe jeikove opaveʼỹva (1 Tim. 6:19). Upévare jahechauka vaʼerã jaiko lájare jaroviaha pe fin og̃uahẽtaha en kualkiér moménto. Ñaimeséramo pe paraísope, jajepreparáma vaʼerã koʼág̃a guive jaiko hag̃ua upépe. w15 15/8 3:2, 3

Koʼág̃arupi heta pelíkula, lívro, rrevísta, músika, prográma de televisión ha páhina de Internet, ipeligrosoiterei kristianokuérape g̃uarã. ¿Mbaʼérepa? Pórke ikatu operhudika ñane amista Jehovándi. Umíva haʼete hína júnta vai ikatúva ñanemboliga jajerovia hag̃ua Satanás múndore, ñakonfia rangue Jehová ha ipromesakuérare. Upévare ñañatende porã vaʼerã. Aníkena jahecha ni jalee mbaʼeve ñanemoakãrakútava “jaipota [hag̃ua] umi mbaʼe ko mundopegua” ha ikatúva ñanemomombyry Jehovágui (Tito 2:12). Ñandejára organisasión ojapo puvlikasión, vidéo ha páhina de Internet ñanemboʼéva mbaʼépa jajapo vaʼerã jaiko hag̃ua pára siémpre. Avei ñanemboʼe heta mbaʼe la Bíbliagui umi rreunionkuéra rupive, ojejapóva hína mas de 110.000 kongregasiónpe ko yvy tuichakuére. Umi mbaʼe ñaaprendéva umi rreunión ha asambleahápe, ñanepytyvõ jajeroviave hag̃ua Jehováre ha ipromesakuérare (Heb. 10:24, 25). w15 15/8 4:9, 11

La majoría umi hénte nohekomboʼéi ikonsiénsia. Péro ñande si, pórke jaipota ñanepytyvõ jaikuaa hag̃ua mbaʼépa oĩ porã ha mbaʼépa oĩ vai. Ikatu hag̃uáicha ñahekomboʼe ñane konsiénsia, jalee vaʼerã la Biblia ha ñaaprende umi mbaʼe oĩva pype. Péro ndahaʼéi upévante. Avei ñamombaʼe vaʼerã Ñandejára léi ha ñaime vaʼerã konvensído ideprovechotaha ñandéve. Pablo ohai vaʼekue: “Ñakumplíramo koʼã mbaʼe ikatúta ñane korasõ ha ñanekonsiénsia potĩ ha jajerovia tovamokõiʼỹre, ha upéva ñanemomýita japorohayhu hag̃ua” (1 Tim. 1:5). Ñahekomboʼe porãramo ñane konsiénsia ha ñapenáramo hese, tuichaiterei ñandedeprovéchota kongregasiónpe, pórke ñaipytyvõta oĩ hag̃ua unida ermanokuéra apytépe. Avei jahayhuvéta Jehovápe ha jajeroviavéta hese. Hiʼarive jahechaukáta ñande haʼeha iñamígo tee ha ñambovyʼaseha chupe. w15 15/9 2:2, 3

Jehová voi ñandeapo vaʼekue ha omeʼẽ ñandéve ñande vída (Sal. 100:3-5). La Biblia ohenói Adánpe “Ñandejára raʼy” (Luc. 3:38). Avei Jesús omboʼe vaʼekue Jehová haʼeha ‘ñande Ru oĩva yvágape’ (Mat. 6:9). Upévare jaʼekuaa Jehová ñanderayhuha peteĩ túva ohayhuháicha itaʼýrape. Heta persónape itúva omaltrata vaʼekue imitãme, upévare okakuaa rire ijetuʼu chupe oñeimahina hag̃ua peteĩ túva ikatuha ohayhu ifamíliape. Péro Jehová núnka nañanembosufríri. Haʼe ningo pe Túva ivuenovéva enterovévagui (Sal. 27:10). Jehová ñanderayhueterei ha oñangareko ñanderehe de diferénte fórma. Amáske jahechakuaa mbaʼeichaitépa ñanderayhu, koʼýte jahayhuvéta chupe (Sant. 4:8). w15 15/9 4:3, 4

