Diciembre

Apóstol Pedro omokyreʼỹ umi kristiánope oaguanta hag̃ua umi mbaʼe ijetuʼúva Satanás omoĩva hiʼarikuéra. Ñandéve avei ideprovechoitereíta jaikuaáramo máva mávapa “umi oaguanta vaʼekue heta mbaʼe ijetuʼúva”. Ohechaukáta ñandéve ñasẽ porãtaha ñaneñeʼẽrendúramo, ha ñanemomanduʼáta Jehová katuete ñanevendesitaha (Sant. 5:11). ¿Oĩpa oñemoĩva nderehe térã ndepersegíva? ¿Ndépa reservi hína kómo ansiáno térã superintendénte de sirkuíto ha sapyʼánte ndereikuaavéima mbaʼépa rejapóta hetaiterei ne rembiapógui? Oiméramo rehasa hína koʼã situasiónre, Pablo ehémplo tuicha nepytyvõta. Chupe heta ojepersegi vaʼekue ha avei ojepyʼapyeterei umi ermánore (2 Cor. 11:23-29). Pablo núnka noñentregái, ha péicha omoĩ ehémplo porã oipytyvõva hetápe oaguanta hag̃ua (2 Cor. 1:6). Ñaaguantáramo jahasa asy jave, ñane ehémplo oipytyvõta avei heta ermánope oaguanta hag̃ua. w16.04 2:11, 14

Jesús oprofetisa vaʼekue umi ára pahápe, pe marandu porã oñeʼẽva Ñandejára Rréinore ojepredikataha oparupiete (Mat. 24:14). Ko yvy tuichakuére umi hénte ñandekuaa ñasẽ rupi japredika opárupi. Oĩ heta persóna oaseptáva pe mensáhe jagueraháva, péro oĩ avei umi ndoaseptáiva. Heta rrelihión oasegura okumpliha pe mandáto Jesús oheja vaʼekue. Haʼekuéra heʼi opredikaha pe marandu porã ojapóvo mísa térã sermón ijiglésiape, térã otransmitíramo imensáhe téle ha Internet rupive. Oĩ avei heʼíva opredikaha omombeʼúvo itestimónio ótrope, oipytyvõvo umi hénte oikotevẽvape, ombaʼapóvo ospitalhárupi, térã omboʼévo umi eskuéla ha koléhiore. Péro, ¿añetehápepa okumpli hikuái Jesús omanda vaʼekue? w16.05 2:1, 2

Áño 1914 guive, entéro goviérnogui oiko Ñandejára Rréino enemígo. Ko Rréino ningo koʼẽrõite ohundipaitéta entéro goviérno umáno (Sal. 2:2, 7-9). Ñandejára opermiti oĩ umi goviérno umáno pórke omoĩʼimi órden. Upéicha rupi ñande ikatu avei japredika pe marandu porã oñeʼẽva Ñandejára Rréinore (Rom. 13:3, 4). Jehová voi heʼi ñandéve ñañemboʼe vaʼerãha umi orekóvare autorida ikatu hag̃uáicha jaservi porã chupe (1 Tim. 2:1, 2). Ha oĩ vove umi ñandetrata vaíva, ikatu jajerure umi autoridápe tañanepytyvõ, ojapo haguéicha apóstol Pablo. La Biblia heʼíramo jepe Satanás orekoha ipoguýpe ko múndope, ndajaʼéi vaʼerã haʼe ojapoukaha chupekuéra opa mbaʼe vai (Luc. 4:5, 6). Avei ndovaléi ñaneñeʼẽ arhél chupekuéra (Tito 3:1, 2). w16.04 4:5, 6

¿Mbaʼéichapa ikatu jaikuaa mbaʼépa ogustáta Ñandejárape? Ndaipóri jave la Bíbliape peteĩ léi espesífika, ñañehaʼã vaʼerã ñantende mbaʼépa haʼe oipota jajapo upe situasiónpe. Upearã tekotevẽ ñañemboʼe Jehovápe, ha upéi jaasepta pe gía haʼe omeʼẽva ijespíritu sánto rupive. Jesús siémpre ohechakuaa vaʼekue mbaʼépa Jehová oipota ojapo. Por ehémplo, la Biblia omombeʼu Jesús dos vése omongaru hague hetaiterei persónape. Upearã oñemboʼe Jehovápe ha upéi ojapo pe milágro (Mat. 14:17-20; 15:34-37). Péro ótra vuéltape, haʼe oĩ aja desiértope iñembyahyieterei, upéicharõ jepe ndojapói peteĩ itágui pan, Satanás oipota haguéicha (Mat. 4:2-4). Jesús oikuaa porã Itúape, upévare ndoipurúi ijupe g̃uarãnte pe podér omeʼẽ vaʼekue chupe. Jesús oĩ segúro Itúa omeʼẽtaha chupe hembiʼurã oikotevẽ jave ha siémpre ogiataha chupe. w16.05 3:7, 8

