Diciembre

La Biblia omombeʼu yma umi hénte ohechauka hague iñamavleha oinvitávo hapichápe hógape hoʼu hag̃ua álgo oñondive (Gén. 18:1-8; Juec. 13:15; Luc. 24:28-30). Péicha ohechauka hikuái oñamigaseha hese ha oikoseha pyʼaguapýpe hendive. Ñande kásope, ¿mávape raẽvetépa iporãta ñainvita? Umi ermáno ñane kongregasionguápe. Ko múndo aña amás día ivaive ohóvo ha katuete ñaikotevẽta ojuehe. Upévare ñañehaʼã vaʼerã jajogueraha porã ñane ermanokuérandi ha jahechauka chupekuéra haʼeha ñane amígo tee. Umi superintendénte de sirkuíto oikotevẽ jepi peteĩ lugár opyta hag̃ua ovisita jave umi kongregasión. Umi ermáno oñeinvitáva umi eskuéla teokrátikape ha umi ombaʼapóva oñemopuʼã hag̃ua Salón oikotevẽ jepi avei alohamiénto. Heta oĩ opytáva ogaʼỹre peteĩ torménta vai rire, haʼekuéra oikotevẽterei avei peteĩ lugár oiko hag̃ua oñemyatyrõmba peve hogakuéra. Nañapensái vaʼerã umi hóga tuichávante ikatuha oipytyvõ péicha jave. Koʼã ermáno heta vésema oofrese ojepyta hag̃ua hógape. Péro, ¿ikatúpa nde avei rejapo upéva michĩramo jepe la nde róga? w18.03 páh. 15 párr. 6, 9

¿Mbaʼépa ñanepytyvõta “ñapuʼã jey hag̃ua” oiméramo jajavy? Ndahaʼemoʼãi ñanembaretégui la ñapuʼã jeýtava, síno Ñandejára espíritu rupive (Filip. 4:13). Ñandejára espíritu sántogui ningo ou hína pe autodomínio térã jejokokuaa, ha jajekorrehi jave ñandejupe voi jahechauka jajejokokuaaha. Avei ñanepytyvõta ñañemboʼe, jastudia la Biblia ha jajepyʼamongetárõ. Péro, ¿mbaʼépa ikatu jajapo ijetuʼúramo ñandéve jastudia hag̃ua, térã ndajastudiaséirõ voi? Ani jajepyʼapy, jaheja vaʼerã Jehová ñanepytyvõ, péicha ñanekyreʼỹvéta “jaheka meme” hag̃ua umi mbaʼe oĩva Iñeʼẽme (1 Ped. 2:2). Jajerure chupe ikatu hag̃uáicha ñañeorganisa porã jastudia hag̃ua la Biblia, ha ñakumpli hag̃ua pe prográma jajapóva. Ñepyrũrã ikatu jastudia unos kuánto minútonte, péicha mbeguekatúpe ifasilvéta ha igustovéta ñandéve pe estúdio. Ha amo ipahápe jadisfrutátama ñamboyke haguére tiémpo jajepyʼamongeta hag̃ua Jehováre (1 Tim. 4:15). w18.03 páh. 29 párr. 5, 6

Peteĩ persóna ojevautisa mboyve, oaprende vaʼerã pe añetegua Ñandejáragui, mbaʼépa hembipota yvyporakuérape g̃uarã ha ko yvýpe g̃uarã, ha mbaʼépa haʼe ojapo ñandesalva hag̃ua (1 Tim. 2:3-6). Amedída oikuaa Ñandejárape, haʼekuéra ojeroviavéta ohóvo, ha upéva omomýita chupekuéra iñeʼẽrendu hag̃ua chupe ha oheja hag̃ua umi mbaʼe vai ojapóva (Hech. 3:19). Koʼã mbaʼe iñimportanteterei, pórke Jehová ndoaseptamoʼãi peteĩ persóna oñemeʼẽvape chupe ha osegíva hembiapo vai (1 Cor. 6:9, 10). Oĩ hetave mbaʼe tekotevẽva ojapo pe ojevautisaséva. Por ehémplo, oho vaʼerã rreunionhápe, opredika meme vaʼerã umi marandu porã ha omboʼe hapichápe (Hech. 1:8). Jahechaháicha, peteĩ estudiánte tekotevẽ ojapopaite koʼã mbaʼe ojevautisa mboyve. Upéi ikatúma oñemboʼe Jehovápe haʼeñoháme oñemeʼẽ hag̃ua chupe ha ojevautisa. w18.03 páh. 6 párr. 12

Jehová oiporavo Maríape oiko hag̃ua chugui Jesús sy pórke haʼe ijespirituál. Eleemína María heʼi vaʼekue ohórõ guare ovisita ihentekuérape, haʼéva Zacarías ha Elisabet (Luc. 1:46-55). Umi mbaʼe heʼívare jahechakuaa haʼe ohayhuetereiha Ñandejára Ñeʼẽ ha oikuaa porãha pe Escrituras Hebreas (Gén. 30:13; 1 Sam. 2:1-10; Mal. 3:12). Avei haʼe ha José omendámarõ jepe, ohaʼãrõ Jesús onase raẽ oreko hag̃ua hikuái rrelasión sexuál. Pe asignasión orresivíva Jehovágui iñimportanteve umi deséo sexuál orekóvagui hikuái (Mat. 1:25). María ojesareko avei la oikóvare Jesús okakuaa aja, ojapysaka porã umi mbaʼe Jesús omboʼévare. Jahechaháicha, haʼe oñeinteresaiterei vaʼekue umi promésa Ñandejára ojapo vaʼekuére pe Mesíasre. ¿Ikatúpa ñande jasegi María ehémplo ha ñañehaʼã meme jajapo Ñandejára oipotáva? w18.02 páh. 21 párr. 11

