Febrero

La Bíbliape ojepuru jave pe palávra “hustísia” heʼise jepi ojejapoha umi mbaʼe Ñandejára heʼíva oĩ porãha, ha ndajafavoreseiha avavépe jajapo jave upéva. Epensamína mbaʼéichapa umi mbaʼe Jesús ojapóva ohechauka vaʼekue haʼe ihustoha. Jesús tiémpope, umi omoakãva rrelihión judía ndochaʼéi vaʼekue umi ndahaʼéivare judío, oapoʼi umi ótro judío noñehekomboʼéi vaʼekuépe umi eskuéla judíape, ha ndorrespetaiete voi umi kuñáme. Péro Jesús idiferénte vaʼekue, haʼe ihústo ha nomboykéi avavépe. Haʼe oheja umi ndahaʼéivape judío oiko chugui isegidór (Mat. 8:5-10, 13). Haʼe opredika jave nomboykéi ni peteĩ persónape, tahaʼe imboriahúva térã iplátavape (Mat. 11:5; Luc. 19:2, 9). Jesús núnka ndotratavaíri umi kuñanguérape ni naiñeʼẽpohýiri chupekuéra. Upéva rangue imbaʼeporã ha orrespeta chupekuéra, umi ojeapoʼívape jepe (Luc. 7:37-39, 44-50). Ñande jasegi Jesús ehémplo nañamboykéi jave avavépe ha japredika entéro ohendusévape, tahaʼe haʼéva irrelihión, iplátava térã imboriahúvape. Umi ermáno osegi avei Jesús ehémplo otrata porã ha orrespetávo kuñanguérape. w19.05 2 párr. 1; 5 párr. 15-17

Ko tiémpope avei, umi ansiáno imbaʼeporã ha mborayhúpe oipuru la Biblia omeʼẽ hag̃ua konsuélo umi oikotevẽvape. Péro, ¿ansianokuérantepa ikatu omeʼẽ konsuélo umi ojeavusa térã ojeviola vaʼekuépe? Nahániri. Enterove jareko pe rresponsavilida ‘jasegi hag̃ua ñañokonsola’ (1 Tes. 4:18). Umi ermána ijerovia mbaretéva ikatu tuicha oipytyvõ umi ermána oikotevẽvape konsuélo. Ndareíri ningo Jehová oñembojoja peteĩ sy okonsolávare imembýpe ohechauka hag̃ua mbaʼeichagua konsuélopa haʼe omeʼẽ umi ohasa asývape (Is. 66:13). La Biblia oñeʼẽ avei umi kuña okonsola vaʼekuére umi osufrívape (Job 42:11). ¡Mbaʼeichaitépa oiméne Jehová ovyʼa ohechávo umi ermána ñane kongregasionpegua okonsolaha hína umi ermána osufrívape! Sapyʼánte, umi ansiáno ikatu oporandu apartete peteĩ ermána ijerovia mbaretévape ndaikatúipa oipytyvõmi peteĩ ermána ohasávape hína peichagua sufrimiénto. Ñaipytyvõta jave peteĩ ermáno térã ermánape, ñañatende vaʼerã ani ñaporandu chupe umi mbaʼe haʼe nomombeʼuséiva (1 Tes. 4:11). w19.05 16, 17 párr. 10-12

¿Mbaʼérepa kongregasiónpe umi ansiáno oikotevẽ mokõi testígo jepe ojapo hag̃ua peteĩ komite hudisiál? Pórke upéva hína peteĩ mandamiénto omeʼẽva la Biblia oñeʼẽva pe hustísiare. Pe pekadór nomombeʼúiramo pe mbaʼe vai ojapo vaʼekue, oñekotevẽ mokõi testígo jepe ikatu hag̃uáicha umi ansiáno ojapo peteĩ komite hudisiál (Deut. 19:15; 1 Tim. 5:19). Pe persóna ojeakusáva onegáramo, upéicharõ umi ansiáno ohendúta umi testígo heʼíva. Pe oporoakusáva ha peteĩ persóna mas heʼíramo upe ojeakusáva añetehápe oavusa hague pe mitãre, upéicharõ umi ansiáno orekóma pruéva ojapo hag̃ua peteĩ komite hudisiál. Péro ndaipóriramo pe segundo testígo, ¿heʼisépa upéva ijapuha pe ojapóva pe akusasión? Nahániri. Ndaikatúiramo jepe oñekomprova upe mbaʼe vai oiko vaʼekue mokõi testígo rupive, umi ansiáno oikuaa upe ojeakusáva oiméne hague ojapo peteĩ pekádo ivaietereíva. Upévare umi ansiáno osegíta okonsola ha oipytyvõ umi ojeperhudika vaʼekuépe, ha osegíta oñatende porã oprotehe hag̃ua pe kongregasión, ani hag̃ua ojeperhudika mbaʼe upeichahágui algúnope (Hech. 20:28). w19.05 11 párr. 15, 16

