Diciembre

¿Mbaʼépa la reguerohoryvéva Jesúsgui? Oiméne ningo oĩ heta mbaʼe, péro katuete remombaʼetereíne mbaʼéichapa ontende porã umi mbaʼe jahasáva kómo umáno imperfékto. Oĩ aja ko yvy ape ári, Jesús ovyʼa vaʼekue “umi ovyʼáva ndive” ha hasẽ “umi hasẽva ndive” (Rom. 12:15). Por ehémplo, umi 70 disípulo ou jeýrõ guare vyʼápe opredikapa rire, “Jesús ovyʼaiterei espíritu sánto rupive” (Luc. 10:17-21). Péro Lázaro omanórõ guare, haʼe ohecha mbaʼéichapa oñeñandu umi ohayhúva chupe, ha “upéva oguapyeterei hese” (Juan 11:33). ¿Mbaʼérepa ko kuimbaʼe perfékto otrata porãite vaʼekue umi yvypóra pekadórpe ha oiporiahuvereko chupekuéra? Prinsipálmente pórke ohayhu umi héntepe (Prov. 8:31). Upéva omomýi chupe oikuaa porã hag̃ua mbaʼéichapa opensa hikuái. Apóstol Juan heʼi kuri hese: “Haʼe oikuaa yvypóra pyʼapy” (Juan 2:25). w19.03 páh. 20 párr. 1, 2

Satanás oipeʼapaite Jóbgui umi mbaʼerepy orekóva, ojuka chugui isiervokuéra ha omoherakuã vaipa chupe. Ojukapaite avei chugui umi 10 ifamília ohayhuetéva, ha upéi ombou chupe peteĩ mbaʼasy ivaietereíva. Osẽ hese kuru vai ipeupáva, ipy guive iñakã meve. Job rembireko ohechávo umi mbaʼe oikóva oñeñandu vaieterei ha opyta yvýre, upévare heʼi iménape omaldesi hag̃ua Ñandejárape ha omanóntema hag̃ua. Job jepe omanoséntema kuri, péro lomímonte osegi ifiél. Upémarõ Satanás otantea ótro hendáicha oity hag̃ua chupe. Haʼe ojevale mbohapy Job amígore. Koʼã kuimbaʼe oho ovisita Jóbpe ha opyta hendive heta díare, péro haʼekuéra ni vy noipytyvõi ni nokonsolái chupe. Upéva rangue oñemoĩ hikuái okritika vaieterei Jóbpe. Heʼi avei hikuái Ñandejára káusare Job ohasa asyha, ha nointeresaiha chupe oimépa Job ifiél térã nahániri. Haʼekuéra ontendeka voi Job iñañaha ha upévare omereseha voi péicha osufri (Job 1:13-22; 2:7-11; 15:4, 5; 22:3-6; 25:4-6). w19.02 páh. 4 párr. 7, 8

Sapyʼánte ndaivaíri la jakyhyje. Por ehémplo, jakyhyje vaʼerã jajapórõ g̃uarã peteĩ mbaʼe ndogustáiva Jehovápe. Adán ha Eva okyhyjérire ojapo hag̃ua upéva, nopuʼãi vaʼerãmoʼã kuri Jehová kóntrape. Péro ojapo rupi upéva, “ojesapeʼa hikuái” ha opilla porã oikóma hague chuguikuéra pekadór. Upe guive entéro ifamiliarégui oikóta kuri avei pekadór ha omanóta. Haʼekuéra ohechakuaáma la isituasión, upévare otĩ oĩ haguére opío ha oñepyrũ oñemoʼã hikuái (Gén. 3:7, 21). Ñande ningo jakyhyje vaʼerã jafalláramo g̃uarã Jehovándi, péro natekotevẽi jakyhyjeterei ñamanóramo g̃uarã. Jehová ningo ojapo peteĩ mbaʼe ikatu hag̃uáicha jaiko pára siémpre. Upéicha rupi, jajúramo jepe japeka, Jehová katuete ñaneperdonáta, péro upearã ñañarrepenti vaʼerã ñande pyʼaite guive ha jajerovia Jesús sakrifísiore. ¿Mbaʼéichapa ikatu jahechauka jajeroviaha upe sakrifísiore? Prinsipálmente ñañemeʼẽvo Jehovápe ha jajevautisa (1 Ped. 3:21). w19.03 páh. 5, 6 párr. 12, 13

Umi israelita ikatu kuri oagradese heta mbaʼére. Por ehémplo, haʼekuéra esklávo kuri Egíptope, péro Jehová ogueru 10 plága ha oguenohẽ chupekuéra upégui. Upe riremínte ohundi avei peteĩ ehérsito kompletoitépe pe Mar Rójope ha osalva umi israelítape. Upérõ guare haʼekuéra oagradeseterei Ñandejárape, ha opurahéi chupe haʼe osalva haguére chupekuéra. ¿Mboy tiémpopa osegi ijagradesído hikuái? Umi israelita ombohováivo ótra situasión ijetuʼúva, hesaráima umi mbaʼe porãita Jehová ojapo vaʼekuégui hesehapekuéra ha ohechaukáma imalagradesidoha (Sal. 106:7). La Biblia heʼi: “Upéi enterove umi israelita oñepyrũ ojeplagea Moisés ha Aarónpe”. Péro añetehápe haʼekuéra Jehovágui la ojekeha (Éx. 16:2, 8). Jehová oñedesepsiona chuguikuéra, upéicha rupi upe rire heʼi entéro upe henerasión omanotaha pe desiértope ha sólamente Josué ha Caleb nomanomoʼãiha (Núm. 14:22-24). w19.02 páh. 17 párr. 12, 13

