Diciembre

Sapyʼánte ningo ikatu ijetuʼu ñandéve ñantende hag̃ua peteĩ mbaʼe la Biblia heʼíva. Térã ikatu Jehová nokontestái raʼe ñandéve ñane ñemboʼe pe ñande ñahaʼarõ haguéicha. Koʼã mbaʼe ikatu hína ñanemboduda. Ha nañapenáiramo umi dúda jarekóvare, umíva ikatu omokangy ñande jerovia ha ombyai pe amista jarekóva Jehovándi (Sant. 1:7, 8). Ha umíva káusare ikatu voi jaju japerde la esperánsa umi mbaʼe ñaneraʼarõvagui amo gotyove. Apóstol Pablo okompara vaʼekue ñane esperánsa peteĩ ánklare (Heb. 6:19). Oiko jave peteĩ torménta, pe ánkla oipytyvõ pe várkope ani hag̃ua oho ochoka umi itáre. Péro peteĩ ánkla ideprovécho hag̃ua, pe kadéna ojepurúva oñeñapytĩ hag̃ua pe várkore ndosói vaʼerã. Pe errúmbre ningo ikatu okaru pe ánkla kadénare ha omokangy chupe, péicha avei umi dúda jarekóva ikatu omokangy ñande jerovia. Oĩ jave persekusión, peteĩ persóna odudáva ikatu ndojeroviavéi Jehová okumplitaha ipromesakuéra. Ha jajúramo ndajajeroviavéi, japerdéta avei ñane esperánsa. Pórke peteĩ persóna oñeñandúva upéicha ni mbaʼevéicharõ ndovyʼamoʼãi. w21.02 30 párr. 14, 15

Abrahán oiméne orekóma raʼe mas de 70 áño osẽrõ guare Úrgui ifamíliandi (Gén. 11:31–12:4). Ha amo 100 áñorupi haʼe oiko vaʼekue óga kárpape ha ova ova Canaán tuichakuére. Abrahán ningo omano vaʼekue orekórõ guare 175 áño (Gén. 25:7). Péro haʼe ndohechajepéi vaʼekue Jehová okumplírõ guare ipromésa omeʼẽtaha ifamiliarépe pe yvy haʼe okorre hague oikóvo. Ha haʼe ndoikoʼaréi vaʼekue avei ohecha hag̃ua “pe siuda” térã Ñandejára Rréino oñemoĩmaha. Upéicharõ jepe, Abrahán rehe ojeʼe ‘ovyʼa hague oikove puku haguére’ ha upéi omano (Gén. 25:8). Abrahán ohasáramo jepe heta mbaʼe ijetuʼúva, ijerovia mbarete ha vyʼápe ohaʼarõ vaʼekue Jehová okumpli ipromésa. ¿Mbaʼépa oipytyvõ vaʼekue chupe oaguanta hag̃ua? Oikove aja pukukue, Jehová oprotehe ha otrata vaʼekue chupe iñamígoramo (Gén. 15:1; Is. 41:8; Sant. 2:22, 23). Abrahán ojapo haguéicha, ñande ñahaʼarõ avei “pe siuda oguerekóva simiénto teete” (Heb. 11:10). Péro ñande nañahaʼarõi hína oñemopuʼã upe siuda, pórke Ñandejára Rréino oñemoĩma 1914-pe ha ogovernáma hína pe yvága kompletoite (Apoc. 12:7-10). Upéva rangue, ñande ñahaʼarõ hína ogoverna ko yvy kompletoite. w20.08 4, 5 párr. 11, 12

Ñahendukuaa hag̃ua ñande rapichápe tekotevẽ ñaneumílde ha ñanepasiénsia. Koʼág̃a jahecháta mbohapy rrasón ohechaukáva iporãha ñañehaʼã jajapo upéva. Primero, nañapensavaimoʼãi ñande rapicháre pyaʼeterei. Segundo, jaikuaáta mbaʼéichapa oñeñandu ñane ermanokuéra ha mbaʼérepa odesidi ojapo peteĩ mbaʼe, ha upéva ñanepytyvõta ñañemoĩ hag̃ua ilugarpekuéra. Ha tercero, ñande ñapermitíramo ñane ermáno oñeʼẽ, ikatu hína ñaipytyvõ chupe haʼe voi ontende hag̃ua mbaʼéichapa oñeñandu. Sapyʼánte ningo ni ñande nañañentendéi, ha ñañeʼẽ rire umi mbaʼe ñañandúvaremante jaikuaa la ojehúva ñandéve. Ñane ermáno ha ermanakuéra apytépe oĩ umi ijetuʼuetereíva chupe oñeʼẽ hag̃ua umi mbaʼe oñandúvare. Ikatu hína upéicha umi mbaʼe ohasa vaʼekue káusare térã upéichante voi ilája. Ikatu ningo heta tiémpo haguépe raẽ okonfia hikuái ñanderehe ikatu hag̃uáicha omombeʼu ñandéve mbaʼéichapa oñeñandu. Péro ñande ñanepasiénsiaramo Jehováicha, mbeguekatúpe okonfiátama ñanderehe ha omombeʼúta ñandéve la ohasáva, ha haʼekuéra ojapo vove upéva, ñande ñahendu porã vaʼerã chupekuéra. w20.04 15, 16 párr. 6, 7

Umi pira oĩ jepi ogustahápe chupekuéra pe y ha oĩháme heta hembiʼurã. Pe peskadórpe g̃uarã iñimportánte avei mbaʼe órapa oho peskádape. Peteĩ misionéro oikóva peteĩ ísla del Pacíficope oaprende kuri iñimportanteha mbaʼe órapa ojeho péskape. Peteĩ ermáno upepegua oinvita chupe oho hag̃ua hendive peskádape, ha pe misionéro heʼi chupe: “Jajotopána koʼẽrõ pyhareve las 9”. Ha pe ermáno ombohovái chupe: “Chéverõ g̃uarã nde nderepillái hína, jaha ningo japeska hoʼaha órape la pira ha ndahaʼéi opyta porãve jave ñandéve”. Upéicha avei Jesús disipulokuéra oho vaʼekue “peskádape” umi lugár ha umi óra oĩháme jepi umi hénte. Por ehémplo, Jesús segidorkuéra opredika vaʼekue pe témplope, umi sinagógape, ogahárupi ha umi merkádope (Hech. 5:42; 17:17; 18:4). Ñande avei tekotevẽ jaikuaa mbaʼe órapa umi hénte ñande territoriopegua oĩ jepi hógape, térã moõpa oĩ jepi hikuái ikatu hag̃uáicha japredika chupekuéra. Tekotevẽ jajadapta umi héntere ikatu hag̃uáicha japredika chupekuéra umi lugár ha jatopataha órape hesekuéra (1 Cor. 9:19-23). w20.09 4 párr. 8, 9