Iñimportánte tuakuéra omboʼe ifamíliape mbaʼéichapa ostudia vaʼerã. Por ehémplo, haʼekuéra oaprende vaʼerã mbaʼéichapa ikatu ojeprepara umi rreunionrã, térã oheka hag̃ua informasión oñeʼẽva peteĩ provléma oñepresenta vaʼekuére eskuéla térã koléhiope (Heb. 5:14). Haʼekuéra ojepokuaáramo hógapema voi ostudia peteĩ téma bíblico, ifasilvéta chupekuéra oñatende ha ontende hag̃ua umi mbaʼe oñemboʼéva rreunión ha asambleahápe. Péro jaikuaaháicha, pe tiémpo oipurútava tuakuéra ostudia hag̃ua ifamíliandi odependétama umi mitãnguéra edáre térã ilájare. Ñane estudiantekuéra oaprende vaʼerã avei mbaʼéichapa ostudia vaʼerã. Ñepyrũrã ningo ñande javyʼaiterei haʼekuéra omarka haguére umi rrespuésta pe puvlikasión jastudiávape hendivekuéra, térã umi jaipurúva rreunionrã. Péro tekotevẽ avei ñamboʼe chupekuéra mbaʼéichapa ikatu oheka informasión ñane puvlikasionkuérape, ha ostudia porã hag̃ua haʼeñoháme. Péicha ombohovái vove hikuái peteĩ provléma, haʼekuéra ijeheguiete ohekakuaáta informasión ikatútava oipytyvõ chupekuéra. w19.05 26 párr. 2; 28 párr. 10, 11

Satanás ojerresolvéma okambiataha ñandehegui ñapensa lája. Haʼe oipuru opaichagua enseñánsa ha pensamiénto ombyai hag̃ua umi mbaʼe porã ojapóva Ñandejára Ñeʼẽ ñane pensamiéntore. Satanás osegínte oipuru la mísma pregúnta oipuru vaʼekue Évare pe hardín de Edénpe, heʼírõ guare: “¿Añetéiko Ñandejára heʼi peẽme...?” (Gén. 3:1). Ko múndo oĩvape Satanás poguýpe, oñeporandu jepi ñandéve koʼãichagua pregúnta ñanemboduda hag̃ua: “¿Añetéiko Ñandejára heʼi peẽme ndovaleiha omenda kuimbaʼe kuimbaʼéndi térã kuña kuñándi? ¿Añetéiko Ñandejára heʼi peẽme ndovaleiha pefesteha Navidad ha kumpleáño? ¿Añetéiko Ñandejára heʼi peẽme ndovaleiha pemoĩka tuguy? ¿Añetéiko Ñandejára heʼi peẽme ndovaleiha pejeheʼa umi pene hénte térã pene amígo oñemosẽ vaʼekuére kongregasióngui?”. Tekotevẽterei ningo ñaime segúro umi mbaʼe jagueroviávare. Nañakontestáiramo umi pregúnta iñimportánteva ikatu hína ñañepyrũ jaduda umi mbaʼe jagueroviávagui. Umi mbaʼe ñanembodudáva ikatu mbeguekatúpe ombyai ñapensa lája ha ohundi ñandehegui ñande jerovia. w19.06 12, 13 párr. 15-17

Jehová ningo ñanderayhueterei (Juan 3:16). Ha ñande jasegise ñande Túa ñanderayhuetéva ehémplo, upévare ñañehaʼã ‘jajoayhu oñoermánoicha, jahasa asy oñondive, ha jajoporiahuvereko’, ha koʼýte jahechauka vaʼerã umíva ‘ñane ermanokuérape’ (Gál. 6:10). Ñande ningo ñaipytyvõse ñane ermanokuérape ohasa asy jave hikuái. ¿Mbaʼéichapa ikatu ñakonsola umi omano vaʼekuépe chugui hembiayhu? Primeroite ningo iporãta ñañemongetáramo hendive, ñatĩ térã ndajaikuaáiramo jepe mbaʼépa jaʼéta chupe. Paula, iména omano vaʼekue derrepentete, heʼi: “Che antende la hénte ndoikuaaiha jepi mbaʼépa heʼíta térã ojapóta oĩ jave omanóva. Okyhyje hikuái heʼírõ g̃uarã álgo noĩporãiva térã ikatúva oporombopochy. Péro añetehápe ivaive hína la hénte ndeʼíriramo mbaʼevete asy”. Pe persóna oñembyasýva oiméne nohaʼarõi voi jaʼe chupe álgo iprofundoitereíva. Paula heʼive: “Amombaʼeterei vaʼekue che amigokuéra oñembojáramo che rendápe ha heʼínte chéve ombyasyetereiha la oikóva”. w19.06 20 párr. 1; 23 párr. 14

Ojeproivíramo pe predikasión, ansianokuéra oorganisáta umi rreunión ikatu hag̃uáicha ojejapo ani hag̃ua umi ñandepersegíva ñandepilla. Haʼekuéra ikatu heʼi ñandéve ñañembyaty hag̃ua grúpo michĩvape, ha ikatu voi pyʼỹi okambia hikuái moõ ha mbaʼe órapa ojejapo umi rreunión. ¿Ha mbaʼépa ikatu jaʼe pe predikasiónre? Upéva ikatu okambia hína asegún pe lugár jaikoha. Péro ñande jahayhu Jehovápe ha ñamombeʼuseterei ñande rapichakuérape umi notísia porã oñeʼẽva Irréinore. Upévare jahecháta katuete mbaʼéichapa ikatu japredika (Luc. 8:1). Pe istoriadóra Emily Baran oñeʼẽvo umi testígo de Jehová oĩ vaʼekuére pe Unión Soviéticape, heʼi: “Pe goviérno heʼírõ guare umi testígo de Jehovápe anive hag̃ua opredika, haʼekuéra oñepyrũ oñemongeta ivesinokuérandi, ikompañéro de traváhondi ha iñamigokuérandi. Ha ojeguerahárõ guare chupekuéra préso upe haguére, oñepyrũ opredika hikuái umi ótro oĩvape avei préso”. Ojeproivíramo jepe chuguikuéra opredika, umi ermanokuéra osegi ojapo upéva. ¡Hiʼãite ñande jasegi iñehemplokuéra! w19.07 11 párr. 12, 13