Jesús noñemombaʼeguasúi vaʼekue ha upévare noñepyrũi oprepara peteĩ akontesimiénto tuicháva ojegueromanduʼa hag̃ua isakrifísio. Upéva rangue, heʼi idisipulokuérape ojapo hag̃ua una ves al áño peteĩ akontesimiénto isensíllova (Juan 13:15; 1 Cor. 11:23-25). Péicha Jesús ohechauka noñemombaʼeguasuiha. ¡Ajépa javyʼaite ñande Rréi yvagapegua hekomirĩ haguére! (Filip. 2:5-8). ¿Mbaʼéichapa ikatu jasegi Jesús ehémplo ha ñanderekomirĩ avei? Ñamotenondévo ñande rapichakuérape (Filip. 2:3, 4). Ñapensamína mbaʼépa Jesús ojapo vaʼekue pe pyhare omano mboyve. Oikuaáramo jepe omano asyetereitaha, ndojepyʼapyguasúi ijehe síno idisipulokuérare. Chupe oipyʼapyve mbaʼéichapa oñeñandúta hikuái haʼe omano rire. Upévare, upe pyharépe heta omokyreʼỹ, ohekomboʼe ha okonsola chupekuéra (Juan 14:25-31). Jahechaháicha, Jesús omotenonde vaʼekue umi ótro oikotevẽva, péicha ohechauka porãiterei iñumildeha. Ñañehaʼãmbaitékena ñande avei jasegi iñehémplo. w19.01 páh. 21 párr. 5, 6

¿Ndépa ndepyʼa pererepa jepi repensa haguénte voi rehupitaha nde po rekomenta hag̃ua? Oiméramo péicha, ani repensa ndévente ojehuha upéva. Amo ipahápe ningo heta oĩ okyhyjéva jepi okomentáta jave. Añetehápe ndaivaiguasúi hína rekyhyje, pórke upéva ikatu ohechauka neumildeha ha epensaha umi ótro tuichaveha ndehegui. Jehová oguerohoryeterei umichagua persónape (Sal. 138:6; Filip. 2:3). Péro haʼe oipota avei embotuicha chupe ha emokyreʼỹ ne ermanokuérape rreunionhápe (1 Tes. 5:11). Jehová nderayhu ha nembopyʼaguasúta rekomenta hag̃ua. Jahechamína unos kuánto téxto bíblico. La Biblia heʼi enterovéva jajavyha la jaʼévape ha avei jaʼe lájape (Sant. 3:2). Jehová nohaʼarõi voi perfeksión ñandehegui, ha ñane ermanokuéra nohaʼarõi avei upéva (Sal. 103:12-14). Haʼekuéra ningo ñane família ha ñanderayhu (Mar. 10:29, 30; Juan 13:35). Ñane ermanokuéra oikuaa voi ñakomenta jave, sapyʼánte nosẽmoʼãiha ñandéve ñandegustahaichaite. w19.01 páh. 8 párr. 3; páh. 10, 11 párr. 10, 11

Añetehápe ndahaʼéi la ifásilva esegi hag̃ua ko konsého, péro upéva ndeʼiséi ndaikatuiha rejapo. Jehová ningo oipota nde revyʼa ha osẽ porã ndéve entéro mbaʼe, ha haʼe nepytyvõramo, katuete oho porãta ndéve nemitã aja ha avei rekakuaapa rire. Jahechamína mbaʼépa oipytyvõ kuri umi israelítape ojagarra hag̃ua pe Yvy Oñepromete vaʼekue chupekuéra. Umi israelita oĩma kuri oike hag̃uáicha pe Yvy Oñepromete vaʼekuépe. ¿Mbaʼépa Jehová heʼi chupekuéra ojapo hag̃ua? ¿Heʼípa raʼe oiko vaʼerãha chuguikuéra soldádo ikatupyryvéva, térã oñentrena vaʼerãha pe gerrarã? ¡Nahániri! (Deut. 28:1, 2). Upéva rangue Jehová heʼi chupekuéra iñeʼẽrendu hag̃ua ha ojerovia hag̃ua hese (Jos. 1:7-9). Oime vaʼerã ko konsého naisentidoguasúi yvyporakuérape g̃uarã, péro upéva haʼe kuri pe konsého iporãvéva. Jehová ningo oipytyvõ heta vése ipuévlope ogana hag̃ua umi cananéope (Jos. 24:11-13). Jahechaháicha, tekotevẽ ningo jajerovia Ñandejárare ikatu hag̃uáicha ñaneñeʼẽrendu chupe, péro jajapóramo upéva katuete oho porãta ñandéve. Péicha oiko vaʼekue ymave ha koʼág̃a avei. w18.12 páh. 25 párr. 3, 4

Ko ñane tiémpope, oĩ algúno oñemomombyry vaʼekue ndogustái rupi chupekuéra peteĩ entendimiénto pyahu. Algúnope avei okonvense umi enseñánsa japu omosarambíva umi apóstata térã umi oñemoĩva pe añeteguáre. Oĩ umi odesidíva oheja Jehovápe ha pe kongregasión koʼã mbaʼére (Heb. 3:12-14). ¡Iporãitevéta kuri haʼekuéra osegírire ojerovia Jesúsre, ojapo haguéicha apóstol Pedro! Oĩ avei umi mbeguekatúpe oheja vaʼekue ohóvo pe añetegua, ha ndopillái oiko hague hese upéva. Peteĩ persóna mbeguekatúpe oñemomombyrýva ojogua peteĩ várko oñemomombyrývape ohóvo pe kóstagui. Upéicha rupi, la Biblia heʼi ñañatende vaʼerãha “ani hag̃ua arakaʼeve jajei tape porãgui” (Heb. 2:1). Heta persóna ohejáva ohóvo pe añetegua nopensái kuri ojapotaha upéva. Péro haʼekuéra oheja mbeguekatúpe ikangy pe amista orekóva Jehovándi oñemomombyryete peve chugui. w18.11 páh. 9 párr. 5, 6

