Enero

Jesús pyʼaguasúpe okondena vaʼekue umi líder rrelihióso oiko vaʼekuépe itiémpope. Por ehémplo, ohechauka vaʼekue umi fariséo hovamokõiha, chupekuéra iñimportanteve rupi mbaʼéichapa ojepohéi vaʼerã ke la mbaʼéichapa oñangareko ituakuérare (Mat. 15:1-11). Haʼekuéra ipochýramo jepe Jesúsndi umi mbaʼe haʼe heʼi vaʼekuére, Jesús lomímonte osegi vaʼekue heʼi la verda. Haʼe ohechauka vaʼekue avei japuha heta mbaʼe omboʼéva hikuái. Haʼe ndeʼíri vaʼekue Ñandejára oaseptaha entéro umi mbaʼe oñemboʼéva umi rrelihiónpe. Upéva rangue, heʼi vaʼekue oĩtaha heta ohóva pe tape guasu oporoguerahávare ñehundípe, ha saʼimínte oĩtaha umi ohóva pe tape poʼi oporoguerahávare jeikove opaveʼỹvape (Mat. 7:13, 14). Haʼe omyesakã vaʼekue oĩtaha umi oadora guaʼúnteva Ñandejárape, péro añetehápe ndojapomoʼãiva upéva. Haʼe heʼi vaʼekue: “Peñangarekóke pendejehe, cháke oĩta proféta japu oúva pene rendápe ovecharamoguáicha, péro añetehápe haʼekuéra lóvo vareʼa hína. Hembiapokuére pepilláta chupekuéra” (Mat. 7:15-20). w21.05 9 párr. 7, 8

Ana omenda vaʼekue peteĩ levita héravare Elcaná, ha haʼe ohayhueterei vaʼekue Ánape. Péro Elcaná oreko avei ótro hembireko hérava Peniná. Elcaná ningo ohayhuve vaʼekue Ánape, upéicharõ jepe, “Peniná imemby vaʼekue, péro Ana naimembýi”. Upe haguére Peniná oñembohory hese “ombopochy hag̃ua” chupe. Ana oñeñandu vaieterei, “hasẽ ha ni ndokarusevéi”. Péro la Biblia nomombeʼúi ñandéve Ana oñehaʼã hague ojedeskita. Upéva rangue, haʼe omombeʼupaite Jehovápe mbaʼéichapa oñeñandu ha ojerovia haʼe oipytyvõtaha chupe (1 Sam. 1:2, 6, 7, 10). ¿Mbaʼépa ñaaprende Ana ehémplogui? Oĩramo okompetiséva ñanendive, ñanemanduʼa vaʼerã ñande ikatuha jadesidi mbaʼépa jajapóta. Natekotevẽi ningo ñañemoĩ ñakompeti hendive. Ha oĩramo ojapóva mbaʼe vai ñanderehe, ani jajapo hese la mísma kósa. Upéva rangue, ñañehaʼã jajogueraha porã hendive (Rom. 12:17-21). Pe ótra persóna nokambiáiramo jepe, ñande jasegíta ñandepyʼaguapy ha javyʼáta. w21.07 17 párr. 13, 14

Judas Iscariote itaryrýi rupi, otraisiona vaieterei vaʼekue Jesúspe. Péro ñepyrũrã haʼe ndahaʼéi vaʼekue peteĩ persóna iñañáva (Luc. 6:13, 16). Jesús okonfia vaʼekue hese, ha upévare oheja ikárgope pe káha orekohápe hikuái ipláta. Péro tiémpo rire, Judas oñepyrũma imonda, ohendúramo jepe heta vése Jesús oavisa hague umi héntepe ipeligrosoha itaryrýi (Mar. 7:22, 23; Luc. 11:39). Peteĩ mbaʼe oiko vaʼekue Jesús omano mboyvemi ohechauka Judas itaryrýima hague. Jesús ha idisipulokuéra, umíva apytépe María ha iñermána Marta, oĩ kuri de visíta Simón pe lepróso rógape. Ojekaru aja, María oho omoĩ Jesús akãre peteĩ aséite perfumádo hepyetereíva. Judas ha umi ótro disípulo ipochyeterei upévare. Umi ótro disípulo opensáne raʼe iporãvéta hague ojepuru pe pláta oñepytyvõ hag̃ua umi oikotevẽvape, péro Judas ótra kosaitére la ipochy. “Haʼéngo peteĩ mondaha”, ha omondase kuri pe pláta oĩva pe káhape (Juan 12:2-6; Mat. 26:6-16; Luc. 22:3-6). w21.06 18 párr. 12, 13

¿Ndépa sapyʼánte eñandu erekomaha hetaiterei rresponsavilida, ha ijetuʼuha ndéve ekumplipa hag̃ua umíva? Oiméramo upéicha, rentende porãitereíta apóstol Páblope. Haʼe ningo ojepyʼapy vaʼekue ndahaʼéi peteĩ kongregasiónrente, síno “entéro umi kongregasiónre” (2 Cor. 11:23-28). ¿Ndépa nderasykatu hína ha upéicha rupi reñedesanima ha nderevyʼavéi? Pablo ningo heta ohasa asy vaʼekue pórke oreko ‘peteĩ ñuatĩ oikutúva chupe hetépe’. Oime vaʼerãngo upéva peteĩ mbaʼasy rakaʼe, ha haʼe okuerase asy vaʼekue chugui (2 Cor. 12:7-10). ¿Ndépa sapyʼánte reñedesanima neimperfékto rupi? Páblore sapyʼánte oiko vaʼekue upéva, ha heʼi vaʼekue voi ijehe: “¡Ivaietépa ko che situasión!”, pórke kontinuadoite oñehaʼã vaʼerã kuri ojapo hag̃ua iporãva (Rom. 7:21-24). Pablo ombohováiramo jepe entéro koʼã mbaʼe ijetuʼuetéva, haʼe osegi vaʼekue oservi Jehovápe. Haʼe oikuaa porãitereíramo jepe umi idefektokuéra, ojerovia vaʼekue ipyʼaite guive pe rreskátere. w21.04 21, 22 párr. 7, 8