¿Mbaʼéichapa ikatu ñaipytyvõ umi ndorekóivape rrelihión ohayhu hag̃ua Ñandejárape, ha oiko hag̃ua chuguikuéra Jesús disípulo? Jahechakuaa vaʼerã pe lugár okakuaa hague peteĩ persóna oafektaha mbaʼéichapa haʼe orresponde japredika jave chupe. Por ehémplo, umi europeo orresponde lája japredika jave chupekuéra idiferénte umi asiáticogui. ¿Mbaʼérepa? Európape heta hénte oikuaa michĩmi jepe la Bíbliagui, ha ohendúma ojeʼeha Ñandejára ojapo hague entéro mbaʼe. Péro Ásiape la majoría umi hénte ndoikuaái mbaʼeve la Bíbliagui térã saʼieterei oikuaa, ha oĩ voi umi ndogueroviáiva oexistiha peteĩ Apohare. Ñandepositívokena. Káda áño oiko testígo de Jehová hetaiterei umi hénte ndorekói vaʼekuégui rrelihión. Umíva apytépe oĩ umi hekoporãma vaʼekue voi ha ndogustáiva chupe umi rrelihión oĩ rupi ijapytepekuéra heta hovamokõiva. Ótro katu ndahekoporãi vaʼekue ha oheja vaʼerã heta mbaʼe vai anteve ojapo vaʼekue. Upévare ikatu ñaime segúro, Jehová ñanepytyvõ rupi ikatutaha jatopa umi ‘oñehaʼãvare ohupyty jeikove opaveʼỹva’ (Hech. 13:48; 1 Tim. 2:3, 4). w19.07 20, 21 párr. 3, 4

Oimérõ ñande ñahaʼarõ hína jaiko yvágape térã ko yvy ape ári, jasegi vaʼerã ñañehaʼã jahupyty hag̃ua pe prémio. Tahaʼe haʼéva ñane situasión, ndovaléi jajesareko umi mbaʼe opyta vaʼekuére tapykuépe, ha ani jaheja mbaʼeve ñandejoko jasegi hag̃ua jaservi Jehovápe (Filip. 3:16). Ikatu ningo ñaimoʼã otardaitereimaha oñekumpli hag̃ua umi mbaʼe ñahaʼarõva, térã ñanekangy ha ñanderasykatúma ñandeeda rupi. Ikatu avei heta áñorema jahasa umi mbaʼe ijetuʼúva ha jajepersegi. Tahaʼe haʼéva ñane situasión, ‘ani jajepyʼapyeterei mbaʼevére’. Upéva rangue, ñamombeʼúkena Ñandejárape umi mbaʼe jaipotáva ha jajerure asy chupe tañanepytyvõ, ha haʼe omeʼẽta ñandéve pe pyʼaguapy tuichavéva opa mbaʼe ikatúvagui ñañeimahina (Filip. 4:6, 7). Peteĩ ohaʼãva karréra ningo oñehaʼãve amáske omohuʼã mbota pe karréra. Ha ñande avei ñamohuʼã mbotáma hína pe karréra, upévare jasegíkena ñañekonsentra umi mbaʼe porã oñeprometévare ñandéve. Ñande ningo jasegise jajapo upéva koʼág̃a, omeʼẽháicha entéro ñande fuérsa ha opermitiha peve ñandéve ñane situasión. w19.08 7 párr. 16, 17

Katuete ningo ijetuʼúne ñandéve jaikuaa hag̃ua mbaʼépa jaʼéta peteĩ persónape omano jave chugui peteĩ ohayhúva. Sapyʼánte iporãvéta ñanerasẽramo hendive jaʼe rangue chupe heta mbaʼe. Lázaro omanórõ guare, María, Marta ha umi iñamigokuéra hasẽmba kuri pórke operde hikuái peteĩ persóna ohayhúva. Ohasa rire 4 día Jesús og̃uahẽ upe lugárpe ha “hasẽ” avei, oikuaáramo jepe omoingove jeytaha Lázarope (Juan 11:17, 33-35). Jesús hasẽvo ohechauka mbaʼéichapa oñeñandu Itúa. Avei, péicha ohechauka ohayhuha upe famíliape. Katuete ningo upéva tuichaiterei okonsola kuri María ha Mártape. Péicha avei, ñane ermanokuéra ohechakuaa jave jahayhu ha jajepyʼapyha hesekuéra, oñemeʼẽ enkuénta noĩriha haʼeño. Upéva rangue ohechakuaa hikuái orekoha heta amígo ojepyʼapýva hesekuéra ha oapojáva chupekuéra. Sapyʼánte tekotevẽta ehendúnte chupekuéra. Eheja tomombeʼu ndéve umi mbaʼe oñandúva, ha ani ndepochy heʼíramo peteĩ mbaʼe opensa porãʼỹre (Job 6:2, 3). Ikatu oime ihénte ojopy hína chupe ojapo hag̃ua peteĩ mbaʼe oñemoĩva la Biblia heʼívare, upévare iporãta reñemboʼéramo hendive. Ejerure Jehovápe omombarete hag̃ua chupe ha avei toipytyvõ chupe opensa porã hag̃ua (Sal. 65:2). w19.04 18, 19 párr. 18, 19