Jadesidíta jave peteĩ mbaʼe, katuete jajeasegura raẽ mbaʼépa opensa Jehová. Jajerure jave chupe ajúda, haʼe omeʼẽ ñandéve ijespíritu sánto ikatu hag̃uáicha jajapo iporãva. Proféta Samuel tiémpope, umi isrraelíta oñorairõ kuri umi filistéondi, ha operde ohóvo hikuái. Péro okonfia rangue Jehováre ha oporandu rangue chupe mbaʼépa ojapo vaʼerã, haʼekuéra odesidi ogueraha pe árka del pákto pe lugár oñeñorairõháme. Opensa hikuái péicha Jehová oipytyvõtaha chupekuéra ogana hag̃ua. Haʼekuéra ni noporandúi Jehovápe mbaʼépa opensa, síno ijeheguíntema odesidi mbaʼépa okonvenive. ¿Mbaʼépa oiko upe rire? Omano 30.000 soldádo isrraelíta (Prov. 14:12). Upéi umi filistéo ogueraha chuguikuéra pe árka (1 Sam. 4:2-4, 10, 11). w15 15/9 5:16, 17

Nahiʼãi ningo ñañekontenta umi mbaʼe ñaaprende vaʼekuére jajevautisa mboyve, síno jasegi vaʼerã ñaaprende la Biblia omboʼéva (Heb. 6:1, 2). Por ehémplo, ikatu jastudia mbaʼéichapa oñekumpli umi profesía. Avei jastudia jave la Biblia, ñañeporandu vaʼerã oimépa ñande fe imbarete hína (Sant. 1:25; 2:24, 26). Apóstol Pablo heʼi vaʼekue ‘káda uno ñañomokyreʼỹ vaʼerãha ñande jerovia rupive’ (Rom. 1:12). ¿Mbaʼépa heʼise upéva? Heʼise ñande fe imbaretevetaha jajeheʼa meméramo ñane ermanokuérare, koʼýte umi osegívare iñeʼẽrendu “ojejopy vaíramo” jepe (Sant. 1:3). Umi júnta vai ningo ñandeperhudika, péro umi amígo iñeʼẽrendúva Jehovápe ñanepytyvõ ñamombarete hag̃ua ñande fe (1 Cor. 15:33). Upévare la Biblia heʼi ñandéve ani hag̃ua jafalta rreunionhápe, pórke upépe “ñañomokyreʼỹ” (Heb. 10:24, 25). w15 15/10 2:2, 8, 9

Ñañemotiémpo vaʼerã jajepyʼamongeta hag̃ua umi mbaʼe jaʼétavare. Por ehémplo, jajapóta jave peteĩ estúdio vívliko, iporã ñapensáma mbaʼe pregúntapa jaipurúta, térã mbaʼe ehémplopa oipytyvõvéta pe estudiántepe oñemoag̃uive hag̃ua Jehováre. Jajapóramo péicha, ñande fe imbaretevéta ha ñanekyreʼỹvéta ñaporomboʼe hag̃ua. Avei tekotevẽ jajepyʼamongeta jaha mboyve japredika (Esd. 7:10). Ikatu jalee peteĩ kapítulo oĩva lívro de Héchospe. Avei iporã ñapensa pe versíkulo jaleétavare umi héntepe, térã umi puvlikasión jaofresétavare. Koʼã mbaʼe katuete ñanemokyreʼỹvéta japredika jave (2 Tim. 1:6). Ñapensa vaʼerã mbaʼe témapa ointeresavéta umi hénte oikóvape ñande territóriope. Péicha jaipuru porãvéta la Biblia japredika jave (1 Cor. 2:4). w15 15/10 4:9

¿Mbaʼépa rejapo vaʼerã reprotehe hag̃ua ne famíliape? Ere vaʼerã chupe pe pornografía ivaiha. Péro ndahaʼéi upévante la rejapo vaʼerã. Eñeporandumína: “¿Oikuaápa che família mbaʼérepa ndovaléi ohecha pornografía? ¿Mbaʼépa ikatu ombokurióso chupe? ¿Okonfiápa cherehe omombeʼu hag̃ua chéve oimeraẽ mbaʼe? Oiméramo ostira chupe pe pornografía, ¿heʼínepa chéve?”. Pe mitã michĩramo jepe, ikatu ere chupe: “Sapyʼarei rejuhúramo Internétpe peteĩ páhina ohechaukáva pornografía térã taʼanga tieʼỹ, ha peichahágui ehechase lénto, ani rekyhyje ni retĩ eju hag̃ua emombeʼu chéve. Che roipytyvõse”. Reiporavóta jave peteĩ mbaʼe peñentretene hag̃ua, epensa vaʼerã mbaʼe ehémplopa remoĩta hína ne famíliape. Peteĩ túa hérava Pranas, heʼi: “Ñande ningo ikatu jaʼe heta mbaʼe ñane famíliape, péro haʼekuéra imanduʼavéta umi mbaʼe jajapóvare, ha osegíta hikuái ñane ehémplo”. Upéicharõ, epensákena mbaʼe ehémplopa remoĩ ne famíliape reiporavo jave músika, pelíkula ha lívro (Rom. 2:21-24). w15 15/11 1:12-14