Adán haʼérõ guare peteĩ kuimbaʼe perfékto, opeka ha operde vaʼekue pe oportunida oikovévo pára siémpre. Péro ndahaʼéi haʼe añónte, síno enterove ifamiliare operde avei upe oportunida. Ndaipóri exkúsa la Adán ojapo vaʼekuépe g̃uarã. Haʼe ijehegui voi odesidi opekataha ha upévare omerese voi omano. ¿Péro mbaʼépa ikatu jaʼe ifamiliare rehe? Haʼekuéra ningo ndorekói la kúlpa upe Adán ojapo vaʼekuére (Rom. 5:12, 14). ¿Ikatúpa raʼe Jehová ojapo álgo oipytyvõ hag̃ua chupekuéra oikove hag̃ua pára siémpre? ¡Si ikatu! Adán opeka riremi, Jehová oñepyrũ mbeguekatúpe oikuaauka mbaʼéichapa orreskatáta hetaiterei Adán familiarépe pekádo ha ñemanógui (Gén. 3:15). Pe rreskáte rupive ningo ikatu ojehupyty heta mbaʼe: 1) Jareko peteĩ amista iporãva Jehovándi ñaneimperféktoramo jepe. 2) Oñehundipaitéta pe Diablo rembiapokue (1 Juan 3:8). Ha 3) ikatúta oñekumpli la Jehová oipota vaʼekue ko yvýpe g̃uarã. Ko yvy kompletoitégui oikóta peteĩ paraíso. w21.04 14 párr. 1; 19 párr. 17

Hetaiterei kuimbaʼe ha kuña oviaha vaʼekue Jerusalénpe. Haʼekuéra oho upépe heta paísgui ha oñeʼẽ diferénte idióma. Upe díape oiko peteĩ mbaʼe ijojahaʼỹva: Derrepentete, unos kuánto judío oñepyrũ oñeʼẽ umi hénte diferénte paisgua idiómape. Upéva osorprendeterei umi héntepe, péro osorprendeve chupekuéra umi mbaʼe heʼíva umi judío ha avei apóstol Pedro. Umi hénte ohendu haʼekuéra ikatuha ojesalva ohechaukáramo ojeroviaha Jesucrístore. Upe ohendúva ningo opokoiterei hesekuéra, upévare oporandu hikuái: “¿Mbaʼe piko rojapo vaʼerã?”. Ha Pedro heʼi chupekuéra: “Pejevautisa káda uno” (Hech. 2:37, 38). Tuichaitereive mbaʼéntema la oiko vaʼekue upe rire. Amo 3.000 persónarupi ojevautisa upe díape ha oiko chuguikuéra Cristo disípulo. Upérõ oñepyrũ vaʼekue pe traváho tuichaite Jesús omanda vaʼekue isegidorkuérape ojapo hag̃ua: Oipytyvõ la héntepe oiko hag̃ua chuguikuéra idisípulo. Upe tembiapo ningo koʼag̃aite peve osegi. w21.06 2 párr. 1, 2

Ikatu oime japredika hína peteĩ território ijetuʼuhápe ñamoñepyrũ estúdio bíblico. Oĩ umi ndoikuaaséiva mbaʼeve pe mensáhe jaguerahávagui, térã oñemoĩ voi ñane kóntrape. ¿Mbaʼépa ñanepytyvõta jasegi hag̃ua ñandepositívo peichagua territóriope? Ñanemanduʼa vaʼerã umi hénte situasión ikatuha pyaʼe okambia. Ha umi anteve nohenduséi vaʼekue, ikatu upéi ohechakuaa oikotevẽha Ñandejárare (Mat. 5:3). Algúno ymave ndojagarraséi vaʼekue ñandehegui umi puvlikasión, péro upéi oasepta peteĩ estúdio bíblico. Ñande jaikuaa avei Jehová haʼeha pe kokue Jára (Mat. 9:38). Haʼe oipota ñande jasegi ñañotỹ ha jarrega pe semílla, péro haʼe hína pe oñenkargáva omongakuaa hag̃ua upéva. Ha ndaikatúiramo jepe koʼag̃aite jajapo peteĩ estúdio bíblico, aníkena ñanderesarái: Jehová ñanevendesi umi esfuérso jajapóvare ha ndahaʼéi umi mbaʼe jahupytývare. w21.07 6 párr. 14

Jehová omeʼẽ ñandéve pe kapasida ifamília hag̃ua, ha avei pe rresponsavilida ñamboʼévo ñane famíliape ohayhu ha oservi hag̃ua chupe. Jehová ningo omeʼẽ vaʼekue umi ánhelpe heta avilida ndaijojaháiva, péro nomeʼẽi chupekuéra pe kapasida ifamília hag̃ua. Orekóvo upéva enkuénta, tuakuéra omombaʼe vaʼerã pe priviléhio porãite orekóva omongakuaa hag̃ua ifamiliakuérape. Chupekuéra ningo oñemeʼẽ vaʼekue tuichaiterei rresponsavilida: Oipytyvõ ifamíliape, ha ‘okorrehi ha oñemoñeʼẽ chupekuéra Jehová heʼiháicha’ (Efes. 6:4; Deut. 6:5-7). Ñandejára organisasión oipytyvõ umi tuakuérape omeʼẽvo hetaiterei informasión bíblica. Por ehémplo, lívro, rrevísta, vidéo, músika ha umi artíkulo osẽva ñane páhina de Internétpe. Upéva ohechauka porã mbaʼeichaitépa Jehová ha Jesús ohayhu umi mitã mimíme (Luc. 18:15-17). Jehová ningo ovyʼaiterei umi tuakuéra ojerovia jave hese, ha ojapo opa ikatúva oñangareko porã hag̃ua ifamiliakuérare. Péicha haʼekuéra oipytyvõ hína umi mitãme oĩ hag̃ua Jehová famíliape pára siémpre. w21.08 5 párr. 9