Oiméramo jaservi raʼe de tiémpo kompléto, tahaʼe Betélpe térã ótro lugárpe, ñande jareko kuri upépe ñane amigokuéra ha jahayhu kuri pe lugár jaservi hague. Ha ñambyasyeterei voi jahejátarõ ñane asignasión. Ikatu hína jahechagaʼu umi ermáno ha ermána jahejávape ha jajepyʼapy hesekuéra, koʼýte oimérõ jaheja raʼe upe lugár oĩ rupi persekusión (Mat. 10:23; 2 Cor. 11:28, 29). Avei ikatu ijetuʼueterei jaha ótro lugárpe, pórke jajepokuaa vaʼerã peteĩ kultúra pyahúre. Ha péichante avei ikatu ñañeñandu jaha jeýramo ñande vállepe. Umi okambia vaʼekue chugui iñasignasión, ikatu hína derrepentete oreko umi gásto ymave ndorekói vaʼekue. Ha upéva ikatu omokangy, omoñeñandu vai ha odesanima chupekuéra. ¿Mbaʼépa ikatu oipytyvõ koʼã ermánope? Omombarete vaʼerã hikuái iñamista Jehovándi (Sant. 4:8). ¿Mbaʼéichapa ikatu ojejapo upéva? Jajerovia vaʼerã ‘Ñandejára ohendúvare umi hénte ñemboʼe’ (Sal. 65:2). Jehová ningo ipodér rupive “ikatu ojapo hetaitereive mbaʼe ñande ikatúvagui jajerure térã ñañeimahina” (Efes. 3:20). Jehová ningo ndahaʼéi omeʼẽva umi mbaʼe jajerurévante chupe ñane ñemboʼépe, síno ikatu ojapo umi mbaʼe nañahaʼarõiva jepe. Haʼe ikatu osolusiona umi provléma jarekóva ñande ñaimoʼãʼỹháicha. w19.08 20, 21 párr. 5, 6

Heta hénte opensa jepi Armagedón haʼeha peteĩ gérra nukleár térã peteĩ desástre naturál ohundipátava ko yvy. Péro la Biblia nomboʼéi upéva, síno heʼi Armagedón oguerutaha heta mbaʼe iporãva, ha umi mbaʼe heʼíva hese ñanembovyʼa vaʼerã (Apoc. 1:3). Armagedón nohundimoʼãi yvyporakuérape, síno osalváta chupekuéra. ¿Mbaʼérepa jaʼe upéva? Armagedónpe oñehundíta umi goviérno umánope ha umi iñañávape, péro osalváta umi ihústovape. Avei ko gérra osalváta yvyporakuérape pórke ohundíta “umi ohundívape ko yvy” (Apoc. 11:18). Pe palávra Armagedón una vénte oaparese la Bíbliape, ha ou peteĩ palávra hebrea heʼisévagui “Montáña de Meguidó” (Apoc. 16:16, nóta). Meguidó haʼe vaʼekue peteĩ siuda oĩ vaʼekue Israel yma guarépe (Jos. 17:11). Péro Armagedón ndahaʼéi hína peteĩ lugár oĩva ko yvy ape ári, síno haʼe hína umi situasión oñepresentátava oñembyaty hag̃ua ‘entéro umi rréi ko yvy ariguápe’ oñemoĩtava Ñandejára kóntrape, ha avei haʼe pe gérra oikótava oñembyaty riremínte koʼã rréipe (Apoc. 16:14). w19.09 8 párr. 1-3

Pe kuña ningo oikotevẽterei oñepytyvõmi chupe. Haʼe ja ohóma heta doktórpe, péro ohasáma 12 áño ha pe imbaʼasy osegínte ombosufri chupe. Hiʼarive pe léipe heʼi haʼe ikyʼaha oreko rupi upe mbaʼasy (Lev. 15:25). Upéi haʼe oikuaa Jesús omongueraha oikóvo umi hasývape, upémarõ osẽ oho oheka chupe. Otopa rire hese, opoko pe ijao ruguáire ha upepete okuera. Péro Jesús ndahaʼéi ku omongueránteva chupe, síno otrata porã chupe ha ohenói voi chupe “che rajy”, péicha ko kuña oñandu Jesús ohayhu ha orrespetaha chupe. Ajépa oiméne ipiroʼy ha oñeñandu porãite raʼe pe kuña (Luc. 8:44-48). Iporã jahechakuaa pe kuña voi oñehaʼãmbaite hague oho hag̃ua Jesús rendápe, ndahaʼéi ku ohaʼarõnteva chupe. Ñande avei koʼág̃a ñañehaʼãmbaite vaʼerã ñañemoag̃ui hag̃ua Jesús rehe. Koʼág̃arupi haʼe ndojapói hína milágro omonguera hag̃ua umi héntepe. Péro osegi heʼi ñandéve: “Peju che rendápe [...] ha che pombopiroʼýta” (Mat. 11:28). w19.09 20 párr. 2, 3

Proféta Zacarías heʼi avei kuri peteĩ profesía ojoguáva upévape. Haʼe oskrivi: “Umíva umi díape 10 kuimbaʼe oñeʼẽva opaichagua idióma oĩva umi nasiónpe, oñakarama hatãta peteĩ judío aóre, ha heʼíta: ‘Ore rohose penendive, pórke rohendu Ñandejára oĩha penendive’” (Zac. 8:23). Oñembyaty hag̃ua umi hénte oparupiguápe oñeʼẽva diferénte idióma, ojepredika vaʼerã chupekuéra iñeʼẽtépe. Upévare, koʼág̃a jatradusíma hetaiterei idiómape arakaʼeve ojejapoʼỹ haguéicha ko múndope. Ojekuaa porã Jehová ojapoha peteĩ milágro koʼã tiémpope, pórke ombyaty hína peteĩ aty guasu opa tetãgui. Pe aliménto espirituál ningo amás día oĩ hetave idiómape, upévare ko grúpope oĩramo jepe diferénte kláse de persóna, lomímonte enterovéva oservi Jehovápe peteĩ ñeʼẽme. Chupekuéra ojekuaa voi opredika kyreʼỹ haguére, ha ojoayhu rupi oñoermáno teéicha. ¡Ajépa upéva omombareteve ñande jerovia! (Mat. 24:14; Juan 13:35). w19.09 30 párr. 16, 17

