Junio

¿Mbaʼépa ikatu jajapo oĩramo ñaneofendéva? Siémpre iporãve ñarresponde amávlemente (Prov. 15:1). Jahechamína mbaʼépa ohasa vaʼekue peteĩ sy omongakuaa vaʼekue haʼeño imembykuimbaʼe. Pe mitãrusu ojeporta vai kuri oikóvo ñemihãme. Peteĩ díape, peteĩ ermána oñentera la oikóvare ha omokyreʼỹse pe sýpe. Haʼe heʼi chupe: “Ambyasyete ningo la nderehekomboʼeporãi haguére ne membýpe”. Pe sy orresponde mboyve, opensa raẽ ha oñehaʼãmbaite oñetrankilisa. Upéi heʼi chupe ojapo hague ikatúva guive omongakuaa porã hag̃ua imembýpe, ha osegitaha oñehaʼã hese. Ko ermána norreaksionavaíri rupi, mokõivéva osegi oñoamíga. Avei, pe mitãrusu ohendu kuri isýpe heʼírõ guare oñehaʼãmbaite hague hese, ha ohechakuaa isy nopensaiha haʼe naipohãveimaha. Koʼã mbaʼe omokyreʼỹ chupe ha oheja hembiapo vai. Upéi oprogresa, ojevautisa ha tiémpo rire oservi Betélpe. Ñande avei, ñañeʼẽ jave ñane ermanokuérandi, ñane héntendi térã umi ndajaikuaáivandi, jasegi vaʼerã ko konsého oĩva la Bíbliape: “Pene ñeʼẽ iporã ha ijuky vaʼerã” (Col. 4:6). w15 15/12 3:15, 17

Ñamoĩ chupe nde reimeha umi 120 disípulo apytépe, ha peichahágui ojekuaa ne akã ári peteĩ mbaʼe ojoguáva tatarendýpe ha reñepyrũ reñeʼẽ peteĩ idióma ndereikuaáivape. Katuete ningo reiméta segúro rerresivi hague pe espíritu sánto (Hech. 2:6-12). Péro añetehápe naentéroi umi unhído ojeporavo de la mísma fórma. Upe día de Pentekostéspe hetaiterei persóna orresivi pe espíritu sánto ojevautisárõ guare (Hech. 2:38). La Biblia nomombeʼúi ojehecha hague koʼã persóna akã ári peteĩ mbaʼe ojoguáva tatarendýpe. Péro naentéroi umi unhído orresivi espíritu sánto ojevautisávo. Por ehémplo, umi samaritáno orresivi ojevautisa riréma (Hech. 8:14-17). Cornelio ha hogayguakuéra katu orresivi pe espíritu ojevautisa mboyve (Hech. 10:44-48). w16.01 3:3, 5

Umi unhído nopensái iñimportanteveha ótrogui, térã orekoveha espíritu sánto ha ontende porãveha la Biblia umi ótro kristiánogui. Avei nomokyreʼỹi avavépe hoʼu hag̃ua pe pan ha pe víno openságui peteĩ persóna haʼeha unhído. Haʼekuéra iñumílde rupi, orrekonose Jehová añoite ikatuha oinvita peteĩ persónape oho hag̃ua yvágape. Umi unhído nohaʼarõi umi ótro kristiáno otrata chupekuéra de fórma espesiál (Efes. 1:18, 19; Filip. 2:2, 3). Jehová oiporavórõ guare chupekuéra, ndoikuaaukái kuri entéro umi ótra persónape haʼekuéra haʼeha unhído. Upévare, pe kristiáno ojeporavóva espíritu sánto rupive noñesorprendéi oĩramo ndogueroviapáiva haʼeha unhído. Haʼe oikuaa la Biblia voi heʼiha ani hag̃ua jaroviánte peteĩ persóna heʼíramo orresiviha Jehovágui peteĩ rresponsavilida espesiál (Apoc. 2:2). w16.01 4:6, 7

Jehová oprotehe milagrósamente Abrahán ha Sárape (Gén. 12:10-20; 20:2-7, 10-12, 17, 18). Abrahán ohechakuaa mbaʼéichapa Jehová oipytyvõ chupe, ha upévare ojeroviave hese. ¿Ikatúpa oiko avei ñandehegui Ñandejára amígo? Si, ikatu. Péro upearã jajapo vaʼerã Abrahán ojapo vaʼekue: jaikuaa porã Jehovápe ha jahechakuaa haʼe ñanepytyvõ jave. Abrahán ningo ndorekói vaʼekue la Biblia. Péro ñande si, upévare jareko posivilida jaikuaávo hetave mbaʼe Jehovágui (Dan. 12:4). La Biblia omombeʼu hetaiterei mbaʼe Ñandejáragui, “pe ojapo vaʼekue yvága ha yvy” (Gén. 14:22). Umi mbaʼe ñaaprendéva ñanepytyvõta jahayhuve hag̃ua Jehovápe ha jarrespeta hag̃ua chupe ñande pyʼaite guive. Ha koʼã mbaʼe ñañandúva ñanemomýita ñaneñeʼẽrendu hag̃ua. Péicha Jehová oñangarekóta ñanderehe ha ñanevendesíta, ha upéi jahechakuaáta mbaʼeichaitépa ñanepytyvõ. Jaservívo chupe ñane korasõ mbytete guive, javyʼave ha ñandepyʼaguapy (Sal. 34:8; Prov. 10:22). Amáske jaikuaa Jehovápe ha jahechakuaa mbaʼéichapa ñanepytyvõ, ñañemoag̃uivéta jahávo hese. w16.02 1:7, 8