¿Mbaʼéichapa ikatu jajerovia ha ñaneñeʼẽrendu Job ojapo haguéicha? Tahaʼe haʼéva ñane situasión, siémpre jahechauka vaʼerã Jehová haʼeha la iñimportantevéva ñandéve g̃uarã. Jajerovia vaʼerã hese opaite mbaʼépe ha ñaneñeʼẽrendu chupe ñande pyʼaite guive. Añetehápe jareko hetaitereive mbaʼe ñanemomýiva ñaneñeʼẽrendu hag̃ua Ñandejárape Job oreko vaʼekuégui. Por ehémplo, koʼág̃a ñande jaikuaa heta mbaʼe Satanásgui ha mbaʼéichapa haʼe ombaʼapo (2 Cor. 2:11). La Bíbliape, koʼýte pe lívro de Jóbpe, jahechakuaa mbaʼérepa Ñandejára oheja jasufri. Ha umi profesía oĩva lívro de Daniélpe katu ñanepytyvõ jaikuaa hag̃ua Ñandejára Rréino haʼeha peteĩ goviérno rreál oĩva Jesucristo poguýpe (Dan. 7:13, 14). Jaikuaa avei koʼẽrõitéma ko Rréino oisãmbyhytaha ko yvy tuichakue, ha oiko vove upéva opatamaha pe sufrimiénto. Umi mbaʼe Job ohasa vaʼekue ohechauka avei ñandéve tekotevẽha jaiporiahuvereko ñane ermanokuéra ohasa asývape. Job rehe oiko haguéicha, ikatu oĩ ñane ermáno ohasáva umi situasión ijetuʼúva ha upévare heʼi umi mbaʼe heʼiʼỹ vaʼerã (Ecl. 7:7). Upéicha jave, ñañehaʼã vaʼerã ñantende chupekuéra ha ani ñapensa vaíma voi hesekuéra. Péicha jajapóramo jasegíta Jehová ehémplo, haʼe ningo ñanderayhueterei ha ñandeporiahuvereko (Sal. 103:8). w18.02 páh. 6 párr. 16; páh. 7 párr. 19, 20

Oĩ persóna oúva oñemombaʼeguasu iporã haguére, ojekuaa haguére chupe opárupi, ivale rupi músikape, imbaretégui térã oĩgui omombaʼetereíva chupe. David orekopaite vaʼekue koʼã mbaʼe, upéicharõ jepe haʼe siémpre iñumílde. Por ehémplo, ojukárõ guare Goliátpe, rréi Saúl heʼi chupe ikatuha omenda itajýrare. Péro David osẽ heʼi: “¿Mbaʼéicha piko che amendáta peteĩ rréi rajýre?” (1 Sam. 18:18). Ñande ningo ñañehaʼã avei ñaneumílde David iñumílde haguéicha. Ñamombaʼeterei avei jahechávo mbaʼéichapa Jehová iñumílde haʼéramo jepe pe Rréi del univérso. Ñañehaʼãmbaite ningo jasegi ko konsého oĩva la Bíbliape: “Pehechaukákena peiporiahuverekoha pende rapichápe pende pyʼaite guive, penembaʼeporã, peñemomirĩ, ani pendepochy rei ha penepasiénsiakena” (Col. 3:12). Ñande jaikuaa avei pe oporohayhúva ndaijejapói ha noñembotuichaiha (1 Cor. 13:4). Umi hénte ohecha jave ñaneumildeha, ikatu hína oikuaase avei Jehovápe. w18.01 páh. 28 párr. 6, 7

Sapyʼánte oñekotevẽ kontrivusión ojejapo hag̃ua peteĩ traváho espesífiko, por ehémplo oñemyatyrõ térã oñemopuʼãta jave peteĩ Salón pyahu ñane kongregasiónpe g̃uarã (Hech. 4:34, 35; 1 Cor 16:2). Sapyʼánte ikatu avei ojeʼe ñandéve oñekotevẽha fóndo ojekuvri hag̃ua umi gásto ojeguerekóva ojejapo hag̃ua ñane asambléa, térã oñepytyvõ hag̃ua ermanokuérape oiko rire peteĩ desástre naturál. Umi kontrivusión ñameʼẽva ningo ojepuru avei oñepytyvõ hag̃ua umi misionéro, prekursór espesiál, superintendénte de sirkuíto ha umi ermáno ombaʼapóvape sentrál mundiálpe, ha entéro umi sukursál oĩvape ko yvy tuichakuére. Enterovete ikatu ñameʼẽ ñane kontrivusión jaapoja hag̃ua Jehová organisasión koʼã ára pahápe. La majoría umi kontrivusión ojerresivíva ndojekuaái mávapa omeʼẽ, pórke oñemoĩnte umi káha de kontrivusión oĩvape Salón del Réinope, térã oñemondo jw.org rupive. Sapyʼánte ikatu ñapensa michĩetereiha pe kontrivusión ñameʼẽva ha noipytyvõmoʼãiha mbaʼevépe. Péro añetehápe, la majoría umi fóndo orekóva Jehová organisasión oñembyaty enterove omeʼẽ rupi la ikatumíva, ndahaʼéi katuete unos kuánto omeʼẽ rupi heta kontrivusión. w18.01 páh. 19 párr. 10, 11