Oimérõ ndekatupyryseve Jehová servísiope ikatu hína reñehaʼã rekumpli umi rrekisíto ikatu hag̃uáicha reho pe Eskuéla Oñembokatupyryve hag̃ua umi Opredikávape. Ko eskuéla ombokatupyry umi ermáno ha ermána iñakãguapývape ha oservímava voi de tiémpo kompléto. Péicha Jehová organisasión ikatúta oipuru porãve chupekuéra. Umi ohóva ko eskuélape oĩ vaʼerã dispuésto oservívo oñeasignahápe chupekuéra opa rire pe kúrso. ¿Reñanimánepa reho ko eskuélape ikatu hag̃uáicha rejapove Jehovápe g̃uarã? (1 Cor. 9:23). Entéro jaservíva Jehovápe ñañehaʼã ñandepojera, ñanevuéno, ñanembaʼeporã ha japorohayhukuaa. Avei siémpre ñañeinteresa ñande rapicháre ha ñaipytyvõse chupe. Upéicha rupi ñañeñandu porã, javyʼa ha ñandepyʼaguapy (Gál. 5:22, 23). Tahaʼe haʼéva la ñane situasión, katuete javyʼavéta ñandepojeráramo Jehová ipojeraháicha ha jasegíramo ñamombaʼe ikatu haguére ñambaʼapo hendive (Prov. 3:9, 10). w18.08 páh. 27 párr. 16-18

Ikatu oĩ oñeporandúva: “¿Ikatúpa peteĩ kristiáno ojedivorsia ha omenda jey?”. Jahechamína mbaʼépa heʼi vaʼekue Jesús: “Oimeraẽ ojedivorsiáva hembirekógui ha upéi omenda jey ótrare, omoakãratĩ chupe. Ha peteĩ kuña ojedivorsiáramo iménagui ha upéi omenda jey ótrore, oporomoakãratĩ hína” (Mar. 10:11, 12; Luc. 16:18). Jahechaháicha, Jesús omombaʼe pe ñemenda ha oipota enterovéva omombaʼe avei. Peteĩ kuimbaʼe ojedivorsiárõ hembireko ifiélvagui ha omenda jey ótrare, omoakãratĩ hína chupe. Péicha avei oiko peteĩ kuña ojedivorsiáva iména ifiélvagui. Peteĩ paréha ojedivorsiáramo orekoʼỹre váse bíblica ndeʼiséi opamaha la imatrimónio. Ñandejárape g̃uarã haʼekuéra ‘peteĩnte’ gueteri. Jesús heʼi voi kuri peteĩ kuimbaʼe ojedivorsiárõ hembireko ifiélvagui chupe, oheja vaiha pe kuñáme pórke ikatu upéva káusare omoakãratĩ iménape. ¿Mbaʼérepa ikatu oiko upéva? Pórke Jesús tiémpope peteĩ kuña péicha ojedivorsiáva ikatu opensa tekotevẽha omenda jey ohupyty hag̃ua hemikotevẽ. Ha ojapóramo upéva, pe segundo matrimónio rupive omoakãratĩta iména ypykuépe. w18.12 páh. 11 párr. 8, 9

Habacuc opyta ipyʼaguapy oñemongeta rire Jehovándi. Oipytyvõ chupe ojerovia hag̃ua Jehová oñenkargataha opa mbaʼére. Jahechakuaa upéva koʼã mbaʼe heʼi vaʼekuére: “Ahaʼarõ kirirĩháme ou pe sarambi guasu” (Hab. 3:16). ¿Mbaʼépa ñaaprende Habacuc odesidi vaʼekuégui ojapo? Primero, siémpre ñañemboʼe vaʼerãha Jehovápe ijetuʼúramo jepe ñane situasión. Segundo, tekotevẽha ñahendu umi mbaʼe Jehová omombeʼúva Iñeʼẽ ha iñorganisasión rupive. Tercero, ñanepasiénsia vaʼerã ha ñahaʼarõ la ojapótava Jehová, ha jajerovia haʼe ñanepytyvõtaha itiempoitépe. Jasegíramo Habacuc ehémplo, ñandepyʼaguapýta ha ikatúta ñaaguanta. Jagueroviáramo añetehápe oñekumplitaha Ñandejára promesakuéra, ñanepasiénsiata ha javyʼáta tahaʼe haʼéva umi provléma jahasáva. Jarekóramo esperánsa Jehováre ndajadudamoʼãi haʼe ojapotaha la tekotevẽva guive itiempoitépe (Rom. 12:12). w18.11 páh. 15, 16 párr. 11, 12

¿Mbaʼépa Jehová opensa peteĩ persóna omoñepysangáva hapichápe? Jesús heʼi vaʼekue: “Oimeraẽ omoñepysangáva peteĩva koʼã michĩvévape ojeroviáva cherehe, iporãve vaʼerã voi oñeñapytĩramo ijajúrare peteĩ ita guasu ha upéi ojepoi márpe” (Mar. 9:42). Jahechaháicha, koʼã mbaʼe Jesús heʼíva ndahaʼeiete hína vyrorei. Ha ñande jaikuaa Jesús opensaha Itúaicha. Upévare, ikatu ñaĩ segúro Jehovápe g̃uarã tuichaiterei mbaʼeha oĩrõ omoñepysangáva Jesús disípulope (Juan 14:9). ¿Ñapensápa avei Jehová ha Jesús opensaháicha? ¿Mbaʼépa ohechauka la jajapóva? Por ehémplo, ikatu ñañemondese ha jajearreglase peteĩ hendáicha pórke ñandegusta. Péro, ¿mbaʼépa jajapóta jaikuaárõ kongregasiónpe oĩtaha otropesáva upéva káusare? ¿Térã ikatuha oĩ opensáva mbaʼe tieʼỹre ñañemonde lájare? ¿Jahejátapa pe mborayhu ñanemomýi ñamboyke hag̃ua umi mbaʼe ñandegustáva ñane ermanokuéra rehehápe? w18.11 páh. 25 párr. 9, 10