Ñande ningo japredika umi lugár oĩháme heta hénte. Ñañehaʼã japredika umi paradaháre, terminálpe, estasión de trénpe, ofisinaháre, plása ha merkádorupi. Oiméramo nereñanimái repredika koʼã lugár rupi, ¿mbaʼépa ikatu rejapo? Eñemboʼe Jehovápe, ha epensa peteĩ superintendénte de sirkuíto heʼi vaʼekuére. Haʼe heʼi: “Oréve g̃uarã umi método pyahu ojepurúva ojepredika hag̃ua haʼe peteĩ oportunida rohechauka hag̃ua Jehovápe rojeroviaha hese ha oreñeʼẽrenduha chupe. Avei upéicha rohechaukase chupe roimeha dispuésto roservívo haʼe ojerureháicha”. Jahechaháicha, ndajakyhyjéiramo ñatantea hag̃ua umi método pyahu, jaservi porãve Jehovápe ha ñakonfiave hese (2 Cor. 12:9, 10). Heta ermáno omokyreʼỹ umi héntepe oipuru hag̃ua ñane páhina de Internet: jw.org. Koʼág̃arupi, ñane páhina rupive ñamog̃uahẽ avei pe marandu porã umi persóna oikóva mombyryvehápe jepe. w15 15/11 5:12, 13, 15

Pe Traducción del Nuevo Mundo oĩva ingléspe, oreko kuri heta palávra noñentendeporãiva, upévare ijetuʼu vaʼekue ojetradusi hag̃ua ótro idiómape. Por ehémplo, pe edisión osẽ vaʼekue 1984-pe, oipuru pe palávra evréa “Seol” Eclesiastés 9:10-pe ha hetave téxtope. Heta Biblia oĩva ingléspe oipuru avei pe palávra Seol, péro heta idiómape ndojekuaái mbaʼépa heʼise ko palávra ni ndaipóri voi diksionáriope. Oĩ voi opensáva Seol haʼeha peteĩ lugár opytáva algúna párte. Upévare oñemeʼẽ permíso umi traduktórpe omoĩ hag̃ua pe edisión rrevisáda 2013-pe, Sepultúra pe palávra evréa “Seol” ha pe palávra griéga “Hades” rangue. Ko traduksión ningo oĩ porã ha ndahasýi oñentende hag̃ua. Avei oñekambia umi palávra ha fráse ndojepuruvéimava koʼã tiémpope, ha oñemoĩ hendaguépe umi ikonosidovéva. Haʼekuéra oñehaʼãmbaite ikatu hag̃uáicha pe Biblia osegi ijexákto ha ifasilve oñentende hag̃ua. Jahechaháicha, umi ermáno otradusíva la Biblia ótro idiómape, oipytyvõiterei oñemehora hag̃ua pe Traducción del Nuevo Mundo 2013 ingléspe. w15 15/12 2:10, 12

Ñanderasy jave, ikatu jajerure Ñandejárape ñanepytyvõ, ñanekonsola ha ñanemoarandu hag̃ua, ojapo haguéicha isiervokuéra yma guare. Péro, ¿heʼisépa upéva peteĩ persóna oipytyvõva umi imboriahúvape nomanomoʼãiha arakaʼeve? Nahániri. Upéicharõ, ¿mbaʼéichapa Jehová oipytyvõ koʼãichaguápe? David heʼi: “Oúramo hasyete ha opyta tupápe, Jehová oipytyvõta chupe. Ñandejára okonsoláta ha oñangarekóta hese” (Sal. 41:3, NM). Jehová oikuaa porã mbaʼépa jahasa hína, ha haʼe nañanderejareimoʼãi. Ñandejára ñanemombarete ha ñanemoarandu ikatu hag̃uáicha ñaaguanta ñanderasy jave, ha hiʼarive ojapo vaʼekue ñande kuérpo ikatu hag̃uáicha oñedefende heta mbaʼasýgui. w15 15/12 4:7