Peteĩ mbaʼe ikatúva jajapo jareko hag̃ua Jesúspe ñane amígoramo haʼe hína jaapoja umi mbaʼe odesidíva Jehová organisasión. Jesús ningo omoakã pe kongregasión, ha ñande ñamombarete ñane amista hendive jaapoja jave umi ermáno haʼe omoĩ vaʼekuépe oñangareko hag̃ua ñanderehe (Efes. 4:16). Por ehémplo, koʼág̃a ñañehaʼã jaipuru porãve umi Salón del Reino, ha upévare heta kongregasión oñeuni. Upéicha rupi, tuichaiterei ojeaorra ha ojepuru porãve umi kontrivusión oñemeʼẽva Jehová organisasiónpe. Ojejapo rupi koʼã mbaʼe, heta puvlikadór ojadapta vaʼerã ko situasión pyahúre. Koʼã ermáno ifiélva ningo oiméne oservíma raʼe heta áñore peteĩ kongregasiónpe, ha oiméne oreko raʼe upépe umi ermána ha ermáno iñamigoitéva. Péro koʼág̃a ojejerure chupekuéra oservi hag̃ua ótra kongregasiónpe. ¡Katuete ningo Jesús ovyʼaiterei ohechávo koʼã ermáno ifiélva oapojaha koʼã mbaʼe ojedesidíva! w20.04 24 párr. 14

Pe rréi del nórte ha pe rréi del sur osegi opuʼã ojuehe, pórke káda únonte orekose pe goviérno ipoderosovéva ko múndope. Por ehémplo jahechami mbaʼépa oiko vaʼekue pe segunda gérra mundiál rire, pe Unión Soviética oñepyrũrõ guare omanda heta pártepe oĩva Európape. Oiko rupi koʼã mbaʼe, pe rréi del sur oñomoirũ umi ótro país ndive ha ouni ijehérsito pe rréi del nórte kóntrape. Koʼã país oñeuni vaʼekuépe oñehenói la OTAN, térã Organización del Tratado del Atlántico Norte. Pe rréi del nórte ha pe rréi del sur ogasta avei hetaiterei pláta orekoségui pe ehérsito ipoderosovéva. Oiko jave gérra África, Asia ha Latinoaméricape, pe rréi del nórte oapoja pe rréi del sur enemigokuérape. Ramoiténte umi áño ohasa vaʼekuépe, Rusia ha iñirũnguéra ipoderosoiterei ohóvo ko múndope. Haʼekuéra avei oñorairõ pe rréi del sur kóntrape oipurúvo umi komputadóra. Koʼã rréi omboja ojuehe oipuruha umi prográma de komputadóra omboperde hag̃ua ojupe pláta ha operhudika hag̃ua ojuehegui igoviernokuéra. Ha Daniel oprofetisa haguéicha, pe rréi del nórte osegi oataka Ñandejára puévlope (Dan. 11:41). w20.05 13 párr. 5, 6

Proféta Isaías tiémpope, Jehová oporandu vaʼekue ipuévlope: “¿Ikatu piko peteĩ sy hesarái imembyraʼýgui?”. Ha upéi heʼi avei chupekuéra: “Oĩramo jepe kuña hesaráiva imembýgui, che arakaʼeve ndacheresaraimoʼãi ndehegui” (Is. 49:15). Jehová ningo nameméi oñekompara peteĩ sýre, péro koʼápe haʼe ojapo upéva. Jehová ningo okompara umi mbaʼe oñandúva isiervokuérare peteĩ sy oñandúvare imembyʼíre, pórke Ñandejára oipota jaikuaa haʼe ñanderayhuetereiha. Katuete heta sy oñeñandu avei peteĩ ermána hérava Jazmín oñeñanduháicha. Haʼe heʼi jaguereko jave peteĩ mitãraʼy “oñepyrũha peteĩ sentimiénto iporãitereíva ñañandútava ñamano meve”. Jehová ningo oikuaa oĩ jave peteĩ isiérvo ndopredikavéiva ha ndohovéiva rreunionhápe. Heta koʼã ñane ermáno ha ermána oĩ vaʼekue inaktívo ou jey kongregasiónpe, ha ñande vyʼápe jarresivi chupekuéra. Jehová ningo oipota haʼekuéra ou jey ha ñande upéichante avei (1 Ped. 2:25). w20.06 18 párr. 1-3

Ndahaʼéi ningo opaichagua tesóro ikatúva jahecha. Añetehápe umi tesóro ndaikatúiva jahecha la iporãvéva. Pe Sermón del Móntepe, Jesús oñeʼẽ vaʼekue umi tesóro yvagapeguáre ha iporãvéva umi rrikésa oĩvagui ko yvy ape ári. Upéi haʼe heʼive: “Pende tesóro oĩháme, upépe oĩta avei pene korasõ” (Mat. 6:19-21). Ñande ñamombaʼetereíramo peteĩ mbaʼe, ñane korasõ ñanemomýita ñañehaʼã hag̃ua jareko upéva. ¿Mbaʼépa heʼise ñambyaty “tesóro yvágape” Jesús heʼi haguéicha? Heʼise ñaime porãha Ñandejára renondépe. Ñambyatýramo umichagua tesóro yvágape, arakaʼeve noñehundimoʼãi ni noñemondamoʼãi ñandehegui. Apóstol Pablo ñanemokyreʼỹ ‘ñapensa meme hag̃ua umi mbaʼe ndaikatúivare jahecha’ (2 Cor. 4:17, 18). Koʼã tesóro ndaikatúiva jahecha apytépe oĩ hína umi mbaʼe porã jahupytýtava Ñandejára múndo pyahúpe. ¿Jahechaukápa Jehovápe jaagradeseha umi tesóro ndaikatúivare jahecha? w20.05 26 párr. 1, 2