Oĩ umi opensáva jajerovia heʼiseha jakreeha peteĩ mbaʼe jarekoʼỹre pruéva. Péro la Biblia heʼi upéva ndahaʼeiha jerovia. Jaikuaa porã hag̃ua siertoha peteĩ mbaʼe jarekómante vaʼerã pruéva. Upéicha rupi, ndajahecháiramo jepe Jehovápe, Jesúspe ha pe Rréino, ñande jaikuaa porã umíva oexistiha jareko rupi heta pruéva (Heb. 11:3). Peteĩ ermáno haʼéva viokímiko heʼi: “Ñande testígo de Jehová ndahaʼéi jajerovia reínteva, síno jareko umi pruéva sientífika ohechaukáva siertoha umi mbaʼe jagueroviáva”. ¿Mbaʼérepa upéicharõ hetaite hénte ndogueroviái Ñandejára ojapo hague opa mbaʼe? Pórke oĩ umi núnka ndostudiái vaʼekue umi pruéva. Por ehémplo Robert, koʼág̃a haʼémava testígo de Jehová, heʼi: “Eskuélape núnka noñeñeʼẽi vaʼekue oréve pe kreasiónre, upévare che apensa vaʼekue oiméne hag̃ua ndasiértoi. Upéi arekórõ guare 22 áño aaprende la Biblia omeʼẽha heta pruéva ohechaukáva oĩha peteĩ Apohare”. w21.08 15 párr. 4, 5

Ñande ikatu jaikuaa Jehová ivuenoha jaleéramo la Biblia, ha ñahendúramo umi ótrope omombeʼuha umi mbaʼe porã Jehová ojapo vaʼekue hesehapekuéra. Péro ñande ikatúta ñantende porãve mbaʼeichaitépa Jehová ivuéno, ñandete voi ‘ñatantea ha jahecháramo haʼe ivuenoha’ ñanendive. Por ehémplo, ñamoĩ chupe jaserviseha Jehovápe de tiémpo kompléto. Péro upearã tekotevẽta ñamosensillove ñande rekove. Ñande jaikuaa Jesús opromete hague ñamotenondéramo Ñandejára Rréino, Jehová omeʼẽtaha ñandéve umi mbaʼe ñaikotevẽva. Péro ñande núnka ndajahecháiva gueteri Jehová ojapoha upéva ñanderehehápe (Mat. 6:33). Upéicharõ jepe, jajerovia rupi Jesús promésare, ñañehaʼã saʼive jagasta, saʼive ñambaʼapo, ha ñañepyrũ ñamotenondeve pe predikasión. Jajapóvo upéva, ñandete voi jahechakuaa Jehová añetehápe okuidaha ñanderehe ha nombofaltaiha ñandéve mbaʼeve. Péicha ñandete ‘ñatantea’ Jehová ivuenoha. w21.08 26 párr. 2

¿Oikópa avei upéva ñane tiémpope? Si. Heta líder rrelihióso pyaʼe voi oasepta irrelihiónpe umi hénte iñimportántevape, ipláta hetáva ha iñarandúvape ko múndope g̃uarã. Haʼekuéra oasepta koʼãichagua persónape ojapóramo jepe hikuái umi mbaʼe ombojeguarúva Jehovápe. Péro koʼã líder rrelihióso oapoʼi Jehová siervokuéra ikyreʼỹetéva ha hekopotĩvape, pórke ko múndope g̃uarã haʼekuéra naiñimportántei. Pablo heʼi haguéicha, Ñandejára oiporavo vaʼekue umi ‘ojedespresiávape’ (1 Cor. 1:26-29). Péro Jehovápe g̃uarã enterove isiervokuéra ifiélva ivaliosoiterei. (Mat. 11:25, 26). Upévare ndajahejái vaʼerã ñandeafekta ko múndo opensa lája Ñandejára siervokuérare. Jaasepta vaʼerã Jehová ojevaleha umi iñumíldevare añoite okumpli hag̃ua ivolunta (Sal. 138:6). Avei jajepyʼamongeta vaʼerã entéro umi mbaʼe Jehová ohupytýmavare ojevalévo umi persóna ko múndope g̃uarã ndaikatupyrýiva ni naiñarandúivare. w21.05 8 párr. 1; 9 párr. 5, 6

Apóstol Pablo oagradese vaʼekue umi ermánope oipytyvõ haguére chupe. Haʼe iñumílde ha oasepta pe ajúda oñemeʼẽva chupe (Filip. 2:19-22). Peẽ ermanokuéra ijedáva ikatu pehechauka heta hendáicha peagradeseha oĩ haguére kongregasiónpe umi imitãva. Por ehémplo, oĩ jave ojeofreséva pendegueraha hag̃ua Salónpe, ombaʼejogua hag̃ua peẽme, térã ojapo hag̃ua oimeraẽ mbaʼe peikotevẽva, peagradesékena ha peasepta pe ajúda oñemeʼẽséva peẽme. Penemanduʼákena upéicha Jehová ohechaukaha hína peẽme penderayhuha, ha ikatu voi pekonsegi pene amigorã. Siémprekena peñehaʼã peipytyvõ umi pene amígo imitãvape oñemoag̃uive hag̃ua Jehováre, ha peje chupekuéra mbaʼeichaitépa pevyʼa pehechávo umi imitãva ojapoha hetave mbaʼe kongregasiónpe. Pehasákena tiémpo hendivekuéra ha pekasea chupekuéra umi mbaʼe pehasa vaʼekue. Upéicha ‘pehechaukáta peagradeseha’ Jehovápe omoag̃ui haguére umi imitãvape kongregasiónpe (Col. 3:15; Juan 6:44; 1 Tes. 5:18). w21.09 11, 12 párr. 12, 13