La Bíbliape oĩ párte ojeskrivi vaʼekue peteĩ persónape g̃uarã, térã peteĩ grúpo de persónape g̃uarã. Upévare jalee mboyve la Biblia jajerure vaʼerã Jehovápe tañanemoarandu ha tañanepytyvõ ñantende hag̃ua mbaʼépa ñanemboʼese (Esd. 7:10; Sant. 1:5). Jalee jave la Biblia iporã ñañeporandu koʼã mbaʼe: “¿Mbaʼépa chemboʼe Jehovágui? ¿Mbaʼéichapa ikatu ideprovécho chéve ko aleéva? Ha, ¿mbaʼéichapa ikatu aipuru ko informasión aipytyvõ hag̃ua ótrope?”. Ñañeporandúramo koʼã mbaʼe jalee jave la Biblia, ideprovechovéta ñandéve umi mbaʼe jaleéva. Ñamoĩmína peteĩ ehémplo. La Biblia heʼi mbaʼe mbaʼépa okumpli vaʼerã umi ansiáno (1 Tim. 3:2-7). La majoría ñande ningo ndahaʼéi ansiáno, upévare ikatu ñapensa pe párte de la Biblia ndahaʼeiha ñandéve g̃uarã, ha nañanepytyvõmoʼãiha. Péro umi rrekisíto enterovévape ikatu ñanepytyvõ. w16.05 5:7, 8

Umi hudío ojeguerahárõ guare Babilóniape, ohecha pe siudápe oĩha hetaiterei imáhen, ha umi hénte upepegua oadoraha umi demóniope. Péro oĩ heta hudío osegíva iñeʼẽrendu Jehovápe, umíva apytépe Daniel ha mbohapy iñamígo. Haʼekuéra ndohejái umi mbaʼe vai ojejapóva Babilóniape omoldea chupekuéra (Dan. 1:6, 8, 12; 3:16-18). Daniel ha umi iñamígo orrekonose Jehová haʼeha Ijalfaréro ha osegi oadora chupe añoite. Daniel oikórõ jepe heta áñore Babilóniape umi hénte aña apytépe, peteĩ Ñandejára ánhel heʼi vaʼekue hese haʼeha peteĩ “kuimbaʼe ojeguerohorýva” (Dan. 10:11, 19, TNM). Ymave, umi alfaréro omoĩmi avei pe ñaiʼũ peteĩ móldepe oforma hag̃ua peteĩ mbaʼyru. Ñande avei jaadoráva Jehovápe ñarrekonose haʼe orekoha derécho ñanegoverna hag̃ua, ha orekoha autorida omoldea hag̃ua umi tetãnguérape (Jer. 18:6). Ñandejára avei oreko derécho ñanemoldea hag̃ua káda únope. Péro haʼe nañandeovligái ñakambia hag̃ua, síno oipota ñandete jadesidi jahejátapa haʼe ñanemoldea. w16.06 2:1, 2

Satanás oipota ñapensa javyʼavetaha sólamente jarekóramo heta mbaʼerepy. Upévare ojevale ko múndore ha “ñande resa oipotáva” rehe, jaipota potave hag̃ua umi kósa materiál (1 Juan 2:15-17; Gén. 3:6; Prov. 27:20). Ko múndo oofrese heta mbaʼe, ha ñanemboliga jajogua hag̃ua umi mbaʼe osẽ pyahuvéva. Ha umíva ikatu iporã ha ideprovécho, térã naiporãi ha ndovaléi mbaʼeverã. Ñapensamína, ¿jajoguámapa algúna ves peteĩ mbaʼe nañaikotevẽiva? Ikatu oime jajogua raʼe pórke ñandegustaiterei jahecha ypýrõ guare, térã jahecha rupi peteĩ propagándape. Jaikóramo jajogua umi mbaʼe nañaikotevẽiva, jagasta reíta ha ikatu ñanemoprovléma. Koʼã mbaʼe ikatu ñandedistrae ha jaju ndajastudiaguasuvéi la Biblia, saʼíma japredika, ndajajepreparavéi rreunionrã térã ñañepyrũ jafalta meme. Ani ñanderesarái Juan heʼi vaʼekuégui: “Ko múndo ha umi mbaʼe oipotáva, ohasa ohóvo”. w16.07 1:3, 4

Síglo primérope, umi kristiáno apytépe oĩ vaʼekue hudío, griégo, rrománo térã ótro paisgua. Haʼekuéra oreko diferénte kultúra, kostúmbre ha nopensái peteĩchapa. Upévare, ijetuʼu vaʼekue algúnope ojapo hag̃ua umi mbaʼe oaprendéva ha okambia hag̃ua ohóvo. Ndareíri apóstol Pablo omomanduʼa koʼã kristiánope Jehová añoite haʼeha Idiós. ¿Mbaʼépa ikatu jaʼe umi kongregasión ñane tiempopeguáre? Proféta Isaías heʼi vaʼekue “umi ára pahápe” heta persóna de diferénte país oadorataha Ñandejárape. Haʼekuéra heʼíta Jehováre: “Haʼe oikuaaukáta ñandéve hape ha jaikóta haʼe oipotaháicha” (Is. 2:2, 3, TNM). Javyʼaiterei ningo jahechávo mbaʼéichapa oñekumpli ohóvo upe profesía. Jareko ñanendive ermáno ha ermána oúva de diferénte país, oñeʼẽva ótro idióma, ha orekóva diferénte kultúra. Upéicharõ jepe, entéronte ñamombaʼeguasu Jehovápe oñondivepa. w16.06 3:15, 16