Umi mbaʼe Moisés omboʼe vaʼekue umi israelítape omombarete ijerovia ha omokyreʼỹ chupekuéra, pe amarayvi ojapo porãháicha umi plántare. ¿Mbaʼépa ñande ikatu jajapo ñamoñeñandu hag̃ua avei péicha umi hénte ñamboʼévape hína? Ñasẽ jave japredika ogahárupi térã karríto reheve, ikatu jaipuru la Biblia jahechauka hag̃ua umi héntepe Ñandejára réra haʼeha Jehová. Jaofresekuaa chupekuéra umi puvlikasión ideprovechoitéva, jahechauka chupekuéra umi vidéo iporãitéva ha umi informasión oĩva ñande sítio de Internétpe omombaʼeguasúva Jehovápe. Ñande ningo jareko la oportunida ñañeʼẽ hag̃ua Ñandejára jahayhuetévare ha ñamombeʼu mbaʼeichaguápa haʼe ñaime jave ñande travahohápe, eskuélape, térã javiaha jave. Ikatu ñamombeʼu chupekuéra umi mbaʼe porãite Jehová ojapótava ko ñande yvy ha ñanderehehápe. Ha ohendúvo hikuái koʼã mbaʼe, ikatu hína primera ves ohechakuaa hikuái mbaʼeichaitépa Jehová ñanderayhu. Ñande ñamombeʼu jave ótrope mbaʼeichagua persónapa añetehápe Jehová, ñaipytyvõ hína oñesantifika hag̃ua héra. Ñaipytyvõ umi héntepe ontende hag̃ua oñemboʼe hague chupekuéra hetaiterei japu Ñandejáragui, ha ñamboʼe chupekuéra la Biblia rupive umi mbaʼe omombaretétava ijerovia ha omokyreʼỹtava chupekuéra (Is. 65:13, 14). w20.06 10 párr. 8, 9

¿Mbaʼeichaguápa hína umi kualida ñaikotevẽva ñaipytyvõ hag̃ua umi oñemoag̃uise jeývape Jehováre? Jahechami mbaʼépa ikatu ñaaprende pe ehémplo Jesús omombeʼu vaʼekuégui, oñeʼẽva pe taʼýra oho vaʼekuére hógagui (Luc. 15:17-24). Pe taʼýra ipahápe ohechakuaa ivyroiterei hague, ha odesidi oho jey hógape. Pe túa ningo odipara ohug̃uaitĩ itaʼýrape ha hatã oañuã chupe, ha péicha ohechauka itaʼýrape ohayhuha chupe. Pe taʼýra oñeñandu vaieterei upe ojapo vaʼekuére, ha opensa nomereseveimaha voi otrata chupe itaʼýraicha. Pe túa katu oñemoĩ itaʼýra lugárpe omombeʼúrõ guare chupe mbaʼéichapa oñeñandu. Ha upéi ojapo álgo ohechauka hag̃ua itaʼýrape ojerresivi porã jeyha chupe hógape. Upearã haʼe ojapo peteĩ karuguasu ha omeʼẽ umi ao iporãva pe itaʼýra oñarrepenti vaʼekuépe. Péicha pe túa ohechauka otrataha chupe itaʼýra teéicha. Jehová ningo ojogua pe túape oñeñeʼẽvare ko ehémplope. Haʼe ohayhu umi ñane ermáno ha ermanakuéra inaktívope, ha oipota oñemoag̃ui jey hese hikuái. Jasegíramo Jehová ehémplo ikatúta ñaipytyvõ chupekuéra ou jey hag̃ua kongregasiónpe. Upearã tekotevẽta ñanepasiénsia, ñañemoĩ ilugarpekuéra, ha jahayhu chupekuéra. w20.06 25, 26 párr. 8, 9

Jesús heʼi vaʼekue oĩtaha umi “ohendúva pe mensáhe ha pyaʼe voi oguerovia vyʼápe”, péro ijerovia ikangytaha ombohováivo umi provléma (Mat. 13:3-6, 20, 21). Ikatu oime ndohechakuaái raʼe hikuái jasegíramo Jesúspe, jahasatanteha voi umi situasión ijetuʼúva (Mat. 16:24). Térã oiméne opensa raʼe peteĩ kristiáno núnka naiprovlemamoʼãiha, ha Ñandejára siémpre ovendesitaha chupe. Péro ko múndope katuete oĩta provléma, ikatu avei oiko ñanderehe peteĩ mbaʼe ñahaʼarõʼỹva ha upéicha rupi jaju ndajavyʼavéi peteĩ tiémpore (Sal. 6:6; Ecl. 9:11). La majoría ñane ermanokuéra ohechauka oĩha segúro umi mbaʼe ogueroviáva haʼeha pe añetegua. ¿Mbaʼérepa jaʼe upéva? Pórke ijeroviakuéra naikangýi oiméramo jepe peteĩ ermáno térã ermána ombopochy chupekuéra, térã opeka vai (Sal. 119:165). Ha iprovléma jave, haʼekuéra ndaijeroviakangýi síno ijerovia mbareteve (Sant. 1:2-4). Ñande jareko vaʼerã avei peichagua jerovia. w20.07 8 párr. 1; 9 párr. 4, 5

Jalee mboyve la Biblia, jajerure Jehovápe tañanepytyvõ jahecha hag̃ua mbaʼéichapa ikatu ñanevenefisia umi mbaʼe jaleéva. Por ehémplo, jaikuaaséramo mbaʼépa jajapóta jareko jave peteĩ provléma, jajerurekuaa Jehovápe tañanepytyvõ jatopa hag̃ua la Bíbliape umi konsého ñanepytyvõtava jadesidi porã hag̃ua (Filip. 4:6, 7). Jehová ñandeapo vaʼekue ikatu hag̃uáicha jaipuru ñane imahinasión. Upévare jalee jave peteĩ rreláto oĩva la Bíbliape, ñañehaʼã ñapensa ñaimeha upe lugárpe, ha ñande voi haʼeha upe persóna oñeñeʼẽha. Ñañehaʼã jahecha umi mbaʼe haʼe ohecha vaʼekue, ha ñañandu umi mbaʼe haʼe oñandu vaʼekue. Péicha ideprovechovéta ñandéve umi rreláto jaleéva. Upéi jajepyʼamongeta vaʼerã. Jajepyʼamongeta heʼise ñapensa porãha upe jaleévare ha mbaʼéichapa pe informasión ideprovécho ñandéve. Upéva ñanepytyvõ ñakonekta hag̃ua pe ñaaprendéva hína umi mbaʼe jaikuaámavandi voi, péicha ñantende porãve hag̃ua peteĩ rreláto. Jaleéramo la Biblia ha ndajajepyʼamongetái hese, haʼete ñamoĩva mesa ári peteĩ kuatia ha umi lápi de kolór, péro ndajadivuhái mbaʼeve. Péro jajepyʼamongetáramo, haʼete jajagarráva pe kuatia ha umi lápi de kolór, ha jajapo peteĩ divúho iporãitereíva ha ñapintapa voi. Jajepyʼamongetáramo ñanepytyvõta jahecha hag̃ua pe divúho kompléto. w21.03 15 párr. 3-5