¿Mbaʼérepa iñimportantete káda uno ñandefiél Jehovápe? Tekotevẽ ñandefiél chupe pórke Satanás odesafia kuri Jehovápe, ha avei oñeʼẽ vai káda uno ñanderehe. Ko ánhel irrevéldeva omongyʼa Jehová réra porãite heʼívo hese iñañaha, nogovernaporãiha ha opensaha ijehénte. Ñambyasýramo jepe, Adán ha Eva ohendu chupe ha oñemoĩ avei Jehováre (Gén. 3:1-6). Oikóvo pe hardín de Edénpe, haʼekuéra oreko kuri hetaiterei oportunida ohayhuve hag̃ua Jehovápe. Péro Satanás ojerrevelárõ guare, ojekuaa Adán ha Eva ndohayhúi hague Jehovápe ipyʼaite guive, pe imborayhu naikomplétoi kuri. Upévare, tiémpo rire tekotevẽ kuri oñembohovái koʼã porandu: ¿ikatúnepa peteĩ persóna iñeʼẽrendu Jehovápe ohayhúgui chupe? ¿Térã ikatúpa umi persóna ohechauka añetehápe ifielha Jehovápe? Koʼã dúda oñepyrũ kuri Job tiémpope (Job 1:8-11). Añetehápe ningo Job ñandéichante avei iñimperfékto ha ojavy vaʼekue, péro Jehová ohayhueterei chupe iñeʼẽrendu haguére. w19.02 páh. 3, 4 párr. 6, 7

Jesús omoĩ vaʼekue peteĩ ehémplo oñeʼẽva peteĩ komersiánte oviahávare oheka hag̃ua umi pérla iporãva. Pe kuimbaʼe otopávo peteĩ pérla iporãitereíva ovendéma voi la orekomíva guive ojogua hag̃ua upéva. Pe pérla orrepresenta pe añetegua oñeʼẽva Ñandejára Rréinore. Upéicha, Jesús ohechauka mbaʼeichaitépa umi persóna oñehaʼãva oikuaa Ñandejáragui omombaʼe pe añetegua (Mat. 13:45, 46). Ñañepyrũrõ guare ñaaprende pe añetegua Ñandejára Rréinogui ha entéro umi enseñánsa oúva la Bíbliagui, ñaime kuri avei dispuésto jahejávo opa mbaʼe umíva rehehápe. Jasegíramo ñamombaʼe la ñaaprende vaʼekue, arakaʼeve ndajahejamoʼãi upéva (Prov. 23:23). Péro ñambyasýramo jepe, sapyʼánte oĩ umi Ñandejára siérvo oúva nomombaʼevéi pe añetegua ha ohejáva voi upéva. ¡Ndajaipotaiete ningo oiko ñanderehe upéva! Upearã jajapo vaʼerã pe konsého oĩva la Bíbliape ñanemomýiva jasegi hag̃ua jaiko “pe añetegua rapére” (3 Juan 2-4). Upéva heʼise ñamotenonde vaʼerãha pe añetegua ha jahechauka upéva pe jaiko lájare. w18.11 páh. 9 párr. 3

Umi israelítape ojeʼe kuri ani hag̃ua oataka Jericó. Upéva rangue, haʼekuéra oguata vaʼerã pe siuda jerére 6 día pukukue unave káda día, ha pe día sieteha katu oguata vaʼerã ijerére siete vése. Umi soldádo ikatu kuri heʼi operdereitaha itiémpo ha ikaneʼõmbareitaha. Péro Israel líder, haʼekuéra ndaikatúiva ohecha, oikuaa porãiterei la ojapóva. Umi instruksión osegíva umi israelita omombareteve ijerovia, ha iñeʼẽrendu rupi hikuái natekotevẽi oñorairõ umi soldádo Jericogua imbaretetévandi (Jos. 6:2-5). ¿Mbaʼépa ikatu ñaaprende ko rrelátogui? Jehová organisasión sapyʼánte ikatu ojapo peteĩ mbaʼe anteve ndojapói vaʼekue, ha ikatu voi nañantendepái mbaʼérepa péicha koʼág̃a. Por ehémplo, ymave ikatu kuri ñapensa noĩporãiha jaipuru selulár ha távlet jajapo hag̃ua ñande estúdio personál, japredika hag̃ua térã rreunionhápe. Péro koʼág̃a jahechakuaa ideprovechoitereiha ñandéve. Jahecha jave umi mbaʼe porã jahupytýva koʼã kámbio rupive, jajerovia mbareteve ha ñaneunidove ñane ermáno ha ermanakuéra ndive. w18.10 páh. 23 párr. 8, 9