Jehová ohayhu ñane ermáno ha ermanakuérape. Péro sapyʼánte ikatu ijetuʼu ñandéve jahayhu térã jahechauka upéva chupekuéra. Upéva ningo upéichatante voi pórke idiferénte hína la ñande kultúra ha mbaʼéichapa ñañemongakuaa vaʼekue. Avei enterovéva jafalla jepi ha ikatu ñambopochy ótrope. Péro káda uno ñañehaʼãmbaite vaʼerã amás día jahayhuve hag̃ua ñane ermanokuérape. ¿Mbaʼéichapa ikatu jajapo upéva? Jasegívo Jehová ehémplo (Efes. 5:1, 2; 1 Juan 4:19). Peteĩ persóna oiporiahuverekóva ótrope oñehaʼã oipytyvõ ha okonsola chupe. Jesús ningo otrata lájare umi héntepe, ohechauka vaʼekue osegiha Itúa ehémplo ha ojepyʼapy hesekuéra (Juan 5:19). Por ehémplo, Jesús ohechárõ guare umi hénte atýpe, “ombyasyeterei chupekuéra, pórke ohecha mbaʼéichapa oñemaltrata umi héntepe ha isarambipaha hikuái. Umi hénte ojogua umi ovecha ndorekóivape pastór” (Mat. 9:36). Péro Jesús ndahaʼéi oiporiahuverekónteva umi héntepe, síno oipytyvõ voi chupekuéra. Haʼe omonguera umi hasývape, ha ombopiroʼy umi ‘ikaneʼõ ha ikárga pohýivape’ (Mat. 11:28-30; 14:14). w21.09 22 párr. 10, 11

Jehová ñandeporiahuvereko ñanderayhu rupi. Apóstol Pablo oskrivi vaʼekue Ñandejára “ñandeporiahuverekoitereiha”. Koʼápe Pablo heʼi Ñandejára ohechaukaha ko kualida pórke omeʼẽ isiervokuéra imperféktope pe esperánsa oikovévo yvágape (Efes. 2:4-7). Péro Jehová ndahaʼéi oiporiahuverekóva umi unhídopente. Rréi David heʼi vaʼekue: “Jehová, nde ningo nevuenoiterei enterovéndi, siémpre oreporiahuvereko, upéva ojekuaa opa mbaʼe rejapóvape” (Sal. 145:9). Jehová ñanderayhu enterovépe, upévare siémpre ñandeporiahuvereko ijáma guive chupe. Jesús oikuaa porãiterei mbaʼeichaitépa Jehová ñandeporiahuvereko ñanderayhu rupi. Ndaipóri voi ótro haʼéicha oikuaa porãve vaʼerã Jehovápe, pórke ou mboyve ko yvy ape ári, haʼekuéra oĩ vaʼekue oñondive yvágape hetaiterei áñore (Prov. 8:30, 31). Hetaiterei vése Jesús ohecha vaʼekue mbaʼéichapa Itúa oiporiahuvereko umi persóna imperféktape (Sal. 78:37-42). Ha Jesús oporomboʼe jave, pyʼỹinte oñeʼẽ vaʼekue ko kualida porãite Itúa orekóvare. w21.10 8, 9 párr. 4, 5

Jehová voi okontesta vaʼekue upe ñemboʼe ha hatã heʼi yvága guive ombotuichataha héra. Jesús opredikárõ guare ko yvy ape ári siémpre ombotuicha vaʼekue Itúa réra (Juan 17:26). Upévare ikatu jaʼe umi kristiáno verdadérope g̃uarã haʼeha peteĩ priviléhio oipuru Jehová réra ha oikuaauka upéva ótrope. Síglo primérope, oñepyrũ riremínte pe kongregasión kristiána, Jehová ‘imanduʼa umi hénte ótro tetãyguáre, ha ijapyteguikuéra haʼe oñepyrũ oiporavo peteĩ puévlo ogueraha vaʼerã héra’ (Hech. 15:14). Koʼã kristiáno ovyʼaiterei vaʼekue oipuru haguére Ñandejára réra, ha oikuaauka haguére upéva ótrope. Haʼekuéra ningo pyʼỹinte voi oipuru vaʼekue Ñandejára réra, tahaʼe opredika jave térã oskrivi jave umi lívro oĩva la Bíbliape. Péicha ohechauka hikuái haʼekuéra añoite haʼeha pe puévlo oikuaaukáva Jehová réra (Hech. 2:14, 21). Upéicha avei koʼág̃arupi umi testígo de Jehová haʼe pe puévlo ogueraháva Jehová réra. w21.10 20, 21 párr. 8-10

Ñandejára siémpre ohechaukáta mborayhu ifiélva. Ko fráse ikatu jatopa 26 vése Salmo 136-pe. Pe primer versíkulo heʼi: “Peagradese Jehovápe pórke haʼe ivuenoiterei. Haʼe siémpre ohechaukáta mborayhu ifiélva” (Sal. 136:1, nóta). Káda versíkulope, versíkulo 2 guive 26 peve, jatopa heʼiha: “Haʼe siémpre ohechaukáta mborayhu ifiélva”. Amedída ke jalee ko salmo, jahecharamoiterei mbaʼéichapa heta hendáicha Jehová siémpre ohechauka pe mborayhu ifiélva. Pe fráse “Haʼe siémpre ohechaukáta mborayhu ifiélva”, ohechauka ñandéve la Jehová oñandúva ñanderehe núnka nokambiamoʼãiha. Haʼe ningo siémpre oĩta ñande ykére ñande jaservi rupi chupe, ha ni mbaʼevéicharõ nañanderejamoʼãi ñaneaño jahasa asy jave. Upéva ñanembovyʼa ha ñanemombarete ikatu hag̃uáicha jagueropuʼaka umi mbaʼe vai jahasáva, ha jasegi hag̃ua jaservi chupe (Sal. 31:7). w21.11 4 párr. 9, 10