Añetehápe entéro kristiáno tekotevẽ ojevautisa ikatu hag̃uáicha ojesalva ha oikove pára siémpre (Mat. 28:19, 20). Pe vautísmo heʼise reñemeʼẽmaha Jehovápe. Repromete rehayhutaha chupe, ha iservísio iñimportantevetaha ndéve g̃uarã opa mbaʼégui. Núnka nerembyasýi vaʼerã repermiti haguére Jehovápe ndegia. Umi ndoikuaáiva Jehovápe oĩ Satanás poguýpe. Ha jaikuaaháicha, Satanás noñeinteresái avavére. Haʼe ovyʼáta remboykéramo Jehovápe ha reperde pe esperánsa reikove hag̃ua opa árare. Epensamína mbaʼeichaitémapa Jehová nevendesi reñemeʼẽ rupi chupe ha rejevautisa. Nde ningo rentrega kuri chupe nde rekove, upévare ikatu ere: “Ndakyhyjemoʼãi asy pórke Jehová oĩ che ykére, ¿mbaʼe piko ojapóta cherehe peteĩ persóna cheichagua?” (Sal. 118:6). Jehová ndeguerohory reñemoĩ haguére ifavórpe. Añetehápe ndaipóri ótra kósa iporãvéva upévagui. w17.12 páh. 23, 24 párr. 1-3

Enterove ningo ñaneimperfékto, péicha rupi ikatu ñaneprovléma ermanokuérandi. Sapyʼánte oĩ heʼi térã ojapóva álgo ñanembopochýva, térã ñande voi jaʼe o jajapo álgo ombopochýva ótrope. Koʼãichagua situasión ningo ijetuʼu hína. Péro omeʼẽ ñandéve peteĩ oportunida jahechauka hag̃ua ñandefielha Jehovápe. ¿Mbaʼérepa jaʼe upéva? Pórke péicha ñaaprende ñambaʼapo hag̃ua pyʼaguapýpe ha peteĩ ñeʼẽme ñane ermanokuérandi. Jehová ohayhu chupekuéra iñimperféktoramo jepe, ha ñande avei jajapo vaʼerã upéva. Upéicharõ jepe, Jehová opermiti isiervokuéra ohasa umi situasión ijetuʼúva. Ha upéva jahechakuaa José ohasa vaʼekuére. Haʼe imitãrusúrõ guare, iñermanokuéra iñenvidióso rupi ovende chupe esklávoramo, ha upéi ojeraha chupe Egíptope (Gén. 37:28). Jehová ombyasy asy kuri ohechávo mbaʼéichapa oñemaltrata iñamígo Josépe, haʼéva isiérvo ihústo ha iñeʼẽrendúva. Péro Jehová noguenohẽi kuri Josépe upe situasióngui, ni oñemoingérõ guare chupe kárselpe oñemboja haguére hese oviolaseha ipatrón rembirekópe. ¿Péro heʼisépa upéva Jehová oheja hague Josépe haʼeño? Nahániri. La Biblia heʼi: “ Jehová oipytyvõ chupe osẽ porãmba hag̃ua opa mbaʼe ojapóva” (Gén. 39:21-23). w18.01 páh. 9, 10 párr. 12-14

¿Mbaʼe mbaʼépa umi ne kreénsia iñimportantevéva? Ikatu ere Jehová haʼeha ñande Apohare ha haʼe rupivénte jaikoveha. Avei erekuaa ejeroviaha Jesucristo omano hague ñanderehehápe. Katuete ningo nemanduʼáta avei koʼẽrõitéma jaikotaha opa árare peteĩ paraísope ko yvy ape ári. Péro, ¿erétapa pe rresurreksión haʼeha peteĩ kreénsia iñimportantetereíva kristianokuérape g̃uarã? Añetehápe jaʼekuaa upeichaha, ñapensáramo jepe jajesalvataha pe jehasa asy guasúpe ha jaikotaha opa árare ko yvy ape ári. Pe rresurreksión ningo tuichaiterei mbaʼe hína ñandéve g̃uarã. Jesús ndorresusitáirire, koʼág̃a ndahaʼéi vaʼerãmoʼã Rréi yvágape, ha ñande katu reiete japredikáta umi héntepe (1 Cor. 15:12-19). Péro jaikuaa porã Jesúspe oñemoingove jey hague, ha ñande jajeroviaiterei Ñandejára omoingove jeytaha umi omano vaʼekuépe (Mar. 12:18; Hech. 4:2, 3; 17:32; 23:6-8). w17.12 páh. 8 párr. 1, 2

Umi fariséo noporombyasýi vaʼekue ohusgáta jave. Haʼekuéra oñekonsentrave pe pekádore, ndahaʼéi pe persónare. Unos kuánto fariséo ohechárõ guare Jesúspe okaruha Mateo rógape, oporandu hikuái Jesús disipulokuérape: “¿Mbaʼére piko pene mboʼehára okaru umi impuésto kovraha ha mbaʼe vai apohándi?”. Jesús ombohovái chupekuéra: “Hesãiva noikotevẽi doktór, péro umi hasýva oikotevẽ. Tapeho pejepyʼamongeta mbaʼépa heʼise ko mbaʼe: ‘Aipota peiporiahuvereko pende rapichápe, pejapo rangue sakrifísio’. Che ndajúi ahenói umi hekojojávape, aju guei ahenói umi mbaʼe vai apohápe” (Mat. 9:9-13). ¿Mbaʼérepa Jesús osẽ heʼi upéva? ¿Odefende mbaʼe piko raʼe umi pekadórpe? Nahániri. Haʼe oipota kuri oñarrepenti umi hénte. Ha jaikuaaháicha, heta vése heʼi vaʼekue umi persónape oñarrepenti hag̃ua (Mat. 4:17). Jesús iñarandúgui ohechakuaa kuri oĩha “impuésto kovraha ha mbaʼe vai apoha” okambiaséva. Koʼãva ningo ndohói kuri Mateo rógape okaru hag̃uánte, síno omoirũségui Jesúspe (Mar. 2:15). Péro ñambyasýramo jepe, la majoría umi fariséo nopensái Jesús opensaháicha. w17.11 páh. 13 párr. 2; páh. 16 párr. 15