Ko téxto heʼíva ñanemboʼe María oikuaa porãha Ñandejára Ñeʼẽ. Umi mbaʼe heʼi vaʼekue, ñanemomanduʼa peteĩ orasión ojapo vaʼekuére Ana, Samuel sy (1 Sam. 2:1-10). Amalisia María osita 20 véserupi umi fráse oĩva Ñandejára Ñeʼẽme. Péicha jahechakuaa chupe ogustaiterei hague entéro mbaʼe oaprendéva Jehovágui ha Iñeʼẽgui. Oiméramo oñemeʼẽ ñandéve peteĩ tembiapo Jehová servísiope, péro haʼetévaicha ñandéve ijetuʼuetereítava, katuete ñantendéta Maríape. ¿Mbaʼépa ikatu jajapo péicha jave? Iporãta jasegi María ehémplo ha jajerovia Jehováre. Upearã ñaneumílde ha jaasepta vaʼerã oimeraẽ tembiapo Jehová onkargáva ñandéve, ha jajerovia haʼe ñanepytyvõtaha. Iporã avei ñahendu Jehová heʼíva ha jajepyʼamongeta meme umi mbaʼe ñaaprendévare. Avei, kyreʼỹme ñañeʼẽ vaʼerã ótrope opa mbaʼe ñaaprende vaʼekuégui (Sal. 77:11, 12; Luc. 8:18; Rom. 10:15). w16.02 2:17, 18

Entéronte javyʼaiterei jahechávo ojevautisaha káda áño hetaiterei mitãrusu ha mitãkuña (Ecl. 12:1). Añetehápe umi túa ha ansianokuéra ojasegura vaʼerã mbaʼérepa umi mitãrusu ha mitãkuña ojevautisase, ha oimépa ontende porã la ojapótava. Jajededika guive Jehovápe ha jajevautisa, oiko ñandehegui Ñandejára siérvo ha okambia la ñande rekove. Upe guive jahupyty hetaiterei vendisión oúva Jehovágui. Péro Satanás oñehaʼãmbaitéta ñanemomombyry Ñandejáragui (Prov. 10:22; 1 Ped. 5:8). Upévare tuakuéra oservíva Jehovápe, odedika vaʼerã tiémpo oipytyvõ hag̃ua ifamíliape ikatu hag̃uáicha ontende porã mbaʼépa oñehaʼarõ peteĩ kristiánogui. Péro, ¿mávapa oipytyvõta umi mitãrusu térã mitãkuñáme ituakuéra ndahaʼéiva Testígo? Umi ansiáno ikongregasiongua, mborayhúpe ikatu oipytyvõ chupekuéra ontende hag̃ua mbaʼépa heʼise jajededika Jehovápe ha jajevautisa (Luc. 14:27-30). Peteĩ persóna omopuʼãsérõ peteĩ óga, tekotevẽ ojeprepara raẽ. Péicha avei, peteĩ mitãrusu ojevautisaséva, tekotevẽ ojeprepara porã ikatu hag̃uáicha osegi iñeʼẽrendu Jehovápe “ipahaite peve” (Mat. 24:13). w16.03 1:1, 2

Jehová omeʼẽ vaʼekue pe Léi Mosáika umi isrraelítape. Upéi Jesús ou rire ko yvy ape ári, Jehová omeʼẽ instruksión ipyahúva. Pórke isiervokuéra ndahaʼemoʼãvéima peteĩ tetãmeguánte, síno heta paisgua ha orekóva diferénte kostúmbre. Ko puévlo oformáta pe kongregasión kristiána, oikéta peteĩ kompromíso pyahúpe ha oñehenóita chupekuéra Israel espirituál. Pe kongregasión kristiána ipyahúva oñemoĩ “Cristo Léi” poguýpe. Cristo Léipe oĩ heta instruksión ipyahúva. Péro umíva ndojeskrivíri itáre, ojeskrivi haguéicha pe Léi Mosáika, síno oĩ káda kristiáno korasõme. Koʼã instruksión ogia ha oipytyvõta Ñandejára siervokuérape, tahaʼe haʼéva pe lugár oikohápe (Gál. 6:2). Pe Israel espirituál oñevenefisiaiterei ‘Cristo Léigui’. Ojejapo mboyvemi pe kompromíso pyahu, Jesús omeʼẽ mokõi mandáto kristianokuéra okumpli vaʼerã. Peteĩva haʼe hína pe predikasión. Ha pe ótro katu ohechauka mbaʼéichapa ojotrata vaʼerã umi kristiáno. Koʼã instruksión oñemeʼẽ entéro Jesús segidorkuérape, tahaʼe umi ohótava yvágape térã oikótava ko yvy ape ári. Upévare koʼag̃aite peve ñande avei tekotevẽ ñakumpli koʼã instruksión. w16.03 4:10, 11