Koʼẽrõitéma ningo oñehundíta umi rrelihión japu, oñemoĩta ñanderehe Gog de Magog ha oñepyrũta pe gérra de Armagedón. ¿Ejepyʼapýpa repensávo koʼã mbaʼére? Ikatu oime eñeporandu: “Oiko vove koʼã mbaʼe, ¿ikatútapa aaguanta ha chefiél Jehovápe?”. Oiméramo epensa koʼã mbaʼére tuichaiterei nepytyvõta la Jesús heʼi vaʼekue pe téxto koestediaguápe: “Ani pejepyʼapyeterei, pehechauka pejeroviaha”. Jajerovia mbaretéramo, ñandepyʼaguasúta ñambohovái hag̃ua umi mbaʼe oikótava hína. ¿Mbaʼéichapa ikatu ñamombarete ñande jerovia? Ñapensakuaa mbaʼe mbaʼépepa ñanekangy ha mbaʼépepa ikatu ñamehorave. Káda pruéva jahasáva ningo ñanemombareteve, ha upéva ñanepytyvõta hína ñaaguanta hag̃ua umi mbaʼe oútava. w21.11 20 párr. 1, 2

Apóstol Pablo omokyreʼỹ vaʼekue Timotéope ha enterove kristiánope ojapo porã hag̃ua hembiapo Ñandejára servísiope (2 Tim. 4:5). Péro upéva sapyʼánte ndahaʼéi la ifasilpáva, por ehémplo umi ñane ermanokuéra oĩvape g̃uarã umi lugár ojeproivihápe ñane rembiapo. Jehová siervokuéra ningo ombohovái opaichagua provléma ikatúva odesanima chupekuéra. Por ehémplo, oĩ ombaʼapóva heta óra ikatu hag̃uáicha omantene ifamíliape. Chupekuéra hiʼãiterei ohasa hetave tiémpo predikasiónpe, péro ikaneʼõitereíma hikuái og̃uahẽvo pe fin de semána. Oĩ avei umi saʼieterei ikatúva ojapo Jehová servísiope hasykatu térã ijedáma rupi. Oĩ avei umi ndaikatuietéva voi osẽ hógagui, ha ótro katu oñandu ndovaleiha mbaʼeverã. Tahaʼe haʼéva umi provléma jarekóva, Jehová ikatu ñanemombarete jasegi hag̃ua jaservi chupe ñande posivilida omeʼẽha peve. w21.05 20 párr. 1-3

Sapyʼánte ótro ikatu ñanemboliga jajapo hag̃ua peteĩ mbaʼe ndogustáiva Jehovápe. Oiko jave upéva, jadesidímante vaʼerã mávapepa ñandefiélta. Ñapensamína mbaʼépa ikatu ñaaprende Levítico 19:19-gui, heʼíva en párte: “Neremondéi vaʼerã peteĩ ao ojejapo vaʼekue 2 kláse ílogui”. Ko mandáto oipytyvõ vaʼekue umi israelítape idiferénte hag̃ua umi ótra nasióngui. Ñande ningo natekotevẽvéima ñakumpli ko léi ni jaelehi umi ao ojejapo vaʼekue peteĩ télaguinte ñanediferénte hag̃ua umi ótrogui. ¿Péro mbaʼépepa si ñanediferénte vaʼerã? Umi mbaʼe jadesidívape ha jajapóvape, pórke ñande ñanediferentese umi ndojapóivagui la Biblia heʼíva. Jahayhúngo añete la ñane hénte ha ñande rapichakuérape, péro jadesidíta jave peteĩ mbaʼe siémpre ñamotenondéta Jehovápe. Upéva iñimportánte hína, pórke upéicharõmante Jehová heʼíta ñanderehe ñanesantoha entéro mbaʼépe (2 Cor. 6:14-16; 1 Ped. 4:3, 4). w21.12 5 párr. 14; 6 párr. 16

¡Umi hénte ikatu otopa pe tape oporogueraháva jeikove opaveʼỹvape! Jesús heʼi vaʼekue voi: “Peẽ pesegíramo pejapo che haʼéva, peẽ añetehápe che disípulo hína. Peẽ peikuaáta pe añetegua ha upéva omeʼẽta peẽme liverta” (Juan 8:31, 32). Nde ningo reñehaʼãmbaite reikuaa hag̃ua la verda ha nderejesegíri la hénte heʼívarente, upévare emerese ejefelisita. Katuete oiméne hetaitereíma restudia Ñandejára Ñeʼẽ ha eaprendéma heta mbaʼe chugui. Ha katuete avei rejapo umi mbaʼe Jesús omboʼe vaʼekue. Por ehémplo Jehová oipota ñamboykete umi enseñánsa omboʼéva umi rrelihión japu ha ndoipotái japartisipa umi fiésta oúvape koʼã rrelihióngui. Oiméne rehechakuaa ndahaʼeiha la ifasilpáva jajapo hag̃ua entéro koʼã mbaʼe Jehová ojeruréva ñandéve (Mat. 10:34-36). Péro nde eñehaʼãmbaite hína ehayhúgui chupe, ha katuete haʼe ovyʼaiterei ndereheve (Prov. 27:11). w21.12 22 párr. 3; 23 párr. 5