Umi judío oipota kuri pe Mesías osolusiona iprovlemakuéra. Upévare, opensa haguéicha avei Jesús disipulokuéra, umi hénte Galileagua oipotáne raʼe Jesúspe irreikuerarã. Oiméne opensa hikuái ndaiporimoʼãiha ótro líder haʼéicha ikatupyrýva. ¿Mbaʼérepa? Pórke haʼe iñeʼẽkuaaiterei, omonguera umi hasývape, ha hiʼarive omongaru umi iñembyahýivape. Umi hénte ningo oñemaravilla Jesús omongarúrõ guare 5.000 kuimbaʼépe. Péro haʼe oikuaa la ojaposéva hikuái. La Biblia heʼi: “Jesús katu oikuaágui outaha hikuái mbaretépe omoĩ chupe rréiramo, oho jey pe sérrope haʼeño” (Juan 6:10-15). Al ótro día umi hénte oñekalmamiéma, ha Jesús oexplika chupekuéra ndoúi hague omeʼẽ hag̃ua umi héntepe hemikotevẽ, síno omboʼe hag̃ua chupekuéra heta mbaʼe porã Ñandejára Rréinogui. Jesús heʼi chupekuéra: “Ani pembaʼapo tembiʼu oñehundi vaʼerãre, pembaʼapo guei pe tembiʼu oñehundiʼỹvare ha omeʼẽva jeikove opaveʼỹva” (Juan 6:25-27). w18.06 páh. 4 párr. 4, 5

Jesús ningo ohayhu umi héntepe, upévare oraha enkuénta mbaʼéichapa oñeñandu hikuái. Haʼe ontende la oñandúva umi oñedesanimáva térã ikangýva ojoguáva “peteĩ takuarílla” opẽ mbotávape térã “peteĩ lámpara” ogue potávape, ha ipasiénsia ha otrata porã chupekuéra (Mar. 10:14). Jaikuaaháicha, ndaikatumoʼãi ñantende ni ñamboʼe umi héntepe Jesús ojapo hagueichaite. Péro ikatu jahechauka ñanembaʼerechakuaaha umi oĩvandi ñande territóriope ñañeʼẽ lájare chupekuéra. Avei jadesidi jave mbaʼe órapa javisitáta umi héntepe, ha mboy tiémpopa ñañemongetáta hendivekuéra. Koʼág̃arupi, hetaiterei persóna “oiko asyeterei ha isarambipa” pórke heta emprésa ikorrúpto ha ndoiporiahuverekói chupekuéra, avei umi líder polítiko ha rrelihióso káusare (Mat. 9:36). Upéicha rupi, heta hénte nokonfiavéi avavére ha nohaʼarõi mbaʼeve iporãva. Upévare ñañeʼẽ lája ha umi palávra jaipurúva ñañemongeta hag̃ua hendivekuéra ohechauka vaʼerã ñañeinteresaha umi persónare ha ñambyasyha chupekuéra. Oĩ ningo heta ohenduséva la jaʼéva ndahaʼéi jaipuru haguérente la Biblia, síno ohechakuaa haguére añetehápe ñañeinteresaha hesekuéra ha jarrespetaha la opensáva hikuái. w18.09 páh. 31, 32 párr. 13, 14

Jahechakuaáramo ñaikotevẽha Ñandejárare ñañehaʼãta jaikuaa chupe ha jahejáta haʼe ñanepytyvõ ha ñandegia. ¿Mbaʼéichapa jahechaukáta jajapoha upéva? Jastudiáramo la Biblia, jasegírõ umi konsého jatopáva pype ha jahechaukáramo la iñimportantevéva ñandéve g̃uarã haʼeha hína jaadora Jehovápe. Jajapóramo koʼã mbaʼe, javyʼáta ha jajerovia mbaretevéta Ñandejára promesakuérare (Tito 2:13). Oiméramo jasegise javyʼa, jasegi vaʼerã ñañemoag̃uive Jehováre tahaʼe haʼéva umi provléma jahasáva. Apóstol Pablo heʼi vaʼekue: “Akóintekena pevyʼa ñande Ruvicha servísiope, haʼe jeýta voi peẽme: ¡Pevyʼákena!” (Filip. 4:4). Jaipotáramo Jehovágui oiko ñane amigoite jaheja vaʼerã haʼe ñanemoarandu (Prov. 3:13, 18). Péro jasegi hag̃ua javyʼa iñimportanteterei akóinte jajapo umi mbaʼe ñaaprendéva la Bíbliagui. Jesús ohechauka vaʼekue mbaʼeichaite pevépa iñimportánte jajapo upéva heʼírõ guare: “Peẽ peikuaáma koʼã mbaʼe, ha pejapóramo katu pevyʼáta” (Juan 13:17; Sant. 1:25). Tekotevẽterei jajapo Jesús heʼíva ñanembarete hag̃ua espirituálmente ha jasegi hag̃ua javyʼa. w18.09 páh. 18 párr. 4-6

Epafras oikuaa porã kuri umi ermánope ha ipyʼaite guive oñeinteresa hesekuéra. Haʼe heʼi Epafras rehe: “[Oĩ] chendive kárselpe”. Péicha ohechauka Epafras oreko hague avei iprovlemakuéra (Filem. 23). Upéicharõ jepe, ko ermáno osegi ojepyʼapy iñermáno ha iñermanakuérare ha oñemboʼe hesekuéra hérarupi. Ñande avei ikatu jasegi iñehémplo, ha jajapóramo upéva katuete ñaipytyvõitereíta ñane ermanokuérape (2 Cor. 1:11; Sant. 5:16). ¿Máva rehepa ikatu ñañemboʼe? Epafras ojapo haguéicha, ikatu ñamensiona hérarupi umi ñane amígo oĩvape kongregasiónpe térã ñane hénte ombohováivape situasión ijetuʼúva. Ikatu hína haʼekuéra tekotevẽ odesidi peteĩ mbaʼe iñimportánteva térã ombohovái peteĩ tentasión. Avei ikatu ñamensiona ñane orasiónpe umi ihénte manóvape, umi oikóvape umi lugár ndaʼaréi oiko haguépe desástre naturál ha gérra, térã umi ohasa asývape imboriahueterei rupi. Hetaiterei ermáno ha ermána oikotevẽ ñañemboʼe hesekuéra. w18.09 páh. 5, 6 párr. 12, 13