Pe jehasa asy guasúpe umi hénte oñemondýita ohechávo ofallaha opa mbaʼe haʼekuéra ojerovia hague. Upe tiémpope ivaietereíta la situasión, arakaʼeve oikoʼỹ haguéicha, ha umi hénte “oñelamentáta” ha okyhyjetereíta voi omanórõ g̃uarã (Sof. 1:14, 15). Upe moméntope Jehová siervokuérape jepe ikatu hína ijetuʼu. Ñande ningo ndajajeheʼái ko múndore, upévare koʼýte umi hénte ikatu ñanembohasa asy. Ha ikatu voi ndajarekopái umi mbaʼe ñaikotevẽva jaiko hag̃ua. “Pe esklávo de konfiánsa ha iñarandúva” ñandepreparáma oikóvo ñandefiél hag̃ua pe jehasa asy guasúpe (Mat. 24:45). Ojapo upéva de diferénte fórma, péro ñapensamína peteĩva umíva apytégui: Umi aty guasu tres diagua ojejapo vaʼekue áño 2016, 2017 ha 2018-pe. Umíva ohechauka kuri ñandéve umi kualida tekotevẽva ñamombarete amáske hiʼag̃ui Jehová ára. w19.10 14 párr. 2; 16 párr. 10; 17 párr. 12

Ñamokõ jave pe tembiʼu, ndaikatúi jadesidi mbaʼéichapa ñande rete oipurúta upéva. Jaʼúramo umi tembiʼu iporãva, ñaneresãita, péro pe tembiʼu ivaírõ, upéva ñandeperhudikáta. Ikatu ningo ndajahechái ensegidamínte pe rresultádo, péro ohasávo la tiémpo si ojekuaátama. Upéicha avei jaiporavo jave umi entretenimiénto ikatu jadesidi mbaʼépa ñamoingéta ñane akãme. Péro ndaikatúi jadesidi mbaʼéichapa upéva oafektáta umi mbaʼe ñapensáva ha ñañandúva. Pe entretenimiénto iporãva ikatu ñanembopiroʼy, péro pe ivaíva ñandeperhudikáta (Sant. 1:14, 15). Pe entretenimiénto ivaíva ñandeafekta lája ikatu hína ndojekuaái ensegidami, péro upéi katuete ojekuaáta. Upévare la Biblia omeʼẽ ñandéve ko konsého: “Entéro mbaʼe oñotỹva peteĩ persóna, upéva avei omonoʼõta. Pórke pe oñotỹva omeʼẽ hag̃ua gústo hete imperféktope, omonoʼõta ñehundi” (Gál. 6:7, 8). Ajépa iñimportantete ñamboyke umi entretenimiénto ñanemomýitava jajapo hag̃ua umi mbaʼe Jehovápe ombojeguarúva (Sal. 97:10). w19.10 30 párr. 12-14

Jehová ohechauka vaʼekue ñanderayhuetereiha omeʼẽvo Itaʼýrape omano hag̃ua ñanderehehápe (Juan 3:16). ¿Mbaʼéichapa ikatu jahechauka japorohayhuha Jehová ojapoháicha? Ñande jajapo upéva ñamombaʼe ha javalorávo ñane ermáno ha ermanakuérape. Avei vyʼápe jarresivi jave peteĩ ‘ovecha okañy vaʼekuépe’ ha ou jeýva Jehová rendápe (Sal. 119:176; Luc. 15:7, 10). Jahechauka avei jahayhuha ñane ermanokuérape ñañemotiémpo ha ñañehaʼãmbaite jave ñaipytyvõ hag̃ua chupekuéra, ha koʼýte oikotevẽ jave hikuái (1 Juan 3:17). Jesús omanda vaʼekue idisipulokuérape ojoayhu hag̃ua haʼe oporohayhu haguéicha (Juan 13:34, 35). ¿Mbaʼérepa ipyahu rakaʼe ko mandamiénto? Pe Léi Mosáika ningo heʼíma vaʼekue jahayhu vaʼerãha ñande rapichápe, péro Jesús mandamiénto ojerure kuri álgo mas: Jahayhu hag̃ua ñane ermanokuérape Jesús ñanderayhu haguéicha. Ñande ningo ndahaʼéi jahayhúnteva ñane ermanokuérape ñande jajehayhuháicha, síno jahayhuve voi chupekuéra, ha upéicha rupi tekotevẽramo ñameʼẽta ñande rekove jepe hesehapekuéra, Jesús ojapo haguéicha. w19.05 4 párr. 11-13

Jaipotáramo pe espíritu sánto ñanepytyvõ, ñañemboʼe jey jey vaʼerã (Luc. 11:8, 13). Jesús ehémplo oĩva Lucas 11:5-9-pe ñanepytyvõ avei ñantende hag̃ua mbaʼérepa Jehová omeʼẽta ñandéve espíritu sánto. Pe kuimbaʼe oñeñeʼẽha pe ehémplope oñatende porãse iñinvitadokuéra oúvare pyharekue. Haʼe ningo omeʼẽse chupekuéra álgo hoʼu vaʼerã, péro ndorekói mbaʼeve oofrese hag̃ua. Jesús heʼi pe ivesíno omeʼẽ hague chupe pan oinsisti jey jey haguére chupe. ¿Mbaʼépa ñanemboʼese Jesús? Peteĩ kuimbaʼe imperfékto jepe oipytyvõramo ivesínope oinsisti jey jey haguére chupe, ¡koʼytevéntema ñande Ru ñanderayhuetéva omeʼẽta ijespíritu sánto umi ojerure jey jeývape chupe! Upévare, ikatu ñaime segúro ñañemboʼéramo Jehovápe ha jajerure chupe ijespíritu, haʼe katuete omeʼẽtaha ñandéve (Sal. 10:17; 66:19). Satanás ningo kontinuadoite ñandeataka, upéicharõ jepe ikatu ñaime segúro ñande ikatutaha ñaaguanta ha ñagana. w19.11 13 párr. 17-19