Peteĩ ansiáno ombokatupyry mboyve peteĩ ermánope, tekotevẽ oñemoamígo hese. Upéicha pe ermáno oñeñandu porãta ha notĩmoʼãi chugui. Ansianokuéra, tahaʼe haʼéva pene situasión, térã pende kultúra, ha jepe heta penerembiapo, pededika vaʼerã tiémpo pe ermánope. Péicha haʼe ohechakuaáta reñeinteresaha hese. Katuete pe ermáno omombaʼe ha oagradeséta reipytyvõ haguére chupe. Peteĩ ansiáno okumpli porãva hembiapo oñehaʼã ombokatupyry ótrope ha oapresia voi upe ermánope (embojoja Juan 5:20 heʼívare). Pe ermáno ohecháramo añetehápe peipytyvõseha chupe, ikyreʼỹvéta ha oñehaʼãmbaitéta oprogresa hag̃ua. Upéicharõ ansianokuéra, ikatu hag̃uáicha pembokatupyry umi ermánope, peñemoamígo raẽ vaʼerã hesekuéra (Prov. 17:17; Juan 15:15). w15 15/4 1:19, 20

Pe rreláto oñeʼẽva rréi Azarías rehe (rréi Uzías) oreko heta detálle ñanepytyvõva ñantende hag̃ua mbaʼérepa Ñandejára okastiga chupe. Péro ¿mbaʼépa jajapóta la Bíbliape ndaipóriramo umi detálle omyesakãva peteĩ rreláto? (2 Rey. 15:7, 32; 2 Crón. 26:3-5, 16-21.) ¿Ñañepyrũtapa ñapensa Jehová iñinhustoha, térãpa ñaiméta segúro ojapoha opaite mbaʼe hekopete? (Deut. 32:4.) La Bíbliape oĩ hetaiterei informasión ñanepytyvõva jaikuaa porã hag̃ua Ñandejárape ha jajerovia hag̃ua hese. Jaikuaa porãramo Jehovápe ha jahayhúramo chupe, natekotevẽmoʼãi oexplikapaite ñandéve mbaʼérepa haʼe odesidi ojapo peteĩ mbaʼe. Péro, ¿mbaʼépa jajapo vaʼerã jasegi hag̃ua ñakonfia Ñandejára ojapóva siémpre oĩ porãha? Tekotevẽ jastudia la Biblia. Péicharõmante oikóta ñandehegui Jehová amígo (Sal. 77:12, 13). w15 15/4 3:8, 10

Umi ánhel ningo “ipoderosoiterei”. Haʼekuéra iñaranduve ha imbareteve ñandehegui. Umi ánhel iñeʼẽrendúva ningo oipuru ipodér ojapo hag̃ua Jehová rembipota. Por ehémplo, peteĩ jey peteĩ ánhel ojuka 185.000 soldádo asíriope peteĩ pyharépente. Upéva ni mbaʼevéicharõ ndaikatumoʼãi ojapo peteĩ umáno, ha ijetuʼuetereítante avei peteĩ ehérsitope g̃uarã (2 Rey. 19:35). Ótra okasiónpe katu peteĩ ánhel oguenohẽ kárselgui Jesús apostolkuérape. ¿Mbaʼéichapa ojapo raʼe upéva? Oavri pe okẽ, oguenohẽ chupekuéra ha upéi omboty jey pe okẽ, ha umi guárdia ni ndopillái (Hech. 5:18-23). Jahechaháicha, umi ánhel iñeʼẽrendúva oipuru ipodér ojapo hag̃ua umi mbaʼe iporãva. Péro Satanás oipuru ipodér ojapo hag̃ua mbaʼe vai. Añetehápe ningo haʼe ipoderosoiterei, upévare la Biblia heʼi hese haʼeha “ko múndo ruvicha” (Juan 12:31). w15 15/5 1:5, 6

Umi kristiáno soltéro ha omendáva ojekuida vaʼerã ani hag̃ua okomete inmoralida. Péro heta vése ijetuʼu upéva. Por ehémplo, umi mitãrusu ha mitãkuña ohendu jepi ikompañerokuéra ojalavaha oreko haguére rrelasión sexuál oimeraẽ ogustávandi chupekuéra. Térã omombeʼujoa hikuái oguerahaukaha ojupe mensáhe ha fóto tieʼỹ iselulár rupive. Heta paíspe umi léi okonsidera ko práktika igraveha oñemosarambirõguáicha pornografía infantíl. Avei la Biblia heʼi umi okometéva inmoralida ‘hetére voi ojapoha ivaíva’ (1 Cor. 6:18). Heta persóna omano térã osufrieterei ova haguére hesekuéra mbaʼasy vai rrelasión sexuál rupive. Ha opavave lénto umi imitãva orekóva rrelasión omendaʼỹre, oñarrepenti upe rire. Koʼág̃arupi heta lívro, pelíkula ha músika ogueroviaukase ñandéve ndoikomoʼãiha ñanderehe mbaʼeve ndajarrespetáiramo Ñandejára mandamientokuéra. Péro upéva japu hína. Upéicharõ, ñanemanduʼa vaʼerã tekotevẽha akóinte jajekuida ani hag̃ua ‘pe pekádo ñanembotavy’. w15 15/5 2:14