Ñande ningo javyʼaiterei ñaime haguére kongregasiónpe. Ñaime jave rreunionhápe jastudia Ñandejára Ñeʼẽ ha ñañomokyreʼỹ ñane ermanokuérandi. Upéva ñanepytyvõ jajesareko hag̃ua pe prémiore. Péro sapyʼánte ikatu jajoavyʼimi ñane ermanokuérandi nañantendeporãi rupi peteĩ situasión. Nañasolusionáiramo upe provléma ikatu hína japyta ñandepyʼaro (1 Ped. 3:8, 9). Jasegíramo ñandepyʼaro ñane ermánondi, ndajahupytymoʼãi pe prémio. Pablo heʼi vaʼekue mbaʼépa ikatu ojapo umi kristiáno Colosasgua: “Peẽme ningo Ñandejára penderayhu, pendeporavo, ha penemomarangatu, upévare pehechaukákena peiporiahuverekoha pende rapichápe pende pyʼaite guive, penembaʼeporã, peñemomirĩ, ani pendepochy rei ha penepasiénsiakena. Pesegíkena peñoaguanta ha peñoperdona pende pyʼaite guive, pejapo upéva oĩramo jepe penembopochýva. Jehová peneperdona haguéicha ipyʼaite guive, upéicha avei peẽ pejapo vaʼerã. (Col. 3:12, 13). w17.11 páh. 27 párr. 7, 8

Peteĩ israelita ojukáramo hapichápe por aksidénte, pyaʼe oho vaʼerã peteĩva umi siuda de rrefúhiope. Og̃uahẽvo pe siuda rokẽ entrádape haʼe omombeʼu vaʼerã umi ansiánope, haʼéva umi kuimbaʼe omoakãva upe siuda, “mbaʼépa la ojapo vaʼekue”. Upévare, haʼekuéra orresivi porã vaʼerã chupe. Peteĩ tiémpo rire, koʼã kuimbaʼe omondo jey vaʼerã chupe pe siuda oporojuka haguépe, ikatu hag̃uáicha umi ansiáno upepegua ohusga chupe (Núm. 35:24, 25). Ohechakuaárõ hikuái pe asesináto oiko hague por aksidénte, omondo jey vaʼerã pe oporojuka vaʼekuépe pe siuda de rrefúhiope. ¿Mbaʼérepa pe oporojukáva oñeʼẽ vaʼerã umi ansiánondi? Péicha umi ansiáno ikatúta oñangareko pe tetã Israélre osegi hag̃ua ipotĩ. Avei Jehová ikatúta oiporiahuvereko pe persóna oporojuka vaʼekuépe ojaposeʼỹre. Peteĩ expérto en téma bíblico heʼi pe oporojukáva ndohóiramo umi ansiáno rendápe, ikatuha ojejuka avei chupe. Péro haʼe oĩta rresponsávle omano haguére ndojaposéigui Ñandejára Léi omandáva. Ndohóiramo peteĩva umi siuda de rrefúhiope, pe omano vaʼekue pariénte ikatu ojuka chupe ha avave norreklamamoʼãi upéva. w17.11 páh. 9 párr. 6, 7

Ñane tiémpope, Jehová oipuru hiʼanhelkuérape oñangareko ha omombarete hag̃ua ipuévlope (Mal. 3:6; Heb. 1:7). Áño 1919 guive Jehová puévlo isãso Babilonia Guasu poguýgui, ha péicha pe rrelihión verdadéra osegi okakuaa (Apoc. 18:4). Péro oĩramo jepe oñemoĩva ikóntrape, ndaikatúi ojoko Ñandejára siervokuérape. Umi ánhel oñangareko Jehová organisasiónre, upévare jaikuaa porã Jehová puévlo ndoikemoʼãveimaha pe rrelihión japu poguýpe (Sal. 34:7). Upéicha rupi jasegíta javyʼa ha ñañemeʼẽmbaite Jehová servísiope. Jehová ehérsito ningo la oĩva ñanendive. Pe jehasa asy guasúpe Jehová anhelkuéra odefendéta ipuévlope, ha ohundíta oimeraẽ oñemoĩvape igoviérno kóntrape (2 Tes. 1:7, 8). ¡Ajépa javyʼaitéta upe día og̃uahẽ vove! w17.10 páh. 28 párr. 10, 11

¿Mbaʼéichapa ñañeñandu peteĩ ñane hénte ojexpulsáramo térã orrenunsiáramo? Katuete ningo ñambyasyeterei ha hasy asy ñandéve. ¿Mbaʼépa ikatu jajapo péicha jave? Iñimportánte ñañekonsentra Jehová servísiore. Tekotevẽterei ningo ñamombarete ñande jerovia. Upearã iñimportánte jalee la Biblia káda día, jajeprepara porã rreunionrã ha ani jafalta, japredika meme ha jajerure Jehovápe tañanemombarete ñaaguanta hag̃ua (Jud. 21). ¿Mbaʼépa ikatu jajapo lomímonte jasegírõ ñañeñandu vai? ¡Ani ñañentrega! Jasegi vaʼerã ñañekonsentra Jehová servísiope. Jajapóramo péicha, mbeguekatúpe ñañeñandu porãvéta ha ndajaikomoʼãi ñapensaiterei upe situasiónre. Péicha ningo oiko vaʼekue pe oskrivi vaʼekuére Salmo 73. Peteĩ tiémpore haʼe ohasa vaʼekue umi mbaʼe ijetuʼúva ha opensaiterei upe situasiónre ha upévare oñekevranta. Péro osegi rupi ikyreʼỹ Jehová servísiope, oñeñandu porã jey (Sal. 73:16, 17). Ñandéve avei ñanepytyvõta jajapóramo upéva. w17.10 páh. 16 párr. 17, 18