Apóstol Pablo ikatu kuri opensaiterei umi mbaʼe oiko vaʼekuére yma, ha okalkula odesidírire ótra kósa ndojapresamoʼãi hague chupe. Haʼe ikatu kuri opyta ipyʼaro umi kuimbaʼe oĩvare Asia distrítope, umi oheja rei vaʼekue chupe, ha nokonfiavéi umi ótro iñamigokuérare. Péro Pablo ndojapói ni peteĩva koʼã mbaʼe. Oikuaáramo jepe saʼíma ofaltaha ojejuka hag̃ua chupe, haʼe ndahesaráiri iñimportanteveha omombaʼeguasu Jehovápe. Pablo osegi vaʼekue opensa mbaʼéichapa ikatu omokyreʼỹ ótrope, ha osegi ojerovia Jehováre oñemboʼe pyʼỹivo chupe. Oiko rangue opensaiterei umi oheja rei vaʼekuére chupe, Pablo oagradeseterei umi iñamígo oipytyvõ haguére chupe mborayhúpe heta hendáicha. Avei Pablo osegi vaʼekue ostudia Ñandejára Ñeʼẽ (2 Tim. 3:16, 17; 4:13). Ha la iñimportantevéva, haʼe ojerovia vaʼekue ipyʼaite guive Jehová ha Jesús ohayhuha chupe. w21.03 18 párr. 17, 18

Ohasa rire pe áño 100, pe kongregasiónpe heta hetavéma oĩ umi kristiáno guaʼu. Haʼekuéra omboʼe umi rrelihión japu omboʼéva ha oñomi pe añetegua oĩva Ñandejára Ñeʼẽme. Upe tiémpo guive 1870 peve, Ñandejára ndorekói vaʼekue peteĩ organisasión ko yvy ape ári. Umi kristiáno japu okakuaa ñanáicha, ha upévare ndaikatúi ojekuaa mávapa umi kristiáno tee (Mat. 13:36-43). ¿Mbaʼérepa iñimportánte jaikuaa upéva? Pórke upéva ohechauka umi rréi oĩ vaʼekue éntre pe áño 100 ha 1870 ndahaʼeiha pe rréi del nórte ha pe rréi del sur, ha umi mbaʼe ojeʼéva Daniel kapítulo 11-pe noñekumpliriha hesekuéra. Upe tiémpope Ñandejára puévlo ndorekói vaʼekue peteĩ organisasión oataka hag̃ua hikuái. Péro ohasa riremi áño 1870, ikatúma kuri jaikuaa jey mávapa pe rréi del nórte ha pe rréi del sur. w20.05 3 párr. 5

Joel oprofetisa vaʼekue umi tuku ohundipaitetaha Israel yvy hoʼupaitévo otopáva haperãme (Joel 1:4). Heta áñore ñande ñantende ko profesía oñeʼẽha Jehová puévlo osegívare opredika, ha umi tukúicha ndaiporiha ojoko vaʼerã chupekuéra. Ñapensa vaʼekue ko tembiapo oafekta vaietereitaha pe ‘tetãme’ oñeñeʼẽha Joel 1:6-pe, ha ñaimoʼã vaʼekue upe ‘tetã’ haʼeha umi hénte oĩva umi líder rrelihióso poguýpe. Péro ñaanalisáramo pe profesía kompletoite, jahechakuaáta tekotevẽha ñakambia ñantende lája. Por ehémplo, jahecha Jehová opromete hague Joel 2:20-pe oñeʼẽvo umi tuku rehe: “Amondóta mombyry pendehegui umi nortéño”, térã umi tuku. Oiméramo umi tuku orrepresenta testígo de Jehová opredika ha ojapóvape disípulo Jesús omanda haguéicha, ¿mbaʼérepa upéicharõ Jehová opromete omondotaha mombyry chupekuéra? (Ezeq. 33:7-9; Mat. 28:19, 20). Jehová ningo ni mbaʼevéicharõ nomondomoʼãi mombyry isiervokuéra ifiélvape, síno álgo térã álgien oñakontrariávape ipuévlore. w20.04 2, 3 párr. 3-5

¿Mbaʼépa jajapo vaʼerã ñapensáramo Jehová nokontestaiha ñandéve ensegída ñane ñemboʼe? Santiago heʼi jasegi vaʼerãha ‘jajerure meme Ñandejárape’. Jehová ningo ndaikueráiri ñandehegui jasegíramo jajerure chupe tañanemoarandu. Haʼe ndaipochymoʼãi ñanendive upe haguére. Ñande Ru yvagapegua “ipojera” omeʼẽ hag̃ua arandu umi ojerurévape chupe, ikatu hag̃uáicha ogueropuʼaka umi pruéva ohasáva (Sal. 25:12, 13). Haʼe ohecha umi mbaʼe vai jahasáva ha oñeñandu vai avei ñande jasufri jave, upévare haʼe ñanepytyvõseterei. ¡Ajépa ñanembovyʼaite upéva! ¿Péro mbaʼéichapa Jehová omeʼẽ ñandéve arandu? Iñeʼẽ la Biblia rupive (Prov. 2:6). Ñanearandu hag̃ua jastudia vaʼerã la Biblia ha ñane puvlikasionkuéra. Péro ndahaʼéi jastudiánte vaʼerã jaikuaa hag̃ua heta mbaʼe, tekotevẽ ñamoĩ en práktika umi mbaʼe Ñandejára heʼíva ñandéve jajapo hag̃ua. Santiago oskrivi vaʼekue: “Pejapókena Ñandejára ñeʼẽ heʼíva, ha ani pehendúnte” (Sant. 1:22). Jajapo jave Ñandejára heʼíva ñandepyʼaguapyve, nañañemohatãi ñande jaʼévapente ha jaiporiahuverekove ñande rapichápe (Sant. 3:17). Koʼã kualida ñanepytyvõta jasegi hag̃ua javyʼa tahaʼe haʼéva umi mbaʼe ijetuʼúva jahasáva. w21.02 29 párr. 10, 11