Moisés oheja vaʼekue ñandéve peteĩ ehémplo iporãitereíva, pórke peteĩ vuéltape tekotevẽ kuri ojekorrehi chupe ojavy rupi. Upérõ guare ningo Moisés ipochyeterei vaʼekue ha nomombaʼeguasúi Jehovápe, ha upévare haʼe heʼi chupe ndoikemoʼãiha pe Tiérra Prometídape (Núm. 20:1-13). Moiséspe ndogustái kuri la Jehová odesidi vaʼekue, ha upévare oporandu chupe ndaikatuichénepa okambia upéva. Péro Jehová orresponde Moiséspe: “Anivetéke reñeʼẽ chéve ko mbaʼére” (Deut. 3:23-27). ¿Oñamargápa raʼe Moisés la oiko vaʼekuére? Nahániri. Haʼe oasepta la Jehová heʼíva chupe ha upévare haʼe osegi ojevale hese omoakã hag̃ua Israel (Deut. 4:1). Iporãitereíta ningo ñande ñañehaʼãmbaitéramo jasegi Moisés ehémplo. Haʼe oasepta la Jehová odesidíva ha osegi ifiél operdéramo jepe peteĩ priviléhio haʼe omombaʼetereíva. Jasegíramo koʼãichagua ehémplo, jahupytýta hetaiterei mbaʼe porã (Prov. 4:11-13). Ha heta ermáno ha ermanakuéra oĩva ko múndo tuichakuére ojapóma voi hína upéva. w22.02 11 párr. 9, 10

Áño 32-pe d.C., hústo inviérno jave, Lázaro ou hasy ha omano (Juan 11:3, 14). Lázaro oreko vaʼekue mokõi ermána, María ha Marta, ha Jesús ohayhueterei vaʼekue lotrevévape. Marta oikuaárõ guare Jesús ouha hína, pyaʼe porã oho ohug̃uaitĩ chupe ha heʼi Jesúspe: “Che Ruvicha, reimérire koʼápe, che ermáno nomanomoʼãi kuri” (Juan 11:21, 32, 33). Katuete oiméne Jesús hasẽ raʼe ohechávo mbaʼeichaitépa oheja vai María ha Mártape la oiko vaʼekue. Oimérõ omanóma raʼe ndehegui peteĩ ne amigoite térã ne hénte, Jehová ontende mbaʼéichapa reñeñandu. Jesús ningo ‘Jehová joguahaite’ (Heb. 1:3). Upévare Jesús hasẽrõ guare, ohechauka hína kuri mbaʼéichapa Jehová voi oñeñandu (Juan 14:9). Oimérõ omano raʼe ndehegui peteĩ rehayhúva ha reñeñandu vaieterei, nemanduʼákena Jehová oikuaaha hína la rehasáva ha nembyasyetereiha. Ha ndahaʼéi voi upévante, haʼe ojapose la ikatúva guive reime porã jey hag̃ua (Sal. 34:18; 147:3). w22.01 15 párr. 5, 7

Emboykéramo tiémpo eñeʼẽ hag̃ua Jehovándi, ehendu hag̃ua chupe ha repensa hag̃ua hese, nerembyasymoʼãi ni michĩmi. Primeroite voi, pórke upéva nepytyvõta redesidi porãve hag̃ua. La Biblia heʼi ‘pe oiko meméva umi iñarandúvandi iñarandutaha avei’ (Prov. 13:20). Segundo, ndevalevéta reporomboʼe hag̃ua. Jastudia jave la Biblia peteĩ persónandi ñaipytyvõseterei chupe oñemoag̃ui hag̃ua Jehováre. Péro upearã ñande voi ñañemongeta pyʼỹi vaʼerã Jehovándi, péicha jahayhuvéta chupe. Ha jahayhúramo Jehovápe, jaikuaáta mbaʼéichapa ñaipytyvõta ñane estudiántepe ohayhu hag̃ua avei chupe. Jesús peichaite ojapo vaʼekue, haʼe oñeʼẽrõ guare Itúare ojekuaa porã vaʼekue hese ohayhuetereiha chupe, ha upéva oipytyvõ vaʼekue idisipulokuérape ohayhu hag̃ua avei Jehovápe (Juan 17:25, 26). Tercero, rejeroviavéta Jehováre. Ijetuʼu jave ñanendive jajerure jepi Jehovápe tañandegiami, tañanepytyvõ ha tañanekonsola. Ha káda ke jahecha haʼe orrespondeha ñandéve ñane ñemboʼe jajeroviave hese (1 Juan 5:15). w22.01 30 párr. 15-17

Jehová ningo ñanderayhueterei ha oipota javyʼa, upéicha rupínte heʼi ñandéve jaipeʼaite hag̃ua ñandejehegui umi pensamiénto vai ha umi vísio (Is. 48:17, 18). Haʼe oikuaa porã umi persóna ohejáva odomina chupe umi deséo vai, ojeperhudikaha ijupe voi ha avei hapichakuérape. Ha Jehová ombyasyeterei ohechávo oĩha persóna ojapóva péicha ijehe voi ha avei ótrore. Ikatu oime primerorã ñane amígo ha ñane hentekuéra jepe oñembohory ñanderehe ñañehaʼã rupi ñakambia (1 Ped. 4:3, 4). Por ehémplo ikatu heʼi ñandéve ñande jarekoha derécho jajapo hag̃ua jajaposéva, ha ndajahejái vaʼerãha avave omanda ñandéve upéva. ¿Péro serápa siérto umi hénte ojapoha la chupekuéra ogustávante? Nahániri, pórke en rrealida haʼekuéra oheja hína Satanás múndo oreko chupekuéra ipoguýpe ha ojapoka chupekuéra haʼe oipotáva (Rom. 12:1, 2). Upévare káda uno jadesidi vaʼerãha mbaʼépa jajapóta: 1) Ikatu ñamantene pe ñane kondúkta yma guare ha jasegi japeka ha japyta Satanás múndope, o 2) jaheja Jehová tañanepytyvõ ñakambia hag̃ua ha toiko ñandehegui koʼág̃ama voi peteĩ mehór persóna (Is. 64:8). w22.03 3 párr. 6, 7