Ndaikatumoʼãi voi ningo ñañeimahinamba umi mbaʼe porãita Jehová omeʼẽtava umi unhídope ogoverna vove Crístondi yvágape (Luc. 22:28-30; Filip. 3:20, 21; 1 Juan 3:2). Chuguikuéra oikóta “Jerusalén Pyahu” ha Cristo “nóvia” (Apoc. 3:12; 17:14; 21:2, 9, 10). Haʼekuéra ombaʼapóta Jesús ndive ikatu hag̃uáicha “omonguera umi tetãnguérape”. Upéva heʼise umi unhído oipytyvõtaha yvyporakuérape ojei hag̃ua pekádo ha ñemano poguýgui, ha ohupyty hag̃ua perfeksión (Apoc. 22:1, 2, 17). Jehová ohechaukáta imbaʼeporãitereiha, por ehémplo pe rresurreksión rupive (Job 14:13-15; Juan 5:28, 29). ¿Mávapa umi orresusitátava? Umíva apytépe oĩta umi Ñandejára siérvo omano vaʼekue Cristo omano mboyve. Avei oĩta umi “ambue ovechakuéra” omanóva koʼã ára pahápe. Enterovéva oikove jeýta ha osegíta oservi Jehovápe (Juan 10:16). w16.07 4:13-15

Ñaĩ hag̃ua alérta ha preparádo jajapose vaʼerã ñande pyʼaite guive pe oĩ porãva. Unos kuánto día Jesús omano mboyve, heʼi vaʼekue idisipulokuérape osegi vaʼerãha ojerure Jehovápe toipytyvõ chupekuéra (Luc. 21:36). Upéicharõ, ñaĩ hag̃ua alérta koʼã ára pahápe, tekotevẽ ñañemboʼe meme (1 Ped. 4:7). Jesús heʼi vaʼekue idisipulokuérape: “Peimoʼãʼỹve jave oúta pe Yvypóra Raʼy” (Mat. 24:44). Upévare ñaĩ vaʼerã preparádo. Koʼýte koʼã tiémpope ndajaikói vaʼerã jaheka umi mbaʼe ko múndo oikuaveʼẽva. Ko múndo ogueroviaukase ñandéve umi mbaʼe oofreséva ñanembovyʼataha, péro upéva japu hína. Jehová ha Jesús heʼi mbaʼépa jajapo vaʼerã ñaĩ hag̃ua alérta. Upévare, ñañatendékena umi profesía oĩvare la Bíbliape ha mbaʼéichapa oñekumpli. Jasegíkena ñañemoag̃ui Jehováre ha ñamotenonde meme Irréino. Péichamante ñaimétama preparádo og̃uahẽ vove pe fin (Apoc. 22:20). Aníkena ñanderesarái, ñande rekove odepende hína upévare. w16.07 2:15-17

¿Mbaʼépa ojapo vaʼerã umi matrimónio siémpre ojogueraha porã hag̃ua? La Biblia heʼi: “Pesegíkena peñoaguanta ha peñoperdona pende pyʼaite guive”. Enterovéva ningo ñaneimperfékto, upéicha rupi ména ha tembireko ojavýtante voi. Péro koʼã mbaʼe ikatu oipytyvõ chupekuéra oaprende hag̃ua umi mbaʼe ojapo vai vaʼekuégui. Avei oñehaʼã vaʼerã oñoperdona ha ohechauka pe mborayhu oñehaʼarõva kristianokuéragui. Peichagua mborayhu “oipytyvõ enterovépe ojogueraha porã hag̃ua” (Col. 3:14). Umi matrimónio ipyʼaporãva, ipasiénsiava ha ndaipyʼaróiva oñondive, ohechauka ojoayhuha (1 Cor. 13:4, 5). Avei mokõivéva oñehaʼã vaʼerã osolusiona umi provléma pyaʼe porã, “kuarahy oike mboyve” (Efes. 4:26, 27). Tekotevẽ iñumílde hikuái ha notĩri vaʼerã heʼi hag̃ua: “Chediskulpána romoñeñandu vai haguére”. Ñaperdonáramo ñane rembiayhúpe, ikatúta ñasolusiona heta provléma ha ñañemoag̃uivéta ojuehe. w16.08 2:6