Peteĩ estudiántepe ifasilvéta osegi hag̃ua oprogresa ojevautisa peve, oipytyvõramo chupe umi ótro ermáno oĩva kongregasiónpe. Káda puvlikadór ikatu oipytyvõ okakuaa hag̃ua pe kongregasión. Peteĩ prekursóra heʼi: “Ojeʼe ningo oñekotevẽha peteĩ puévlo kompletoite oñemongakuaa hag̃ua peteĩ mitã. Chéverõ g̃uarã upéicha avei oñepytyvõ jave peteĩ persónape oservi hag̃ua Jehovápe: Oñekotevẽ voi peteĩ kongregasión kompletoite ojejapo hag̃ua peteĩ disípulo”. Osẽ porã hag̃ua peteĩ mitã, tekotevẽta oipytyvõ chupe ituakuéra, umi ipariénte, pe família amigokuéra ha umi iprofesór eskuelapegua. Haʼekuéra ojapo upéva omokyreʼỹvo pe mitãme ha omboʼévo chupe heta mbaʼe iñimportánteva. Upéicha avei umi ermáno ha ermanakuéra kongregasionpegua ikatu oakonseha, omokyreʼỹ ha omoĩ peteĩ ehémplo iporãva umi estudiántepe g̃uarã. Péicha oipytyvõ chupekuéra oprogresa hag̃ua pe vautísmo peve (Prov. 15:22). Pe puvlikadór ojapóva pe estúdio ovyʼa vaʼerã oĩ jave umi ermáno oipytyvõséva iñestudiántepe. ¿Mbaʼérepa? Pórke heta ermáno ikatu oipytyvõ pe estudiántepe oprogresa hag̃ua. w21.03 8 párr. 1-3

Enterove kristiáno, tahaʼe imitãva térã ijedáva, ñañatende vaʼerã ani jaiko jaservi guaʼu Jehovápe ha avei jajapo ivaíva. Apóstol Juan omyesakã porã vaʼekue ñande ndaikatuiha jaiko pe añetegua rapére ha ñanderekovai avei jaikóvo (1 Juan 1:6). Ñande jaipotáramo Ñandejára ñandeguerohory, koʼág̃ama voi ha amo gotyove, tekotevẽ ñañekomporta siémpre oñemañambarõguáicha ñanderehe. Péro umi hénte ndohecháiramo jepe umi mbaʼe ñande jajapóva ñemiháme, Jehová si ohechapaite entéro mbaʼe jajapóva (Heb. 4:13). Ñande jarrechasaite vaʼerã mbaʼéichapa ko múndo ohecha pe pekádo. Juan tiémpope, umi apóstata heʼi vaʼekue peteĩ persóna ikatuha trankílamente opeka ha osegi oreko Ñandejárape iñamígoramo. Koʼág̃arupi umi hénte oikóva ñande jerére opensa avei upéicha. Heta oĩ heʼíva ojeroviaha Ñandejárare, péro ndoaseptái la Jehová heʼíva pe pekádore. Ha koʼýte ndogustái chupekuéra Jehová heʼíva umi rrelasión sexuál rehe. Umi mbaʼe Jehová heʼívare pekadoha, haʼekuéra heʼi peteĩ persóna gustonteha, térã ikatunteha odesidi oiko upéicha. w20.07 22 párr. 7, 8

¿Ndépa redefende umi ermánape tekotevẽ jave? Ñamoĩ chupe oĩha ermáno ohecháva peteĩ ermána, iména ndahaʼéiva Testígo, pyʼỹinte og̃uahẽha tárde rreunionhápe ha opáre pe rreunión osẽma jepi oho. Haʼekuéra ohecha avei sapyʼántente oruha imembykuéra hendive. Haʼekuéra okritika chupe openságui iñexihénte vaʼerãha iménandi opermiti hag̃ua chupe ogueru imembykuéra rreunionhápe. Péro ndoikuaái hikuái pe ermána ojapoha hína ikatumíva entéro. Sapyʼánte iména derrepentete ojerure jepi chupe ojapo hag̃ua álgo, ha haʼe orrespeta vaʼerã avei iména orekoha la última palávra ojedesidíta jave umi mitãre. Efelisitáramo pe ermánape ha emombeʼu umi mbaʼe porã haʼe ojapóva oikóvo, ikatu hína rejoko umi ótrope anivéma hag̃ua okritika chupe. Umi ansiáno oikuaa Jehová oipotaha ojetrata porã ermanakuérape (Sant. 1:27). Umi ansiáno osegi Jesús ehémplo ha noñemohatãi haʼekuéra heʼívapente. Ojapo hikuái upéicha nomoĩri jave rrégla, iporãvétante jave imbaʼeporã ha imbaʼerechakuaa (Mat. 15:22-28). Umi ansiáno oñehaʼã jave oipytyvõ chupekuéra, umi ermána oñandúta Jehová ha iñorganisasión ohayhuha chupekuéra. w20.09 24, 25 párr. 17-19

Proféta Daniel iñumílde vaʼekue, ha siémpre oheka Jehová gía. Por ehémplo, Jehová ojevalérõ guare hese omombeʼu hag̃ua Nabucodonosórpe mbaʼépa heʼise upe osoña vaʼekue, haʼe ndeʼíri ijeheguínte oexplika hague upe suéño. Upéva rangue, omombaʼeguasu Jehovápe ha orrekonose haʼe rupive ojapo hague upéva (Dan. 2:26-28). ¿Mbaʼépa ñaaprende upévagui? Oiméramo ermanokuérape ogustaiterei ñande diskursokuéra, térã jareko umi experiénsia iporã porãva predikasiónpe, ñanemanduʼa vaʼerã ñamombaʼeguasu hag̃ua Jehovápe ha ñarrekonose haʼe ñanepytyvõ rupínte ikatu hague jajapo umi mbaʼe (Filip. 4:13). Jajapo jave upéicha, jasegi avei hína Jesús ehémplo. Jesús ohechauka vaʼekue odependeha Jehováre (Juan 5:19, 30). Haʼe núnka noñehaʼãi vaʼekue oipeʼa Itúa yvagapeguágui ijautorida. Heʼiháicha Filipenses 2:6, Jesús ‘núnka nopensái vaʼekue oipeʼávo Ñandejáragui ilugár oñembojojávo hese’. Jesús oñemoĩ vaʼekue Itúa poguýpe, orrekonose umi mbaʼe ndaikatúiva ojapo ha orrespeta Itúa autorida. w20.08 11 párr. 12, 13