Jajepyʼamongetáramo Ñandejára Ñeʼẽre, ñanepytyvõta jahecha hag̃ua hendápe porã ñane provlemakuéra. Jahechami mbaʼéichapa la Biblia oipytyvõ peteĩ ermánape. Haʼe ningo oñeñandu vaieterei iména omano haguére. Upévare peteĩ ansiáno oakonseha chupe olee hag̃ua pe lívro de Job, pórke oaprendéta chugui hetaiterei mbaʼe iñimportánteva. Haʼe ojapórõ guare upéva, ensegída oñepyrũ okritika Jóbpe opensa vai haguére. Iñakãme haʼe heʼi: “¡Job, anivéna epensa ne provlémarente!”. Péro upéi pe ermána ohechakuaa opensa hague oikóvo Job opensa hagueichaite avei. Upéva oipytyvõ chupe anivéma hag̃ua opensaiterei iprovlemakuérarente, síno opensave hag̃ua Jehováre ha pe esperánsa haʼe omeʼẽvare, ha upéva oipytyvõ chupe ogueropuʼaka hag̃ua imbaʼembyasy. Jehová ningo ojevale avei ñane ermanokuérare ñanemombarete hag̃ua. Pablo oskrivi vaʼekue hiʼãiterei hague chupe ohecha iñermanokuérape ‘ikatu hag̃uáicha káda uno oñomokyreʼỹ’ (Rom. 1:11, 12). w21.05 22 párr. 10, 11; 24 párr. 12

Yma ningo umi israelítape ojeʼe vaʼekue: “Tres vése káda áño enterove kuimbaʼe oho vaʼerã Jehová pende Jára renondépe, pe lugár Jehová oiporavohápe” (Deut. 16:16). Umi israelita ningo oheja vaʼerã kuri hóga ha ikokue, ha avave ndopytamoʼãi kuri oñangareko hese. Péro Jehová opromete vaʼekue chupekuéra: “Peẽ peho aja peñepresenta Jehová renondépe 3 vése káda áño, avave ndojagarramoʼãi pendehegui pende yvy” (Éx. 34:24). Umi israelita ningo ojerovia vaʼekue Jehováre ipyʼaite guive, ha upéicha rupi osẽ oho hikuái umi fiésta ojejapóvape káda áño. ¿Ha mbaʼépa la ohupytýva hikuái ojapo haguére upéicha? Tuicha oñevendesi chupekuéra, ontende porãve Ñandejára léi, ojepyʼamongeta hikuái umi mbaʼe porã Jehová ojapo vaʼekuére hesehapekuéra, ha avei ovyʼa hikuái umi ótro hapicha oadorávandi Jehovápe. Ñande avei ñañevenefisia umi israelítaicha jajesakrifika jave ñaime hag̃ua rreunionhápe. Ha ñapensamíntena mbaʼeichaitépa oiméne Jehová oguerohory ohecha jave jajepreparaha rreunionrã, ha ñameʼẽha umi komentário mbyky ha ideprovechoitereíva. w22.03 21 párr. 9

Jehová ombokatupyry kuri Itaʼýrape oservi hag̃ua ñane Súmo Saserdóteramo. Jesús ohechakuaa mbaʼeichaitépa ijetuʼu ñaneñeʼẽrendu Ñandejárape ñaime jave peteĩ situasión ivaietereívape. Ijetuʼueterei rupi chupe umi mbaʼe ohasáva, haʼe oñemboʼérõ guare ‘hatã osapukái ha hasẽ’. Añetehápe Jesús oñekevrantaiterei kuri. Ha ohasa rupi entéro koʼã mbaʼe, haʼe oikuaa umi mbaʼe ñaikotevẽva ha ikatu ‘ontende mbaʼéichapa ñañeñandu jahasa asy jave ha ikatu ñanepytyvõ’. Ñande ningo jaagradeseterei Jehovápe onombra haguére peteĩ Súmo Saserdóte ñandeporiahuvereko ha “ikatúva ñanentende ñanekangy jave” (Heb. 2:17; 4:14-16; 5:7-10). Jehová oheja kuri Jesús ohasa asyeterei ikatu hag̃uáicha oñembohovái ko pregúnta iñimportantetéva: ¿Ikatúpa umi yvypóra osegi ifiél Jehovápe ohasáramo jepe umi pruéva ijetuʼuetereíva? Satanás heʼi ndaikatumoʼãiha. Haʼe heʼi ñande yvyporakuéra jaserviha Ñandejárape ñaneinteresádogui reínte, térã jaipotágui haʼe omeʼẽ ñandéve álgo. Haʼe oimoʼã ñande ndajahayhuiha Jehovápe (Job 1:9-11; 2:4, 5). Péro Jesús osegi vaʼekue ifiél Jehovápe ha péicha ohechauka Satanás ijapuha. w21.04 17 párr. 7, 8