Jesús opredika meme vaʼekue umi notísia porã oñeʼẽva Ñandejára Rréinore. Upéicharõ jepe, oipuru avei itiémpo ombokatupyry hag̃ua idisipulokuérape. Oipytyvõ chupekuéra omboʼekuaa hag̃ua ha oñangarekokuaa hag̃ua Jehová siervokuérare (Mat. 10:5-7). Felipe haʼe vaʼekue peteĩ kristiáno odedikáva heta tiémpo predikasiónpe. Péro avei omboʼe vaʼekue itajyrakuérape opredikakuaa hag̃ua (Hech. 21:8, 9). Ñande avei ñambokatupyry vaʼerã ótrope. Ko yvy tuichakuére, oĩ heta persóna oaprende ramóva pe añetegua ha neʼĩrava ojevautisa. Ñaipytyvõ vaʼerã koʼã estudiántepe ontende hag̃ua mbaʼérepa iñimportánte haʼekuéra voi olee ha ostudia la Biblia. Avei ñambokatupyry vaʼerã chupekuéra opredika ha omboʼe hag̃ua ótrope. Umi ermáno oikotevẽ avei ajúda ikatu hag̃uáicha kon el tiémpo oiko chuguikuéra siérvo ministeriál térã ansiáno. Enterove ikatu ñaipytyvõ umi ipyahuvévape oprogresa hag̃ua. w16.08 4:1, 2

Ñambaʼapo rupi ñane ermanokuérandi, jajeheʼave ojuehe ha añetehápe jaiko oñoamígoramo. Avei jajeroviave Ñandejára promesakuérare, koʼerõite oñekumplítava Irréino rupive. Ñamokyreʼỹ jave ótrope, haʼekuéra ogueropuʼakáta avei umi provléma ha ndoperdemoʼãi la esperánsa (Is. 35:4). Jajapóramo koʼã mbaʼe, ñande voi ñanembareteve ha ñañekonsentra umi mbaʼe porã jaguerekóvare ñanerenonderãme. Jajepyʼamongeta jave mbaʼéichapa Jehová oipytyvõ ha oñangareko isiervokuéra yma guarére, jajeroviave hese. Upévare, ñaneprovléma jave ha jajepyʼapy, ani jaheja ikangy ñande jyva, térã ñañedesanima (Sof. 3:16). Ha arakaʼeve nañanderesaráiri vaʼerã Jehová ipyapy mbareteha, ha jajeruréramo chupe ajúda, haʼe katuete ñanepytyvõta. Avei koʼẽrõite omeʼẽta ñandéve hetaiterei mbaʼe porã Irréino rupive (Sal. 73:23, 24). w16.09 1:16-18

Jadesidíta jave mbaʼéichapa ñañemondéta, entéro jaservíva Jehovápe jareko vaʼerã enkuénta pe téxto ko árape g̃uarã. Ñande ningo ñakambia ñañemonde lája asegún pe klíma. Por ehémplo, haku jave ñañemonde peteĩ hendáicha, ha roʼy jave ótro hendáicha. Péro ani ñanderesarái Jehová omandáva arakaʼeve nokambiaiha (Mal. 3:6). Umi lugár hakuvehárupi hasyve jaelehi hag̃ua ao idesénteva. Ñane ermanokuéra oguerohorýne katuete ndajaipurúiramo umi ao ñandejopypáva, hesakãva térã iséxiva (Job 31:1). Ñaime jave umi pláyape térã valneáriope, ñande tráhe de váño idesénte vaʼerã (Prov. 11:2, 20). Heta persóna ko mundopegua oipuru umi tráhe de váño nomoʼãguasúiva chupekuéra. Péro ñande jaservíva Jehovápe ñamondese umi ao nomotĩmoʼãiva chupe. w16.09 3:11, 12

Jesús heta vése oporandu vaʼekue idisipulokuérape mbaʼépa opensa hikuái. Peẽ sy ha túa ikatu avei pejapo upéva. Por ehémplo, peñemongeta jave pene famíliandi peteĩ mbaʼére, térã pejapo jave álgo oñondive, iporãta peporandúrõ chupe la opensáva. Ani reñedespasensia ne famíliare ijetuʼúrõ chupe oasepta hag̃ua peteĩ mbaʼe la Biblia omboʼéva. Iporãta reipytyvõramo chupe ani hag̃ua oduda. Añetehápe oĩ porã ne família ombaʼeporandúramo ndéve, pórke péicha ohechauka oaprendeseveha. Jesús jepe ojapo vaʼekue heta pregúnta imitãme (Luc. 2:46). Eikuaa porãkena ne famíliape. Ani epensa osẽ haguére opredika ha oho rupi rreunionhápe ojeroviamaha Jehováre. Eñehaʼã eaverigua oĩpa peteĩ mbaʼe ojokóva chupe, ha upéva káusare ndaikatúi oservi porã Jehovápe. Eñeʼẽ chupe Ñandejárare káda día pejapo jave algúna kósa oñondive. Eñemboʼékena hese reime jave hendive, ha avei reime jave neaño. w16.09 5:3-5

Koʼág̃arupi heta testígo de Jehová kyreʼỹme ombaʼapo opredika hag̃ua umi marandu porã “umi oikóvape ko yvy ári, entéro tetã, trívu, puévlo ha umi oñeʼẽvape opaichagua idiómape” (Apoc. 14:6). ¿Ndépa reaprende hína avei ótro idióma? Oĩ oservíva kómo misionéro, térã opredikáva ótro paíspe umi lugár oĩvehápe nesesida. Oĩ katu hetãme voi oñepyrũva oasisti rreunionhápe ótro idiómape. Entéro jaservíva Ñandejárape tekotevẽ jakuida ñande espiritualidáre ha ñane família espiritualidáre. Sapyʼánte ningo ñanerembiapoiterei rupi, ijetuʼu jajapo porã hag̃ua ñande estúdio personál. Ha oiméramo jaservi peteĩ kongregasión noñeñeʼẽihápe ñane idióma katu, ijetuʼuvéntema. Péicha jave, ndahaʼéi ñaaprendénte vaʼerã peteĩ idióma pyahu, síno jastudia porã vaʼerã avei ani hag̃ua ikangy ñande jerovia (1 Cor. 2:10). w16.10 2:1-3