Jesús oikuaa vaʼekue haʼe ha ijapostolkuéra opytuʼu vaʼerãha avei sapyʼánte. Péro oiko haguéicha upe tiémpope, koʼág̃arupi avei oĩ umi ojoguáva pe karai ipláta hetávape oñeñeʼẽha Jesús ehémplope. Upe kuimbaʼe heʼi ijupe: “Koʼág̃a ikatúma aiko trankílo, akaru, haʼu vevída ha avyʼa” (Luc. 12:19; 2 Tim. 3:4). Pe kuimbaʼépe g̃uarã iñimportanteve vaʼekue opytuʼu ha ojediverti. Jesús ha ijapostolkuéra katu idiferénte vaʼekue, pórke haʼekuéra ndoikói vaʼekue vyʼarã rapykuérinte. Koʼág̃arupi ñande ñañehaʼã avei jasegi Jesús ehémplo. Ñande ndahaʼéi japytuʼúnteva nañambaʼapói jave, síno jaipuru ñane tiémpo jajapo hag̃ua iporãva, por ehémplo japredika ha jaha rreunionhápe. Añetehápe ñandéve g̃uarã koʼã mokõi mbaʼe sagrádo ha iñimportanteterei hína, upévare ñañehaʼãmbaite jajapo meme umíva (Heb. 10:24, 25). Jaháramo jepe de vakasión térã ñaiméramo jepe de viáhe, ñande lomímonte jasegi jaha rreunionhápe ñaime ñaimehápe, ha jaheka oportunida japredika hag̃ua umi jatopávape (2 Tim. 4:2). w19.12 7 párr. 16, 17

Jehová oheja ñandéve jadesidi mbaʼéichapa jaikóta. Haʼe ñanemboʼe mbaʼéichapa jadesidi vaʼerã, ha umi mbaʼe jadesidíva ombovyʼárõ chupe, haʼe ñanepytyvõ osẽ porã hag̃ua ñandéve umíva (Sal. 119:173). Upévare, amáske ñamoĩ en práktika umi konsého porãite oĩva la Bíbliape, koʼýte jadesidi porãve (Heb. 5:14). Jadesidi porãramo jepe, ikatu oime ijetuʼu ñandéve ñakompleta hag̃ua pe jadesidi vaʼekue jajapo. Jahechamína unos kuánto ehémplo. Peteĩ mitãrusu odesidi oleetaha la Biblia kompletoite. Unas kuánta semána aja oho porãiterei hese, péro upéi ndoleevéi. Peteĩ ermána odesidi oñepyrũtaha iprekursorádo rregulár, péro ombohasa ha ombohasa pe fécha ha núnka noñepyrũi. Peteĩ kuérpo de ansiáno odesidíma ojapovetaha visíta de pastoréo umi ermanokuérape, péro ohasáma heta mése ha ndojevisitái gueteri avavetépe. Koʼã situasión ningo idiferénte péro ojojogua peteĩ mbaʼépe: Ojedesidi peteĩ mbaʼe, péro noñemohuʼãi. w19.11 26 párr. 1, 2

Jesús heʼi vaʼekue ñane tiémpo ojoguataha “Noé tiémpope”, ha añetehápe koʼág̃arupi pe situasión ijetuʼu ha ipeligróso (Mat. 24:37; 2 Tim. 3:1). Upéicha rupi heta matrimónio odesidi koʼag̃aite ndorekomoʼãiha mitã, ikatu hag̃uáicha oipuruve itiémpo oservi hag̃ua Jehovápe. Odesidi jave orekótapa mitã ha mboýpa orekóta, umi matrimónio iñarandúva “okalkula mboýpa ogastáta” (Luc. 14:28, 29). Umi matrimónio ifamília vaʼekue oikuaa porã ndahaʼeiha plátante la oñekotevẽva oñemongakuaa hag̃ua umi mitã, síno avei tiémpo ha fuérsa. Upévare iñimportánte umi matrimónio oñeporandu: “¿Tekotevẽtapa mokõivéva rombaʼapo rokonsegi hag̃ua umi mbaʼe roikotevẽva? ¿Roĩpa de akuérdo mbaʼe mbaʼépa hína la ‘añetehápe roikotevẽva’? Tekotevẽramo mokõivéva rombaʼapo, ¿mávapa oñangarekóta umi mitãre? ¿Máva ehémplopa roipota ore família osegi, tahaʼe umi mbaʼe opensáva térã ojapóvape?”. Umi matrimónio oñemongeta porãva koʼã mbaʼére, ojapo hína upe heʼíva pe téxto koestediagua. w19.12 23 párr. 6, 7