Satanás oñeʼẽrõ guare Évape hardín de Edénpe, oipota kuri Eva opensa haʼe oñeinteresa añeteha hese. Péro ndaupeichaiete kuri (Gén. 3:4, 5). Rréi David katu oreko vaʼekue peteĩ iñamigoite hérava Ahitofel. Péro ko kuimbaʼe hovamokõi ha opensa ijehénte, upéicha rupi oñepresentárõ guare chupe peteĩ oportunida, otraisiona kuri Davídpe (2 Sam. 15:31). Koʼág̃arupi avei umi apóstata ha ambue tapicha oñehaʼã ombyai pe unida oĩva kongregasiónpe, haʼekuéra oñeinteresaiterei guaʼu la héntere ha ombojuruheʼẽ chupekuéra. Péro koʼãichagua persóna opensa ijehénte (Rom. 16:17, 18). Ivaietereíta ningo jaʼe guaʼúnteramo jahayhuha ñande rapichápe, pórke péicha tuichaiterei ñambotavy hína chupe. Ikatu ningo ñande rapichakuéra ndopillái jahayhu guaʼunteha chupekuéra, péro Jehovápe nañambotavymoʼãi. Jesús heʼi vaʼekue umi hovamokõiva ojekastiga vaietereitaha (Mat. 24:51). Upévare iporã ñañeporandu: “¿Ahayhu añetépa hína che rapichakuérape, térãpa sapyʼánte cherovamokõi ha apensa chejehénte?”. w17.10 páh. 8 párr. 6-8

Jalee jave la Biblia umi héntepe predikasiónpe, jaheja hína Jehová oñeʼẽ chupekuéra. Jaiporavo porãramo peteĩ téxto jalee hag̃ua la héntepe, katuete upéva opokovéta hesekuéra oimeraẽ mbaʼe ñande jaʼévagui (1 Tes. 2:13). Upévare iporã ñañeporandu: “¿Ajapópa ikatúva guive alee hag̃ua la Biblia umi héntepe apredika jave chupekuéra?”. Heta hénte ningo sapyʼánte nontendepái umi téxto jaleéva chupekuéra predikasiónpe. Upéicha oiko vaʼekue avei heta héntere síglo primérope. Upéicharõ, ani ñapensa jalee haguérente peteĩ versíkulo pe ñanerendúva ontendetamaha. Síno ñañehaʼã vaʼerã jarrepeti jey chupekuéra umi palávra térã fráse iñimportantevéva upe téxtope ha jaexplika. Péicha ñaipytyvõta hína umi héntepe ontende hag̃ua Ñandejára Ñeʼẽ ha opoko hag̃ua hesekuéra (Luc. 24:32). w17.09 páh. 25 párr. 7, 8

Jehová oipota isiervokuéra oiporiahuvereko ermanokuérape ha avei umi ótra héntepe (Juan 13:34, 35). Jaiporiahuvereko ñande rapichápe heʼise jasufriha umi osufrívandi. Jaiporiahuverekóramo umi ohasa asývape, jahecháta mbaʼéichapa ikatu ñaipytyvõ chupekuéra. Heta ermáno ohechauka jepi oiporiahuverekoha hapichápe oiko jave umi desástre naturál. Entéronte ohechakuaa mbaʼéichapa Jehová siervokuéra oñehaʼã oipytyvõ umi ohasávape koʼãichagua situasión (1 Ped. 2:17). Áño 2011-pe oiko vaʼekue peteĩ yvyryrýi tuichaitereíva Japónpe ha umi márgui opuʼã umi oláda tuichaicháva ha ojapo sarambi. Upérõ peteĩ ermána omombeʼu omokyreʼỹeterei hague chupe ohechávo mbaʼéichapa hetaiterei ermáno ou ótra siudágui ha ótro paísgui oipytyvõ hag̃ua chupekuéra. Omyatyrõ hikuái umi óga ha Salón del Reino oñembyai vaʼekue. Ko ermána heʼi: “Koʼã mbaʼe ohechauka chéve mbaʼeichaitépa Jehová ñanderayhu. Ahechakuaa avei ñande testígo de Jehová jajepyʼapy añeteha ojuehe. Heta ermáno oĩva ko yvy tuichakuére oñemboʼe hína orerehe ko situasiónpe”. w17.09 páh. 11 párr. 12, 13

¿Mbaʼérepa tekotevẽ jajejokokuaa? Primero, pórke umi persóna ojejokokuaáva saʼive iprovléma. Ifasilve chupekuéra ojogueraha porã hag̃ua hapichándi, ojehekýi umi situasión ikatúvagui ombopochy, oipyʼapy térã odeprimi chupe. Segundo, tekotevẽ jajejokokuaa ñamboyke hag̃ua umi deséo vai ha umi tentasión, péicharõmante Ñandejára ñandeguerohorýta. Adán ha Eva ndojapói kuri upéva, ha upéicha rupi opeka (Gén. 3:6). Koʼág̃a avei, heta persóna ohasa asyeterei ndojejokokuaái rupi. Jehová ndahesaráiri ñaneimperfektoha ha ontende ijetuʼuha ñandéve jajejokokuaa hag̃ua. Haʼe ñanepytyvõse ikatu hag̃uáicha ñamboyke umi deséo vai (1 Rey. 8:46-50). w17.09 páh. 3, 4 párr. 3, 4