Ñane tiémpope, oĩ hetaiterei ñane ermáno vyʼápe oservíva Jehovápe, ojepersegi mbaretéramo jepe chupekuéra. Umíva apytépe heta oĩ préso Eritrea, Singapur ha Corea del Súrpe. ¿Mbaʼérepa? Ndoipuruséi rupi árma. Añetehápe ningo heta Testígope ndojeguerahái préso ni noñemaltratái chupekuéra. Péro heta oĩ ohasa asýva pórke imboriahu, oiko rupi desástre naturál térã gérra upe oikohárupi. Avei oĩ ohechaukáva osegiha Abrahán, Isaac, Jacob ha Moisés ehémplo, odesidívo oservi porãve Jehovápe oiko rangue pláta rapykuéri térã oñehaʼã rangue ifamóso. ¿Mbaʼépa oipytyvõ koʼã ñane ermánope vyʼápe oservi hag̃ua Jehovápe? Haʼekuéra ohayhu chupe ha ojerovia ipromesakuérare. Oĩ segúro Jehová katuete omeʼẽtaha umi isiérvo iñeʼẽrendúvape pe oportunida oiko hag̃ua imúndo pyahúpe, upépe ndaiporimoʼãvéima inhustísia (Sal. 37:5, 7, 9, 29). w16.10 3:15, 16

Peteĩ jey, proféta Jeremías okyhyje ha oñedesanima vaʼekue, péro Jehová opromete oipytyvõtaha chupe (Jer. 1:6-10). Ha Daniel ijedámarõ guare, Jehová omondo peteĩ ánhelpe omombarete hag̃ua chupe. Pe ánhel heʼi Daniélpe haʼeha peteĩ “kuimbaʼe ojeguerohorýva” (Dan. 10:8, 11, 18, 19, TNM). Ñande avei ikatu ñamokyreʼỹ umi puvlikadór ha prekursórpe, térã umi ermáno ijedávape. Jesús ou mboyve ko yvy ape ári oĩma vaʼekue Itúandi yvágape heta tiémpore. Upéicharõ jepe, Jehová oikuaa porã tekotevẽha gueteri omokyreʼỹ Itaʼýrape. Por ehémplo, Jesús oñepyrũtarõ guare opredika ha avei pe último áño oĩrõ guare ko yvy ape ári, Jehová oñeʼẽ yvága guive ha heʼi: “Kóva hína che Raʼy ahayhuetéva ha aguerohorýva” (Mat. 3:17; 17:5). Koʼã mbaʼe omokyreʼỹetereíne raʼe Jesúspe. Oiméne ñanemanduʼa avei Jesús omano mboyve oñekevrantaiterei hague. Upévare Jehová ombou hendápe peteĩ ánhelpe omombarete ha okonsola hag̃ua chupe (Luc. 22:43). w16.11 1:7, 8

Heta vése ningo ijetuʼu jajejokokuaa hag̃ua. Sapyʼánte oĩ ñaneofendéva térã reiete ñandetrata vaíva. Ikatu oĩ ojapóva upéva jaju haguére ótro tetãgui térã ñande pire kolór diferénte haguére. Upéicha jave ikatu ñañeñandu vai térã ñandepochy. Ha katuete ñañeñandu vaivétantema oimérõ peteĩ ermáno la ojapóva upéva ñanderehe. Upévare la Biblia heʼi ñandéve jajejokokuaa hag̃ua ha ani ñandepochyrei (Prov. 16:32). La Biblia heʼi avei ñaporoperdona vaʼerãha. Jesús heʼi vaʼekue voi nañaperdonáirõ ñande rapichápe, Jehová nañaneperdonamoʼãiha (Mat. 6:14, 15). Upévare iporã ñañeporandu: “¿Ahechakuaápa tekotevẽha chepasiensiave? ¿Ijetuʼúpa chéve aporoperdona hag̃ua?”. Nañakontroláirõ umi mbaʼe ñañandúva, ikatu ñandepochy ñande rapicháre térã ndajachaʼevéi hese. Ñande káusare umi ermáno opensakuaa avei upéicha (Lev. 19:17, 18). w16.11 3:4-6