Jehová otrata porã opavavépe, ha Jesús péichante avei. ¿Mbaʼéicha rupípa Jesús otrata porã entérope? Oñeimahina mbaʼéichapa oñeñandúta hikuái umi mbaʼe haʼe ojapóvare. Por ehémplo, peteĩ día oho hendápe peteĩ kuña hekovai vaʼekue. Pe kuña hasẽ ha omoheʼõ hesaýpe Jesús py. Jesús ohechakuaa pe kuña oñarrepentiha ipyʼaite guive, ha oikuaa oñeñandu vaivetaha otrata vaíramo chupe. Upémarõ ofelisita chupe umi mbaʼe porã ojapóvare ha operdona hembiapo vaikue. Peteĩ líder rrelihióso ndoguerohoryiete ohechávo operdonaha ko kuñáme. Upéicharõ jepe, Jesús otrata porãnte avei ko karaípe (Luc. 7:36-48). ¿Mbaʼépa jajapo vaʼerã jatrata hag̃ua opavavépe Jehová ojapoháicha? Pablo heʼi vaʼekue umi kristiáno ‘natekotevẽiha oñorairõ avavéndi, síno imbaʼeporã vaʼerãha enterovéndi’ (2 Tim. 2:24). Ñañemoĩ vaʼerã ñande rapicha lugárpe ha ñañeimahina mbaʼéichapa omoñeñandúta chupe umi mbaʼe jaʼéva ha jajapóva. Upéva ñanepytyvõta japorotrata hag̃ua Jehová ojapoháicha (Prov. 15:28). w15 15/5 4:8, 9

Jahechávo oĩha ñane ermáno ohasa asýva hína, ikatu ñaipytyvõ ha ñakonsola chupe (Prov. 17:17). Upéva ikatu jajapo oiko jave peteĩ desástre naturál. Por ehémplo, peteĩ urakán ombyaipa lénto peteĩ ermána viúda róga. Upéi ko ermána omombeʼu: “Avyʼaiterei aime haguére Jehová organisasiónpe. Umi ermáno ningo oporosokorre oĩ jave ojecha vaíva, ha hiʼarive oñopytyvõmba hikuái ijerovia mbarete hag̃ua”. Peteĩ ermána soltéra katu ojedesespera peteĩ torménta rire, pórke ohecha hóga oñembyaiha. Péro umi ermáno oho oipytyvõ chupe ha omyatyrõ pe hóga. Haʼe heʼi: “¡Ndaikuaái ni mbaʼéichapa aagradeséta!”. Upéi heʼi avei: “¡Grásiamante Jehová!”. Ajépa javyʼaite jareko haguére ermáno ha ermána oñeinteresáva ñanderehe. Péro jaagradeseve hína Jehová ha Jesúspe oñangareko porã haguére isiervokuérare. w15 15/6 1:17

Peteĩ ermáno térã ermána omendáva, otrata vaʼerã de fórma espesiál iparéhape añoite. Ha umi kristiáno soltéro ha soltéra, otrata vaʼerã de fórma espesiál inóvio térã inóviapente. Testigokuéra ndoikói vaʼerã omakanea oimeraẽvandi ni onovilleapa rei. Oĩ opensáva ikatuha onovillea igustoitépe, ndopokóima guive ojuehe. Por ehémplo heʼi hikuái ndaivairiha onovillea omaña lája, imovimiéntore térã umi hésto ojapóvare. Upéicharõ, mokõi persóna, tahaʼe soltéro térã omendáva, oikóramo onovillea péicha, ikatu ou iñakãme pensamiénto kyʼa ha ikatu voi hoʼa inmoralida sexuálpe. Upéva oikóma hetáre ha ikatu avei oiko ñanderehe. La Bíbliape oñeʼẽ José ehémplore. Ihéfe rembireko heta vése oñeinsinua chupe orekoségui hendive rrelasión sexuál. José heʼi porã chupe ndojapomoʼãiha upéva, péro pe kuña oiko hapykuéri. Káda día ojerure Josépe opyta hag̃ua hendive (Gén. 39:7, 8, 10). Péro José ojedesidi ndoikomoʼãiha onovillea pe kuñakaraíre. Upéicha rupi ndoikéi iñakãme umi deséo vai. w15 15/6 3:10, 11