Peteĩ tiémpore Sudáfricape umi autorida nopermitíri vaʼekue oñembyaty oñondive Testigokuéra ipire kolór idiferénteva ojuehegui. Péro pe domingo 18 de diciembre de 2011, mas de 78.000 Testígo de diferénte rrása oikóva Sudáfricape ha avei oúva umi ótro tetã hiʼag̃uívagui, oñembyaty peteĩ asamblearã. Pe aty guasu ojejapo pe estádio tuichavévape oĩva Johannesbúrgope. Peteĩ enkargádo pe estadiopegua heʼi: “Primera ves ahecha peichaite peve ojeporta porãha peteĩ hénte aty. Enterovénte peñemonde porãiterei, ha potĩ asy peheja pe lugár. Péro la chesorprendevéva ningo ahecha pende apytépe ndaiporiha omboykéva hapichápe hũ térã morotĩ haguére”. Jahechaháicha umi persóna ndahaʼéiva Testígo jepe ohechakuaa Jehová organisasión idiferenteha (1 Ped. 5:9). ¿Mbaʼérepa ñane organisasión idiferentete umi ótrogui? Pórke la Biblia ha Ñandejára espíritu ñanepytyvõ ñamboykete hag̃ua umi mbaʼe Jehovápe ndogustáiva. Káda uno ñañehaʼã ikatu hag̃uáicha jaipeʼaite ñande “reko tuja” ha ñañemonde pe “teko pyahúgui” (Col. 3:9). w17.08 páh. 17, 18 párr. 2, 3

La Biblia heʼi pe pasiénsia ouha Ñandejára espíritugui. Ñande ningo ñaneimperfékto, upévare Ñandejára nañanepytyvõiramo ijetuʼúta ñandéve ñanepasiénsia hag̃ua jahasa jave umi provléma. Pe pasiénsia haʼe hína peteĩ rregálo oúva Ñandejáragui, ha ñanepasiénsia jave jahechauka hína jahayhuha Jehovápe ha ñande rapichápe. Oiméramo nañanepasiénsiai, hasyvéta avei ñandéve jahechauka hag̃ua japorohayhuha (1 Cor. 13:4; Gál. 5:22). ¿Mbaʼépa heʼise ñanepasiensiaha? Upéva heʼise ñaaguantaha umi situasión ijetuʼúva ha nañañeamargái upe haguére (Col. 1:11; Sant. 1:3, 4). Pe pasiénsia ñanepytyvõ ñandefiél hag̃ua Jehovápe, tahaʼe haʼéva umi provléma jahasáva. Avei ñanepytyvõ ani hag̃ua ñañevenga, jahasa asýramo jepe. La Biblia heʼi jaasepta vaʼerãha tekotevẽha ñahaʼarõkuaa. Upéva haʼe peteĩ mbaʼe iñimportantetereíva ñaaprendéva Santiago 5:7, 8-gui. w17.08 páh. 4 párr. 4

Oiméramo nde peteĩ mitãrusu térã mitãkuña, katuete reikuaa iñimportanteha replanea porã reviaha mboyve peteĩ lugárpe. Nde rekove ningo ikatu rekompara pe viáhere, ha ne huventu haʼe pe moménto replanea hag̃ua mbaʼépa rejapóta. Añetehápe heta vése ijetuʼu rejapo hag̃ua upéva. Péro ani rekyhyje, ejeroviánte pe téxto koestediagua heʼívare. Jehová nemokyreʼỹ repensa porã hag̃ua mbaʼépa rejapóta nde rekovépe (Ecl. 12:1; Mat. 6:20). Haʼe ningo oipota revyʼa. ¿Mbaʼérepa jaʼe upéva? Rehecha, rehendu térã retantea jave umi mbaʼe okrea vaʼekue, reñemeʼẽta enkuénta upeichaha. Haʼe avei oñangareko ñanderehe heta hendáicha. Por ehémplo, omeʼẽ ñandéve heta konsého ha ñanemboʼe mbaʼépa jajapo vaʼerã javyʼa hag̃ua. Péro Jehová ndoguerohorýi umi persóna omboykévape ikonsého. Haʼe heʼi entéro umi nohenduséivape chupe: “Peẽ pedesidi pejapo la chéve ndachegustáiva”. Ha heʼi avei: “Che siervokuéra ovyʼáta, peẽ katu peñemotĩta. Che siervokuéra osapukáita vyʼágui, pórke oñeñandu porãitereíta” (Is. 65:12-14). Añetehápe jadesidi porã jave, ñambotuicha hína Jehovápe (Prov. 27:11). w17.07 páh. 22 párr. 1, 2

Ñandejára oikuaa moõpa oĩ káda estrélla, péicha avei haʼe ñandekuaa porã káda únope. Oikuaa porã moõpa ñaĩ, mbaʼéichapa ñañeñandu ha mbaʼépa ñaikotevẽ. Jehová ningo ontende porã umi mbaʼe jahasáva, ha oreko podér ñanepytyvõ hag̃ua ñane provléma jave (Sal. 147:5). Sapyʼánte ikatu jahasa umi situasión ijetuʼuetereíva ha ñapensa ndaikatumoʼãiha jagueropuʼaka. Péro Jehová oikuaa porã oĩha heta mbaʼe ndaikatúiva jajapo. Haʼe “ndahesaráiri ñande yvynteha” (Sal. 103:14). Ñaneimperfékto rupi jajavy jepi heta vése la mísma kósape, ha upéva ñanemoñeñandu vai. Oime vaʼerã sapyʼánte ñambyasy peteĩ mbaʼe jaʼéva, algún deséo vai jarekóva térã jaipota haguére ótro orekóva. Jaikuaaháicha Jehová ndorekói koʼã provléma, upéicharõ jepe ñanentende porãiterei (Is. 40:28). Oiméne jahechakuaáma mbaʼéichapa Jehová ñanepytyvõ ipodér rupive ñambohovái hag̃ua umi mbaʼe ijetuʼúva (Is. 41:10, 13). w17.07 páh. 18 párr. 6-8