Áño 1870-rupi, Charles Taze Russell ha unos kuánto kuimbaʼe oikuaaseterei pe añetegua Ñandejára ñeʼẽ omboʼéva, upévare oñepyrũ ohesaʼỹijo porã la Biblia. Ñepyrũrã, ermáno Russell oikuaase vaʼekue mbaʼe rrelihiónpa omboʼe pe añetegua. Upémarõ okompara la Biblia heʼíva, heta mbaʼe omboʼévandi umi rrelihión kristiána ha umi ndahaʼéiva. Ha ohechakuaa ni peteĩva koʼã rrelihión ndosegiporãiha Ñandejára Ñeʼẽ heʼíva. Upéi oñeʼẽ unos kuánto omoakãvandi diferénte rrelihión, ikatu hag̃uáicha omboʼe avei ihentekuérape pe añetegua. Péro chupekuéra ndoúi ni ndohói upéva. Umi Estudiánte de la Biblia pyaʼe voi ohechakuaa ndaikatumoʼãiha omombaʼeguasu Ñandejárape umi rrelihión fálsandi. w16.11 4:14

Katuete ningo oiméne ñañehaʼãmbaite jajehekýi umi pekádo igrávevagui, upévare nañaporomoakãratĩri, nañandekaʼúi, ha umícha (1 Cor. 6:9-11). Péro oĩ hetave mbaʼe jajapo vaʼerã. Ñande ñamboykete vaʼerã opa mbaʼe Jehovápe ndogustáiva. Por ehémplo, nañanderekovaiséi péro avei jajehekyiete vaʼerã umi entretenimiénto tieʼỹgui. Upéicha avei, ndahaʼéiramo jepe la ñandekaʼúva, lomímonte jajejoko vaʼerã ani hag̃ua jaʼu vevída jakaʼu lénto peve. Katuete ningo ijetuʼu ñandéve ñamboyke koʼã práktika vai, péro upéva ndeʼiséi ndaikatumoʼãiha ñakonsegi. Jajapose Pablo heʼi hagueichaite: “Ani peheja pe pekádo osegi ogoverna pende rete, ani hag̃ua pejapo meme pende rete oipotáva” (Rom. 6:12; 7:18-20). w16.12 1:16, 19-21

Jesús opromete kuri ñande Ru yvagapegua omeʼẽtaha ñandéve espíritu sánto jajeruréramo chupe (Luc. 11:10-13). Ñandejára espíritu ikatu ñanepytyvõ jareko hag̃ua heta kualida haʼe voi ohechaukáva (Col. 3:10). La Biblia ohenói koʼã kualidápe “umi mbaʼe porã oúva Ñandejára espíritugui”. Ñañehaʼãramo jareko koʼã kualida, jajogueraha porãvéta ñande rapichakuérandi, ha jajehekýita umi situasión ikatúvagui ñanemoangekói. Tekotevẽ ningo ñaneumílde ikatu hag̃uáicha ñañemoĩ “Ñandejára ipuʼakapáva poguýpe”, ha ñamoĩ hag̃ua “ipópe opaite mbaʼe ñandepyʼapýva” (1 Ped. 5:6, 7). Avei iñimportánte ñarrekonose oĩha heta mbaʼe ndaikatúiva jajapo (Miq. 6:8). Upéicha ningo ñakonfiavéta Ñandejárare, jajerovia rangue ñandejehe. Amáske jahechakuaa mbaʼeichaitépa Ñandejára ñanderayhu ha oñangareko ñanderehe, saʼive jajepyʼapýta. w16.12 3:7, 12

Noé ifiél ha opredika pe mensáhe Jehová omeʼẽ vaʼekue chupe. Upe tembiapo oipytyvõ Noépe osegi hag̃ua ojerovia mbarete. Péro haʼe ndahaʼéi opredikánte vaʼekue, ojapo avei peteĩ árka Jehová omanda haguéicha chupe (Heb. 11:7). Noé ojapo haguéicha, ñande avei ñañehaʼã vaʼerã akóinte ñanerembiapo heta “ñande Ruvicha servísiope” (1 Cor. 15:58). Por ehémplo, ikatu ñambaʼapo pe konstruksión ha mantenimiénto de Salón del Reino ha Salón de Asambléape, jajeofrese ñaipytyvõ hag̃ua asambleahápe, Betélpe térã peteĩ ofisína de traduksiónpe. Iporãveha katu, ñañehaʼã vaʼerã japredika meme, pórke péicha ñaĩvéta desidído jajapo hag̃ua opa ikatúva jahupyty hag̃ua umi mbaʼe porã ñaneraʼarõva. Upéicharõ, pe predikasión ñanemokyreʼỹ ñañehaʼãmbaite hag̃ua jahupyty pe jeikove opaveʼỹva (1 Cor. 9:24). w17.01 1:8, 9

Iñimportánte jarrespeta pe liverta umi ótro orekóva odesidi hag̃ua. ¿Mbaʼérepa? Pórke káda únope oñemeʼẽ upe liverta. Péicha rupi ndaikatúi ñahaʼãrõ mokõi kristiáno odesidi de la mísma fórma, por ehémplo mbaʼéichapa oñekomportáta térã umi mbaʼe ojapótava oservi hag̃ua Ñandejárape. Ñarrekonose jave káda kristiáno oĩha rresponsávle umi mbaʼe odesidívare, jarrespetáta pe liverta umi ótro orekóva. Avei jarrespetáta káda uno odesidíva, tahaʼe umi mbaʼe michĩvévape jepe (1 Cor. 10:32, 33). Jehová omeʼẽ ñandéve liverta jadesidi hag̃ua, ha upéva peteĩ rregálo iporãitereíva (2 Cor. 3:17). Ñande ñamombaʼe ko jopói, pórke ñanepytyvõ jahechauka hag̃ua jahayhuha Jehovápe. Jadesidíkena umi mbaʼe ombotuichátava Ñandejárape, ha jarrespeta pe derécho orekóva ñane ermanokuéra odesidi hag̃ua. w17.01 2:15, 17, 18