Jehová oipota siémpre jakuida pe amista jarekóva hendive ha avei oipota ñañeinteresa ñane ermanokuérare. Upévare, ani hag̃ua ñane ermáno opyta vai Jehová renondépe, pyaʼe voi ñaperdona vaʼerã chupe ofalláramo ñanendive. Heta vése umi ofénsa vyroreieterei, péro ñaperdona jave ñane ermanokuérape, jahechauka hína jahayhuha chupekuéra ha jaagradeseha Jehovápe ñaneperdona haguére (Col. 3:13). Ñande ningo ñaneimperfékto, ha upévare heta vése ijetuʼu ñaperdona hag̃ua umi ofallávape ñanendive (Lev. 19:18). Ha jaikóramo ñamombeʼu ótro ermánope ojejapo vaʼekue ñanderehe, ikatu hína pe ermáno oñemoĩ ñande favórpe ha pe ofalláva kóntrape. Oikóramo upéva ndaiporimoʼãvéima unida kongregasiónpe. Ha ndajajapóiramo mbaʼeve ñasolusiona hag̃ua pe provléma, jahechaukáta nañamombaʼeiha Jesús sakrifísio ha ndaikatumoʼãi ñañevenefisia chugui (Mat. 18:35). Avei, nañaperdonáiramo ñande rapichápe, Jehová nañaneperdonamoʼãi (Mat. 6:14, 15). Añetehápe, jaipotáramo Jehová ñaneperdona, ñañehaʼãmbaite vaʼerã ani hag̃ua jaʼa umi pekádo igrávevape (1 Juan 3:4, 6). w15 15/6 5:9-11

Jehová omeʼẽ ñandéve pe priviléhio ikatu hag̃uáicha ñamoporãve pe paraíso espirituál. ¿Mbaʼéichapa ikatu jajapo upéva? Primero, japredika kyreʼỹvo pe notísia porã oñeʼẽva Ñandejára Rréinore, ha ñaipytyvõvo umi héntepe oservi hag̃ua Ñandejárape. Ñaipytyvõ jave ñande rapichakuérape oiko hag̃ua chugui testígo de Jehová, ñambotuichave hína pe paraíso espirituál (Is. 26:15; 54:2). Segundo, ñañehaʼãmbaitévo ñanekondúkta porã. Umi hénte ohechávo jaikoha kristiáno teéicha, ñanemoirũse avei pe paraíso espirituálpe. Ndahaʼéi voi jaikuaágui heta mbaʼe la Bíbliagui la oikeséva hikuái ñane rrelihiónpe, síno ohechágui ñanekondúkta porãha. Ha upéva avei oipytyvõ chupekuéra oñemoag̃ui hag̃ua Jehová ha Jesúsre. Katuete ningo Jehová ha Jesús ovyʼaiterei ohechávo mbaʼeichaitépa iporã ñande paraíso espirituál. Ñande avei javyʼa ikatu haguére ñaipytyvõ oñemoporãve hag̃ua. Ha javyʼaitevéta jajapo vove ko yvy tuichakuégui peteĩ paraíso neporãva. w15 15/7 1:18-20

Jehová oheja káda uno odesidi oapojátapa chupe térãpa nahániri. Upévare iporã ñañeporandu: “¿Aĩpa konvensído Jehová haʼeha pe governánte ikatupyryvéva ha upévare cheñeʼẽrendu chupe? ¿Aĩpa segúro Ñandejára goviérno añoite ikatuha osolusiona umi provléma oĩva ko múndope? ¿Apensápa káda persónante ikatuha odesidi mbaʼépa iporã térã mbaʼépa ivai?”. Por ehémplo, oñeporandúramo ndéve mbaʼépa repensa algún partído polítikore térã peteĩ organisasión oĩvare ko múndope, ¿mbaʼépa eréta? Añetehápe ningo ikatu oĩ persóna iñintensión porãva ha oipytyvõséva umi héntepe. Péro ani ñanderesarái Jehová goviérno añoite ikatuha osolusiona umi provléma ha oipeʼa pe inhustísia oĩva ko múndope. Upévare ñande jaapoja Jehovápe añoite. Ndajajapóirire upéicha, ndaiporimoʼãi kuri unida kongregasiónpe. w15 15/7 3:7, 8

Jajesarekóramo pe kreasión rehe, jahechakuaa Jehová ñanderayhuetereiha (Rom. 1:20). Por ehémplo, haʼe ojapo ko yvy ha omoĩ pype opa mbaʼe ñaikotevẽva jaiko hag̃ua vyʼápe. Avei ojapo vaʼekue diferénte kláse hiʼupy ikatu hag̃uáicha jadisfruta umi mbaʼe jaʼúvagui (Ecl. 9:7). Jehová ohechauka avei ñanderayhuha ñandeapóvo ñambaʼapokuaa hag̃ua ha javyʼa hag̃ua jajapóvare (Ecl. 2:24). Haʼe oipota avei ko yvy henyhẽ yvypóragui, ha omeʼẽ ñandéve ko yvy ñañemitỹ hag̃ua ha ñañangareko hag̃ua umi animál rehe ha opa mbaʼe oikovévare (Gén. 1:26-28). Avei ñanembokatupyry jasegi hag̃ua iñehémplo (Efes. 5:1). w15 15/8 1:4, 5