Pablo oskrivírõ guare koʼã mbaʼe, imanduʼa kuri umi ermáno oĩvare kárselpe iñeʼẽrendu haguére Jehovápe (Filip. 1:12-14). Pablo ofelisita umi kristiáno evréope, pórke haʼekuéra oiporiahuvereko umi “ermáno oĩvape préso” (Heb. 10:34). Haʼe voi oĩ aja préso cuatro áñore, umi ermáno oikóva ag̃ui upégui, heta oipytyvõ chupe. Péro, ¿mbaʼépa ojapo umi oĩva mombyry? ¿Mbaʼéichapa oipytyvõ chupe hikuái? Haʼekuéra oñemboʼe meme hese (Heb. 13:18, 19). Koʼág̃a heta ermáno oĩ avei kárselpe iñeʼẽrendu haguére Jehovápe. Umi ermáno oikóva ag̃ui chuguikuéra, oipytyvõ chupekuéra heta hendáicha. Péro heta ñaime mombyry koʼã ermánogui. ¿Mbaʼéichapa ikatu ñaipytyvõ chupekuéra ha jahechauka ñanemanduʼaha hesekuéra? Jahayhúramo koʼã ermánope, siémpre ñañemboʼéta hesekuéra. w16.01 1:13, 14

Jehová ojapo vaʼekue yvyporakuérape oikove hag̃ua opa árare ko yvy ape ári (Gén. 1:28; Sal. 37:29). Upévare ndahaʼéi normál peteĩ umáno ojeporavo oho hag̃ua yvágape. Péro Jehová oiporavo chupekuéra oiko hag̃ua chuguikuéra rréi ha saserdóte Cristo ndive. Peteĩ kristiáno orresivíva pe invitasión, oreko peteĩ esperánsa ipyahúva ha avei okambia opensa lája (Efes. 1:18). ¿Mbaʼéichapa peteĩ persóna oikuaa oñeinvitaha chupe oho hag̃ua yvágape? Pablo omyesakã upéva oskrivírõ guare umi kristiáno Romaguápe ‘ojeporavóvape imarangatu hag̃ua’. Haʼe heʼi chupekuéra: “Peẽme noñemeʼẽi peteĩ espíritu ojapóva pendehegui tembiguái ha penemongyhyje jeýva, oñemeʼẽ guei peteĩ espíritu ohechaukáva Ñandejára pendeadoptaha itaʼýraramo, ha upe espíritu rupive enterove jasapukái: ¡Abba, che Ru! (Rom. 1:7; 8:15). Upéva heʼise Jehová oipuruha ijespíritu okonfirma hag̃ua pe persónape oñeinvitaha chupe oho hag̃ua ogoverna yvágape Crístondi (1 Tes. 2:12). w16.01 3:8, 9

¿Mbaʼéichapa jahechauka jarrespetaha umi ermáno Ñandejára oiporavo vaʼekuépe oho hag̃ua yvágape? Upéva ikatu jajapo heta hendáicha. Por ehémplo, ndajaikói ñaporandu pe ermáno térã ermánape mbaʼéichapa haʼe oñemeʼẽ enkuénta haʼeha unhído. Upéva natekotevẽi ñande jaikuaa (2 Tes. 3:11). Avei nañaporandúi iména térã hembirekópe, isy térã itúvape, térã ambue ihentekuérape haʼekuérapa haʼe avei unhído, pórke upe priviléhio ndahaʼéi peteĩ mbaʼe ojeeredáva (1 Tes. 2:12). Ñañatende vaʼerã ani hag̃ua jajapo umi pregúnta oporomoñeñandu vaíva. Por ehémplo, naiporãi ñaporandu pe kristiánope mbaʼéichapa oñeñandu iména térã hembireko noĩmoʼãi haguére hendive paraísope. Ñande ningo jaikuaa porã ág̃a pe paraísope Jehová omeʼẽtaha “entérope opa mbaʼe oipotáva” (Sal. 145:16, NM). ¿Mbaʼérepa iporã jatrata umi unhídope jatrataháicha umi ótro ermánope? Pórke upéva haʼe peteĩ proteksión ñandéve g̃uarã. La Biblia heʼi kongregasiónpe ikatuha oĩ “ermáno guaʼu”, heʼínteva haʼeha unhído (Gál. 2:4, 5; 1 Juan 2:19). w16.01 4:10, 11