Apóstol Pablo ohasa vaʼekue umi situasión ijetuʼúva ha heta vése haimete mete omano (2 Cor. 11:23-28). Haʼe heʼi avei oreko hague “peteĩ ñuatĩ” oikutu rasýva chupe, péva oiméne peteĩ mbaʼasy rakaʼe (2 Cor. 12:7). Avei oñeñandu vaieterei vaʼekue Demas ohejárõ guare chupe, haʼe ningo ikompañéro kuri peteĩ tiémpore ha oipytyvõ vaʼekue chupe. Demas oheja chupe “ohayhu rupi ko múndo” (2 Tim. 4:10). Pablo haʼe vaʼekue peteĩ kristiáno unhído ipyʼaguasúva ha heta vése oipytyvõ vaʼekue ótrope, upéicharõ jepe haʼe avei oñedesanima algúna vése (Rom. 9:1, 2). Apóstol Pablo orresivi vaʼekue pe konsuélo ha ánimo oikotevẽva. ¿Mávapa omokyreʼỹ raʼe chupe? Jaikuaa Jehová oipuru hague ijespíritu sánto omombarete hag̃ua chupe (2 Cor. 4:7; Filip. 4:13). Péro avei Jehová ojevale umi ermanokuérare okonsola hag̃ua chupe. Pablo heʼi voi hesekuéra: “Tuichaiterei chekonsola hikuái” (Col. 4:11). Haʼe imanduʼa Aristarco, Tíquico ha Marcos rehe, pórke haʼekuéra okonsola ha oipytyvõ vaʼekue chupe oaguanta hag̃ua. w20.01 8 párr. 2, 3

Jesús ontendeka vaʼekue ndaikatuiha voi ojeexplika porã peteĩ ndahaʼéivape unhído mbaʼépa oñandu peteĩ kristiáno ‘onase jeýva’, térã “onaséva espíritugui” (Juan 3:3-8). Peteĩ kristiánope ojeporavo jave oho hag̃ua yvágape, oñepyrũma okambia opensa lája. ¿Mbaʼérepa jaʼe upéva? Jehová oiporavo mboyve koʼã kristiánope, haʼekuéra ovyʼaiterei pe esperánsa orekóvare oikóvo pára siémpre ko yvy ape ári. Haʼekuéra oipotaitereíma og̃uahẽ pe tiémpo Jehová oipeʼataha entéro mbaʼe vai ko yvýgui, ha ojapo chugui peteĩ paraíso. Ikatu voi haʼekuéra oñeimahina raʼe omeʼẽvo la vienvenída peteĩ ifamília térã iñamígo orresusitávape. Péro Jehová ounhívo chupekuéra, oñepyrũma opensa diferénte hikuái. ¿Mbaʼérepa upéva? Ndahaʼéi ningo ndogustavéiva chupekuéra pe idéa oikóvo ko yvýpe. Ndahaʼéi avei okambiáva opensa lája pórke ou oñedeprimi, osufrieterei térã derrepénte opensáva ndaigustomoʼãiha jaiko pára siémpre ko yvy ape ári. ¿Mbaʼépa la oikóva upéicharõ? Jehová oipuru ijespíritu sánto okambia hag̃ua haʼekuéra opensa lája ha omeʼẽ hag̃ua chupekuéra peteĩ esperánsa pyahu. w20.01 22 párr. 9-11

Pe Léi Mosáika poguýpe, umi omoakãva oñenkarga vaʼekue oĩ jave ojapóva peteĩ mbaʼe oafektáva pe adorasión omeʼẽva Jehovápe. Avei oñatende vaʼerã oĩ jave iprovlémava hapichándi ha oĩramo oporovioláva ha oporojukáva. Péro “Cristo léi” poguýpe, umi ansiáno sólamente oñenkarga oĩ jave peteĩ opekáva ha upe ojapóva oafektáramo pe adorasión omeʼẽva Jehovápe (Gál. 6:2). Ha ohechakuaa avei Ñandejára omeʼẽ hague umi autoridápe pe rresponsavilida oñenkarga hag̃ua oĩ jave iprovlémava hapichándi térã oporojukáva. Upévare umi autorida oreko derécho oporokastigávo, tahaʼe omulta térã omondóvo kárselpe umi mbaʼe vai apohápe (Rom. 13:2-4). ¿Mbaʼépa ojapo vaʼerã ansianokuéra oĩ jave peteĩ opeka vaietereíva kongregasiónpe? Haʼekuéra oipuru la Biblia oanalisa hag̃ua pe káso ha ohecha hag̃ua mbaʼépa odesidíta. Haʼekuéra siémpre imanduʼa Cristo Léi oñemopyendaha mborayhúpe. Upévare oporohayhúgui, umi ansianokuéra ohecháta ko mbaʼe: “Oimérire pe mbaʼe vai apoha operhudika raʼe algúnope kongregasiónpe, ¿mbaʼépa ikatu ojejapo oñepytyvõ hag̃ua chupekuéra?”. Umi ansiáno oñeporandúta avei: “¿Oñarrepentípa pe mbaʼe vai apoha? ¿Ikatúpa roipytyvõ chupe oĩ porã jey hag̃ua Jehová renondépe?”. w19.05 7 párr. 23, 24