Pablo ndeʼiséi vaʼekue ñameʼẽ vaʼerãha pláta ha mbaʼerepy añónte, síno avei ñamokyreʼỹ, ñaipytyvõ ha ñaakonseha vaʼerãha la Biblia rupive umi oikotevẽvape (Hech. 20:31-35). Umi mbaʼe Pablo heʼívare ha ojapóvare ñaaprende iñimportanteha ñandepojera. Jahechaukáta ñandepojeraha ñameʼẽ jave ñane tiémpo ha ñane mbaretekue ótro rehehápe, ha ñañeinteresa ha jahayhúramo ñande rapichápe. Umi investigadór ostudiáva yvyporakuéra lája heʼi peteĩ tapicha ipojeráva ovyʼaveha. Peteĩ informasión heʼi avei: “Heta hénte omombeʼu ovyʼaiteveha hikuái oipytyvõ jave hapichápe”. Umi investigadór heʼi avei ñaipytyvõ jave ótrope isentidoha la ñande rekove. Upévare unos kuánto expérto oakonseha umi héntepe ombaʼapo hag̃ua de voluntário oipytyvõ hag̃ua hapichápe. Haʼekuéra heʼi umi hénte ojapórõ upéva hesãivetaha ha ovyʼavetaha. Péro ndajahecharamói koʼã mbaʼe, pórke ñande Apohare Jehová ñanderayhuetéva heʼi voi javyʼaveha ñameʼẽ jave (2 Tim. 3:16, 17). w18.08 páh. 22 párr. 17, 18

Isaías oprofetisa vaʼekue Jesús ndohusgamoʼãiha umi héntepe ipíntare, ha ndojesegimoʼãiha la ojeʼévarente oporokastiga hag̃ua. Heʼi avei ohusgataha hekoitépe umi imboriahúvape ha ojapotaha hustísia hesehapekuéra. Ko profesía ñanembopyʼaguapy ha omeʼẽ ñandéve esperánsa (Is. 11:3, 4). ¿Mbaʼérepa koʼã mbaʼe ñanembopyʼaguapy? Pórke jaiko peteĩ múndo oĩháme hetaiterei persóna omboykéva hapichápe omañágui pe ipíntarente. Añetehápe ñaikotevẽ Jesúsre pórke haʼe núnka ndojavýi oporohusga jave ha ndojegiái umi hénte píntarente. Káda día oñepresenta jepi peteĩ situasión jahusgahápe ñande rapichápe. Péro ñande yvypóra nañandeperféktoi Jesús iperfékto haguéicha. Upévare umi mbaʼe ñapensáva ikatu hína noĩporãi ha ifásil jajegia hag̃ua la jahechávarente. Péro Jesús omanda vaʼekue ñandéve ani hag̃ua jajesegi la jahechávarente jahusga hag̃ua, síno ke ñandehústo vaʼerã jahusga jave. Haʼe oipota jasegi iñehémplo ani hag̃ua jahusga ótrope ipíntarente. w18.08 páh. 8 párr. 1, 2

Jehová ningo koʼag̃aite peve oñeʼẽ ñandéve, péro jaikuaaháicha ndojapomoʼãi upéva yvága guive. Upéicharõ jepe, haʼe omeʼẽ ñandéve umi instruksión Iñeʼẽ la Biblia rupive. Jehová espíritu avei ogia ‘pe tembiguái jeroviaha ha iñarandúvape’ omeʼẽ hag̃ua isiervokuérape pe aliménto espirituál (Luc. 12:42). Por ehémplo, jarresivi hetaiterei puvlikasión imprésa ha ojehupíva Internétpe, avei jareko umi vidéo ha áudio iporãitéva. Umi Jehová heʼi vaʼekue ha oĩva la Bíbliape ñanepytyvõ jahechakuaa hag̃ua haʼe ipuʼakaha opaite mbaʼére, ha upévare ikatutaha omyatyrõ entéro mbaʼe vai Satanás ha imúndo ojapo vaʼekue. Ñaneñeʼẽrendúkena Jehovápe, pórke péicha ikatúta ñaaguanta tahaʼe haʼéva provléma oñepresentáva ha umi mbaʼe ijetuʼúva ikatúva gueteri jahasa. La Biblia heʼi: “Tekotevẽ ningo peaguanta, ikatu hag̃uáicha perresivi Ñandejára opromete vaʼekue. Péro upe mboyve pejapo vaʼerã Ñandejára rembipota” (Heb. 10:36). w19.03 páh. 13 párr. 17, 18

Moisés ningo omoakã vaʼekue umi israelítape heta tiémpore, péro koʼág̃a Josué la omoakãtava chupekuéra. Upévare, Josué oñeporandúne raʼe oaseptátapa chupe umi hénte kómo líder (Deut. 34:8, 10-12). Peteĩ lívro oñeʼẽva la Bíbliare heʼi ke ymaite guive oñekambia jave pe omoakãva peteĩ puévlope, haʼeha peteĩ moménto ijetuʼuetereíva ha ipeligrósova. Katuete ningo ñantende mbaʼérepa Josué ojepyʼapýne rakaʼe. Péro haʼe ojerovia Jehováre ha ensegídama voi osegi umi instruksión omeʼẽva chupe (Jos. 1:9-11). Pyaʼe voi ojekuaa Josué ndojeroviareíri hague Ñandejárare. La Biblia heʼi Jehová ogia hague Josué ha ipuévlo Israélpe peteĩ ánhel rupive. Posívlemente pe ánhel haʼe kuri “pe Ñeʼẽ”, Ñandejára raʼy ypykue (Éx. 23:20-23; Juan 1:1). Jehová oipytyvõ umi israelítape ojadapta hag̃ua la kámbiore ha oasepta hag̃ua Josuépe kómo líder. w18.10 páh. 22, 23 párr. 1-4