Oĩ umi ohaʼãva pe karréra oporogueraháva jeikove opaveʼỹvape ombohovái vaʼerã hekovépe umi situasión ótro ndaikatúiva ohecha ni ontende. Oiméramo nde nderasykatu ha reñandu avave nontendeiha ne situasión, ikatu nemokyreʼỹ hína Mefibóset ehémplo (2 Sam. 4:4). Haʼe ningo heta osufri vaʼekue ndaikatúi rupi oguata porã, ha hiʼarive rréi David opensa vai hese ha ndaihústoi hendive. Upéicharõ jepe, haʼe ndohejái umi mbaʼe vai oamarga chupe, síno ohechakuaa ha oagradese umi mbaʼe porã oikóva hese. Por ehémplo, haʼe omombaʼeterei vaʼekue David ymave imbaʼeporã haguére hendive (2 Sam. 9:6-10). Upévare David opensa vaírõ guare hese, Mefibóset odesidi ndaipochymoʼãiha ni ndopytamoʼãiha ipyʼaro. David ojavýramo jepe, Mefibóset ndohejái upéva oamarga chupe, ha ndokulpái avei Jehovápe umi mbaʼe vai David ojapo vaʼekuére. Mefibóset ojesareko umi mbaʼe ikatúvare ojapo oapoja hag̃ua pe rréi Jehová oiporavo vaʼekuépe (2 Sam. 16:1-4; 19:24-30). Jehová oheja ñandéve la Bíbliape Mefibóset ehémplo porãite ikatu hag̃uáicha ñaaprende chugui (Rom. 15:4). w20.04 26 párr. 3; 30 párr. 18, 19

Oĩ algúno kongregasiónpe oñenombra vaʼekue oservi hag̃ua de misionéro, prekursór espesiál térã prekursór rregulár. Haʼekuéra odesidi opredika ha oporomboʼe de tiémpo kompléto. Umi oservíva de tiémpo kompléto ndaiplatahetái jepi, péro Jehová omeʼẽ chupekuéra heta vendisión (Mar. 10:29, 30). Jahayhueterei ningo koʼã ermáno ha ermánape, ha jaagradese oĩ haguére hikuái kongregasiónpe. Péro, ¿oreko piko peteĩ lugár kongregasiónpe umi ermáno oñenombra vaʼekue, ha umi oservíva de tiémpo kompléto añoiténte? ¡Ni mbaʼevéicharõ! Entéro puvlikadór oikuaaukáva umi notísia porã ningo iñimportánte Ñandejára ha kongregasiónpe g̃uarã (Rom. 10:15; 1 Cor. 3:6-8). Upéva upéicha, pórke peteĩva umi mbaʼe iñimportantevéva ojapóva pe kongregasión haʼe hína oipytyvõ la héntepe oiko hag̃ua chuguikuéra Jesucristo disípulo (Mat. 28:19, 20; 1 Tim. 2:4). Entéro puvlikadór oĩva kongregasiónpe, tahaʼe vautisádo térã no vautisádo oñehaʼãmbaite omotenonde hekovépe ko traváho (Mat. 24:14). w20.08 21 párr. 7, 8

Ohechaukaháicha pe téxto koestediagua, ñambohovái jave umi situasión ijetuʼúva, Jesús ñanepytyvõta. Umi mbaʼe Jesús heʼi vaʼekue ikatu tuichaiterei ñanemombarete, pórke oĩ umi día ijetuʼuetereiha ñandéve ñaaguanta hag̃ua. Por ehémplo, omanóramo ñandehegui peteĩ jahayhúva, ñande jahasa asy jepi ndahaʼéi unos kuánto díante, síno heta áñore. Ótro katu ombohovái vaʼerã umi mbaʼe ijetuʼúva ijedáma rupi. Ha oĩ avei umi ohasa asýva oreko rupi depresión. Upéicharõ jepe, ikatu jasegi ñaaguanta pórke Jesús heʼi vaʼekue ‘oĩtaha ñanendive káda día’, umíva apytépe umi día jahasahápe umi mbaʼe ijetuʼuvéva ñande rekovépe (Mat. 11:28-30). Ñandejára Ñeʼẽ oasegura ñandéve Jehová ñanepytyvõtaha hiʼanhelkuéra rupive (Heb. 1:7, 14). Por ehémplo, umi ánhel ñanepytyvõ ha ñandegia japredika jave “umi notísia porã oñeʼẽva Ñandejára Rréinore”, umi hénte oikóvape “entéro tetã, trívu, puévlo ha umi oñeʼẽvape diferénte idióma” (Mat. 24:13, 14; Apoc. 14:6). w20.11 13, 14 párr. 6, 7

Ñande jaipota ñane estudiánte ohechakuaa umi mbaʼe oaprendéva hína ndouiha ñandehegui, síno Ñandejára Ñeʼẽgui (1 Tes. 2:13). ¿Mbaʼéichapa ikatu jajapo upéva? Ñamokyreʼỹ chupe oñeʼẽ hag̃ua umi mbaʼe oaprendévare. Jaiko rangue siémpre jaexplika ñane estudiántepe umi téxto bíblico, jajerure chupe toexplika jepi ñandéve umi téxto. Ñaipytyvõ ñane estudiántepe ohecha hag̃ua mbaʼéichapa Ñandejára Ñeʼẽ ikatu oipytyvõ chupe hekovépe. Jajapo umi pregúnta ñanepytyvõtava jaikuaa hag̃ua mbaʼépa haʼe opensa pe téxto oleévare (Luc. 10:25-28). Por ehémplo ikatu ñaporandu: “¿Mbaʼe kualidápa nde rehechakuaa Jehová orekoha releévo ko téxto?”. “¿Mbaʼéichapa ko mbaʼe reaprendéva la Bíbliagui ikatu ideprovécho ndéve?”. “¿Mbaʼéichapa reñeñandu reaprende rire koʼã mbaʼe?”. Pe iñimportantevéva ningo ndahaʼéi heta mbaʼémapa oikuaa pe estudiánte, síno omombaʼe ha ojapópa hína umi mbaʼe oaprendéva. Jaipurúkena la Biblia ñaporomboʼe jave. Ñaneumílde vaʼerã jaipotáramo oiko ñandehegui peteĩ instruktór ikatupyrýva. w20.10 15 párr. 5, 6