Oiméne jahechakuaa umi profesía oĩva la Bíbliape oñekumpliha ohóvo, ha saʼietereíma ofaltaha og̃uahẽ hag̃ua pe fin. Koʼẽrõitéma pe Organización de las Naciones Unidas ha umi goviérno oapojáva chupekuéra ohundiséta umi rrelihión fálsape (Apoc. 17:16). ¿Tekotevẽpa ohasa heta tiémpo oiko hag̃ua upéva? Nahániri. Ñanemanduʼa vaʼerã umi governánte oatakasetaha umi rrelihiónpe pórke Jehová ‘omoĩta upéva ipyʼapypekuéra’. Ha haʼe ikatu ojapo upéva pyaʼénte voi ha en kualkiér moménto (Apoc. 17:17). Ko múndo oĩva Satanás poguýpe oñehundítama. Upévare, jajapókena pe téxto kostediagua heʼíva (Apoc. 16:15). Jasegíkena ñaĩ alérta ha ñañemeʼẽmbaite Jehová servísiope. Jajeroviákena haʼe osalvataha entéro umi oĩvape alérta ha preparádo (Is. 64:4). w15 15/8 2:17

Añetehápe ningo ñanderory vaʼerã opaichagua persónandi, péro ndovaléi jareko ñane amígoramo peteĩ ndahaʼéivape Jehová siérvo. Por ehémplo, naiporãmoʼãi peteĩ kristiáno oñemoĩramo de nóvio peteĩ persóna ndahaʼéivare testígo de Jehová. Iñimportanteve hína ñaneñeʼẽrendu Jehovápe, jaiko rangue ñañeamiga peteĩ ndohayhúivare chupe. Jaheka vaʼerã ñane amigorã sólamente umi oikóva Jehová oipotahaichaite. Umi isrraelíta tuicha iprovléma kuri ijúnta vai haguére (Éx. 23:24, 25; Sal. 106:35-39). ¿Mbaʼépa oiko upéi hesekuéra? Jesús heʼi vaʼekue: “¡Péina! Pende róga ojeheja reíma peẽme” (Mat. 23:38). Jahechaháicha, Jehová orrechasa tetã Israélpe ha oiporavo ipuevlorã pe kongregasión kristiána (Hech. 2:1-4). w15 15/8 4:7, 8

Jehová ojapo vaʼekue yvyporakuérape ikatu hag̃uáicha odesidi ijehegui. Péro jadesidi porã hag̃ua, omeʼẽ ñandéve ñane konsiénsia. ¿Mbaʼépa hína pe konsiénsia? Upéva ningo peteĩ mbaʼe jarekóva ñandepyʼapýpe ha heʼíva ñandéve mbaʼépa oĩ porã ha mbaʼépa oĩ vai. Ñahekomboʼe porãramo ñane konsiénsia, katuete ñanepytyvõta jajapo hag̃ua iporãva ha ñamboyke hag̃ua ivaíva. Ñandejára omeʼẽvo ñandéve ñane konsiénsia, ohechauka ñanderayhuha ha oipotaha javyʼa. Heta persóna ndoikuaái la Biblia omboʼéva, upéicharõ jepe ojapo mimi iporãva ha omboyke avei ivaíva (Rom. 2:14, 15). ¿Mbaʼérepa? Pórke ikonsiénsia oavisa chupekuéra mbaʼépa oĩ vai. Yvyporakuéra ndorekóirire konsiénsia, ko múndo ivaieteve vaʼerãmoʼã. Upévare javyʼa vaʼerã Jehová omeʼẽ haguére enterovévape peteĩ konsiénsia. w15 15/9 2:1, 2

Apóstol Juan heʼívo péicha, oipota ñapensa mbaʼéichapa Jehová ohechauka ñanderayhuha. Jajepyʼamongetáramo koʼã mbaʼére, oikóta ñandehegui Ñandejára amigoite ha jahayhuvéta chupe. Ñambyasýramo jepe, heta persóna opensa Ñandejára ndohayhuiha chupekuéra. Oimoʼã hikuái haʼe noñeinteresaiha avavére, siémpre omoĩha rrégla ha okastigaha umi nokumplírivape. Oĩ rrelihión omboʼéva Ñandejára ipyʼahatãha ha iñañaha. Opa koʼã mbaʼére heta oĩ opensáva ndaikatuiha jahayhu chupe. Oĩ avei opensáva Ñandejára ohayhuha enterovévape hembiapo vaíramo jepe. Péro ñande jastudiáva la Biblia jaikuaa porã mbaʼépa Jehová opensa. La Biblia heʼi Ñandejára voi haʼeha mborayhu, ha upévare ombou hague Itaʼýrape omano hag̃ua ñanderehehápe (Juan 3:16; 1 Juan 4:8). w15 15/9 4:1, 2