Pe estudiánte ojevautisa mboyve ojapo vaʼerã umi mbaʼe la Biblia omboʼéva. Pe estudiánte ojapo jave umi mbaʼe oaprendéva, ojogua pe “kuimbaʼe iñarandúvape” Jesús oñeʼẽ vaʼekuére iñehémplope. Haʼe heʼi vaʼekue hese ojoʼo pypuku hague omoĩ hag̃ua hóga simiénto pe ita ári (Mat. 7:24, 25; Luc. 6:47, 48). Ñaipytyvõ ñane estudiántepe ojapo hag̃ua umi kámbio hekovépe (Mar. 10:17-22). Jesús oikuaa vaʼekue pe kuimbaʼe irríkova hakateʼỹha ikosakuérare, upévare ijetuʼutaha chupe ovendepa hag̃ua umíva. Péro Jesús lomímonte heʼi vaʼekue chupe ojapo hag̃ua upe kámbio tuichaitéva (Mar. 10:23). ¿Mbaʼérepa haʼe ojapo upéva? Ohayhúgui chupe. Ñande ningo sapyʼánte nañañanimái jaʼe ñane estudiántepe ojapo hag̃ua upe oaprendéva, ñaimoʼãgui haʼe ndaikatumoʼãiha gueteri ojapo upe kámbio (Col. 3:9, 10). Péro amáske pyaʼe jaʼe chupe mbaʼépepa tekotevẽ okambia, pyaʼevéntema pe estudiánte oñepyrũta okambia. Ñañemongetáramo hendive péicha, jahechaukáta hína jahayhuha chupe (Sal. 141:5; Prov. 27:17). w21.06 2 párr. 3; 3 párr. 5

Apóstol Pedro oñeʼẽ hína pe ehémplo porãite Jesús oheja vaʼekuére, pórke oaguanta vaʼekue heta mbaʼe ijetuʼúva. Péro ñande ikatu avei jasegi Jesús ehémplo hetave hendáicha (1 Ped. 2:18-25). Añetehápe, Jesús rekove kompletoite, entéro mbaʼe haʼe heʼi ha ojapo vaʼekue, haʼe peteĩ ehémplo ñandéve g̃uarã. ¿Péro ikatu piko jasegi porã Jesús ehémplo ñaneimperféktoramo jepe? Si ikatu. Jaikuaa ningo ndaikatumoʼãiha jasegi Jesús ehémplo perféktamente. Péro jajapóramo opa ikatúva jasegi porã hag̃ua hapykuere, ñakumplíta hína apóstol Juan heʼi vaʼekue: ‘Jasegíta jaiko Jesús oiko haguéicha’ (1 Juan 2:6). Jasegíramo Jesús pypore ñañemoag̃uivéta Jehováre. ¿Mbaʼérepa jaʼekuaa upéva? Pórke Jesús oheja vaʼekue ñandéve peteĩ ehémplo ijojahaʼỹva oiko rupi Ñandejára oguerohoryháicha (Juan 8:29). Upéicharõ, jasegíramo Jesús pypore Jehová ñandeguerohorýta avei. Ha ikatu ñaime segúro ñande Ru yvagapegua oñemoag̃uitaha umi oñehaʼãmbaitévare oiko iñamígoramo (Sant. 4:8). w21.04 3 párr. 4-6

Jehová ohecha umi kualida porã jarekóva ha umi mbaʼe ikatúva jajapo, ha haʼe voi ñanemoag̃ui ijehe. Ñande jasegíramo ñandefiél chupe haʼe oĩta ñande ykére pára siémpre (Juan 6:44). Ñande ñaĩramo segúro Jehová ñanderayhuha, jajaposéta opa ikatúva iservísiope, jahasáramo jepe umi mbaʼe ijetuʼúva ñande rekovépe. Péro jadudáramo Ñandejára ojepyʼapyha ñanderehe ‘ndajarekomoʼãi fuérsa’ (Prov. 24:10). Ñañedesanimáramo ha ñapensa Ñandejára nañanderayhuiha, ndaikatumoʼãi ñandepuʼaka Satanásre ñandeataka jave (Efes. 6:16). Oĩ umi ermáno ha ermána oñepyrũ vaʼekue opensa Jehová ndohayhúi ha ndojepyʼapyiha hesekuéra, upéicha rupi ou ijerovia kangy hikuái. ¿Péro mbaʼépa ikatu jajapo ñañepyrũ jave ñapensa upéicha? Pyaʼe porã jaipeʼaite vaʼerã upéva ñane akãgui, ha jajerure Jehovápe tomeʼẽ ñandéve ‘ipyʼaguapy oñangarekótava ñane korasõre ha umi mbaʼe ñapensávare’. Péicha ndajaikomoʼãvéima ñañekevranta umívare (Sal. 139:23; Filip. 4:6, 7). Ha ñanemanduʼa vaʼerã ndahaʼeiha ñande añónte la ñañeñandúva upéicha. w21.04 20 párr. 1; 21 párr. 4-6

¿Mbaʼéichapa oiko rakaʼe ndehegui testígo de Jehová? Primero, oiméne oñeʼẽ vaʼekue ndéve ‘umi notísia porãre’ nde tuakuéra, ne kompañéro de traváho térã de eskuéla, térã ojepredika raʼe ndéve nde rogaitépe voi (Mar. 13:10). Upéi peteĩ persóna oipurúne raʼe heta tiémpo ha oñehaʼãmbaite ostudia nendive la Biblia. Upe estúdio rupive, nde reju rehayhu Jehovápe ha reikuaa haʼe nderayhuha avei. Jehová ningo nemoag̃ui vaʼekue ijehe, ha koʼág̃a nde haʼéma rupi Jesucristo disípulo, ereko la esperánsa eikovévo pára siémpre (Juan 6:44). Katuete nde reagradeseterei Jehovápe omomýi haguére peteĩ ermáno térã ermánape nemboʼe hag̃ua la verda, ha Haʼe ndeasepta haguére isiervorã. Koʼág̃a nde reikuaáma rupi la verda, ereko pe priviléhio reipytyvõvo ótrope oguata hag̃ua avei pe tape oporoguerahávare jeikovépe. Ikatu oime ifásil ndéve epredika hag̃ua umi héntepe, péro ijetuʼu ndéve reofrese térã rejapo hag̃ua peteĩ estúdio bíblico. w21.07 2 párr. 1, 2