Peteĩ ermáno Sri Lankagua oiko ótro paíspe, péro hetãme oreko peteĩ óga ha peteĩ terréno oipurukáva umi ermánope ojapo hag̃ua rreunión ha asambléa. Avei oipuruka jepi opyta hag̃ua upépe umi oĩva servísio de tiémpo komplétope. Ko ermáno ogastáramo jepe upearã, oipytyvõ heta ermáno imboriahúvape. Peteĩ lugár ojeproivihápe ojepredika katu, umi ermáno oipuru hogakuéra kómo Salón del Reino. Péicha rupi heta prekursór ha ambue ermáno imboriahúva ikatu oñerreuni opagaʼỹre alkilér. Peteĩ ermána ojepokuaa omeʼẽ ikontrivusión oapoja hag̃ua pe predikasión. Haʼe ohecharamoiterei la oikóva hese umi áño ohasávape ipojera haguére. Ko ermána omombeʼu: “Ahechakuaa amáske chepojera, ifasilveha chéve aporoperdona hag̃ua, avei chepasiensiave, ndachepochyreíri ótro ofalla jave ha aasepta porãve umi konsého”. w17.07 páh. 9 párr. 9, 10

Ndajaikuaái ningo oimépa Job ontende raʼe mbaʼérepa ohasa asyeterei, péro oiméne katuete oñeporandúmi vaʼekue tekotevẽpa raʼe osufri peichaite peve. Oimérire Job opensa raʼe koʼã mbaʼére, katuete imanduʼáta Jehová heʼi vaʼekuére. Upéva okonsola ha oipytyvõne chupe opensa hag̃ua hekoitépe (Sal. 94:19). Jajepyʼamongetáramo umi mbaʼe Job ohasa vaʼekuére ñapensáta hekoitépe ha ñanekonsoláta. Jehová oskrivika vaʼekue avei lívro de Job “ñanerekomboʼe hag̃ua. Koʼãva omeʼẽ ñandéve esperánsa, ñanepytyvõgui ñaaguanta hag̃ua ha ñanekonsola avei” (Rom. 15:4). Ko lívrope jaleéva ñanemboʼe ndajaikói vaʼerãha ñapensaiterei ñane provlémarente, ñañemotiémpo vaʼerã guei jajepyʼamongeta hag̃ua la iñimportantevévare: Jehová añoite omereseha ogoverna. Job ojapo haguéicha, ñande avei ikatu jahechauka ñañemoĩha Jehová goviérno ykére ñandefiélvo chupe jahasa asýramo jepe. w17.06 páh. 24, párr. 9; páh. 25 párr. 13, 14

Jesús ohechakuaa vaʼekue idisipulokuéra tekotevẽha opytuʼu. Por ehémplo, peteĩ jey heta opredika rire hikuái, Jesús heʼi chupekuéra la ojesitáva pe téxto koestediaguápe. Iporã ningo ñamboyke tiémpo jajediverti ha jahasa porã hag̃ua. Péro ñañatende vaʼerã ani hag̃ua jaju ñamotenonde koʼã mbaʼe. Síglo primérope, oĩ vaʼekue heta opensa vaʼekue kóicha: “Jakaru ha ñamokõ katu, cháke koʼẽrõ ñamanóta” (1 Cor. 15:32). Koʼág̃arupi avei heta persóna opensa upéicha. ¿Mbaʼépa ñanepytyvõta jaikuaa hag̃ua noiméipa ñamotenonde hína umi vyʼarã? Por ehémplo, ikatu ñaanota mboy órapa jaipuru káda semána jajapo hag̃ua umi mbaʼe ñanemoag̃uivétava Jehováre. Ikatu avei ñaanota mboy tiémpopa jaipuru káda semána jajapo hag̃ua depórte, jahecha hag̃ua téle, térã jahuga hag̃ua umi videohuégo. Upéi, iporãta ñakomparáramo mbaʼépa la hoʼuvéva ñane tiémpo. Jahechakuaáramo tekotevẽha ñakambia, pyaʼe jajapo vaʼerã upéva (Efes. 5:15, 16). w17.05 páh. 24, 25 párr. 11-13

Jesús ehémplope, pe komersiánte otopa peteĩ pérla iporãitevéva entéro umi pérla haʼe ohecha vaʼekuégui. Haʼe oipotaitereígui ko pérla, ovendepa la orekomíva ikatu hag̃uáicha ojogua. Oime vaʼerã ivaliosoiterei raʼe chupe g̃uarã upe pérla ajeve ojapo upéva. Ñandejára Rréino haʼete peteĩ pérla iporãitereíva. Jahayhúramo pe Rréino, pe kuimbaʼe omombaʼe haguéicha pe pérla otopa vaʼekue, ñaĩta dispuésto jajapóvo oimehaichagua sakrifísio ñañemoĩ hag̃ua Ñandejára Rréino poguýpe (Mar. 10:28-30). Por ehémplo, Zaqueo ou vaʼekue irríko oestafa rupi umi héntepe (Luc. 19:1-9). Peteĩ díape Zaqueo ohendu Jesús oñeʼẽha pe Rréinore, ha ogustaitereígui chupe oĩ voi dispuésto okambiávo heta mbaʼépe. Haʼe heʼi: “¡Péina!, che Ruvicha umi che kosakuéragui la mita ameʼẽ umi imboriahúvape, ha umi pláta aipeʼa vaʼekue pokarẽme che rapichágui, amyengovia cuatro vése”. Zaqueo omyengovia jey umi héntepe la omonda vaʼekue ha ndaitaryryivéi. w17.06 páh. 10 párr. 3-5