Jesús oikuaa porã vaʼekue Jehová omeʼẽ hague chupe la vída, ha avei omeʼẽha chupe entéro mbaʼe oikotevẽva osegi hag̃ua oikove. Upévare haʼe heʼi vaʼekue upe jaleéva pe téxto koestediaguápe. Jesús okonfia vaʼekue Itúare ipyʼaite guive, ha Jehová omeʼẽ chupe umi mbaʼe oikotevẽva osegi hag̃ua oikove. Péro iñimportanteveha, Jehová oipytyvõ vaʼekue Jesúspe osegi hag̃ua ifiél chupe (Mat. 4:4). Jehová avei omeʼẽ ñandéve ñaikotevẽva guive ikatu hag̃uáicha jareko peteĩ amista iporãva hendive. La Biblia rupive haʼe omyesakã mbaʼeichagua persónapa haʼe, mbaʼéichapa haʼe oipota vaʼekue ojeiko, mbaʼérepa ñandeapo rakaʼe ha mbaʼépa oikóta amo gotyove. Haʼe ohechauka vaʼekue ñanepytyvõseha ñañepyrũrõ guare jaikuaa umi mbaʼe omboʼéva la Biblia, upearã ojevale ñande tuakuérare térã peteĩ ermánore ikatu hag̃uáicha jaikuaa porãve chupe. Ha koʼag̃aite peve Jehová osegi ñanepytyvõ mborayhúpe umi ansiáno ha ermáno ha ermána ijerovia mbaretéva rupive. Avei haʼe ñanemboʼe umi rreunión rupive, umívape ñande ñaaprende Jehovágui ñane ermanokuérandi, haʼéva ñane família. Ojapóvo koʼã ha hetave mbaʼe, Jehová ohechauka añetehápe oñeinteresaha ñanderehe peteĩ Túaicha (Sal. 32:8). w20.02 3 párr. 8; 5 párr. 13

Ñande ñaenvidiáramo ótrope térã oĩramo ñaneenvidiáva, ndaiporimoʼãi pyʼaguapy ñande apytépe. Upévare jahapoʼo vaʼerã pe envídia ñane korasõgui ha ani jajapo mbaʼeve omomýitava ótrope ñaneenvidia hag̃ua. ¿Mbaʼe mbaʼépa jajapo vaʼerã ñaipytyvõ hag̃ua ótrope ani hag̃ua iñenvidióso, ha mbaʼépa ikatu jajapo siémpre oĩ hag̃ua pyʼaguapy? Umi mbaʼe jajapóva ha ñapensa lája tuichaiterei ikatu oafekta ótrope. Ko múndo ningo oipota ñande “jaiko jajechaukase umi mbaʼe jarekóvare” (1 Juan 2:16). Péro upéva omomýi umi héntepe iñenvidióso hag̃ua. Ñande ikatu ñaipytyvõ ótrope ani hag̃ua iñenvidióso ndajaikóiramo manterei ñañeʼẽ umi mbaʼe jarekóva térã jajoguasévare. Avei ndajaikóiramo ñañemombaʼeguasu jareko haguére priviléhio kongregasiónpe. Manterei ñañeʼẽramo umi priviléhio jarekóvare, ñande ñamomýi hína ótrope iñenvidióso hag̃ua. Péro jahechaukáramo añetehápe ñañeinteresaha ñande rapicháre, ha ñamombaʼe umi mbaʼe porã ojapóva hikuái, ñaipytyvõ chupekuéra oñekontenta hag̃ua la orekóvare, ha jajapo hína ñande párte oĩ hag̃ua unida ha pyʼaguapy kongregasiónpe. w20.02 18 párr. 15, 16

Eikuaa Jehovápe pe kreasión rupive (Apoc. 4:11). Rejepyʼamongeta vaʼerã umi animál ha plánta Jehová ojapo vaʼekuére ha mbaʼéichapa umíva ohechauka haʼe iñaranduetereiha. Eñehaʼã avei eaprende mbaʼeichaitépa ndaijojahái ñande rete (Sal. 139:14). Ejepyʼamongeta avei pe podér orekóvare pe kuarahy Ñandejára ojapo vaʼekue, hiʼarive upéva peteĩnte hína umi millones de estrélla haʼe ojapo vaʼekue apytépe (Is. 40:26). Péicha rejepyʼamongetáramo umi mbaʼe Jehová ojapo vaʼekuére, upéva nepytyvõta rerrespetave hag̃ua chupe. Iñimportánte ningo jaikuaa Jehová iñarandu ha ipoderosoha, péro jahayhuve hag̃ua chupe ha jaiko hag̃ua iñamígoramo, tekotevẽ jaikuaa chugui hetave mbaʼe. Reime vaʼerã segúro Jehová añetehápe ojepyʼapyha nderehe. Nemanduʼa vaʼerã, Ñandejára opromete nde rehekáramo chupe, haʼe ojejuhukataha ndéve (1 Crón. 28:9). Jehová heʼi Jeremías 31:3-pe: ‘Che romoag̃ui cherehe’. Rentende porãvévo rehóvo umi mbaʼe Jehová ojapo vaʼekue nderehehápe, koʼýte rehayhuvéta chupe. w20.03 4 párr. 6, 7

Apóstol Pablo oheja avei ñandéve peteĩ ehémplo neporãva ikatu hag̃uáicha ñamotenonde Jehová servísio. Pe isegúndo viáhe misionálpe, haʼe oho vaʼekue Coríntope, ha upépe ojapo umi óga kárpa oñemantene hag̃ua. Pablo ombaʼapónte upévape ikatu hag̃uáicha opredika umi Corintoguápe, ha ani hag̃ua ojerure chupekuéra pláta oñemantene hag̃ua (2 Cor. 11:7). Pablo ombaʼapóramo jepe, haʼe osegi omotenonde Jehová servísio ha opredika káda sábado. Péro omehoramie rire la isituasión, haʼe ikatúma kuri “oñemeʼẽmbaite opredika hag̃ua Ñandejára Ñeʼẽ umi judíope, ha ohechauka chupekuéra Jesús haʼeha pe Cristo” (Hech. 18:3-5; 2 Cor. 11:9). Tiémpo rire, oĩrõ guare préso peteĩ ógape 2 áñore Rómape, lomímonte osegi opredika umi ovisitávape chupe ha oskrivi avei kárta (Hech. 28:16, 30, 31). Pablo oĩ vaʼekue desidído nopermitimoʼãiha mbaʼeve ostorva chupe iservísiope. w19.04 4 párr. 9