Koʼápe Pablo ndeʼiséi kuri naiñimportanteiha pe disiplína. Haʼe heʼi: “Péicha ñañehekomboʼe rire ñandepyʼaguapy ha ñanderekojoja”. Aníkena núnka ñapensa vyroreiha pe disiplína, ha ani ñandepochy nañandegustáiramo la ojeʼéva ñandéve. Upéva rangue, ñahendu Jehová konsého ha ñakambia tekotevẽhápe. Péicha jahechaukáta jahayhuha Ñandejárape. La majoría umi hénte ningo oñembotuicha ha opensa ijehénte. Ndoipotái avave okorrehi chupekuéra, ni nohenduséi ojeʼétaramo chupekuéra mbaʼépa ojapo vaʼerã. Ha peichahágui oĩramo oaseptáva umi konsého katu, tova pukúpe ojapo. Péro la Biblia heʼi ñande ñanediferénte vaʼerãha. Jaikuaa vaʼerã mbaʼépa ogusta Jehovápe ha ñaneñeʼẽrendu chupe (Rom. 12:2). Haʼe ningo oipuru iñorganisasión omeʼẽ hag̃ua umi konsého ñaikotevẽva. Por ehémplo, heʼi ñandéve kuña ha kuimbaʼe, tahaʼe soltéro térã omendáva ndovaleiha onovilleaparei. Avei heʼi mbaʼéichapa jaiporavo vaʼerã ñane amigorã ha mbaʼeichagua diversiónpa naiporãi. Ñahendúramo Jehovápe ñandekorrehi jave ha ñakambia tekotevẽhápe, jahechauka jaagradeseha umi konsého ha jahayhuha chupe (Juan 14:31; Rom. 6:17). w15 15/9 5:13, 15

Jajerure vaʼerã Ñandejárape tomeʼẽ ñandéve espíritu sánto. ¿Mbaʼérepa iñimportantete upéva? Pórke pe fe ou hína espíritu sántogui (Gál. 5:22). Jesús oipota kontinuadoite jajerure Ñandejárape tomeʼẽve ñandéve ijespíritu. Haʼe heʼi: “Pende Ru yvagapegua omeʼẽta espíritu sánto umi ojerurévape chupe” (Luc. 11:13). Ha, ¿mbaʼépa jajapo vaʼerã oiméramo imbaretéma ñande fe? Tekotevẽ ñañatende ani hag̃ua ou ikangy. ¿Mbaʼérepa? Pórke ñande fe haʼete peteĩ tatarendy. Ñepyrũrã ikatu pe tata hendy porã, péro nañamoĩvéiramo chupe jepeʼa, oguéta hína. Upéicha avei, ikatu hag̃uáicha ñande fe siémpre imbarete, tekotevẽ jalee ha jastudia la Biblia káda día. Upéicha, koʼẽ koʼẽre jahayhuvéta Jehovápe, ñamombaʼevéta Iñeʼẽ, ha ñande fe siémpre imbaretéta. w15 15/10 2:6, 7

Jalee rangue kirirĩháme, jalee vaʼerã en vos vaha, térã ñahenduʼimi hag̃uáicha. Umi sientífiko odeskuvri péicha ñanemanduʼa porãveha umi mbaʼe jaleévare. Ha Jehová oikuaa avei upéva, pórke haʼe voi ñandeapo. Upéicha rupi heʼi Josuépe olee vaʼerãha pe Léi “en vos váha”, ku oñeʼẽguyguyrõguáicha (Jos. 1:8). Jaleéramo péicha la Biblia, ikatúta ñañekonsentra ha ñanemanduʼáta umi mbaʼe jaleévare. Añetehápe ningo sapyʼánte ijetuʼu ñañekonsentra ha jajepyʼamongeta pe jastudiávare. Upéva ikatu oiko ñanekaneʼõ rupi térã oĩgui rruído ñande jerére. Upévare jaheka vaʼerã peteĩ lugár trankílo, ndaiporihápe mbaʼeve ñandedistrae vaʼerã. Por ehémplo, David ojepyʼamongeta vaʼekue pyharekue (Sal. 63:6). Jesús avei oho vaʼekue umi lugár itrankilohápe ojepyʼamongeta ha oñemboʼe hag̃ua (Luc. 6:12). w15 15/10 4:4, 6, 7

Peteĩ okasiónpe unas kuánta persóna Galileagua oho oheka Jesúspe (Juan 6:22-24). Jesús oikuaa umi hénte ndouiha hendápe ohendu hag̃ua chupe, síno ojerurénte hag̃ua tembiʼu. Upévare haʼe okorrehi chupekuéra, péro oexplika porã mbaʼépa ojapo vaʼerã hikuái okambia hag̃ua (Juan 6:25-27). Añetehápe ningo nde ndaikatúi reikuaapa mbaʼépa opensa ne família. Péro reñehaʼã vaʼerã reikuaa mbaʼéichapa oñeñandu. Por ehémplo, oime vaʼerã ne família osẽ jepi opredika nendive. Eñeporandumína: “¿Mbaʼérepa osẽ opredika? ¿Opredikasépa añete, térãpa ojepaseasénte ha oipota ajogua chupe álgo hoʼu hag̃ua?”. Reñemeʼẽrõ enkuénta ne famíliape ndogustaguasuiha pe predikasión, rehecha vaʼerã mbaʼéichapa reipytyvõta chupe. Iporãta remeʼẽ mimíramo chupe hembiaporã ikatu hag̃uáicha oñandu ideprovechoha. w15 15/11 1:10, 11