Ñande ningo ndajaikói jajejapo ni jajechaukase, síno ñañehaʼã ñamoporã umi mbaʼe jarekóva ñande pyʼapýpe (1 Ped. 3:3, 4; Jer. 9:23, 24). Amo ipahápe ningo ojekuaátante voi umi mbaʼe jaʼéva ha jajapóvare mbaʼeichagua persónapa ñande. Por ehémplo, ikatu jaipota umi ótro opensa jarekoha tuicha priviléhio, jaikuaaha umi mbaʼe naentéroipe oñemombeʼúva, térã ñande haʼeha peteĩ ermáno ikonosídova amigoite. Ikatu avei jaipota ótro opensa ñande jajapo hague peteĩ mbaʼe ñandejeheguínte, oĩramo jepe ñanepytyvõva. Péro ñapensamína Jesús ehémplore. Haʼe iñarandúramo jepe, ndoikói vaʼekue ojechaukase umi héntepe. Upéva rangue pyʼỹinte osita Ñandejára Ñeʼẽ heʼíva, ha ndoipotái umi hénte ombotuicha chupe. Jesús oipota vaʼekue siémpre oñemombaʼeguasu Jehovápe. w17.01 4:12

Ko léi ndahasýi vaʼekue oñentende hag̃ua ni oñekumpli hag̃ua. Pe hardínpe oĩ kuri heta mbaʼe hetereíva ikatúva hoʼu hikuái. Satanás oipuru peteĩ mbóipe ombotavy hag̃ua Évape, ikatu hag̃uáicha odesovedese Itúa Jehovápe (Gén. 3:1-5; Apoc. 12:9). Ontendeka Ñandejára iñinhustoha heʼívo Évape: “¿Añetéiko Ñandejára heʼi peẽme ndovaleiha peʼu umi yva oĩva guive ko hardínpe?”. Haʼete Satanás heʼíva Évape: “¿Añetéiko peẽ ndaikatúi pejapo la pejaposéva?”. Upéi heʼi avei chupe: “Peẽ ningo ni mbaʼevéicharõ napemanomoʼãi”. Añetehápe Satanás tuichaiterei ijapu. Upéi oñehaʼã okonvense Évape natekotevẽiha iñeʼẽrendu Ñandejárape heʼívo: “Ñandejára oikuaa porã peʼuha árape pe yva pejesapeʼataha”. Satanás heʼi Jehová ndoipotaiha hoʼu hikuái pe yva, pórke péicha ojesapeʼáta ha oikuaáta peteĩ mbaʼe iñimportánteva Jehová omokañýva chuguikuéra. Upéi Satanás opromete guaʼu: “Pejoguáta Ñandejárape ha peikuaáta mbaʼépa oĩ porã ha mbaʼépa oĩ vai”. w17.02 1:8, 9

Isaías heʼi ko líder haʼeha “mburuvicha guasu” (Is. 55:4, ÑÑB). Ha Daniel heʼi avei pe Mesías haʼetaha pe “mburuvicha guasu” (Dan. 9:25). Tiémpo rire, Jesús heʼi ijehe haʼeha Ñandejára puévlo “Ruvicha” (Mat. 23:10). Jesús disípulo ojapo haʼe omboʼéva ha oguerovia Jehová ombou hague chupe (Juan 6:68, 69). ¿Mbaʼépa oipytyvõ raʼe chupekuéra oĩ hag̃ua segúro Jehová oipuru hague Jesúspe ogia hag̃ua ipuévlope? Jesús ojevautisa rire, Juan “ohecha yvága ojavriha, ha pe espíritu sánto oguejyha hiʼári peteĩ palómaicha”. (Mar. 1:10-12). Jesús opredika aja ko yvy ape ári, Ñandejára espíritu ombokatupyry chupe oporomboʼe ha ojapo hag̃ua heta milágro (Hech. 10:38). Avei pe espíritu sánto oipytyvõ Jesúspe oporohayhu, ovyʼa ha ojerovia mbarete hag̃ua (Juan 15:9; Heb. 12:2). Ndaipóri vaʼekue ótro líder haʼeichagua ohechaukáva orekoha Ñandejára espíritu. Añetehápe, ojekuaa porãiterei Jehová oiporavo hague Jesúspe omoakã hag̃ua ipuévlope. w17.02 3:15, 16