Jehová oikuaa umi oservívape chupe ipyʼaite guive, ha oanota herakuéra ilívrope. ¿Mbaʼépa jajapo vaʼerã jaipotáramo ñande réra opyta Jehová lívrope? Malaquías heʼi jakyhyje vaʼerãha ani hag̃ua ñambopochy Jehovápe, ha jajepyʼamongeta hérare. Jaadoráramo peteĩ kósa térã peteĩ persóna ndahaʼéiva Jehová, ñande réra ojevorráta ilívrogui (Éx. 32:33; Sal. 69:28). Péro ñapromete haguére Jehovápe jajapotaha hembipota ha jajevautisa, ndeʼiséi ovalemaha. Koʼã mbaʼe ningo ñande una vénte jajapo, péro jaikuaaháicha ñande jaadora vaʼerã Jehovápe káda día. Upévare, jaikove aja entéro jahechauka vaʼerã ñaneñeʼẽrenduha chupe umi mbaʼe jajapóvape (1 Ped. 4:1, 2). w18.07 páh. 23, 24 párr. 7-9

Oimérõ heta tiémpoma oiko hague ñandehegui Testígo, ndeʼiséi jajerovia mbaretetamaha. Tekotevẽ jasegi jaikuaave Ñandejárape ha ñaaprendeve chugui. Jalee vaʼerã la Biblia káda día (Sal. 1:1-3). Péicha ñantende porãvéta umi Léi ha prinsípio Jehová omeʼẽva. ¿Mbaʼeichagua Léipa la iñimportantevéva kristianokuérape g̃uarã? Pe Léi oñeʼẽva mborayhúre. Jesús heʼi vaʼekue idisipulokuérape: “Péicha pejoayhúramo, enterove ohechakuaáta peẽ haʼeha che disípulo” (Juan 13:35). Pe mborayhúpe oñehenói “pe Léi ijojahaʼỹva”. Avei pe oporohayhúva “okumpli hína pe Léi” (Sant. 2:8; Rom. 13:10). Ñande jaikuaa porã pe mborayhu iñimportantetereiha, “Ñandejára haʼe rupi mborayhu” (1 Juan 4:8). w18.06 páh. 19 párr. 14, 15

Umi israelita ningo Jehováre la opuʼã vaʼekue, upéicharõ jepe Moisés ipochy ha orrenegaiterei. Haʼe ndojejokói rupi ou oñeʼẽ opensaʼỹre umi konsekuénsiare. Moisés oheja vaʼekue umi ótro fálla odistrae chupe, ha upéva káusare ndojesarekovéi Jehováre. Moisés orreaksiona porã kuri umi israelita oñepyrũrõ guare primera ves ojeplagea ndaipóri haguére y (Éx. 7:6). Péro oime vaʼerã ko vuéltape ikaneʼõ ha ikueráima pórke pe puévlo heta vésema opuʼã Jehováre. Upévare ikatu oime Moisés opensave ijehe, opensa rangue mbaʼéichapa ombotuicháta Jehovápe. Ñapensamína, Moisés haʼe vaʼekue peteĩ proféta ifiélva, upéicharõ jepe ou vaʼekue ojedistrae ha opeka. Añetehápe ndahasyiete oiko hag̃ua avei ñanderehe upéva. Moisés oike potaite vaʼekue pe Tiérra Prometídape, ha ñande jaike potaitéma avei pe múndo pyahúpe (2 Ped. 3:13). Ajépa avave ndajajavyséi ko oportunida porãite. Péro jaiko hag̃ua pe múndo pyahúpe, jasegi vaʼerã jajesareko Jehováre ha akóinte ñaneñeʼẽrendu chupe (1 Juan 2:17). w18.07 páh. 15 párr. 14-16

Satanás ndaikatúi oovliga avavépe ojapo hag̃ua peteĩ mbaʼe ndojaposéiva (Sant. 1:14). Heta persóna ndohechakuaái oĩha Satanás ládope. Péro umi hénte oaprende rire pe añetegua, ikatúma odesidi oñemoĩtapa Jehová favórpe térãpa Satanás favórpe (Hech. 3:17; 17:30). Ñande jajedesidíramo ñaneñeʼẽrendu Ñandejárape, Satanás ndaikatumoʼãi ñandejoko ñandefiél hag̃ua Jehovápe (Job 2:3; 27:5). Oĩ avei ótra kósa Satanás ha umi demónio ndaikatúiva ojapo. Por ehémplo, la Biblia ndeʼíri haʼekuéra ikatuha oikuaa umi mbaʼe ñapensáva. Jehová ha Jesús añoite ikatu ojapo upéva (1 Sam. 16:7; Mar. 2:8). Ñañehaʼãmbaitérõ jaʼe ha jajapo umi mbaʼe Ñandejára oguerohorýva, Jehová ni mbaʼevéicharõ nopermitimoʼãi Satanás ñandeperhudika are (Sal. 34:7). Jahechaháicha, tekotevẽ jaikuaa ñane enemígope, péro ndajakyhyjéi vaʼerã chugui. Jehová ñanepytyvõramo ikatúta ñandepuʼaka Satanásre, ñaneimperféktoramo jepe. Ñañemoĩ mbaretéramo hese, haʼe odiparáta ñandehegui (Sant. 4:7; 1 Ped. 5:9). w18.05 páh. 26 párr. 15-17