Ñandejára ningo siémpre ojapo iporãva isiervokuéra rehehápe, ha upévare ovendesíta umi iñeʼẽrendúvape. La Biblia heʼi avei: “Omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva”. ¡Ajépa hetaite mbaʼe porã ohaʼarõ umi iñeʼẽrendúvape! Ñandejára Ñeʼẽ heʼi ñandéve: “Emaña pe kuimbaʼe ivuénovare ha ejesareko pe hembiapo porãvare, ha rehecháta haʼe oikotaha pyʼaguapýpe. Péro entéro umi hembiapo vaíva oñehundíta” (Sal. 37:37, 38, NM). Jaipotáramo Jehová ñandeguerohory, tekotevẽ jaikuaa porã chupe ha Itaʼýrape, ha jajapo vaʼerã haʼe ojeruréva ñandéve (Juan 17:3). Ñanemanduʼa vaʼerã avei ‘ko múndo ha umi mbaʼe oipotáva, ohasaha ohóvo; péro pe ojapóva Ñandejára rembipota katu opyta opa ára g̃uarã’ (1 Juan 2:17). Pe fin ningo hiʼag̃uimbaitéma, upévare iñimportanteterei jasegi ko konsého: “Ejerovia Jehováre ha esegi ejapo haʼe heʼíva” (Sal. 37:34, NM). w15 15/11 3:11, 12

Ñande jaservíva Jehovápe, jaipurúma heta método ikatu hag̃uáicha japredika hetave persónape. Koʼã método ideprovechoiterei kuri ñandéve oĩrõ guare saʼive testígo de Jehová. Por ehémplo, ojepuru vaʼekue diário oñeguenohẽ hag̃ua informasión vívlika. Káda semána, ermáno Russell orahaka peteĩ diskúrso peteĩ ahénsia de notísiape, ha pe ahénsia omondo jey umi diáriope osẽva Canadá, Estados Unidos ha Európape. Áño 1913-pe g̃uarã, umi diskúrso ojapo vaʼekue ermáno Russell osẽma 2.000 diferénte diáriope, ha oĩma 15 millón de persóna oleéva. Avei ojepuru vaʼekue rrádio oñemog̃uahẽ hag̃ua heta lugár rupi pe marandu porã. El 16 de abril de 1922, ermáno Joseph F. Rutherford primera ves ojapo peteĩ diskúrso rrádiope, ha ohendu chupe 50.000 persónarupi. Upe riremínte, umi ermáno omoĩma peteĩ estasión de rrádio hérava WBBR. Pe primer prográma oñepresenta el 24 de febrero de 1924. w15 15/11 5:10, 11

¿Mbaʼéichapa Jehová oipuru ikreasión okumpli hag̃ua hembipota? Por ehémplo, Ñandejára ombokatupyry vaʼekue Noépe ojapo hag̃ua pe árka, ha Bezalélpe oiko hag̃ua chugui peteĩ artesáno vale. Avei oipytyvõ Gedeónpe oiko hag̃ua chugui peteĩ gerréro ipyʼaguasúva, ha Páblope katu opredika hag̃ua umi hénte ótro tetãguápe. Ñandejára réra ningo iñimportanteterei Jehová siervokuérape g̃uarã, upévare umi ermáno ojapo vaʼekue pe Traducción del Nuevo Mundo omoĩmbaite upe téra umi lúgar oĩ haguépe voi pe eskritúra orihinálpe. Ñane tiémpope, hetave Bíbliagui ojepeʼa pe téra Jehová ha oñemoĩ ivése “Señor”, “Ñandejára”, “Tupã” térã ótro dios réra ikonosídova peteĩ kultúrape. Prinsipálmente upévare pe Kuérpo Governánte oipota umi hénte oñeʼẽva ótro idióma oreko avei peteĩ Biblia ombotuicháva Ñandejára réra (Mal. 3:16). Koʼág̃a peve, pe Traducción del Nuevo Mundo ombotuicháma pe téra Jehová mas de 130 idiómape. w15 15/12 2:7-9

Jehová oipuru vaʼekue avei ipodér ombohasy hag̃ua umi persónape. Por ehémplo, haʼe ombohasy kuri peteĩ rréi Egiptoguápe, ha avei Míriampe, Moisés ermána (Gén. 12:17; Núm. 12:9, 10; 2 Sam. 24:15). Umi isrraelíta idesovediénterõ guare, ombou chupekuéra heta plága ha “mbaʼasy” (Deut. 28:58-61). Péro Jehová oipuru avei ipodér oprotehe hag̃ua isiervokuérape ani hag̃ua hasy (Éx. 23:25; Deut. 7:15). Heta vése katu omonguera voi chupekuéra. Por ehémplo, Job hasyete vaʼekue ha omanoséntema voi, péro Jehová omonguera chupe (Job 2:7; 3:11-13; 42:10, 16). Jesús ikatu avei omonguera umi persónape Jehová ojapoháicha. Oĩrõ guare ko yvy ape ári, omonguera umi lepróso, epiléptiko, siégo, paralítiko ha hetave mbaʼasy (Mat. 4:23, 24; Juan 9:1-7). Koʼã milágro ñanepytyvõ ñañeimahina hag̃ua mbaʼépa Jesús ojapóta pe paraísope. w15 15/12 4:3, 4