Ñande ikatu ñaime segúro pe predikasión opataha itiempoitépe. Jahechamína mbaʼépa oiko vaʼekue Noé tiémpope. Upérõ Jehová ohechauka vaʼekue siémpre ojapoha entéro mbaʼe itiempoitépe. Amo 120 áñorupi oiko mboyve pe dilúvio, Jehová odesidíma vaʼekue arakaʼépa oikóta upéva. Heta áño upe rire, Jehová heʼi Noépe ojapo hag̃ua pe árka. Ha 40 térã 50 áñorupi oñepyrũ mboyve pe dilúvio, Noé osegi vaʼekue ombaʼapo jejopy. Umi hénte nohenduséiramo jepe chupe, haʼe osegi vaʼekue oavisa chupekuéra, Jehová heʼi peve og̃uahẽmaha pe tiémpo oike hag̃ua pe árkape. Upéi itiempoitépe, “Jehová omboty pe árka rokẽ” (Gén. 6:3; 7:1, 2, 16). Koʼẽrõitéma Jehová oikuaaukáta ñandéve opamaha pe predikasión. Upéi haʼe ohundíta Satanás múndo ha omoĩta peteĩ múndo pyahu, ha upépe henyhẽtéta umi hénte iñeʼẽrendúva Ñandejárape. Og̃uahẽ meve upe tiémpo, jasegíkena pe ehémplo oheja vaʼekue ñandéve Noé, ha hetave Jehová siervokuéra ombaʼapo vaʼekue kaʼaruete peve opytuʼuʼỹre. Ñamotenondékena ñande rekovépe pe predikasión, ñanepasiénsiakena ha jasegi jajerovia mbarete Jehová ha ipromesakuérare. w20.09 13 párr. 18, 19

Ndojekuaaporãirire mávapa oporomoakã vaʼerã, Jehová famíliape oĩta kuri sarambi ha ndojevyʼamoʼãi. Por ehémplo avave ndoikuaamoʼãi mávapa odesidi vaʼerã peteĩ mbaʼe ha mávapa ojapo vaʼerã upe ojedesidi vaʼekue. Ha oiméramo Ñandejára voi oipota peteĩ kuimbaʼe omoakã hogapy, ¿mbaʼérepa heta kuña oñandu iména oreko asyha chupekuéra? Pórke heta kuimbaʼe nopenái umi léi Jehová omeʼẽvare umi famíliape g̃uarã, ha osegínte umi tradisión ha kostúmbre orekóva hikuái ivállepe. Ikatu voi otrata vai hembirekópe omeʼẽ hag̃uánte ijupe gústo. Por ehémplo, ikatu omaltrata chupe oñandu hag̃ua haʼe iñimportanteveha, térã ohechauka hag̃ua ótrope “mávapa la omandáva”. Haʼe ikatu opensa ndaikatuiha oovliga hembirekópe ohayhu hag̃ua chupe, péro si ikatu omongyhyje chupe. Ha oĩ voi oipurúva upéva odomina hag̃ua hembirekópe. Tuichaiterei ojavy umi kuimbaʼe opensa ha ojapóva upéicha, ndorrespetái rupi umi kuñáme haʼekuéra omereseháicha, ha la ojapóva hikuái ndogustaiete voi Jehovápe (Efes. 5:25, 28). w21.02 3 párr. 6, 7

Oĩ jave peteĩ mbaʼe ñandepyʼapyetereíva ikatu ñañemboʼe Jehovápe, ha jajerure chupe ñane korasõite guive tañanepytyvõ. Jehová okontestáta ñane ñemboʼe ha omeʼẽta ñandéve pe “pyʼaguapy tuichavéva entéro mbaʼe yvyporakuéra ikatúvagui ontende” (Filip. 4:6, 7). Péicha Jehová ñanembopyʼaguapýta ijespíritu sánto rupive (Gál. 5:22). Ñañemboʼe jave Jehovápe, ñamombeʼupaitékena chupe mbaʼéichapa ñañeñandu. Ñamombeʼu chupe mbaʼépa la ñane provléma, ha mbaʼéichapa upéva ñanemoñeñandu. Ikatúramo oñesolusiona upe provléma, jajerure chupe tañanemoarandu jaikuaa hag̃ua mbaʼépa jajapo vaʼerã, ha tañanemombarete jajapo hag̃ua upéva. Péro ñande ndaikatúiramo ñasolusiona upe provléma, jajerure Jehovápe tañanepytyvõ ani hag̃ua ñañekevrantaiterei. Upévare, ñamombeʼúramo Jehovápe la jahasáva ha mbaʼépa ifálta ñandéve, upéi jahecha porãvétama mbaʼéichapa haʼe okontesta ñandéve ñane ñemboʼe. Péro aníkena ñañentrega noñekontestáiramo ñandéve ensegidaite pe ñane ñemboʼe. Jehová oipota ñamombeʼu chupe mbaʼetépa hína la ñane provléma ha mbaʼépa ñaikotevẽ, péro oipota avei jasegi ñañemboʼe chupe upévare (Luc. 11:8-10). w21.01 3 párr. 6, 7