Tuakuéra ojeruréramo peteĩ ermánope oipytyvõ hag̃ua ifamíliape, pe ermáno imanduʼa vaʼerã haʼe ndahaʼeiha isy ni itúa. Upévare siémpre oñeʼẽ porã vaʼerã umi mitãme ituakuérare ikatu hag̃uáicha oñemoĩ hikuái ipoguypekuéra. Avei pe ermáno oñatende vaʼerã ani hag̃ua oñepensa vai kongregasiónpe térã okápe umi mbaʼe haʼe ojapóvare oipytyvõ hag̃ua pe mitãme (1 Ped. 2:12). Tuakuéra oreko pe rresponsavilida ohekomboʼévo ifamíliape Jehová rapére, upévare oikuaa vaʼerã mbaʼéichapa ótro ermáno oipytyvõ hína ifamíliape, ha haʼe voi osegi vaʼerã omboʼe hogayguakuérape pe añetegua. Tuakuéra, peñemboʼékena Jehovápe ha peñehaʼãmbaite pehekomboʼe porã pene famíliape (2 Crón. 15:7). Ani pejapo peẽme pendegustávante, pemotenonde guei umi mbaʼe oipytyvõtava pene famíliape oñemoag̃uive hag̃ua Jehováre. Pejapo ikatúva guive Ñandejára Ñeʼẽ opoko hag̃ua umi mitã korasõre. Ha ani peduda ikatuha oiko chuguikuéra Jehová siérvo ifiélva. w17.05 páh. 12 párr. 19, 20

Mokõi kuimbaʼe iñañáva oakusa peteĩ karaípe ojapo hague peteĩ mbaʼe ivaietereíva. Péro añetehápe ijapu hikuái. Upéicharõ jepe oñekondena a muérte pe kuimbaʼépe. Epensamíntema mbaʼéichapa oiméne oñeñandu umi persóna ndaijaʼéiva pe inhustísiare ohechávo ojejapiha itápe ko kuimbaʼe inoséntepe ha itaʼyrakuérape omano meve. Ko istória añetehápe oiko vaʼekue peteĩ Ñandejára siérvo iñeʼẽrendúvare hérava Nabot, rréi Acab ogovernaha tiémpope Israel (1 Rey. 21:11-13; 2 Rey. 9:26). Acab oipota kuri Nabot parralty, upévare heʼi ojoguaseha chugui térã okambiase chupe ótro iporãvévare. ¿Mbaʼépa ojapo Nabot? Haʼe heʼi pe rréipe ndaikatumoʼãiha ojapo upéva. Pe Léi heʼi umi israelita ndaikatuiha arakaʼeve ovende peteĩ erénsia ohejáva chupekuéra ifamília, upévare Nabot orrechasa pe oférta (Lev. 25:23; Núm. 36:7). Jahechaháicha, Nabot iñeʼẽrendu Jehovápe. w17.04 páh. 23 párr. 1; páh. 24 párr. 4

¿Mávapa ojesalváta oñehundi vove umi iñañávape? Jehová opromete: “Umi hénte ivuénova opytáta ko yvy ape ári, haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre”. Ótro sálmope heʼi: “Umi hembiapo porãvape oñemeʼẽta ko yvy, ha oikóta pype opa ára g̃uarã” (Sal. 37:11, 29). ¿Mávapa umi “ivuénova”? Umíva hína umi persóna iñumíldeva, oaprendéva ohóvo Jehovágui ha iñeʼẽrendúva chupe. Ha, ¿mávapa umi hembiapo porãva? Koʼãva umi ojaposéva ipyʼaite guive opa mbaʼe Jehová heʼíva oĩ porãha. Pe múndo pyahúpe sólamente oĩta umi ivuénova ha hembiapo porãva, ha haʼekuéra ojapóta ko yvýgui peteĩ paraíso. w17.04 páh. 10 párr. 5, 6

Ñande ningo jahayhu Ñandejárape ha upéva ñanemomýi jahechauka hag̃ua jahayhuha ñane ermanokuérape, koʼýte ijetuʼu jave hendivekuéra (1 Juan 3:17, 18). Por ehémplo, umi kristiáno ypykue Judeagua ohasa asy vaʼekue pórke oñepyrũ ijakáso umi hiʼupy. Upémarõ iñermanokuéra oñeorganisa oipytyvõ hag̃ua chupekuéra (Hech. 11:28, 29). Pablo ha Pedro omokyreʼỹ vaʼekue avei kristianokuérape akóinte ojorresivi porã hag̃ua (Rom. 12:13; 1 Ped. 4:9). Entéro kristiánope oñemanda orresivi porã hag̃ua umi ermáno ovisitávape chupekuéra, upéicharõ koʼytevéntema jahechauka vaʼerã jahayhuha umi ermáno ojapeligrávape, térã ojepersegívape ojerovia haguére Jehováre. Ndaʼareguasúi Ucrániape éste gotyo, hetaiterei testígo de Jehová odipara kuri pe gérragui, térã ojepersegi chupekuéra ha ohejámante hogakuéra. Ñambyasýramo jepe unos kuánto ñane ermánope ojejuka. Heta Testígo oikóva ambue lugárpe Ucrániape ha avei umi Rusiagua, orresivi porã umi ermáno oheja vaʼekuépe hóga. Umi Testígo koʼã tetãmegua ndojeheʼái ko múndore, upévare ndoikéi polítikape ha kyreʼỹme osegi opredika “pe marandu porã” (Juan 15:19; Hech. 8:4). w17.05 páh. 4 párr. 6, 7