Epensamína rehoseha peteĩ akontesimiénto iñimportántevape oikótava mombyry nde rógagui. Upévare rehómante vaʼerã peteĩ kolektívope. Reg̃uahẽ rire pe terminálpe, rehecha oĩha diferénte kolektívo, péro nde rejupi vaʼerã pe kolektívo ndeguerahátava pe rehosehápe. Upéicha rupi reñatendéta pono rejupi ótro kolektívo ndeguerahátavape ótro ládo. Peẽ mitãrusukuéra peime hína peichagua situasiónpe: pereko pene renonderãme peteĩ viáhe puku péro ndahaʼéi kolektívope síno pende rekovépe. Amáske ohasa la tiémpo tekotevẽta pedesidi ha peiporavo heta mbaʼe, péro umíva ikatu penderesarea. Upéicharõ jepe, peikuaa porãramo moõpa pehose, ifasilvéta peẽme pedesidi porã hag̃ua. ¿Reñehaʼãmbaitétapa rembovyʼa hag̃ua Jehovápe? Upearã ereko vaʼerã enkuénta Jehová konsého opa mbaʼe redesidívape. Umíva apytépe mbaʼépa restudiáta, mbaʼépepa rembaʼapóta, remendátapa ha nefamíliatapa. Iporãta reñehaʼãramo rehupyty hetave mbaʼe Jehová servísiope, pórke umíva nemoag̃uivéta hese. Remotenondéramo Jehovápe, haʼe katuete nevendesíta ha nepytyvõta osẽ porã hag̃ua ndéve opa mbaʼe. w18.04 páh. 25 párr. 1-3

Jefté nopyrũi iñeʼẽre ha omondo itajýrape oservi hag̃ua pe tavernákulope oikove aja entéro (Juec. 11:30-35). Upéva ningo ijetuʼúne kuri Jeftépe g̃uarã, péro katuete ijetuʼuve jey itajýrape g̃uarã. Upéicharõ jepe, pe mitãkuña naiprovlémai kuri okumpli hag̃ua la itúa oñekompromete vaʼekue ojapotaha (Juec. 11:36, 37). Upéva heʼise haʼe nomendamoʼãiha ni ndorekomoʼãiha mitã. Avei ndorekomoʼãi desendiénte ni erénsia. Jahechaháicha, Jefté rajy oikotevẽterei kuri oñemokyreʼỹ ha oñekonsola chupe. La Biblia heʼi: “Israélpe ojepokuaa ojapo hikuái ko mbaʼe: Cuatro día al áño umi kuñataĩ israelita oho omokyreʼỹ pe galaadita Jefté rajýpe” (Juec. 11:39, 40). Jefté rajy ñanemomanduʼa umi ermáno ha ermána odesidívare nomendái ombaʼaposevégui Jehovápe g̃uarã. ¿Ndépa ikatu avei remokyreʼỹ ha remombarete chupekuéra? (1 Cor. 7:32-35). w18.04 páh. 17 párr. 10, 11

Hetaiterei ánhel opuʼã avei Ñandejárare ha oñeuni Satanás ndive. Pe dilúvio mboyve, Satanás okonvense por lo méno unos kuánto ánhelpe oreko hag̃ua rrelasión sexuál kuñanguérandi. La Biblia oñeʼẽ upévare heʼi jave pe dragón hoʼa hague yvágagui ha ogueru hague hapykuéri pe tercera párte umi estrélla (Gén. 6:1-4; Apoc. 12:3, 4). Umi ánhel ohejárõ guare Ñandejára famíliape, oñemoĩ Satanás poguýpe. Péro ani ñaimoʼã koʼã ánhel irrevéldeva oĩha sarambikuépe. Satanás oñehaʼã oreko peteĩ goviérno orekoháicha avei Jehová, péro haʼe oñemoĩ ijupe voi rréiramo ha oorganisa umi demóniope. Omeʼẽ chupekuéra autorida ha omoĩ chupekuéra ogoverna hag̃ua ko múndo (Efes. 6:12). Satanás oipuru iñorganisasión odomina hag̃ua entéro umi goviérno umánope. w18.05 páh. 23 párr. 5, 6

Peteĩ túa oporohayhúva ojapoháicha, sapyʼánte Jehová ñandekorrehi ñaikotevẽ jave, péicha ohechauka ñanderayhuha. David omombaʼe vaʼekue Ñandejára okorrehi haguére chupe. Haʼe ojepyʼamongeta Ñandejára opensa lájare, upéicha rupi ou avei opensa haʼéicha. Haʼe oheja Ñandejára opensa lája omoldea chupe ikatu hag̃uáicha omehorave ha okambia tekotevẽhápe. Nde avei rejapóramo upéva, rehayhuvéta Ñandejárape ha reñehaʼãvéta haʼe ndeguerohory hag̃ua. Péicha oikóta ndehegui kristiáno iñakãguapy ha ijerovia mbaretéva. Peteĩ ermána hérava Christin heʼi ostudia ha ojepyʼamongeta jave la oleévare, oñeñanduha ku Jehová oskriviramoguáicha umi mbaʼe chupe g̃uarãite. Rehecháramo umi mbaʼe Ñandejára ohechaháicha, reñemeʼẽta enkuénta ko múndo ndohopukumoʼãveimaha. ¿Mbaʼérepa Jehová nemoarandu ha nepytyvõ reikuaa hag̃ua upéva? Pórke oipota reikuaa mbaʼépa la iñimportantevéva, oipota avei redesidi porã ha ndoipotái rekyhyje umi mbaʼe ikatúvagui oiko amo gotyove. Proféta Isaías heʼi vaʼekue Jehová oprotehetaha umi oñemoag̃uívape hese ha ombopyʼaguapytaha chupekuéra (Is. 26:3). w18.12 páh. 26 párr. 9, 10