Pentekostés áño 33-pe, umi apóstol oñepyrũ odirihi pe kongregasión kristiána. La Biblia heʼi “Pedro oñemboʼy [hague] umi once apóstol ndive”, ha omboʼe umi hénte atýpe pe añetegua ikatúva osalva chupekuéra (Hech. 2:14, 15). Upérõ heta persónagui oiko kristiáno, ha “haʼekuéra ojesareko meme umi apóstol omboʼévare” (Hech. 2:42). Umi apóstol oadministra kuri pe pláta kongregasiónpe (Hech. 4:34, 35). Avei omboʼe meme Ñandejára Ñeʼẽ kristianokuérape ha akóinte oñemboʼe hesekuéra (Hech. 6:4). Haʼekuéra omondo avei ermáno iñexperiénsiava opredika hag̃ua umi território ndojepredikáitivape (Hech. 8:14, 15). Tiémpo rire, ambue ansianokuéra unhído oñepyrũ oipytyvõ umi apóstolpe ikatu hag̃uáicha oñatende umi kongregasiónre. Péicha chuguikuéra oiko pe Kuérpo Governánte ha oñondivepa odirihi umi kongregasión (Hech. 15:2). w17.02 4:4

Ñande ningo ñaneimperfékto ha ko múndo oĩ Satanás poguýpe. Upéicha rupi, heta oĩ orekóva hiʼídoloramo tahaʼe kuña térã kuimbaʼépe. Orrespeta ha omombaʼe rangue Jehovápe, otrata algún umánope haʼerõguáicha peteĩ dios. Por ehémplo, ohaʼanga oñemonde térã oñekomporta lájape umi líder rrelihióso térã polítikope, deportístape, aktórpe térã ambue ifamósovape. Péro umi kristiáno añetegua oikuaa porã nomombaʼéi vaʼerãha peichaite peve peteĩ umánope. Jesús añoite haʼe vaʼekue pe yvypóra ohejáva ñandéve pe ehémplo iporãvéva jasegi hag̃ua (1 Ped. 2:21). Ani ñanderesarái yvyporakuéra pekadorha ha “ndohupytýi Ñandejára rekomimbipa” (Rom. 3:23). Ni peteĩ umáno nomereséi ojereko chupe Ñandejáraicha. Jehová katuete ipochýta jajúramo ñamombaʼeterei peteĩ yvypórape. w17.03 1:6-8

Entéronte tekotevẽ jahecha oimépa jaservi hína Jehovápe ñande pyʼaite guive. Iporãta ñañeporandúramo: “¿Cheñeʼẽrendútapa Jehovápe ahasáramo jepe peteĩ situasión ijetuʼúva? ¿Aimépa desidído añehaʼãmbaitetaha ikatu hag̃uáicha siémpre ipotĩ pe kongregasión?”. Por ehémplo, ¿mbaʼépa jajapóta peteĩ ñane hénte térã ñane amigoite oúramo opeka, noñarrepentíri ha oñemosẽ kongregasióngui? ¿Ñañehaʼãtapa anive hag̃ua jajeheʼa hese? ¿Mbaʼépa añetehápe jajapose? Asá rehe oiko haguéicha, sapyʼánte ikatu reñandu oĩha heta oñemoĩva nderehe. Por ehémplo, ikatu ne kompañéro de eskuéla térã de koléhio ỹrõ nde profesór, oñembohory nderehe nde haʼe haguére testígo de Jehová. Térã ne kompañéro de traváho ikatu heʼi nderehe ndevyroitereiha reipuru haguére ne vakasión reho hag̃ua asambleahápe, térã nderejapomeméi haguére óra éxtra reganave hag̃ua. Upéicha jave rejerovia vaʼerã Ñandejárare ojapo haguéicha Asá. Eñemboʼe Jehovápe, ndepyʼaguasu ha esegi ejapo pe iporãva (2 Crón. 14:11). Aníkena nderesarái Ñandejára omombarete hague Asápe ha katuete nemombaretetaha avei ndéve. w17.03 3:6-8

La Biblia heʼi ani hag̃ua jajapura jadesidi hag̃ua peteĩ mbaʼe iñimportánteva. Upévare tekotevẽ ñañemotiémpo ñapensa porã hag̃ua ikatu hag̃uáicha jadesidi porã (1 Tes. 5:21). Por ehémplo, umi ména odesidi mboyve peteĩ mbaʼe oñemotiémpo vaʼerã ohecha hag̃ua mbaʼépa heʼi la Biblia ha umi puvlikasión, ha mbaʼépa opensa ifamília. Ani ñanderesarái Jehová heʼi hague Abrahánpe ohendu hag̃ua hembirekópe (Gén. 21:9-12). Umi ansiáno avei omboyke vaʼerã tiémpo oinvestiga porã hag̃ua. Osẽramo peteĩ informasión pyahu ha ohechakuaárõ hikuái tekotevẽha okambia peteĩ mbaʼe odesidíma vaʼekue, nopensái umi ermáno ndorrespetamoʼãveimaha chupekuéra. Umi ansiáno iñumílderamo ha noñemohatãi haʼekuéra heʼívapente, naiprovlemamoʼãi okambia hag̃ua opensa lája térã peteĩ mbaʼe odesidíma vaʼekue. Péicha omoĩta hikuái ehémplo porã entérope, ha oipytyvõta ikatu hag̃uáicha pe kongregasión oiko pyʼaguapýpe ha peteĩ ñeʼẽme (Hech. 6:1-4). w17.03 2:16