Koʼág̃arupi kongregasiónpe oĩ heta omendáva ha avei oĩ umi orekóva mitã. Péro oĩ avei heta ermáno ha ermána nomendáiva. ¿Mbaʼéichapa jatrata vaʼerã chupekuéra? Ñande ningo jahecha vaʼerã chupekuéra Jesús ojapo haguéicha. Haʼe oĩrõ guare ko yvy ape ári nomendái vaʼekue, haʼe opytánte vaʼekue soltéro, oipurupaite itiémpo ha oñekonsentra iñasignasiónre. Jesús arakaʼeve nomboʼéi vaʼekue peteĩ kristiáno tekotevẽha omenda térã opyta soltéro, péro heʼi vaʼekue oĩtaha umi kristiáno odesidíva nomendamoʼãiha (Mat. 19:12). Jesús orrespeta vaʼekue umi nomendáivape. Haʼe nopensái umi soltéro menove iñimportanteha umi omendávagui, térã ofaltaha chupekuéra álgo hekovépe nomendái rupi. Jesús ojapo haguéicha, apóstol Pablo opyta vaʼekue avei soltéro oservi hag̃ua Jehovápe. Pablo arakaʼeve nomboʼéi vaʼekue oĩ vaiha peteĩ kristiáno omenda. Haʼe oikuaa vaʼekue káda uno odesidi vaʼerãha upéva. w20.08 28 párr. 7, 8

Apóstol Juan ningo oikove are vaʼekue ha ohasa heta mbaʼe ijojahaʼỹva. Ombohovái vaʼekue avei heta mbaʼe ijetuʼúva ikatúva omokangy ijerovia. Péro haʼe siémpre ojapo vaʼekue opa ikatúva okumpli hag̃ua Jesús mandamientokuéra, umíva apytépe ohayhu iñermáno ha iñermanakuérape. Upéicha rupi, Juan oikuaa porã vaʼekue ha oĩ segúro Jehová ha Jesús ohayhuha chupe, ha omombaretetaha chupe hikuái oaguanta hag̃ua oimehaichagua situasión ijetuʼúva (Juan 14:15-17; 15:9, 10). Satanás ha imúndo ndaikatúi vaʼekue ojapo mbaʼeve anivéma hag̃ua Juan ohayhu iñermáno ha iñermanakuérape, ni ohechauka upéva umi mbaʼe heʼíva ha ojapóva rupive. Oiko haguéicha Juánre, ñande jaiko avei peteĩ múndo oĩvape Satanás poguýpe, ha jaikuaaháicha haʼe ndohayhuiete voi avavépe (1 Juan 3:1, 10). Haʼe oñehaʼãmbaite hína ñandejoko anivéma hag̃ua jahayhu ñane ermáno ha ermanakuérape, péro haʼe ndaikatumoʼãi ojapo upéva ñande nañapermitíriramo chupe. Upévare, jajerresolvékena jahayhutaha ñane ermáno ha ermanakuérape, ha jahechaukataha upéva umi mbaʼe jaʼéva ha jajapóva rupive. Péicha igustoitereíta ñandéve ñaime Jehová famíliape ha añetehápe jaikóta vyʼápe (1 Juan 4:7). w21.01 13 párr. 18, 19

Ijetuʼu ningo jaiko ko múndo oĩvape Satanás poguýpe, ha sapyʼánte ndajaikuaái voi mbaʼépa jajapóta (2 Tim. 3:1). Péro natekotevẽi ningo jakyhyje ni jajepyʼapy. Jehová oikuaa umi mbaʼe ijetuʼúva jahasáva hína, ha jaʼa sapyʼáramo haʼe opromete oñakarama hatãtaha ñanderehe ipo derécha imbaretetévape (Is. 41:10, 13). Ñande ñaime segúro Jehová ñanepytyvõtaha, ha la Biblia ñanemombaretetaha ñaaguanta hag̃ua oimehaichagua provléma. Oĩ umi vidéo, umi lektúra bíblica dramatisáda, ha umi artíkulo oĩva ñande sítiope hérava “Jasegi umi ojeroviáva ehémplo”. Koʼã mbaʼe ningo ñanepytyvõ ñañeimahina porãve hag̃ua umi mbaʼe oñemombeʼúva la Bíbliape. Upévare jahecha, ñahendu, térã jalee mboyve koʼã rreláto, ñañemboʼékena Jehovápe tañanepytyvõ jatopa hag̃ua umi mbaʼe ikatúva ñamoĩ en práktika. Ñapensa ñande voi haʼeha pe persóna oñeñeʼẽha pe rrelátope. Jajepyʼamongeta umi mbaʼe ojapo vaʼekuére koʼã Jehová siervokuéra ifiélva, ha mbaʼéichapa haʼe oipytyvõ chupekuéra ombohovái hag̃ua iprovlemakuéra. Upéi ñamoĩ en práktika umi mbaʼe ñaaprendéva pe situasión jahasávape hína. Jaagradesékena Jehovápe siémpre ñanepytyvõ haguére, ha jahechauka jaagradeseha chupe jahekávo oportunida ñamokyreʼỹ ha jaapoja hag̃ua ótrope. w21.03 19 párr. 22, 23

Oiméramo ñande ñamendáma ha jarekose hína mitã, ikatu ñañeporandu: “¿Orépa oreumílde ha rohayhu Jehovápe ha Iñeʼẽ? ¿Oreporavónepa Jehová roñangareko hag̃ua peteĩ mitãraʼýre?” (Sal. 127:4). Ha oiméramo ñande ñanefamíliama, ikatu ñañeporandu: “¿Amboʼépa che famíliape iporãha ombaʼapo jejopy?” (Ecl. 3:12, 13). “¿Añehaʼãmbaitépa hína aprotehe hag̃ua che famíliape umi pelígrogui?” (Prov. 22:3). Péro ñande ningo ndaikatúi japrotehe ñane famíliape entéro umi provlémagui. Upéicharõ jepe, ikatu japrepara chupekuéra ombohovaikuaa hag̃ua umi provléma, ñamboʼévo kontinuadoite ha mborayhúpe mbaʼéichapa ikatu ojerovia hikuái umi konsého la Biblia omeʼẽvare (Prov. 2:1-6). Por ehémplo, peteĩ ñane pariénte ohejáramo Jehovápe, jaipuru vaʼerã la Biblia ñamboʼe hag̃ua ñane famíliape mbaʼérepa iñimportánte jasegi ñandefiél Jehovápe (Sal. 31:23). Térã omanóramo peteĩ jahayhúva, jahechaukákena ñane famíliape mbaʼéichapa ikatu oipuru Ñandejára Ñeʼẽ otopa hag̃ua konsuélo ha ipyʼaguapy hag̃ua (2 Cor. 1:3, 4; 2 Tim. 3:16). w20.10 27 párr. 7